𑁨𑁨. 𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁧𑁧) 𑁪. 𑀥𑀫𑁆𑀫𑀸𑀪𑀺𑀲𑀫𑀬𑀓𑀣𑀸

𑁮𑁯𑁭. 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀤𑁂𑀲𑀦𑀸, 𑀥𑀫𑁆𑀫𑀲𑁆𑀲𑀯𑀦𑀁, 𑀥𑀫𑁆𑀫𑀲𑀸𑀓𑀘𑁆𑀙𑀸, 𑀧𑀭𑀺𑀧𑀼𑀘𑁆𑀙𑀸, 𑀲𑀻𑀮𑀲𑀫𑀸𑀤𑀸𑀦𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀤𑁂𑀲𑀦𑀸, 𑀥𑀫𑁆𑀫𑀲𑁆𑀲𑀯𑀦𑀁…𑀧𑁂… 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀤𑁂𑀲𑀦𑀸, 𑀥𑀫𑁆𑀫𑀲𑁆𑀲𑀯𑀦𑀁…𑀧𑁂… 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺.

𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑁋 𑀧𑀭𑀢𑁄 𑀘 𑀖𑁄𑀲𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑁋 𑀧𑀭𑀢𑁄 𑀘 𑀖𑁄𑀲𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺.

𑀅𑀢𑁆𑀣𑀺 𑀕𑀩𑁆𑀪𑀲𑁂𑀬𑁆𑀬𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺? 𑀆𑀫𑀦𑁆𑀢𑀸. 𑀲𑀼𑀢𑁆𑀢𑀲𑁆𑀲 𑀧𑀫𑀢𑁆𑀢𑀲𑁆𑀲 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀥𑀫𑁆𑀫𑀸𑀪𑀺𑀲𑀫𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.