𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁨𑁬𑁯. 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀤𑁂𑀯𑀸 𑀚𑀴𑀸 𑀏𑀮𑀫𑀽𑀕𑀸 [𑀏𑀴𑀫𑀽𑀕𑀸 (𑀲𑁆𑀬𑀸.)] 𑀅𑀯𑀺𑀜𑁆𑀜𑀽 𑀳𑀢𑁆𑀣𑀲𑀁𑀯𑀸𑀘𑀺𑀓𑀸 𑀦𑀧𑁆𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀅𑀢𑁆𑀣𑀫𑀜𑁆𑀜𑀸𑀢𑀼𑀁, 𑀲𑀩𑁆𑀩𑁂 𑀤𑁂𑀯𑀸 𑀦 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀦 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀦 𑀲𑀗𑁆𑀖𑁂 𑀧𑀲𑀦𑁆𑀦𑀸, 𑀦 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀢𑁆𑀢𑀫𑀦𑀸, 𑀲𑀩𑁆𑀩𑁂 𑀤𑁂𑀯𑀸 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀲𑁆𑀲𑀤𑁆𑀥𑀸 𑀅𑀘𑁆𑀙𑀦𑁆𑀤𑀺𑀓𑀸 𑀤𑀼𑀧𑁆𑀧𑀜𑁆𑀜𑀸 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀲𑀩𑁆𑀩𑁂 𑀤𑁂𑀯𑀸 𑀫𑀸𑀢𑀼𑀖𑀸𑀢𑀓𑀸 𑀧𑀺𑀢𑀼𑀖𑀸𑀢𑀓𑀸 𑀅𑀭𑀳𑀦𑁆𑀢𑀖𑀸𑀢𑀓𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀸 𑀲𑀗𑁆𑀖𑀪𑁂𑀤𑀓𑀸, 𑀲𑀩𑁆𑀩𑁂 𑀤𑁂𑀯𑀸 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑁄 𑀫𑀼𑀲𑀸𑀯𑀸𑀤𑀺𑀦𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀸𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄 𑀅𑀪𑀺𑀚𑁆𑀛𑀸𑀮𑀼𑀦𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀅𑀢𑁆𑀣𑀺 𑀤𑁂𑀯𑀸 𑀅𑀚𑀴𑀸 𑀅𑀦𑁂𑀮𑀫𑀽𑀕𑀸 𑀯𑀺𑀜𑁆𑀜𑀽 𑀦 𑀳𑀢𑁆𑀣𑀲𑀁𑀯𑀸𑀘𑀺𑀓𑀸 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀅𑀢𑁆𑀣𑀫𑀜𑁆𑀜𑀸𑀢𑀼𑀁, 𑀅𑀢𑁆𑀣𑀺 𑀤𑁂𑀯𑀸 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸, 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀺 𑀤𑁂𑀯𑀸 𑀦 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀦 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀦 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀤𑁆𑀥𑀸 𑀙𑀦𑁆𑀤𑀺𑀓𑀸 𑀧𑀜𑁆𑀜𑀯𑀦𑁆𑀢𑁄 𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀅𑀢𑁆𑀣𑀺 𑀤𑁂𑀯𑀸 𑀦 𑀫𑀸𑀢𑀼𑀖𑀸𑀢𑀓𑀸 𑀦 𑀧𑀺𑀢𑀼𑀖𑀸𑀢𑀓𑀸 𑀦 𑀅𑀭𑀳𑀦𑁆𑀢𑀖𑀸𑀢𑀓𑀸 𑀦 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀸 𑀦 𑀲𑀗𑁆𑀖𑀪𑁂𑀤𑀓𑀸, 𑀅𑀢𑁆𑀣𑀺 𑀤𑁂𑀯𑀸 𑀦 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀦 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀦 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑁄 𑀦 𑀫𑀼𑀲𑀸𑀯𑀸𑀤𑀺𑀦𑁄 𑀦 𑀧𑀺𑀲𑀼𑀡𑀸𑀯𑀸𑀘𑀸 𑀦 𑀨𑀭𑀼𑀲𑀸𑀯𑀸𑀘𑀸 𑀦 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄 𑀦 𑀅𑀪𑀺𑀚𑁆𑀛𑀸𑀮𑀼𑀦𑁄 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀢𑀺? 𑀆𑀫𑀦𑁆𑀢𑀸.

𑀳𑀜𑁆𑀘𑀺 𑀅𑀢𑁆𑀣𑀺 𑀤𑁂𑀯𑀸 𑀅𑀚𑀴𑀸 𑀅𑀦𑁂𑀮𑀫𑀽𑀕𑀸 𑀯𑀺𑀜𑁆𑀜𑀽 𑀦 𑀳𑀢𑁆𑀣𑀲𑀁𑀯𑀸𑀘𑀺𑀓𑀸 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀅𑀢𑁆𑀣𑀫𑀜𑁆𑀜𑀸𑀢𑀼𑀁…𑀧𑁂… 𑀅𑀢𑁆𑀣𑀺 𑀤𑁂𑀯𑀸 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺.

𑁨𑁭𑁦. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀢𑀢𑁆𑀣 𑀧𑀩𑁆𑀩𑀚𑁆𑀚𑀸 𑀫𑀼𑀡𑁆𑀟𑀺𑀬𑀁 𑀓𑀸𑀲𑀸𑀯𑀥𑀸𑀭𑀡𑀸 𑀧𑀢𑁆𑀢𑀥𑀸𑀭𑀡𑀸, 𑀤𑁂𑀯𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀧𑀩𑁆𑀩𑀚𑁆𑀚𑀸 𑀦𑀢𑁆𑀣𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀅𑀢𑁆𑀣𑀺 𑀧𑀩𑁆𑀩𑀚𑁆𑀚𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀅𑀢𑁆𑀣𑀺 𑀧𑀩𑁆𑀩𑀚𑁆𑀚𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑁄 𑀧𑀩𑁆𑀩𑀚𑀢𑀺 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑁄 𑀦 𑀧𑀩𑁆𑀩𑀚𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀫𑀼𑀡𑁆𑀟𑀺𑀬𑀁 𑀦𑀢𑁆𑀣𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀅𑀢𑁆𑀣𑀺 𑀫𑀼𑀡𑁆𑀟𑀺𑀬𑀁 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀫𑀼𑀡𑁆𑀟𑀺𑀬𑀁 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀅𑀢𑁆𑀣𑀺 𑀫𑀼𑀡𑁆𑀟𑀺𑀬𑀁 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀫𑀼𑀡𑁆𑀟𑀺𑀬𑀁 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑁄 𑀫𑀼𑀡𑁆𑀟𑁄 𑀳𑁄𑀢𑀺 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑁄 𑀫𑀼𑀡𑁆𑀟𑁄 𑀦 𑀳𑁄𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀓𑀸𑀲𑀸𑀯𑀥𑀸𑀭𑀡𑀸 𑀦𑀢𑁆𑀣𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀅𑀢𑁆𑀣𑀺 𑀓𑀸𑀲𑀸𑀯𑀥𑀸𑀭𑀡𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀓𑀸𑀲𑀸𑀯𑀥𑀸𑀭𑀡𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀅𑀢𑁆𑀣𑀺 𑀓𑀸𑀲𑀸𑀯𑀥𑀸𑀭𑀡𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀓𑀸𑀲𑀸𑀯𑀥𑀸𑀭𑀡𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑁄 𑀓𑀸𑀲𑀸𑀯𑀁 𑀥𑀸𑀭𑁂𑀢𑀺 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑁄 𑀓𑀸𑀲𑀸𑀯𑀁 𑀦 𑀥𑀸𑀭𑁂𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀧𑀢𑁆𑀢𑀥𑀸𑀭𑀡𑀸 𑀦𑀢𑁆𑀣𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀅𑀢𑁆𑀣𑀺 𑀧𑀢𑁆𑀢𑀥𑀸𑀭𑀡𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀧𑀢𑁆𑀢𑀥𑀸𑀭𑀡𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀅𑀢𑁆𑀣𑀺 𑀧𑀢𑁆𑀢𑀥𑀸𑀭𑀡𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀦𑀢𑁆𑀣𑀺 𑀧𑀢𑁆𑀢𑀥𑀸𑀭𑀡𑀸 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸? 𑀬𑁄 𑀧𑀢𑁆𑀢𑀁 𑀥𑀸𑀭𑁂𑀢𑀺 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑁄 𑀧𑀢𑁆𑀢𑀁 𑀦 𑀥𑀸𑀭𑁂𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀮𑀼𑀫𑁆𑀩𑀺𑀦𑀺𑀬𑀸 𑀪𑀕𑀯𑀸 𑀚𑀸𑀢𑁄, 𑀩𑁄𑀥𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀩𑀸𑀭𑀸𑀡𑀲𑀺𑀬𑀁 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁; 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀦𑀢𑁆𑀣𑀜𑁆𑀜𑀢𑁆𑀭 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀦𑀢𑁆𑀣𑀜𑁆𑀜𑀢𑁆𑀭 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁂𑀯𑁂𑀲𑀼 𑀲𑀸𑀯𑀓𑀬𑀼𑀕𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺, 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀬𑀢𑁆𑀣 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀲𑀸𑀯𑀓𑀬𑀼𑀕𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀢𑁆𑀣 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀬𑀢𑁆𑀣 𑀲𑀸𑀯𑀓𑀬𑀼𑀕𑀁 𑀦𑀼𑀧𑁆𑀧𑀚𑁆𑀚𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀫𑀕𑀥𑁂𑀲𑀼 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀦𑀢𑁆𑀣𑀜𑁆𑀜𑀢𑁆𑀭 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁭𑁧. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀤𑁂𑀯𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀫𑀦𑀼𑀲𑁆𑀲𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀺𑀮𑀓𑁆𑀔𑁂𑀲𑀼 [𑀫𑀺𑀮𑀓𑁆𑀔𑀽𑀲𑀼 (𑀲𑁆𑀬𑀸. 𑀓.)] 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀻𑀢𑀺. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀲𑀜𑁆𑀜𑀲𑀢𑁆𑀢𑁂𑀲𑀼 [𑀅𑀲𑀜𑁆𑀜𑀲𑀢𑁆𑀢𑁂𑀲𑀼 (𑀓.)] 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀤𑁂𑀯𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀓𑀢𑁆𑀣 𑀅𑀢𑁆𑀣𑀺, 𑀓𑀢𑁆𑀣 𑀦𑀢𑁆𑀣𑀻𑀢𑀺? 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀲𑀜𑁆𑀜𑀲𑀢𑁆𑀢𑁂𑀲𑀼 [𑀅𑀲𑀜𑁆𑀜𑀲𑀢𑁆𑀢𑁂𑀲𑀼 (𑀓.)] 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀲𑀜𑁆𑀜𑀲𑀢𑁆𑀢𑁂𑀲𑀼 [𑀅𑀲𑀜𑁆𑀜𑀲𑀢𑁆𑀢𑁂𑀲𑀼 (𑀓.)] 𑀤𑁂𑀯𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀻𑀢𑀺. 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀺𑀮𑀓𑁆𑀔𑁂𑀲𑀼 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀫𑀦𑀼𑀲𑁆𑀲𑁂𑀲𑀼 𑀅𑀢𑁆𑀣𑀺 𑀬𑀢𑁆𑀣 𑀅𑀢𑁆𑀣𑀺, 𑀅𑀢𑁆𑀣𑀺 𑀬𑀢𑁆𑀣 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀓𑀢𑁆𑀣 𑀅𑀢𑁆𑀣𑀺, 𑀓𑀢𑁆𑀣 𑀦𑀢𑁆𑀣𑀻𑀢𑀺? 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀺𑀮𑀓𑁆𑀔𑁂𑀲𑀼 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺. 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀺𑀮𑀓𑁆𑀔𑁂𑀲𑀼 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀅𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀺𑀮𑀓𑁆𑀔𑁂𑀲𑀼 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂! 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸, 𑀲𑀢𑀺𑀫𑀦𑁆𑀢𑁄, 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 [𑀅. 𑀦𑀺. 𑁯.𑁨𑁧]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺? 𑀆𑀫𑀦𑁆𑀢𑀸. 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑁨𑁭𑁨. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀇𑀢𑁄 𑀘𑀼𑀢𑀲𑁆𑀲 𑀢𑀢𑁆𑀣 𑀉𑀧𑀧𑀦𑁆𑀦𑀲𑁆𑀲 𑀓𑀼𑀳𑀺𑀁 𑀨𑀮𑀼𑀧𑁆𑀧𑀢𑁆𑀢𑀻𑀢𑀺? 𑀢𑀢𑁆𑀣𑁂𑀯. 𑀳𑀜𑁆𑀘𑀺 𑀅𑀦𑀸𑀕𑀸𑀫𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀇𑀢𑁄 𑀘𑀼𑀢𑀲𑁆𑀲 𑀢𑀢𑁆𑀣 𑀉𑀧𑀧𑀦𑁆𑀦𑀲𑁆𑀲 𑀢𑀳𑀺𑀁 𑀨𑀮𑀼𑀧𑁆𑀧𑀢𑁆𑀢𑀺; 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺.

𑀅𑀦𑀸𑀕𑀸𑀫𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀇𑀢𑁄 𑀘𑀼𑀢𑀲𑁆𑀲 𑀢𑀢𑁆𑀣 𑀉𑀧𑀧𑀦𑁆𑀦𑀲𑁆𑀲 𑀓𑀼𑀳𑀺𑀁 𑀪𑀸𑀭𑁄𑀳𑀭𑀡𑀁, 𑀓𑀼𑀳𑀺𑀁 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀢𑀁, 𑀓𑀼𑀳𑀺𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀓𑀼𑀳𑀺𑀁 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸, 𑀓𑀼𑀳𑀺𑀁 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑁄𑀢𑀺? 𑀢𑀢𑁆𑀣𑁂𑀯. 𑀳𑀜𑁆𑀘𑀺 𑀅𑀦𑀸𑀕𑀸𑀫𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀇𑀢𑁄 𑀘𑀼𑀢𑀲𑁆𑀲 𑀢𑀢𑁆𑀣 𑀉𑀧𑀧𑀦𑁆𑀦𑀲𑁆𑀲 𑀢𑀳𑀺𑀁 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑁄; 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺.

𑀅𑀦𑀸𑀕𑀸𑀫𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀇𑀢𑁄 𑀘𑀼𑀢𑀲𑁆𑀲 𑀢𑀢𑁆𑀣 𑀉𑀧𑀧𑀦𑁆𑀦𑀲𑁆𑀲 𑀢𑀳𑀺𑀁 𑀨𑀮𑀼𑀧𑁆𑀧𑀢𑁆𑀢𑀺, 𑀢𑀳𑀺𑀁 𑀪𑀸𑀭𑁄𑀳𑀭𑀡𑀁, 𑀢𑀳𑀺𑀁 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀢𑀁, 𑀢𑀳𑀺𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀢𑀳𑀺𑀁 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸, 𑀢𑀳𑀺𑀁 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑁄; 𑀓𑁂𑀦𑀝𑁆𑀞𑁂𑀦 𑀯𑀤𑁂𑀲𑀺 𑁋 ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺? 𑀳𑀦𑁆𑀤 𑀳𑀺 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 [𑀲𑀘𑁆𑀙𑀺𑀓𑀭𑁄𑀢𑀺 (𑀩𑀳𑀽𑀲𑀼)].

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁨𑁭𑁩. 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀇𑀥 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀓𑀤𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀺𑀧𑀼𑀕𑁆𑀕𑀮𑁄 [𑀇𑀥𑀧𑀭𑀺𑀦𑀺𑀩𑁆𑀩𑀸𑀬𑀻 (?)] 𑀢𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀇𑀥 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀇𑀥 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀲𑀓𑀤𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀺𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀇𑀥 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀦 𑀘 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀦 𑀘 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀦 𑀘 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲…𑀧𑁂… 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀦 𑀘 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀓𑀺𑀮𑁂𑀲𑀸 𑀘 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀓𑀺𑀮𑁂𑀲𑀸 𑀘 𑀧𑀳𑀻𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲…𑀧𑁂… 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀓𑀺𑀮𑁂𑀲𑀸 𑀘 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀫𑀕𑁆𑀕𑁄 𑀘 𑀪𑀸𑀯𑀻𑀬𑀢𑀺, 𑀓𑀺𑀮𑁂𑀲𑀸 𑀘 𑀧𑀳𑀻𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄 𑀪𑀸𑀯𑀺𑀢𑀪𑀸𑀯𑀦𑁄 𑀢𑀢𑁆𑀣 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀉𑀧𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀭𑀳𑀸 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀦𑀩𑁆𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀦𑀩𑁆𑀪𑀯𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀪𑀯𑁂𑀦 𑀪𑀯𑀁 𑀕𑀘𑁆𑀙𑀢𑀺, 𑀕𑀢𑀺𑀬𑀸 𑀕𑀢𑀺𑀁 𑀕𑀘𑁆𑀙𑀢𑀺, 𑀲𑀁𑀲𑀸𑀭𑁂𑀦 𑀲𑀁𑀲𑀸𑀭𑀁 𑀕𑀘𑁆𑀙𑀢𑀺, 𑀉𑀧𑀧𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄 𑀪𑀸𑀯𑀺𑀢𑀪𑀸𑀯𑀦𑁄 𑀅𑀦𑁄𑀳𑀝𑀪𑀸𑀭𑁄 𑀢𑀢𑁆𑀣 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀪𑀸𑀭𑁄𑀳𑀭𑀡𑀸𑀬 𑀧𑀼𑀦 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄 𑀪𑀸𑀯𑀺𑀢𑀪𑀸𑀯𑀦𑁄 𑀅𑀧𑀭𑀺𑀜𑁆𑀜𑀸𑀢𑀤𑀼𑀓𑁆𑀔𑁄 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑁄 𑀅𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀢𑀢𑁆𑀣 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑀸𑀬 𑀧𑀼𑀦 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄 𑀪𑀸𑀯𑀺𑀢𑀪𑀸𑀯𑀦𑁄 𑀅𑀦𑁄𑀳𑀝𑀪𑀸𑀭𑁄 𑀢𑀢𑁆𑀣 𑀉𑀧𑀧𑀚𑁆𑀚𑀢𑀺, 𑀦 𑀘 𑀪𑀸𑀭𑁄𑀳𑀭𑀡𑀸𑀬 𑀧𑀼𑀦 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀦𑁄𑀳𑀝𑀪𑀸𑀭𑁄 𑀘 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀓𑀢𑀓𑀭𑀡𑀻𑀬𑁄 𑀪𑀸𑀯𑀺𑀢𑀪𑀸𑀯𑀦𑁄 𑀅𑀧𑀭𑀺𑀜𑁆𑀜𑀸𑀢𑀤𑀼𑀓𑁆𑀔𑁄 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑁄 𑀅𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀢𑀢𑁆𑀣 𑀉𑀧𑀧𑀚𑁆𑀚𑀢𑀺, 𑀦 𑀘 𑀅𑀓𑀼𑀧𑁆𑀧𑀧𑀝𑀺𑀯𑁂𑀥𑀸𑀬 𑀧𑀼𑀦 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀧𑁆𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀘 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀬𑀣𑀸 𑀫𑀺𑀕𑁄 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺.

𑀬𑀣𑀸 𑀫𑀺𑀕𑁄 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀲𑀮𑁆𑀮𑁄𑀯 𑀓𑀸𑀮𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀇𑀥 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀲𑀲𑀮𑁆𑀮𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀑𑀥𑀺𑀲𑁄𑀓𑀣𑀸

𑁨𑁭𑁪. 𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑁄 [𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄 (?)] 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀓𑁄𑀮𑀗𑁆𑀓𑁄𑀮𑁄, 𑀏𑀓𑀩𑀻𑀚𑀻, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀚𑀳𑀢𑀺, 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄…𑀧𑁂… 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄…𑀧𑁂… 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀕𑁆𑀕𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀓𑁄𑀮𑀗𑁆𑀓𑁄𑀮𑁄, 𑀏𑀓𑀩𑀻𑀚𑀻, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁭𑁫. 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀚𑀳𑀢𑀺, 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 [𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄 (?)] 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀚𑀳𑀢𑀺, 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀺, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀕𑁆𑀕𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀺, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁭𑁬. 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀚𑀳𑀢𑀺, 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 [𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄 (?)] 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀚𑀳𑀢𑀺, 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀅𑀦𑀸𑀕𑀸𑀫𑀻…𑀧𑁂… 𑀏𑀓𑀤𑁂𑀲𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀺, 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀅𑀦𑀸𑀕𑀸𑀫𑀻…𑀧𑁂… 𑀏𑀓𑀤𑁂𑀲𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀕𑁆𑀕𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁭𑁭. 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀭𑀽𑀧𑀭𑀸𑀕𑀁 𑀅𑀭𑀽𑀧𑀭𑀸𑀕𑀁 𑀫𑀸𑀦𑀁 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀭𑀳𑀸, 𑀏𑀓𑀤𑁂𑀲𑀁 𑀦 𑀅𑀭𑀳𑀸, 𑀏𑀓𑀤𑁂𑀲𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 [𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 (?)] 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀲𑀗𑁆𑀓𑀺𑀡𑁆𑀡𑀧𑀭𑀺𑀔𑁄 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀲𑀼𑀯𑀺𑀚𑀺𑀢𑀯𑀺𑀚𑀬𑁄, 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, (𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁,) [( ) (?)] 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀭𑀽𑀧𑀭𑀸𑀕𑀁 𑀅𑀭𑀽𑀧𑀭𑀸𑀕𑀁 𑀚𑀳𑀢𑀺, 𑀫𑀸𑀦𑀁 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀭𑀳𑀸, 𑀏𑀓𑀤𑁂𑀲𑀁 𑀦 𑀅𑀭𑀳𑀸…𑀧𑁂… 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀫𑀸𑀦𑀁 𑀚𑀳𑀢𑀺, 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀏𑀓𑀤𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀭𑀳𑀸, 𑀏𑀓𑀤𑁂𑀲𑀁 𑀦 𑀅𑀭𑀳𑀸 …𑀧𑁂… 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀕𑁆𑀕𑀤𑀲𑁆𑀲𑀦𑁂𑀦 𑀓𑀺𑀁 𑀚𑀳𑀢𑀻𑀢𑀺? 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀁 𑀢𑀤𑁂𑀓𑀝𑁆𑀞𑁂 𑀘 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺. 𑀏𑀓𑀤𑁂𑀲𑀁 𑀅𑀭𑀳𑀸, 𑀏𑀓𑀤𑁂𑀲𑀁 𑀦 𑀅𑀭𑀳𑀸, 𑀏𑀓𑀤𑁂𑀲𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀲𑀗𑁆𑀓𑀺𑀡𑁆𑀡𑀧𑀭𑀺𑀔𑁄 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀲𑀼𑀯𑀺𑀚𑀺𑀢𑀯𑀺𑀚𑀬𑁄, 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁭𑁮. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀅𑀦𑀼𑀧𑀼𑀩𑁆𑀩𑁂𑀦 𑀫𑁂𑀥𑀸𑀯𑀻, 𑀣𑁄𑀓𑀁 𑀣𑁄𑀓𑀁 𑀔𑀡𑁂 𑀔𑀡𑁂;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄’’𑀢𑀺 [𑀥. 𑀧. 𑁨𑁩𑁯 𑀥𑀫𑁆𑀫𑀧𑀤𑁂].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺.

𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀲𑀳𑀸𑀯𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀤𑀸𑀬,

𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺;

𑀲𑀓𑁆𑀓𑀸𑀬𑀤𑀺𑀝𑁆𑀞𑀻 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘,

𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺;

𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄,

𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩 [𑀅𑀪𑀩𑁆𑀩𑁄 (𑀲𑀻. 𑀲𑁆𑀬𑀸.)] 𑀓𑀸𑀢𑀼’’𑀦𑁆𑀢𑀺 [𑀔𑀼. 𑀧𑀸. 𑁬.𑁧𑁦; 𑀲𑀼. 𑀦𑀺. 𑁨𑁩𑁩].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺.

𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺, 𑀲𑀳 𑀤𑀲𑁆𑀲𑀦𑀼𑀧𑁆𑀧𑀸𑀤𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄’’𑀢𑀺 [𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀑𑀥𑀺𑀲𑁄𑀥𑀺𑀲𑁄 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺.

𑀑𑀥𑀺𑀲𑁄𑀓𑀣𑀸 𑀦𑀺𑀝𑁆𑀞𑀺𑀢𑀸.