𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁦) 𑁧. 𑀲𑀸𑀲𑀦𑀓𑀣𑀸

𑁮𑁭𑁮. 𑀲𑀸𑀲𑀦𑀁 𑀦𑀯𑀁 𑀓𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀢𑀺𑀧𑀝𑁆𑀞𑀸𑀦𑀸 𑀦𑀯𑀁 𑀓𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀲𑀦𑀁 𑀦𑀯𑀁 𑀓𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀫𑁆𑀫𑀧𑁆𑀧𑀥𑀸𑀦𑀸…𑀧𑁂… 𑀇𑀤𑁆𑀥𑀺𑀧𑀸𑀤𑀸…𑀧𑁂… 𑀇𑀦𑁆𑀤𑁆𑀭𑀺𑀬𑀸…𑀧𑁂… 𑀩𑀮𑀸…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀦𑀯𑀁 𑀓𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀩𑁆𑀩𑁂 𑀅𑀓𑀼𑀲𑀮𑀁 𑀧𑀘𑁆𑀙𑀸 𑀓𑀼𑀲𑀮𑀁 𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀩𑁆𑀩𑁂 𑀲𑀸𑀲𑀯𑀁…𑀧𑁂… 𑀲𑀁𑀬𑁄𑀚𑀦𑀺𑀬𑀁 𑀕𑀦𑁆𑀣𑀦𑀺𑀬𑀁 𑀑𑀖𑀦𑀺𑀬𑀁 𑀬𑁄𑀕𑀦𑀺𑀬𑀁 𑀦𑀻𑀯𑀭𑀡𑀺𑀬𑀁 𑀧𑀭𑀸𑀫𑀝𑁆𑀞𑀁 𑀉𑀧𑀸𑀤𑀸𑀦𑀺𑀬𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀓𑀁 𑀧𑀘𑁆𑀙𑀸 𑀅𑀲𑀁𑀓𑀺𑀮𑁂𑀲𑀺𑀓𑀁 𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀦𑀯𑀁 𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀲𑀢𑀺𑀧𑀝𑁆𑀞𑀸𑀦𑁂 𑀦𑀯𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑁄𑀘𑀺 𑀲𑀫𑁆𑀫𑀧𑁆𑀧𑀥𑀸𑀦𑁂…𑀧𑁂… 𑀇𑀤𑁆𑀥𑀺𑀧𑀸𑀤𑁂…𑀧𑁂… 𑀇𑀦𑁆𑀤𑁆𑀭𑀺𑀬𑁂…𑀧𑁂… 𑀩𑀮𑁂…𑀧𑁂… 𑀩𑁄𑀚𑁆𑀛𑀗𑁆𑀕𑁂 𑀦𑀯𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑁄𑀘𑀺 𑀧𑀼𑀩𑁆𑀩𑁂 𑀅𑀓𑀼𑀲𑀮𑀁 𑀧𑀘𑁆𑀙𑀸 𑀓𑀼𑀲𑀮𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑁄𑀘𑀺 𑀧𑀼𑀩𑁆𑀩𑁂 𑀲𑀸𑀲𑀯𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀓𑀁 𑀧𑀘𑁆𑀙𑀸 𑀅𑀲𑀁𑀓𑀺𑀮𑁂𑀲𑀺𑀬𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀮𑀩𑁆𑀪𑀸 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀧𑀼𑀦 𑀦𑀯𑀁 𑀓𑀸𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑀩𑁆𑀪𑀸 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀦 𑀦𑀯𑀁 𑀓𑀸𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀮𑀩𑁆𑀪𑀸 𑀲𑀫𑁆𑀫𑀧𑁆𑀧𑀥𑀸𑀦𑀸…𑀧𑁂… 𑀇𑀤𑁆𑀥𑀺𑀧𑀸𑀤𑀸…𑀧𑁂… 𑀇𑀦𑁆𑀤𑁆𑀭𑀺𑀬𑀸…𑀧𑁂… 𑀩𑀮𑀸…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀧𑀼𑀦 𑀦𑀯𑀁 𑀓𑀸𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀮𑀩𑁆𑀪𑀸 𑀧𑀼𑀩𑁆𑀩𑁂 𑀅𑀓𑀼𑀲𑀮𑀁 𑀧𑀘𑁆𑀙𑀸 𑀓𑀼𑀲𑀮𑀁 𑀓𑀸𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀮𑀩𑁆𑀪𑀸 𑀧𑀼𑀩𑁆𑀩𑁂 𑀲𑀸𑀲𑀯𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀬𑀁 𑀧𑀘𑁆𑀙𑀸 𑀅𑀲𑀁𑀓𑀺𑀮𑁂𑀲𑀺𑀬𑀁 𑀓𑀸𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀸𑀲𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁧) 𑁨. 𑀅𑀯𑀺𑀯𑀺𑀢𑁆𑀢𑀓𑀣𑀸

𑁮𑁭𑁯. 𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀨𑀲𑁆𑀲𑁂𑀳𑀺…𑀧𑁂… 𑀢𑁂𑀥𑀸𑀢𑀼𑀓𑀸𑀳𑀺 𑀯𑁂𑀤𑀦𑀸𑀳𑀺… 𑀲𑀜𑁆𑀜𑀸𑀳𑀺 … 𑀘𑁂𑀢𑀦𑀸𑀳𑀺… 𑀘𑀺𑀢𑁆𑀢𑁂𑀳𑀺… 𑀲𑀤𑁆𑀥𑀸𑀳𑀺… 𑀯𑀻𑀭𑀺𑀬𑁂𑀳𑀺… 𑀲𑀢𑀻𑀳𑀺… 𑀲𑀫𑀸𑀥𑀻𑀳𑀺…𑀧𑁂… 𑀢𑁂𑀥𑀸𑀢𑀼𑀓𑀸𑀳𑀺 𑀧𑀜𑁆𑀜𑀸𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀫𑀺𑀁 𑀔𑀡𑁂 𑀧𑀼𑀣𑀼𑀚𑁆𑀚𑀦𑁄 𑀘𑀻𑀯𑀭𑀁 𑀤𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀬𑀲𑁆𑀫𑀺𑀁 𑀔𑀡𑁂 𑀧𑀼𑀣𑀼𑀚𑁆𑀚𑀦𑁄 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺…𑀧𑁂… 𑀲𑁂𑀦𑀸𑀲𑀦𑀁 𑀤𑁂𑀢𑀺…𑀧𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁮𑁦. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄’’𑀢𑀺? 𑀆𑀫𑀦𑁆𑀢𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀽𑀧𑀕𑀁 𑀓𑀫𑁆𑀫𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺…𑀧𑁂….

𑀅𑀯𑀺𑀯𑀺𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁨) 𑁩. 𑀲𑀁𑀬𑁄𑀚𑀦𑀓𑀣𑀸

𑁮𑁮𑁧. 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀅𑀧𑁆𑀧𑀳𑀸𑀬…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀁 𑀅𑀧𑁆𑀧𑀳𑀸𑀬…𑀧𑁂… 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀅𑀧𑁆𑀧𑀳𑀸𑀬… 𑀭𑀸𑀕𑀁 𑀅𑀧𑁆𑀧𑀳𑀸𑀬… 𑀤𑁄𑀲𑀁 𑀅𑀧𑁆𑀧𑀳𑀸𑀬… 𑀫𑁄𑀳𑀁 𑀅𑀧𑁆𑀧𑀳𑀸𑀬… 𑀅𑀦𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀫𑀸𑀦𑁄 𑀲𑀫𑀓𑁆𑀔𑁄 𑀲𑀧𑀴𑀸𑀲𑁄 𑀲𑀉𑀧𑀸𑀬𑀸𑀲𑁄 𑀲𑀓𑀺𑀮𑁂𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀭𑀳𑀸 𑀦𑀺𑀭𑀸𑀕𑁄 𑀦𑀺𑀤𑁆𑀤𑁄𑀲𑁄 𑀦𑀺𑀫𑁆𑀫𑁄𑀳𑁄 𑀦𑀺𑀫𑁆𑀫𑀸𑀦𑁄 𑀦𑀺𑀫𑁆𑀫𑀓𑁆𑀔𑁄 𑀦𑀺𑀧𑁆𑀧𑀴𑀸𑀲𑁄 𑀦𑀺𑀭𑀼𑀧𑀸𑀬𑀸𑀲𑁄 𑀦𑀺𑀓𑁆𑀓𑀺𑀮𑁂𑀲𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀸 𑀦𑀺𑀭𑀸𑀕𑁄…𑀧𑁂… 𑀦𑀺𑀓𑁆𑀓𑀺𑀮𑁂𑀲𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻’’𑀢𑀺.

𑁮𑁮𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻’’𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀲𑀩𑁆𑀩𑀁 𑀩𑀼𑀤𑁆𑀥𑀯𑀺𑀲𑀬𑀁 𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺.

𑀲𑀁𑀬𑁄𑀚𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁩) 𑁪. 𑀇𑀤𑁆𑀥𑀺𑀓𑀣𑀸

𑁮𑁮𑁩. 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀆𑀫𑀦𑁆𑀢𑀸. ‘‘𑀦𑀺𑀘𑁆𑀘𑀧𑀡𑁆𑀡𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀽’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀺𑀘𑁆𑀘𑀧𑀼𑀧𑁆𑀨𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀼…𑀧𑁂… 𑀦𑀺𑀘𑁆𑀘𑀨𑀮𑀺𑀓𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀼… 𑀦𑀺𑀘𑁆𑀘𑀁 𑀚𑀼𑀡𑁆𑀳𑀁 𑀳𑁄𑀢𑀼… 𑀦𑀺𑀘𑁆𑀘𑀁 𑀔𑁂𑀫𑀁 𑀳𑁄𑀢𑀼… 𑀦𑀺𑀘𑁆𑀘𑀁 𑀲𑀼𑀪𑀺𑀓𑁆𑀔𑀁 𑀳𑁄𑀢𑀼… ‘‘𑀦𑀺𑀘𑁆𑀘𑀁 𑀲𑀼𑀯𑀢𑁆𑀣𑀺 [𑀲𑀼𑀯𑀼𑀝𑁆𑀞𑀺𑀓𑀁 (𑀲𑁆𑀬𑀸.)] 𑀳𑁄𑀢𑀽’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀆𑀫𑀦𑁆𑀢𑀸. ‘‘𑀉𑀧𑁆𑀧𑀦𑁆𑀦𑁄 𑀨𑀲𑁆𑀲𑁄 𑀫𑀸 𑀦𑀺𑀭𑀼𑀚𑁆𑀛𑀻’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀘𑁂𑀢𑀦𑀸… 𑀘𑀺𑀢𑁆𑀢𑀁… 𑀲𑀤𑁆𑀥𑀸… 𑀯𑀻𑀭𑀺𑀬𑀁… 𑀲𑀢𑀺… 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸 𑀫𑀸 𑀦𑀺𑀭𑀼𑀚𑁆𑀛𑀻𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀆𑀫𑀦𑁆𑀢𑀸. ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀳𑁄𑀢𑀽’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺… 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… ‘‘𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀳𑁄𑀢𑀽’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀆𑀫𑀦𑁆𑀢𑀸. ‘‘𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀚𑀸𑀬𑀺𑀁𑀲𑀽’’𑀢𑀺 𑀅𑀢𑁆𑀣𑀺…𑀧𑁂… ‘‘𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀚𑀻𑀭𑀺𑀁𑀲𑀽’’𑀢𑀺…𑀧𑁂… ‘‘𑀩𑁆𑀬𑀸𑀥𑀺𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀩𑁆𑀬𑀸𑀥𑀺𑀬𑀺𑀁𑀲𑀽’’𑀢𑀺…𑀧𑁂… ‘‘𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀫𑀻𑀬𑀺𑀁𑀲𑀽’’𑀢𑀺 𑁋 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁮𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀸𑀲𑀸𑀤𑀁 ‘‘𑀲𑀼𑀯𑀡𑁆𑀡’’𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑀺, 𑀲𑀼𑀯𑀡𑁆𑀡𑁄 𑀘 𑀧𑀦 𑀆𑀲𑀻𑀢𑀺 [𑀧𑀸𑀭𑀸. 𑁬𑁨𑁧; 𑀫𑀳𑀸𑀯. 𑁨𑁭𑁧]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀸𑀲𑀸𑀤𑀁 𑀲𑀼𑀯𑀡𑁆𑀡𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑀺, 𑀲𑀼𑀯𑀡𑁆𑀡𑁄 𑀘 𑀧𑀦 𑀆𑀲𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸’’𑀢𑀺.

𑀇𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁪) 𑁫. 𑀩𑀼𑀤𑁆𑀥𑀓𑀣𑀸

𑁮𑁮𑁫. 𑀅𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑁂𑀳𑀺 𑀳𑀻𑀦𑀸𑀢𑀺𑀭𑁂𑀓𑀢𑀸𑀢𑀺? 𑀆𑀫𑀦𑁆𑀢𑀸. 𑀲𑀢𑀺𑀧𑀝𑁆𑀞𑀸𑀦𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀲𑀫𑁆𑀫𑀧𑁆𑀧𑀥𑀸𑀦𑀢𑁄…𑀧𑁂… 𑀇𑀤𑁆𑀥𑀺𑀧𑀸𑀤𑀢𑁄… 𑀇𑀦𑁆𑀤𑁆𑀭𑀺𑀬𑀢𑁄… 𑀩𑀮𑀢𑁄… 𑀩𑁄𑀚𑁆𑀛𑀗𑁆𑀕𑀢𑁄… 𑀯𑀲𑀺𑀪𑀸𑀯𑀢𑁄…𑀧𑁂… 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀤𑀲𑁆𑀲𑀦𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀩𑀼𑀤𑁆𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁫) 𑁬. 𑀲𑀩𑁆𑀩𑀤𑀺𑀲𑀸𑀓𑀣𑀸

𑁮𑁮𑁬. 𑀲𑀩𑁆𑀩𑀸 𑀤𑀺𑀲𑀸 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀆𑀫𑀦𑁆𑀢𑀸. 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸, 𑀓𑀺𑀁𑀚𑀘𑁆𑀘𑁄, 𑀓𑀺𑀁𑀕𑁄𑀢𑁆𑀢𑁄, 𑀓𑀺𑀦𑁆𑀦𑀸𑀫𑀸 𑀢𑀲𑁆𑀲 𑀪𑀕𑀯𑀢𑁄 𑀫𑀸𑀢𑀸𑀧𑀺𑀢𑀭𑁄, 𑀓𑀺𑀦𑁆𑀦𑀸𑀫𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀬𑀼𑀕𑀁, 𑀓𑁄𑀦𑀸𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄, 𑀓𑀻𑀤𑀺𑀲𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀓𑀻𑀤𑀺𑀲𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺, 𑀓𑀢𑀭𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸 𑀭𑀝𑁆𑀞𑁂 𑀯𑀸 𑀚𑀦𑀧𑀤𑁂 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬…𑀧𑁂… 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬…𑀧𑁂… 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬…𑀧𑁂… 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀆𑀫𑀦𑁆𑀢𑀸. 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸…𑀧𑁂… 𑀚𑀦𑀧𑀤𑁂 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀩𑀼𑀤𑁆𑀥𑁄 𑀢𑀺𑀝𑁆𑀞𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀢𑀺𑀝𑁆𑀞𑀢𑀺…𑀧𑁂… 𑀢𑀸𑀯𑀢𑀺𑀁𑀲𑁂 𑀢𑀺𑀝𑁆𑀞𑀢𑀺…𑀧𑁂… 𑀬𑀸𑀫𑁂 𑀢𑀺𑀝𑁆𑀞𑀢𑀺…𑀧𑁂… 𑀢𑀼𑀲𑀺𑀢𑁂 𑀢𑀺𑀝𑁆𑀞𑀢𑀺…𑀧𑁂… 𑀦𑀺𑀫𑁆𑀫𑀸𑀦𑀭𑀢𑀺𑀬𑀸 𑀢𑀺𑀝𑁆𑀞𑀢𑀺…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀬𑀸 𑀢𑀺𑀝𑁆𑀞𑀢𑀺…𑀧𑁂… 𑀩𑁆𑀭𑀳𑁆𑀫𑀮𑁄𑀓𑁂 𑀢𑀺𑀝𑁆𑀞𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑀤𑀺𑀲𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁬) 𑁭. 𑀥𑀫𑁆𑀫𑀓𑀣𑀸

𑁮𑁮𑁭. 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸’’𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀬𑁄 𑀭𑀸𑀲𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺 [𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁫]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀬𑁄 𑀭𑀸𑀲𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸’’𑀢𑀺.

𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁮𑁮. 𑀦 𑀯𑀢𑁆𑀢𑀩𑁆𑀩𑀁 𑁋 𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀁…𑀧𑁂… 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀯𑁂𑀤𑀦𑀸 𑀳𑁄𑀢𑀺…𑀧𑁂… 𑀲𑀜𑁆𑀜𑀸 𑀳𑁄𑀢𑀺… 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀺… 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺… 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀳𑁄𑀢𑀺…𑀧𑁂… 𑀯𑁂𑀤𑀦𑀸 𑀳𑁄𑀢𑀺… 𑀲𑀜𑁆𑀜𑀸 𑀳𑁄𑀢𑀺… 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀁, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺.

𑀥𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁦𑁭) 𑁮. 𑀓𑀫𑁆𑀫𑀓𑀣𑀸

𑁮𑁮𑁯. 𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀅𑀦𑀺𑀬𑀢𑁄 𑀭𑀸𑀲𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸’’𑀢𑀺.

𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀬𑁄 𑀭𑀸𑀲𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀬𑁄 𑀭𑀸𑀲𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸’’𑀢𑀺.

𑁮𑁯𑁦. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀓𑀫𑁆𑀫𑀁…𑀧𑁂… 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀫𑁆𑀫𑀢𑁆𑀢𑀦𑀺𑀬𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁯𑁧. 𑀦 𑀯𑀢𑁆𑀢𑀩𑁆𑀩𑀁 𑁋 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀁, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀓𑀫𑁆𑀫𑀁…𑀧𑁂… 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀳𑁄𑀢𑀺…𑀧𑁂… 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀳𑁄𑀢𑀺…𑀧𑁂… 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀁, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀓𑀫𑁆𑀫𑀁…𑀧𑁂… 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺.

𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀸𑀲𑀦𑀁 𑀦𑀯𑀁 𑀓𑀢𑀁 𑀅𑀢𑁆𑀣𑀺 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀦𑀯𑀁 𑀓𑀭𑁄𑀢𑀺 𑀮𑀩𑁆𑀪𑀸 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀧𑀼𑀦 𑀦𑀯𑀁 𑀓𑀸𑀢𑀼𑀁, 𑀧𑀼𑀣𑀼𑀚𑁆𑀚𑀦𑁄 𑀢𑁂𑀥𑀸𑀢𑀼𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄, 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀺𑀤𑁆𑀥𑀺 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀸𑀯𑀓𑀸𑀦𑀁 𑀯𑀸, 𑀅𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑁂𑀳𑀺 𑀳𑀻𑀦𑀸𑀢𑀺𑀭𑁂𑀓𑀢𑀸, 𑀲𑀩𑁆𑀩𑀸 𑀤𑀺𑀲𑀸 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀺, 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀬𑀢𑀸, 𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸𑀢𑀺.