𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

(𑁧𑁭𑁨) 𑁭. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸

𑁭𑁯𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀬𑀼𑀕𑀸 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀬𑀼𑀕𑀸 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀤𑀓𑁆𑀔𑀺𑀡𑀁 𑀆𑀭𑀸𑀥𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀤𑀓𑁆𑀔𑀺𑀡𑀁 𑀆𑀭𑀸𑀥𑁂𑀦𑁆𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺.

𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀖𑀲𑁆𑀲 𑀘𑀻𑀯𑀭𑀁 𑀤𑀢𑁆𑀯𑀸…𑀧𑁂… 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸…𑀧𑁂… 𑀲𑁂𑀦𑀸𑀲𑀦𑀁 𑀤𑀢𑁆𑀯𑀸… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑀢𑁆𑀯𑀸… 𑀔𑀸𑀤𑀦𑀻𑀬𑀁 𑀤𑀢𑁆𑀯𑀸… 𑀪𑁄𑀚𑀦𑀻𑀬𑀁 𑀤𑀢𑁆𑀯𑀸…𑀧𑁂… 𑀧𑀸𑀦𑀻𑀬𑀁 𑀤𑀢𑁆𑀯𑀸 𑀤𑀓𑁆𑀔𑀺𑀡𑀁 𑀆𑀭𑀸𑀥𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀖𑀲𑁆𑀲 𑀧𑀸𑀦𑀻𑀬𑀁 𑀤𑀢𑁆𑀯𑀸 𑀤𑀓𑁆𑀔𑀺𑀡𑀁 𑀆𑀭𑀸𑀥𑁂𑀦𑁆𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺.

𑁭𑁯𑁪. 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀯𑀺𑀲𑁄𑀥𑁂𑀢𑀺, 𑀨𑀮𑀁 𑀯𑀺𑀲𑁄𑀥𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.