𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

(𑁧𑁬𑁭) 𑁨. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸

𑁭𑁮𑁦. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺? 𑀆𑀫𑀦𑁆𑀢𑀸. 𑀬𑁄 𑀅𑀭𑀳𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀅𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺? 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺. 𑀳𑀜𑁆𑀘𑀺 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽’’𑀢𑀺. 𑀅𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺, 𑀦𑀢𑁆𑀣𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁮𑁧. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁄 𑀓𑀸𑀬𑁂 𑀯𑀺𑀲𑀁 𑀦 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀦 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀦 𑀓𑀫𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀭𑀳𑀢𑁄 𑀓𑀸𑀬𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀓𑀸𑀬𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽’’𑀢𑀺.

𑀅𑀭𑀳𑀢𑁄 𑀓𑀸𑀬𑁂 𑀯𑀺𑀲𑀁 𑀦 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀦 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀦 𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁮𑁨. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺; 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑀁 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺.

𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.