𑁧𑁬. 𑀲𑁄𑀴𑀲𑀫𑀯𑀕𑁆𑀕𑁄

(𑁧𑁬𑁫) 𑁧𑁦. 𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀓𑀣𑀸

𑁭𑁭𑁧. 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀉𑀧𑀧𑀢𑁆𑀢𑁂𑀲𑀺𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀦 𑀘𑀺𑀢𑁆𑀢𑁂𑀦 𑀲𑀳𑀕𑀢𑁄 𑀲𑀳𑀚𑀸𑀢𑁄 𑀲𑀁𑀲𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁄 𑀏𑀓𑀦𑀺𑀭𑁄𑀥𑁄 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀦 𑀉𑀧𑀧𑀢𑁆𑀢𑁂𑀲𑀺𑀬𑁄 𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦…𑀧𑁂… 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀦 𑀉𑀧𑀧𑀢𑁆𑀢𑁂𑀲𑀺𑀬𑁄 𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦…𑀧𑁂… 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺.

𑁭𑁭𑁨. 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀲𑀤𑁆𑀤𑀭𑀸𑀕𑁄 𑀲𑀤𑁆𑀤𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀕𑀦𑁆𑀥𑀭𑀸𑀕𑁄…𑀧𑁂… 𑀭𑀲𑀭𑀸𑀕𑁄…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀸𑀕𑁄 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀤𑁆𑀤𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀤𑁆𑀤𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀕𑀦𑁆𑀥𑀭𑀸𑀕𑁄…𑀧𑁂… 𑀭𑀲𑀭𑀸𑀕𑁄…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁭𑁩. 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀽𑀧𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀉𑀧𑀧𑀢𑁆𑀢𑁂𑀲𑀺𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀦 𑀘𑀺𑀢𑁆𑀢𑁂𑀦 𑀲𑀳𑀕𑀢𑁄 𑀲𑀳𑀚𑀸𑀢𑁄 𑀲𑀁𑀲𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁄 𑀏𑀓𑀦𑀺𑀭𑁄𑀥𑁄 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀦 𑀉𑀧𑀧𑀢𑁆𑀢𑁂𑀲𑀺𑀬𑁄 𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦…𑀧𑁂… 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁄 𑀦 𑀉𑀧𑀧𑀢𑁆𑀢𑁂𑀲𑀺𑀬𑁄 𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄, 𑀦 𑀲𑀫𑀸𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀦 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀦 𑀘𑀺𑀢𑁆𑀢𑁂𑀦 𑀲𑀳𑀕𑀢𑁄 𑀲𑀳𑀚𑀸𑀢𑁄 𑀲𑀁𑀲𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁄 𑀏𑀓𑀦𑀺𑀭𑁄𑀥𑁄 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺.

𑁭𑁭𑁪. 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀲𑀤𑁆𑀤𑀭𑀸𑀕𑁄 𑀲𑀤𑁆𑀤𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀕𑀦𑁆𑀥𑀭𑀸𑀕𑁄…𑀧𑁂… 𑀭𑀲𑀭𑀸𑀕𑁄…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀸𑀕𑁄 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀤𑁆𑀤𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀤𑁆𑀤𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀅𑀭𑀽𑀧𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀕𑀦𑁆𑀥𑀭𑀸𑀕𑁄…𑀧𑁂… 𑀭𑀲𑀭𑀸𑀕𑁄…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀅𑀭𑀽𑀧𑀭𑀸𑀕𑁄 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁭𑁫. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺.

𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀘𑀺𑀢𑁆𑀢𑀦𑀺𑀕𑁆𑀕𑀳𑁄, 𑀘𑀺𑀢𑁆𑀢𑀧𑀕𑁆𑀕𑀳𑁄, 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀁, 𑀅𑀥𑀺𑀕𑀬𑁆𑀳 𑀫𑀦𑀲𑀺𑀓𑀸𑀭𑁄, 𑀭𑀽𑀧𑀁 𑀳𑁂𑀢𑀼, 𑀭𑀽𑀧𑀁 𑀲𑀳𑁂𑀢𑀼𑀓𑀁, 𑀭𑀽𑀧𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺, 𑀭𑀽𑀧𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀭𑀽𑀧𑀁 𑀭𑀽𑀧𑀸𑀯𑀘𑀭𑀁 𑀅𑀢𑁆𑀣𑀺 𑀭𑀽𑀧𑀁 𑀅𑀭𑀽𑀧𑀸𑀯𑀘𑀭𑀁, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀢𑀺.