𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

(𑁧𑁫𑁩) 𑁯. 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸

𑁭𑁩𑁨. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑀸𑀭𑀡𑀦𑁆𑀢𑀺𑀬𑁄 𑀨𑀲𑁆𑀲𑁄, 𑀫𑀸𑀭𑀡𑀦𑁆𑀢𑀺𑀬𑀸 𑀯𑁂𑀤𑀦𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀲𑀜𑁆𑀜𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀘𑁂𑀢𑀦𑀸, 𑀫𑀸𑀭𑀡𑀦𑁆𑀢𑀺𑀬𑀁 𑀘𑀺𑀢𑁆𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑀸𑀭𑀡𑀦𑁆𑀢𑀺𑀬𑁄 𑀨𑀲𑁆𑀲𑁄, 𑀫𑀸𑀭𑀡𑀦𑁆𑀢𑀺𑀬𑀸 𑀯𑁂𑀤𑀦𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀲𑀜𑁆𑀜𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀘𑁂𑀢𑀦𑀸, 𑀫𑀸𑀭𑀡𑀦𑁆𑀢𑀺𑀬𑀁 𑀘𑀺𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑀸𑀭𑀡𑀦𑁆𑀢𑀺𑀬𑁄 𑀨𑀲𑁆𑀲𑁄, 𑀫𑀸𑀭𑀡𑀦𑁆𑀢𑀺𑀬𑀸 𑀯𑁂𑀤𑀦𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀲𑀜𑁆𑀜𑀸, 𑀫𑀸𑀭𑀡𑀦𑁆𑀢𑀺𑀬𑀸 𑀘𑁂𑀢𑀦𑀸, 𑀫𑀸𑀭𑀡𑀦𑁆𑀢𑀺𑀬𑀁 𑀘𑀺𑀢𑁆𑀢𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺.

𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀨𑀲𑁆𑀲𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸, 𑀅𑀯𑁂𑀤𑀦𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸…𑀧𑁂… 𑀅𑀘𑀺𑀢𑁆𑀢𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀲𑀨𑀲𑁆𑀲𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸…𑀧𑁂… 𑀲𑀘𑀺𑀢𑁆𑀢𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀨𑀲𑁆𑀲𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸…𑀧𑁂… 𑀲𑀘𑀺𑀢𑁆𑀢𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺.

𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀸𑀬𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀸𑀬𑁂 𑀯𑀺𑀲𑀁 𑀦 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀦 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀦 𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀸𑀬𑁂 𑀯𑀺𑀲𑀁 𑀦 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀦 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀦 𑀓𑀫𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺.

𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀓𑀸𑀬𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀦 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁩𑁩. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀲𑁄 𑀦𑀺𑀬𑀸𑀫𑁄 𑀬𑁂𑀦 𑀦𑀺𑀬𑀸𑀫𑁂𑀦 𑀦𑀺𑀬𑀢𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀦𑀢𑁆𑀣𑀺. 𑀳𑀜𑁆𑀘𑀺 𑀦𑀢𑁆𑀣𑀺 𑀲𑁄 𑀦𑀺𑀬𑀸𑀫𑁄 𑀬𑁂𑀦 𑀦𑀺𑀬𑀸𑀫𑁂𑀦 𑀦𑀺𑀬𑀢𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀦 𑀓𑀸𑀮𑀁 𑀓𑀭𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺.

𑁭𑁩𑁪. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀲𑁄 𑀦𑀺𑀬𑀸𑀫𑁄 𑀬𑁂𑀦 𑀦𑀺𑀬𑀸𑀫𑁂𑀦 𑀦𑀺𑀬𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺? 𑀦𑀢𑁆𑀣𑀺. 𑀳𑀜𑁆𑀘𑀺 𑀦𑀢𑁆𑀣𑀺 𑀲𑁄 𑀦𑀺𑀬𑀸𑀫𑁄 𑀬𑁂𑀦 𑀦𑀺𑀬𑀸𑀫𑁂𑀦 𑀦𑀺𑀬𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀦 𑀓𑀸𑀮𑀁 𑀓𑀭𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺.

𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.