𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

(𑁧𑁪𑁮) 𑁪. 𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸

𑁭𑁨𑁨. 𑀔𑀡𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑁄, 𑀮𑀬𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑁄, 𑀫𑀼𑀳𑀼𑀢𑁆𑀢𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁨𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀫𑀼𑀳𑀼𑀢𑁆𑀢𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀣𑀸𑀯𑀢𑁆𑀣𑀽𑀦𑀺! 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀢𑀻𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺; 𑀅𑀦𑀸𑀕𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺; 𑀏𑀢𑀭𑀳𑀺 𑀯𑀸, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀳𑁄𑀢𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦’𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀓𑀣𑀸𑀯𑀢𑁆𑀣𑀽𑀦𑀻’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀫𑀼𑀳𑀼𑀢𑁆𑀢𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺.

𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.