𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

(𑁧𑁪𑁬) 𑁨. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸

𑁭𑁧𑁮. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯 𑀲𑀗𑁆𑀔𑀸𑀭𑀸, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑁂𑀦 𑀲𑀳𑀚𑀸𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑁂𑀦 𑀲𑀳𑀚𑀸𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺.

𑀢𑀡𑁆𑀳𑀸𑀧𑀘𑁆𑀘𑀬𑀸𑀯 𑀉𑀧𑀸𑀤𑀸𑀦𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀺 𑀢𑀡𑁆𑀳𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀡𑁆𑀳𑀸 𑀉𑀧𑀸𑀤𑀸𑀦𑁂𑀦 𑀲𑀳𑀚𑀸𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀡𑁆𑀳𑀸 𑀉𑀧𑀸𑀤𑀸𑀦𑁂𑀦 𑀲𑀳𑀚𑀸𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀢𑀡𑁆𑀳𑀸𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀺 𑀢𑀡𑁆𑀳𑀸’’𑀢𑀺.

𑁭𑁧𑁯. ‘‘𑀚𑀭𑀸𑀫𑀭𑀡𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑁋 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀦𑀢𑁆𑀣𑀺. 𑀢𑁂𑀦 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯 𑀲𑀗𑁆𑀔𑀸𑀭𑀸, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺. 𑀢𑀡𑁆𑀳𑀸𑀧𑀘𑁆𑀘𑀬𑀸𑀯 𑀉𑀧𑀸𑀤𑀸𑀦𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀺 𑀢𑀡𑁆𑀳𑀸’’𑀢𑀺.

‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 [𑀤𑀻. 𑀦𑀺. 𑁨.𑁫𑁮, 𑀣𑁄𑀓𑀁 𑀧𑀦 𑀯𑀺𑀲𑀤𑀺𑀲𑀁] 𑁋 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸; 𑀢𑀡𑁆𑀳𑀸𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀺 𑀢𑀡𑁆𑀳𑀸𑀢𑀺.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.