𑁧𑁪. 𑀘𑀼𑀤𑁆𑀤𑀲𑀫𑀯𑀕𑁆𑀕𑁄

(𑁧𑁩𑁯) 𑁪. 𑀅𑀭𑀺𑀬𑀭𑀽𑀧𑀓𑀣𑀸

𑁬𑁯𑁮. 𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀭𑀺𑀬𑀭𑀽𑀧𑀁 𑀓𑀼𑀲𑀮𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀳𑀸𑀪𑀽𑀢𑀸 𑀓𑀼𑀲𑀮𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀫𑀳𑀸𑀪𑀽𑀢𑀸 𑀅𑀩𑁆𑀬𑀸𑀓𑀢𑀸𑀢𑀺? 𑀆𑀫𑀦𑁆𑀢𑀸. 𑀅𑀭𑀺𑀬𑀭𑀽𑀧𑀁 𑀅𑀩𑁆𑀬𑀸𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀭𑀺𑀬𑀭𑀽𑀧𑀁 𑀅𑀦𑀸𑀲𑀯𑀁 𑀅𑀲𑀁𑀬𑁄𑀚𑀦𑀺𑀬𑀁 𑀅𑀕𑀦𑁆𑀣𑀦𑀺𑀬𑀁 𑀅𑀦𑁄𑀖𑀦𑀺𑀬𑀁 𑀅𑀬𑁄𑀕𑀦𑀺𑀬𑀁 𑀅𑀦𑀻𑀯𑀭𑀡𑀺𑀬𑀁 𑀅𑀧𑀭𑀸𑀫𑀝𑁆𑀞𑀁 𑀅𑀦𑀼𑀧𑀸𑀤𑀸𑀦𑀺𑀬𑀁 𑀅𑀲𑀁𑀓𑀺𑀮𑁂𑀲𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀳𑀸𑀪𑀽𑀢𑀸 𑀅𑀦𑀸𑀲𑀯𑀸…𑀧𑁂… 𑀅𑀲𑀁𑀓𑀺𑀮𑁂𑀲𑀺𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀫𑀳𑀸𑀪𑀽𑀢𑀸 𑀲𑀸𑀲𑀯𑀸 𑀲𑀁𑀬𑁄𑀚𑀦𑀺𑀬𑀸…𑀧𑁂… 𑀲𑀁𑀓𑀺𑀮𑁂𑀲𑀺𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀭𑀺𑀬𑀭𑀽𑀧𑀁 𑀲𑀸𑀲𑀯𑀁 𑀲𑀁𑀬𑁄𑀚𑀦𑀺𑀬𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁯𑁯. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 [𑀫. 𑀦𑀺. 𑁧.𑁩𑁪𑁭; 𑀅. 𑀦𑀺. 𑁧𑁧.𑁧𑁫]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺.

𑀅𑀭𑀺𑀬𑀭𑀽𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.