𑁧𑁩. 𑀢𑁂𑀭𑀲𑀫𑀯𑀕𑁆𑀕𑁄

(𑁧𑁩𑁩) 𑁮. 𑀅𑀲𑀸𑀢𑀭𑀸𑀕𑀓𑀣𑀸

𑁬𑁭𑁪. 𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄𑀢𑀺? 𑀆𑀫𑀦𑁆𑀢𑀸. 𑀤𑀼𑀓𑁆𑀔𑀸𑀪𑀺𑀦𑀦𑁆𑀤𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀓𑁂𑀘𑀺 𑀤𑀼𑀓𑁆𑀔𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀺 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺, 𑀤𑀼𑀓𑁆𑀔𑀁 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀲𑀼𑀔𑀸𑀪𑀺𑀦𑀦𑁆𑀤𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀓𑁂𑀘𑀺 𑀲𑀼𑀔𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀺 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺, 𑀲𑀼𑀔𑀁 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀼𑀔𑀸𑀪𑀺𑀦𑀦𑁆𑀤𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀓𑁂𑀘𑀺 𑀲𑀼𑀔𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀺 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺, 𑀲𑀼𑀔𑀁 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄’’𑀢𑀺.

𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄𑀢𑀺? 𑀆𑀫𑀦𑁆𑀢𑀸. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄’’𑀢𑀺.

𑁬𑁭𑁫. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻’’𑀢𑀺 [𑀫. 𑀦𑀺. 𑁩.𑁪𑁦𑁯 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑁂]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀢𑁆𑀣𑀺 𑀅𑀲𑀸𑀢𑀭𑀸𑀕𑁄𑀢𑀺.

𑀅𑀲𑀸𑀢𑀭𑀸𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.