𑁧𑁩. 𑀢𑁂𑀭𑀲𑀫𑀯𑀕𑁆𑀕𑁄

(𑁧𑁩𑁧) 𑁬. 𑀲𑀫𑁆𑀫𑀼𑀔𑀻𑀪𑀽𑀢𑀓𑀣𑀸

𑁬𑁬𑁮. 𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀁𑀬𑁄𑀚𑀦𑀁 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀢𑁆𑀢𑁄 𑀭𑀸𑀕𑀁 𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁 𑀚𑀳𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀁 𑀚𑀳𑀢𑀺, 𑀓𑀺𑀮𑀺𑀝𑁆𑀞𑁄 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀸𑀕𑁂𑀦 𑀭𑀸𑀕𑀁 𑀚𑀳𑀢𑀺, 𑀤𑁄𑀲𑁂𑀦 𑀤𑁄𑀲𑀁 𑀚𑀳𑀢𑀺, 𑀫𑁄𑀳𑁂𑀦 𑀫𑁄𑀳𑀁 𑀚𑀳𑀢𑀺, 𑀓𑀺𑀮𑁂𑀲𑁂𑀳𑀺 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀭𑀸𑀕𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄, 𑀫𑀕𑁆𑀕𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁…𑀧𑁂… 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀸𑀕𑁄 𑀅𑀓𑀼𑀲𑀮𑁄, 𑀫𑀕𑁆𑀕𑁄 𑀓𑀼𑀲𑀮𑁄𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁬𑁯. 𑀓𑀼𑀲𑀮𑀸𑀓𑀼𑀲𑀮𑀸…𑀧𑁂… 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀺! 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀦𑀪𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀣𑀯𑀻 𑀘 𑁋 𑀇𑀤𑀁 𑀧𑀞𑀫𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁…𑀧𑁂… 𑀢𑀲𑁆𑀫𑀸 𑀲𑀢𑀁 𑀥𑀫𑁆𑀫𑁄 𑀅𑀲𑀩𑁆𑀪𑀺 𑀆𑀭𑀓𑀸’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀓𑀼𑀲𑀮𑀸…𑀧𑁂… 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺.

𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀁𑀬𑁄𑀚𑀦𑀁 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀁𑀬𑁄𑀚𑀦𑀁 𑀚𑀳𑀢𑀻’’𑀢𑀺.

𑁬𑁭𑁦. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀁𑀬𑁄𑀚𑀦𑀁 𑀚𑀳𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀁𑀬𑁄𑀚𑀦𑀁 𑀚𑀳𑀢𑀻𑀢𑀺.

𑀲𑀫𑁆𑀫𑀼𑀔𑀻𑀪𑀽𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.