𑁧𑁩. 𑀢𑁂𑀭𑀲𑀫𑀯𑀕𑁆𑀕𑁄

(𑁧𑁨𑁮) 𑁩. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸

𑁬𑁬𑁦. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀜𑁆𑀘 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀜𑁆𑀘 𑀉𑀪𑁄 𑀑𑀓𑁆𑀓𑀫𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀁 𑀓𑀫𑁆𑀫𑀁 𑀧𑀬𑀼𑀢𑁆𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑀺𑀢𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀚𑀦𑀺𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀁 𑀓𑀫𑁆𑀫𑀁 𑀧𑀬𑀼𑀢𑁆𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑀺𑀢𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀚𑀦𑀺𑀢𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬𑀸’’𑀢𑀺.

𑁬𑁬𑁧. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀸𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸… 𑀧𑀺𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄… 𑀅𑀭𑀳𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄… 𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑀺𑀢𑀁… 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀧𑀝𑀺𑀯𑀺𑀦𑁂𑀢𑁆𑀯𑀸 [𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 (𑀲𑀻. 𑀧𑀻. 𑀓.)] 𑀅𑀪𑀩𑁆𑀩𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀸𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸… 𑀧𑀺𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄…𑀧𑁂… 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀧𑀝𑀺𑀯𑀺𑀦𑁂𑀢𑁆𑀯𑀸 𑀅𑀪𑀩𑁆𑀩𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀁 𑀓𑀫𑁆𑀫𑀁 𑀧𑀝𑀺𑀲𑀁𑀳𑀝𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀯𑀺𑀦𑁄𑀤𑀺𑀢𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀧𑀝𑀺𑀯𑀺𑀦𑀻𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀁 𑀓𑀫𑁆𑀫𑀁 𑀧𑀝𑀺𑀲𑀁𑀳𑀝𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀯𑀺𑀦𑁄𑀤𑀺𑀢𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀧𑀝𑀺𑀯𑀺𑀦𑀻𑀢𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀬𑀁 𑀧𑀝𑀺𑀯𑀺𑀦𑁂𑀢𑁆𑀯𑀸 𑀅𑀪𑀩𑁆𑀩𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼’’𑀦𑁆𑀢𑀺.

𑁬𑁬𑁨. 𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀁 𑀓𑀫𑁆𑀫𑀁 𑀧𑀬𑀼𑀢𑁆𑀢𑁄 𑀆𑀲𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀁 𑀓𑀫𑁆𑀫𑀁 𑀧𑀬𑀼𑀢𑁆𑀢𑁄 𑀆𑀲𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑁂𑀬𑁆𑀬𑀸’’𑀢𑀺.

𑀅𑀦𑀦𑁆𑀢𑀭𑀸𑀧𑀬𑀼𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.