(𑁧𑁨𑁫) 𑁧𑁦. 𑀲𑀢𑁆𑀢𑀫𑀪𑀯𑀺𑀓𑀓𑀣𑀸

𑁬𑁫𑁩. 𑀦 𑀯𑀢𑁆𑀢𑀩𑁆𑀩𑀁 ‘‘𑀲𑀢𑁆𑀢𑀫𑀪𑀯𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀳𑀻𑀦𑀸 𑀤𑀼𑀕𑁆𑀕𑀢𑀻’’𑀢𑀺? 𑀆𑀫𑀦𑁆𑀢𑀸. 𑀲𑀢𑁆𑀢𑀫𑀪𑀯𑀺𑀓𑁄 𑀧𑀼𑀕𑁆𑀕𑀮𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀲𑀢𑁆𑀢𑀫𑀪𑀯𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀳𑀻𑀦𑀸 𑀤𑀼𑀕𑁆𑀕𑀢𑀻𑀢𑀺.

𑀲𑀢𑁆𑀢𑀫𑀪𑀯𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀁𑀯𑀭𑁄 𑀓𑀫𑁆𑀫𑀁 𑀢𑀣𑁂𑀯 𑀅𑀲𑀁𑀯𑀭𑁄, 𑀲𑀩𑁆𑀩𑀓𑀫𑁆𑀫𑀁 𑀲𑀯𑀺𑀧𑀸𑀓𑀁, 𑀲𑀤𑁆𑀤𑁄 𑀯𑀺𑀧𑀸𑀓𑁄, 𑀲𑀴𑀸𑀬𑀢𑀦𑀁 𑀯𑀺𑀧𑀸𑀓𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀦𑀺𑀬𑀢𑁄, 𑀓𑁄𑀮𑀗𑁆𑀓𑁄𑀮𑀧𑀼𑀕𑁆𑀕𑀮𑁄 𑀓𑁄𑀮𑀗𑁆𑀓𑁄𑀮𑀢𑀸𑀦𑀺𑀬𑀢𑁄, 𑀏𑀓𑀩𑀻𑀚𑀻 𑀧𑀼𑀕𑁆𑀕𑀮𑁄 𑀏𑀓𑀩𑀻𑀚𑀺𑀢𑀸𑀦𑀺𑀬𑀢𑁄, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀳𑀻𑀦𑀸 𑀤𑀼𑀕𑁆𑀕𑀢𑀺, 𑀢𑀣𑁂𑀯 𑀲𑀢𑁆𑀢𑀫𑀪𑀯𑀺𑀓𑀲𑁆𑀲𑀸𑀢𑀺.