𑁧𑁧. 𑀏𑀓𑀸𑀤𑀲𑀫𑀯𑀕𑁆𑀕𑁄

(𑁧𑁧𑁨) 𑁭. 𑀇𑀤𑁆𑀥𑀺𑀩𑀮𑀓𑀣𑀸

𑁬𑁨𑁧. 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀇𑀤𑁆𑀥𑀺𑀫𑀬𑀺𑀓𑁄 𑀲𑁄 𑀆𑀬𑀼, 𑀇𑀤𑁆𑀥𑀺𑀫𑀬𑀺𑀓𑀸 𑀲𑀸 𑀕𑀢𑀺, 𑀇𑀤𑁆𑀥𑀺𑀫𑀬𑀺𑀓𑁄 𑀲𑁄 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀁 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀸𑀕𑀢𑀁 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬, 𑀢𑀬𑁄 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬, 𑀘𑀢𑁆𑀢𑀸𑀭𑁄 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀢𑀺𑀝𑁆𑀞𑁂𑀬𑁆𑀬, 𑀅𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀳𑀜𑁆𑀘𑀺 𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀢𑀺𑀝𑁆𑀞𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺. 𑀅𑀲𑀢𑀺 𑀚𑀻𑀯𑀺𑀢𑁂 𑀚𑀻𑀯𑀺𑀢𑀸𑀯𑀲𑁂𑀲𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺, 𑀫𑀢𑁄 𑀢𑀺𑀝𑁆𑀞𑁂𑀬𑁆𑀬, 𑀓𑀸𑀮𑀗𑁆𑀓𑀢𑁄 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁨𑁨. 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑁆𑀧𑀦𑁆𑀦𑁄 𑀨𑀲𑁆𑀲𑁄 𑀫𑀸 𑀦𑀺𑀭𑀼𑀚𑁆𑀛𑀻𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸…𑀧𑁂… 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 …𑀧𑁂… 𑀉𑀧𑁆𑀧𑀦𑁆𑀦𑀸 𑀘𑁂𑀢𑀦𑀸…𑀧𑁂… 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁… 𑀉𑀧𑁆𑀧𑀦𑁆𑀦𑀸 𑀲𑀤𑁆𑀥𑀸… 𑀉𑀧𑁆𑀧𑀦𑁆𑀦𑀁 𑀯𑀻𑀭𑀺𑀬𑀁… 𑀉𑀧𑁆𑀧𑀦𑁆𑀦𑀸 𑀲𑀢𑀺… 𑀉𑀧𑁆𑀧𑀦𑁆𑀦𑁄 𑀲𑀫𑀸𑀥𑀺 …𑀧𑁂… 𑀉𑀧𑁆𑀧𑀦𑁆𑀦𑀸 𑀧𑀜𑁆𑀜𑀸 𑀫𑀸 𑀦𑀺𑀭𑀼𑀚𑁆𑀛𑀻𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀦𑀺𑀘𑁆𑀘𑀁 𑀳𑁄𑀢𑀽𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀳𑁄𑀢𑀽𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀚𑀸𑀬𑀺𑀁𑀲𑀽𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀚𑀻𑀭𑀺𑀁𑀲𑀽𑀢𑀺…𑀧𑁂… 𑀩𑁆𑀬𑀸𑀥𑀺𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀩𑁆𑀬𑀸𑀥𑀺𑀬𑀺𑀁𑀲𑀽𑀢𑀺…𑀧𑁂… 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀸 𑀫𑀻𑀬𑀺𑀁𑀲𑀽𑀢𑀺 𑀮𑀩𑁆𑀪𑀸 𑀇𑀤𑁆𑀥𑀺𑀬𑀸 𑀧𑀕𑁆𑀕𑀳𑁂𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁨𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺 [𑀤𑀻. 𑀦𑀺. 𑁨.𑁧𑁬𑁬; 𑀲𑀁. 𑀦𑀺. 𑁫.𑁮𑁨𑁨; 𑀉𑀤𑀸. 𑁫𑁧]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺.

𑁬𑁨𑁪. 𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁! 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀚𑀭𑀸𑀥𑀫𑁆𑀫𑁄 ‘‘𑀫𑀸 𑀚𑀻𑀭𑀻’’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀩𑁆𑀬𑀸𑀥𑀺𑀥𑀫𑁆𑀫𑁄 ‘‘𑀫𑀸 𑀩𑁆𑀬𑀸𑀥𑀺𑀬𑀻’’𑀢𑀺…𑀧𑁂… 𑀫𑀭𑀡𑀥𑀫𑁆𑀫𑁄 ‘‘𑀫𑀸 𑀫𑀻𑀬𑀻’’𑀢𑀺…𑀧𑁂… 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀲𑀁𑀓𑀺𑀮𑁂𑀲𑀺𑀓𑀸𑀦𑀺 𑀧𑁄𑀦𑁄𑀩𑁆𑀪𑀯𑀺𑀓𑀸𑀦𑀺 [𑀧𑁄𑀦𑁄𑀪𑀯𑀺𑀓𑀸𑀦𑀺 (𑀲𑀻. 𑀧𑀻.)] 𑀲𑀤𑀭𑀸𑀦𑀺 [𑀦𑀺𑀲𑁆𑀲𑀸𑀭𑀸𑀦𑀺 (𑀲𑀻. 𑀧𑀻. 𑀓.), 𑀤𑀼𑀓𑁆𑀔𑀼𑀤𑁆𑀭𑀬𑀸𑀦𑀺 (𑀲𑁆𑀬𑀸.)] 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸𑀦𑀺 𑀢𑁂𑀲𑀁 𑀯𑀺𑀧𑀸𑀓𑁄 ‘‘𑀫𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀅. 𑀦𑀺. 𑁪.𑁧𑁮𑁨]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀇𑀤𑁆𑀥𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀇𑀤𑁆𑀥𑀺𑀩𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.