(𑁬𑁯) 𑁭. 𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸

𑁪𑁯𑁨. 𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀲𑀼𑀔𑀯𑁂𑀤𑀦𑀺𑀬𑀸 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀸, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀸𑀭𑀫𑁆𑀫𑀡𑀸; 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸 [𑀆𑀯𑀚𑁆𑀚𑀦𑀸 (𑀲𑁆𑀬𑀸. 𑀓𑀁.)] 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀘𑁂𑀢𑀦𑀸 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦 𑀲𑀼𑀔𑀯𑁂𑀤𑀦𑀺𑀬𑀸 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀦 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀸, 𑀦 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀦 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀅𑀦𑀸𑀭𑀫𑁆𑀫𑀡𑀸; 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀘𑁂𑀢𑀦𑀸 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦 𑀲𑀼𑀔𑀯𑁂𑀤𑀦𑀺𑀬𑀸 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀸…𑀧𑁂… 𑀅𑀦𑀸𑀭𑀫𑁆𑀫𑀡𑀸; 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺.

𑀨𑀲𑁆𑀲𑁄 𑀓𑀫𑁆𑀫𑀯𑀺𑀧𑀸𑀓𑁄, 𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀺𑀬𑁄 𑀤𑀼𑀓𑁆𑀔𑀯𑁂𑀤𑀦𑀺𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀤𑀼𑀓𑁆𑀔𑀸𑀬…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀭𑀫𑁆𑀫𑀡𑁄; 𑀅𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄, 𑀧𑀣𑀯𑀻 𑀲𑀼𑀔𑀯𑁂𑀤𑀦𑀺𑀬𑀸 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀲𑀸𑀭𑀫𑁆𑀫𑀡𑀸; 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀘𑁂𑀢𑀦𑀸 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄, 𑀧𑀣𑀯𑀻 𑀦 𑀲𑀼𑀔𑀯𑁂𑀤𑀦𑀺𑀬𑀸 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀸…𑀧𑁂… 𑀅𑀦𑀸𑀭𑀫𑁆𑀫𑀡𑀸; 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀨𑀲𑁆𑀲𑁄 𑀓𑀫𑁆𑀫𑀯𑀺𑀧𑀸𑀓𑁄, 𑀨𑀲𑁆𑀲𑁄 𑀦 𑀲𑀼𑀔𑀯𑁂𑀤𑀦𑀺𑀬𑁄 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑁄 …𑀧𑁂… 𑀅𑀦𑀸𑀭𑀫𑁆𑀫𑀡𑁄; 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀧𑀣𑀯𑀻 𑀧𑀕𑁆𑀕𑀳𑀦𑀺𑀕𑁆𑀕𑀳𑀼𑀧𑀕𑀸 𑀙𑁂𑀤𑀦𑀪𑁂𑀤𑀦𑀼𑀧𑀕𑀸𑀢𑀺? 𑀆𑀫𑀦𑁆𑀢𑀸. 𑀓𑀫𑁆𑀫𑀯𑀺𑀧𑀸𑀓𑁄 𑀧𑀕𑁆𑀕𑀳𑀦𑀺𑀕𑁆𑀕𑀳𑀼𑀧𑀕𑁄 𑀙𑁂𑀤𑀦𑀪𑁂𑀤𑀦𑀼𑀧𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀮𑀩𑁆𑀪𑀸 𑀧𑀣𑀯𑀻 𑀓𑁂𑀢𑀼𑀁 𑀯𑀺𑀓𑁆𑀓𑁂𑀢𑀼𑀁 𑀆𑀞𑀧𑁂𑀢𑀼𑀁 𑀑𑀘𑀺𑀦𑀺𑀢𑀼𑀁 𑀯𑀺𑀘𑀺𑀦𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑀩𑁆𑀪𑀸 𑀓𑀫𑁆𑀫𑀯𑀺𑀧𑀸𑀓𑁄 𑀓𑁂𑀢𑀼𑀁 𑀯𑀺𑀓𑁆𑀓𑁂𑀢𑀼𑀁 𑀆𑀞𑀧𑁂𑀢𑀼𑀁 𑀑𑀘𑀺𑀦𑀺𑀢𑀼𑀁 𑀯𑀺𑀘𑀺𑀦𑀺𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁯𑁩. 𑀧𑀣𑀯𑀻 𑀧𑀭𑁂𑀲𑀁 𑀲𑀸𑀥𑀸𑀭𑀡𑀸𑀢𑀺? 𑀆𑀫𑀦𑁆𑀢𑀸. 𑀓𑀫𑁆𑀫𑀯𑀺𑀧𑀸𑀓𑁄 𑀧𑀭𑁂𑀲𑀁 𑀲𑀸𑀥𑀸𑀭𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀫𑁆𑀫𑀯𑀺𑀧𑀸𑀓𑁄 𑀧𑀭𑁂𑀲𑀁 𑀲𑀸𑀥𑀸𑀭𑀡𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀁, 𑀅𑀘𑁄𑀭𑀳𑀭𑀡𑁄 𑀦𑀺𑀥𑀺;

𑀓𑀬𑀺𑀭𑀸𑀣 𑀫𑀘𑁆𑀘𑁄 𑀧𑀼𑀜𑁆𑀜𑀸𑀦𑀺, 𑀲𑀘𑁂 𑀲𑀼𑀘𑀭𑀺𑀢𑀁 𑀘𑀭𑁂’’𑀢𑀺 [𑀔𑀼. 𑀧𑀸. 𑁮.𑁯 𑀔𑀼𑀤𑁆𑀤𑀓𑀧𑀸𑀞𑁂, 𑀣𑁄𑀓𑀁 𑀯𑀺𑀲𑀤𑀺𑀲𑀁].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀧𑀭𑁂𑀲𑀁 𑀲𑀸𑀥𑀸𑀭𑀡𑁄’’𑀢𑀺.

𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀁 𑀧𑀣𑀯𑀻 𑀲𑀡𑁆𑀞𑀸𑀢𑀺, 𑀧𑀘𑁆𑀙𑀸 𑀲𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀁 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀯𑀺𑀧𑀸𑀓𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀣𑀯𑀻 𑀲𑀩𑁆𑀩𑀲𑀢𑁆𑀢𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀲𑀢𑁆𑀢𑀸 𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀩𑁆𑀩𑁂 𑀲𑀢𑁆𑀢𑀸 𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀧𑀣𑀯𑀺𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀓𑀫𑁆𑀫𑀯𑀺𑀧𑀸𑀓𑀁 𑀅𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀣𑀯𑀻 𑀘𑀓𑁆𑀓𑀯𑀢𑁆𑀢𑀺𑀲𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁂 𑀲𑀢𑁆𑀢𑀸 𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀓𑁆𑀓𑀯𑀢𑁆𑀢𑀺𑀲𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀁 𑀅𑀜𑁆𑀜𑁂 𑀲𑀢𑁆𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀘𑀓𑁆𑀓𑀯𑀢𑁆𑀢𑀺𑀲𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀁 𑀅𑀜𑁆𑀜𑁂 𑀲𑀢𑁆𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀓𑁆𑀓𑀯𑀢𑁆𑀢𑀺𑀲𑀢𑁆𑀢𑀲𑁆𑀲 𑀨𑀲𑁆𑀲𑀁 𑀯𑁂𑀤𑀦𑀁 𑀲𑀜𑁆𑀜𑀁 𑀘𑁂𑀢𑀦𑀁 𑀘𑀺𑀢𑁆𑀢𑀁 𑀲𑀤𑁆𑀥𑀁 𑀯𑀻𑀭𑀺𑀬𑀁 𑀲𑀢𑀺𑀁 𑀲𑀫𑀸𑀥𑀺𑀁 𑀧𑀜𑁆𑀜𑀁 𑀅𑀜𑁆𑀜𑁂 𑀲𑀢𑁆𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁯𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀇𑀲𑁆𑀲𑀭𑀺𑀬𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀅𑀥𑀺𑀧𑀘𑁆𑀘𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀇𑀲𑁆𑀲𑀭𑀺𑀬𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀅𑀥𑀺𑀧𑀘𑁆𑀘𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺.

𑀧𑀣𑀯𑀻 𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.