(𑁬𑁫) 𑁩. 𑀘𑁂𑀢𑀲𑀺𑀓𑀓𑀣𑀸

𑁪𑁭𑁫. 𑀦𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀘𑀺𑀢𑁆𑀢𑁂𑀦 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀘𑀺𑀢𑁆𑀢𑁂𑀦 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄’’𑀢𑀺.

𑀨𑀲𑁆𑀲𑁄 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀨𑀲𑁆𑀲𑁄 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀨𑀲𑁆𑀲𑁄 𑀘𑁂𑀢𑀲𑀺𑀓𑁄’’𑀢𑀺. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀘𑁂𑀢𑀦𑀸… 𑀲𑀤𑁆𑀥𑀸… 𑀯𑀻𑀭𑀺𑀬𑀁… 𑀲𑀢𑀺… 𑀲𑀫𑀸𑀥𑀺… 𑀧𑀜𑁆𑀜𑀸… 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀦𑁄𑀢𑁆𑀢𑀧𑁆𑀧𑀁 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀁, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑁄𑀢𑁆𑀢𑀧𑁆𑀧𑀁 𑀘𑁂𑀢𑀲𑀺𑀓’’𑀦𑁆𑀢𑀺.

𑁪𑁭𑁬. 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀸𑀢𑀺 𑀓𑀢𑁆𑀯𑀸 𑀘𑁂𑀢𑀲𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀨𑀲𑁆𑀲𑁂𑀦 𑀲𑀳𑀚𑀸𑀢𑀸𑀢𑀺 𑀓𑀢𑁆𑀯𑀸 𑀨𑀲𑁆𑀲𑀲𑀺𑀓𑀸𑀢𑀺 [𑀨𑀲𑁆𑀲𑀺𑀓𑀸𑀢𑀺 (𑀧𑀻. 𑀅𑀝𑁆𑀞.)]? 𑀆𑀫𑀦𑁆𑀢𑀸. 𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀸𑀢𑀺 𑀓𑀢𑁆𑀯𑀸 𑀘𑁂𑀢𑀲𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀘𑁂𑀢𑀦𑀸𑀬… 𑀲𑀤𑁆𑀥𑀸𑀬… 𑀯𑀻𑀭𑀺𑀬𑁂𑀦… 𑀲𑀢𑀺𑀬𑀸… 𑀲𑀫𑀸𑀥𑀺𑀦𑀸… 𑀧𑀜𑁆𑀜𑀸𑀬… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦…𑀧𑁂… 𑀅𑀦𑁄𑀢𑁆𑀢𑀧𑁆𑀧𑁂𑀦 𑀲𑀳𑀚𑀸𑀢𑀸𑀢𑀺 𑀓𑀢𑁆𑀯𑀸 𑀅𑀦𑁄𑀢𑁆𑀢𑀧𑁆𑀧𑀸𑀲𑀺𑀓𑀸𑀢𑀺 [𑀅𑀦𑁄𑀢𑁆𑀢𑀧𑁆𑀧𑀺𑀓𑀸𑀢𑀺 (?)]? 𑀆𑀫𑀦𑁆𑀢𑀸.

𑁪𑁭𑁭. 𑀦𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀘𑀺𑀢𑁆𑀢𑀜𑁆𑀳𑀺𑀤𑀁 𑀘𑁂𑀢𑀲𑀺𑀓𑀸 𑀘 𑀥𑀫𑁆𑀫𑀸,

𑀅𑀦𑀢𑁆𑀢𑀢𑁄 𑀲𑀁𑀯𑀺𑀤𑀺𑀢𑀲𑁆𑀲 𑀳𑁄𑀦𑁆𑀢𑀺;

𑀳𑀻𑀦𑀧𑁆𑀧𑀡𑀻𑀢𑀁 𑀢𑀤𑀼𑀪𑀬𑁂 𑀯𑀺𑀤𑀺𑀢𑁆𑀯𑀸,

𑀲𑀫𑁆𑀫𑀤𑁆𑀤𑀲𑁄 𑀯𑁂𑀤𑀺 𑀧𑀮𑁄𑀓𑀥𑀫𑁆𑀫’’𑀦𑁆𑀢𑀺.

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄𑀢𑀺.

𑀦𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀆𑀤𑀺𑀲𑀢𑀺 𑀘𑁂𑀢𑀲𑀺𑀓𑀫𑁆𑀧𑀺 𑀆𑀤𑀺𑀲𑀢𑀺 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀆𑀤𑀺𑀲𑀢𑀺 𑀯𑀺𑀘𑀸𑀭𑀺𑀢𑀫𑁆𑀧𑀺 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’’’𑀦𑁆𑀢𑀺 [𑀤𑀻. 𑀦𑀺. 𑁧.𑁪𑁮𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀢𑁆𑀣𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄𑀢𑀺.

𑀘𑁂𑀢𑀲𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.