(𑁬𑁩) 𑁧. 𑀲𑀗𑁆𑀕𑀳𑀺𑀢𑀓𑀣𑀸

𑁪𑁭𑁧. 𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 [𑀲𑀗𑁆𑀕𑀳𑀻𑀢𑀸𑀢𑀺 (𑀧𑀻.)]? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀕𑀡𑀦𑀁 𑀕𑀘𑁆𑀙𑀦𑁆𑀢𑀺 𑀉𑀤𑁆𑀤𑁂𑀲𑀁 𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀕𑀡𑀦𑀁 𑀕𑀘𑁆𑀙𑀦𑁆𑀢𑀺 𑀉𑀤𑁆𑀤𑁂𑀲𑀁 𑀕𑀘𑁆𑀙𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺.

𑀘𑀓𑁆𑀔𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 [𑀓𑀢𑀫𑀁 𑀔𑀦𑁆𑀥𑀕𑀡𑀦𑀁 (𑀲𑀻. 𑀧𑀻. 𑀓.)] 𑀕𑀘𑁆𑀙𑀢𑀻𑀢𑀺? 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺. 𑀲𑁄𑀢𑀸𑀬𑀢𑀦𑀁…𑀧𑁂… 𑀖𑀸𑀦𑀸𑀬𑀢𑀦𑀁…𑀧𑁂… 𑀚𑀺𑀯𑁆𑀳𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀓𑀸𑀬𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀓𑀸𑀬𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺.

𑀭𑀽𑀧𑀸𑀬𑀢𑀦𑀁…𑀧𑁂… 𑀲𑀤𑁆𑀤𑀸𑀬𑀢𑀦𑀁…𑀧𑁂… 𑀕𑀦𑁆𑀥𑀸𑀬𑀢𑀦𑀁…𑀧𑁂… 𑀭𑀲𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺.

𑀲𑀼𑀔𑀸 𑀯𑁂𑀤𑀦𑀸 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀯𑁂𑀤𑀦𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺. 𑀤𑀼𑀓𑁆𑀔𑀸 𑀯𑁂𑀤𑀦𑀸…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀯𑁂𑀤𑀦𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀲𑀜𑁆𑀜𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀲𑀜𑁆𑀜𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 …𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺. 𑀳𑀜𑁆𑀘𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀫𑀦𑁄𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺.

𑁪𑁭𑁨. 𑀬𑀣𑀸 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀤𑁆𑀯𑁂 𑀩𑀮𑀺𑀩𑀤𑁆𑀤𑀸 𑀲𑀗𑁆𑀕𑀳𑀺𑀢𑀸, 𑀲𑀺𑀓𑁆𑀓𑀸𑀬 𑀧𑀺𑀡𑁆𑀟𑀧𑀸𑀢𑁄 𑀲𑀗𑁆𑀕𑀳𑀺𑀢𑁄, 𑀲𑀸 𑀕𑀤𑁆𑀤𑀼𑀮𑁂𑀦 𑀲𑀗𑁆𑀕𑀳𑀺𑀢𑁄; 𑀏𑀯𑀫𑁂𑀯 𑀢𑁂 𑀥𑀫𑁆𑀫𑀸 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 [𑀲𑀓𑀯𑀸𑀤𑀺𑀯𑀘𑀦𑀁 (𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸)]? 𑀳𑀜𑁆𑀘𑀺 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀤𑁆𑀯𑁂 𑀩𑀮𑀻𑀩𑀤𑁆𑀤𑀸 𑀲𑀗𑁆𑀕𑀳𑀺𑀢𑀸, 𑀲𑀺𑀓𑁆𑀓𑀸𑀬 𑀧𑀺𑀡𑁆𑀟𑀧𑀸𑀢𑁄 𑀲𑀗𑁆𑀕𑀳𑀺𑀢𑁄, 𑀲𑀸 𑀕𑀤𑁆𑀤𑀼𑀮𑁂𑀦 𑀲𑀗𑁆𑀕𑀳𑀺𑀢𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀓𑁂𑀘𑀺 𑀥𑀫𑁆𑀫𑀸 𑀓𑁂𑀳𑀺𑀘𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺 [𑀲𑀓𑀯𑀸𑀤𑀺𑀯𑀘𑀦𑀁 (𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸)].

𑀲𑀗𑁆𑀕𑀳𑀺𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.