(𑁫𑁪) 𑁨. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸

𑁪𑁪𑁮. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀧𑀭𑀸𑀬𑀦𑀁 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺 𑀤𑁆𑀯𑁂 𑀮𑁂𑀡𑀸𑀦𑀺 𑀤𑁆𑀯𑁂 𑀲𑀭𑀡𑀸𑀦𑀺 𑀤𑁆𑀯𑁂 𑀧𑀭𑀸𑀬𑀦𑀸𑀦𑀺 𑀤𑁆𑀯𑁂 𑀅𑀘𑁆𑀘𑀼𑀢𑀸𑀦𑀺 𑀤𑁆𑀯𑁂 𑀅𑀫𑀢𑀸𑀦𑀺 𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀸𑀦𑀁 𑀉𑀘𑁆𑀘𑀦𑀻𑀘𑀢𑀸 𑀳𑀻𑀦𑀧𑀡𑀻𑀢𑀢𑀸 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀲𑀻𑀫𑀸 𑀯𑀸 𑀪𑁂𑀤𑁄 𑀯𑀸 𑀭𑀸𑀚𑀺 𑀯𑀸 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁪𑁯. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀚𑁆𑀚𑀸 𑀅𑀲𑀗𑁆𑀔𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀯𑀺𑀚𑁆𑀚𑀸 𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀅𑀲𑀗𑁆𑀔𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁫𑁦. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑀁 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀅𑀪𑀺𑀲𑀫𑁂𑀢𑀺. 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀪𑀺𑀲𑀫𑁂𑀢𑁆𑀯𑀸 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀸𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺. ‘𑀧𑀲𑁆𑀲𑀣𑀸’𑀢𑀺 𑀘𑀸𑀳 𑁋 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀪𑀯𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀼…𑀧𑁂… ‘𑀧𑀲𑁆𑀲𑀣𑀸’𑀢𑀺 𑀘𑀸𑀳 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀬𑀸 𑀢𑀢𑁆𑀭 𑀢𑀣𑀢𑀸 𑀅𑀯𑀺𑀢𑀣𑀢𑀸 𑀅𑀦𑀜𑁆𑀜𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 [𑀲𑀁. 𑀦𑀺. 𑁨.𑁨𑁦]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀲𑀗𑁆𑀔𑀢𑁄𑀢𑀺.

𑁪𑁫𑁧. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀢𑀻𑀡𑀺 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀢𑀻𑀡𑀺 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀢𑀻𑀡𑀺 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸…𑀧𑁂… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀬𑀸 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀸𑀤𑀲 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑀸𑀤𑀲 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀸𑀤𑀲 𑀢𑀸𑀡𑀸𑀦𑀺 𑀤𑁆𑀯𑀸𑀤𑀲 𑀮𑁂𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.