(𑁫𑁩) 𑁧. 𑀦𑀺𑀬𑀸𑀫𑀓𑀣𑀸

𑁪𑁪𑁫. 𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀧𑀭𑀸𑀬𑀦𑀁 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺 𑀤𑁆𑀯𑁂 𑀮𑁂𑀡𑀸𑀦𑀺 𑀤𑁆𑀯𑁂 𑀲𑀭𑀡𑀸𑀦𑀺 𑀤𑁆𑀯𑁂 𑀧𑀭𑀸𑀬𑀦𑀸𑀦𑀺 𑀤𑁆𑀯𑁂 𑀅𑀘𑁆𑀘𑀼𑀢𑀸𑀦𑀺 𑀤𑁆𑀯𑁂 𑀅𑀫𑀢𑀸𑀦𑀺 𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀸𑀦𑀁 𑀉𑀘𑁆𑀘𑀦𑀻𑀘𑀢𑀸 𑀳𑀻𑀦𑀧𑀡𑀻𑀢𑀢𑀸 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀲𑀻𑀫𑀸 𑀯𑀸 𑀪𑁂𑀤𑁄 𑀯𑀸 𑀭𑀸𑀚𑀺 𑀯𑀸 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺 𑀲𑀫𑀼𑀧𑁆𑀧𑀸𑀤𑁂𑀦𑁆𑀢𑀺 𑀉𑀝𑁆𑀞𑀸𑀧𑁂𑀦𑁆𑀢𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀅𑀲𑀗𑁆𑀔𑀢𑀁 𑀑𑀓𑁆𑀓𑀫𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺 𑀲𑀫𑀼𑀧𑁆𑀧𑀸𑀤𑁂𑀦𑁆𑀢𑀺 𑀉𑀝𑁆𑀞𑀸𑀧𑁂𑀦𑁆𑀢𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁪𑁬. 𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀕𑁆𑀕𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀦𑀺𑀬𑀸𑀫𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀦𑀺𑀬𑀸𑀫𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀓𑀤𑀸𑀕𑀸𑀫𑀺𑀦𑀺𑀬𑀸𑀫𑁄…𑀧𑁂… 𑀅𑀦𑀸𑀕𑀸𑀫𑀺𑀦𑀺𑀬𑀸𑀫𑁄…𑀧𑁂… 𑀅𑀭𑀳𑀢𑁆𑀢𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀦𑀺𑀬𑀸𑀫𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄…𑀧𑁂… 𑀅𑀭𑀳𑀢𑁆𑀢𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁪𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄’’𑀢𑀺? 𑀆𑀫𑀦𑁆𑀢𑀸. 𑀦𑀺𑀬𑀸𑀫𑁂 𑀉𑀧𑁆𑀧𑀚𑁆𑀚 𑀦𑀺𑀭𑀼𑀤𑁆𑀥𑁂 𑀅𑀦𑀺𑀬𑀢𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀢𑁂𑀦 𑀳𑀺 𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺. 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁂 𑀉𑀧𑁆𑀧𑀚𑁆𑀚 𑀦𑀺𑀭𑀼𑀤𑁆𑀥𑁂 𑀅𑀦𑀺𑀬𑀢𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀳𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀅𑀲𑀗𑁆𑀔𑀢𑁄𑀢𑀺.

𑀦𑀺𑀬𑀸𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.