𑁫. 𑀧𑀜𑁆𑀘𑀫𑀯𑀕𑁆𑀕𑁄

(𑁪𑁯) 𑁭. 𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸

𑁪𑁩𑁬. 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 ‘‘𑀲𑀭𑀸𑀕𑀁 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 ‘‘𑀲𑀭𑀸𑀕𑀁 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺.

𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀁…𑀧𑁂… 𑀲𑀤𑁄𑀲𑀁 𑀘𑀺𑀢𑁆𑀢𑀁… 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢𑀁… 𑀲𑀫𑁄𑀳𑀁 𑀘𑀺𑀢𑁆𑀢𑀁… 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢𑀁… 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀁… 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁… 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁… 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁… 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢𑀁… 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁… 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁… 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁… 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 ‘‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 ‘‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺.

𑁪𑁩𑁭. 𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀢𑁆𑀢𑀩𑁆𑀩𑀁 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺. 𑀯𑁂𑀤𑀦𑀸𑀭𑀫𑁆𑀫𑀡𑁂 𑀜𑀸𑀡𑀁…𑀧𑁂… 𑀲𑀜𑁆𑀜𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀘𑁂𑀢𑀦𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀘𑀺𑀢𑁆𑀢𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀲𑀤𑁆𑀥𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀯𑀻𑀭𑀺𑀬𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀲𑀢𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀲𑀫𑀸𑀥𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀧𑀜𑁆𑀜𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀭𑀸𑀕𑀸𑀭𑀫𑁆𑀫𑀡𑁂 𑀜𑀸𑀡𑀁 … 𑀤𑁄𑀲𑀸𑀭𑀫𑁆𑀫𑀡𑁂 𑀜𑀸𑀡𑀁… 𑀫𑁄𑀳𑀸𑀭𑀫𑁆𑀫𑀡𑁂 𑀜𑀸𑀡𑀁…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀦𑁄𑀢𑁆𑀢𑀧𑁆𑀧𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀢𑁆𑀢𑀩𑁆𑀩𑀁 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺.

𑀨𑀲𑁆𑀲𑀸𑀭𑀫𑁆𑀫𑀡𑁂 𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀨𑀲𑁆𑀲𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸𑀭𑀫𑁆𑀫𑀡𑁂 𑀜𑀸𑀡𑀁…𑀧𑁂… 𑀲𑀜𑁆𑀜𑀸𑀭𑀫𑁆𑀫𑀡𑁂 𑀜𑀸𑀡𑀁…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀸𑀭𑀫𑁆𑀫𑀡𑁂 𑀜𑀸𑀡𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀦𑁄𑀢𑁆𑀢𑀧𑁆𑀧𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁩𑁮. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑁂𑀢𑁄𑀧𑀭𑀺𑀬𑀸𑀬𑁂 𑀜𑀸𑀡𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀜𑁂𑀯 𑀦 𑀅𑀜𑁆𑀜𑀸𑀭𑀫𑁆𑀫𑀡’’𑀦𑁆𑀢𑀺.

𑀘𑀺𑀢𑁆𑀢𑀸𑀭𑀫𑁆𑀫𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.