(𑁩𑁫) 𑁩. 𑀅𑀦𑀸𑀲𑀯𑀓𑀣𑀸

𑁩𑁯𑁧. 𑀅𑀭𑀳𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀨𑀮𑀁 𑀦𑀺𑀩𑁆𑀩𑀸𑀦𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀁, 𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀇𑀤𑁆𑀥𑀺𑀧𑀸𑀤𑁄 𑀇𑀦𑁆𑀤𑁆𑀭𑀺𑀬𑀁 𑀩𑀮𑀁 𑀩𑁄𑀚𑁆𑀛𑀗𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀳𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁄 𑀘𑀓𑁆𑀔𑀼𑀁 𑀅𑀦𑀸𑀲𑀯𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀅𑀭𑀳𑀢𑁄 𑀘𑀓𑁆𑀔𑀼𑀁 𑀅𑀦𑀸𑀲𑀯𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀨𑀮𑀁 𑀦𑀺𑀩𑁆𑀩𑀸𑀦𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀩𑁄𑀚𑁆𑀛𑀗𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀳𑀢𑁄 𑀲𑁄𑀢𑀁…𑀧𑁂… 𑀅𑀭𑀳𑀢𑁄 𑀖𑀸𑀦𑀁… 𑀅𑀭𑀳𑀢𑁄 𑀚𑀺𑀯𑁆𑀳𑀸… 𑀅𑀭𑀳𑀢𑁄 𑀓𑀸𑀬𑁄 𑀅𑀦𑀸𑀲𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀅𑀭𑀳𑀢𑁄 𑀓𑀸𑀬𑁄 𑀅𑀦𑀸𑀲𑀯𑁄𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀨𑀮𑀁 𑀦𑀺𑀩𑁆𑀩𑀸𑀦𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀩𑁄𑀚𑁆𑀛𑀗𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀳𑀢𑁄 𑀓𑀸𑀬𑁄 𑀅𑀦𑀸𑀲𑀯𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁄 𑀓𑀸𑀬𑁄 𑀧𑀕𑁆𑀕𑀳𑀦𑀺𑀕𑁆𑀕𑀳𑀼𑀧𑀕𑁄 𑀙𑁂𑀤𑀦𑀪𑁂𑀤𑀦𑀼𑀧𑀕𑁄 𑀓𑀸𑀓𑁂𑀳𑀺 𑀕𑀺𑀚𑁆𑀛𑁂𑀳𑀺 𑀓𑀼𑀮𑀮𑁂𑀳𑀺 𑀲𑀸𑀥𑀸𑀭𑀡𑁄𑀢𑀺? 𑀆𑀫𑀦𑁆𑀢𑀸. 𑀅𑀦𑀸𑀲𑀯𑁄 𑀥𑀫𑁆𑀫𑁄 𑀧𑀕𑁆𑀕𑀳𑀦𑀺𑀕𑁆𑀕𑀳𑀼𑀧𑀕𑁄 𑀙𑁂𑀤𑀦𑀪𑁂𑀤𑀦𑀼𑀧𑀕𑁄 𑀓𑀸𑀓𑁂𑀳𑀺 𑀕𑀺𑀚𑁆𑀛𑁂𑀳𑀺 𑀓𑀼𑀮𑀮𑁂𑀳𑀺 𑀲𑀸𑀥𑀸𑀭𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑀅𑀭𑀳𑀢𑁄 𑀓𑀸𑀬𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀦𑀸𑀲𑀯𑁂 𑀥𑀫𑁆𑀫𑁂 𑀯𑀺𑀲𑀁 𑀓𑀫𑁂𑀬𑁆𑀬, 𑀲𑀢𑁆𑀣𑀁 𑀓𑀫𑁂𑀬𑁆𑀬, 𑀅𑀕𑁆𑀕𑀺 𑀓𑀫𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀮𑀩𑁆𑀪𑀸 𑀅𑀭𑀳𑀢𑁄 𑀓𑀸𑀬𑁄 𑀅𑀤𑁆𑀤𑀼𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀕𑀸𑀫𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀦𑀺𑀕𑀫𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀦𑀕𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀚𑀦𑀧𑀤𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑀩𑁆𑀪𑀸 𑀅𑀦𑀸𑀲𑀯𑁄 𑀥𑀫𑁆𑀫𑁄 𑀅𑀤𑁆𑀤𑀼𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀕𑀸𑀫𑀦𑀺𑀕𑀫𑀦𑀕𑀭𑀚𑀦𑀧𑀤𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀁, 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑀼𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁯𑁨. 𑀬𑀤𑀺 𑀅𑀭𑀳𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘𑀻𑀯𑀭𑀁 𑀤𑁂𑀢𑀺, 𑀅𑀦𑀸𑀲𑀯𑀁 𑀳𑀼𑀢𑁆𑀯𑀸 𑀲𑀸𑀲𑀯𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑀸𑀲𑀯𑀁 𑀳𑀼𑀢𑁆𑀯𑀸 𑀲𑀸𑀲𑀯𑀁 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀅𑀦𑀸𑀲𑀯𑀁 𑀢𑀁 𑀲𑀸𑀲𑀯𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑀜𑁆𑀜𑁂𑀯 𑀅𑀦𑀸𑀲𑀯𑀁 𑀢𑀁 𑀲𑀸𑀲𑀯𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀨𑀮𑀁… 𑀲𑀢𑀺𑀧𑀝𑁆𑀞𑀸𑀦𑀁… 𑀲𑀫𑁆𑀫𑀧𑁆𑀧𑀥𑀸𑀦𑀁… 𑀇𑀤𑁆𑀥𑀺𑀧𑀸𑀤𑁄… 𑀇𑀦𑁆𑀤𑁆𑀭𑀺𑀬𑀁… 𑀩𑀮𑀁… 𑀩𑁄𑀚𑁆𑀛𑀗𑁆𑀕𑁄 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑀤𑀺 𑀅𑀭𑀳𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺, 𑀲𑁂𑀦𑀸𑀲𑀦𑀁 𑀤𑁂𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑁂𑀢𑀺, 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀅𑀦𑀸𑀲𑀯𑀁 𑀢𑀁 𑀲𑀸𑀲𑀯𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑀜𑁆𑀜𑁂𑀯 𑀅𑀦𑀸𑀲𑀯𑀁 𑀢𑀁 𑀲𑀸𑀲𑀯𑀦𑁆𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀨𑀮𑀁… 𑀲𑀢𑀺𑀧𑀝𑁆𑀞𑀸𑀦𑀁… 𑀲𑀫𑁆𑀫𑀧𑁆𑀧𑀥𑀸𑀦𑀁… 𑀇𑀤𑁆𑀥𑀺𑀧𑀸𑀤𑁄… 𑀇𑀦𑁆𑀤𑁆𑀭𑀺𑀬𑀁… 𑀩𑀮𑀁… 𑀩𑁄𑀚𑁆𑀛𑀗𑁆𑀕𑁄 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀲𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑀤𑀺 𑀧𑀼𑀣𑀼𑀚𑁆𑀚𑀦𑁄 𑀅𑀭𑀳𑀢𑁄 𑀘𑀻𑀯𑀭𑀁 𑀤𑁂𑀢𑀺, 𑀲𑀸𑀲𑀯𑀁 𑀳𑀼𑀢𑁆𑀯𑀸 𑀅𑀦𑀸𑀲𑀯𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀲𑀯𑀁 𑀳𑀼𑀢𑁆𑀯𑀸 𑀅𑀦𑀸𑀲𑀯𑀁 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀲𑀸𑀲𑀯𑀁 𑀢𑀁 𑀅𑀦𑀸𑀲𑀯𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑀜𑁆𑀜𑁂𑀯 𑀲𑀸𑀲𑀯𑀁 𑀢𑀁 𑀅𑀦𑀸𑀲𑀯𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀸𑀕𑁄 𑀲𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁄𑀲𑁄…𑀧𑁂… 𑀫𑁄𑀳𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀸𑀲𑀯𑀁 𑀳𑀼𑀢𑁆𑀯𑀸 𑀅𑀦𑀸𑀲𑀯𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑀤𑀺 𑀧𑀼𑀣𑀼𑀚𑁆𑀚𑀦𑁄 𑀅𑀭𑀳𑀢𑁄 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺, 𑀲𑁂𑀦𑀸𑀲𑀦𑀁 𑀤𑁂𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑁂𑀢𑀺, 𑀲𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀸𑀲𑀯𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀲𑀸𑀲𑀯𑀁 𑀢𑀁 𑀅𑀦𑀸𑀲𑀯𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑀜𑁆𑀜𑁂𑀯 𑀲𑀸𑀲𑀯𑀁 𑀢𑀁 𑀅𑀦𑀸𑀲𑀯𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀸𑀕𑁄 𑀲𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀸𑀲𑀯𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁄𑀲𑁄…𑀧𑁂… 𑀫𑁄𑀳𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀸𑀲𑀯𑀁 𑀳𑀼𑀢𑁆𑀯𑀸 𑀅𑀦𑀸𑀲𑀯𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀭𑀳𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀸 𑀅𑀦𑀸𑀲𑀯𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀸 𑀅𑀦𑀸𑀲𑀯𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸’’𑀢𑀺.

𑀅𑀦𑀸𑀲𑀯𑀓𑀣𑀸 𑀦𑀺𑀝𑁆𑀞𑀺𑀢𑀸.