𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

(𑁩𑁪) 𑁨. 𑀉𑀧𑀧𑀢𑁆𑀢𑀺𑀓𑀣𑀸

𑁩𑁮𑁮. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑁄𑀢𑀸𑀧𑀦𑁆𑀦𑁄 𑀦 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑁄𑀢𑀸𑀧𑀦𑁆𑀦𑁄 𑀦 𑀳𑁄𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑀓𑀤𑀸𑀕𑀸𑀫𑀻 𑀦 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀲𑀓𑀤𑀸𑀕𑀸𑀫𑀻 𑀦 𑀳𑁄𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀦𑀸𑀕𑀸𑀫𑀻 𑀦 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀦𑀸𑀕𑀸𑀫𑀻 𑀦 𑀳𑁄𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑁩𑁮𑁯. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑁄 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀣𑁂𑀭𑁄 …𑀧𑁂… 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑁄…𑀧𑁂… 𑀫𑀳𑀸𑀓𑀘𑁆𑀘𑀸𑀦𑁄 𑀣𑁂𑀭𑁄…𑀧𑁂… 𑀫𑀳𑀸𑀓𑁄𑀝𑁆𑀞𑀺𑀓𑁄 𑀣𑁂𑀭𑁄…𑀧𑁂… 𑀫𑀳𑀸𑀧𑀦𑁆𑀣𑀓𑁄 𑀣𑁂𑀭𑁄 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑁄 𑀦 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑁄 𑀦 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀣𑁂𑀭𑁄…𑀧𑁂… 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑁄…𑀧𑁂… 𑀫𑀳𑀸𑀓𑀘𑁆𑀘𑀸𑀦𑁄 𑀣𑁂𑀭𑁄…𑀧𑁂… 𑀫𑀳𑀸𑀓𑁄𑀝𑁆𑀞𑀺𑀓𑁄 𑀣𑁂𑀭𑁄…𑀧𑁂… 𑀫𑀳𑀸𑀧𑀦𑁆𑀣𑀓𑁄 𑀣𑁂𑀭𑁄 𑀦 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀫𑀳𑀸𑀧𑀦𑁆𑀣𑀓𑁄 𑀣𑁂𑀭𑁄 𑀦 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑁩𑁯𑁦. 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺 𑀮𑁄𑀓𑀺𑀬𑁂𑀦 𑀲𑀸𑀲𑀯𑁂𑀦…𑀧𑁂… 𑀲𑀁𑀓𑀺𑀮𑁂𑀲𑀺𑀬𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑀧𑀢𑁆𑀢𑁂𑀲𑀺𑀬𑀁 𑀘𑀺𑀢𑁆𑀢𑀁 𑀦𑀺𑀬𑁆𑀬𑀸𑀦𑀺𑀓𑀁 𑀔𑀬𑀕𑀸𑀫𑀻 𑀩𑁄𑀥𑀕𑀸𑀫𑀻 𑀅𑀧𑀘𑀬𑀕𑀸𑀫𑀻 𑀅𑀦𑀸𑀲𑀯𑀁…𑀧𑁂… 𑀅𑀲𑀁𑀓𑀺𑀮𑁂𑀲𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀉𑀧𑀧𑀢𑁆𑀢𑁂𑀲𑀺𑀬𑀁 𑀘𑀺𑀢𑁆𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀦 𑀔𑀬𑀕𑀸𑀫𑀺 𑀦 𑀩𑁄𑀥𑀕𑀸𑀫𑀺 𑀦 𑀅𑀧𑀘𑀬𑀕𑀸𑀫𑀺 𑀲𑀸𑀲𑀯𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀉𑀧𑀧𑀢𑁆𑀢𑁂𑀲𑀺𑀬𑀁 𑀘𑀺𑀢𑁆𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀦 𑀔𑀬𑀕𑀸𑀫𑀺 𑀦 𑀩𑁄𑀥𑀕𑀸𑀫𑀺 𑀦 𑀅𑀧𑀘𑀬𑀕𑀸𑀫𑀺 𑀲𑀸𑀲𑀯𑀁…𑀧𑁂… 𑀲𑀁𑀓𑀺𑀮𑁂𑀲𑀺𑀬𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸’’𑀢𑀺.

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀭𑀸𑀕𑀁 𑀧𑀚𑀳𑀢𑀺, 𑀤𑁄𑀲𑀁 𑀧𑀚𑀳𑀢𑀺, 𑀫𑁄𑀳𑀁 𑀧𑀚𑀳𑀢𑀺, 𑀅𑀦𑁄𑀢𑁆𑀢𑀧𑁆𑀧𑀁 𑀧𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑀧𑀢𑁆𑀢𑁂𑀲𑀺𑀬𑀁 𑀘𑀺𑀢𑁆𑀢𑀁 𑀫𑀕𑁆𑀕𑁄… 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀲𑀫𑁆𑀫𑀧𑁆𑀧𑀥𑀸𑀦𑀁… 𑀇𑀤𑁆𑀥𑀺𑀧𑀸𑀤𑁄… 𑀇𑀦𑁆𑀤𑁆𑀭𑀺𑀬𑀁… 𑀩𑀮𑀁… 𑀩𑁄𑀚𑁆𑀛𑀗𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀘𑀺𑀢𑁆𑀢𑁂𑀦 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸𑀢𑀺? 𑀆𑀫𑀦𑁆𑀢𑀸. 𑀘𑀼𑀢𑀺𑀘𑀺𑀢𑁆𑀢𑀁 𑀫𑀕𑁆𑀕𑀘𑀺𑀢𑁆𑀢𑀁 𑀉𑀧𑀧𑀢𑁆𑀢𑁂𑀲𑀺𑀬𑀁 𑀘𑀺𑀢𑁆𑀢𑀁 𑀨𑀮𑀘𑀺𑀢𑁆𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀉𑀧𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.