𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

(𑁪𑁨) 𑁧𑁦. 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸

𑁪𑁧𑁩. 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀅𑀭𑀳𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻’’𑀢𑀺.

𑁪𑁧𑁪. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁧𑁫. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻’’𑀢𑀺.

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁧𑁬. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻’’𑀢𑀺.

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀬 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀭𑀳𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀬 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀭𑀳𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻’’𑀢𑀺.

𑁪𑁧𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀅𑀭𑀳𑀢𑁆𑀢’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀢𑁄 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀲𑀩𑁆𑀩𑁂 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀅𑀭𑀳𑀢𑁆𑀢’’𑀦𑁆𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀺𑀳𑀺𑀲𑁆𑀲 𑀅𑀭𑀳𑀸, 𑀲𑀳 𑀉𑀧𑀧𑀢𑁆𑀢𑀺𑀬𑀸 𑀅𑀭𑀳𑀸, 𑀅𑀭𑀳𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸, 𑀅𑀭𑀳𑀸 𑀘𑀢𑀽𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀯𑀫𑁂𑀯𑀁 𑀙𑀳𑀺 𑀉𑀧𑁂𑀓𑁆𑀔𑀸𑀳𑀺, 𑀩𑁄𑀥𑀺𑀬𑀸 𑀩𑀼𑀤𑁆𑀥𑁄, 𑀲𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁄, 𑀩𑁄𑀥𑀺𑀲𑀢𑁆𑀢𑁄 𑀑𑀓𑁆𑀓𑀦𑁆𑀢𑀦𑀺𑀬𑀸𑀫𑁄 𑀘𑀭𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄, 𑀧𑀝𑀺𑀧𑀦𑁆𑀦𑀓𑁄 𑀨𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀅𑀭𑀳𑀢𑁆𑀢𑀦𑁆𑀢𑀺.