𑁩. 𑀢𑀢𑀺𑀬𑀯𑀕𑁆𑀕𑁄

(𑁨𑁪) 𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸

𑁩𑁬𑁬. 𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀓𑁄𑀮𑀗𑁆𑀓𑁄𑀮𑁄 𑀏𑀓𑀩𑀻𑀚𑀻 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀏𑀓𑀤𑁂𑀲𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀦 𑀲𑀫𑀦𑁆𑀦𑀸𑀕𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀲𑀓𑀤𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀲𑀓𑀤𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀅𑀦𑀸𑀕𑀸𑀫𑀻, 𑀏𑀓𑀤𑁂𑀲𑀁 𑀅𑀦𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄𑀅𑀓𑀦𑀺𑀝𑁆𑀞𑀕𑀸𑀫𑀻, 𑀏𑀓𑀤𑁂𑀲𑀁 𑀦 𑀉𑀤𑁆𑀥𑀁𑀲𑁄𑀢𑁄𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀓𑀤𑁂𑀲𑀁 𑀅𑀭𑀳𑀸 𑀏𑀓𑀤𑁂𑀲𑀁 𑀦 𑀅𑀭𑀳𑀸, 𑀏𑀓𑀤𑁂𑀲𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀅𑀥𑀺𑀕𑀢𑁄 𑀲𑀘𑁆𑀙𑀺𑀓𑀢𑁄 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀦 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀓𑀤𑁂𑀲𑀁 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄…𑀧𑁂… 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀏𑀓𑀤𑁂𑀲𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁, 𑀪𑀗𑁆𑀕𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁬𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 [𑀤𑀻. 𑀦𑀺. 𑁧.𑁨𑁪𑁮 𑀆𑀤𑀬𑁄]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀯𑀢𑁆𑀢𑀩𑁆𑀩𑀁 [𑀢𑁂𑀦 𑀳𑀺 (𑀲𑀻. 𑀲𑁆𑀬𑀸. 𑀓𑀁.), 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 (𑀓.)] 𑁋 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺.

𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺.

𑀅𑀢𑁆𑀣𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀘𑀺𑀢𑁆𑀢𑀁 𑀭𑀚𑁆𑀚𑀫𑀸𑀦𑀁 𑀤𑀼𑀲𑁆𑀲𑀫𑀸𑀦𑀁 𑀫𑀼𑀬𑁆𑀳𑀫𑀸𑀦𑀁 𑀓𑀺𑀮𑀺𑀲𑁆𑀲𑀫𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀭𑀢𑁆𑀢𑀜𑁆𑀘𑁂𑀯 𑀅𑀭𑀢𑁆𑀢𑀜𑁆𑀘, 𑀤𑀼𑀝𑁆𑀞𑀜𑁆𑀘𑁂𑀯 𑀅𑀤𑀼𑀝𑁆𑀞𑀜𑁆𑀘, 𑀫𑀽𑀴𑁆𑀳𑀜𑁆𑀘𑁂𑀯 𑀅𑀫𑀽𑀴𑁆𑀳𑀜𑁆𑀘, 𑀙𑀺𑀦𑁆𑀦𑀜𑁆𑀘𑁂𑀯 𑀅𑀙𑀺𑀦𑁆𑀦𑀜𑁆𑀘, 𑀪𑀺𑀦𑁆𑀦𑀜𑁆𑀘𑁂𑀯 𑀅𑀪𑀺𑀦𑁆𑀦𑀜𑁆𑀘, 𑀓𑀢𑀜𑁆𑀘𑁂𑀯 𑀅𑀓𑀢𑀜𑁆𑀘𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀭𑀢𑁆𑀢𑀜𑁆𑀘𑁂𑀯 𑀅𑀭𑀢𑁆𑀢𑀜𑁆𑀘, 𑀤𑀼𑀝𑁆𑀞𑀜𑁆𑀘𑁂𑀯 𑀅𑀤𑀼𑀝𑁆𑀞𑀜𑁆𑀘, 𑀫𑀽𑀴𑁆𑀳𑀜𑁆𑀘𑁂𑀯 𑀅𑀫𑀽𑀴𑁆𑀳𑀜𑁆𑀘, 𑀙𑀺𑀦𑁆𑀦𑀜𑁆𑀘𑁂𑀯 𑀅𑀙𑀺𑀦𑁆𑀦𑀜𑁆𑀘, 𑀪𑀺𑀦𑁆𑀦𑀜𑁆𑀘𑁂𑀯 𑀅𑀪𑀺𑀦𑁆𑀦𑀜𑁆𑀘, 𑀓𑀢𑀜𑁆𑀘𑁂𑀯 𑀅𑀓𑀢𑀜𑁆𑀘, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺.

𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.