(𑁩𑁨) 𑁧𑁨. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸

𑁩𑁮𑁪. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺 𑀲𑀜𑁆𑀜𑀸𑀲𑀢𑁆𑀢𑀸𑀯𑀸𑀲𑁄 𑀲𑀜𑁆𑀜𑀸𑀲𑀁𑀲𑀸𑀭𑁄 𑀲𑀜𑁆𑀜𑀸𑀬𑁄𑀦𑀺 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺…𑀧𑁂… 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘𑀲𑀜𑁆𑀜𑀸 𑀅𑀢𑁆𑀣𑀻’’’𑀢𑀺.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀘𑀢𑀼𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀘𑀢𑀼𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘𑀲𑀜𑁆𑀜𑀸 𑀅𑀢𑁆𑀣𑀻’’’𑀢𑀺.

𑁩𑁮𑁫. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺’’, 𑀲𑁄 𑀘 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺…𑀧𑁂… 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺…𑀧𑁂… 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀘𑀢𑀼𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀺,’’ 𑀲𑁄 𑀘 𑀘𑀢𑀼𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘𑀲𑀜𑁆𑀜𑀸 𑀅𑀢𑁆𑀣𑀻’’’𑀢𑀺.

𑁩𑁮𑁬. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀅𑀢𑁆𑀣𑀺 𑀢𑀢𑁆𑀣 𑀲𑀜𑁆𑀜𑀸𑀢𑀺? 𑀆𑀫𑀦𑁆𑀢𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀅𑀢𑁆𑀣𑀺 𑀢𑀢𑁆𑀣 𑀲𑀜𑁆𑀜𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀅𑀢𑁆𑀣𑀺 𑀢𑀢𑁆𑀣 𑀲𑀜𑁆𑀜𑀸𑀢𑀺? 𑀆𑀫𑀦𑁆𑀢𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀅𑀢𑁆𑀣𑀺 𑀢𑀢𑁆𑀣 𑀲𑀜𑁆𑀜𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘𑀲𑀜𑁆𑀜𑀸 𑀅𑀢𑁆𑀣𑀻’𑀢𑀺 𑀯𑀸 ‘𑀦𑀢𑁆𑀣𑀻’𑀢𑀺 𑀯𑀸’’𑀢𑀺.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺? 𑀆𑀫𑀦𑁆𑀢𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 [𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀯𑀢𑁆𑀢𑀩𑁆𑀩𑀁 (?)] 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘𑀲𑀜𑁆𑀜𑀸 𑀅𑀢𑁆𑀣𑀻’𑀢𑀺 𑀯𑀸 ‘𑀦𑀢𑁆𑀣𑀻’𑀢𑀺 𑀯𑀸’’𑀢𑀺.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀸𑀢𑀺? 𑀆𑀫𑀦𑁆𑀢𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸𑀢𑀺 𑀓𑀢𑁆𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 [𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 (𑀲𑀻. 𑀓.)] 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀯𑁂𑀤𑀦𑀸’’𑀢𑀺 𑀯𑀸 ‘‘𑀅𑀯𑁂𑀤𑀦𑀸’’𑀢𑀺 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑀮𑀁 𑀲𑀸𑀥𑀸𑀭𑀡𑀁 𑀅𑀭𑀺𑀬𑀁, 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺;

𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀁, 𑀅𑀢𑁆𑀣𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀁.

𑀅𑀝𑁆𑀞𑀫𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀳𑀻𑀦𑀁;

𑀅𑀝𑁆𑀞𑀫𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀦𑀢𑁆𑀣𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀓𑁆𑀔𑀼𑀁.

𑀲𑁄𑀢𑀁 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁, 𑀬𑀣𑀸𑀓𑀫𑁆𑀫𑀽𑀧𑀕𑀢𑀁 𑀜𑀸𑀡𑀁;

𑀤𑁂𑀯𑁂𑀲𑀼 𑀲𑀁𑀯𑀭𑁄 𑀅𑀲𑀜𑁆𑀜-𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀏𑀯𑀫𑁂𑀯 𑀪𑀯𑀕𑁆𑀕𑀦𑁆𑀢𑀺.