𑁨. 𑀤𑀼𑀢𑀺𑀬𑀯𑀕𑁆𑀕𑁄

(𑁧𑁭) 𑁮. 𑀓𑀼𑀓𑁆𑀓𑀼𑀴𑀓𑀣𑀸

𑁩𑁩𑁮. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀲𑀼𑀔𑀸 𑀯𑁂𑀤𑀦𑀸, 𑀓𑀸𑀬𑀺𑀓𑀁 𑀲𑀼𑀔𑀁, 𑀘𑁂𑀢𑀲𑀺𑀓𑀁 𑀲𑀼𑀔𑀁, 𑀤𑀺𑀩𑁆𑀩𑀁 𑀲𑀼𑀔𑀁, 𑀫𑀸𑀦𑀼𑀲𑀓𑀁 𑀲𑀼𑀔𑀁, 𑀮𑀸𑀪𑀲𑀼𑀔𑀁, 𑀲𑀓𑁆𑀓𑀸𑀭𑀲𑀼𑀔𑀁, 𑀬𑀸𑀦𑀲𑀼𑀔𑀁, 𑀲𑀬𑀦𑀲𑀼𑀔𑀁, 𑀇𑀲𑁆𑀲𑀭𑀺𑀬𑀲𑀼𑀔𑀁, 𑀆𑀥𑀺𑀧𑀘𑁆𑀘𑀲𑀼𑀔𑀁, 𑀕𑀺𑀳𑀺𑀲𑀼𑀔𑀁, 𑀲𑀸𑀫𑀜𑁆𑀜𑀲𑀼𑀔𑀁, 𑀲𑀸𑀲𑀯𑀁 𑀲𑀼𑀔𑀁, 𑀅𑀦𑀸𑀲𑀯𑀁 𑀲𑀼𑀔𑀁, 𑀉𑀧𑀥𑀺𑀲𑀼𑀔𑀁, 𑀦𑀺𑀭𑀽𑀧𑀥𑀺𑀲𑀼𑀔𑀁, 𑀲𑀸𑀫𑀺𑀲𑀁 𑀲𑀼𑀔𑀁, 𑀦𑀺𑀭𑀸𑀫𑀺𑀲𑀁 𑀲𑀼𑀔𑀁, 𑀲𑀧𑁆𑀧𑀻𑀢𑀺𑀓𑀁 𑀲𑀼𑀔𑀁, 𑀦𑀺𑀧𑁆𑀧𑀻𑀢𑀺𑀓𑀁 𑀲𑀼𑀔𑀁, 𑀛𑀸𑀦𑀲𑀼𑀔𑀁, 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀓𑀸𑀫𑀲𑀼𑀔𑀁, 𑀦𑁂𑀓𑁆𑀔𑀫𑁆𑀫𑀲𑀼𑀔𑀁, 𑀯𑀺𑀯𑁂𑀓𑀲𑀼𑀔𑀁, 𑀉𑀧𑀲𑀫𑀲𑀼𑀔𑀁, 𑀲𑀫𑁆𑀩𑁄𑀥𑀲𑀼𑀔𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀲𑀼𑀔𑀸 𑀯𑁂𑀤𑀦𑀸…𑀧𑁂… 𑀲𑀫𑁆𑀩𑁄𑀥𑀲𑀼𑀔𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀉𑀧𑀸𑀬𑀸𑀲𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁! 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀆𑀤𑀺𑀢𑁆𑀢𑀁? 𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄; 𑀬𑀫𑀺𑀤𑀁 [𑀬𑀫𑁆𑀧𑀺𑀤𑀁 (𑀲𑀁. 𑀦𑀺. 𑁪.𑁨𑁮)] 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? ‘𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢’𑀦𑁆𑀢𑀺 𑀯𑀤𑀸𑀫𑀺. 𑀲𑁄𑀢𑀁 𑀆𑀤𑀺𑀢𑁆𑀢𑀁, 𑀲𑀤𑁆𑀤𑀸 𑀆𑀤𑀺𑀢𑁆𑀢𑀸…𑀧𑁂… 𑀖𑀸𑀦𑀁 𑀆𑀤𑀺𑀢𑁆𑀢𑀁, 𑀕𑀦𑁆𑀥𑀸 𑀆𑀤𑀺𑀢𑁆𑀢𑀸…𑀧𑁂… 𑀚𑀺𑀯𑁆𑀳𑀸 𑀆𑀤𑀺𑀢𑁆𑀢𑀸, 𑀭𑀲𑀸 𑀆𑀤𑀺𑀢𑁆𑀢𑀸…𑀧𑁂… 𑀓𑀸𑀬𑁄 𑀆𑀤𑀺𑀢𑁆𑀢𑁄, 𑀨𑁄𑀝𑁆𑀞𑀩𑁆𑀩𑀸 𑀆𑀤𑀺𑀢𑁆𑀢𑀸…𑀧𑁂… 𑀫𑀦𑁄 𑀆𑀤𑀺𑀢𑁆𑀢𑁄, 𑀥𑀫𑁆𑀫𑀸 𑀆𑀤𑀺𑀢𑁆𑀢𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄; 𑀬𑀫𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? ‘𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢’𑀦𑁆𑀢𑀺 𑀯𑀤𑀸𑀫𑀻’’𑀢𑀺 [𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁪.𑁨𑁮]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀯𑀢𑁆𑀢𑀩𑁆𑀩𑀁 [𑀢𑁂𑀦 𑀳𑀺 (𑀲𑀻. 𑀲𑁆𑀬𑀸.), 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 (𑀓.)] 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸! 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺 [𑀫. 𑀦𑀺. 𑁧.𑁧𑁬𑁬; 𑀲𑀁. 𑀦𑀺. 𑁪.𑁨𑁬𑁮]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀮𑀸𑀪𑀸 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄 𑀧𑀝𑀺𑀮𑀤𑁆𑀥𑁄 [𑀧𑀝𑀺𑀯𑀺𑀤𑁆𑀥𑁄 (𑀩𑀳𑀽𑀲𑀼)] 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬! 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀦𑀺𑀭𑀬𑀸. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀅𑀦𑀺𑀝𑁆𑀞𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀇𑀝𑁆𑀞𑀭𑀽𑀧𑀁, 𑀅𑀓𑀦𑁆𑀢𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀓𑀦𑁆𑀢𑀭𑀽𑀧𑀁, 𑀅𑀫𑀦𑀸𑀧𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀫𑀦𑀸𑀧𑀭𑀽𑀧𑀁. 𑀬𑀁 𑀓𑀺𑀜𑁆𑀘𑀺 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀅𑀦𑀺𑀝𑁆𑀞𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀇𑀝𑁆𑀞𑀭𑀽𑀧𑀁, 𑀅𑀓𑀦𑁆𑀢𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀓𑀦𑁆𑀢𑀭𑀽𑀧𑀁, 𑀅𑀫𑀦𑀸𑀧𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀫𑀦𑀸𑀧𑀭𑀽𑀧’’𑀦𑁆𑀢𑀺 [𑀲𑀁. 𑀦𑀺. 𑁪.𑁧𑁩𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀯𑀢𑁆𑀢𑀩𑁆𑀩𑀁 [𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 (𑀲𑁆𑀬𑀸. 𑀓.)] 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀮𑀸𑀪𑀸 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄 𑀧𑀝𑀺𑀮𑀤𑁆𑀥𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬! 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀲𑀕𑁆𑀕𑀸. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀇𑀝𑁆𑀞𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀅𑀦𑀺𑀝𑁆𑀞𑀭𑀽𑀧𑀁, 𑀓𑀦𑁆𑀢𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀅𑀓𑀦𑁆𑀢𑀭𑀽𑀧𑀁, 𑀫𑀦𑀸𑀧𑀭𑀽𑀧𑀜𑁆𑀜𑁂𑀯 𑀧𑀲𑁆𑀲𑀢𑀺 𑀦𑁄 𑀅𑀫𑀦𑀸𑀧𑀭𑀽𑀧𑀁. 𑀬𑀁 𑀓𑀺𑀜𑁆𑀘𑀺 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀇𑀝𑁆𑀞𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀅𑀦𑀺𑀝𑁆𑀞𑀭𑀽𑀧𑀁, 𑀓𑀦𑁆𑀢𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀅𑀓𑀦𑁆𑀢𑀭𑀽𑀧𑀁, 𑀫𑀦𑀸𑀧𑀭𑀽𑀧𑀜𑁆𑀜𑁂𑀯 𑀯𑀺𑀚𑀸𑀦𑀸𑀢𑀺 𑀦𑁄 𑀅𑀫𑀦𑀸𑀧𑀭𑀽𑀧’’𑀦𑁆𑀢𑀺 [𑀲𑀁. 𑀦𑀺. 𑁪.𑁧𑁩𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 [𑀲𑀁. 𑀦𑀺. 𑁩.𑁧𑁫],’’ 𑀯𑀼𑀢𑁆𑀢𑀁 𑀪𑀕𑀯𑀢𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 [𑀥. 𑀧. 𑁨𑁭𑁭; 𑀫. 𑀦𑀺. 𑁧.𑁩𑁫𑁬]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁,’’ 𑀯𑀼𑀢𑁆𑀢𑀁 𑀪𑀕𑀯𑀢𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸,’’ 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀤𑀸𑀦𑀁 𑀅𑀦𑀺𑀝𑁆𑀞𑀨𑀮𑀁 𑀅𑀓𑀦𑁆𑀢𑀨𑀮𑀁 𑀅𑀫𑀦𑀼𑀜𑁆𑀜𑀨𑀮𑀁 𑀲𑁂𑀘𑀦𑀓𑀨𑀮𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀲𑀻𑀮𑀁…𑀧𑁂… 𑀉𑀧𑁄𑀲𑀣𑁄…𑀧𑁂… 𑀪𑀸𑀯𑀦𑀸…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀦𑀺𑀝𑁆𑀞𑀨𑀮𑀁 𑀅𑀓𑀦𑁆𑀢𑀨𑀮𑀁 𑀅𑀫𑀦𑀼𑀜𑁆𑀜𑀨𑀮𑀁 𑀲𑁂𑀘𑀦𑀓𑀨𑀮𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀦𑀦𑀼 𑀤𑀸𑀦𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮𑀁 𑀫𑀦𑀼𑀜𑁆𑀜𑀨𑀮𑀁 𑀅𑀲𑁂𑀘𑀦𑀓𑀨𑀮𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑀸𑀦𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮𑀁 𑀫𑀦𑀼𑀜𑁆𑀜𑀨𑀮𑀁 𑀅𑀲𑁂𑀘𑀦𑀓𑀨𑀮𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀦𑀦𑀼 𑀲𑀻𑀮𑀁… 𑀉𑀧𑁄𑀲𑀣𑁄… 𑀪𑀸𑀯𑀦𑀸… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮𑀁 𑀫𑀦𑀼𑀜𑁆𑀜𑀨𑀮𑀁 𑀅𑀲𑁂𑀘𑀦𑀓𑀨𑀮𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮𑀁 𑀫𑀦𑀼𑀜𑁆𑀜𑀨𑀮𑀁 𑀅𑀲𑁂𑀘𑀦𑀓𑀨𑀮𑀁 𑀲𑀼𑀔𑀼𑀤𑁆𑀭𑀬𑀁 𑀲𑀼𑀔𑀯𑀺𑀧𑀸𑀓𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑁂, 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄.

‘‘𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂, 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄;

𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔𑀁 [𑀫𑀳𑀸𑀯. 𑁫; 𑀉𑀤𑀸. 𑁧𑁧 𑀉𑀤𑀸𑀦𑁂 𑀘].

‘‘𑀢𑀁 𑀲𑀼𑀔𑁂𑀦 𑀲𑀼𑀔𑀁 𑀧𑀢𑁆𑀢𑀁, 𑀅𑀘𑁆𑀘𑀦𑁆𑀢𑀲𑀼𑀔𑀫𑁂𑀯 𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑁄𑀥𑀺𑀁 𑀓𑀢𑁆𑀯𑀸 𑀓𑀼𑀓𑁆𑀓𑀼𑀴𑀸’’𑀢𑀺.

𑀓𑀼𑀓𑁆𑀓𑀼𑀴𑀓𑀣𑀸 𑀦𑀺𑀝𑁆𑀞𑀺𑀢𑀸.