(𑁧𑁧) 𑁨. 𑀅𑀜𑁆𑀜𑀸𑀡𑀓𑀣𑀸

𑁩𑁧𑁪. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀅𑀜𑁆𑀜𑀸𑀡𑀧𑀓𑀢𑁄 𑀧𑀸𑀡𑀁 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬, 𑀫𑀼𑀲𑀸 𑀪𑀡𑁂𑀬𑁆𑀬, 𑀧𑀺𑀲𑀼𑀡𑀁 𑀪𑀡𑁂𑀬𑁆𑀬, 𑀨𑀭𑀼𑀲𑀁 𑀪𑀡𑁂𑀬𑁆𑀬, 𑀲𑀫𑁆𑀨𑀁 𑀧𑀮𑀧𑁂𑀬𑁆𑀬, 𑀲𑀦𑁆𑀥𑀺𑀁 𑀙𑀺𑀦𑁆𑀤𑁂𑀬𑁆𑀬, 𑀦𑀺𑀮𑁆𑀮𑁄𑀧𑀁 𑀳𑀭𑁂𑀬𑁆𑀬, 𑀏𑀓𑀸𑀕𑀸𑀭𑀺𑀬𑀁 𑀓𑀭𑁂𑀬𑁆𑀬, 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑁂𑀬𑁆𑀬, 𑀧𑀭𑀤𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀕𑀸𑀫𑀖𑀸𑀢𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀁 𑀓𑀭𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀸𑀡𑀧𑀓𑀢𑁄 𑀧𑀸𑀡𑀁 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬, 𑀫𑀼𑀲𑀸 𑀪𑀡𑁂𑀬𑁆𑀬…𑀧𑁂… 𑀕𑀸𑀫𑀖𑀸𑀢𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀅𑀭𑀳𑀸 𑀅𑀜𑁆𑀜𑀸𑀡𑀧𑀓𑀢𑁄 𑀧𑀸𑀡𑀁 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬…𑀧𑁂… 𑀕𑀸𑀫𑀖𑀸𑀢𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀁 𑀓𑀭𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀦 𑀘 𑀅𑀭𑀳𑀸 𑀅𑀜𑁆𑀜𑀸𑀡𑀧𑀓𑀢𑁄 𑀧𑀸𑀡𑀁 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬…𑀧𑁂… 𑀕𑀸𑀫𑀖𑀸𑀢𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀦 𑀘 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀸𑀡𑀧𑀓𑀢𑁄 𑀧𑀸𑀡𑀁 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬…𑀧𑁂… 𑀕𑀸𑀫𑀖𑀸𑀢𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀁 𑀓𑀭𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁, 𑀲𑀺𑀓𑁆𑀔𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀦𑀢𑁆𑀣𑀺 𑀅𑀭𑀳𑀢𑁄 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁, 𑀲𑀺𑀓𑁆𑀔𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀅𑀭𑀳𑀢𑁄 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀢𑀲𑁆𑀲 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀅𑀢𑁆𑀣𑀺 𑀢𑀲𑁆𑀲 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀢𑀲𑁆𑀲 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀜𑁆𑀜𑀸𑀡𑀁, 𑀦𑀢𑁆𑀣𑀺 𑀢𑀲𑁆𑀲 𑀲𑀢𑁆𑀣𑀭𑀺 𑀅𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀅𑀜𑁆𑀜𑀸𑀡𑀁, 𑀲𑀗𑁆𑀖𑁂 𑀅𑀜𑁆𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑁩𑁧𑁫. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀢𑁄 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀫𑁄𑀳𑁄 𑀧𑀳𑀻𑀦𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀢𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀢𑁄 𑀤𑁄𑀲𑀧𑁆𑀧𑀳𑀸𑀦𑀸𑀬…𑀧𑁂… 𑀫𑁄𑀳𑀧𑁆𑀧𑀳𑀸𑀦𑀸𑀬…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄 …𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀸 𑀯𑀻𑀢𑀭𑀸𑀕𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑁩𑁧𑁬. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀢𑁆𑀣𑀺 𑀅𑀜𑁆𑀜𑀸𑀡𑀁, 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀦𑀢𑁆𑀣𑀺 𑀅𑀜𑁆𑀜𑀸𑀡𑀦𑁆𑀢𑀺. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀢𑁆𑀣𑀺 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀢𑁆𑀣𑀺 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀦𑀢𑁆𑀣𑀺 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀦𑀢𑁆𑀣𑀺 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀫𑁄𑀳𑁄 𑀧𑀳𑀻𑀦𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀤𑁄𑀲𑀧𑁆𑀧𑀳𑀸𑀦𑀸𑀬…𑀧𑁂… 𑀫𑁄𑀳𑀧𑁆𑀧𑀳𑀸𑀦𑀸𑀬…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀥𑀫𑁆𑀫𑀓𑀼𑀲𑀮𑁄 𑀅𑀭𑀳𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀭𑀥𑀫𑁆𑀫𑀓𑀼𑀲𑀮𑁄 𑀅𑀭𑀳𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀅𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑁄 𑀧𑀳𑀻𑀦𑁄, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀤𑁄𑀲𑁄 𑀧𑀳𑀻𑀦𑁄…𑀧𑁂… 𑀫𑁄𑀳𑁄 𑀧𑀳𑀻𑀦𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀻𑀦𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸…𑀧𑁂… 𑀤𑁄𑀲𑀧𑁆𑀧𑀳𑀸𑀦𑀸𑀬 𑀫𑁄𑀳𑀧𑁆𑀧𑀳𑀸𑀦𑀸𑀬…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀫𑀕𑁆𑀕𑁄 𑀪𑀸𑀯𑀺𑀢𑁄…𑀧𑁂… 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀥𑀫𑁆𑀫𑀓𑀼𑀲𑀮𑀲𑁆𑀲 𑀅𑀭𑀳𑀢𑁄 𑀅𑀦𑁄𑀢𑁆𑀢𑀧𑁆𑀧𑀧𑀳𑀸𑀦𑀸𑀬 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀥𑀫𑁆𑀫𑀓𑀼𑀲𑀮𑁄 𑀅𑀭𑀳𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀥𑀫𑁆𑀫𑀓𑀼𑀲𑀮𑁄 𑀅𑀭𑀳𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 …𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁧𑁭. 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀚𑀸𑀦𑀢𑁄𑀳𑀁 [𑀚𑀸𑀦𑀢𑀸𑀳𑀁 (𑀲𑀻.), 𑀚𑀸𑀦𑀢𑁆𑀯𑀸𑀳𑀁 (𑀲𑁆𑀬𑀸. 𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺, 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀓𑀺𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺? ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸…𑀧𑁂… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺 [𑀲𑀁. 𑀦𑀺. 𑁩.𑁧𑁦𑁧; 𑀇𑀢𑀺𑀯𑀼. 𑁧𑁦𑁨; 𑀲𑀁. 𑀦𑀺. 𑁫.𑁧𑁦𑁯𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀚𑀸𑀦𑀢𑁄𑀳𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺, 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀓𑀺𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑁋 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑁋 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑁋 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑁋 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺 [𑀲𑀁. 𑀦𑀺. 𑁫.𑁧𑁦𑁯𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀲𑀩𑁆𑀩𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺 [𑀲𑀁. 𑀦𑀺. 𑁪.𑁨𑁬; 𑀇𑀢𑀺𑀯𑀼. 𑁭 𑀇𑀢𑀺𑀯𑀼𑀢𑁆𑀢𑀓𑁂𑀧𑀺]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀲𑀳𑀸𑀯𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀤𑀸𑀬,

𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺;

𑀲𑀓𑁆𑀓𑀸𑀬𑀤𑀺𑀝𑁆𑀞𑀻 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘,

𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺;

𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄,

𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩 𑀓𑀸𑀢𑀼’’𑀦𑁆𑀢𑀺.

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺, 𑀲𑀳 𑀤𑀲𑁆𑀲𑀦𑀼𑀧𑁆𑀧𑀸𑀤𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀭𑀳𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀸𑀦𑁂𑀬𑁆𑀬, 𑀫𑀕𑁆𑀕𑀸𑀫𑀕𑁆𑀕𑀁 𑀦 𑀚𑀸𑀦𑁂𑀬𑁆𑀬, 𑀢𑀺𑀡𑀓𑀝𑁆𑀞𑀯𑀦𑀧𑁆𑀧𑀢𑀻𑀦𑀁 𑀦𑀸𑀫𑀁 𑀦 𑀚𑀸𑀦𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀭𑀳𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀸𑀦𑁂𑀬𑁆𑀬, 𑀫𑀕𑁆𑀕𑀸𑀫𑀕𑁆𑀕𑀁 𑀦 𑀚𑀸𑀦𑁂𑀬𑁆𑀬, 𑀢𑀺𑀡𑀓𑀝𑁆𑀞𑀯𑀦𑀧𑁆𑀧𑀢𑀻𑀦𑀁 𑀦𑀸𑀫𑀁 𑀦 𑀚𑀸𑀦𑁂𑀬𑁆𑀬, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡’’𑀦𑁆𑀢𑀺.

𑀅𑀭𑀳𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀸𑀦𑁂𑀬𑁆𑀬, 𑀫𑀕𑁆𑀕𑀸𑀫𑀕𑁆𑀕𑀁 𑀦 𑀚𑀸𑀦𑁂𑀬𑁆𑀬, 𑀢𑀺𑀡𑀓𑀝𑁆𑀞𑀯𑀦𑀧𑁆𑀧𑀢𑀻𑀦𑀁 𑀦𑀸𑀫𑀁 𑀦 𑀚𑀸𑀦𑁂𑀬𑁆𑀬𑀸𑀢𑀺, 𑀅𑀢𑁆𑀣𑀺 𑀅𑀭𑀳𑀢𑁄 𑀅𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀦 𑀚𑀸𑀦𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀜𑁆𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.