(𑁨𑁦) 𑁧𑁧. 𑀦𑀺𑀭𑁄𑀥𑀓𑀣𑀸

𑁩𑁫𑁩. 𑀤𑁆𑀯𑁂 𑀦𑀺𑀭𑁄𑀥𑀸𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀤𑀼𑀓𑁆𑀔𑀦𑀺𑀭𑁄𑀥𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀤𑀼𑀓𑁆𑀔𑀦𑀺𑀭𑁄𑀥𑀸𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀤𑀼𑀓𑁆𑀔𑀲𑀘𑁆𑀘𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀲𑀫𑀼𑀤𑀬𑀲𑀘𑁆𑀘𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀫𑀕𑁆𑀕𑀲𑀘𑁆𑀘𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀦𑀺𑀭𑁄𑀥𑀲𑀘𑁆𑀘𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀤𑁆𑀯𑁂 𑀮𑁂𑀡𑀸𑀦𑀺… 𑀤𑁆𑀯𑁂 𑀲𑀭𑀡𑀸𑀦𑀺… 𑀤𑁆𑀯𑁂 𑀧𑀭𑀸𑀬𑀡𑀸𑀦𑀺… 𑀤𑁆𑀯𑁂 𑀅𑀘𑁆𑀘𑀼𑀢𑀸𑀦𑀺… 𑀤𑁆𑀯𑁂 𑀅𑀫𑀢𑀸𑀦𑀺… 𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀦𑀺𑀩𑁆𑀩𑀸𑀦𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀸𑀦𑀁 𑀉𑀘𑁆𑀘𑀦𑀻𑀘𑀢𑀸 𑀳𑀻𑀦𑀧𑀡𑀻𑀢𑀢𑀸 𑀉𑀓𑁆𑀓𑀁𑀲𑀸𑀯𑀓𑀁𑀲𑁄 𑀲𑀻𑀫𑀸 𑀯𑀸 𑀪𑁂𑀤𑁄 𑀯𑀸 𑀭𑀸𑀚𑀺 𑀯𑀸 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀦𑀺𑀭𑁄𑀥𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑁂 𑀲𑀗𑁆𑀔𑀸𑀭𑁂 𑀧𑀝𑀺𑀲𑀗𑁆𑀔𑀸 𑀦𑀺𑀭𑁄𑀥𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑁂 𑀲𑀗𑁆𑀔𑀸𑀭𑁂 𑀧𑀝𑀺𑀲𑀗𑁆𑀔𑀸 𑀦𑀺𑀭𑁄𑀥𑁂𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑁆𑀯𑁂 𑀦𑀺𑀭𑁄𑀥𑀸’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀤𑁆𑀯𑁂 𑀦𑀺𑀭𑁄𑀥𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀧𑀺 𑀲𑀗𑁆𑀔𑀸𑀭𑀸 𑀅𑀘𑁆𑀘𑀦𑁆𑀢𑀪𑀕𑁆𑀕𑀸, 𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀧𑀺 𑀲𑀗𑁆𑀔𑀸𑀭𑀸 𑀅𑀘𑁆𑀘𑀦𑁆𑀢𑀪𑀕𑁆𑀕𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀧𑀺 𑀲𑀗𑁆𑀔𑀸𑀭𑀸 𑀅𑀘𑁆𑀘𑀦𑁆𑀢𑀪𑀕𑁆𑀕𑀸, 𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀧𑀺 𑀲𑀗𑁆𑀔𑀸𑀭𑀸 𑀅𑀘𑁆𑀘𑀦𑁆𑀢𑀪𑀕𑁆𑀕𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑁆𑀯𑁂 𑀦𑀺𑀭𑁄𑀥𑀸’’𑀢𑀺.

𑀤𑁆𑀯𑁂 𑀦𑀺𑀭𑁄𑀥𑀸𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸𑀧𑀺 [𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸 (?)] 𑀲𑀗𑁆𑀔𑀸𑀭𑀸 𑀅𑀭𑀺𑀬𑀫𑀕𑁆𑀕𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀢𑀺? 𑀆𑀫𑀦𑁆𑀢𑀸. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸 𑀲𑀗𑁆𑀔𑀸𑀭𑀸 𑀅𑀭𑀺𑀬𑀫𑀕𑁆𑀕𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑁆𑀯𑁂 𑀦𑀺𑀭𑁄𑀥𑀸𑀢𑀺? 𑀆𑀫𑀦𑁆𑀢𑀸. 𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸 𑀲𑀗𑁆𑀔𑀸𑀭𑀸 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑀼𑀤𑁆𑀥𑀸 𑀲𑀗𑁆𑀔𑀸𑀭𑀸 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀤𑁆𑀯𑁂 𑀦𑀺𑀭𑁄𑀥𑀸’’𑀢𑀺.

𑀦𑀺𑀭𑁄𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀭𑀽𑀧𑀳𑀸𑀭𑁄 𑀅𑀜𑁆𑀜𑀸𑀡𑀁, 𑀓𑀗𑁆𑀔𑀸 𑀧𑀭𑀯𑀺𑀢𑀸𑀭𑀡𑀸;

𑀯𑀘𑀻𑀪𑁂𑀤𑁄 𑀤𑀼𑀓𑁆𑀔𑀸𑀳𑀸𑀭𑁄, 𑀘𑀺𑀢𑁆𑀢𑀝𑁆𑀞𑀺𑀢𑀺 𑀘 𑀓𑀼𑀓𑁆𑀓𑀼𑀴𑀸;

𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑁄, 𑀯𑁄𑀳𑀸𑀭𑁄 𑀘 𑀦𑀺𑀭𑁄𑀥𑀓𑁄𑀢𑀺.