𑁨. 𑀤𑀼𑀢𑀺𑀬𑀯𑀕𑁆𑀕𑁄

(𑁧𑁯) 𑁧𑁦. 𑀯𑁄𑀳𑀸𑀭𑀓𑀣𑀸

𑁩𑁪𑁭. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀼𑀢𑁆𑀢𑀭𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺 𑀦𑁄 𑀮𑁄𑀓𑀺𑀬𑁂, 𑀮𑁄𑀓𑀼𑀢𑁆𑀢𑀭𑁂𑀦 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀺 𑀦𑁄 𑀮𑁄𑀓𑀺𑀬𑁂𑀦, 𑀲𑀸𑀯𑀓𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀺 𑀦𑁄 𑀧𑀼𑀣𑀼𑀚𑁆𑀚𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑀦𑀦𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀮𑁄𑀓𑀺𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀮𑁄𑀓𑀺𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑀦𑀦𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀧𑀼𑀣𑀼𑀚𑁆𑀚𑀦𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀧𑀼𑀣𑀼𑀚𑁆𑀚𑀦𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑁩𑁪𑁮. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑁄 𑀨𑀮𑀁 𑀦𑀺𑀩𑁆𑀩𑀸𑀦𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀁, 𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀇𑀤𑁆𑀥𑀺𑀧𑀸𑀤𑁄 𑀇𑀦𑁆𑀤𑁆𑀭𑀺𑀬𑀁 𑀩𑀮𑀁 𑀩𑁄𑀚𑁆𑀛𑀗𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄, 𑀲𑁄𑀢𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺, 𑀲𑁄𑀢𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄, 𑀦 𑀲𑁄𑀢𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺, 𑀦 𑀲𑁄𑀢𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄, 𑀦 𑀲𑁄𑀢𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺, 𑀦 𑀲𑁄𑀢𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑁩𑁪𑁯. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁂 𑀭𑀚𑁆𑀚𑁂𑀬𑁆𑀬𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀭𑀸𑀕𑀝𑁆𑀞𑀸𑀦𑀺𑀬𑁄 𑀭𑀚𑀦𑀻𑀬𑁄 𑀓𑀫𑀦𑀻𑀬𑁄 𑀫𑀤𑀦𑀻𑀬𑁄 𑀩𑀦𑁆𑀥𑀦𑀻𑀬𑁄 𑀫𑀼𑀘𑁆𑀙𑀦𑀻𑀬𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀭𑀸𑀕𑀝𑁆𑀞𑀸𑀦𑀺𑀬𑁄 𑀦 𑀭𑀚𑀦𑀻𑀬𑁄 𑀦 𑀓𑀫𑀦𑀻𑀬𑁄 𑀦 𑀫𑀤𑀦𑀻𑀬𑁄 𑀦 𑀩𑀦𑁆𑀥𑀦𑀻𑀬𑁄 𑀦 𑀫𑀼𑀘𑁆𑀙𑀦𑀻𑀬𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀭𑀸𑀕𑀝𑁆𑀞𑀸𑀦𑀺𑀬𑁄 𑀦 𑀭𑀚𑀦𑀻𑀬𑁄 𑀦 𑀓𑀫𑀦𑀻𑀬𑁄 𑀦 𑀫𑀤𑀦𑀻𑀬𑁄 𑀦 𑀩𑀦𑁆𑀥𑀦𑀻𑀬𑁄 𑀦 𑀫𑀼𑀘𑁆𑀙𑀦𑀻𑀬𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁂 𑀤𑀼𑀲𑁆𑀲𑁂𑀬𑁆𑀬𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀤𑁄𑀲𑀝𑁆𑀞𑀸𑀦𑀺𑀬𑁄 𑀓𑁄𑀧𑀝𑁆𑀞𑀸𑀦𑀺𑀬𑁄 𑀧𑀝𑀺𑀖𑀝𑁆𑀞𑀸𑀦𑀺𑀬𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀤𑁄𑀲𑀝𑁆𑀞𑀸𑀦𑀺𑀬𑁄 𑀦 𑀓𑁄𑀧𑀝𑁆𑀞𑀸𑀦𑀺𑀬𑁄 𑀦 𑀧𑀝𑀺𑀖𑀝𑁆𑀞𑀸𑀦𑀺𑀬𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀤𑁄𑀲𑀝𑁆𑀞𑀸𑀦𑀺𑀬𑁄 𑀦 𑀓𑁄𑀧𑀝𑁆𑀞𑀸𑀦𑀺𑀬𑁄 𑀦 𑀧𑀝𑀺𑀖𑀝𑁆𑀞𑀸𑀦𑀺𑀬𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁂 𑀫𑀼𑀬𑁆𑀳𑁂𑀬𑁆𑀬𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀫𑁄𑀳𑀝𑁆𑀞𑀸𑀦𑀺𑀬𑁄 𑀅𑀜𑁆𑀜𑀸𑀡𑀓𑀭𑀡𑁄 𑀅𑀘𑀓𑁆𑀔𑀼𑀓𑀭𑀡𑁄 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄 𑀯𑀺𑀖𑀸𑀢𑀧𑀓𑁆𑀔𑀺𑀓𑁄 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀫𑁄𑀳𑀝𑁆𑀞𑀸𑀦𑀺𑀬𑁄 𑀦 𑀅𑀜𑁆𑀜𑀸𑀡𑀓𑀭𑀡𑁄 𑀦 𑀅𑀘𑀓𑁆𑀔𑀼𑀓𑀭𑀡𑁄 𑀧𑀜𑁆𑀜𑀸𑀯𑀼𑀤𑁆𑀥𑀺𑀓𑁄 𑀅𑀯𑀺𑀖𑀸𑀢𑀧𑀓𑁆𑀔𑀺𑀓𑁄 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀦 𑀫𑁄𑀳𑀝𑁆𑀞𑀸𑀦𑀺𑀬𑁄 𑀦 𑀅𑀜𑁆𑀜𑀸𑀡𑀓𑀭𑀡𑁄 𑀦 𑀅𑀘𑀓𑁆𑀔𑀼𑀓𑀭𑀡𑁄 𑀧𑀜𑁆𑀜𑀸𑀯𑀼𑀤𑁆𑀥𑀺𑀓𑁄 𑀅𑀯𑀺𑀖𑀸𑀢𑀧𑀓𑁆𑀔𑀺𑀓𑁄 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄’’𑀢𑀺.

𑁩𑁫𑁦. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀆𑀫𑀦𑁆𑀢𑀸. 𑀬𑁂 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑁂 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀦𑁆𑀢𑀺, 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀫𑀸𑀢𑀼𑀖𑀸𑀢𑀓𑁄 𑀫𑀕𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀧𑀺𑀢𑀼𑀖𑀸𑀢𑀓𑁄… 𑀅𑀭𑀳𑀦𑁆𑀢𑀖𑀸𑀢𑀓𑁄… 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑁄… 𑀲𑀗𑁆𑀖𑀪𑁂𑀤𑀓𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀸𑀢𑀺, 𑀲𑀗𑁆𑀖𑀪𑁂𑀤𑀓𑁄 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁫𑁧. 𑀮𑀩𑁆𑀪𑀸 𑀲𑁄𑀯𑀡𑁆𑀡𑀫𑀬𑀸𑀬 𑀮𑀝𑁆𑀞𑀺𑀬𑀸 𑀥𑀜𑁆𑀜𑀧𑀼𑀜𑁆𑀚𑁄𑀧𑀺 𑀲𑀼𑀯𑀡𑁆𑀡𑀧𑀼𑀜𑁆𑀚𑁄𑀧𑀺 𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀯𑀫𑁂𑀯𑀁 𑀪𑀕𑀯𑀸 𑀮𑁄𑀓𑀼𑀢𑁆𑀢𑀭𑁂𑀦 𑀯𑁄𑀳𑀸𑀭𑁂𑀦 𑀮𑁄𑀓𑀺𑀬𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀥𑀫𑁆𑀫𑀁 𑀯𑁄𑀳𑀭𑀢𑀻𑀢𑀺.

𑀮𑀩𑁆𑀪𑀸 𑀏𑀮𑀡𑁆𑀟𑀺𑀬𑀸𑀬 𑀮𑀝𑁆𑀞𑀺𑀬𑀸 𑀥𑀜𑁆𑀜𑀧𑀼𑀜𑁆𑀚𑁄𑀧𑀺 𑀲𑀼𑀯𑀡𑁆𑀡𑀧𑀼𑀜𑁆𑀚𑁄𑀧𑀺 𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺? 𑀆𑀫𑀦𑁆𑀢𑀸. 𑀏𑀯𑀫𑁂𑀯𑀁 𑀪𑀕𑀯𑀸 𑀮𑁄𑀓𑀺𑀬𑁂𑀦 𑀯𑁄𑀳𑀸𑀭𑁂𑀦 𑀮𑁄𑀓𑀺𑀬𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀥𑀫𑁆𑀫𑀁 𑀯𑁄𑀳𑀭𑀢𑀻𑀢𑀺.

𑁩𑁫𑁨. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺; 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁂𑀦 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀺; 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀲𑀸𑀯𑀓𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀮𑁄𑀓𑀺𑀬𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀥𑀫𑁆𑀫𑀁 𑀯𑁄𑀳𑀭𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀮𑁄𑀓𑀺𑀬𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀥𑀫𑁆𑀫𑀁 𑀯𑁄𑀳𑀭𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁄 𑀳𑁄𑀢𑀻’’𑀢𑀺.

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀫𑀕𑁆𑀕𑀁 𑀯𑁄𑀳𑀭𑀦𑁆𑀢𑀲𑁆𑀲 𑀫𑀕𑁆𑀕𑁄 𑀳𑁄𑀢𑀺, 𑀅𑀫𑀕𑁆𑀕𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀫𑀕𑁆𑀕𑁄 𑀳𑁄𑀢𑀺, 𑀨𑀮𑀁 𑀯𑁄𑀳𑀭𑀦𑁆𑀢𑀲𑁆𑀲 𑀨𑀮𑀁 𑀳𑁄𑀢𑀺, 𑀅𑀨𑀮𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀨𑀮𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀯𑁄𑀳𑀭𑀦𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺, 𑀅𑀦𑀺𑀩𑁆𑀩𑀸𑀦𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀦𑀺𑀩𑁆𑀩𑀸𑀦𑀁 𑀳𑁄𑀢𑀺, 𑀲𑀗𑁆𑀔𑀢𑀁 𑀯𑁄𑀳𑀭𑀦𑁆𑀢𑀲𑁆𑀲 𑀲𑀗𑁆𑀔𑀢𑀁 𑀳𑁄𑀢𑀺, 𑀅𑀲𑀗𑁆𑀔𑀢𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀲𑀗𑁆𑀔𑀢𑀁 𑀳𑁄𑀢𑀺, 𑀭𑀽𑀧𑀁 𑀯𑁄𑀳𑀭𑀦𑁆𑀢𑀲𑁆𑀲 𑀭𑀽𑀧𑀁 𑀳𑁄𑀢𑀺, 𑀅𑀭𑀽𑀧𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀭𑀽𑀧𑀁 𑀳𑁄𑀢𑀺, 𑀯𑁂𑀤𑀦𑀁 𑀯𑁄𑀳𑀭𑀦𑁆𑀢𑀲𑁆𑀲 𑀯𑁂𑀤𑀦𑀸 𑀳𑁄𑀢𑀺, 𑀅𑀯𑁂𑀤𑀦𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀁 𑀯𑁄𑀳𑀭𑀦𑁆𑀢𑀲𑁆𑀲 𑀲𑀜𑁆𑀜𑀸 𑀳𑁄𑀢𑀺, 𑀅𑀲𑀜𑁆𑀜𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀲𑀜𑁆𑀜𑀸 𑀳𑁄𑀢𑀺, 𑀲𑀗𑁆𑀔𑀸𑀭𑁂 𑀯𑁄𑀳𑀭𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀺, 𑀅𑀲𑀗𑁆𑀔𑀸𑀭𑁂 𑀯𑁄𑀳𑀭𑀦𑁆𑀢𑀲𑁆𑀲 𑀅𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀺, 𑀯𑀺𑀜𑁆𑀜𑀸𑀡𑀁 𑀯𑁄𑀳𑀭𑀦𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀅𑀯𑀺𑀜𑁆𑀜𑀸𑀡𑀁 𑀯𑁄𑀳𑀭𑀦𑁆𑀢𑀲𑁆𑀲 𑀅𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑁄𑀳𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.