𑁨𑁧. 𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀕𑀸𑀦𑀼𑀬𑁄𑀕𑁄

𑁨𑁦𑁮. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀧𑀼𑀕𑁆𑀕𑀮𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀕𑁆𑀕𑀮𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑁨𑁦𑁯. 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀗𑁆𑀔𑀢𑀜𑁆𑀘 𑀅𑀲𑀗𑁆𑀔𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀢𑁆𑀣𑀜𑁆𑀜𑀸 𑀢𑀢𑀺𑀬𑀸 𑀓𑁄𑀝𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁦. 𑀲𑀗𑁆𑀔𑀢𑀜𑁆𑀘 𑀅𑀲𑀗𑁆𑀔𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀢𑁆𑀣𑀜𑁆𑀜𑀸 𑀢𑀢𑀺𑀬𑀸 𑀓𑁄𑀝𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀥𑀸𑀢𑀼𑀬𑁄. 𑀓𑀢𑀫𑀸 𑀤𑁆𑀯𑁂? 𑀲𑀗𑁆𑀔𑀢𑀸 𑀘 𑀥𑀸𑀢𑀼 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀥𑀸𑀢𑀼𑀬𑁄’’𑀢𑀺 [𑀫. 𑀦𑀺. 𑁧.𑁧𑁨𑁫, 𑀆𑀮𑀧𑀦𑀫𑀢𑁆𑀢𑀫𑁂𑀯 𑀦𑀸𑀦𑀁]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀔𑀢𑀜𑁆𑀘 𑀅𑀲𑀗𑁆𑀔𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀢𑁆𑀣𑀜𑁆𑀜𑀸 𑀢𑀢𑀺𑀬𑀸 𑀓𑁄𑀝𑀻’’𑀢𑀺.

𑁨𑁧𑁧. 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀲𑀗𑁆𑀔𑀢𑀁, 𑀅𑀜𑁆𑀜𑀁 𑀅𑀲𑀗𑁆𑀔𑀢𑀁, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁨. 𑀔𑀦𑁆𑀥𑀸 𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀁, 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁂 𑀔𑀦𑁆𑀥𑀸, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦𑀁, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁩. 𑀭𑀽𑀧𑀁 𑀲𑀗𑁆𑀔𑀢𑀁, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀁, 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀭𑀽𑀧𑀁, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦𑀁, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀢𑀁, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀁, 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀗𑁆𑀔𑀢𑁄 𑀦𑀸𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀯𑀺𑀜𑁆𑀜𑀸𑀡𑀁, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦𑀁, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁪. 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀼𑀕𑁆𑀕𑀮𑁄 𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀲𑀗𑁆𑀔𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 [𑀓𑀢𑀫𑀸𑀦𑀺 𑀢𑀻𑀡𑀺 (𑀅. 𑀦𑀺. 𑁩.𑁪𑁭)] 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 [𑀅. 𑀦𑀺. 𑁩.𑁪𑁭]. 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺; 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀗𑁆𑀔𑀢𑁄𑀢𑀺.

𑁨𑁧𑁫. 𑀧𑀼𑀕𑁆𑀕𑀮𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀼𑀕𑁆𑀕𑀮𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀲𑀗𑁆𑀔𑀢𑀲𑁆𑀲 𑀅𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀅𑀲𑀗𑁆𑀔𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀦 𑀞𑀺𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 [𑀅. 𑀦𑀺. 𑁩.𑁪𑁮]. 𑀧𑀼𑀕𑁆𑀕𑀮𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺; 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀅𑀲𑀗𑁆𑀔𑀢𑁄𑀢𑀺.

𑁨𑁧𑁬. 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀢𑁆𑀣𑀫𑁆𑀳𑀺, 𑀦𑀢𑁆𑀣𑀢𑁆𑀣𑀫𑁆𑀳𑀻𑀢𑀺? 𑀅𑀢𑁆𑀣𑀢𑁆𑀣𑀫𑁆𑀳𑀻𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀼𑀕𑁆𑀕𑀮𑁄 𑀲𑀲𑁆𑀲𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀢𑁆𑀣𑀫𑁆𑀳𑀻𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀼𑀕𑁆𑀕𑀮𑁄 𑀉𑀘𑁆𑀙𑀺𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁭. 𑀧𑀼𑀕𑁆𑀕𑀮𑁄 𑀓𑀺𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀻𑀢𑀺? 𑀪𑀯𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀻𑀢𑀺. 𑀪𑀯𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀧𑀼𑀕𑁆𑀕𑀮𑁄𑀧𑀺 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁧𑁮. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁧𑁯. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁨𑁦. 𑀅𑀢𑁆𑀣𑀺 𑀓𑁄𑀘𑀺 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀬𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄; 𑀬𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀦 𑀧𑀚𑀸𑀦𑀸𑀢𑀺, 𑀦 𑀲𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑁄 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄…𑀧𑁂… 𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄; 𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀦 𑀧𑀚𑀸𑀦𑀸𑀢𑀺, 𑀦 𑀲𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁨𑁧. 𑀅𑀢𑁆𑀣𑀺 𑀓𑁄𑀘𑀺 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀸 𑀲𑀼𑀔𑀸 𑀯𑁂𑀤𑀦𑀸, 𑀅𑀜𑁆𑀜𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀜𑁆𑀜𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸…𑀧𑁂… 𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀅𑀜𑁆𑀜𑁄 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑁨𑁨𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁨𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁨𑁪. 𑀅𑀢𑁆𑀣𑀺 𑀓𑁄𑀘𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀬𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄; 𑀬𑁄 𑀦 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦 𑀲𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀬𑁄 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄; 𑀬𑁄 𑀦 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦 𑀲𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁨𑁫. 𑀅𑀢𑁆𑀣𑀺 𑀓𑁄𑀘𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁄 𑀓𑀸𑀬𑁄, 𑀅𑀜𑁆𑀜𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀜𑁆𑀜𑀸 𑀯𑁂𑀤𑀦𑀸… 𑀅𑀜𑁆𑀜𑀁 𑀘𑀺𑀢𑁆𑀢𑀁… 𑀅𑀜𑁆𑀜𑁂 𑀥𑀫𑁆𑀫𑀸, 𑀅𑀜𑁆𑀜𑁄 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁨𑁬. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘 [𑀑𑀳𑀘𑁆𑀘 (𑀲𑁆𑀬𑀸.), 𑀉𑀳𑀘𑁆𑀘 (𑀓.)], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺 [𑀲𑀼. 𑀦𑀺. 𑁧𑁧𑁨𑁫; 𑀘𑀽𑀴𑀦𑀺. 𑁮𑁮 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁨𑁭. 𑀧𑀼𑀕𑁆𑀕𑀮𑁄 𑀅𑀯𑁂𑀓𑁆𑀔𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀳 𑀭𑀽𑀧𑁂𑀦 𑀅𑀯𑁂𑀓𑁆𑀔𑀢𑀺, 𑀯𑀺𑀦𑀸 𑀭𑀽𑀧𑁂𑀦 𑀅𑀯𑁂𑀓𑁆𑀔𑀢𑀻𑀢𑀺? 𑀲𑀳 𑀭𑀽𑀧𑁂𑀦 𑀅𑀯𑁂𑀓𑁆𑀔𑀢𑀻𑀢𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀺𑀦𑀸 𑀭𑀽𑀧𑁂𑀦 𑀅𑀯𑁂𑀓𑁆𑀔𑀢𑀻𑀢𑀺, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁨𑁮. 𑀧𑀼𑀕𑁆𑀕𑀮𑁄 𑀅𑀯𑁂𑀓𑁆𑀔𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀩𑁆𑀪𑀦𑁆𑀢𑀭𑀕𑀢𑁄 𑀅𑀯𑁂𑀓𑁆𑀔𑀢𑀺, 𑀩𑀳𑀺𑀤𑁆𑀥𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀯𑁂𑀓𑁆𑀔𑀢𑀻𑀢𑀺? 𑀅𑀩𑁆𑀪𑀦𑁆𑀢𑀭𑀕𑀢𑁄 𑀅𑀯𑁂𑀓𑁆𑀔𑀢𑀻𑀢𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀩𑀳𑀺𑀤𑁆𑀥𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀯𑁂𑀓𑁆𑀔𑀢𑀻𑀢𑀺, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁨𑁯. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺.

𑁨𑁩𑁦. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 [𑀅. 𑀦𑀺. 𑁧.𑁧𑁬𑁨-𑁧𑁬𑁯]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺.

𑁨𑁩𑁧. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 [𑀫. 𑀦𑀺. 𑁧.𑁩𑁫𑁬; 𑀥. 𑀧. 𑁨𑁭𑁯 𑀥𑀫𑁆𑀫𑀧𑀤𑁂]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁨. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀫𑁂𑀯 [𑀤𑀼𑀓𑁆𑀔𑀁 (𑀲𑀁. 𑀦𑀺. 𑁨.𑁧𑁫)] 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀅𑀧𑀭𑀧𑁆𑀧𑀘𑁆𑀘𑀬𑀜𑁆𑀜𑀸𑀡𑀫𑁂𑀯𑀲𑁆𑀲 𑀏𑀢𑁆𑀣 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀓𑀘𑁆𑀘𑀸𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 [𑀲𑀁. 𑀦𑀺. 𑁨.𑁧𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁩. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀚𑀺𑀭𑀸 𑀪𑀺𑀓𑁆𑀔𑀼𑀦𑀻 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀦𑁆𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀺.

‘‘𑀬𑀣𑀸 𑀳𑀺 [𑀬𑀣𑀸𑀧𑀺 (𑀩𑀳𑀽𑀲𑀼)] 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸. 𑀓𑀁.)].

‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 [𑀲𑀁. 𑀦𑀺. 𑁧.𑁧𑁭𑁧].

𑁨𑁩𑁪. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀼𑀜𑁆𑀜𑁄 𑀮𑁄𑀓𑁄 𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, ‘𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀬𑀲𑁆𑀫𑀸 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 ‘𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸? 𑀘𑀓𑁆𑀔𑀼𑀁 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀭𑀽𑀧𑀸 𑀲𑀼𑀜𑁆𑀜𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄… 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀲𑁄𑀢𑀁 𑀲𑀼𑀜𑁆𑀜𑀁…𑀧𑁂… 𑀲𑀤𑁆𑀤𑀸 𑀲𑀼𑀜𑁆𑀜𑀸… 𑀖𑀸𑀦𑀁 𑀲𑀼𑀜𑁆𑀜𑀁… 𑀕𑀦𑁆𑀥𑀸 𑀲𑀼𑀜𑁆𑀜𑀸… 𑀚𑀺𑀯𑁆𑀳𑀸 𑀲𑀼𑀜𑁆𑀜𑀸… 𑀭𑀲𑀸 𑀲𑀼𑀜𑁆𑀜𑀸… 𑀓𑀸𑀬𑁄 𑀲𑀼𑀜𑁆𑀜𑁄… 𑀨𑁄𑀝𑁆𑀞𑀩𑁆𑀩𑀸 𑀲𑀼𑀜𑁆𑀜𑀸… 𑀫𑀦𑁄 𑀲𑀼𑀜𑁆𑀜𑁄… 𑀥𑀫𑁆𑀫𑀸 𑀲𑀼𑀜𑁆𑀜𑀸… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄… 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀬𑀲𑁆𑀫𑀸 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 ‘𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 [𑀲𑀁. 𑀦𑀺. 𑁪.𑁮𑁫]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁫. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀢𑀦𑀺 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 ‘𑀅𑀢𑁆𑀢𑀦𑀺𑀬𑀁 𑀫𑁂’𑀢𑀺 𑀅𑀲𑁆𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀅𑀢𑁆𑀢𑀦𑀺𑀬𑁂 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 ‘𑀅𑀢𑁆𑀢𑀸 𑀫𑁂’𑀢𑀺 𑀅𑀲𑁆𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀅𑀢𑁆𑀢𑀦𑀺 𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀺𑀬𑁂 𑀘 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 [𑀅𑀦𑀼𑀧𑀮𑀩𑁆𑀪𑀫𑀸𑀦𑁂 (𑀫. 𑀦𑀺. 𑁧.𑁨𑁪𑁪)] 𑀬𑀫𑁆𑀧𑀺𑀤𑀁 [𑀬𑀫𑀺𑀤𑀁 (𑀲𑁆𑀬𑀸.) 𑀬𑀫𑁆𑀧𑀺𑀢𑀁 (𑀫. 𑀦𑀺. 𑁧.𑁨𑁪𑁪)] 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺 𑁋 ‘𑀦𑀦𑁆𑀯𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑁂𑀯𑀮𑁄 𑀧𑀭𑀺𑀧𑀽𑀭𑁄 𑀩𑀸𑀮𑀥𑀫𑁆𑀫𑁄’’’𑀢𑀺? ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂, 𑀓𑁂𑀯𑀮𑁄 𑀳𑀺, 𑀪𑀦𑁆𑀢𑁂, 𑀧𑀭𑀺𑀧𑀽𑀭𑁄 𑀩𑀸𑀮𑀥𑀫𑁆𑀫𑁄’’𑀢𑀺 [𑀫. 𑀦𑀺. 𑁧.𑁨𑁪𑁪]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁬. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄 𑀫𑁂, 𑀲𑁂𑀦𑀺𑀬, 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀲𑁂𑀦𑀺𑀬, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺.

‘‘𑀇𑀥 𑀧𑀦, 𑀲𑁂𑀦𑀺𑀬, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀤𑀺𑀝𑁆𑀞𑁂𑀯 𑀳𑀺 𑀔𑁄 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺, 𑀦𑁄 𑀘 𑀔𑁄 𑀅𑀪𑀺𑀲𑀫𑁆𑀧𑀭𑀸𑀬𑀁 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺.

‘‘𑀇𑀥 𑀧𑀦, 𑀲𑁂𑀦𑀺𑀬, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺.

‘‘𑀢𑀢𑁆𑀭, 𑀲𑁂𑀦𑀺𑀬, 𑀬𑁆𑀯𑀸𑀬𑀁 𑀲𑀢𑁆𑀣𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑁂𑀦𑀺𑀬, 𑀲𑀢𑁆𑀣𑀸 𑀲𑀲𑁆𑀲𑀢𑀯𑀸𑀤𑁄.

‘‘𑀢𑀢𑁆𑀭, 𑀲𑁂𑀦𑀺𑀬, 𑀬𑁆𑀯𑀸𑀬𑀁 𑀲𑀢𑁆𑀣𑀸 𑀤𑀺𑀝𑁆𑀞𑁂𑀯 𑀳𑀺 𑀔𑁄 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺, 𑀦𑁄 𑀘 𑀔𑁄 𑀅𑀪𑀺𑀲𑀫𑁆𑀧𑀭𑀸𑀬𑀁 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀧𑀜𑁆𑀜𑀸𑀧𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑁂𑀦𑀺𑀬, 𑀲𑀢𑁆𑀣𑀸 𑀉𑀘𑁆𑀙𑁂𑀤𑀯𑀸𑀤𑁄.

‘‘𑀢𑀢𑁆𑀭, 𑀲𑁂𑀦𑀺𑀬, 𑀬𑁆𑀯𑀸𑀬𑀁 𑀲𑀢𑁆𑀣𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺, 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀢𑁆𑀢𑀸𑀦𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀧𑀜𑁆𑀜𑀸𑀧𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑁂𑀦𑀺𑀬, 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀇𑀫𑁂 𑀔𑁄, 𑀲𑁂𑀦𑀺𑀬, 𑀢𑀬𑁄 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀧𑀼. 𑀧. 𑁧𑁩𑁧 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀁, 𑀅𑀢𑁆𑀣𑀢𑁄 𑀏𑀓𑀁]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁭. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀧𑁆𑀧𑀺𑀓𑀼𑀫𑁆𑀪𑁄’’𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀲𑀧𑁆𑀧𑀺𑀲𑁆𑀲 𑀓𑀼𑀫𑁆𑀪𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁨𑁩𑁮. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀲𑀘𑁆𑀘𑀯𑀸𑀤𑀻 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀢𑀣𑀯𑀸𑀤𑀻 𑀅𑀯𑀺𑀢𑀣𑀯𑀸𑀤𑀻 𑀅𑀦𑀜𑁆𑀜𑀣𑀯𑀸𑀤𑀻𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀢𑁂𑀮𑀓𑀼𑀫𑁆𑀪𑁄… 𑀫𑀥𑀼𑀓𑀼𑀫𑁆𑀪𑁄… 𑀨𑀸𑀡𑀺𑀢𑀓𑀼𑀫𑁆𑀪𑁄… 𑀔𑀻𑀭𑀓𑀼𑀫𑁆𑀪𑁄… 𑀉𑀤𑀓𑀓𑀼𑀫𑁆𑀪𑁄… 𑀧𑀸𑀦𑀻𑀬𑀣𑀸𑀮𑀓𑀁… 𑀧𑀸𑀦𑀻𑀬𑀓𑁄𑀲𑀓𑀁… 𑀧𑀸𑀦𑀻𑀬𑀲𑀭𑀸𑀯𑀓𑀁… 𑀦𑀺𑀘𑁆𑀘𑀪𑀢𑁆𑀢𑀁… 𑀥𑀼𑀯𑀬𑀸𑀕𑀽’’𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑀸𑀘𑀺 𑀬𑀸𑀕𑀼 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.…𑀧𑁂…. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺. (𑀲𑀁𑀔𑀺𑀢𑁆𑀢𑀁)

𑀅𑀝𑁆𑀞𑀓𑀦𑀺𑀕𑁆𑀕𑀳𑀧𑁂𑀬𑁆𑀬𑀸𑀮𑀸, 𑀲𑀦𑁆𑀥𑀸𑀯𑀦𑀺𑀬𑀸 𑀉𑀧𑀸𑀤𑀸𑀬;

𑀘𑀺𑀢𑁆𑀢𑁂𑀦 𑀧𑀜𑁆𑀘𑀫𑀁 𑀓𑀮𑁆𑀬𑀸𑀡𑀁, 𑀇𑀤𑁆𑀥𑀺𑀲𑀼𑀢𑁆𑀢𑀸𑀳𑀭𑀡𑁂𑀦 𑀅𑀝𑁆𑀞𑀫𑀁.

𑀲𑀘𑁆𑀘𑀺𑀓𑀝𑁆𑀞𑀲𑀪𑀸𑀕𑀸𑀦𑀼𑀬𑁄𑀕𑁄.

𑀧𑀼𑀕𑁆𑀕𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.