𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺

𑁧𑁯𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀫𑀸𑀢𑀸 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀫𑀸𑀢𑀸 𑀅𑀢𑁆𑀣𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁧𑁯𑁮. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀧𑀺𑀢𑀸 𑀅𑀢𑁆𑀣𑀺…𑀧𑁂… 𑀪𑀸𑀢𑀸 𑀅𑀢𑁆𑀣𑀺… 𑀪𑀕𑀺𑀦𑀻 𑀅𑀢𑁆𑀣𑀺… 𑀔𑀢𑁆𑀢𑀺𑀬𑁄 𑀅𑀢𑁆𑀣𑀺 … 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀣𑀺… 𑀯𑁂𑀲𑁆𑀲𑁄 𑀅𑀢𑁆𑀣𑀺… 𑀲𑀼𑀤𑁆𑀤𑁄 𑀅𑀢𑁆𑀣𑀺… 𑀕𑀳𑀝𑁆𑀞𑁄 𑀅𑀢𑁆𑀣𑀺… 𑀧𑀩𑁆𑀩𑀚𑀺𑀢𑁄 𑀅𑀢𑁆𑀣𑀺… 𑀤𑁂𑀯𑁄 𑀅𑀢𑁆𑀣𑀺… 𑀫𑀦𑀼𑀲𑁆𑀲𑁄 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀫𑀦𑀼𑀲𑁆𑀲𑁄 𑀅𑀢𑁆𑀣𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺.

𑁧𑁯𑁯. 𑀫𑀸𑀢𑀸 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀦 𑀫𑀸𑀢𑀸 𑀳𑀼𑀢𑁆𑀯𑀸 𑀫𑀸𑀢𑀸 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀺𑀢𑀸 𑀳𑀼𑀢𑁆𑀯𑀸…𑀧𑁂… 𑀦 𑀪𑀸𑀢𑀸 𑀳𑀼𑀢𑁆𑀯𑀸… 𑀦 𑀪𑀕𑀺𑀦𑀻 𑀳𑀼𑀢𑁆𑀯𑀸… 𑀦 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸… 𑀦 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸… 𑀦 𑀯𑁂𑀲𑁆𑀲𑁄 𑀳𑀼𑀢𑁆𑀯𑀸… 𑀦 𑀲𑀼𑀤𑁆𑀤𑁄 𑀳𑀼𑀢𑁆𑀯𑀸… 𑀦 𑀕𑀳𑀝𑁆𑀞𑁄 𑀳𑀼𑀢𑁆𑀯𑀸… 𑀦 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸… 𑀦 𑀤𑁂𑀯𑁄 𑀳𑀼𑀢𑁆𑀯𑀸… 𑀦 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁨𑁦𑁦. 𑀫𑀸𑀢𑀸 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀫𑀸𑀢𑀸 𑀳𑀼𑀢𑁆𑀯𑀸 𑀦 𑀫𑀸𑀢𑀸 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀦 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀓𑁄𑀘𑀺 𑀧𑀺𑀢𑀸 𑀳𑀼𑀢𑁆𑀯𑀸… 𑀪𑀸𑀢𑀸 𑀳𑀼𑀢𑁆𑀯𑀸… 𑀪𑀕𑀺𑀦𑀻 𑀳𑀼𑀢𑁆𑀯𑀸… 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸… 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸… 𑀯𑁂𑀲𑁆𑀲𑁄 𑀳𑀼𑀢𑁆𑀯𑀸… 𑀲𑀼𑀤𑁆𑀤𑁄 𑀳𑀼𑀢𑁆𑀯𑀸… 𑀕𑀳𑀝𑁆𑀞𑁄 𑀳𑀼𑀢𑁆𑀯𑀸… 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸… 𑀤𑁂𑀯𑁄 𑀳𑀼𑀢𑁆𑀯𑀸… 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀦 𑀫𑀦𑀼𑀲𑁆𑀲𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀦 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….