𑀅𑀩𑁆𑀬𑀸𑀓𑀢𑀯𑀺𑀧𑀸𑀓𑁄

𑀓𑀼𑀲𑀮𑀯𑀺𑀧𑀸𑀓𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺

𑁪𑁩𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀸 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁩𑁨. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺.

𑁪𑁩𑁩. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺.

𑁪𑁩𑁪. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺.

𑁪𑁩𑁫. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺.

𑁪𑁩𑁬. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺.

𑁪𑁩𑁭. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺.

𑁪𑁩𑁮. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁪𑁩𑁯. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁪𑁦. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁪𑁧. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁪𑁪𑁨. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁪𑁩. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀤𑁆𑀤𑀸𑀭𑀫𑁆𑀫𑀡𑀁…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀕𑀦𑁆𑀥𑀸𑀭𑀫𑁆𑀫𑀡𑀁…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀭𑀲𑀸𑀭𑀫𑁆𑀫𑀡𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑀼𑀔𑀲𑀳𑀕𑀢𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀲𑀼𑀔𑀁 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁪𑁪. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺.

𑁪𑁪𑁫. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀓𑀸𑀬𑀺𑀓𑀁 𑀲𑀸𑀢𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺.

𑁪𑁪𑁬. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺.

𑁪𑁪𑁭. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺.

𑁪𑁪𑁮. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺.

𑁪𑁪𑁯. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀺𑀓𑀁 𑀲𑀸𑀢𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀳𑁄𑀢𑀺.

𑁪𑁫𑁦. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁪𑁫𑁧. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁫𑁨. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀺𑀓𑀁 𑀲𑀸𑀢𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁫𑁩. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁪𑁫𑁪. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺.

𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀥𑀸𑀢𑀼

𑁪𑁫𑁫. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁫𑁬. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺.

𑁪𑁫𑁭. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺.

𑁪𑁫𑁮. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺.

𑁪𑁫𑁯. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺.

𑁪𑁬𑁦. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺.

𑁪𑁬𑁧. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺.

𑁪𑁬𑁨. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀸𑀭𑁄 𑀯𑀺𑀘𑀸𑀭𑁄 𑀅𑀦𑀼𑀯𑀺𑀘𑀸𑀭𑁄 𑀉𑀧𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲 𑀅𑀦𑀼𑀲𑀦𑁆𑀥𑀸𑀦𑀢𑀸 𑀅𑀦𑀼𑀧𑁂𑀓𑁆𑀔𑀦𑀢𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺.

𑁪𑁬𑁩. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺.

𑁪𑁬𑁪. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁪𑁬𑁫. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁬𑁬. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁬𑁭. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀫𑀦𑁄𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁪𑁬𑁮. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀼𑀲𑀮𑀯𑀺𑀧𑀸𑀓𑀸 𑀫𑀦𑁄𑀥𑀸𑀢𑀼.

𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀸

𑁪𑁬𑁯. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀧𑀻𑀢𑀺 𑀳𑁄𑀢𑀺, 𑀲𑀼𑀔𑀁 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁭𑁦. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺.

𑁪𑁭𑁧. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺.

𑁪𑁭𑁨. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺.

𑁪𑁭𑁩. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺. 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺.

𑁪𑁭𑁪. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺.

𑁪𑁭𑁫. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺.

𑁪𑁭𑁬. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀸𑀭𑁄 𑀯𑀺𑀘𑀸𑀭𑁄 𑀅𑀦𑀼𑀯𑀺𑀘𑀸𑀭𑁄 𑀉𑀧𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲 𑀅𑀦𑀼𑀲𑀦𑁆𑀥𑀸𑀦𑀢𑀸 𑀅𑀦𑀼𑀧𑁂𑀓𑁆𑀔𑀦𑀢𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺.

𑁪𑁭𑁭. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀻𑀢𑀺 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀻𑀢𑀺 𑀳𑁄𑀢𑀺.

𑁪𑁭𑁮. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀳𑁄𑀢𑀺.

𑁪𑁭𑁯. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁪𑁮𑁦. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁮𑁧. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁮𑁨. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁪𑁮𑁩. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀼𑀲𑀮𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸.

𑀓𑀼𑀲𑀮𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀸

𑁪𑁮𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁮𑁫. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺.

𑁪𑁮𑁬. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸 𑀳𑁄𑀢𑀺.

𑁪𑁮𑁭. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀜𑀸 𑀳𑁄𑀢𑀺.

𑁪𑁮𑁮. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀦𑀸 𑀳𑁄𑀢𑀺.

𑁪𑁮𑁯. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺.

𑁪𑁯𑁦. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀢𑀓𑁆𑀓𑁄 𑀳𑁄𑀢𑀺.

𑁪𑁯𑁧. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀸𑀭𑁄 𑀯𑀺𑀘𑀸𑀭𑁄 𑀅𑀦𑀼𑀯𑀺𑀘𑀸𑀭𑁄 𑀉𑀧𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲 𑀅𑀦𑀼𑀲𑀦𑁆𑀥𑀸𑀦𑀢𑀸 𑀅𑀦𑀼𑀧𑁂𑀓𑁆𑀔𑀦𑀢𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀸𑀭𑁄 𑀳𑁄𑀢𑀺.

𑁪𑁯𑁨. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀳𑁄𑀢𑀺.

𑁪𑁯𑁩. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁪𑁯𑁪. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁯𑁫. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁪𑁯𑁬. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁪𑁯𑁭. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀼𑀲𑀮𑀯𑀺𑀧𑀸𑀓𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼.

𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀸

𑁪𑁯𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺 …𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂… 𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀅𑀤𑁄𑀲𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀸.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸

𑁪𑁯𑁯. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁦𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸.

𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸

𑁫𑁦𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁦𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁦𑁩. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁦𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸.