𑁬. 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀦𑀺𑀤𑁆𑀤𑁂𑀲𑁄

𑁧. 𑀔𑀦𑁆𑀥𑁄

𑁨𑁨𑁮. 𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀓𑀢𑀺𑀳𑀸𑀬𑀢𑀦𑁂𑀳𑀺 𑀓𑀢𑀺𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁨𑁯. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄… 𑀲𑀜𑁆𑀜𑀸𑀓𑁆𑀔𑀦𑁆𑀥𑁄… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁩𑁦. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨. 𑀆𑀬𑀢𑀦𑀁

𑁨𑁩𑁧. 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁩𑁨. 𑀫𑀦𑀸𑀬𑀢𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁩. 𑀥𑀸𑀢𑀼

𑁨𑁩𑁩. 𑀘𑀓𑁆𑀔𑀼𑀥𑀸𑀢𑀼 …𑀧𑁂… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁩𑁪. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁪. 𑀲𑀘𑁆𑀘𑀸𑀤𑀺

𑁨𑁩𑁫. 𑀲𑀫𑀼𑀤𑀬𑀲𑀘𑁆𑀘𑀁… 𑀫𑀕𑁆𑀕𑀲𑀘𑁆𑀘𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁩𑁬. 𑀦𑀺𑀭𑁄𑀥𑀲𑀘𑁆𑀘𑀁… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁… 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁… 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁩𑁭. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁩𑁮. 𑀲𑀼𑀔𑀺𑀦𑁆𑀤𑁆𑀭𑀺𑀬𑀁… 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁… 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁩𑁯. 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀙𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁪𑁦. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁… 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁… 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁… 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁… 𑀅𑀯𑀺𑀚𑁆𑀚𑀸… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁪𑁧. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁪𑁨. 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁪𑁩. 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁪𑁪. 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁… 𑀓𑀫𑁆𑀫𑀪𑀯𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁪𑁫. 𑀭𑀽𑀧𑀪𑀯𑁄…𑀧𑁂… 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀢𑀻𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁪𑁬. 𑀅𑀭𑀽𑀧𑀪𑀯𑁄… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄… 𑀘𑀢𑀼𑀯𑁄𑀓𑀸𑀭𑀪𑀯𑁄…𑀧𑁂… 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁪𑁭. 𑀅𑀲𑀜𑁆𑀜𑀸𑀪𑀯𑁄… 𑀏𑀓𑀯𑁄𑀓𑀸𑀭𑀪𑀯𑁄… 𑀧𑀭𑀺𑀤𑁂𑀯𑁄…𑀧𑁂… 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁪𑁮. 𑀲𑁄𑀓𑁄… 𑀤𑀼𑀓𑁆𑀔𑀁… 𑀤𑁄𑀫𑀦𑀲𑁆𑀲𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁪𑁯. 𑀉𑀧𑀸𑀬𑀸𑀲𑁄… 𑀲𑀢𑀺𑀧𑀝𑁆𑀞𑀸𑀦𑀁… 𑀲𑀫𑁆𑀫𑀧𑁆𑀧𑀥𑀸𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁫𑁦. 𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁫𑁧. 𑀛𑀸𑀦𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁫𑁨. 𑀅𑀧𑁆𑀧𑀫𑀜𑁆𑀜𑀸… 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀩𑀮𑀸𑀦𑀺… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁫𑁩. 𑀨𑀲𑁆𑀲𑁄 … 𑀘𑁂𑀢𑀦𑀸… 𑀫𑀦𑀲𑀺𑀓𑀸𑀭𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁨𑁫𑁪. 𑀯𑁂𑀤𑀦𑀸… 𑀲𑀜𑁆𑀜𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁫𑁫. 𑀘𑀺𑀢𑁆𑀢𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑁨𑁫𑁬. 𑀅𑀥𑀺𑀫𑁄𑀓𑁆𑀔𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑁄.

𑁫. 𑀢𑀺𑀓𑀁

𑁨𑁫𑁭. 𑀓𑀼𑀲𑀮𑀸 𑀥𑀫𑁆𑀫𑀸… 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀓𑀢𑀺𑀳𑀸𑀬𑀢𑀦𑁂𑀳𑀺 𑀓𑀢𑀺𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁫𑁮. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸… 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁫𑁯. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁦. 𑀯𑀺𑀧𑀸𑀓𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁧. 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸… 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁨. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸… 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀧𑀜𑁆𑀘𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁩. 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸 𑀥𑀫𑁆𑀫𑀸… 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁪. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁫. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸… 𑀧𑀻𑀢𑀺𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁬. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀏𑀓𑀸𑀬 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁭. 𑀲𑀼𑀔𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁮. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁬𑁯. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸… 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸… 𑀅𑀧𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸… 𑀲𑁂𑀓𑁆𑀔𑀸 𑀥𑀫𑁆𑀫𑀸… 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸… 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁦. 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸… 𑀧𑀡𑀻𑀢𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁧. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁨. 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀳𑀻𑀦𑀸 𑀥𑀫𑁆𑀫𑀸… 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸… 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸… 𑀫𑀕𑁆𑀕𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀫𑀕𑁆𑀕𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁩. 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀧𑀜𑁆𑀘𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁪. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸…𑀧𑁂… 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁫. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁬. 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸… 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁬. 𑀤𑀼𑀓𑀁

𑁨𑁭𑁭. 𑀳𑁂𑀢𑀽 𑀥𑀫𑁆𑀫𑀸… 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘 𑀥𑀫𑁆𑀫𑀸… 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁮. 𑀲𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁭𑁯. 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽 𑀥𑀫𑁆𑀫𑀸… 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦 𑀘 𑀳𑁂𑀢𑀽 𑀥𑀫𑁆𑀫𑀸… 𑀦 𑀳𑁂𑀢𑀼𑀲𑀳𑁂𑀢𑀼𑀓𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁦. 𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸… 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸… 𑀲𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸… 𑀲𑀧𑁆𑀧𑀝𑀺𑀖𑀸 𑀥𑀫𑁆𑀫𑀸… 𑀭𑀽𑀧𑀺𑀦𑁄 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁧. 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁨. 𑀆𑀲𑀯𑀸 𑀥𑀫𑁆𑀫𑀸… 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘 𑀥𑀫𑁆𑀫𑀸… 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁩. 𑀅𑀦𑀸𑀲𑀯𑀸 𑀥𑀫𑁆𑀫𑀸… 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁪. 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁫. 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁬. 𑀲𑀁𑀬𑁄𑀚𑀦𑀸 𑀥𑀫𑁆𑀫𑀸… 𑀕𑀦𑁆𑀣𑀸 𑀥𑀫𑁆𑀫𑀸… 𑀑𑀖𑀸 𑀥𑀫𑁆𑀫𑀸… 𑀬𑁄𑀕𑀸 𑀥𑀫𑁆𑀫𑀸… 𑀦𑀻𑀯𑀭𑀡𑀸 𑀥𑀫𑁆𑀫𑀸… 𑀧𑀭𑀸𑀫𑀸𑀲𑀸 𑀥𑀫𑁆𑀫𑀸… 𑀧𑀭𑀸𑀫𑀸𑀲𑀸 𑀘𑁂𑀯 𑀧𑀭𑀸𑀫𑀝𑁆𑀞𑀸 𑀘 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁭. 𑀅𑀧𑀭𑀸𑀫𑀝𑁆𑀞𑀸 𑀥𑀫𑁆𑀫𑀸… 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁮. 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁮𑁯. 𑀲𑀸𑀭𑀫𑁆𑀫𑀡𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁦. 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸 𑀥𑀫𑁆𑀫𑀸… 𑀉𑀧𑀸𑀤𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁧. 𑀘𑀺𑀢𑁆𑀢𑀸 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁨. 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸… 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄 𑀥𑀫𑁆𑀫𑀸… 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁩. 𑀅𑀦𑀼𑀧𑀸𑀤𑀺𑀦𑁆𑀦𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀧𑀜𑁆𑀘𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁪. 𑀉𑀧𑀸𑀤𑀸𑀦𑀸 𑀥𑀫𑁆𑀫𑀸… 𑀓𑀺𑀮𑁂𑀲𑀸 𑀥𑀫𑁆𑀫𑀸… 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀥𑀫𑁆𑀫𑀸… 𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀸 𑀘 𑀥𑀫𑁆𑀫𑀸… 𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁫. 𑀅𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸… 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁬. 𑀲𑀁𑀓𑀺𑀮𑀺𑀝𑁆𑀞𑀸 𑀥𑀫𑁆𑀫𑀸… 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁭. 𑀲𑀁𑀓𑀺𑀮𑀺𑀝𑁆𑀞𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸 𑀥𑀫𑁆𑀫𑀸… 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁮. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸… 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸… 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁨𑁯𑁯. 𑀲𑀯𑀺𑀢𑀓𑁆𑀓𑀸 𑀥𑀫𑁆𑀫𑀸… 𑀲𑀯𑀺𑀘𑀸𑀭𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁦. 𑀅𑀯𑀺𑀢𑀓𑁆𑀓𑀸 𑀥𑀫𑁆𑀫𑀸… 𑀅𑀯𑀺𑀘𑀸𑀭𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀏𑀓𑀸𑀬 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁧. 𑀲𑀧𑁆𑀧𑀻𑀢𑀺𑀓𑀸 𑀥𑀫𑁆𑀫𑀸… 𑀧𑀻𑀢𑀺𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁨. 𑀲𑀼𑀔𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀧𑀦𑁆𑀦𑀭𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁩. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁪. 𑀦 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸… 𑀅𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸… 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀙𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑁩𑁦𑁫. 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸… 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸… 𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸… 𑀦𑀺𑀬𑀢𑀸 𑀥𑀫𑁆𑀫𑀸… 𑀲𑀭𑀡𑀸 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀓𑀢𑀺𑀳𑀸𑀬𑀢𑀦𑁂𑀳𑀺 𑀓𑀢𑀺𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺? 𑀦𑀢𑁆𑀣𑀺. 𑀓𑀢𑀺𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸? 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸; 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸.

𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀚𑀻𑀯𑀺𑀢𑀁;

𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑀁, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀯𑀸.

𑀚𑀸𑀢𑀺 𑀚𑀭𑀸 𑀘 𑀫𑀭𑀡𑀁, 𑀢𑀺𑀓𑁂𑀲𑁆𑀯𑁂𑀓𑀽𑀦𑀯𑀻𑀲𑀢𑀺;

𑀕𑁄𑀘𑁆𑀙𑀓𑁂𑀲𑀼 𑀘 𑀧𑀜𑁆𑀜𑀸𑀲, 𑀅𑀝𑁆𑀞 𑀘𑀽𑀴𑀦𑁆𑀢𑀭𑁂 𑀧𑀤𑀸.

𑀫𑀳𑀦𑁆𑀢𑀭𑁂 𑀧𑀦𑁆𑀦𑀭𑀲, 𑀅𑀝𑁆𑀞𑀸𑀭𑀲 𑀢𑀢𑁄 𑀧𑀭𑁂;

𑀢𑁂𑀯𑀻𑀲 𑀧𑀤𑀲𑀢𑀁 𑀏𑀢𑀁, 𑀲𑀫𑁆𑀧𑀬𑁄𑀕𑁂 𑀦 𑀮𑀩𑁆𑀪𑀢𑀻𑀢𑀺.

𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.