𑁨𑁩. 𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑁄

𑀆𑀦𑀺𑀲𑀁𑀲𑀧𑀓𑀸𑀲𑀦𑀸

𑁮𑁫𑁪. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀪𑀸𑀯𑀦𑀸𑀬 𑀓𑁄 𑀆𑀦𑀺𑀲𑀁𑀲𑁄’’𑀢𑀺, 𑀢𑀢𑁆𑀣 𑀯𑀤𑀸𑀫. 𑀅𑀬𑀜𑁆𑀳𑀺 𑀧𑀜𑁆𑀜𑀸𑀪𑀸𑀯𑀦𑀸 𑀦𑀸𑀫 𑀅𑀦𑁂𑀓𑀲𑀢𑀸𑀦𑀺𑀲𑀁𑀲𑀸. 𑀢𑀲𑁆𑀲𑀸 𑀤𑀻𑀖𑁂𑀦𑀸𑀧𑀺 𑀅𑀤𑁆𑀥𑀼𑀦𑀸 𑀦 𑀲𑀼𑀓𑀭𑀁 𑀯𑀺𑀢𑁆𑀣𑀸𑀭𑀢𑁄 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑀼𑀁. 𑀲𑀗𑁆𑀔𑁂𑀧𑀢𑁄 𑀧𑀦𑀲𑁆𑀲𑀸 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁, 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸, 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀻𑀢𑀺 𑀅𑀬𑀫𑀸𑀦𑀺𑀲𑀁𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀣𑀸

𑁮𑁫𑁫. 𑀢𑀢𑁆𑀣 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀯𑀲𑁂𑀦 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁 𑀯𑀼𑀢𑁆𑀢𑀁, 𑀅𑀬𑀁 𑀮𑁄𑀓𑀺𑀓𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄. 𑀬𑀁 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀲𑀁𑀬𑁄𑀚𑀦𑀸𑀤𑀻𑀦𑀁 𑀯𑀲𑁂𑀦 𑀦𑀸𑀦𑀸𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁 𑀯𑀼𑀢𑁆𑀢𑀁, 𑀅𑀬𑀁 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀻𑀫𑀯𑁂𑀕𑀸𑀦𑀼𑀧𑀢𑀺𑀢𑀸, 𑀅𑀲𑀦𑀻𑀯 𑀲𑀺𑀮𑀼𑀘𑁆𑀘𑀬𑁂;

𑀯𑀸𑀬𑀼𑀯𑁂𑀕𑀲𑀫𑀼𑀝𑁆𑀞𑀺𑀢𑁄, 𑀅𑀭𑀜𑁆𑀜𑀫𑀺𑀯 𑀧𑀸𑀯𑀓𑁄.

𑀅𑀦𑁆𑀥𑀓𑀸𑀭𑀁 𑀯𑀺𑀬 𑀭𑀯𑀺, 𑀲𑀢𑁂𑀚𑀼𑀚𑁆𑀚𑀮𑀫𑀡𑁆𑀟𑀮𑁄;

𑀤𑀻𑀖𑀭𑀢𑁆𑀢𑀸𑀦𑀼𑀧𑀢𑀺𑀢𑀁, 𑀲𑀩𑁆𑀩𑀸𑀦𑀢𑁆𑀣𑀯𑀺𑀥𑀸𑀬𑀓𑀁.

𑀓𑀺𑀮𑁂𑀲𑀚𑀸𑀮𑀁 𑀧𑀜𑁆𑀜𑀸 𑀳𑀺, 𑀯𑀺𑀤𑁆𑀥𑀁𑀲𑀬𑀢𑀺 𑀪𑀸𑀯𑀺𑀢𑀸;

𑀲𑀦𑁆𑀤𑀺𑀝𑁆𑀞𑀺𑀓𑀫𑀢𑁄 𑀚𑀜𑁆𑀜𑀸, 𑀆𑀦𑀺𑀲𑀁𑀲𑀫𑀺𑀫𑀁 𑀇𑀥.

𑀨𑀮𑀲𑀫𑀸𑀧𑀢𑁆𑀢𑀺𑀓𑀣𑀸

𑁮𑁫𑁬. 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀦𑁆𑀢𑀺 𑀦 𑀓𑁂𑀯𑀮𑀜𑁆𑀘 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀜𑁆𑀜𑁂𑀯, 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀫𑁆𑀧𑀺 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄. 𑀅𑀭𑀺𑀬𑀨𑀮𑀦𑁆𑀢𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺 𑀲𑀸𑀫𑀜𑁆𑀜𑀨𑀮𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀭𑀲𑀸𑀦𑀼𑀪𑀯𑀦𑀁 𑀳𑁄𑀢𑀺. 𑀫𑀕𑁆𑀕𑀯𑀻𑀣𑀺𑀬𑀜𑁆𑀘 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁. 𑀢𑀢𑁆𑀭𑀸𑀲𑁆𑀲 𑀫𑀕𑁆𑀕𑀯𑀻𑀣𑀺𑀬𑀁 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀬𑁂𑀯.

𑁮𑁫𑁭. 𑀅𑀧𑀺𑀘 𑀬𑁂 ‘‘𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀫𑀢𑁆𑀢𑀫𑁂𑀯 𑀨𑀮𑀁 𑀦𑀸𑀫, 𑀦 𑀓𑁄𑀘𑀺 𑀅𑀜𑁆𑀜𑁄 𑀥𑀫𑁆𑀫𑁄 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀦𑀬𑀢𑁆𑀣𑀁 𑀇𑀤𑀁 𑀲𑀼𑀢𑁆𑀢𑀫𑁆𑀧𑀺 𑀤𑀲𑁆𑀲𑁂𑀢𑀩𑁆𑀩𑀁 𑁋 ‘‘𑀓𑀣𑀁 𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀜𑁆𑀜𑀸 𑀨𑀮𑁂 𑀜𑀸𑀡𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑀫𑁆𑀧𑀬𑁄𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀕𑁆𑀕𑀲𑁆𑀲𑁂𑀢𑀁 𑀨𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁬𑁩) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’ (𑀥. 𑀲. 𑁧𑁪𑁨𑁨). ‘‘𑀫𑀳𑀕𑁆𑀕𑀢𑁄 𑀥𑀫𑁆𑀫𑁄 𑀅𑀧𑁆𑀧𑀫𑀸𑀡𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁬𑁨) 𑀏𑀯𑀫𑀸𑀤𑀻𑀦𑀺𑀧𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺.

𑁮𑁫𑁮. 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀧𑀦𑀲𑁆𑀲 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑁋 𑀓𑀸 𑀨𑀮𑀲𑀫𑀸𑀧𑀢𑁆𑀢𑀺, 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀁, 𑀓𑀺𑀁 𑀨𑀮𑀲𑁆𑀲 𑀅𑀦𑀦𑁆𑀢𑀭𑀁, 𑀓𑀲𑁆𑀲 𑀘 𑀨𑀮𑀁 𑀅𑀦𑀦𑁆𑀢𑀭𑀦𑁆𑀢𑀺?

𑁮𑁫𑁯. 𑀢𑀢𑁆𑀣 𑀓𑀸 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀬𑀸 𑀅𑀭𑀺𑀬𑀨𑀮𑀲𑁆𑀲 𑀦𑀺𑀭𑁄𑀥𑁂 𑀅𑀧𑁆𑀧𑀦𑀸.

𑁮𑁬𑁦. 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀅𑀦𑀥𑀺𑀕𑀢𑀢𑁆𑀢𑀸. 𑀅𑀭𑀺𑀬𑀸 𑀧𑀦 𑀲𑀩𑁆𑀩𑁂𑀧𑀺 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀅𑀥𑀺𑀕𑀢𑀢𑁆𑀢𑀸. 𑀉𑀧𑀭𑀺𑀫𑀸 𑀧𑀦 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀼𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀳𑁂𑀝𑁆𑀞𑀺𑀫𑀸 𑀘 𑀉𑀧𑀭𑀺𑀫𑀁, 𑀅𑀦𑀥𑀺𑀕𑀢𑀢𑁆𑀢𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀬𑁂𑀯 𑀧𑀦 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁.

𑀓𑁂𑀘𑀺 𑀧𑀦 ‘‘𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀉𑀧𑀭𑀺𑀫𑀸 𑀤𑁆𑀯𑁂𑀬𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀢𑁂𑀲𑀁 𑀓𑀸𑀭𑀡𑀁, 𑀏𑀢𑁂 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺. 𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀥𑀺𑀲𑀫𑀸𑀧𑀚𑁆𑀚𑀦𑀢𑁄 𑀅𑀓𑀸𑀭𑀡𑀫𑁂𑀯. 𑀓𑀺𑀜𑁆𑀘𑁂𑀢𑁆𑀣 𑀓𑀸𑀭𑀡𑀸𑀓𑀸𑀭𑀡𑀘𑀺𑀦𑁆𑀢𑀸𑀬. 𑀦𑀦𑀼 𑀧𑀸𑀴𑀺𑀬𑀁𑀬𑁂𑀯 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑁂 𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁…𑀧𑁂… 𑀉𑀧𑀸𑀬𑀸𑀲𑀁 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 …𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁…𑀧𑁂… 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀕𑁄𑀢𑁆𑀭𑀪𑀽’’𑀢𑀺 (𑀧𑀝𑀺. 𑀫. 𑁧.𑁬𑁦). 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁮𑁬𑁧. 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁. 𑀬𑀣𑀸 𑀳𑀺 𑀭𑀸𑀚𑀸 𑀭𑀚𑁆𑀚𑀲𑀼𑀔𑀁, 𑀤𑁂𑀯𑀢𑀸 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀁 𑀅𑀭𑀺𑀬𑀸 ‘‘𑀅𑀭𑀺𑀬𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀤𑁆𑀥𑀸𑀦𑀧𑁆𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑁮𑁬𑁨. 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀦𑁆𑀢𑀺 𑀤𑁆𑀯𑀻𑀳𑀺 𑀢𑀸𑀯 𑀆𑀓𑀸𑀭𑁂𑀳𑀺 𑀅𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺 𑁋 𑀦𑀺𑀩𑁆𑀩𑀸𑀦𑀢𑁄 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀫𑀦𑀲𑀺𑀓𑀸𑀭𑀸. 𑀬𑀣𑀸𑀳 𑁋 ‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮).

𑁮𑁬𑁩. 𑀅𑀬𑀫𑁆𑀧𑀦𑁂𑀢𑁆𑀣 𑀲𑀫𑀸𑀧𑀚𑁆𑀚𑀦𑀓𑁆𑀓𑀫𑁄. 𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀺𑀓𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸 𑀯𑀺𑀧𑀲𑁆𑀲𑀺𑀢𑀩𑁆𑀩𑀸. 𑀢𑀲𑁆𑀲 𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀲𑁆𑀲 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀢𑀸𑀬 𑀘𑁂𑀢𑁆𑀣 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄.

𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀲𑁄𑀢𑀸𑀧𑀦𑁆𑀦𑁄 ‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀻 𑀘 𑀅𑀦𑀸𑀕𑀸𑀫𑀻’’𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀏𑀯𑀁 𑀲𑀢𑀺 𑀅𑀦𑀸𑀕𑀸𑀫𑀻 𑀅𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 𑀩𑀼𑀤𑁆𑀥𑁄. 𑀢𑀲𑁆𑀫𑀸 𑀦 𑀓𑀺𑀜𑁆𑀘𑀺 𑀏𑀢𑀁, 𑀧𑀸𑀴𑀺𑀯𑀲𑁂𑀦𑁂𑀯 𑀘 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀇𑀤𑀫𑁂𑀯 𑀧𑀦 𑀕𑀳𑁂𑀢𑀩𑁆𑀩𑀁 𑁋 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄. 𑀨𑀮𑀜𑁆𑀘𑀲𑁆𑀲 𑀲𑀘𑁂 𑀅𑀦𑁂𑀦 𑀧𑀞𑀫𑀚𑁆𑀛𑀸𑀦𑀺𑀓𑁄 𑀫𑀕𑁆𑀕𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀧𑀞𑀫𑀚𑁆𑀛𑀸𑀦𑀺𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀲𑀘𑁂 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄, 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀫𑁂𑀯𑀸𑀢𑀺. 𑀏𑀯𑀁 𑀢𑀸𑀯𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺.

𑁮𑁬𑁪. ‘‘𑀢𑀬𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑀯𑀘𑀦𑀢𑁄 𑀧𑀦𑀲𑁆𑀲𑀸 𑀢𑀻𑀳𑀸𑀓𑀸𑀭𑁂𑀳𑀺 𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀳𑀺𑀲𑁆𑀲𑀸 𑀬𑀸𑀯 𑀲𑁄 𑀓𑀸𑀮𑁄 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀞𑀸𑀦𑀁 𑀳𑁄𑀢𑀺. 𑀏𑀯𑀫𑀲𑁆𑀲𑀸 𑀞𑀸𑀦𑀁 𑀳𑁄𑀢𑀻𑀢𑀺.

𑁮𑁬𑁫. ‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀅𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑀯𑀘𑀦𑀢𑁄 𑀧𑀦𑀲𑁆𑀲𑀸 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀁. 𑀓𑀸𑀫𑀜𑁆𑀘 𑀦 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀏𑀓𑀢𑁄 𑀫𑀦𑀲𑀺𑀓𑀭𑁄𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀫𑀦𑀲𑀺𑀓𑀭𑁄𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀫𑀲𑁆𑀲𑀸 𑀯𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁮𑁬𑁬. 𑀓𑀺𑀁 𑀨𑀮𑀲𑁆𑀲 𑀅𑀦𑀦𑁆𑀢𑀭𑀁, 𑀓𑀲𑁆𑀲 𑀘 𑀨𑀮𑀁 𑀅𑀦𑀦𑁆𑀢𑀭𑀦𑁆𑀢𑀺 𑀨𑀮𑀲𑁆𑀲 𑀢𑀸𑀯 𑀨𑀮𑀫𑁂𑀯 𑀯𑀸 𑀅𑀦𑀦𑁆𑀢𑀭𑀁 𑀳𑁄𑀢𑀺, 𑀪𑀯𑀗𑁆𑀕𑀁 𑀯𑀸. 𑀨𑀮𑀁 𑀧𑀦 𑀅𑀢𑁆𑀣𑀺 𑀫𑀕𑁆𑀕𑀸𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀨𑀮𑀸𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁, 𑀅𑀢𑁆𑀣𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀁. 𑀢𑀢𑁆𑀣 𑀫𑀕𑁆𑀕𑀯𑀻𑀣𑀺𑀬𑀁 𑀫𑀕𑁆𑀕𑀸𑀦𑀦𑁆𑀢𑀭𑀁, 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀨𑀮𑀸𑀦𑀦𑁆𑀢𑀭𑀁. 𑀨𑀮𑀲𑀫𑀸𑀧𑀢𑁆𑀢𑀻𑀲𑀼 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀁. 𑀕𑁄𑀢𑁆𑀭𑀪𑀽𑀢𑀺 𑀘𑁂𑀢𑁆𑀣 𑀅𑀦𑀼𑀮𑁄𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂 𑁋 ‘‘𑀅𑀭𑀳𑀢𑁄 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁂𑀓𑁆𑀔𑀸𑀦𑀁 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭). 𑀬𑁂𑀦 𑀨𑀮𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀫𑀕𑁆𑀕𑀯𑀻𑀣𑀺𑀬𑀁 𑀉𑀧𑁆𑀧𑀦𑁆𑀦𑀁 𑀨𑀮𑀁 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁 𑀦𑀸𑀫. 𑀏𑀯𑀫𑁂𑀢𑀁 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀯𑀸 𑀉𑀧𑁆𑀧𑀚𑁆𑀚𑀦𑀯𑀲𑁂𑀦,

𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀁, 𑀅𑀫𑀢𑀸𑀭𑀫𑁆𑀫𑀡𑀁 𑀲𑀼𑀪𑀁;

𑀯𑀦𑁆𑀢𑀮𑁄𑀓𑀸𑀫𑀺𑀲𑀁 𑀲𑀦𑁆𑀢𑀁, 𑀲𑀸𑀫𑀜𑁆𑀜𑀨𑀮𑀫𑀼𑀢𑁆𑀢𑀫𑀁.

𑀑𑀚𑀯𑀦𑁆𑀢𑁂𑀦 𑀲𑀼𑀘𑀺𑀦𑀸, 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑀺𑀢𑀁;

𑀬𑁂𑀦 𑀲𑀸𑀢𑀸𑀢𑀺𑀲𑀸𑀢𑁂𑀦, 𑀅𑀫𑀢𑁂𑀦 𑀫𑀥𑀼𑀁 𑀯𑀺𑀬.

𑀢𑀁 𑀲𑀼𑀔𑀁 𑀢𑀲𑁆𑀲 𑀅𑀭𑀺𑀬𑀲𑁆𑀲, 𑀭𑀲𑀪𑀽𑀢𑀫𑀦𑀼𑀢𑁆𑀢𑀭𑀁;

𑀨𑀮𑀲𑁆𑀲 𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸, 𑀬𑀲𑁆𑀫𑀸 𑀯𑀺𑀦𑁆𑀤𑀢𑀺 𑀧𑀡𑁆𑀟𑀺𑀢𑁄.

𑀢𑀲𑁆𑀫𑀸 𑀅𑀭𑀺𑀬𑀨𑀮𑀲𑁆𑀲𑁂𑀢𑀁, 𑀭𑀲𑀸𑀦𑀼𑀪𑀯𑀦𑀁 𑀇𑀥;

𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬, 𑀆𑀦𑀺𑀲𑀁𑀲𑁄𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸

𑁮𑁬𑁭. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀨𑀮𑀭𑀲𑀸𑀦𑀼𑀪𑀯𑀦𑀁𑀬𑁂𑀯, 𑀅𑀬𑀁 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀧𑀺 𑀇𑀫𑀺𑀲𑁆𑀲𑀸 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀺𑀤𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀢𑁆𑀣𑀁 𑀧𑀜𑁆𑀳𑀸𑀓𑀫𑁆𑀫𑀁 𑁋 𑀓𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀁, 𑀯𑀼𑀝𑁆𑀞𑀺𑀢𑀲𑁆𑀲 𑀓𑀺𑀁𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀫𑀢𑀲𑁆𑀲 𑀘 𑀲𑀫𑀸𑀧𑀦𑁆𑀦𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀓𑀺𑀁 𑀲𑀗𑁆𑀔𑀢𑀸 𑀅𑀲𑀗𑁆𑀔𑀢𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀦𑀺𑀧𑁆𑀨𑀦𑁆𑀦𑀸 𑀅𑀦𑀺𑀧𑁆𑀨𑀦𑁆𑀦𑀸𑀢𑀺?

𑁮𑁬𑁮. 𑀢𑀢𑁆𑀣 𑀓𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀬𑀸 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸, 𑀲𑁄𑀢𑀸𑀧𑀦𑁆𑀦𑀸, 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀘 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀦𑁆𑀢𑁄 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀅𑀦𑀸𑀕𑀸𑀫𑀺𑀦𑁄, 𑀔𑀻𑀡𑀸𑀲𑀯𑀸 𑀘 𑀲𑀫𑀸𑀧𑀚𑁆𑀚𑀦𑁆𑀢𑀺. ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸, 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺, 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸 𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁧.𑁩𑁪) 𑀳𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀲𑀫𑁆𑀧𑀤𑀸 𑀞𑀧𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀜𑁆𑀜𑁂𑀲𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀬𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀦 𑀅𑀜𑁆𑀜𑁂.

𑁮𑁬𑁯. 𑀓𑀢𑀫𑀸𑀦𑀺 𑀧𑀦𑁂𑀢𑁆𑀣 𑀤𑁆𑀯𑁂 𑀩𑀮𑀸𑀦𑀺…𑀧𑁂… 𑀓𑀢𑀫𑀸 𑀯𑀲𑀻𑀪𑀸𑀯𑀢𑀸𑀢𑀺? 𑀦 𑀏𑀢𑁆𑀣 𑀓𑀺𑀜𑁆𑀘𑀺 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺. 𑀲𑀩𑁆𑀩𑀫𑀺𑀤𑀁 𑀏𑀢𑀲𑁆𑀲 𑀉𑀤𑁆𑀤𑁂𑀲𑀲𑁆𑀲 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯. 𑀬𑀣𑀸𑀳 𑁋

‘‘𑀤𑁆𑀯𑀻𑀳𑀺 𑀩𑀮𑁂𑀳𑀻𑀢𑀺 𑀤𑁆𑀯𑁂 𑀩𑀮𑀸𑀦𑀺 𑀲𑀫𑀣𑀩𑀮𑀁 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀓𑀢𑀫𑀁 𑀲𑀫𑀣𑀩𑀮𑀁? 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀣𑀩𑀮𑀁. 𑀅𑀩𑁆𑀬𑀸𑀧𑀸𑀤𑀯𑀲𑁂𑀦… 𑀆𑀮𑁄𑀓𑀲𑀜𑁆𑀜𑀸𑀯𑀲𑁂𑀦… 𑀅𑀯𑀺𑀓𑁆𑀔𑁂𑀧𑀯𑀲𑁂𑀦…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀯𑀲𑁂𑀦… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀣𑀩𑀮𑀦𑁆𑀢𑀺. 𑀓𑁂𑀦𑀝𑁆𑀞𑁂𑀦 𑀲𑀫𑀣𑀩𑀮𑀁? 𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀣𑀩𑀮𑀁. 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀲𑀫𑀣𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀘 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀻𑀢𑀺 𑀲𑀫𑀣𑀩𑀮𑀁. 𑀇𑀤𑀁 𑀲𑀫𑀣𑀩𑀮𑀁.

‘‘𑀓𑀢𑀫𑀁 𑀯𑀺𑀧𑀲𑁆𑀲𑀦𑀸𑀩𑀮𑀁? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸…𑀧𑁂… 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀩𑀮𑀦𑁆𑀢𑀺. 𑀓𑁂𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸𑀩𑀮𑀁? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀬 𑀦 𑀓𑀫𑁆𑀧𑀢𑀻𑀢𑀺… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀬𑀸 𑀦 𑀓𑀫𑁆𑀧𑀢𑀻𑀢𑀺… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑁂 𑀦 𑀓𑀫𑁆𑀧𑀢𑀻𑀢𑀺… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑁂 𑀦 𑀓𑀫𑁆𑀧𑀢𑀻𑀢𑀺… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑁂 𑀦 𑀓𑀫𑁆𑀧𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀅𑀯𑀺𑀚𑁆𑀚𑀸𑀬 𑀘 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀩𑀮𑀁. 𑀇𑀤𑀁 𑀯𑀺𑀧𑀲𑁆𑀲𑀦𑀸𑀩𑀮𑀁.

‘‘𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀓𑀢𑀫𑁂𑀲𑀁 𑀢𑀺𑀡𑁆𑀡𑀦𑁆𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸? 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀦𑁆𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸.

‘‘𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀓𑀢𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀸… 𑀅𑀦𑀢𑁆𑀢𑀸… 𑀦𑀺𑀩𑁆𑀩𑀺𑀤𑀸… 𑀯𑀺𑀭𑀸𑀕𑀸… 𑀦𑀺𑀭𑁄𑀥𑀸… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸… 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄…𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺.

‘‘𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀓𑀢𑀫𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺? 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀥𑀺𑀘𑀭𑀺𑀬𑀸. 𑀤𑀼𑀢𑀺𑀬𑀚𑁆𑀛𑀸𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀲𑀫𑀸𑀥𑀺𑀘𑀭𑀺𑀬𑀸. 𑀧𑀞𑀫𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘. 𑀇𑀫𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺.

‘‘𑀯𑀲𑀻𑀢𑀺 𑀧𑀜𑁆𑀘 𑀯𑀲𑀺𑀬𑁄 𑁋 𑀆𑀯𑀚𑁆𑀚𑀦𑀯𑀲𑀻, 𑀲𑀫𑀸𑀧𑀚𑁆𑀚𑀦𑀯𑀲𑀻, 𑀅𑀥𑀺𑀝𑁆𑀞𑀸𑀦𑀯𑀲𑀻, 𑀯𑀼𑀝𑁆𑀞𑀸𑀦𑀯𑀲𑀻, 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀧𑀞𑀫𑀚𑁆𑀛𑀸𑀦𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀆𑀯𑀚𑁆𑀚𑀢𑀺, 𑀆𑀯𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀆𑀯𑀚𑁆𑀚𑀦𑀯𑀲𑀻. 𑀧𑀞𑀫𑀚𑁆𑀛𑀸𑀦𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀲𑀫𑀸𑀧𑀚𑁆𑀚𑀦𑀯𑀲𑀻…𑀧𑁂… 𑀅𑀥𑀺𑀝𑁆𑀞𑀸𑀢𑀺 𑀅𑀥𑀺𑀝𑁆𑀞𑀸𑀦𑁂…𑀧𑁂… 𑀯𑀼𑀝𑁆𑀞𑀸𑀢𑀺 𑀯𑀼𑀝𑁆𑀞𑀸𑀦𑁂…𑀧𑁂… 𑀧𑀘𑁆𑀘𑀯𑁂𑀓𑁆𑀔𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀤𑀼𑀢𑀺𑀬𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀆𑀯𑀚𑁆𑀚𑀢𑀺 …𑀧𑁂… 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻. 𑀇𑀫𑀸 𑀧𑀜𑁆𑀘 𑀯𑀲𑀺𑀬𑁄’’𑀢𑀺 (𑀧𑀝𑀺. 𑀫. 𑁧.𑁮𑁩).

𑁮𑁭𑁦. 𑀏𑀢𑁆𑀣 𑀘 ‘‘𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻’’𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀘𑀼𑀤𑁆𑀤𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀳𑁄𑀢𑀺. 𑀬𑀤𑀺 𑀏𑀯𑀁 𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑀸𑀤𑀲𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀤𑀲𑀳𑀺 𑀓𑀺𑀁 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀺𑀓𑀲𑁆𑀲 𑀧𑀜𑁆𑀘 𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀢𑁂𑀲𑀁 𑀳𑀺 𑀲𑁄 𑀅𑀧𑁆𑀧𑀳𑀻𑀦𑁄. 𑀢𑀲𑁆𑀫𑀸 𑀲𑀫𑀣𑀩𑀮𑀁 𑀦 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀧𑀭𑀺𑀧𑀽𑀭𑁂 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀩𑀮𑀯𑁂𑀓𑀮𑁆𑀮𑁂𑀦 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀦 𑀲𑁄 𑀧𑀳𑀻𑀦𑁄, 𑀢𑀲𑁆𑀫𑀸 𑀏𑀲 𑀧𑀭𑀺𑀧𑀼𑀡𑁆𑀡𑀩𑀮𑁄 𑀳𑁄𑀢𑀺. 𑀧𑀭𑀺𑀧𑀼𑀡𑁆𑀡𑀩𑀮𑀢𑁆𑀢𑀸 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭). 𑀇𑀤𑀜𑁆𑀳𑀺 𑀧𑀝𑁆𑀞𑀸𑀦𑁂 𑀫𑀳𑀸𑀧𑀓𑀭𑀡𑁂 𑀅𑀦𑀸𑀕𑀸𑀫𑀺𑀦𑁄𑀯 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑁮𑁭𑁧. 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀓𑀲𑁆𑀫𑀸? 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀢𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀼𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀢𑁆𑀣𑀼𑀲𑁆𑀲 𑀅𑀪𑀸𑀯𑀸’’𑀢𑀺 𑀯𑀤𑀦𑁆𑀢𑀺.

𑁮𑁭𑁨. 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 ‘‘𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑀺.

𑁮𑁭𑁩. 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑀬𑀢𑁄, 𑀏𑀯𑀫𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺. 𑀬𑁄 𑀳𑀺 𑀲𑀫𑀣𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀉𑀪𑀬𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑁂𑀢𑀺, 𑀲𑁄 𑀢𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑁮𑁭𑁪. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄 𑁋 𑀇𑀥 𑀪𑀺𑀓𑁆𑀔𑀼 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀼𑀥𑁄𑀢𑀳𑀢𑁆𑀣𑀧𑀸𑀤𑁄 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀲𑀼𑀧𑀜𑁆𑀜𑀢𑁆𑀢𑀫𑁆𑀳𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, 𑀲𑁄 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺.

𑀯𑀺𑀧𑀲𑁆𑀲𑀦𑀸 𑀧𑀦𑁂𑀲𑀸 𑀢𑀺𑀯𑀺𑀥𑀸 𑀳𑁄𑀢𑀺 𑁋 𑀲𑀗𑁆𑀔𑀸𑀭𑀧𑀭𑀺𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸, 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀧𑀭𑀺𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸 𑀫𑀦𑁆𑀤𑀸 𑀯𑀸 𑀳𑁄𑀢𑀼 𑀢𑀺𑀓𑁆𑀔𑀸 𑀯𑀸, 𑀫𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺𑀬𑁂𑀯. 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀢𑀺𑀓𑁆𑀔𑀸𑀯 𑀯𑀝𑁆𑀝𑀢𑀺 𑀫𑀕𑁆𑀕𑀪𑀸𑀯𑀦𑀸𑀲𑀤𑀺𑀲𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀧𑀦 𑀦𑀸𑀢𑀺𑀫𑀦𑁆𑀤𑀦𑀸𑀢𑀺𑀢𑀺𑀓𑁆𑀔𑀸 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀏𑀲 𑀦𑀸𑀢𑀺𑀫𑀦𑁆𑀤𑀸𑀬 𑀦𑀸𑀢𑀺𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑁂 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀢𑀺.

𑀢𑀢𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺 𑁋 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁, 𑀲𑀗𑁆𑀖𑀧𑀝𑀺𑀫𑀸𑀦𑀦𑀁, 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁, 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀦𑁆𑀢𑀺.

𑁮𑁭𑁫. 𑀢𑀢𑁆𑀣 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀦𑁆𑀢𑀺 𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀦 𑀳𑁄𑀢𑀺, 𑀦𑀸𑀦𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀫𑀜𑁆𑀘𑀧𑀻𑀞𑀁 𑀯𑀸 𑀦𑀺𑀯𑀸𑀲𑀕𑁂𑀳𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀢𑀁 𑀬𑀣𑀸 𑀦 𑀯𑀺𑀓𑀼𑀧𑁆𑀧𑀢𑀺, 𑀅𑀕𑁆𑀕𑀺𑀉𑀤𑀓𑀯𑀸𑀢𑀘𑁄𑀭𑀉𑀦𑁆𑀤𑀽𑀭𑀸𑀤𑀻𑀦𑀁 𑀯𑀲𑁂𑀦 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀁 ‘‘𑀇𑀤𑀜𑁆𑀘 𑀇𑀤𑀜𑁆𑀘 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀫𑀸 𑀅𑀕𑁆𑀕𑀺𑀦𑀸 𑀛𑀸𑀬𑀢𑀼, 𑀫𑀸 𑀉𑀤𑀓𑁂𑀦 𑀯𑀼𑀬𑁆𑀳𑀢𑀼, 𑀫𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀼, 𑀫𑀸 𑀘𑁄𑀭𑁂𑀳𑀺 𑀳𑀭𑀺𑀬𑀢𑀼, 𑀫𑀸 𑀉𑀦𑁆𑀤𑀽𑀭𑀸𑀤𑀻𑀳𑀺 𑀔𑀚𑁆𑀚𑀢𑀽’’𑀢𑀺. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂 𑀢𑀁 𑀲𑀢𑁆𑀢𑀸𑀳𑀁 𑀢𑀲𑁆𑀲 𑀦 𑀓𑁄𑀘𑀺 𑀧𑀭𑀺𑀲𑁆𑀲𑀬𑁄 𑀳𑁄𑀢𑀺.

𑀅𑀦𑀥𑀺𑀝𑁆𑀞𑀳𑀢𑁄 𑀧𑀦 𑀅𑀕𑁆𑀕𑀺𑀆𑀤𑀻𑀳𑀺 𑀯𑀺𑀦𑀲𑁆𑀲𑀢𑀺 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀣𑁂𑀭𑁄 𑀓𑀺𑀭 𑀫𑀸𑀢𑀼𑀉𑀧𑀸𑀲𑀺𑀓𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀉𑀧𑀸𑀲𑀺𑀓𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀸𑀧𑁂𑀲𑀺. 𑀣𑁂𑀭𑁄 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑀲𑀸𑀮𑀸𑀬 𑀅𑀕𑁆𑀕𑀺𑀦𑀸 𑀕𑀳𑀺𑀢𑀸𑀬 𑀲𑁂𑀲𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀕𑀸𑀫𑀯𑀸𑀲𑀺𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀮𑀲𑀲𑀫𑀡𑁄’’𑀢𑀺 𑀆𑀳𑀁𑀲𑀼. 𑀅𑀕𑁆𑀕𑀺 𑀢𑀺𑀡𑀯𑁂𑀡𑀼𑀓𑀝𑁆𑀞𑀸𑀦𑀺 𑀛𑀸𑀧𑁂𑀢𑁆𑀯𑀸 𑀣𑁂𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀖𑀝𑁂𑀳𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀼𑀝𑁆𑀞𑀸𑀬 𑀢𑁂 𑀤𑀺𑀲𑁆𑀯𑀸 ‘‘𑀧𑀸𑀓𑀝𑁄𑀫𑁆𑀳𑀺 𑀚𑀸𑀢𑁄’’𑀢𑀺 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀺𑀬𑀗𑁆𑀕𑀼𑀤𑀻𑀧𑀁 𑀅𑀕𑀫𑀸𑀲𑀺. 𑀇𑀤𑀁 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁 𑀦𑀸𑀫.

𑀬𑀁 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀁 𑀯𑀸, 𑀢𑀢𑁆𑀣 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀦𑀁 𑀭𑀓𑁆𑀔𑀢𑀺 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀯𑀺𑀬. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻’’𑀢𑀺.

𑁮𑁭𑁬. 𑀲𑀗𑁆𑀖𑀧𑀝𑀺𑀫𑀸𑀦𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀧𑀝𑀺𑀫𑀸𑀦𑀦𑀁 𑀉𑀤𑀺𑀓𑁆𑀔𑀦𑀁. 𑀬𑀸𑀯 𑀏𑀲𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀢𑀸𑀯 𑀲𑀗𑁆𑀖𑀓𑀫𑁆𑀫𑀲𑁆𑀲 𑀅𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀦 𑀧𑀝𑀺𑀫𑀸𑀦𑀦𑀁 𑀏𑀢𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀁, 𑀧𑀝𑀺𑀫𑀸𑀦𑀦𑀸𑀯𑀚𑁆𑀚𑀦𑀁 𑀧𑀦 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀢𑀲𑁆𑀫𑀸 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 ‘‘𑀲𑀘𑁂 𑀫𑀬𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀗𑁆𑀖𑁄 𑀉𑀢𑁆𑀢𑀺𑀓𑀫𑁆𑀫𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀸𑀯 𑀫𑀁 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀼𑀝𑁆𑀞𑀸𑀢𑀺𑀬𑁂𑀯.

𑀬𑁄 𑀧𑀦 𑀏𑀯𑀁 𑀦 𑀓𑀭𑁄𑀢𑀺, 𑀲𑀗𑁆𑀖𑁄 𑀘 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀓𑀼𑀳𑀺’’𑀦𑁆𑀢𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑁄 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑀺 ‘‘𑀕𑀘𑁆𑀙 𑀦𑀁 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦 𑀧𑀓𑁆𑀓𑁄𑀲𑀸𑀳𑀻’’𑀢𑀺. 𑀅𑀣𑀲𑁆𑀲 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀗𑁆𑀖𑁄 𑀢𑀁 𑀆𑀯𑀼𑀲𑁄 𑀧𑀝𑀺𑀫𑀸𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀁 𑀕𑀭𑀼𑀓𑀸 𑀳𑀺 𑀲𑀗𑁆𑀖𑀲𑁆𑀲 𑀆𑀡𑀸 𑀦𑀸𑀫. 𑀢𑀲𑁆𑀫𑀸 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀬𑀣𑀸 𑀲𑀬𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁.

𑁮𑁭𑁭. 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀦𑁆𑀢𑀺 𑀇𑀥𑀸𑀧𑀺 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀯𑀚𑁆𑀚𑀦𑀫𑁂𑀯 𑀇𑀫𑀲𑁆𑀲 𑀓𑀺𑀘𑁆𑀘𑀁. 𑀢𑀲𑁆𑀫𑀸 𑀢𑀫𑁆𑀧𑀺 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 ‘‘𑀲𑀘𑁂 𑀫𑀬𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀧𑀜𑁆𑀜𑀧𑁂𑀢𑀺, 𑀢𑀣𑀸𑀭𑀽𑀧𑀸𑀬 𑀯𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀸𑀯 𑀫𑀁 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀼𑀝𑁆𑀞𑀸𑀢𑀺𑀬𑁂𑀯.

𑀬𑁄 𑀧𑀦 𑀏𑀯𑀁 𑀦 𑀓𑀭𑁄𑀢𑀺, 𑀲𑀢𑁆𑀣𑀸 𑀘 𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀓𑀼𑀳𑀺’’𑀦𑁆𑀢𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑀺 ‘‘𑀕𑀘𑁆𑀙 𑀦𑀁 𑀫𑀫 𑀯𑀘𑀦𑁂𑀦 𑀧𑀓𑁆𑀓𑁄𑀲𑀸’’𑀢𑀺. 𑀅𑀣𑀲𑁆𑀲 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑀁 𑀆𑀫𑀦𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀁 𑀕𑀭𑀼𑀓𑀁 𑀳𑀺 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁, 𑀢𑀲𑁆𑀫𑀸 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀬𑀣𑀸 𑀲𑀬𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁.

𑁮𑁭𑁮. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀚𑀻𑀯𑀺𑀢𑀤𑁆𑀥𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑁄. 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 𑀲𑀼𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 ‘‘𑀆𑀬𑀼𑀲𑀗𑁆𑀔𑀸𑀭𑀸 𑀲𑀢𑁆𑀢𑀸𑀳𑀁 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺 𑀦 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀦𑀺𑀭𑀼𑀚𑁆𑀛𑀦𑀓𑁂 𑀆𑀬𑀼𑀲𑀗𑁆𑀔𑀸𑀭𑁂 𑀅𑀦𑀸𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀢𑀺, 𑀦𑀸𑀲𑁆𑀲 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀦𑁆𑀢𑁄𑀦𑀺𑀭𑁄𑀥𑁂 𑀫𑀭𑀡𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑁆𑀢𑀭𑀸𑀯 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀢𑀺. 𑀢𑀲𑁆𑀫𑀸 𑀏𑀢𑀁 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀳𑀺 𑀅𑀦𑀸𑀯𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀤𑀁 𑀧𑀦 𑀆𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁.

𑁮𑁭𑁯. 𑀲𑁄 𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀇𑀫𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀅𑀣𑁂𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺, 𑀦𑀺𑀭𑁄𑀥𑀁 𑀨𑀼𑀲𑀢𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺𑀘𑀺𑀢𑁆𑀢𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺? 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸. 𑀇𑀤𑀜𑁆𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀬𑀼𑀕𑀦𑀤𑁆𑀥𑁂 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀆𑀭𑁄𑀳𑀦𑀁 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑁄, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀦 𑀧𑀯𑀢𑁆𑀢𑀦𑁆𑀢𑀺.

𑀬𑁄 𑀧𑀦 𑀪𑀺𑀓𑁆𑀔𑀼 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀇𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀧𑀭𑀢𑁄 𑀅𑀘𑀺𑀢𑁆𑀢𑀓𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀫𑀕𑁆𑀕𑀁 𑀅𑀕𑀢𑀧𑀼𑀩𑁆𑀩𑀧𑀼𑀭𑀺𑀲𑀽𑀧𑀫𑀸 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀸 𑁋

𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀏𑀓𑀁 𑀫𑀕𑁆𑀕𑀁 𑀅𑀕𑀢𑀧𑀼𑀩𑁆𑀩𑁄 𑀅𑀦𑁆𑀢𑀭𑀸 𑀉𑀤𑀓𑀓𑀦𑁆𑀤𑀭𑀁 𑀯𑀸 𑀕𑀫𑁆𑀪𑀻𑀭𑀁 𑀉𑀤𑀓𑀘𑀺𑀓𑁆𑀔𑀮𑁆𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀧𑀺𑀢𑀁 𑀘𑀡𑁆𑀟𑀸𑀢𑀧𑀲𑀦𑁆𑀢𑀢𑁆𑀢𑀧𑀸𑀲𑀸𑀡𑀁 𑀯𑀸 𑀆𑀕𑀫𑁆𑀫 𑀢𑀁 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀅𑀲𑀡𑁆𑀞𑀧𑁂𑀢𑁆𑀯𑀸𑀯 𑀓𑀦𑁆𑀤𑀭𑀁 𑀑𑀭𑀽𑀴𑁆𑀳𑁄 𑀧𑀭𑀺𑀓𑁆𑀔𑀸𑀭𑀢𑁂𑀫𑀦𑀪𑀬𑁂𑀦 𑀧𑀼𑀦𑀤𑁂𑀯 𑀢𑀻𑀭𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀸𑀲𑀸𑀡𑀁 𑀅𑀓𑁆𑀓𑀫𑀺𑀢𑁆𑀯𑀸𑀧𑀺 𑀲𑀦𑁆𑀢𑀢𑁆𑀢𑀧𑀸𑀤𑁄 𑀧𑀼𑀦𑀤𑁂𑀯 𑀑𑀭𑀪𑀸𑀕𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀅𑀲𑀡𑁆𑀞𑀧𑀺𑀢𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀢𑁆𑀢𑀸 𑀓𑀦𑁆𑀤𑀭𑀁 𑀑𑀢𑀺𑀡𑁆𑀡𑀫𑀢𑁆𑀢𑁄𑀯, 𑀢𑀢𑁆𑀢𑀧𑀸𑀲𑀸𑀡𑀁 𑀅𑀓𑁆𑀓𑀦𑁆𑀢𑀫𑀢𑁆𑀢𑁄 𑀏𑀯 𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀭𑀢𑁄𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄𑀧𑀺 𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀫𑀢𑁆𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀧𑀢𑀺𑀝𑁆𑀞𑀸𑀢𑀺.

𑀬𑀣𑀸 𑀧𑀦 𑀧𑀼𑀩𑁆𑀩𑁂𑀧𑀺 𑀢𑀁 𑀫𑀕𑁆𑀕𑀁 𑀕𑀢𑀧𑀼𑀩𑁆𑀩𑀧𑀼𑀭𑀺𑀲𑁄 𑀢𑀁 𑀞𑀸𑀦𑀁 𑀆𑀕𑀫𑁆𑀫 𑀏𑀓𑀁 𑀲𑀸𑀝𑀓𑀁 𑀤𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀧𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀓𑀦𑁆𑀤𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀢𑀢𑁆𑀢𑀧𑀸𑀲𑀸𑀡𑀁 𑀯𑀸 𑀅𑀓𑁆𑀓𑀦𑁆𑀢𑀫𑀢𑁆𑀢𑀓𑀫𑁂𑀯 𑀓𑀭𑀺𑀢𑁆𑀯𑀸 𑀧𑀭𑀢𑁄 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑁄 𑀪𑀺𑀓𑁆𑀔𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀧𑀭𑀢𑁄 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀭𑁄𑀥𑀁 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺.

𑁮𑁮𑁦. 𑀓𑀣𑀁 𑀞𑀸𑀦𑀦𑁆𑀢𑀺 𑀏𑀯𑀁 𑀲𑀫𑀸𑀧𑀦𑁆𑀦𑀸𑀬 𑀧𑀦𑀲𑁆𑀲𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀅𑀦𑁆𑀢𑀭𑀸𑀆𑀬𑀼𑀓𑁆𑀔𑀬𑀲𑀗𑁆𑀖𑀧𑀝𑀺𑀫𑀸𑀦𑀦𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀪𑀸𑀯𑁂𑀦 𑀘 𑀞𑀸𑀦𑀁 𑀳𑁄𑀢𑀺.

𑁮𑁮𑁧. 𑀓𑀣𑀁 𑀯𑀼𑀝𑁆𑀞𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁄 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀏𑀯𑀁 𑀤𑁆𑀯𑁂𑀥𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺.

𑁮𑁮𑁨. 𑀯𑀼𑀝𑁆𑀞𑀺𑀢𑀲𑁆𑀲 𑀓𑀺𑀁𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼𑀦𑁄 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁪).

𑁮𑁮𑁩. 𑀫𑀢𑀲𑁆𑀲 𑀘 𑀲𑀫𑀸𑀧𑀦𑁆𑀦𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸𑀳 𑁋 ‘‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸… 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀪𑀺𑀦𑁆𑀦𑀸𑀦𑀺. 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲𑀧𑀺 𑀓𑀸𑀬𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀯𑀘𑀻𑀲𑀗𑁆𑀔𑀸𑀭𑀸… 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀆𑀬𑀼 𑀅𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀅𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀭𑀺𑀪𑀺𑀦𑁆𑀦𑀸𑀦𑀻’’𑀢𑀺 (𑀫. 𑀦𑀺. 𑁧.𑁪𑁫𑁭).

𑁮𑁮𑁪. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀗𑁆𑀔𑀢𑀸𑀢𑀺𑀆𑀤𑀺𑀧𑀼𑀘𑁆𑀙𑀸𑀬𑀁 𑀧𑀦 𑀲𑀗𑁆𑀔𑀢𑀸𑀢𑀺𑀧𑀺 𑀅𑀲𑀗𑁆𑀔𑀢𑀸𑀢𑀺𑀧𑀺 𑀮𑁄𑀓𑀺𑀬𑀸𑀢𑀺𑀧𑀺 𑀮𑁄𑀓𑀼𑀢𑁆𑀢𑀭𑀸𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀲𑀪𑀸𑀯𑀢𑁄 𑀦𑀢𑁆𑀣𑀺𑀢𑀸𑀬. 𑀬𑀲𑁆𑀫𑀸 𑀧𑀦𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀯𑀲𑁂𑀦 𑀲𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀨𑀦𑁆𑀦𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦𑁄 𑀅𑀦𑀺𑀧𑁆𑀨𑀦𑁆𑀦𑀸.

𑀇𑀢𑀺 𑀲𑀦𑁆𑀢𑀁 𑀲𑀫𑀸𑀧𑀢𑁆𑀢𑀺𑀁, 𑀇𑀫𑀁 𑀅𑀭𑀺𑀬𑀦𑀺𑀲𑁂𑀯𑀺𑀢𑀁;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀫𑀺𑀢𑀺𑀲𑀗𑁆𑀔𑀁 𑀉𑀧𑀸𑀕𑀢𑀁;

𑀪𑀸𑀯𑁂𑀢𑁆𑀯𑀸 𑀅𑀭𑀺𑀬𑀁 𑀧𑀜𑁆𑀜𑀁, 𑀲𑀫𑀸𑀧𑀚𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀬𑀲𑁆𑀫𑀸 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀲𑀫𑀢𑁆𑀣𑀢𑀸;

𑀅𑀭𑀺𑀬𑀫𑀕𑁆𑀕𑁂𑀲𑀼 𑀧𑀜𑁆𑀜𑀸𑀬, 𑀆𑀦𑀺𑀲𑀁𑀲𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀓𑀣𑀸

𑁮𑁮𑁫. 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀻𑀢𑀺 𑀦 𑀓𑁂𑀯𑀮𑀜𑁆𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀯, 𑀅𑀬𑀁 𑀧𑀦 𑀆𑀳𑀼𑀦𑁂𑀬𑁆𑀬𑀪𑀸𑀯𑀸𑀤𑀺𑀲𑀺𑀤𑁆𑀥𑀺𑀧𑀺 𑀇𑀫𑀺𑀲𑁆𑀲𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀳𑀺 𑀘𑀢𑀼𑀩𑁆𑀩𑀺𑀥𑀸𑀬𑀧𑀺 𑀏𑀢𑀺𑀲𑁆𑀲𑀸 𑀪𑀸𑀯𑀺𑀢𑀢𑁆𑀢𑀸 𑀪𑀸𑀯𑀺𑀢𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀻𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

𑁮𑁮𑁬. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀧𑀞𑀫𑀫𑀕𑁆𑀕𑀧𑀜𑁆𑀜𑀁 𑀢𑀸𑀯 𑀪𑀸𑀯𑁂𑀢𑁆𑀯𑀸 𑀫𑀦𑁆𑀤𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫 𑀳𑁄𑀢𑀺, 𑀲𑀢𑁆𑀢𑀲𑀼𑀕𑀢𑀺𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀫𑀚𑁆𑀛𑀺𑀫𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑁄 𑀓𑁄𑀮𑀁𑀓𑁄𑀮𑁄 𑀦𑀸𑀫 𑀳𑁄𑀢𑀺, 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺, 𑀏𑀓𑀜𑁆𑀜𑁂𑀯 𑀫𑀸𑀦𑀼𑀲𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑁮𑁮𑁭. 𑀤𑀼𑀢𑀺𑀬𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑁮𑁮𑁮. 𑀢𑀢𑀺𑀬𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺. 𑀲𑁄 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀯𑀲𑁂𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘𑀥𑀸. 𑀇𑀥 𑀯𑀺𑀳𑀸𑀬𑀦𑀺𑀝𑁆𑀞𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀼𑀤𑁆𑀥𑀸𑀯𑀸𑀲𑀪𑀯𑁂 𑀉𑀧𑀧𑀚𑁆𑀚𑀺𑀢𑁆𑀯𑀸 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀉𑀧𑀭𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀉𑀧𑀭𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀬𑀢𑁆𑀣𑀼𑀧𑀧𑀦𑁆𑀦𑁄, 𑀢𑀢𑁄 𑀉𑀤𑁆𑀥𑀁 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀸 𑀆𑀭𑀼𑀬𑁆𑀳 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑁮𑁮𑁯. 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀓𑁄𑀘𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀓𑁄𑀘𑀺 𑀢𑁂𑀯𑀺𑀚𑁆𑀚𑁄, 𑀓𑁄𑀘𑀺 𑀙𑀴𑀪𑀺𑀜𑁆𑀜𑁄, 𑀓𑁄𑀘𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀪𑁂𑀤𑀧𑁆𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀓𑁆𑀔𑀡𑁂 𑀧𑀦𑁂𑀲 𑀢𑀁 𑀚𑀝𑀁 𑀯𑀺𑀚𑀝𑁂𑀢𑀺 𑀦𑀸𑀫. 𑀨𑀮𑀓𑁆𑀔𑀡𑁂 𑀯𑀺𑀚𑀝𑀺𑀢𑀚𑀝𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀻’’𑀢𑀺.

𑀏𑀯𑀁 𑀅𑀦𑁂𑀓𑀸𑀦𑀺𑀲𑀁𑀲𑀸, 𑀅𑀭𑀺𑀬𑀧𑀜𑁆𑀜𑀸𑀬 𑀪𑀸𑀯𑀦𑀸;

𑀬𑀲𑁆𑀫𑀸 𑀢𑀲𑁆𑀫𑀸 𑀓𑀭𑁂𑀬𑁆𑀬𑀸𑀣, 𑀭𑀢𑀺𑀁 𑀢𑀢𑁆𑀣 𑀯𑀺𑀘𑀓𑁆𑀔𑀡𑁄.

𑁮𑁯𑁦. 𑀏𑀢𑁆𑀢𑀸𑀯𑀢𑀸 𑀘 𑁋

𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀦𑁆𑀢𑀺. 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦 𑀤𑁂𑀲𑀺𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀸𑀦𑀺𑀲𑀁𑀲𑀸 𑀧𑀜𑁆𑀜𑀸𑀪𑀸𑀯𑀦𑀸 𑀧𑀭𑀺𑀤𑀻𑀧𑀺𑀢𑀸 𑀳𑁄𑀢𑀻𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂

𑀧𑀜𑁆𑀜𑀸𑀪𑀸𑀯𑀦𑀸𑀦𑀺𑀲𑀁𑀲𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀕𑀫𑀦𑀓𑀣𑀸

𑁮𑁯𑁧. 𑀏𑀢𑁆𑀢𑀸𑀯𑀢𑀸 𑀘 𑁋

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀯𑁄𑀘𑀼𑀫𑁆𑀳 𑁋

‘‘𑀇𑀫𑀺𑀲𑁆𑀲𑀸 𑀤𑀸𑀦𑀺 𑀕𑀸𑀣𑀸𑀬, 𑀓𑀣𑀺𑀢𑀸𑀬 𑀫𑀳𑁂𑀲𑀺𑀦𑀸;

𑀯𑀡𑁆𑀡𑀬𑀦𑁆𑀢𑁄 𑀬𑀣𑀸𑀪𑀽𑀢𑀁, 𑀅𑀢𑁆𑀣𑀁 𑀲𑀻𑀮𑀸𑀤𑀺𑀪𑁂𑀤𑀦𑀁.

‘‘𑀲𑀼𑀤𑀼𑀮𑁆𑀮𑀪𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑁆𑀚𑀁 𑀚𑀺𑀦𑀲𑀸𑀲𑀦𑁂;

𑀲𑀻𑀮𑀸𑀤𑀺𑀲𑀗𑁆𑀕𑀳𑀁 𑀔𑁂𑀫𑀁, 𑀉𑀚𑀼𑀁 𑀫𑀕𑁆𑀕𑀁 𑀯𑀺𑀲𑀼𑀤𑁆𑀥𑀺𑀬𑀸.

‘‘𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸, 𑀲𑀼𑀤𑁆𑀥𑀺𑀓𑀸𑀫𑀸𑀧𑀺 𑀬𑁂 𑀇𑀥;

𑀯𑀺𑀲𑀼𑀤𑁆𑀥𑀺𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀯𑀸𑀬𑀫𑀦𑁆𑀢𑀸𑀧𑀺 𑀬𑁄𑀕𑀺𑀦𑁄.

‘‘𑀢𑁂𑀲𑀁 𑀧𑀸𑀫𑁄𑀚𑁆𑀚𑀓𑀭𑀡𑀁, 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀤𑁂𑀲𑀦𑀸𑀦𑀬𑀦𑀺𑀲𑁆𑀲𑀺𑀢𑀁.

‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀪𑀸𑀲𑀺𑀲𑁆𑀲𑀁, 𑀢𑀁 𑀫𑁂 𑀲𑀓𑁆𑀓𑀘𑁆𑀘 𑀪𑀸𑀲𑀢𑁄;

𑀯𑀺𑀲𑀼𑀤𑁆𑀥𑀺𑀓𑀸𑀫𑀸 𑀲𑀩𑁆𑀩𑁂𑀧𑀺, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄’’𑀢𑀺.

𑀲𑁆𑀯𑀸𑀬𑀁 𑀪𑀸𑀲𑀺𑀢𑁄 𑀳𑁄𑀢𑀺.

𑁮𑁯𑁨. 𑀢𑀢𑁆𑀣 𑀘 𑁋

𑀢𑁂𑀲𑀁 𑀲𑀻𑀮𑀸𑀤𑀺𑀪𑁂𑀤𑀸𑀦𑀁, 𑀅𑀢𑁆𑀣𑀸𑀦𑀁 𑀬𑁄 𑀯𑀺𑀦𑀺𑀘𑁆𑀙𑀬𑁄;

𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀺𑀓𑀸𑀬𑀸𑀦𑀁, 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀦𑀬𑁂.

𑀲𑀫𑀸𑀳𑀭𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀬𑁂𑀪𑀼𑀬𑁆𑀬𑁂𑀦 𑀲𑀦𑀺𑀘𑁆𑀙𑀬𑁄;

𑀲𑀩𑁆𑀩𑀲𑀗𑁆𑀓𑀭𑀤𑁄𑀲𑁂𑀳𑀺, 𑀫𑀼𑀢𑁆𑀢𑁄 𑀬𑀲𑁆𑀫𑀸 𑀧𑀓𑀸𑀲𑀺𑀢𑁄.

𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀓𑀸𑀫𑁂𑀳𑀺, 𑀲𑀼𑀤𑁆𑀥𑀧𑀜𑁆𑀜𑁂𑀳𑀺 𑀬𑁄𑀕𑀺𑀳𑀺;

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀏𑀢𑀲𑁆𑀫𑀺𑀁, 𑀓𑀭𑀡𑀻𑀬𑁄𑀯 𑀆𑀤𑀭𑁄𑀢𑀺.

𑁮𑁯𑁩. 𑀯𑀺𑀪𑀚𑁆𑀚𑀯𑀸𑀤𑀺𑀲𑁂𑀝𑁆𑀞𑀸𑀦𑀁, 𑀣𑁂𑀭𑀺𑀬𑀸𑀦𑀁 𑀬𑀲𑀲𑁆𑀲𑀺𑀦𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀁𑀲𑀚𑀲𑁆𑀲 𑀯𑀺𑀪𑀸𑀯𑀺𑀦𑁄.

𑀪𑀤𑀦𑁆𑀢𑀲𑀗𑁆𑀖𑀧𑀸𑀮𑀲𑁆𑀲, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄;

𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑀲𑁆𑀲, 𑀬𑀼𑀢𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀁.

𑀔𑀦𑁆𑀢𑀺𑀲𑁄𑀭𑀘𑁆𑀘𑀫𑁂𑀢𑁆𑀢𑀸𑀤𑀺-𑀕𑀼𑀡𑀪𑀽𑀲𑀺𑀢𑀘𑁂𑀢𑀲𑁄;

𑀅𑀚𑁆𑀛𑁂𑀲𑀦𑀁 𑀕𑀳𑁂𑀢𑁆𑀯𑀸𑀦, 𑀓𑀭𑁄𑀦𑁆𑀢𑁂𑀦 𑀇𑀫𑀁 𑀫𑀬𑀸.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀬𑁄 𑀧𑀢𑁆𑀢𑁄 𑀧𑀼𑀜𑁆𑀜𑀲𑀜𑁆𑀘𑀬𑁄;

𑀢𑀲𑁆𑀲 𑀢𑁂𑀚𑁂𑀦 𑀲𑀩𑁆𑀩𑁂𑀧𑀺, 𑀲𑀼𑀔𑀫𑁂𑀥𑀦𑁆𑀢𑀼 𑀧𑀸𑀡𑀺𑀦𑁄.

𑁮𑁯𑁪. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀏𑀲𑁄 𑀘, 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀇𑀥;

𑀦𑀺𑀝𑁆𑀞𑀺𑀢𑁄 𑀅𑀝𑁆𑀞𑀧𑀜𑁆𑀜𑀸𑀲-𑀪𑀸𑀡𑀯𑀸𑀭𑀸𑀬 𑀧𑀸𑀴𑀺𑀬𑀸.

𑀬𑀣𑀸 𑀢𑀣𑁂𑀯 𑀮𑁄𑀓𑀲𑁆𑀲, 𑀲𑀩𑁆𑀩𑁂 𑀓𑀮𑁆𑀬𑀸𑀡𑀦𑀺𑀲𑁆𑀲𑀺𑀢𑀸;

𑀅𑀦𑀦𑁆𑀢𑀭𑀸𑀬𑀸 𑀇𑀚𑁆𑀛𑀦𑁆𑀢𑀼, 𑀲𑀻𑀖𑀁 𑀲𑀻𑀖𑀁 𑀫𑀦𑁄𑀭𑀣𑀸𑀢𑀺.

𑁮𑁯𑁫. 𑀧𑀭𑀫 𑀯𑀺𑀲𑀼𑀤𑁆𑀥 𑀲𑀤𑁆𑀥𑀸 𑀩𑀼𑀤𑁆𑀥𑀺 𑀯𑀻𑀭𑀺𑀬 𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯 𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬 𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺 𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀧𑁆𑀧𑀝𑀺𑀳𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀫𑀼𑀤𑀦𑁆𑀢𑀔𑁂𑀤𑀓𑀯𑀢𑁆𑀢𑀩𑁆𑀩𑁂𑀦 𑀓𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀦𑀸𑀫.

𑁮𑁯𑁬. 𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀻𑀮𑀸𑀤𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀣𑀸,

𑀧𑀸𑀴𑀺𑀕𑀡𑀦𑀸𑀬 𑀧𑀦 𑀲𑀸 𑀅𑀝𑁆𑀞𑀧𑀜𑁆𑀜𑀸𑀲𑀪𑀸𑀡𑀯𑀸𑀭𑀸 𑀳𑁄𑀢𑀻𑀢𑀺.

𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.