𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀼𑀢𑁆𑀢𑀯𑀦𑁆𑀤𑀦𑀸

𑁧. 𑀥𑀫𑁆𑀫𑀢𑁆𑀣 𑀤𑁂𑀲𑀦𑀸 𑀯𑁂𑀥,

𑀘𑀢𑀼𑀕𑀫𑁆𑀪𑀻𑀭 𑀤𑀼𑀤𑁆𑀤𑀲𑀁;

𑀥𑀫𑁆𑀫𑀁 𑀮𑁄𑀓𑀲𑁆𑀲 𑀤𑁂𑀲𑁂𑀦𑁆𑀢𑀁,

𑀥𑀫𑁆𑀫𑀭𑀸𑀚𑀁 𑀦𑀫𑀸𑀫𑀳𑀁;

𑁨. 𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘,

𑀅𑀭𑀳𑀸 𑀘𑀓𑁆𑀓𑀯𑀢𑁆𑀢𑀻𑀢𑀺;

𑀣𑀽𑀧𑀸𑀣𑀽𑀧𑀸𑀭𑀳𑀁 𑀯𑀦𑁆𑀤𑁂,

𑀘𑀢𑀼𑀣𑀽𑀧𑀸𑀭𑀳𑁂𑀲𑀼 𑀢𑀁;

𑁩. 𑀧𑁂𑀢𑀲𑁂𑀬𑁆𑀬𑁄 𑀓𑀸𑀫𑀪𑁄𑀕𑀻,

𑀲𑀻𑀳𑀲𑁂𑀬𑁆𑀬𑁄 𑀢𑀣𑀸𑀕𑀢𑁄;

𑀲𑀬𑀦𑁆𑀢𑀁 𑀘𑀢𑀼𑀲𑁂𑀬𑁆𑀬𑁂𑀲𑀼,

𑀘𑀢𑀼𑀢𑁆𑀣𑁂𑀦 𑀦𑀫𑁂 𑀚𑀺𑀦𑀁;

𑁪. 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸 𑀘;

𑀲𑀁𑀲𑁂𑀤𑀚𑁄 𑀧𑀧𑀸𑀢𑀺𑀓𑀸;

𑀘𑀢𑀼𑀬𑁄𑀦𑀺 𑀧𑀭𑀺𑀘𑁆𑀙𑁂𑀤,

𑀜𑀸𑀡𑀯𑀦𑁆𑀢𑀁 𑀦𑀫𑁂 𑀚𑀺𑀦𑀁;

𑁫. 𑀲𑀼𑀢𑀩𑀼𑀤𑁆𑀥𑁄𑀦𑀼𑀩𑀼𑀤𑁆𑀥𑁄 𑀘,

𑀧𑀘𑁆𑀘𑁂𑀓𑁄 𑀚𑀺𑀦𑀩𑀼𑀤𑁆𑀥𑁄𑀢𑀺;

𑀘𑀢𑀼𑀢𑁆𑀣𑀁 𑀘𑀢𑀼𑀩𑀼𑀤𑁆𑀥𑁂𑀲𑀼,

𑀯𑀦𑁆𑀤𑀸𑀫𑀺 𑀮𑁄𑀓𑀦𑀸𑀬𑀓𑀁;

𑁬. 𑀭𑀸𑀳𑀼𑀕𑁆𑀕𑀁 𑀅𑀢𑁆𑀢𑀪𑀸𑀕𑀻𑀦𑀁,

𑀫𑀦𑁆𑀥𑀸𑀢𑀸 𑀓𑀸𑀫𑀪𑁄𑀕𑀻𑀦𑀁;

𑀫𑀸𑀭𑁄 𑀅𑀥𑀺𑀧𑀢𑁂𑀬𑁆𑀬𑀸𑀦𑀁,

𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀘𑀢𑀼𑀅𑀕𑁆𑀕 𑀧𑀜𑁆𑀜𑀢𑁆𑀢𑀻𑀦𑀁,

𑀅𑀕𑁆𑀕𑀧𑀢𑁆𑀢𑀁 𑀦𑀫𑁂 𑀚𑀺𑀦𑀁.

𑁭. 𑀤𑀸𑀦𑀁 𑀧𑀺𑀬𑀓𑀣𑀸 𑀅𑀢𑁆𑀣,

𑀘𑀭𑀺𑀬𑀸 𑀲𑀤𑀺𑀲𑀢𑁆𑀢𑀢𑀸;

𑀘𑀢𑀼𑀲𑀗𑁆𑀕𑀳 𑀯𑀢𑁆𑀣𑀽𑀳𑀺,

𑀅𑀲𑀗𑁆𑀔𑀺𑀬𑁂𑀲𑀼 𑀚𑀸𑀢𑀺𑀲𑀼;

𑀮𑁄𑀓𑀲𑁆𑀲 𑀲𑀗𑁆𑀕𑀳𑁂𑀢𑀸𑀭𑀁,

𑀯𑀦𑁆𑀤𑀸𑀫𑀺 𑀮𑁄𑀓𑀦𑀸𑀬𑀓𑀁;

𑁮. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄𑀢𑀺,

𑀅𑀦𑁆𑀢𑁄 𑀧𑀘𑁆𑀘𑀢𑁆𑀣𑀺𑀓𑁂 𑀢𑀬𑁄;

𑀤𑀼𑀚𑁆𑀚𑀬𑁂 𑀲𑀩𑁆𑀩𑀯𑁂𑀭𑀻𑀳𑀺,

𑀲𑀜𑁆𑀚𑀺𑀢𑀁𑀧𑀺 𑀲𑀼𑀥𑀺𑀁 𑀦𑀫𑁂;

𑁯. 𑀚𑀸𑀢𑀺 𑀧𑀼𑀜𑁆𑀜 𑀫𑀳𑀢𑁆𑀢𑀸𑀦𑀺,

𑀕𑀼𑀡𑀫𑀳𑀢𑁆𑀢𑀫𑀼𑀢𑁆𑀢𑀫𑀁;

𑀢𑀺𑀫𑀳𑀢𑁆𑀣𑁂𑀳𑀺 𑀲𑀫𑁆𑀧𑀦𑁆𑀦𑀁,

𑀯𑀦𑁆𑀤𑀸𑀫𑀺 𑀮𑁄𑀓𑀦𑀸𑀬𑀓𑀁;

𑁧𑁦. 𑀳𑁂𑀢𑀼 𑀨𑀮 𑀲𑀫𑁆𑀧𑀤𑀸𑀬𑁄,

𑀲𑀢𑁆𑀢𑀼𑀧𑀓𑀸𑀭𑀲𑀫𑁆𑀧𑀤𑀸;

𑀢𑀺𑀲𑀫𑁆𑀧𑀤𑀸𑀳𑀺 𑀲𑀫𑁆𑀧𑀦𑁆𑀦𑀁,

𑀯𑀦𑁆𑀤𑀸𑀫𑀺 𑀮𑁄𑀓𑀦𑀸𑀬𑀓𑀁.

𑁧𑁧. 𑀜𑀸𑀡𑀧𑁆𑀧𑀳𑀸𑀦𑀸𑀦𑀼𑀪𑀸𑀯,

𑀲𑀼𑀭𑀽𑀧𑀓𑀸𑀭𑀲𑀫𑁆𑀧𑀤𑀸;

𑀘𑀢𑀼𑀨𑀮 𑀲𑀫𑁆𑀧𑀤𑀸𑀳𑀺,

𑀢𑀁 𑀲𑀫𑁆𑀧𑀦𑁆𑀦𑀁 𑀦𑀫𑁂 𑀚𑀺𑀦𑀁.

𑁧𑁨. 𑀆𑀲𑀬𑁄 𑀘 𑀧𑀬𑁄𑀕𑁄𑀢𑀺,

𑀲𑀢𑁆𑀢𑀼𑀧𑀓𑀸𑀭 𑀲𑀫𑁆𑀧𑀤𑀸;

𑀤𑀼𑀯𑀺𑀥𑀸 𑀬𑀲𑁆𑀲 𑀲𑀫𑁆𑀧𑀦𑁆𑀦𑀸,

𑀲𑀫𑁆𑀫𑀸 𑀫𑀁 𑀧𑀸𑀢𑀼 𑀲𑁄 𑀚𑀺𑀦𑁄.

𑁧𑁩. 𑀫𑀳𑁄𑀲𑀥𑁂 𑀯𑁂𑀲𑁆𑀲𑀦𑁆𑀢𑀭𑁂,

𑀧𑀘𑁆𑀙𑀺𑀫𑀪𑀯𑀺𑀓𑁂 𑀢𑀣𑀸;

𑀢𑀺𑀚𑀸𑀢𑀻𑀲𑀼 𑀦𑀫𑁂 𑀯𑀸𑀘𑀁,

𑀪𑀸𑀲𑁂𑀦𑁆𑀢𑀁 𑀚𑀸𑀬𑀦𑀓𑁆𑀔𑀡𑁂.

𑁧𑁪. 𑀦𑁂𑀫𑀺𑀫𑁆𑀳𑀺 𑀲𑀸𑀥𑀺𑀦𑁂 𑀘𑁂𑀯,

𑀫𑀦𑁆𑀥𑀸𑀢𑀭𑀺 𑀘 𑀕𑀼𑀢𑁆𑀢𑀺𑀮𑁂;

𑀘𑀢𑀽𑀲𑀼 𑀫𑀦𑀼𑀚𑀢𑁆𑀢𑁂𑀦,

𑀤𑁂𑀯𑀮𑁄𑀓𑀁 𑀕𑀢𑀁 𑀦𑀫𑁂.

𑁧𑁫. 𑀲𑀗𑁆𑀔𑀸𑀭𑁄 𑀭𑀽𑀧𑀯𑀺𑀓𑀸𑀭𑁄,

𑀮𑀓𑁆𑀔𑀡𑀁 𑀯𑀸𑀦𑀦𑀺𑀲𑁆𑀲𑀝𑀁;

𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀺𑀘𑁂𑀢𑀺,

𑀧𑀜𑁆𑀘 𑀜𑁂𑀬𑁆𑀬𑀦𑁆𑀢𑀕𑀼𑀁 𑀦𑀫𑁂.

𑁧𑁬. 𑀧𑀼𑀢𑁆𑀢 𑀤𑀸𑀭 𑀧𑀭𑀺𑀘𑁆𑀘𑀸𑀕𑀸,

𑀭𑀚𑁆𑀚𑀗𑁆𑀕𑀁 𑀚𑀻𑀯 𑀘𑀸𑀕𑀻𑀢𑀺;

𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂,

𑀓𑀭𑀁 𑀲𑀼𑀤𑀼𑀓𑁆𑀓𑀭𑁂 𑀦𑀫𑁂.

𑁧𑁭. 𑀭𑀽𑀧𑀜𑁆𑀘 𑀯𑁂𑀤𑀦𑀸 𑀲𑀜𑁆𑀜𑀸,

𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺𑀫𑁂;

𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀁,

𑀢𑀺𑀧𑀭𑀺𑀜𑁆𑀜𑀸𑀳𑀺 𑀢𑀁 𑀦𑀫𑁂.

𑁧𑁮. 𑀫𑀦𑀼𑀲𑁆𑀲 𑀤𑁂𑀯 𑀕𑀢𑀺𑀬𑁄,

𑀧𑁂𑀢𑁄 𑀘 𑀦𑀺𑀭𑀬𑁄 𑀢𑀣𑀸;

𑀢𑀺𑀭𑀘𑁆𑀙𑀸𑀦𑁄𑀢𑀺 𑀧𑀜𑁆𑀘𑁂𑀢𑀸,

𑀙𑀺𑀦𑁆𑀤𑀦𑁆𑀢𑀁 𑀕𑀢𑀺𑀬𑁄 𑀦𑀫𑁂;

𑁧𑁯. 𑀤𑁂𑀯𑀧𑀼𑀢𑁆𑀢𑁄 𑀓𑀺𑀮𑁂𑀲𑁄 𑀘,

𑀅𑀪𑀺𑀲𑀗𑁆𑀔𑀸𑀭 𑀫𑀸𑀭𑀓𑁄;

𑀔𑀦𑁆𑀥𑁄 𑀫𑀘𑁆𑀘𑀽𑀢𑀺 𑀧𑀜𑁆𑀘𑁂𑀢𑁂,

𑀫𑀸𑀭𑁂 𑀯𑀺𑀚𑀺𑀢𑀯𑀁 𑀦𑀫𑁂.

𑁨𑁦. 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁,

𑀧𑀼𑀭𑀺𑀫𑀜𑁆𑀘𑁂𑀯 𑀫𑀚𑁆𑀛𑀺𑀫𑀁;

𑀧𑀘𑁆𑀙𑀺𑀫𑀦𑁆𑀢𑀺 𑀲𑀤𑀸 𑀧𑀜𑁆𑀘,

𑀩𑀼𑀤𑁆𑀥𑀓𑀺𑀘𑁆𑀘𑀁 𑀓𑀭𑀁 𑀦𑀫𑁂.

𑁨𑁧. 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸,

𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸,

𑀔𑁂𑀴𑀁𑀯 𑀦𑀺𑀕𑁆𑀕𑀢𑀁 𑀦𑀫𑁂.

𑁨𑁨. 𑀭𑀸𑀕𑀲𑀮𑁆𑀮𑀁 𑀤𑁄𑀲𑀲𑀮𑁆𑀮𑀁,

𑀫𑁄𑀳𑀸 𑀫𑀸𑀦𑁄 𑀘 𑀤𑀺𑀝𑁆𑀞𑀻𑀢𑀺;

𑀯𑀦𑁆𑀤𑁂 𑀯𑀚𑁆𑀚𑀸𑀢𑀺𑀯𑀚𑁆𑀚𑀦𑁆𑀢𑀁,

𑀧𑀜𑁆𑀘𑀲𑀮𑁆𑀮𑀧𑀦𑀽𑀤𑀦𑀁.

𑁨𑁩. 𑀤𑀻𑀖𑁄 𑀫𑀚𑁆𑀛𑀺𑀫 𑀲𑀁𑀬𑀼𑀢𑁆𑀢𑀸,

𑀅𑀗𑁆𑀕𑀼𑀢𑁆𑀢𑀭𑁄 𑀘 𑀔𑀼𑀤𑁆𑀤𑀓𑁄;

𑀇𑀢𑀺 𑀧𑀜𑁆𑀘 𑀦𑀺𑀓𑀸𑀬𑁂𑀳𑀺,

𑀲𑀼𑀯𑀺𑀦𑁂𑀦𑁆𑀢𑀁 𑀧𑀚𑀁 𑀦𑀫𑁂.

𑁨𑁪. 𑀇𑀲𑁆𑀲𑀭𑀺𑀬𑀁 𑀬𑀲𑁄 𑀥𑀫𑁆𑀫𑁄,

𑀓𑀸𑀫𑁄 𑀲𑀺𑀭𑀻 𑀧𑀬𑀢𑁆𑀢𑀻𑀢𑀺;

𑀪𑀕𑁆𑀬𑁂𑀳𑀺 𑀙𑀳𑀺 𑀲𑀫𑁆𑀧𑀦𑁆𑀦𑀁,

𑀯𑀦𑁆𑀤𑀸𑀫𑀺 𑀮𑁄𑀓𑀦𑀸𑀬𑀓𑀁.

𑁨𑁫. 𑀧𑀺𑀬𑀸𑀧𑀺𑀬𑀁 𑀪𑀽𑀢𑀸𑀪𑀽𑀢𑀁,

𑀅𑀢𑁆𑀣𑀸𑀦𑀢𑁆𑀣𑀁 𑀬𑀣𑀸𑀭𑀳𑀁;

𑀫𑀺𑀲𑁆𑀲𑀸 𑀙𑀲𑀼 𑀲𑀼𑀯𑀸𑀘𑀁𑀯,

𑀪𑀸𑀲𑀦𑁆𑀢𑀁 𑀅𑀢𑁆𑀣𑀓𑀁 𑀦𑀫𑁂.

𑁨𑁬. 𑀅𑀮𑀲𑁄 𑀘 𑀧𑀫𑀸𑀤𑁄 𑀘,

𑀅𑀦𑀼𑀝𑁆𑀞𑀸𑀦𑀁 𑀅𑀲𑀁𑀬𑀫𑁄;

𑀦𑀺𑀤𑁆𑀤𑀸 𑀢𑀦𑁆𑀢𑀻𑀢𑀺 𑀙𑀺𑀤𑁆𑀤𑁂𑀳𑀺,

𑀙𑀳𑀺 𑀫𑀼𑀢𑁆𑀢𑀁 𑀲𑀤𑀸 𑀦𑀫𑁂.

𑁨𑁭. 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺,

𑀬𑀫𑀓𑀧𑁆𑀧𑀸𑀝𑀺𑀳𑀸𑀭𑀺𑀬𑀁;

𑀆𑀲𑀬𑀸𑀦𑀼𑀲𑀬𑁂 𑀜𑀸𑀡𑀁,

𑀇𑀦𑁆𑀤𑁆𑀭𑀺𑀬𑀸𑀦 𑀧𑀭𑁄𑀧𑀭𑁂;

𑀲𑀩𑁆𑀩𑀜𑁆𑀜𑀼𑀢𑀸 𑀦𑀸𑀯𑀭𑀡𑀁,

𑀙𑀸 𑀲𑀸𑀥𑀸𑀭𑀡𑀺𑀓𑀁 𑀦𑀫𑁂.

𑁨𑁮. 𑀓𑀸𑀫𑀘𑁆𑀙𑀦𑁆𑀤𑁄 𑀘 𑀩𑁆𑀬𑀸𑀧𑀸𑀤𑁄,

𑀣𑀺𑀦𑀫𑀺𑀤𑁆𑀥𑀜𑁆𑀘 𑀲𑀁𑀲𑀬𑁄;

𑀅𑀯𑀺𑀚𑁆𑀚𑀼𑀤𑁆𑀥𑀘𑁆𑀘 𑀓𑀼𑀓𑁆𑀓𑀼𑀘𑁆𑀘𑀁,

𑀙𑀯𑀺𑀦𑀻𑀯𑀭𑀡𑀁 𑀦𑀫𑁂.

𑁨𑁯. 𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑀁,

𑀧𑀭𑀘𑀺𑀢𑁆𑀢 𑀯𑀺𑀚𑀸𑀦𑀦𑀸;

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺,

𑀤𑀺𑀩𑁆𑀩𑀘𑀓𑁆𑀔𑀸𑀲𑀯𑀓𑁆𑀔𑀬𑁄;

𑀙𑀴𑀪𑀺𑀜𑁆𑀜𑀸𑀳𑀺 𑀲𑀫𑁆𑀧𑀦𑁆𑀦𑀁,

𑀯𑀦𑁆𑀤𑀸𑀫𑀺 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁩𑁦. 𑀦𑀻𑀮 𑀧𑀻𑀢𑀸 𑀘 𑀑𑀤𑀸𑀢𑀸,

𑀫𑀜𑁆𑀚𑀺𑀝𑁆𑀞𑀸 𑀘 𑀧𑀪𑀲𑁆𑀲𑀭𑀸;

𑀮𑁄𑀳𑀺𑀢𑀸𑀢𑀺 𑀙 𑀭𑀁𑀲𑀻𑀳𑀻,

𑀯𑀺𑀚𑁆𑀚𑁄𑀢𑀦𑁆𑀢𑀁 𑀲𑀤𑀸 𑀦𑀫𑁂.

𑁩𑁧. 𑀅𑀲𑁆𑀲𑀸𑀤𑀸𑀤𑀻𑀦𑀯𑁄 𑀘𑁂𑀯,

𑀦𑀺𑀲𑁆𑀲𑀭𑀡𑀨𑀮𑀁 𑀢𑀣𑀸;

𑀉𑀧𑀸𑀬𑀸𑀡𑀢𑁆𑀢𑀻𑀢𑀺 𑀙𑀥𑀸,

𑀲𑀤𑁆𑀥𑀫𑁆𑀫𑀤𑁂𑀲𑀓𑀁 𑀦𑀫𑁂.

𑁩𑁨. 𑀭𑀸𑀕𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀯𑀺𑀢𑀓𑁆𑀓𑀘𑀭𑀺𑀬𑀸 𑀢𑀣𑀸;

𑀲𑀤𑁆𑀥𑀸 𑀩𑀼𑀤𑁆𑀥𑀻𑀢𑀺 𑀪𑀸𑀚𑁂𑀦𑁆𑀢𑀁,

𑀢𑀸 𑀙𑀴𑁂𑀘𑀭𑀺𑀬𑀸 𑀦𑀫𑁂.

𑁩𑁩. 𑀭𑀚𑀢𑀁 𑀓𑀦𑀓𑀁 𑀫𑀼𑀢𑁆𑀢𑀸,

𑀫𑀡𑀺 𑀯𑁂𑀴𑀼𑀭𑀺𑀬𑀸𑀦𑀺 𑀘;

𑀯𑀚𑀺𑀭𑀜𑁆𑀘 𑀧𑀯𑀸𑀴𑀦𑁆𑀢𑀺,

𑀲𑁂𑀝𑁆𑀞𑀺 𑀲𑀢𑁆𑀢𑀥𑀦𑁄 𑀯𑀺𑀬.

𑁩𑁪. 𑀲𑀤𑁆𑀥𑀸𑀲𑀻𑀮𑀁 𑀲𑀼𑀢𑀁𑀘𑀸𑀕𑁄,

𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁,

𑀧𑀜𑁆𑀜𑀸𑀥𑀦𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁,

𑀯𑀦𑁆𑀤𑁂 𑀲𑀢𑁆𑀢𑀫𑀳𑀸𑀥𑀦𑀁.

𑁩𑁫. 𑀘𑀓𑁆𑀓𑀁 𑀳𑀢𑁆𑀣𑀺 𑀅𑀲𑁆𑀲𑁄 𑀫𑀡𑀺,

𑀕𑀳𑀧𑀢𑀺𑀢𑁆𑀣𑀺𑀬𑁄 𑀢𑀣𑀸;

𑀲𑀼𑀧𑀭𑀺𑀡𑀸𑀬𑀓𑁄𑀘𑀸𑀢𑀺,

𑀲𑀢𑁆𑀢𑀭𑀢𑀦𑁄 𑀘𑀓𑁆𑀓𑀯𑀢𑁆𑀢𑀻𑀯.