𑁪. 𑀲𑀫𑀲𑀻𑀲𑀺𑀓𑀡𑁆𑀟𑁄

𑀇𑀤𑀸𑀦𑀺 𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂𑀢𑀺 𑀧𑀤𑀲𑁆𑀲 𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀲𑀗𑁆𑀖𑁄𑀢𑀺 𑀧𑀭𑀫𑀢𑁆𑀣𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑁂𑀲𑀼 𑀧𑀭𑀫𑀢𑁆𑀣𑀲𑀗𑁆𑀖𑁄 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺, 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀼𑀕𑁆𑀕𑀮𑀸, 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀲𑀗𑁆𑀔𑁂𑀧𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀁, 𑀲𑀓𑀤𑀸𑀫𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁, 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀦𑁆𑀢𑀺 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀼𑀕𑁆𑀕𑀮𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀧𑀞𑀫𑀛𑀸𑀦𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘, 𑀢𑀣𑀸 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸𑀧𑀺 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀸, 𑀢𑀣𑀸 𑀨𑀮𑀝𑁆𑀞𑀸𑀧𑀺 𑀲𑁄𑀢𑀧𑀢𑁆𑀢𑀺𑀨𑀮𑀝𑁆𑀞𑀸𑀤𑀺𑀯𑀲𑁂𑀦 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀯𑀻𑀲𑀢𑀺 𑀨𑀮𑀝𑁆𑀞𑀸𑀢𑀺 𑀘𑀢𑁆𑀢𑀸𑀮𑀻𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀓𑀣𑀁 𑀯𑀻𑀲𑀢𑀺𑀫𑀕𑁆𑀕𑀝𑁆𑀞𑀸 𑀧𑀼𑀕𑁆𑀕𑀮𑀸 𑀪𑀯𑁂𑀬𑁆𑀬𑀼𑀦𑁆𑀢𑀺.

𑀯𑀼𑀘𑁆𑀘𑀢𑁂𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀲𑀼𑀧𑀺 𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀢𑀁 𑀢𑀁 𑀛𑀸𑀦𑀲𑀤𑀺𑀲𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀸 𑀧𑀘𑁆𑀘𑁂𑀓𑀁 𑀧𑀜𑁆𑀘𑀧𑀜𑁆𑀘𑀥𑀸 𑀯𑀺𑀪𑀚𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀁 𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀧𑀯𑀢𑁆𑀢𑀸, 𑀢𑀁 𑀧𑀸𑀤𑀓𑀚𑁆𑀛𑀸𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑀢𑁄. 𑀬𑀁 𑀬𑀁 𑀛𑀸𑀦𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀸 𑀧𑀯𑀢𑁆𑀢𑀸, 𑀢𑀁 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁. ‘‘𑀅𑀳𑁄 𑀯𑀢 𑀫𑁂 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑁄 𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀲𑀤𑀺𑀲𑁄 𑀘𑀢𑀼𑀭𑀗𑁆𑀕𑀺𑀓𑀸𑀤𑀺𑀪𑁂𑀤𑁄 𑀫𑀕𑁆𑀕𑁄 𑀪𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁄𑀕𑀸𑀯𑀘𑀭𑀲𑁆𑀲 𑀉𑀧𑁆𑀧𑀦𑁆𑀦𑀚𑁆𑀛𑀸𑀲𑀬𑁄 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀸𑀫. 𑀢𑀢𑁆𑀣 𑀬𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀸𑀤𑀺 𑀢𑀁 𑀢𑀁 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀲𑀘𑁂 𑀧𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀓𑀺𑀜𑁆𑀘𑀺𑀛𑀸𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀬𑀤𑀸 𑀧𑀦𑀬𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀤𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑀲𑀤𑀺𑀲𑁄 𑀳𑁄𑀢𑀺. 𑀏𑀯𑀁 𑀲𑀫𑀣𑀬𑀸𑀦𑀺𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀭𑀺𑀬𑀸𑀦𑀁 𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀛𑀸𑀦𑀲𑀤𑀺𑀲𑀲𑁆𑀲 𑀫𑀕𑁆𑀕𑀗𑁆𑀕𑀺𑀓𑀲𑁆𑀲 𑀧𑀯𑀢𑁆𑀢𑀦𑀢𑁄 𑀧𑀼𑀕𑁆𑀕𑀮𑀪𑁂𑀤𑀯𑀲𑁂𑀦 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀸 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀢𑀣𑀸 𑀨𑀮𑀝𑁆𑀞𑀸𑀧𑀺 𑀯𑀻𑀲𑀢𑀻𑀢𑀺 𑀘𑀢𑁆𑀢𑀸𑀮𑀻𑀲𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀅𑀧𑀭𑀫𑁆𑀧𑀺 𑀲𑀘𑁂 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸 𑀯𑀺𑀥𑁄 𑀅𑀚𑁆𑀛𑀸𑀲𑀬𑁄 𑀦𑀢𑁆𑀣𑀺, 𑀅𑀦𑀼𑀮𑁄𑀫𑀯𑀲𑁂𑀦 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑀭𑀽𑀧𑀭𑀺𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀧𑀸𑀤𑀓𑀚𑁆𑀛𑀸𑀦𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀧𑀝𑀺𑀮𑁄𑀫𑀯𑀲𑁂𑀦 𑀉𑀧𑀭𑀽𑀧𑀭𑀺𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺, 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀢𑁄 𑀳𑀺 𑀉𑀧𑀭𑀽𑀧𑀭𑀺𑀛𑀸𑀦𑀁 𑀩𑀮𑀯𑀢𑀭𑀦𑁆𑀢𑀺, 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀢𑀢𑁆𑀣 𑀏𑀓𑀩𑀻𑀚𑀻, 𑀓𑁄𑀮𑀁𑀓𑁄𑀮𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸. 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀥𑀺𑀕𑀢𑀨𑀮𑀸 𑀢𑀬𑁄 𑀲𑀓𑀤𑀸𑀕𑀸𑀫𑀺𑀦𑁄𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺 𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀅𑀯𑀺𑀳𑀸𑀲𑀼 𑀧𑀜𑁆𑀘 𑀅𑀦𑀸𑀫𑀺𑀕𑀸𑀦𑁄, 𑀢𑀣𑀸 𑀅𑀢𑀧𑁆𑀧𑀸𑀲𑀼𑀤𑀲𑁆𑀲𑀸𑀲𑀼𑀤𑀲𑁆𑀲𑀻𑀲𑀼𑀧𑀺 𑀧𑀜𑁆𑀘. 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑀯𑀚𑁆𑀚𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀩𑁆𑀩𑀸𑀬𑀻𑀢𑀺 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀯𑀻𑀲𑀢𑀺 𑀅𑀦𑀸𑀕𑀸𑀫𑀺𑀦𑁄. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀲𑀫𑀣𑀬𑀸𑀦𑀺𑀓𑁄𑀢𑀺 𑀤𑁆𑀯𑁂 𑀅𑀭𑀳𑀦𑁆𑀢𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸𑀢𑀺 𑀘𑀢𑀼𑀧𑀜𑁆𑀜𑀸𑀲 𑀢𑁂 𑀲𑀩𑁆𑀩𑁂𑀧𑀺 𑀲𑀤𑁆𑀥𑀸𑀥𑀼𑀭𑀧𑀜𑁆𑀜𑀸𑀥𑀼𑀭𑀸𑀦𑀁𑀯𑀲𑁂𑀦 𑀤𑁆𑀯𑁂𑀕𑀼𑀡𑁂 𑀳𑀼𑀢𑁆𑀯𑀸 𑀅𑀝𑁆𑀞𑀲𑀢𑀁 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 ‘‘𑀅𑀝𑁆𑀞𑀲𑀢𑀁 𑀯𑀸’’𑀢𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀸 𑀅𑀭𑀺𑀬𑀧𑀼𑀕𑁆𑀕𑀮𑀸 𑀢𑁂 𑀲𑀗𑁆𑀔𑁂𑀧𑀢𑁄 𑀬𑀼𑀕𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀦𑁆𑀢𑁆𑀬𑀸𑀤𑀺𑀦𑀸 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑀭𑀢𑀦𑀧𑀭𑀺𑀢𑁆𑀢𑁂 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀢𑁆𑀣𑀸, 𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀅𑀬𑀁 𑀧𑀪𑁂𑀤𑁄𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑁂𑀲𑀼 𑀫𑀺𑀲𑁆𑀲𑀓𑀯𑀲𑁂𑀦 𑀮𑀩𑁆𑀪𑀢𑀺 𑀛𑀸𑀦𑀺𑀓𑀯𑀺𑀧𑀲𑁆𑀲𑀓𑀧𑀪𑁂𑀤𑁄 𑀧𑀦 𑀨𑀮𑀝𑁆𑀞𑁂𑀬𑁂𑀯 𑀮𑀩𑁆𑀪𑀢𑀺 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀢𑀺𑀓𑀢𑁆𑀢𑀸 𑀫𑀕𑁆𑀕𑀝𑁆𑀞𑁂𑀲𑀼 𑀦 𑀮𑀩𑁆𑀪𑀢𑀺. 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑁄 𑀛𑀸𑀦𑀺𑀓𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀢𑁂𑀲𑀼 𑀛𑀸𑀦𑀺𑀓𑁄 𑀧𑀼𑀕𑁆𑀕𑀮𑁄 𑀢𑀲𑁆𑀫𑀺𑀁 𑀪𑀯𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀅𑀧𑁆𑀧𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀕𑀢𑁄 𑀳𑁄𑀢𑀺, 𑀲𑁄 𑀛𑀸𑀦𑀺𑀓𑁄 𑀦𑀸𑀫. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀬𑀣𑀸𑀮𑀤𑁆𑀥𑀚𑁆𑀛𑀸𑀦𑀲𑁆𑀲 𑀪𑀽𑀫𑀺𑀪𑀽𑀢𑁂 𑀲𑀼𑀤𑁆𑀥𑀸𑀯𑀸𑀲𑀯𑀚𑁆𑀚𑀺𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑀣𑀸 𑀓𑀸𑀫𑀪𑀯𑁂𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀩𑀮𑁂𑀦 ‘‘𑀇𑀚𑁆𑀛𑀢𑀺 𑀳𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀓𑀸𑀫𑀭𑀸𑀕𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀓𑀸𑀫𑀪𑀯𑁂𑀲𑀼 𑀦𑀺𑀓𑀦𑁆𑀢𑀺𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀓𑀸𑀫𑀮𑁄𑀓𑀯𑀚𑁆𑀚𑀺𑀢𑁂 𑀬𑀣𑀸𑀮𑀤𑁆𑀥𑀲𑁆𑀲 𑀪𑀽𑀫𑀺 𑀪𑀽𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁 𑀢𑀣𑀸 𑀳𑀺 𑀅𑀦𑀸𑀕𑀸𑀫𑀺𑀲𑁆𑀲𑁂𑀯 𑀓𑀸𑀫𑀪𑀯𑁂 𑀦𑀺𑀓𑀦𑁆𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀓𑀸𑀫𑀪𑀯𑁂 𑀓𑀸𑀫𑀸𑀯𑀘𑀭𑀓𑀫𑁆𑀫𑀩𑀮𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑁄 𑀅𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀲𑁆𑀫𑀸 ‘‘𑀅𑀧𑁆𑀧𑀢𑁆𑀢𑁂 𑀩𑁆𑀭𑀳𑁆𑀫𑀮𑁄𑀓𑀕𑀢𑁄 𑀳𑁄𑀢𑀺, 𑀲𑁄 𑀛𑀸𑀦𑀺𑀓𑁄 𑀦𑀸𑀫𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀧𑀦 𑀢𑀺𑀯𑀺𑀥𑁄 𑀏𑀓𑀩𑀻𑀚𑀻, 𑀓𑁄𑀮𑀁𑀓𑁄𑀮𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺. 𑀢𑀢𑁆𑀣 𑀏𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸 𑀳𑁄𑀢𑀼 𑀙𑀤𑁂𑀯𑀮𑁄𑀓𑁂 𑀯𑀸, 𑀏𑀓𑀧𑀝𑀺𑀲𑀦𑁆𑀥𑀺𑀓𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀏𑀓𑀩𑀻𑀚𑀻 𑀦𑀸𑀫 𑀏𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀤𑁂𑀯𑀮𑁄𑀓𑁂 𑀏𑀓𑀸𑀢𑀺 𑀤𑁆𑀯𑁂𑀧𑀝𑀺𑀲𑀦𑁆𑀥𑀺𑀓𑁄 𑀯𑀸, 𑀏𑀯𑀁 𑀢𑀺𑀘𑀢𑀼𑀧𑀜𑁆𑀘𑀙𑀧𑀭𑀫𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀏𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑁂 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀢𑀢𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀸𑀢𑀺 𑀏𑀯𑀁 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑀫𑀺𑀲𑁆𑀲𑀓𑀯𑀲𑁂𑀦 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀇𑀥 𑀢𑀻𑀡𑀺𑀢𑁆𑀬𑀸𑀤𑀺𑀦𑀸 𑀢𑀢𑁆𑀣 𑀙, 𑀇𑀥 𑀏𑀓𑁄𑀢𑀺 𑀬𑀸𑀯 𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀓𑁂𑀯𑀮𑀁 𑀧𑀦 𑀫𑀦𑀼𑀲𑁆𑀲𑀮𑁄𑀓𑁂 𑀬𑁂𑀯 𑀲𑀢𑁆𑀢 𑀤𑁂𑀯𑀮𑁄𑀓𑁂𑀬𑁂𑀯 𑀯𑀸 𑀲𑀢𑁆𑀢𑀸𑀢𑀺 𑀏𑀯𑀁 𑀅𑀫𑀺𑀲𑁆𑀲𑁄 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀓𑁄 𑀕𑀳𑁂𑀢𑀩𑁆𑀩𑁄 𑀅𑀧𑀭𑁂 𑀧𑀦 ‘‘𑀇𑀢𑁄 𑀲𑀢𑁆𑀢, 𑀢𑀢𑁄 𑀲𑀢𑁆𑀢 𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀤𑁂𑀯𑀮𑁄𑀓 𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 𑀯𑀤𑀦𑁆𑀢𑀺. 𑀢𑀁 𑀅𑀬𑀼𑀢𑁆𑀢𑀁 𑀓𑀲𑁆𑀫𑀸 ‘‘𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁𑀧𑀫𑀢𑁆𑀢𑀸, 𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀸 𑀯𑀺𑀭𑁄𑀥𑀢𑁆𑀢𑀸. 𑀅𑀧𑀺𑀘 𑀤𑁆𑀯𑀺𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀤𑀸𑀕𑀸𑀫𑀻𑀧𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑁄 𑀪𑀯𑁂𑀬𑁆𑀬, 𑀢𑀲𑁆𑀲𑀧𑀺 𑀢𑀢𑁆𑀣 𑀏𑀓𑀁, 𑀇𑀥 𑀏𑀓𑀦𑁆𑀢𑀺 𑀯𑀸𑀭𑀲𑁆𑀲 𑀮𑀩𑁆𑀪𑀺𑀢𑀩𑁆𑀩𑀢𑁄 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀓𑀺𑀁 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀧𑀜𑁆𑀘𑀫𑀓𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀤𑀺 𑀏𑀯𑀁 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀣𑀁 𑀲𑀓𑀤𑀸𑀕𑀸𑀫𑀻𑀦𑀸𑀫𑀸𑀢𑀺. 𑀢𑁂 𑀲𑀓𑀺𑀁 𑀧𑀼𑀦 𑀆𑀕𑀘𑁆𑀙𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀲𑀓𑀤𑀸𑀕𑀸𑀫𑀻 𑀦𑀸𑀫. 𑀓𑀸𑀫𑀢𑀡𑁆𑀳𑀸𑀬 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀇𑀫𑀁 𑀓𑀸𑀫𑀥𑀸𑀢𑀼𑀁 𑀅𑀦𑀸𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀦𑀺𑀘𑁆𑀘𑀁 𑀩𑁆𑀭𑀳𑁆𑀫𑀮𑁄𑀓𑁂𑀬𑁂𑀯 𑀧𑀝𑀺𑀲𑀦𑁆𑀥𑀺 𑀯𑀲𑁂𑀦 𑀆𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀛𑀸𑀦𑀺𑀓𑀲𑁆𑀲 𑀏𑀯𑀁 𑀳𑁄𑀢𑀼, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀓𑀣𑀦𑁆𑀢𑀺 𑀲𑁄𑀧𑀺 𑀛𑀸𑀦𑀺𑀓𑁄𑀯 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺 𑀢𑀲𑁆𑀲 𑀳𑀺 𑀫𑀕𑁆𑀕𑀦𑁆𑀢𑀭𑁂 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀳𑀢𑀲𑁆𑀲𑀸𑀧𑀺 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀛𑀸𑀦𑀺𑀓𑁄 𑀳𑀼𑀢𑁆𑀯𑀸𑀯 𑀫𑀭𑀡𑀁 𑀳𑁄𑀢𑀺 𑀅𑀬𑀁 𑀧𑀦 𑀭𑀽𑀧𑀸𑀭𑀽𑀧𑀪𑀯𑁂𑀦 𑀏𑀓𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀬𑁄 𑀅𑀭𑀺𑀬𑀸 𑀭𑀽𑀧𑀸𑀭𑀽𑀧𑀮𑁄𑀓𑁂𑀲𑀼 𑀅𑀦𑁂𑀓𑀓𑁆𑀔𑀢𑁆𑀢𑀼𑀧𑀝𑀺𑀲𑀦𑁆𑀥𑀺𑀓𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀲𑀸𑀫𑀜𑁆𑀜𑁂𑀦 𑀏𑀓𑀧𑀝𑀺𑀲𑀦𑁆𑀥𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀭𑀳𑀸 𑀧𑀦 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸 𑀤𑀓𑁆𑀔𑀺𑀡𑀁 𑀅𑀭𑀳𑀢𑁆𑀢𑀸 𑀧𑀼𑀦 𑀪𑀯𑀸 𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀭𑀳𑀸𑀪𑀸𑀯𑀸𑀢𑁆𑀬𑀸𑀤𑀺𑀦𑀸 𑀯𑀘𑀦𑀢𑁆𑀣𑁂𑀦 𑀅𑀭𑀳𑀸 𑀦𑀸𑀫. 𑀲𑁄𑀧𑀺 𑀢𑀺𑀯𑀺𑀥𑁄 𑀛𑀸𑀦𑀺𑀓 𑀲𑀼𑀓𑁆𑀔𑀯𑀺𑀧𑀲𑁆𑀲𑀓 𑀲𑀫𑀲𑀻𑀲𑀻𑀯𑀲𑁂𑀦. 𑀢𑀢𑁆𑀣 𑀛𑀸𑀦𑀺𑀓𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑁄, 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀦𑀸𑀫. 𑀅𑀧𑀭𑁄𑀧𑀺 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀛𑀸𑀦𑀺𑀓𑁄 𑀳𑀼𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄𑀧𑀺 𑀛𑀸𑀦𑀺𑀓𑁄𑀯. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀧𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯 𑀫𑀕𑁆𑀕𑁂𑀦 𑀲𑀳 𑀅𑀦𑀸𑀕𑀢𑀛𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀁 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀫𑀲𑀻𑀲𑀻 𑀧𑀦 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀬𑁂𑀦𑁂𑀯 𑀇𑀭𑀺𑀬𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀺, 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂 𑀏𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀬𑀁 𑀭𑁄𑀕𑀲𑀫𑀲𑀻𑀲𑀺 𑀦𑀸𑀫. 𑀬𑁄 𑀧𑀦 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻𑀦𑀸𑀫. 𑀢𑀢𑁆𑀣 𑀢𑁂𑀭𑀲 𑀲𑀻𑀲𑀸𑀦𑀺 𑀓𑀢𑀫𑀸𑀦𑀺 𑀢𑁂𑀭𑀲 𑀲𑀻𑀲𑀸𑀦𑀺. 𑀧𑀮𑀺𑀩𑁄𑀥𑀲𑀻𑀲𑀁, 𑀢𑀡𑁆𑀳𑀸𑀩𑀦𑁆𑀥𑀦𑀲𑀻𑀲𑀁, 𑀫𑀸𑀦𑀧𑀭𑀸𑀫𑀸𑀲𑀲𑀻𑀲𑀁, 𑀤𑀺𑀝𑁆𑀞𑀺𑀯𑀺𑀓𑁆𑀔𑁂𑀧𑀲𑀻𑀲𑀁, 𑀉𑀤𑁆𑀥𑀘𑁆𑀘𑀓𑀺𑀮𑁂𑀲𑀲𑀻𑀲𑀁, 𑀅𑀯𑀺𑀚𑁆𑀚𑀸𑀅𑀥𑀺𑀫𑁄𑀓𑁆𑀔𑀲𑀻𑀲𑀁, 𑀲𑀤𑁆𑀥𑀸𑀧𑀕𑁆𑀕𑀳𑀲𑀻𑀲𑀁, 𑀯𑀻𑀭𑀺𑀬𑀉𑀧𑀝𑁆𑀞𑀸𑀦𑀲𑀻𑀲𑀁, 𑀲𑀢𑀺𑀅𑀯𑀺𑀓𑁆𑀔𑁂𑀧𑀲𑀻𑀲𑀁, 𑀲𑀫𑀸𑀥𑀺𑀤𑀲𑁆𑀲𑀦𑀲𑀻𑀲𑀁, 𑀧𑀜𑁆𑀜𑀸𑀧𑀯𑀢𑁆𑀢𑀺𑀲𑀻𑀲𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑀲𑀻𑀲𑀁, 𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀭𑀲𑀻𑀲𑀦𑁆𑀢𑀺. 𑀏𑀢𑁆𑀣 𑀘 𑀅𑀯𑀺𑀚𑁆𑀚𑀸 𑀧𑀭𑀺𑀬𑀸𑀤𑀸𑀬𑀓𑀁 𑀫𑀕𑁆𑀕𑀘𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀬𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀚𑁆𑀚𑀸 𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁. 𑀓𑀣𑀁 𑀧𑀦𑀺𑀤𑀁 𑀲𑀻𑀲𑀁 𑀲𑀫𑀁 𑀳𑁄𑀢𑀻𑀢𑀺. 𑀯𑀸𑀭𑀲𑀫𑀢𑀸𑀬, 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀲𑁂𑀲𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺, 𑀢𑀣𑀸 𑀲𑀓𑀤𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀲𑁂𑀲𑀓𑀺𑀮𑁂𑀲𑀸𑀪𑀸𑀯𑀸 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲 𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑁂 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀫𑀕𑁆𑀕𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀺𑀬𑀢𑀺. 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀪𑀸𑀯𑀢𑁄 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺 𑀦𑀸𑀫. 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀫𑀕𑁆𑀕𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸𑀯 𑀧𑀭𑀺𑀧𑀼𑀡𑁆𑀡𑀸. 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀡𑀢𑁄 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀢𑁂𑀦𑁂𑀯 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀦𑀜𑁆𑀘 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀦𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀘𑀭𑀺𑀫𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀲𑀁𑀬𑀼𑀢𑁆𑀢𑀞𑀓𑀣𑀸𑀬𑀁 𑀧𑀦 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁𑀢𑀺 𑀧𑀼𑀕𑁆𑀕𑀮𑁄 𑀲𑀫𑀲𑀻𑀲𑀻. 𑀏𑀢𑁆𑀣 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀓𑀺𑀮𑁂𑀲𑀲𑀻𑀲𑀦𑁆𑀢𑀺 𑀤𑁆𑀯𑁂 𑀲𑀻𑀲𑀸𑀦𑀺. 𑀢𑀢𑁆𑀣 𑀧𑀯𑀢𑁆𑀢𑀺𑀲𑀻𑀲𑀁 𑀦𑀸𑀫 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀓𑀺𑀮𑁂𑀲𑀲𑀻𑀲𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀢𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀔𑁂𑀧𑁂𑀢𑀺. 𑀅𑀯𑀺𑀚𑁆𑀚𑀁 𑀫𑀕𑁆𑀕𑀘𑀺𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀨𑀮𑀁, 𑀨𑀮𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁, 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀁 𑀅𑀧𑀭𑀺𑀧𑀼𑀡𑁆𑀡𑀁 𑀯𑀸𑀢𑀺. 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀦𑁆𑀤𑀦𑁆𑀢𑁂𑀧𑀺 𑀳𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯, 𑀘𑀺𑀢𑁆𑀢𑀸𑀦𑀁 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘 𑀏𑀓𑀓𑁆𑀔𑀡𑁂 𑀯𑀺𑀬 𑀲𑀜𑁆𑀚𑀸𑀬𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀸𑀦𑀁. 𑀢𑀦𑁆𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀁. 𑀧𑀭𑀺𑀧𑀼𑀡𑁆𑀡𑀁 𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸. 𑀅𑀧𑀭𑀺𑀧𑀼𑀡𑁆𑀡𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸. 𑀓𑀺𑀜𑁆𑀘𑀸𑀧𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀯𑀘𑀦 𑀲𑀺𑀮𑀺𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀸𑀯 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀻𑀢𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀧𑀭𑀺𑀧𑀼𑀡𑁆𑀡𑀁 𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸, 𑀅𑀧𑀭𑀺𑀧𑀼𑀡𑁆𑀡𑀁 𑀧𑀜𑁆𑀙𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀝𑀻𑀓𑀸𑀯𑀘𑀦𑁂𑀦 𑀲𑀫𑀲𑀻𑀲𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀬𑀁 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀅𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀓𑁆𑀭𑀺𑀬𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣𑀸𑀯 𑀕𑀦𑁆𑀢𑀩𑁆𑀩𑀁. ‘‘𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀚𑀯𑀦𑀧𑀯𑀢𑁆𑀢𑀺. 𑀏𑀯𑀜𑁆𑀘 𑀲𑀢𑀺 ‘‘𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀧𑀦 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀯𑀸𑀭𑀫𑁂𑀯𑀸’’𑀢𑀺 𑀏𑀢𑁆𑀣 ‘‘𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸. ‘‘𑀧𑀜𑁆𑀘𑀯𑀸𑀭𑀫𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀓𑀸𑀭𑁂𑀦 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀙𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀲𑀫𑁆𑀫𑀽𑀴𑁆𑀳𑀓𑀸𑀮𑁂 𑀧𑀦 𑀙𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀺. 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀜𑁆𑀘 𑀅𑀦𑀺𑀬𑀢𑀧𑀭𑀺𑀫𑀸𑀡𑀸 𑀩𑀮𑀯𑀓𑀸𑀮𑁂𑀧𑀺 𑀧𑀭𑀺𑀲𑀫𑁆𑀧𑀼𑀡𑁆𑀡𑀪𑀸𑀯𑀸 𑀢𑀣𑀸 𑀳𑀺 ‘‘𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺𑀩𑀮𑀯𑀓𑀸𑀮𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀁 𑀯𑀸, 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀧𑀦 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀯𑀸𑀭𑀫𑁂𑀯. 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀮𑀳𑀼𑀓𑀧𑁆𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑀺 𑀧𑀜𑁆𑀘𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀻’’𑀢𑀺 𑀅𑀦𑀺𑀬𑀫𑀺𑀢𑀧𑁆𑀧𑀫𑀸𑀡𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑁄 𑀆𑀕𑀢𑁄 𑀇𑀫𑀲𑁆𑀫𑀺𑀁 𑀲𑀫𑀲𑀻𑀲𑀺𑀦𑀺𑀤𑁆𑀤𑁂𑀲𑀯𑀸𑀭𑁂𑀧𑀺 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀁 𑀅𑀮𑀩𑁆𑀪𑀦𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑁂𑀬𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀲𑀢𑁆𑀢 𑀚𑀯𑀦𑀘𑀺𑀢𑁆𑀢𑀸𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀯𑀸 𑀧𑀓𑀸𑀭𑁄 𑀮𑀩𑁆𑀪𑀫𑀸𑀦𑁄 𑀕𑀯𑁂𑀲𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀫𑀢𑁆𑀣𑀲𑀗𑁆𑀖𑀯𑀲𑁂𑀦 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺, 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀲𑀩𑁆𑀩𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀗𑁆𑀖𑁄𑀧𑀺 𑀤𑀼𑀮𑁆𑀮𑀪𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 𑀢𑀣𑀸 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀢𑀺𑀤𑀼𑀮𑁆𑀮𑀪𑀸𑀯 𑀲𑀸𑀲𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀓𑀸𑀮𑁂𑀧𑀺 𑀇𑀤𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀧𑀺 𑀅𑀯𑀺𑀚𑁆𑀚𑀫𑀸𑀦𑀢𑁄 𑀅𑀬𑀁 𑀧𑀭𑀫𑀢𑁆𑀣𑀲𑀗𑁆𑀖𑀯𑀺𑀘𑀸𑀭𑀡𑀸. 𑀲𑀫𑁆𑀫𑀼𑀢𑀺𑀲𑀗𑁆𑀖𑁄 𑀧𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀧𑀼𑀣𑀼𑀚𑁆𑀚𑀦𑀲𑀗𑁆𑀖𑁄𑀯, 𑀲𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯. 𑀓𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀬𑁂𑀯 𑀮𑀩𑁆𑀪𑀦𑀢𑁄 𑀢𑀣𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀢𑀲𑀳𑀲𑁆𑀲𑀸𑀤𑀺𑀕𑀡𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀧𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀸𑀪𑀸𑀯𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀭𑀡𑀕𑀫𑀦𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀧𑀺 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀦𑀸𑀫 𑀫𑀽𑀕𑀲𑁆𑀲 𑀲𑀼𑀧𑀺𑀦𑀤𑀲𑁆𑀲𑀦𑀁 𑀯𑀺𑀬 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀲𑀘𑁆𑀘𑀥𑀫𑁆𑀫𑁂 𑀧𑀭𑁂𑀲𑀁 𑀆𑀘𑀺𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑀸 ‘‘𑀏𑀯𑀁 𑀢𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺 𑀆𑀤𑀺𑀦𑀸𑀦𑀬𑁂𑀦 𑀅𑀪𑀺𑀲𑀫𑀸𑀘𑀸𑀭𑀺𑀓𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀼𑀁 𑀢𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀬𑁂𑀯 𑀲𑀫𑁆𑀫𑀼𑀢𑀺𑀲𑀗𑁆𑀖𑁄 𑀮𑀩𑁆𑀪𑀢𑀺. 𑀅𑀧𑀺𑀘 𑀦 𑀢𑁂 𑀤𑀼𑀮𑁆𑀮𑀪𑀸𑀬𑁂𑀯 𑀳𑁄𑀦𑁆𑀢𑀺, 𑀅𑀣 𑀔𑁄 𑀢𑀲𑁆𑀫𑀺𑀁 𑀉𑀤𑁆𑀤𑀺𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀸𑀧𑀺 𑀓𑀢𑀸𑀓𑀸𑀭𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀨𑀮𑀸𑀧𑀺 𑀳𑁄𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀢𑀤𑀸 𑀧𑀸𑀳𑀁 𑀆𑀦𑀦𑁆𑀤 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀺 𑀦 𑀢𑁆𑀯𑁂𑀯𑀸𑀳𑀁 𑀆𑀦𑀦𑁆𑀤 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀓𑁆𑀔𑀺𑀡𑀁 𑀫𑀳𑀧𑁆𑀨𑀮𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀢𑀣𑀸 𑀳𑀺 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 ‘‘𑀓𑀸𑀲𑀸𑀯𑀓𑀡𑁆𑀞𑀸𑀦𑀁 𑀲𑀗𑁆𑀖𑁂 𑀤𑀺𑀦𑁆𑀦𑁂 𑀤𑀓𑁆𑀔𑀺𑀡𑀸𑀧𑀺 𑀕𑀼𑀡𑀸𑀲𑀗𑁆𑀔𑁆𑀬𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀕𑀢𑀤𑀓𑁆𑀔𑀺𑀡𑀸 𑀳𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀳𑁄𑀢𑀺. 𑀲𑀗𑁆𑀖𑁂 𑀧𑀦 𑀘𑀺𑀢𑁆𑀢𑀻𑀓𑀸𑀭𑁄 𑀤𑀼𑀓𑁆𑀓𑀭𑁄 𑀬𑁄 𑀳𑀺 ‘‘𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀦𑁆𑀢𑁂 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀓𑀁 𑀣𑁂𑀭𑀁 𑀤𑁂𑀣𑀸’𑀢𑀺 𑀯𑀤𑀢𑀺, 𑀅𑀣 𑀲𑀗𑁆𑀖𑀢𑁄 𑀲𑀸𑀫𑀡𑁂𑀭𑀁 𑀮𑀪𑀺𑀢𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺. 𑀫𑀳𑀸𑀣𑁂𑀭𑀁 𑀮𑀪𑀺𑀢𑁆𑀯𑀸 𑀧𑀺 ‘‘𑀫𑀳𑀸𑀣𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀦 𑀳𑁄𑀢𑀺𑀬𑁂𑀯. 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺. 𑀬𑁄 𑀧𑀦 𑀲𑀸𑀫𑀡𑁂𑀭𑀁 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀤𑀳𑀭𑀁 𑀯𑀸 𑀣𑁂𑀭𑀁 𑀯𑀸 𑀩𑀸𑀮𑀁 𑀯𑀸 𑀧𑀡𑁆𑀟𑀺𑀢𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀗𑁆𑀖𑀢𑁄 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦𑀸𑀫 𑀳𑁄𑀢𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀓𑀺𑀭 𑀏𑀯𑀁 𑀓𑀭𑁄𑀦𑁆𑀢𑀺 𑀢𑀢𑁆𑀣 𑀳𑀺 𑀏𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑀼𑀝𑀼𑀫𑁆𑀩𑀺𑀓𑁄 ‘‘𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀲𑁄 𑀏𑀓𑀁 𑀤𑀼𑀲𑁆𑀲𑀻𑀮𑀪𑀺𑀓𑁆𑀔𑀼𑀁 𑀮𑀪𑀺𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀥𑀽𑀫𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀸𑀲𑀺 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀁 𑀚𑀕𑁆𑀕𑀦𑀢𑁆𑀣𑀸𑀬 ‘‘𑀓𑀼𑀤𑀸𑀮𑀓𑀁 𑀤𑁂𑀣𑀸’’𑀢𑀺 𑀖𑀭𑀤𑁆𑀯𑀸𑀭𑀁 𑀆𑀕𑀢𑁄 𑀉𑀧𑀸𑀲𑀓𑁄 𑀦𑀺𑀲𑀺𑀦𑁆𑀦𑁄𑀯 𑀓𑀼𑀤𑀸𑀮𑀁 𑀧𑀸𑀤𑁂𑀦 𑀔𑀺𑀧𑀺𑀢𑁆𑀯𑀸 ‘‘𑀕𑀡𑁆𑀳𑀸’’𑀢𑀺 𑀅𑀤𑀸𑀲𑀺 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 ‘‘𑀢𑀼𑀫𑁆𑀳𑁂𑀳𑀺 𑀧𑀸𑀢𑁄𑀯 𑀏𑀢𑀲𑁆𑀲 𑀓𑀢𑀲𑀓𑁆𑀓𑀸𑀭𑁄 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀸𑀦𑀺 𑀅𑀧𑀘𑀬𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺. 𑀉𑀧𑀸𑀲𑀓𑁄 ‘‘𑀲𑀗𑁆𑀖𑀲𑁆𑀲 𑀲𑁄 𑀅𑀬𑁆𑀬𑁄 𑀘𑀺𑀢𑁆𑀢𑀻𑀓𑀸𑀭𑁄, 𑀦 𑀏𑀢𑀲𑁆𑀲𑀸’’𑀢𑀺 𑀆𑀳. 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑀤𑀺𑀦𑁆𑀦𑀤𑀓𑁆𑀔𑀺𑀡𑀁 𑀧𑀦 𑀓𑁄 𑀲𑁄𑀥𑁂𑀢𑀺, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀲𑁄𑀥𑁂𑀦𑁆𑀢𑀺 𑀅𑀧𑀺 𑀘 𑀣𑁂𑀭𑀸 𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑀸, 𑀣𑁂𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯𑀚𑁆𑀚𑀢𑀦𑀸 𑀥𑀭𑀫𑀸𑀦𑀔𑀻𑀡𑀸𑀲𑀯𑀸 𑀲𑁄𑀥𑁂𑀦𑁆𑀢𑀺𑀬𑁂𑀯, 𑀢𑀣𑀸 𑀳𑀺 𑀤𑀸𑀬𑀓𑀢𑁄 𑀧𑀝𑀺𑀕𑁆𑀕𑀸𑀳𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀤𑀸𑀦𑀁. 𑀤𑀸𑀬𑀓𑀢𑁄 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀓𑀣𑁂𑀢𑀩𑁆𑀩𑀁 𑀯𑁂𑀲𑁆𑀲𑀦𑁆𑀢𑀭𑁄 𑀳𑀺 𑀤𑀼𑀲𑁆𑀲𑀻𑀮𑀲𑁆𑀲 𑀚𑀽𑀚𑀓𑀸𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀬𑀦𑀲𑀤𑀺𑀲𑁂 𑀤𑁆𑀯𑁂 𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑁂 𑀧𑀼𑀢𑁆𑀢𑁂 𑀤𑀢𑁆𑀯𑀸 𑀧𑀣𑀯𑀺𑀁 𑀓𑀫𑁆𑀧𑁂𑀲𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀘𑁂𑀢𑀦𑀸𑀬 𑀫𑀳𑀦𑁆𑀢𑀪𑀸𑀯𑁂𑀦 𑀧𑀣𑀯𑀺𑀁 𑀓𑀫𑁆𑀧𑁂𑀲𑀺. 𑀏𑀯𑀁 𑀤𑀸𑀬𑀓𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀘𑁄𑀭𑀖𑀸𑀢𑀓𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁 𑀘𑁄𑀭𑀖𑀸𑀢𑀓𑁄 𑀦𑀸𑀫 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀏𑀓𑁄 𑀚𑀦𑀧𑀤𑀧𑀼𑀭𑀺𑀲𑁄 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀦𑀸𑀲𑀺𑀓𑀯𑀸𑀢𑁂𑀦𑁂𑀯 𑀓𑀡𑁆𑀡𑀦𑀸𑀲𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀲𑁄 𑀫𑀭𑀡 𑀫𑀜𑁆𑀘𑁂 𑀦𑀺𑀧𑀦𑁆𑀦𑁄𑀯 𑀅𑀢𑁆𑀢𑀦𑁄 𑀓𑀫𑁆𑀫𑀩𑀮𑁂𑀦 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀬 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀤𑁆𑀤𑁂𑀦 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀉𑀪𑀢𑁄 𑀧𑀲𑁆𑀲𑁂 𑀕𑁂𑀳𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀢𑀤𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀲𑀺𑀓𑀯𑀸𑀢𑁂𑀦 𑀯𑀺𑀲𑁆𑀲𑀚𑁆𑀚𑀫𑀸𑀦𑁄𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀺𑀭𑁄𑀘𑀫𑀸𑀦𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀧𑀸𑀬𑀸𑀲𑀁 𑀅𑀤𑀸𑀲𑀺. 𑀣𑁂𑀭𑁄𑀧𑀺 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀧𑀓𑁆𑀓𑀫𑀺. 𑀘𑁄𑀭𑀖𑀸𑀢𑀓𑁄 𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀯𑀁 𑀧𑀝𑀺𑀕𑁆𑀕𑀸𑀳𑀓𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀉𑀪𑀬𑀢𑁄𑀧𑀺 𑀫𑀳𑀧𑁆𑀨𑀮𑀁, 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀺𑀲𑀸𑀔𑀸𑀤𑀬𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

‘‘𑀢𑀣𑀸𑀕𑀢𑁂 𑀘 𑀲𑀫𑁆𑀩𑀼𑀤𑁆𑀥𑁂, 𑀅𑀣𑀯𑀸 𑀢𑀲𑁆𑀲 𑀲𑀸𑀯𑀓𑁂;

𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸.

𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺.

𑀏𑀯𑀁 𑀉𑀪𑀬𑀯𑀲𑁂𑀦 𑀫𑀳𑀧𑁆𑀨𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀸𑀬𑀓𑀢𑁄𑀧𑀺 𑀧𑀝𑀺𑀕𑁆𑀕𑀸𑀳𑀓𑀢𑁄𑀧𑀺 𑀦𑀺𑀧𑁆𑀨𑀮𑀫𑁂𑀯. 𑀲𑁂𑀬𑁆𑀬𑀣𑀸𑀧𑀺 𑀫𑀓𑁆𑀔𑀮𑀺𑀕𑁄𑀲𑀸𑀮𑀙𑀲𑀢𑁆𑀣𑀸𑀭𑀸𑀤𑀻𑀦𑀁 𑀅𑀢𑁆𑀢𑀦𑁄 𑀉𑀧𑀸𑀲𑀓𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀳𑀺 𑀧𑀽𑀚𑀸𑀯𑀺𑀲𑁂𑀲𑀸 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

‘‘𑀫𑀸𑀲𑁂 𑀫𑀸𑀲𑁂 𑀓𑀼𑀲𑀕𑁆𑀕𑁂𑀦, 𑀩𑀸𑀮𑁄 𑀪𑀼𑀜𑁆𑀚𑁂𑀬𑁆𑀬 𑀪𑁄𑀚𑀦𑀁;

𑀦 𑀲𑁄 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀢𑁂𑀦𑁂𑀯𑀸𑀳 𑀪𑀕𑀯𑀸 𑀘𑀢𑁆𑀢𑀸𑀭𑀺𑀫𑀸𑀦𑀺 𑀆𑀦𑀦𑁆𑀤 𑀤𑀓𑁆𑀔𑀺𑀡𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀲𑀸𑀥𑀽𑀦𑀁 𑀭𑀢𑀺𑀚𑀦𑀦𑀢𑁆𑀣𑁂𑀦 𑀭𑀢𑀦𑀸𑀦𑀺 𑀦𑀸𑀫.

𑀯𑀼𑀢𑁆𑀢𑀜𑁆𑀳𑁂𑀢𑀁.

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀭𑀢𑀦𑀜𑁆𑀘 𑀦𑀸𑀫 𑀤𑀼𑀯𑀺𑀥𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀁 𑀘𑀓𑁆𑀓𑀭𑀢𑀦𑀁, 𑀫𑀡𑀺𑀭𑀢𑀦𑀁 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀼𑀯𑀡𑁆𑀡𑀭𑀚𑀢𑀸𑀤𑀺. 𑀲𑀯𑀺𑀜𑁆𑀜𑀸𑀡𑀓𑀁 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀤𑀺𑀧𑀭𑀺𑀡𑀸𑀬𑀓𑀭𑀢𑀦𑀧𑀭𑀺𑀬𑁄𑀲𑀸𑀦𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁. 𑀏𑀯𑀁 𑀤𑀼𑀯𑀺𑀥𑁂 𑀘𑁂𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀓𑀲𑁆𑀫𑀸 𑀬𑀲𑁆𑀫𑀸 𑀅𑀯𑀺𑀜𑁆𑀜𑀸𑀡𑀓𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀳𑀢𑁆𑀢𑀺𑀭𑀢𑀦𑀸𑀤𑀻𑀦𑀁 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀉𑀧𑀦𑀻𑀬𑀢𑀺. 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀫𑀦𑀼𑀲𑁆𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀲𑁆𑀲 𑀑𑀧𑀯𑀬𑁆𑀳𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀧𑀼𑀭𑀺𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀲𑁆𑀲 𑀧𑀭𑀺𑀘𑀸𑀭𑀺𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀧𑀼𑀭𑀺𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀕𑀸𑀭𑀺𑀓𑀭𑀢𑀦𑀁 𑀅𑀦𑀕𑀸𑀭𑀺𑀓𑀭𑀢𑀦𑀜𑁆𑀘 𑀢𑀢𑁆𑀣 𑀅𑀦𑀕𑀸𑀭𑀺𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀅𑀕𑀸𑀭𑀺𑀓𑀭𑀢𑀦𑁂𑀲𑀼 𑀅𑀕𑁆𑀕𑁄 𑀘𑀓𑁆𑀓𑀯𑀢𑁆𑀢𑀻𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀅𑀦𑀕𑀸𑀭𑀺𑀓𑀭𑀢𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀩𑁆𑀩𑀫𑀸𑀦𑀼𑀲𑁆𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀅𑀦𑀕𑀸𑀭𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀭𑀺𑀬𑀧𑀼𑀣𑀼𑀚𑁆𑀚𑀦𑀯𑀲𑁂𑀦. 𑀅𑀭𑀺𑀬𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀯𑀲𑁂𑀦. 𑀅𑀲𑁂𑀓𑁆𑀔𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑀫𑀣𑀬𑀸𑀦𑀺𑀓𑀯𑀲𑁂𑀦. 𑀲𑀫𑀣𑀬𑀸𑀦𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀫𑀧𑀢𑁆𑀢𑀜𑁆𑀘. 𑀢𑀢𑁆𑀣 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬. 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀭𑀢𑀦𑀢𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀲𑀤𑀺𑀲𑀸𑀧𑀺 𑀳𑀺 𑀅𑀦𑁂𑀓𑀲𑀢𑀸 𑀲𑀸𑀯𑀓𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀲𑀢𑀪𑀸𑀕𑀫𑁆𑀧𑀺 𑀦 𑀉𑀧𑀦𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀲𑀫𑁆𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬 𑀲𑀓𑀮𑀫𑁆𑀧𑀺 𑀚𑀫𑁆𑀩𑀼𑀤𑀻𑀧𑀁 𑀧𑀮𑁆𑀮𑀗𑁆𑀓𑁂 𑀦 𑀧𑀮𑁆𑀮𑀗𑁆𑀓𑀁 𑀖𑀝𑁆𑀝𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀏𑀓𑀲𑁆𑀲 𑀕𑀼𑀡𑀸𑀦𑀁 𑀦𑁂𑀯 𑀲𑀗𑁆𑀔𑁆𑀬𑀁 𑀓𑀮𑀁 𑀕𑀡𑀦𑀪𑀸𑀕𑀁 𑀉𑀧𑀦𑁂𑀦𑁆𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀆𑀤𑀺. 𑀏𑀯𑀁 ‘‘𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘, 𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂’’𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀩𑁆𑀩𑀲𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂 𑀲𑀗𑁆𑀖𑀯𑀡𑁆𑀡𑀦𑀸𑀬

𑀲𑀫𑀲𑀻𑀲𑀺𑀓𑀡𑁆𑀟𑁄 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑀧𑀓𑀺𑀡𑁆𑀡𑀓𑀓𑀡𑁆𑀟𑁄

𑀇𑀤𑀸𑀦𑀺 𑀲𑀧𑁆𑀧𑀼𑀭𑀺𑀲𑀸𑀢𑀺 𑀤𑀼𑀮𑁆𑀮𑀪𑀸𑀢𑀺 𑀇𑀫𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄 𑀢𑀣𑀸 𑀳𑀺 𑀮𑁄𑀓𑁂 𑀲𑀧𑁆𑀧𑀼𑀭𑀺𑀲𑀸𑀧𑀺 𑀅𑀢𑀺𑀤𑀼𑀮𑁆𑀮𑀪𑀸𑀬𑁂𑀯. 𑀲𑀧𑁆𑀧𑀼𑀭𑀺𑀲𑀸𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑁆𑀧𑀦𑁆𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀢𑁂 𑀦𑀺𑀲𑁆𑀲𑀸𑀬 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑀢𑁄 𑀫𑀼𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀫𑀫𑀜𑁆𑀳𑀺 𑀆𑀦𑀦𑁆𑀤 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀤𑀺 𑀯𑀘𑀦𑀢𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀦𑀸𑀫. 𑀢𑀁 𑀅𑀮𑀪𑀦𑁆𑀢𑁂𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸𑀤𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑀸 𑀯𑀸. 𑀢𑁂𑀧𑀺 𑀅𑀮𑀪𑀦𑁆𑀢𑁂𑀦 𑀏𑀓𑀦𑁆𑀢𑀚𑀳𑀺𑀢𑀁 𑀲𑀺𑀯𑀝𑁆𑀞𑀺𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀪𑀺𑀢𑀩𑁆𑀩𑀁, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺.

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄𑀘𑀸𑀞𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺.

𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀯𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁄 𑀮𑁄𑀓𑁂 𑀤𑀼𑀮𑁆𑀮𑀪𑁄𑀯. 𑀓𑀢𑀫𑁄 𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀲𑀻𑀢𑀺 𑀘 𑀫𑀳𑀸𑀲𑀸𑀯𑀓𑀸 𑀅𑀜𑁆𑀜𑁂 𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸 𑀲𑀼𑀦𑁂𑀢𑁆𑀢𑀫𑀳𑀸𑀕𑁄𑀯𑀺𑀦𑁆𑀤𑀯𑀺𑀥𑀼𑀭𑀲𑀭𑀪𑀗𑁆𑀕𑀫𑀳𑁄𑀲𑀥𑀲𑀼𑀢𑀲𑁄𑀫𑀦𑀺𑀫𑀺𑀭𑀸𑀚𑀅𑀬𑁄𑀖𑀭𑀓𑀼𑀫𑀸𑀭𑀓 𑀅𑀓𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀬𑁄 𑀘 𑀧𑀡𑁆𑀟𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀪𑀬𑁂 𑀯𑀺𑀬 𑀭𑀓𑁆𑀔𑀸, 𑀅𑀦𑁆𑀥𑀓𑀸𑀭𑁂 𑀯𑀺𑀬 𑀧𑀤𑀻𑀧𑀸, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀸𑀪𑀺𑀪𑀯𑁂 𑀯𑀺𑀬 𑀅𑀦𑁆𑀦𑀧𑀸𑀦𑀸𑀤𑀺𑀧𑀝𑀺𑀮𑀸𑀪𑁄, 𑀅𑀢𑁆𑀢𑀦𑁄 𑀯𑀘𑀦𑀓𑀭𑀸𑀦𑀁 𑀲𑀩𑁆𑀩𑀪𑀬𑀉𑀧𑀤𑁆𑀤𑀯𑀽𑀧𑀲𑀕𑁆𑀕𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀸 𑀳𑁄𑀦𑁆𑀢𑀺 𑀢𑀣𑀸 𑀳𑀺 𑀢𑀣𑀸𑀕𑀢𑀁 𑀆𑀕𑀫𑁆𑀫 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑀸𑀡𑀸 𑀤𑁂𑀯𑀫𑀦𑀼𑀲𑁆𑀲𑀸 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀣𑁂𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺 𑀓𑀼𑀲𑀮𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀢𑀣𑀸 𑀫𑀳𑀸𑀫𑁄𑀕𑁆𑀕𑀮𑀸𑀦𑀫𑀳𑀸𑀓𑀲𑁆𑀲𑀧𑀧𑀪𑀼𑀢𑀺 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁…𑀧𑁂… 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦𑀢𑁆𑀣𑀺 𑀪𑀺𑀓𑁆𑀔𑀯𑁂 𑀧𑀡𑁆𑀟𑀺𑀢𑀢𑁄 𑀪𑀬𑀁, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀤𑁆𑀤𑀯𑁄, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀲𑀕𑁆𑀕𑁄’’𑀢𑀺. 𑀅𑀧𑀺𑀘 𑀢𑀕𑁆𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀲𑀤𑀺𑀲𑁄 𑀧𑀡𑁆𑀟𑀺𑀢𑁄, 𑀢𑀕𑁆𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀧𑀮𑀺𑀯𑁂𑀞𑀦𑀧𑀢𑁆𑀢𑀲𑀤𑀺𑀲𑁄 𑀢𑀤𑀼𑀧𑀲𑁂𑀯𑀻 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀸𑀭𑀤𑀚𑀸𑀢𑀓𑁂.

‘‘𑀢𑀕𑁆𑀕𑀭𑀜𑁆𑀘 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸’’𑀢𑀺.

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳

‘‘𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀸’𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀤𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀦𑀭𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄’’𑀢𑀺.

𑀅𑀧𑀺𑀘 𑀢𑁂𑀧𑀺 𑀲𑀧𑁆𑀧𑀼𑀭𑀺𑀲𑁂 𑀲𑀗𑁆𑀕𑀫𑁆𑀫 𑀅𑀲𑁆𑀲𑀼𑀢𑀧𑀼𑀩𑁆𑀩𑀫𑁆𑀧𑀺 𑀉𑀪𑀬𑀮𑁄𑀓𑀳𑀺𑀢𑀸𑀯𑀳𑀁 𑀯𑀸𑀘𑀁 𑀲𑀼𑀬𑁆𑀬𑀢𑁂𑀯, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁.

‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄, 𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁, 𑀲𑀘𑁆𑀘𑀁 𑀪𑀡𑁂 𑀦𑀸𑀮𑀻𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺 𑀘.

‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺.

𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁂𑀯𑀦𑀧𑀘𑁆𑀘𑀬𑀸𑀬𑁂𑀯 𑀤𑀸𑀦𑀸𑀤𑀺𑀓𑀼𑀲𑀮𑀲𑀫𑀸𑀬𑁄𑀕𑁂𑀦 𑀅𑀧𑀸𑀬𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀧𑀺𑀘 𑀦𑁂𑀭𑀬𑀺𑀓𑀸𑀤𑀺𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀢𑁄 𑀧𑀼𑀜𑁆𑀜𑀸𑀦𑀺 𑀏𑀯 𑀧𑀸𑀡𑀻𑀦𑀁 𑀩𑀳𑀽𑀧𑀓𑀸𑀭𑀸𑀦𑀺, 𑀬𑀢𑁄 𑀢𑁂𑀲𑀫𑁆𑀧𑀺 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀢𑀸 𑀓𑀢𑀜𑁆𑀜𑀼𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀲𑀁𑀲𑀦𑀻𑀬𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀽𑀘 𑀳𑁄𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, ‘‘𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁, 𑀓𑀢𑀫𑁂 𑀤𑁆𑀯𑁂, 𑀬𑁄 𑀘 𑀧𑀼𑀩𑁆𑀩𑀓𑀸𑀭𑀻, 𑀬𑁄 𑀘 𑀓𑀢𑀜𑁆𑀜𑀼 𑀓𑀢𑀯𑁂𑀤𑀻’’𑀢𑀺. 𑀅𑀧𑀺𑀘 𑀯𑀺𑀥𑀼𑀭𑀫𑀳𑁄𑀲𑀥𑀚𑀸𑀢𑀓𑀸𑀤𑀺𑀓𑀸𑀮𑁂𑀧𑀺 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀫𑁂𑀯 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂 𑀲𑀫𑁆𑀫𑀸 𑀬𑁄𑀚𑁂𑀦𑁆𑀢𑀺. 𑀅𑀦𑀸𑀓𑀼𑀮𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀓𑀸𑀮𑀜𑁆𑀜𑀼𑀢𑀸𑀬 𑀧𑀢𑀺𑀭𑀽𑀧𑀓𑀸𑀭𑀺𑀢𑀸𑀬 𑀅𑀦𑀮𑀲𑀢𑀸𑀬 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑀢𑀸𑀬 𑀅𑀩𑁆𑀬𑀲𑀦𑀺𑀬𑀢𑀸𑀘 𑀓𑀸𑀮𑀸𑀦𑀢𑀺𑀓𑁆𑀓𑀫𑀦𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀅𑀓𑀭𑀡𑀲𑀺𑀣𑀺𑀮𑀓𑀭𑀡𑀸𑀳𑀺 𑀅𑀓𑀼𑀲𑀮𑀸𑀤𑀻𑀳𑀺 𑀭𑀳𑀺𑀢𑀓𑀲𑀺𑀕𑁄𑀭𑀓𑁆𑀔𑀯𑀸𑀡𑀺𑀚𑁆𑀚𑀸𑀤𑀬𑁄 𑀓𑀫𑁆𑀫𑀦𑁆𑀢𑀸, 𑀏𑀢𑁂 𑀅𑀢𑁆𑀢𑀦𑁄 𑀯𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀯𑀸 𑀩𑁆𑀬𑀢𑁆𑀢𑀢𑀸𑀬 𑀏𑀯𑀁 𑀧𑀬𑁄𑀚𑀺𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀦𑀥𑀜𑁆𑀜𑀯𑀺𑀢𑁆𑀢𑀺 𑀧𑀝𑀺𑀮𑀸𑀪𑀳𑁂𑀢𑀽 𑀳𑁄𑀦𑁆𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑀧𑀢𑀺𑀭𑀽𑀧𑀓𑀸𑀭𑀻𑀭𑀺 𑀥𑀼𑀭𑀯𑀸, 𑀉𑀝𑁆𑀞𑀸𑀦𑀢𑀸 𑀯𑀺𑀦𑁆𑀤𑀢𑁂 𑀥𑀦𑀦𑁆𑀢𑀺 𑀘;

𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂, 𑀭𑀢𑁆𑀢𑀺𑀁 𑀉𑀝𑁆𑀞𑀸𑀦𑀤𑀲𑁆𑀲𑀺𑀦𑀸;

𑀦𑀺𑀘𑁆𑀘𑀧𑁆𑀧𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭𑀁.

𑀅𑀢𑀻𑀲𑀺𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀭𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘; 𑀢𑀺𑀡𑀸𑀦𑀺 𑀬𑁄 𑀦 𑀫𑀜𑁆𑀜𑀢𑀺;

𑀲𑀧𑁆𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀬𑀢𑀻’’𑀢𑀺 𑀘.

𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲, 𑀧𑀭𑀲𑁆𑀲𑁂𑀯 𑀇𑀭𑀬𑀢𑁄;

𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀺, 𑀯𑀫𑁆𑀫𑀺𑀓𑁄𑀯𑀽𑀧𑀘𑀻𑀬𑀢𑀻𑀢𑀺.

𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂 𑀅𑀢𑀺𑀤𑀼𑀮𑁆𑀮𑀪𑀸𑀯. 𑀢𑀩𑁆𑀩𑀺𑀕𑀫𑁂𑀦 𑀤𑀼𑀧𑁆𑀧𑀼𑀭𑀺𑀲𑀸 𑀩𑀸𑀮𑀚𑀦𑀸 𑀅𑀕𑀯𑁂𑀲𑀦𑁆𑀢𑁄𑀧𑀺 𑀮𑀩𑁆𑀪𑀦𑁆𑀢𑁂𑀯 𑀢𑁂 𑀩𑀸𑀮𑀸 𑀅𑀢𑁆𑀢𑀸𑀦𑀁 𑀲𑁂𑀯𑀫𑀸𑀦𑁂 𑀧𑀭𑀚𑀦𑁂 𑀲𑀁𑀲𑀸𑀭𑀤𑀼𑀓𑁆𑀔𑁂𑀬𑁂𑀯 𑀑𑀲𑀻𑀤𑁂𑀦𑁆𑀢𑀺 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦 𑀤𑁂𑀦𑁆𑀢𑀺 𑀢𑀣𑀸 𑀳𑀺 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀙𑀲𑀢𑁆𑀣𑀸𑀭𑀸 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓-𑀫𑁄𑀤𑀓𑀢𑀺𑀲𑁆𑀲 𑀔𑀡𑁆𑀟𑀤𑁂𑀯𑀺𑀬𑀸𑀧𑀼𑀢𑁆𑀢𑀲𑀫𑀼𑀤𑁆𑀤𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀬𑁄 𑀅𑀢𑀻𑀢𑀓𑀸𑀮𑁂 𑀘 𑀤𑀻𑀖𑀤𑀼𑀓𑁆𑀔𑀲𑁆𑀲 𑀮𑀸𑀪𑀸𑀢𑀺 𑀇𑀫𑁂 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀲𑀢𑁆𑀢𑀸 𑀩𑀸𑀮𑀸 𑀅𑀕𑁆𑀕𑀺𑀧𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀢𑁆𑀢𑀸𑀦𑀜𑁆𑀘 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑀓𑁂 𑀘 𑀯𑀺𑀦𑀸𑀲𑁂𑀦𑁆𑀢𑀺 𑀢𑀣𑀸 𑀳𑀺 𑀤𑁂𑀯𑀤𑀢𑁆𑀢𑀫𑀸𑀕𑀫𑁆𑀫 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼-𑀓𑁄𑀓𑀸𑀮𑀺𑀓𑀸𑀤𑀬𑁄 𑀢𑀤𑀜𑁆𑀜𑁂𑀧𑀺 𑀧𑀼𑀕𑁆𑀕𑀮𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀦𑁆𑀢𑀲𑀯𑀦𑀓𑀸𑀮𑁂 𑀬𑀤𑀺 𑀧𑀺𑀢𑀭𑀁 𑀅𑀖𑀸𑀢𑁂𑀬𑁆𑀬, 𑀲𑁄𑀢𑀸𑀧𑀦𑁆𑀦𑁄 𑀪𑀯𑁂𑀬𑁆𑀬 𑀧𑀺𑀢𑀭𑀁 𑀖𑀸𑀢𑀺𑀢𑀢𑁆𑀢𑀸 𑀫𑀕𑁆𑀕𑀨𑀮𑀫𑁆𑀧𑀺 𑀅𑀧𑁆𑀧𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀬𑀁 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀫𑀼𑀘𑁆𑀘𑀺𑀲𑁆𑀲𑀢𑀺 𑀅𑀦𑀸𑀕𑀢𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀓𑁄𑀓𑀸𑀮𑀺𑀓𑁄𑀧𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑁂 𑀅𑀦𑀧𑀘𑀸𑀬𑀺𑀢𑁆𑀯𑀸 𑀫𑀳𑀸𑀦𑀺𑀭𑀬𑁂 𑀧𑀤𑀼𑀫𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁂 𑀦𑀺𑀭𑀬𑀧𑀤𑁂𑀲𑁂 𑀧𑀤𑀼𑀫𑀦𑀺𑀭𑀬𑁂…𑀧𑁂… 𑀧𑀤𑀼𑀫𑀁 𑀔𑁄 𑀧𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀦𑀺𑀭𑀬𑀁 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁 ‘‘𑀓𑀺𑀁 𑀯 𑀤𑀻𑀖𑀁 𑀦𑀼𑀔𑁄 𑀪𑀦𑁆𑀢𑁂 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀯𑀫𑀸𑀳 ‘‘𑀤𑀻𑀖𑀁 𑀔𑁄 𑀪𑀺𑀓𑁆𑀔𑀼 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀸 𑀲𑀓𑁆𑀓𑀸 𑀧𑀦 𑀪𑀦𑁆𑀢𑁂 𑀉𑀧𑀫𑀁 𑀓𑀸𑀢𑀼𑀦𑁆𑀢𑀺. ‘‘𑀲𑀓𑁆𑀓𑀸 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀢𑀺𑀮𑀁 𑀉𑀤𑁆𑀥𑀭𑁂𑀬𑁆𑀬, 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀏𑀓𑁄 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀯𑀻𑀲 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄, 𑀏𑀯𑀫𑁂𑀓𑁄 𑀦𑀺𑀭𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀆𑀤𑀺. 𑀯𑀻𑀲𑀢𑀺𑀔𑀸𑀭𑀺𑀓𑁄 𑀢𑀺 𑀫𑀸𑀕𑀥𑀺𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀧𑀢𑁆𑀣𑁄 𑀳𑁄𑀢𑀺. 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁. 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁. 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸. 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻. 𑀢𑀸𑀬𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄 𑀢𑀺𑀮𑀯𑀸𑀳𑁄. 𑀢𑀺𑀮𑀯𑀸𑀳𑁄𑀢𑀺 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀏𑀓𑁄 𑀧𑀘𑁆𑀘𑁂𑀓𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺 𑀏𑀯 𑀧𑀦 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁄 ‘‘𑀅𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼𑀧𑀺. 𑀢𑀢𑁆𑀣 𑀯𑀲𑁆𑀲𑀕𑀡𑀦𑀸𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸𑀳 ‘‘𑀲𑀢𑀁𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺 𑀏𑀯𑀁 𑀲𑀢𑀁𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫. 𑀲𑀢𑀁𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫. 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑁄 𑀅𑀩𑁆𑀩𑀼𑀤𑁄. 𑀢𑀢𑁄 𑀯𑀻𑀲𑀢𑀺𑀕𑀼𑀡𑁄 𑀦𑀺𑀭𑀩𑁆𑀩𑀼𑀤𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀅𑀬𑀜𑁆𑀘 𑀕𑀡𑀦𑀸 𑀅𑀧𑀭𑀺𑀘𑀺𑀢𑀸𑀦𑀁 𑀤𑀼𑀓𑁆𑀓𑀭𑀸’’𑀢𑀺 𑀯𑀼𑀢𑁆𑀢𑀁 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’𑀦𑁆𑀢𑀺 𑀓𑁂𑀘𑀺 𑀧𑀦 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀦𑀢𑁆𑀢𑁂𑀦𑀧𑀺 𑀓𑀫𑁆𑀫𑀓𑀭𑀡𑀦𑀸𑀦𑀢𑁆𑀢𑁂𑀦𑀧𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑀮𑀤𑁆𑀥𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂𑀧𑀺 𑀯𑀸𑀦𑀓𑀸𑀭𑀡𑁂𑀳𑀻𑀢𑀺 𑀝𑀻𑀓𑀸𑀦𑁂𑀢𑁆𑀢𑀺. 𑀬𑀣𑀸 𑀘 𑀤𑀻𑀖𑀯𑀺𑀤𑀲𑁆𑀲𑀆𑀖𑀸𑀢𑀸 𑀘 𑀩𑀼𑀤𑁆𑀥𑀦𑁆𑀢𑀭𑀁 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀢𑁆𑀢𑀸𑀦𑁄 𑀧𑀢𑀺𑀢𑁄 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀢𑀺 𑀬𑀣𑀸 𑀘, 𑀢𑀲𑁆𑀲 𑀤𑀺𑀝𑁆𑀞𑀺𑀅𑀪𑀺𑀭𑀼𑀘𑀺𑀢𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀢𑀲𑁆𑀲𑁂𑀯 𑀲𑀳𑀩𑁆𑀬𑀢𑀁 𑀉𑀧𑁆𑀧𑀦𑁆𑀦𑀸𑀦𑀺 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀦𑀴𑀸𑀕𑀸𑀭𑀁 𑀯𑀸 𑀢𑀺𑀡𑀸𑀕𑀸𑀭𑀁 𑀯𑀸 𑀅𑀕𑁆𑀕𑀺𑀨𑀼𑀝𑁆𑀞𑁄 𑀓𑀽𑀝𑀸𑀕𑀸𑀭𑀸𑀦𑀺 𑀤𑀳𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀺 𑀦𑀺𑀯𑀸𑀢𑀸𑀦𑀺 𑀨𑀼𑀲𑀺𑀢𑀕𑁆𑀕𑀴𑀸𑀦𑀺 𑀧𑀺𑀳𑀺𑀢 𑀯𑀸𑀢𑀧𑀸𑀦𑀸𑀦𑀺 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀬𑀸𑀦𑀺𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄 𑀬𑁂𑀓𑁂𑀘𑀺 𑀉𑀧𑀤𑁆𑀤𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄, 𑀬𑁂𑀓𑁂𑀘𑀺 𑀉𑀧𑀲𑀕𑁆𑀕𑀸…𑀧𑁂… 𑀦𑁄 𑀧𑀡𑁆𑀟𑀺𑀢𑀢𑁄. 𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄𑀢𑀺. 𑀅𑀧𑀺 𑀘 𑀧𑀽𑀢𑀺𑀫𑀘𑁆𑀙𑀲𑀤𑀺𑀲𑁄 𑀩𑀸𑀮𑁄, 𑀧𑀽𑀢𑀺𑀫𑀘𑁆𑀙𑀩𑀤𑁆𑀥𑀧𑀢𑁆𑀢 𑀧𑀼𑀢𑀺𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻. 𑀙𑀟𑁆𑀟𑀦𑀻𑀬𑀢𑀁 𑀚𑀺𑀕𑀼𑀘𑁆𑀙𑀦𑀻𑀬𑀢𑀜𑁆𑀘 𑀆𑀧𑀚𑁆𑀚𑀢𑀺 𑀯𑀺𑀜𑁆𑀜𑀽𑀦𑀁 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀦𑀸𑀭𑀤𑀚𑀸𑀢𑀓𑁂.

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸’’𑀢𑀺.

𑀅𑀓𑀢𑁆𑀢𑀺𑀧𑀡𑁆𑀟𑀺𑀢𑁄𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳

‘‘𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀸’𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

𑀓𑀺𑀁𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦’’𑀦𑁆𑀢𑀺.

𑀏𑀯𑀁 𑀩𑀸𑀮𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀯𑀲𑁂𑀦𑁂𑀯 𑀲𑀩𑁆𑀩𑀸𑀦𑀺 𑀪𑀬𑀼𑀧𑀤𑁆𑀤𑀯𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀲𑁂𑀯𑀦𑀯𑀲𑁂𑀦𑀸𑀢𑀺𑀲𑀩𑁆𑀩𑀲𑁄 𑀲𑀧𑁆𑀧𑀼𑀭𑀺𑀲𑀸 𑀅𑀢𑀺𑀤𑀼𑀮𑁆𑀮𑀪𑀸𑀯.

𑀇𑀤𑀸𑀦𑀺.

‘‘𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀘 𑀤𑀼𑀮𑁆𑀮𑀪𑁄;

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀲𑀤𑁆𑀥𑀫𑁆𑀫𑁄 𑀧𑀭𑀫𑀤𑀼𑀮𑁆𑀮𑀪𑁄’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯 𑀫𑀦𑀼𑀲𑁆𑀲𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑁄 𑀓𑀸𑀡𑀓𑀘𑁆𑀙𑀧𑁄𑀧𑀫𑀸𑀤𑀻𑀳𑀺 𑀯𑁂𑀤𑀺𑀢𑀩𑁆𑀩𑁄 𑀏𑀓𑁄 𑀓𑀺𑀭 𑀓𑀲𑁆𑀲𑀓𑁄 𑀕𑀗𑁆𑀕𑀸𑀢𑀻𑀭𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀓𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀦𑀗𑁆𑀕𑀮𑀨𑀸𑀮𑀁 𑀤𑁆𑀯𑁂𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀔𑀺𑀧𑀺 𑀢𑁂𑀦 𑀕𑀗𑁆𑀕𑀸𑀦𑀤𑀺𑀬𑀸 𑀯𑀸𑀳𑁂𑀦 𑀏𑀓𑁄 𑀉𑀤𑁆𑀥𑀁 𑀏𑀓𑁄 𑀳𑁂𑀝𑁆𑀞𑀸𑀢𑀺 𑀏𑀯𑀁 𑀤𑁆𑀯𑁂 𑀦𑀗𑁆𑀕𑀮𑀨𑀸𑀮𑀓𑀸 𑀕𑀗𑁆𑀕𑀸𑀬𑀁 𑀯𑀼𑀬𑁆𑀳𑀦𑁆𑀢𑀸 𑀘𑀺𑀭𑁂𑀦 𑀏𑀓𑁄 𑀉𑀤𑁆𑀥𑀁 𑀏𑀓𑁄 𑀳𑁂𑀝𑁆𑀞𑀸𑀢𑀺 𑀤𑁆𑀯𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀸𑀓𑀢𑀺𑀓𑀸 𑀬𑀼𑀚𑁆𑀚𑀦𑁆𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀯𑀲𑁆𑀲𑀲𑀢𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀏𑀓𑀯𑀸𑀭𑀁 𑀉𑀫𑁆𑀫𑀼𑀚𑁆𑀚𑀫𑀸𑀦𑁄 𑀓𑀸𑀡𑀓𑀘𑁆𑀙𑀧𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀓𑁆𑀔𑀡𑁂 𑀢𑀲𑁆𑀲 𑀕𑀻𑀯𑀸 𑀤𑁆𑀯𑀺𑀦𑁆𑀦𑀁 𑀦𑀗𑁆𑀕𑀮𑀨𑀸𑀮𑀸𑀦𑀫𑀦𑁆𑀢𑀭𑁂 𑀳𑁄𑀢𑀺 𑀅𑀬𑀁 𑀓𑀸𑀮𑁄 𑀤𑀼𑀮𑁆𑀮𑀪𑁄𑀯 𑀏𑀯𑀫𑁂𑀯 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯 𑀢𑀣𑀸𑀳𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀅𑀮𑀪𑀺𑀢𑁆𑀯𑀸𑀯 𑀦𑀺𑀭𑀬𑀧𑁂𑀢𑀅𑀲𑀼𑀭𑀓𑀸𑀬𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼𑀬𑁂𑀯 𑀲𑀁𑀲𑀭𑀺𑀢𑁆𑀯𑀸 𑀲𑀻𑀲𑀫𑁆𑀧𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀮𑀪𑀦𑁆𑀢𑀸 𑀏𑀓𑀩𑀼𑀤𑁆𑀥𑀦𑁆𑀢𑀭𑀸 𑀤𑁆𑀯𑁂 𑀩𑀼𑀤𑁆𑀥𑀦𑁆𑀢𑀭𑀸 𑀢𑀬𑁄 𑀩𑀼𑀤𑁆𑀥𑀦𑁆𑀢𑀭𑀸 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀦𑁆𑀢𑀭𑀸 𑀏𑀓𑀸𑀲𑀗𑁆𑀔𑁆𑀬𑁂𑀬𑁆𑀬𑀯𑀲𑁂𑀦 𑀦𑀺𑀭𑀬𑁂 𑀧𑀘𑁆𑀘𑀦𑀓𑀲𑀢𑁆𑀢𑀸𑀦𑀁 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀢𑀣𑀸 𑀧𑁂𑀢𑀅𑀲𑀼𑀭𑀓𑀸𑀬𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼𑀧𑀺 𑀅𑀢𑀺𑀔𑀼𑀤𑁆𑀤𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀢𑀺𑀮𑀩𑀻𑀚𑀲𑀸𑀲𑀧𑀩𑀻𑀚𑀲𑁆𑀲 𑀘𑀢𑀼𑀧𑀜𑁆𑀘𑀙𑀲𑀢𑁆𑀢𑀅𑀝𑁆𑀞𑀓𑀮𑀪𑀸𑀕𑀫𑀢𑁆𑀢𑁂𑀦𑁂𑀯 𑀅𑀗𑁆𑀕𑀼𑀮𑀺𑀬𑀸 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀫𑀢𑁆𑀢𑁂𑀬𑁂𑀯 𑀪𑀽𑀫𑀺𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀸𑀦𑀁 𑀅𑀢𑀺𑀔𑀼𑀤𑁆𑀤𑀓𑀲𑀢𑁆𑀢𑀸𑀦𑀁 𑀕𑀡𑀦𑀧𑀣𑀫𑁆𑀧𑀺 𑀯𑀻𑀢𑀺𑀯𑀢𑁆𑀢𑀸 𑀢𑁂 𑀳𑀺 𑀕𑀡𑀺𑀢𑀼𑀁 𑀇𑀤𑁆𑀥𑀺𑀫𑀦𑁆𑀢𑀧𑀼𑀕𑁆𑀕𑀮𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀓𑁄 𑀦𑀸𑀫 𑀲𑀓𑁆𑀔𑀺𑀲𑁆𑀲𑀢𑀺 𑀢𑁂𑀳𑀺 𑀫𑁄𑀳𑀦𑁆𑀥𑀪𑀸𑀯𑁂𑀦 𑀓𑀡𑁆𑀳𑀲𑀼𑀓𑁆𑀓𑀧𑀓𑁆𑀔𑀫𑁆𑀧𑀺 𑀅𑀚𑀸𑀦𑀦𑁆𑀢𑀸 𑀅𑀦𑁂𑀓𑁂𑀲𑀼 𑀩𑀼𑀤𑁆𑀥𑀲𑀢𑁂𑀲𑀼 𑀯𑀸 𑀩𑀼𑀤𑁆𑀥𑀲𑀳𑀲𑁆𑀲𑁂𑀲𑀼 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀩𑀼𑀤𑁆𑀥𑁄𑀢𑀺𑀲𑀤𑁆𑀤𑀁 𑀅𑀲𑀼𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀸, 𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀮𑀪𑀫𑀸𑀦𑁂𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄 𑀅𑀢𑀺𑀤𑀼𑀮𑁆𑀮𑀪𑁄𑀯. 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑀼𑀢𑁆𑀯𑀸 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸𑀯, 𑀲𑀤𑁆𑀥𑀫𑁆𑀫𑀤𑁂𑀲𑀓𑀲𑁆𑀲𑀸𑀧𑀺 𑀤𑀼𑀮𑁆𑀮𑀪𑀢𑁆𑀢𑀸, 𑀢𑀲𑁆𑀫𑀺𑀫𑁆𑀧𑀺 𑀲𑀢𑀺 𑀅𑀗𑁆𑀕𑀯𑀺𑀓𑀮𑀪𑀸𑀯𑁂𑀦 𑀲𑀤𑁆𑀥𑀫𑁆𑀫𑀲𑀯𑀦𑀲𑁆𑀲𑀸𑀧𑀺 𑀤𑀼𑀮𑁆𑀮𑀪𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀤𑀺𑀓𑀸 𑀔𑀡𑀲𑀫𑁆𑀧𑀢𑁆𑀢𑀺𑀬𑁄 𑀤𑀼𑀮𑁆𑀮𑀪𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀻𑀢𑀺 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸𑀬𑁂𑀯 𑀢𑀣𑀸 𑀳𑀺 𑀧𑀘𑁆𑀘𑀦𑁆𑀢𑀯𑀺𑀲𑀬 𑀅𑀭𑀽𑀧𑀅𑀲𑀜𑁆𑀜𑀲𑀢𑁆𑀢𑀢𑀺𑀭𑀘𑁆𑀙𑀸𑀦𑀧𑁂𑀢𑀦𑁂𑀭𑀬𑀺𑀓𑀓𑀸𑀮𑁂 𑀯𑀸 𑀫𑀚𑁆𑀛𑀺𑀫𑀤𑁂𑀲𑁂𑀧𑀺 𑀘𑀓𑁆𑀔𑀸𑀤𑀺𑀅𑀗𑁆𑀕𑀯𑀺𑀓𑀮𑁂𑀯𑀸 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑀪𑀸𑀯𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀽𑀢𑀸 𑀯𑀸 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀸 𑀦 𑀳𑁄𑀦𑁆𑀢𑀺 𑀧𑀘𑁆𑀘𑀦𑁆𑀢𑀯𑀺𑀲𑀬𑁂 𑀳𑀺 𑀧𑀯𑀢𑁆𑀢𑀸 𑀚𑀦𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀬𑁂𑀯 𑀭𑀫𑀦𑁆𑀢𑀺 𑀅𑀪𑀺𑀭𑀫𑀦𑁆𑀢𑀺, 𑀘𑀡𑁆𑀟𑀲𑀪𑀸𑀯𑀸 𑀘 𑀢𑁂 𑀳𑁄𑀦𑁆𑀢𑀺, 𑀭𑀢𑀦𑀢𑁆𑀢𑀬𑀕𑀼𑀡𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀅𑀭𑀽𑀧𑀺𑀦𑁄𑀧𑀺 𑀧𑀼𑀕𑁆𑀕𑀮𑀸 𑀧𑀭𑀢𑁄𑀖𑁄𑀲𑀯𑀺𑀭𑀳𑀺𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑁄𑀧𑀺 𑀢𑁂𑀲𑀁 𑀦𑀢𑁆𑀣𑀺, 𑀩𑀼𑀤𑁆𑀥𑀤𑀲𑁆𑀲𑀦𑀸𑀤𑀻𑀦𑀺𑀧𑀺 𑀦 𑀮𑀪𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀢𑀺𑀭𑀘𑁆𑀙𑀸𑀦𑀧𑁂𑀢𑀦𑁂𑀭𑀬𑀺𑀓𑀓𑀸𑀮𑁂𑀲𑀼 𑀧𑀦 𑀧𑀕𑁂𑀯 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀼𑀮𑁂 𑀚𑀸𑀬𑀫𑀸𑀦𑀸𑀧𑀺 𑀘𑀓𑁆𑀔𑀼𑀯𑀺𑀓𑀮𑁂𑀦 𑀩𑀼𑀤𑁆𑀥𑀲𑀗𑁆𑀖𑀭𑀢𑀦𑀸𑀦𑀁 𑀅𑀤𑀲𑁆𑀲𑀦𑀁, 𑀲𑁄𑀢𑀯𑀺𑀓𑀮𑁂𑀦 𑀥𑀫𑁆𑀫𑀲𑀯𑀦𑀢𑁄𑀧𑀺 𑀳𑀸𑀬𑀢𑀺 𑀏𑀴𑀫𑀽𑀕𑀸𑀤𑀺𑀪𑀸𑀯𑁂𑀦 𑀓𑀼𑀲𑀮𑀲𑀫𑀸𑀤𑀸𑀦𑀸 𑀦 𑀳𑁄𑀦𑁆𑀢𑀺. 𑀅𑀗𑁆𑀕𑀲𑀫𑁆𑀧𑀦𑁆𑀦𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀩𑁆𑀩𑀚𑀦𑀸𑀦𑀁 𑀦𑀬𑀦𑀭𑀲𑀸𑀬𑀢𑀦𑀪𑀽𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀫𑁆𑀧𑀺 𑀤𑀺𑀲𑁆𑀯𑀸 𑀧𑀲𑀸𑀤𑀲𑁄𑀫𑁆𑀫𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑀩𑁆𑀩𑀫𑁆𑀧𑀺 𑀦 𑀫𑀜𑁆𑀜𑀦𑁆𑀢𑀺 𑀫𑀦𑁄𑀧𑀤𑁄𑀲𑀯𑀲𑁂𑀦𑁂𑀯 𑀬𑀼𑀕𑀕𑁆𑀕𑀸𑀳𑀸 𑀳𑀼𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀅𑀦𑁂𑀓𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄 𑀫𑀳𑀸𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀓𑀼𑀲𑀮𑀽𑀧𑀧𑀢𑁆𑀢𑀺𑀔𑀡𑀲𑀫𑁆𑀧𑀢𑁆𑀢𑀺𑀧𑀺 𑀤𑀼𑀮𑁆𑀮𑀪𑀸𑀬𑁂𑀯.

‘‘𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀘 𑀤𑀼𑀮𑁆𑀮𑀪𑁄;

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀲𑀤𑁆𑀥𑀫𑁆𑀫𑁄 𑀧𑀭𑀫𑀤𑀼𑀮𑁆𑀮𑀪𑁄’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂

𑀧𑀓𑀺𑀡𑁆𑀡𑀓𑀓𑀡𑁆𑀟𑁄 𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀲𑀢𑁆𑀣𑀼𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀧𑀢𑀺𑀝𑁆𑀞𑀺𑀢𑁂 𑀇𑀲𑀺𑀦𑀸 𑀓𑀸𑀭𑀺𑀢𑀢𑁆𑀢𑀸’ 𑀇𑀲𑀺𑀦𑀕𑀭’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀤𑁆𑀯𑀢𑁆𑀢𑀧𑀸𑀤𑀺𑀪𑀽𑀧𑀸𑀮𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁂 𑀲𑀻𑀭𑀺𑀔𑁂𑀢𑁆𑀢𑀦𑀕𑀭𑁂 𑀏𑀭𑀸𑀯𑀢𑀺𑀬𑀸 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑀪𑀽𑀢𑁂 𑀧𑀩𑁆𑀩𑀢𑀲𑀸𑀦𑀼𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀲𑁆𑀲 𑀓𑀜𑁆𑀘𑀦𑀯𑀭𑀫𑀳𑀸𑀣𑀽𑀧𑀲𑁆𑀲 𑀤𑀸𑀬𑀓𑀲𑁆𑀲 𑀲𑀢𑁆𑀯𑀺𑀯𑀫𑀳𑀸𑀥𑀫𑁆𑀫𑀭𑀜𑁆𑀜𑁄 𑀓𑀸𑀮𑁂 𑀲𑀸𑀲𑀦𑀲𑁆𑀲 𑀤𑁆𑀯𑀺𑀲𑀳𑀲𑁆𑀲𑀲𑀢𑀸𑀥𑀺𑀓𑀏𑀓𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀳𑀸𑀚𑀸𑀦𑀺𑀓𑀭𑀡𑀯𑀲𑁂𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀸 𑀯𑀼𑀢𑁆𑀢𑀯𑀘𑀦𑀁 𑀲𑀤𑁆𑀤𑀬𑀼𑀢𑁆𑀢𑀺𑀅𑀢𑁆𑀣𑀬𑀼𑀢𑁆𑀢𑀺𑀯𑀲𑁂𑀦 𑀲𑀸𑀥𑀼𑀓𑀁 𑀅𑀯𑀺𑀘𑀺𑀦𑀺𑀢𑁆𑀯𑀸 𑀦𑀤𑀺𑀬𑀸 𑀉𑀤𑀓𑀼𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀉𑀧𑀲𑀫𑁆𑀧𑀤𑀸 𑀓𑀫𑁆𑀫𑀲𑁆𑀲 𑀓𑀸𑀭𑀺𑀢𑀢𑁆𑀢𑀸 𑀲𑀸𑀲𑀦𑁂 𑀧𑀭𑀸𑀚𑀬𑀫𑀸𑀧𑀦𑁆𑀦𑁂 𑀓𑀼𑀮𑀧𑀼𑀢𑁆𑀢𑁂 𑀉𑀧𑀸𑀭𑀫𑁆𑀪𑀓𑀭𑀡𑀯𑀲𑁂𑀦 𑀲𑀻𑀫𑀯𑀺𑀧𑀢𑁆𑀢𑀺𑀳𑀸𑀭𑀓𑁄 𑀲𑀻𑀫𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀓𑁄 𑀕𑀦𑁆𑀣𑁄 𑀧𑀯𑀢𑁆𑀢𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑀕𑁄𑀘𑀭𑀕𑀸𑀫𑁂𑀦 𑀲𑀢𑁆𑀯𑀺𑀯𑀫𑀳𑀸𑀥𑀫𑁆𑀫𑀭𑀸𑀚𑀕𑀼𑀭𑀼𑀪𑀽𑀢𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀺𑀧𑀺𑀝𑀓𑀥𑀭𑁂𑀦’𑀲𑀤𑁆𑀥𑀫𑁆𑀫𑀓𑁄𑀯𑀺𑀤𑁄’𑀢𑀺 𑀧𑀸𑀓𑀝 𑀦𑀸𑀫𑀥𑁂𑀬𑁆𑀬𑁂𑀦 𑀫𑀳𑀸𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀥𑀺𑀧𑀢𑀻𑀦𑀁 𑀦𑀺𑀯𑀸𑀲𑀪𑀽𑀢𑁂 𑀧𑀘𑁆𑀙𑀺𑀫𑀚𑀺𑀦𑀘𑀓𑁆𑀓𑀲𑀸𑀲𑀦𑀯𑀭𑁂 𑀯𑀸𑀲𑀺𑀕𑀡𑀸𑀘𑀭𑀺𑀬𑁂𑀦 𑀕𑀡𑀯𑀸𑀘𑀓𑁂𑀦 𑀯𑀺𑀦𑀬𑀥𑀭𑁂𑀦 𑀫𑀳𑀸𑀲𑀸𑀫𑀺𑀦𑀸 𑀘, 𑀭𑀸𑀚𑀕𑀼𑀭𑀼𑀦𑀸 𑀢𑀺𑀧𑀺𑀝𑀓𑀦𑀸𑀕𑀢𑁆𑀣𑁂𑀭𑁂𑀦 𑀘 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀚𑀗𑁆𑀖𑀧𑁂𑀲𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀅𑀦𑁂𑀲𑀦𑀁 𑀧𑀳𑀸𑀬 𑀲𑀫𑁆𑀫𑀸 𑀆𑀚𑀻𑀯𑁂𑀦 𑀯𑀺𑀲𑀼𑀤𑁆𑀥𑀸𑀚𑀻𑀯𑁂𑀳𑀺 𑀲𑀗𑁆𑀖𑀕𑀡𑁂𑀳𑀺 𑀓𑀸𑀭𑀓𑀲𑀗𑁆𑀖𑀸 𑀳𑀼𑀢𑁆𑀯𑀸 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀤𑀻𑀖𑀧𑀩𑁆𑀩𑀢𑀲𑀸𑀦𑀼𑀫𑁆𑀳𑀺 𑀏𑀭𑀸𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 𑀯𑀸𑀮𑀺𑀓𑀧𑀼𑀴𑀺𑀦𑁂 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳 𑀉𑀤𑀓𑀼𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀤𑀲𑀥𑀸 𑀩𑁆𑀬𑀜𑁆𑀚𑀦𑀯𑀺𑀧𑀢𑁆𑀢𑀺𑀁 𑀅𑀓𑀢𑁆𑀯𑀸 𑀞𑀸𑀦𑀸𑀭𑀳𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀤𑀸𑀬 𑀯𑀻𑀲𑀢𑀺𑀯𑀲𑁆𑀲𑁂𑀦 𑀲𑀸𑀕𑀭𑀩𑀼𑀤𑁆𑀥𑀻𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀸 𑀭𑀘𑀺𑀢𑁄 𑀲𑀸𑀲𑀦𑀯𑀺𑀧𑀢𑁆𑀢𑀺𑀳𑀸𑀭𑀓𑁄 𑀲𑀻𑀫𑀯𑀺𑀲𑁄𑀥𑀦𑀻 𑀦𑀸𑀫 𑀕𑀦𑁆𑀣𑁄 𑀲𑀫𑀢𑁆𑀢𑁄.

𑀏𑀢𑁆𑀢𑀸𑀯𑀢𑀸 𑀯𑀺𑀪𑀢𑁆𑀢𑀸 𑀳𑀺, 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸;

𑀲𑀻𑀫𑀯𑀺𑀲𑁄𑀥𑀦𑀻𑀳𑁂𑀲𑀸, 𑀦𑀺𑀧𑀼𑀡𑀸 𑀲𑀸𑀥𑀼𑀘𑀺𑀦𑁆𑀢𑀺𑀢𑀸.

𑀲𑀺𑀭𑀺𑀔𑁂𑀢𑁆𑀢𑀸𑀢𑀺 𑀧𑀜𑁆𑀜𑀸𑀢𑁂, 𑀧𑀼𑀭𑁂 𑀅𑀧𑀭𑀦𑀸𑀫𑀓𑁂;

𑀤𑀓𑁆𑀔𑀺𑀡𑁂𑀬𑁆𑀬𑀤𑀺𑀲𑀸𑀪𑀸𑀕𑁂, 𑀉𑀘𑁆𑀘𑀦𑁂𑀦 𑀓𑀢𑀸𑀮𑀬𑁂.

𑀯𑀲𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫𑁂𑀦, 𑀲𑀸𑀕𑀭𑀩𑀼𑀤𑁆𑀥𑀻𑀢𑀺 𑀯𑀺𑀲𑁆𑀲𑀼𑀢𑁄;

𑀧𑀼𑀡𑁆𑀡𑁂 𑀯𑀻𑀲𑀢𑀺𑀯𑀲𑁆𑀲𑀫𑁆𑀳𑀺, 𑀕𑀦𑁆𑀣𑁄𑀬𑀁 𑀲𑀸𑀥𑀼𑀘𑀺𑀦𑁆𑀢𑀺𑀢𑁄.

𑀫𑀬𑀸𑀬𑀁 𑀭𑀘𑀺𑀢𑁄 𑀕𑀦𑁆𑀣𑁄, 𑀦𑀺𑀝𑁆𑀞𑀧𑁆𑀧𑀢𑁆𑀢𑁄 𑀅𑀦𑀸𑀓𑀼𑀮𑁄;

𑀏𑀯𑀁 𑀧𑀸𑀡𑀺𑀦𑀁 𑀲𑀩𑁆𑀩𑁂, 𑀲𑀻𑀖𑀁 𑀲𑀺𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺𑀦𑀸𑀫𑀫𑁆𑀧𑀺 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀢𑀸𑀯 𑀢𑀺𑀝𑁆𑀞𑀢𑀼 𑀬𑀁 𑀕𑀦𑁆𑀣𑁄, 𑀲𑀸𑀲𑀦𑁂 𑀳𑀸𑀭𑀬𑀁 𑀢𑀫𑀁.

𑀉𑀤𑁆𑀥𑀁 𑀬𑀸𑀯 𑀪𑀯𑀕𑁆𑀕𑀸 𑀘, 𑀅𑀥𑁄 𑀬𑀸𑀯 𑀅𑀯𑀻𑀘𑀺𑀢𑁄;

𑀲𑀫𑀦𑁆𑀢𑀸 𑀘𑀓𑁆𑀓𑀯𑀸𑀴𑁂𑀲𑀼, 𑀬𑁂 𑀲𑀢𑁆𑀢𑀸 𑀧𑀣𑀯𑀻𑀘𑀭𑀸.

𑀢𑁂𑀧𑀺 𑀲𑀩𑁆𑀩𑁂 𑀫𑀬𑀸 𑀳𑁄𑀦𑁆𑀢𑀼, 𑀲𑀫𑀲𑀫𑀯𑀺𑀧𑀸𑀓𑀺𑀦𑁄;

𑀘𑀺𑀭𑀁 𑀚𑀻𑀯𑀢𑀼 𑀦𑁄 𑀭𑀸𑀚𑀸, 𑀲𑀸𑀲𑀦𑀲𑁆𑀲 𑀉𑀚𑁆𑀚𑁄𑀢𑀓𑁄.

𑀤𑀺𑀩𑁆𑀩𑀦𑁆𑀢𑁄 𑀭𑀸𑀚𑀥𑀫𑁆𑀫𑁂𑀦, 𑀅𑀭𑁄𑀕𑁄 𑀲𑀳 𑀜𑀸𑀢𑀺𑀪𑀺;

𑀅𑀦𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀪𑀯𑁂𑀬𑁆𑀬𑀁 𑀚𑀸𑀢𑀺𑀚𑀸𑀢𑀺𑀬𑀁.

𑀲𑀸𑀲𑀦𑀁 𑀚𑁄𑀢𑀬𑀦𑁆𑀢𑁄𑀯, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂;

𑀬𑀤𑀸 𑀦𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑁄, 𑀅𑀦𑁆𑀥𑀻𑀪𑀽𑀢𑁄 𑀫𑀳𑀻𑀢𑀮𑁂;

𑀤𑁂𑀯𑀮𑁄𑀓𑁂 𑀢𑀤𑀸 𑀳𑁂𑀲𑁆𑀲𑀁, 𑀢𑀼𑀲𑀺𑀢𑁂 𑀞𑀸𑀦𑀫𑀼𑀢𑁆𑀢𑀫𑁂𑀢𑀺.

𑀲𑀻𑀫𑀯𑀺𑀲𑁄𑀥𑀦𑀻 𑀦𑀺𑀝𑁆𑀞𑀺𑀢𑀸.