𑁨. 𑀓𑀧𑁆𑀧𑀯𑀺𑀦𑀸𑀲𑀓𑀡𑁆𑀟𑁄

𑀇𑀤𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀤𑀼𑀮𑁆𑀮𑀪𑀓𑀣𑀸

‘‘𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘;

𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀧𑁆𑀧𑀼𑀭𑀺𑀲𑀸𑀢𑀺 𑀤𑀼𑀮𑁆𑀮𑀪𑀸’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀯𑀸 𑀲𑀩𑁆𑀩𑀜𑁆𑀜𑀼𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀼𑀮𑁆𑀮𑀪𑁄𑀯 𑀢𑀣𑀸 𑀳𑁂𑀲 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄𑀢𑀺 𑀢𑀺𑀧𑁆𑀧𑀪𑁂𑀤𑁄 𑀳𑁄𑀢𑀺 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺 𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀢𑀢𑁆𑀣 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑀸𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑁂𑀲 𑀲𑀢𑁆𑀢𑀸 𑀅𑀯𑀓𑀲𑀦𑁆𑀢𑀺 𑀏𑀢𑁆𑀣𑀸𑀢𑀺𑀑𑀓𑀸𑀲𑁄𑀢𑀺 𑀯𑀼𑀘𑁆𑀘𑀢𑀺 𑀲𑁄 𑀪𑀽𑀫𑀺𑀯𑀲𑁂𑀦 𑀅𑀧𑀸𑀬𑀪𑀽𑀫𑀺, 𑀓𑀸𑀫𑀲𑀼𑀕𑀢𑀺𑀪𑀽𑀫𑀺, 𑀭𑀽𑀧𑀸𑀯𑀘𑀭𑀪𑀽𑀫𑀺, 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀦𑀺𑀭𑀬𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀅𑀲𑀼𑀭𑀓𑀸𑀬𑁄, 𑀢𑀺 𑀘𑀢𑀲𑁆𑀲𑁄 𑀅𑀧𑀸𑀬𑀪𑀽𑀫𑀺 𑀦𑀸𑀫. 𑀫𑀦𑀼𑀲𑁆𑀲𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀢𑀸𑀯𑀢𑀺𑀁𑀲𑀸, 𑀬𑀸𑀫𑀸, 𑀢𑀼𑀲𑀺𑀢𑀸, 𑀦𑀺𑀫𑁆𑀫𑀸𑀦𑀭𑀢𑀺, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀘𑁂𑀢𑀺 𑀲𑀢𑁆𑀢𑀯𑀺𑀥𑀸 𑀳𑁄𑀢𑀺 𑀓𑀸𑀫𑀲𑀼𑀕𑀢𑀺𑀪𑀽𑀫𑀺 𑀲𑀸𑀧𑀦𑀸𑀬𑀁 𑀏𑀓𑀸𑀤𑀲𑀯𑀺𑀥𑀸𑀧𑀺 𑀓𑀸𑀫𑀢𑀡𑁆𑀳𑀸 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀯𑀘𑀦𑀢𑁆𑀣𑁂𑀦 𑀓𑀸𑀫𑀸𑀯𑀘𑀭𑀪𑀽𑀫𑀺 𑀦𑀸𑀫. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀫𑀳𑀸𑀩𑁆𑀭𑀳𑁆𑀫𑀸 𑀘 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀅𑀕𑁆𑀕𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸, 𑀆𑀪𑀲𑁆𑀲𑀭𑀸 𑀘 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀆𑀧𑁂𑀦 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀓𑀺𑀡𑁆𑀳𑀸 𑀘 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀯𑀸𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁, 𑀢𑁂𑀲𑀁 𑀯𑀺𑀧𑀢𑁆𑀢𑀺𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀳𑀧𑁆𑀨𑀮𑀸, 𑀅𑀲𑀜𑁆𑀜𑀲𑀢𑁆𑀢𑀸, 𑀲𑀼𑀤𑁆𑀥𑀸𑀯𑀸𑀲𑀸 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀘𑁂𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺 𑀲𑁄𑀴𑀲𑀯𑀺𑀥𑀸 𑀳𑁄𑀢𑀺. 𑀅𑀯𑀺𑀳𑀸, 𑀅𑀢𑀧𑁆𑀧𑀸, 𑀲𑀼𑀤𑀲𑁆𑀲𑀸, 𑀲𑀼𑀤𑀲𑁆𑀲𑀻, 𑀅𑀓𑀦𑀺𑀝𑁆𑀞𑀸𑀘𑁂𑀢𑀺 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀽𑀫𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀽𑀫𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑀅𑀭𑀽𑀧𑀪𑀽𑀫𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀢𑀺𑀁𑀲𑀧𑁆𑀧𑀪𑁂𑀤𑀸𑀧𑀺 𑀪𑀽𑀫𑀺 𑀅𑀯𑀓𑀲𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑀸𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸𑀦𑀺 𑀅𑀧𑀸𑀬𑀪𑀽𑀫𑀺 𑀦𑀸𑀫. 𑀢𑀺𑀭𑀘𑁆𑀙𑀸𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀓𑀸𑀬𑁄𑀢𑀺 𑀇𑀫𑁂𑀲𑀁 𑀯𑀺𑀲𑀼𑀁 𑀪𑀽𑀫𑀺 𑀦𑀸𑀫 𑀦𑀢𑁆𑀣𑀺, 𑀫𑀦𑀼𑀲𑁆𑀲𑀪𑀽𑀫𑀺𑀬𑀁𑀬𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀤𑀻𑀲𑀼 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺 𑀲𑁄𑀬𑁂𑀯 𑀧𑀤𑁂𑀲𑁄 𑀢𑁂𑀲𑀁 𑀪𑀽𑀫𑀺. 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑁄 𑀬𑀼𑀕𑀦𑁆𑀥𑀭𑀧𑁆𑀧𑀫𑀸𑀡𑁄 𑀲𑀺𑀦𑁂𑀭𑀼𑀦𑁄 𑀧𑀜𑁆𑀘𑀫𑀸𑀴𑀺𑀦𑁆𑀥𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀽𑀫𑀺. 𑀢𑀢𑀼𑀧𑀭𑀺 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀽𑀫𑀺. 𑀢𑀢𑀼𑀧𑀭𑀺 𑀤𑁆𑀯𑁂𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑀁 𑀞𑀸𑀦𑀁 𑀬𑀸𑀫𑀸𑀦𑀁 𑀪𑀽𑀫𑀺. 𑀇𑀫𑀺𑀦𑀸 𑀦𑀬𑁂𑀦 𑀬𑀸𑀯 𑀯𑀲𑀯𑀢𑁆𑀢𑀺𑀪𑀽𑀫𑀺 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑁂 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯 𑀯𑀲𑀯𑀢𑁆𑀢𑀺𑀪𑀽𑀫𑀺 𑀤𑁆𑀯𑁂𑀲𑀳𑀲𑁆𑀲𑀸𑀦𑀺𑀧𑀜𑁆𑀘𑀦 𑀳𑀼𑀢𑀸𑀦𑀺 𑀤𑀼𑀯𑁂𑀲𑀢𑀲𑀳𑀲𑁆𑀲𑀸𑀦𑀺 𑀬𑁄𑀚𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺.

‘‘𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯, 𑀪𑀽𑀫𑀺 𑀯𑀲𑀯𑀢𑁆𑀢𑀦𑁆𑀢𑀭𑀸;

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘𑀦𑀳𑀼𑀢𑀫𑁂𑀯 𑀘.

𑀤𑁆𑀯𑁂𑀲𑀳𑀲𑁆𑀲𑀜𑁆𑀘 𑀫𑀥𑀺𑀓𑀁, 𑀬𑁄𑀚𑀦𑀸𑀦𑀁 𑀧𑀫𑀸𑀡𑀢𑁄;

𑀕𑀡𑀦𑀸 𑀦𑀸𑀫 𑀪𑀽𑀫𑀻𑀲𑀼, 𑀲𑀗𑁆𑀔𑁆𑀬𑀸 𑀏𑀯𑀁 𑀧𑀓𑀸𑀲𑀺𑀢𑀸’’𑀢𑀺.

𑀢𑀢𑀼𑀧𑀭𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀬𑁄 𑀢𑀬𑁄 𑀩𑁆𑀭𑀳𑁆𑀫𑀼𑀦𑁄 𑀧𑀜𑁆𑀘𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁂 𑀲𑀫𑀢𑀮𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀤𑀼𑀢𑀺𑀬𑀢𑀢𑀺𑀬𑀪𑀽𑀫𑀻𑀩𑁆𑀭𑀳𑁆𑀫𑀼𑀦𑁄𑀧𑀺 𑀢𑀧𑁆𑀧𑀫𑀸𑀡𑁂𑀲𑀼 𑀲𑀫𑀢𑀮𑁂𑀲𑀼 𑀢𑀺𑀝𑁆𑀞𑀦𑁆𑀢𑀺. 𑀘𑀢𑀼𑀢𑁆𑀣𑀪𑀽𑀫𑀺𑀬𑀁 𑀧𑀦 𑀯𑁂𑀳𑀧𑁆𑀨𑀮𑀅𑀲𑀜𑁆𑀜𑀲𑀢𑁆𑀢𑀸 𑀢𑀧𑁆𑀧𑀫𑀸𑀡𑁂 𑀲𑀫𑀢𑀮𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀢𑀢𑀼𑀧𑀭𑀺𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑁄 𑀢𑀁𑀢𑀁 𑀧𑀫𑀸𑀡𑁂 𑀞𑀸𑀦𑁂 𑀉𑀧𑀭𑀽𑀧𑀭𑀺 𑀢𑀺𑀝𑁆𑀞𑀦𑁆𑀢𑀺. 𑀘𑀢𑀲𑁆𑀲𑁄𑀧𑀺 𑀅𑀭𑀽𑀧𑀪𑀽𑀫𑀺𑀬𑁄 𑀢𑀧𑁆𑀧𑀫𑀸𑀡𑁂 𑀞𑀸𑀦𑁂 𑀉𑀧𑀭𑀽𑀧𑀭𑀺 𑀢𑀺𑀝𑁆𑀞𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀬𑁄𑀚𑀦𑀸𑀦𑀁 𑀲𑀢𑁆𑀢𑀓𑁄𑀝𑀺 𑀘 𑀅𑀝𑁆𑀞𑀸𑀭𑀲𑀮𑀓𑁆𑀔𑀸 𑀘 𑀧𑀜𑁆𑀘𑀦𑀳𑀼𑀢𑀸𑀦𑀺 𑀘 𑀙𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑀧𑁄𑀭𑀸𑀡𑁂𑀳𑀺.

‘‘𑀳𑁂𑀝𑁆𑀞𑀺𑀫𑀸 𑀩𑁆𑀭𑀳𑁆𑀫𑀮𑁄𑀓𑀫𑁆𑀳𑀸, 𑀧𑀢𑀺𑀢𑀸 𑀫𑀳𑀢𑀻 𑀲𑀺𑀮𑀸;

𑀅𑀳𑁄𑀭𑀢𑁆𑀢𑁂𑀦 𑀏𑀓𑁂𑀦, 𑀉𑀕𑁆𑀕𑀢𑀸 𑀅𑀝𑁆𑀞𑀢𑀸𑀮𑀻𑀲𑀁.

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀘𑀸𑀢𑀼𑀫𑀸𑀲𑁂𑀳𑀺 𑀪𑀽𑀫𑀺;

𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦, 𑀲𑀸𑀬𑀁 𑀳𑁂𑀝𑁆𑀞𑀺𑀫𑀪𑀽𑀫𑀺.

𑀇𑀢𑁄 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢𑀧𑀜𑁆𑀜𑀸𑀲 𑀘𑀸𑀧𑀭𑀁;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀉𑀩𑁆𑀩𑁂𑀥𑁂𑀦 𑀧𑀓𑀸𑀲𑀺𑀢𑀸.

𑀬𑁄𑀚𑀦𑁂𑀲𑀼𑀧𑀺 𑀯𑀼𑀢𑁆𑀢𑁂𑀲𑀼, 𑀳𑀺𑀢𑁆𑀯𑀸 𑀓𑀸𑀫𑀧𑁆𑀧𑀫𑀸𑀡𑀓𑀁;

𑀲𑁂𑀲𑀸𑀦𑀺 𑀯𑀲𑀯𑀢𑁆𑀢𑀻𑀦𑀁, 𑀧𑀸𑀭𑀺𑀲𑀚𑁆𑀚𑀸𑀦 𑀫𑀦𑁆𑀢𑀭𑀁.

𑀢𑀜𑁆𑀘 𑀧𑀜𑁆𑀘𑀳𑀺 𑀧𑀜𑁆𑀜𑀸𑀲, 𑀲𑀢𑀲𑀳𑀲𑁆𑀲𑀸𑀦𑀺 𑀘𑀸𑀧𑀭𑀁;

𑀅𑀝𑁆𑀞 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀬𑁄𑀚𑀦𑀸𑀦𑀺 𑀧𑀯𑀼𑀘𑁆𑀘𑀭𑁂.

𑀇𑀢𑁄 𑀧𑀭𑀸𑀲𑀼 𑀲𑀩𑁆𑀩𑀸𑀲𑀼, 𑀩𑁆𑀭𑀳𑁆𑀫𑀪𑀽𑀫𑀻𑀲𑀼 𑀬𑁄𑀚𑀦𑀸;

𑀢𑀧𑁆𑀧𑀫𑀸𑀡𑀸𑀯 𑀤𑀝𑁆𑀞𑀩𑁆𑀩𑀸, 𑀦𑀬𑀕𑁆𑀕𑀸𑀳𑁂𑀦 𑀥𑀻𑀫𑀢𑀸.

𑀪𑀽𑀫𑀺𑀢𑁄 𑀆𑀪𑀯𑀕𑁆𑀕𑀫𑁆𑀳𑀸, 𑀲𑀢𑁆𑀢𑀓𑁄𑀝𑀺 𑀅𑀝𑁆𑀞𑀸𑀭𑀲;

𑀮𑀓𑁆𑀔𑀸 𑀧𑀜𑁆𑀘 𑀦𑀳𑀼𑀢𑀸𑀦𑀺, 𑀙𑀲𑀳𑀲𑁆𑀲𑀸𑀦𑀺 𑀲𑀩𑁆𑀩𑀤𑀸𑀢𑀺.

𑀏𑀲𑀸 𑀘 𑀯𑀺𑀘𑀸𑀭𑀡𑀸 𑀝𑀻𑀓𑀸 𑀘𑀭𑀺𑀬𑀫𑀢𑁂𑀦 𑀓𑀢𑀸;

𑀇𑀤𑀫𑁂𑀯 𑀲𑀦𑁆𑀥𑀸𑀬, 𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸.

𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺, 𑀯𑀺𑀭𑁄𑀘𑀫𑀸𑀦𑀸 𑀬𑀸𑀯𑀢𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁂, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺.

𑀯𑀼𑀢𑁆𑀢𑀁. 𑀏𑀢𑁆𑀣𑀦𑁆𑀢𑀭𑁂 𑀲𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀅𑀧𑀼𑀩𑁆𑀩𑀁 𑀓𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦 𑀯𑀓𑁆𑀔𑀸𑀫 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀘 𑀲𑀩𑁆𑀩𑀜𑁆𑀜𑀼𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀤𑀼𑀮𑁆𑀮𑀪𑁄, 𑀢𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀅𑀦𑀼𑀩𑀼𑀤𑁆𑀥𑁄, 𑀲𑀸𑀯𑀓𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀢𑀢𑁆𑀣 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀧𑀲𑀁𑀲𑀦𑁆𑀢𑁂𑀦 𑀘 𑀦 𑀲𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀦𑀸𑀫, 𑀩𑀼𑀤𑁆𑀥𑁄𑀦𑀸𑀫𑁂𑀲 𑀘𑀼𑀦𑁆𑀤𑀸𑀢𑀺 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀼𑀤𑁆𑀥𑀪𑀸𑀯𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀘.

𑀥𑀫𑁆𑀫𑀓𑀸𑀬𑁄 𑀬𑀢𑁄 𑀲𑀢𑁆𑀣𑀸, 𑀥𑀫𑁆𑀫𑁄 𑀲𑀢𑁆𑀣𑀼𑀓𑀸𑀬𑁄 𑀫𑀢𑁄;

𑀥𑀫𑁆𑀫𑀸𑀲𑀺𑀓𑁄𑀲𑁄 𑀲𑀗𑁆𑀖𑁄 𑀘, 𑀲𑀢𑁆𑀣𑀼𑀲𑀗𑁆𑀔𑁆𑀬𑀫𑁆𑀧𑀺 𑀕𑀘𑁆𑀙𑀢𑀻𑀢𑀺.

𑀯𑀼𑀢𑁆𑀢𑁂 𑀧𑀼𑀣𑀼𑀚𑁆𑀚𑀦𑁄𑀧𑀺 𑀉𑀧𑀘𑀸𑀭𑀯𑀲𑁂𑀦 𑀯𑀸𑀘𑀦𑀸𑀫𑀕𑁆𑀕𑀲𑁆𑀲 𑀩𑁄𑀥𑀢𑁆𑀢𑀸 𑀅𑀦𑀼𑀩𑀼𑀤𑁆𑀥𑁄 𑀦𑀸𑀫. 𑀅𑀭𑀺𑀬𑀲𑀸𑀯𑀓𑁄 𑀧𑀦 𑀧𑀭𑀢𑁄 𑀬𑁄𑀲𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀩𑀼𑀚𑁆𑀛𑀦𑀫𑀢𑁆𑀢𑀫𑁂𑀯 𑀯𑀸𑀢𑀺 𑀯𑀘𑀦𑀢𑁆𑀣𑁂𑀦 𑀩𑀼𑀚𑁆𑀛𑀦𑀲𑀪𑀸𑀯𑀢𑁆𑀢𑀸 𑀲𑀸𑀯𑀓𑀩𑀼𑀤𑁆𑀥𑁄 𑀦𑀸𑀫. 𑀬𑁄 𑀧𑀦 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀅𑀦𑀜𑁆𑀜𑀩𑁄𑀥𑀓𑁄 𑀳𑀼𑀢𑁆𑀯𑀸 𑀲𑀸𑀫𑀁 𑀩𑀼𑀚𑁆𑀛𑀦𑀢𑁆𑀣𑁂𑀦 𑀧𑀘𑁆𑀘𑁂𑀓𑀩𑀼𑀚𑁆𑀛𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀲𑀫𑁆𑀩𑀼𑀤𑁆𑀥𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀬𑁄 𑀧𑀦 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑁆𑀧𑀪𑁂𑀤𑀁 𑀲𑀓𑀮𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀯𑀲𑁂𑀦 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀲𑀬𑀁 𑀧𑀘𑀺𑀢𑀼𑀧𑀸𑀭𑀫𑀺𑀢𑀸𑀲𑀬𑀫𑁆𑀪𑀽𑀢𑁂𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀬𑀫𑁂𑀯 𑀅𑀦𑀜𑁆𑀜𑀩𑁄𑀥𑀺𑀢𑁄 𑀳𑀼𑀢𑁆𑀯𑀸 𑀲𑀯𑀸𑀲𑀦𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀁 𑀯𑀺𑀕𑀢𑁄 𑀤𑀺𑀦𑀓𑀭𑀓𑀺𑀭𑀡𑀲𑀫𑀸𑀕𑀫𑁂𑀦 𑀧𑀭𑀫𑀭𑀼𑀘𑀺𑀭𑀲𑀺𑀭𑀻𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀫𑀸𑀕𑀫𑁂𑀦 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀺 𑀅𑀩𑀼𑀚𑁆𑀛𑀺 𑀅𑀜𑁆𑀜𑀸𑀲𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀪𑀕𑀯𑀸, 𑀲𑁄𑀯 𑀮𑁄𑀓𑁂 𑀤𑀼𑀮𑁆𑀮𑀪𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑀢𑀲𑀳𑀲𑁆𑀲𑀸𑀤𑀺𑀯𑀲𑁂𑀦 𑀏𑀓𑀢𑁄 𑀧𑀯𑀢𑁆𑀢𑀢𑁆𑀢𑀸 𑀢𑁂 𑀤𑀼𑀮𑁆𑀮𑀪𑀸𑀧𑀺 𑀅𑀦𑀘𑁆𑀙𑀭𑀺𑀬𑀚𑀸𑀢𑀢𑁆𑀢𑀸 𑀧𑀭𑁂𑀲𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑀢𑁆𑀢𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀮𑁄𑀓𑁂 𑀤𑀼𑀮𑁆𑀮𑀪𑁄, 𑀅𑀬𑀁 𑀮𑁄𑀓𑀲𑀫𑁆𑀧𑀢𑁆𑀢𑀺𑀯𑀺𑀘𑀸𑀭𑀡𑀸.

𑀓𑀣𑀁 𑀮𑁄𑀓𑀲𑁆𑀲 𑀯𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑀢𑀣𑀸 𑀳𑁂𑀲 𑀮𑁄𑀓𑁄 𑀯𑀺𑀦𑀲𑁆𑀲𑀫𑀸𑀦𑁄 𑀢𑁂𑀚𑁂𑀦𑀧𑀺 𑀆𑀧𑁂𑀦𑀧𑀺 𑀯𑀸𑀬𑀼𑀦𑀸𑀧𑀺 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁄𑀧𑀺 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁 𑀫𑀢𑁂𑀦 𑀫𑀺𑀘𑁆𑀙𑀸𑀕𑀸𑀳𑀢𑁆𑀢𑀸 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀦𑀸 𑀫𑀺𑀦𑀺𑀢𑁂𑀧𑀺 𑀅𑀲𑀫𑀸𑀦𑀁 𑀲𑀁𑀯𑀝𑁆𑀝𑀲𑀻𑀫𑀸𑀧𑀺 𑀯𑀺𑀭𑀼𑀤𑁆𑀥𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀸𑀤𑀁 𑀅𑀧𑀦𑁂𑀢𑁆𑀯𑀸 𑀕𑀦𑁆𑀣𑀢𑁄 𑀲𑀫𑀸𑀦𑁂𑀢𑁆𑀯𑀸 𑀯𑀓𑁆𑀔𑀸𑀫. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄, 𑀯𑀝𑁆𑀝𑀝𑁆𑀞𑀸𑀬𑀻𑀢𑀺. 𑀢𑀬𑁄 𑀲𑀁𑀯𑀝𑁆𑀝𑀸 𑀆𑀧𑁄𑀲𑀁𑀯𑀝𑁆𑀝𑁄, 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀅𑀬𑀫𑁂𑀢𑁆𑀣 𑀉𑀤𑁆𑀤𑁂𑀲𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁄 𑀦𑀸𑀫 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄. 𑀢𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀧𑀺 𑀕𑀳𑀺𑀢𑁄 𑀳𑁄𑀢𑀺, 𑀢𑀁 𑀫𑀽𑀮𑀓𑀢𑁆𑀢𑀸. 𑀯𑀟𑁆𑀠𑀬𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄 𑀦𑀸𑀫. 𑀢𑁂𑀦 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀧𑀺 𑀕𑀳𑀺𑀢𑁄 𑀢𑀁 𑀫𑀽𑀮𑀓𑀢𑁆𑀢𑀸. 𑀢𑀢𑁆𑀣 𑀲𑀁𑀯𑀝𑁆𑀝𑁄𑀢𑀺 𑀯𑀺𑀦𑀸𑀲𑁄. 𑀬𑀤𑀸 𑀓𑀧𑁆𑀧𑁄 𑀯𑀺𑀦𑀲𑁆𑀲𑀫𑀸𑀦𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀅𑀕𑁆𑀕𑀺𑀦𑀸 𑀤𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀯𑀸𑀢𑁂𑀦 𑀲𑀁𑀯𑀝𑁆𑀝𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀚𑀸𑀢𑀺𑀔𑁂𑀢𑁆𑀢 𑀆𑀡𑀸𑀔𑁂𑀢𑁆𑀢𑀯𑀺𑀲𑀬𑀔𑁂𑀢𑁆𑀢𑀯𑀲𑁂𑀦 𑀢𑀺𑀡𑁆𑀡𑀁 𑀩𑀼𑀤𑁆𑀥𑀔𑁂𑀢𑁆𑀢𑀸𑀦𑀁 𑀆𑀡𑀸𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀯𑀺𑀦𑀝𑁆𑀞𑁂 𑀚𑀸𑀢𑀺𑀔𑁂𑀢𑁆𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑁂𑀯. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺. 𑀢𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀸𑀤𑀺𑀓𑀸𑀮𑁂𑀲𑀼𑀧𑀺 𑀓𑀫𑁆𑀧𑀢𑀺. 𑀆𑀡𑀸𑀔𑁂𑀢𑁆𑀢𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁. 𑀬𑀢𑁆𑀣 𑀭𑀢𑀦𑀲𑀼𑀢𑁆𑀢𑀁 𑀔𑀦𑁆𑀥𑀧𑀭𑀺𑀢𑁆𑀢𑀁 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀁 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀆𑀡𑀸𑀔𑁂𑀢𑁆𑀢𑀸𑀯𑀲𑁂𑀦 𑀤𑁆𑀯𑁂 𑀔𑁂𑀢𑁆𑀢𑀸𑀦𑀺 𑀏𑀓𑀢𑁄 𑀯𑀺𑀦𑀲𑁆𑀲𑀦𑁆𑀢𑀺. 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄 𑀲𑀡𑁆𑀞𑀳𑀢𑀺. 𑀢𑀲𑁆𑀲 𑀯𑀺𑀦𑀸𑀲𑁄𑀘 𑀲𑀡𑁆𑀞𑀳𑀦𑁆𑀢𑀜𑁆𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀧𑁆𑀧𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀢𑀤𑀸 𑀆𑀤𑀺𑀢𑁄 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀏𑀓𑀫𑁂𑀖𑀯𑀲𑁆𑀲𑀁 𑀯𑀲𑀺, 𑀢𑀼𑀝𑁆𑀞𑀸 𑀫𑀦𑀼𑀲𑁆𑀲𑀸 𑀩𑀻𑀚𑀸𑀦𑀺 𑀯𑀧𑁆𑀧𑁂𑀦𑁆𑀢𑀺, 𑀲𑀲𑁆𑀲𑁂𑀲𑀼 𑀕𑁄𑀔𑀸𑀬𑀺𑀢𑀫𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀕𑀤𑁆𑀭𑀪𑀭𑀯𑀁 𑀯𑀺𑀭𑀯𑀦𑁆𑀢𑁄 𑀏𑀓𑀩𑀺𑀦𑁆𑀤𑀼𑀧𑀺 𑀦 𑀧𑀢𑀢𑀺. 𑀬𑀤𑀸 𑀧𑀘𑁆𑀙𑀺𑀦𑁆𑀦𑀫𑁂𑀯 𑀳𑁄𑀢𑀺 𑀢𑀤𑀸 𑀯𑀲𑁆𑀲𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑁂𑀲𑀼 𑀩𑁆𑀭𑀳𑁆𑀫𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀺𑀦𑁄𑀧𑀺 𑀤𑁂𑀯𑀢𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀫𑀘𑁆𑀙𑀓𑀘𑁆𑀙𑀧𑀸𑀤𑀺 𑀉𑀤𑀓𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀓𑀸𑀮𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺 𑀲𑀢𑁆𑀢𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀳𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀉𑀓𑁆𑀔𑀺𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀫𑀼𑀜𑁆𑀘𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀫𑀸𑀭𑀺𑀲𑀸 𑀪𑁄 𑀇𑀢𑁄 𑀯𑀲𑁆𑀲𑀲𑀢 𑀲𑀳𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺 𑀫𑀳𑀸𑀲𑀫𑀼𑀤𑁆𑀤𑁄𑀧𑀺𑀲𑀼𑀲𑁆𑀲𑀺𑀲𑁆𑀲𑀢𑀺 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀟𑀬𑁆𑀳𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺 𑀬𑀸𑀯𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣. 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀘 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀲𑀁𑀯𑁂𑀕𑀚𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀤𑀼𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀲𑀼𑀥𑀸𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸𑀬𑁄 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺, 𑀏𑀯𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁂 𑀧𑀦 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑁂𑀲𑀁 𑀓𑀫𑁆𑀫𑀲𑁆𑀲 𑀅𑀧𑀭𑀺𑀓𑁆𑀔𑀬𑀸 𑀅𑀜𑁆𑀜𑀘𑀓𑁆𑀓𑀯𑀸𑀴𑁂𑀲𑀼 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀁 𑀯𑀺𑀧𑀸𑀓𑀫𑀦𑀼𑀪𑁄𑀦𑁆𑀢𑀺. 𑀢𑁂𑀦𑁂𑀯 𑀅𑀳𑁄𑀲𑀺𑀓𑀫𑁆𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀺, 𑀬𑀢𑁄 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑁄𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀺 𑀧𑀭𑀫𑀸𑀦𑀺 𑀪𑀺𑀓𑁆𑀔𑀯𑁂 𑀯𑀚𑁆𑀚𑀸𑀦𑀻’’𑀢𑀺. ‘‘𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀭𑀳𑀺𑀢𑁄𑀧𑀺 𑀲𑀁𑀲𑀭𑀦𑁆𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀯𑀲𑁂𑀦 𑀬𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀺𑀭𑀸𑀚𑁂𑀢𑁆𑀯𑀸 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀏𑀯𑀁 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀲𑁆𑀲𑀼𑀧𑀘𑁆𑀙𑁂𑀤𑀢𑁄 𑀧𑀦 𑀉𑀤𑁆𑀥𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀧𑀸𑀢𑀼𑀪𑀽𑀢𑁂 𑀘 𑀢𑀲𑁆𑀫𑀺𑀁 𑀦𑁂𑀯 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄, 𑀦 𑀤𑀺𑀯𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀓𑁄 𑀲𑀽𑀭𑀺𑀬𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀅𑀯𑀺𑀘𑁆𑀙𑀺𑀦𑁆𑀦𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀯 𑀮𑁄𑀓𑁄 𑀳𑁄𑀢𑀺.

𑀧𑀓𑀢𑀺𑀲𑀽𑀭𑀺𑀬𑁂 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀣𑀺 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀧𑀦 𑀦𑀢𑁆𑀣𑀺. 𑀧𑀓𑀢𑀺𑀲𑀽𑀭𑀺𑀬𑁄𑀪𑀸𑀲𑁂𑀦 𑀆𑀓𑀸𑀲𑁂 𑀯𑀮𑀸𑀳𑀓𑀸 𑀥𑀽𑀫𑀲𑀺𑀔𑀸𑀧𑀺 𑀘𑀭𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁄𑀪𑀸𑀲𑁂𑀦 𑀯𑀺𑀕𑀢𑀥𑀽𑀫𑀯𑀮𑀸𑀳𑀓𑀁 𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀦𑀺𑀫𑁆𑀫𑀮𑀁 𑀳𑁄𑀢𑀺 𑀦𑀪𑀁 𑀞𑀧𑁂𑀢𑁆𑀯𑀸 𑀕𑀗𑁆𑀕𑀸, 𑀬𑀫𑀼𑀦𑀸, 𑀲𑀭𑀪𑀽, 𑀅𑀘𑀺𑀭𑀯𑀢𑀻, 𑀫𑀳𑀻𑀢𑀺, 𑀇𑀫𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀲𑀢𑀓𑀼𑀦𑁆𑀦𑀤𑀻𑀆𑀤𑀻𑀲𑀼 𑀉𑀤𑀓𑀁 𑀲𑀼𑀲𑁆𑀲𑀢𑀺 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺 𑀢𑀲𑁆𑀫𑀺𑀁 𑀧𑀸𑀢𑀼𑀪𑀽𑀢𑁂 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄𑀧𑀺 𑀲𑀼𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀳𑀺𑀫𑀯𑀢𑀻 𑀫𑀳𑀸𑀦𑀤𑀻𑀦𑀁 𑀧𑀪𑀯𑀸 𑀲𑀻𑀳𑀧𑀢𑀦𑁄, 𑀳𑀁𑀲𑀧𑀢𑀦𑁄, 𑀫𑀦𑁆𑀤𑀸𑀓𑀺𑀦𑀻, 𑀓𑀡𑁆𑀡𑀫𑀼𑀡𑁆𑀟𑀓𑁄, 𑀭𑀣𑀓𑀸𑀭𑀤𑀳𑁄, 𑀅𑀦𑁄𑀢𑀢𑁆𑀢𑀤𑀳𑁄, 𑀙𑀤𑁆𑀤𑀦𑁆𑀢𑀤𑀳𑁄, 𑀓𑀼𑀡𑀸𑀮𑀤𑀳𑁄𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀸𑀲𑀭𑀸 𑀲𑀼𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀧𑀜𑁆𑀘𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑁄 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀙𑀝𑁆𑀞𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀫𑀺𑀁 𑀧𑀸𑀢𑀼𑀪𑀸𑀯𑁂 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀥𑀽𑀫𑀁 𑀳𑁄𑀢𑀺, 𑀧𑀭𑀺𑀬𑀸𑀤𑀺𑀦𑁆𑀦𑀲𑀺𑀦𑁂𑀳𑀥𑀽𑀫𑁂𑀦 𑀬𑀣𑀸 𑀘 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀫𑁆𑀧𑀺. 𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀢𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀚𑀸𑀮𑀁 𑀳𑁄𑀢𑀺 𑀲𑀤𑁆𑀥𑀺𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀳𑀺 𑀬𑁄𑀚𑀦𑀲𑀢𑀺𑀓𑀸𑀤𑀺𑀪𑁂𑀤𑀸 𑀲𑀺𑀦𑁂𑀭𑀼𑀓𑀽𑀝𑀸𑀦𑀺 𑀧𑀮𑀼𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑀸𑀧𑀺 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀕𑀡𑁆𑀳𑀸𑀢𑀺, 𑀢𑀢𑁆𑀣 𑀓𑀦𑀓𑀯𑀺𑀫𑀸𑀦𑀭𑀢𑀦𑀯𑀺𑀫𑀸𑀦𑀸𑀦𑀺 𑀛𑀸𑀧𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀡𑁆𑀳𑀸𑀢𑀺 𑀏𑀢𑁂𑀦𑀽𑀧𑀸𑀬𑁂𑀦 𑀬𑀸𑀯 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀛𑀸𑀧𑁂𑀢𑁆𑀯𑀸 𑀆𑀪𑀲𑁆𑀲𑀭𑁂 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑀸 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦𑀦𑀺𑀩𑁆𑀩𑀸𑀬𑀺. 𑀲𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸 𑀧𑀦 𑀲𑀧𑁆𑀧𑀺𑀢𑁂𑀮𑀛𑀸𑀧𑀦𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀙𑀸𑀭𑀺𑀓𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀺. 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄. 𑀏𑀯𑀁 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯𑀚𑀸𑀮𑀧𑀭𑀺𑀘𑁆𑀙𑁂𑀤𑀸 𑀲𑀁𑀯𑀝𑁆𑀝𑁄 𑀦𑀸𑀫 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀅𑀣 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀁 𑀲𑀼𑀔𑀼𑀫𑀁 𑀯𑀲𑁆𑀲𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀓𑀼𑀫𑀼𑀤𑀦𑀸𑀴𑀬𑀝𑁆𑀞𑀺𑀫𑀼𑀲𑀮𑀢𑀸𑀮𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀫𑀸𑀡𑀸𑀳𑀺 𑀥𑀸𑀭𑀸𑀳𑀺 𑀯𑀲𑁆𑀲𑀦𑁆𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀟𑀟𑁆𑀠𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀘 𑀢𑀺𑀭𑀺𑀬𑀜𑁆𑀘 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀖𑀦𑀁 𑀓𑀭𑁄𑀢𑀺. 𑀧𑀭𑀺𑀯𑀝𑀼𑀫𑀁 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼𑀲𑀤𑀺𑀲𑀁. 𑀏𑀯𑀁 𑀅𑀕𑁆𑀕𑀺𑀚𑀸𑀮𑀦𑀺𑀩𑁆𑀩𑀸𑀬𑀦𑀢𑁄 𑀬𑀸𑀯 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀧𑀽𑀭𑀢𑁄 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫, 𑀤𑀼𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀓𑀣𑀁 𑀢𑀸𑀯 𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁 𑀯𑀸𑀢𑁄 𑀖𑀦𑀁 𑀓𑀭𑁄𑀢𑀻𑀢𑀺 𑀘𑁂. 𑀯𑀺𑀯𑀭𑀲𑀫𑁆𑀧𑀤𑀸𑀦𑀢𑁄 𑀢𑀁 𑀯𑀸 𑀢𑁂𑀦 𑀧𑀺𑀡𑁆𑀟𑀺𑀬𑀫𑀸𑀦𑀁 𑀖𑀦𑀁 𑀓𑀭𑀺𑀬𑀫𑀸𑀦𑀁 𑀧𑀭𑀺𑀓𑁆𑀔𑀬𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀮𑁄𑀓𑀝𑁆𑀞𑀸𑀦𑁂 𑀩𑁆𑀭𑀳𑁆𑀫𑀧𑀸𑀭𑀺 𑀲𑀚𑁆𑀚-𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀧𑀞𑀫𑀁 𑀧𑀸𑀢𑀼𑀪𑀯𑀢𑀺. 𑀢𑀢𑁄 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀘𑀢𑀼𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀝𑁆𑀞𑀸𑀦𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻, 𑀦𑀺𑀫𑁆𑀫𑀸𑀦𑀭𑀢𑀻, 𑀢𑀼𑀲𑀺𑀢𑀸, 𑀬𑀸𑀫𑀸𑀢𑀺 𑀘𑀢𑁆𑀢𑀸𑀭𑁄 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁄 𑀧𑀼𑀭𑀺𑀫𑀧𑀣𑀯𑀺𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑁂 𑀧𑀦 𑀉𑀤𑀓𑁂 𑀩𑀮𑀯𑀯𑀸𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀢𑀁 𑀧𑀺𑀤𑀳𑀺𑀢𑀤𑁆𑀯𑀸𑀭𑁂 𑀥𑀫𑀓𑀭𑀡𑁂 𑀞𑀺𑀢𑀉𑀤𑀓𑀫𑀺𑀯 𑀦𑀺𑀭𑀼𑀲𑁆𑀲𑀸𑀲𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀫𑀥𑀼𑀭𑁄𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀫𑀸𑀦𑀁 𑀉𑀧𑀭𑀺 𑀭𑀲𑀧𑀣𑀯𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀲𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸𑀘𑁂𑀯 𑀳𑁄𑀢𑀺 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸 𑀘, 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀉𑀧𑀭𑀺 𑀧𑀝𑀮𑀁 𑀯𑀺𑀬 𑀢𑀤𑀸 𑀘 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀧𑀞𑀫𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀦𑁆𑀢𑀺. ‘‘𑀧𑀼𑀜𑁆𑀜𑀓𑁆𑀔𑀬𑀸 𑀯𑀸’’𑀢𑀺 𑀇𑀫𑀺𑀦𑀸 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑀁 𑀅𑀧𑁆𑀧𑀢𑁆𑀯𑀸𑀯 𑀓𑀫𑁆𑀫𑀓𑁆𑀔𑀬𑁂𑀦 𑀫𑀭𑀡𑀁 𑀯𑀺𑀜𑁆𑀜𑀸𑀬𑀢𑀺. 𑀢𑁂 𑀳𑁄𑀦𑁆𑀢𑀺 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸. 𑀢𑁂 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀭𑀲𑀧𑀣𑀯𑀺𑀁 𑀲𑀸𑀬𑀺𑀢𑁆𑀯𑀸 𑀢𑀡𑁆𑀳𑀸𑀪𑀺𑀪𑀽𑀢𑀸 𑀆𑀮𑀼𑀧𑁆𑀧𑀓𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀺. 𑀅𑀣 𑀦𑁂𑀲𑀁 𑀲𑀬𑀁 𑀧𑀪𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀢𑁂 𑀅𑀦𑁆𑀥𑀓𑀸𑀭𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺. 𑀢𑀢𑁄 𑀦𑁂𑀲𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀧𑀡𑁆𑀡𑀸𑀲𑀬𑁄𑀚𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀸 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 ‘‘𑀆𑀮𑁄𑀓𑀁 𑀧𑀝𑀺𑀮𑀪𑀺𑀫𑁆𑀳𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑁄 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀲𑀽𑀭𑀺𑀬𑁄 𑀳𑁄𑀢𑀽’’𑀢𑀺 𑀲𑀽𑀭𑀺𑀬𑁄 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀅𑀣 𑀲𑀽𑀭𑀺𑀬𑁂 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 ‘‘𑀬𑀫𑁆𑀧𑀺 𑀆𑀮𑁄𑀓𑀁 𑀮𑀪𑀺𑀫𑁆𑀳𑀸, 𑀲𑁄𑀧𑀺 𑀦𑁄 𑀦𑀝𑁆𑀞𑁄’’𑀢𑀺 𑀧𑀼𑀦 𑀪𑀻𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀲𑀸𑀥𑀼𑀯𑀢𑀲𑁆𑀲 𑀅𑀜𑁆𑀜𑀁 𑀆𑀮𑁄𑀓𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀬 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀺𑀬 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀘𑀦𑁆𑀤𑁄 𑀳𑁄𑀢𑀽’’𑀢𑀺 𑀘𑀦𑁆𑀤𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀭𑀢𑁆𑀢𑀺𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀘 𑀫𑀸𑀲𑀤𑁆𑀥𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀦 𑀧𑀸𑀢𑀼𑀪𑀽𑀢𑀤𑀺𑀯𑀲𑁂𑀬𑁂𑀯 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂 𑀘 𑀔𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀣𑀁 𑀬𑀣𑀸𑀦𑀸𑀫 𑀓𑀗𑁆𑀕𑀼𑀪𑀢𑁆𑀢𑁂 𑀧𑀘𑁆𑀘𑀫𑀸𑀦𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀩𑀼𑀩𑁆𑀩𑀼𑀴𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀏𑀓𑁂 𑀧𑀤𑁂𑀲𑀸 𑀣𑀽𑀧𑀣𑀽𑀧𑀸 𑀳𑁄𑀦𑁆𑀢𑀺, 𑀏𑀓𑁂 𑀦𑀺𑀦𑁆𑀦𑀦𑀺𑀦𑁆𑀦𑀸, 𑀏𑀓𑁂 𑀲𑀫𑀲𑀫𑀸 𑀏𑀯𑀫𑁂𑀯 𑀣𑀽𑀧𑀣𑀽𑀧𑀝𑁆𑀞𑀸𑀦𑁂 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀦𑀺𑀦𑁆𑀦𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀫𑀼𑀤𑁆𑀤𑀸, 𑀲𑀫𑀲𑀫𑀝𑁆𑀞𑀸𑀦𑁂 𑀤𑀻𑀧𑀸𑀢𑀺 𑀏𑀯𑀁 𑀫𑀦𑀼𑀲𑁆𑀲𑀮𑁄𑀓𑁂 𑀲𑀡𑁆𑀞𑀺𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀢𑀸𑀯𑀢𑀺𑀁𑀲𑀸𑀢𑀺 𑀤𑁆𑀯𑁂 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀧𑀘𑁆𑀙𑀢𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀪𑀽𑀫𑀦𑀺𑀲𑁆𑀲𑀺𑀢𑀸 𑀦𑀸𑀫 𑀳𑁂𑀢𑁂 𑀤𑁆𑀯𑁂 𑀤𑁂𑀯𑀮𑁄𑀓𑀸. 𑀏𑀯𑀁 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀯𑀺𑀯𑀝𑁆𑀝𑁄 𑀦𑀸𑀫 𑀢𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀅𑀣 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀫𑁆𑀫𑁂𑀦 𑀏𑀓𑀘𑁆𑀘𑁂 𑀯𑀡𑁆𑀡𑀯𑀦𑁆𑀢𑁄, 𑀏𑀓𑀘𑁆𑀘𑁂 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺 𑀢𑀢𑁆𑀣 𑀯𑀡𑁆𑀡𑀯𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁂 𑀅𑀢𑀺𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀫𑀸𑀦𑀸𑀢𑀺𑀫𑀸𑀦𑀧𑀘𑁆𑀘𑀬𑀸 𑀲𑀸𑀧𑀺 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀢𑀺. 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀪𑀯𑀢𑀺 𑀅𑀣 𑀦𑁂𑀲𑀁 𑀢𑁂𑀦𑁂𑀯 𑀦𑀬𑁂𑀦 𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀢𑀸𑀮𑀢𑀸 𑀧𑀸𑀢𑀼𑀪𑀯𑀢𑀺, 𑀢𑁂𑀦𑁂𑀯 𑀦𑀬𑁂𑀦 𑀲𑀸𑀧𑀺 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 𑀧𑀸𑀢𑀼𑀪𑀯𑀢𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀤𑁆𑀥𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀧𑁆𑀨𑀮𑁄. 𑀢𑀢𑁄 𑀦𑁂𑀲𑀁 𑀪𑀸𑀚𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑁂 𑀲𑀸𑀮𑀻 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀸 𑀞𑀧𑁂𑀦𑁆𑀢𑀺, 𑀲𑀬𑀫𑁂𑀯 𑀚𑀸𑀮𑀲𑀺𑀔𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑀢𑀺. 𑀲𑁄 𑀳𑁄𑀢𑀺 𑀑𑀤𑀦𑁄 𑀲𑀼𑀫𑀦𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄, 𑀦 𑀢𑀲𑁆𑀲 𑀲𑀽𑀧𑁂𑀦 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀯𑀸 𑀓𑀭𑀡𑀻𑀬𑀁 𑀅𑀢𑁆𑀣𑀺. 𑀬𑀁𑀬𑀁 𑀭𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁𑀢𑀁 𑀭𑀲𑁄𑀯 𑀳𑁄𑀢𑀺. 𑀢𑁂𑀲𑀁 𑀢𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀢𑀁 𑀢𑀢𑁄 𑀧𑀪𑀼𑀢𑀺 𑀫𑀼𑀢𑁆𑀢𑀓𑀭𑀻𑀲𑀁 𑀲𑀜𑁆𑀚𑀸𑀬𑀢𑀺. 𑀅𑀣 𑀦𑁂𑀲𑀁 𑀢𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀡𑀫𑀼𑀔𑀸𑀦𑀺 𑀧𑀪𑀺𑀚𑁆𑀚𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀪𑀸𑀯𑁄 𑀧𑀸𑀢𑀼𑀪𑀯𑀢𑀺. 𑀢𑀢𑁆𑀭𑀲𑀼𑀤𑀁 𑀇𑀢𑁆𑀣𑀻 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁄 𑀘 𑀇𑀢𑁆𑀣𑀺𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑀸 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺. 𑀢𑁂 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀬𑀫𑀸𑀦𑀸 𑀯𑀺𑀳𑁂𑀞𑀺𑀬𑀫𑀸𑀦𑀸 𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀅𑀕𑀸𑀭𑀸𑀦𑀺 𑀓𑀭𑁄𑀦𑁆𑀢𑀺.

𑀢𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀜𑁆𑀜𑀢𑀭𑀲𑁆𑀲 𑀅𑀮𑀲𑀚𑀸𑀢𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀓𑀡𑁄𑀧𑀺 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺, 𑀮𑀸𑀬𑀺𑀢𑀝𑁆𑀞𑀸𑀦𑀫𑁆𑀧𑀺 𑀦𑀧𑁆𑀧𑀝𑀺𑀯𑀺𑀭𑀽𑀳𑀢𑀺. 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀝𑁆𑀞𑀼𑀦𑀦𑁆𑀢𑀺 ‘‘𑀧𑀸𑀧𑀓𑀸 𑀯𑀢 𑀪𑁄 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀫𑀬𑀁 𑀧𑀼𑀩𑁆𑀩𑁂 𑀫𑀦𑁄𑀫𑀬𑀸 𑀅𑀳𑀼𑀫𑁆𑀳𑀸’’𑀢𑀺. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀭𑁂𑀢𑀩𑁆𑀩𑀁. 𑀢𑀢𑁄 𑀫𑀭𑀺𑀬𑀸𑀤𑀁 𑀞𑀧𑁂𑀦𑁆𑀢𑀺. 𑀅𑀣𑀜𑁆𑀜𑀢𑀭𑁄 𑀲𑀢𑁆𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀮𑁂𑀟𑁆𑀟𑀼𑀤𑀡𑁆𑀟𑁂𑀳𑀺 𑀧𑀳𑀭𑀦𑁆𑀢𑀺. 𑀢𑁂 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀓𑀮𑀳𑀫𑀼𑀲𑀸𑀯𑀸𑀤𑀤𑀡𑁆𑀟𑀤𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑀺, ‘‘𑀬𑀁𑀦𑀽𑀦 𑀫𑀬𑀁 𑀏𑀓𑀁 𑀲𑀢𑁆𑀢𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫, 𑀬𑁄 𑀦𑁄 𑀲𑀫𑁆𑀫𑀸 𑀔𑀺𑀬𑀺𑀢𑀩𑁆𑀩𑀁 𑀔𑀺𑀬𑁂𑀬𑁆𑀬, 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑁂𑀬𑁆𑀬, 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀫𑀬𑀁 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁂𑀲𑀼 𑀧𑀦 𑀲𑀢𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀢𑀸𑀯 𑀓𑀧𑁆𑀧𑁂 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀢𑁂𑀦 𑀲𑀫𑀬𑁂𑀦 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀪𑀺𑀭𑀽𑀧𑀢𑀭𑁄 𑀘 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀝𑀺𑀩𑀮𑁄 𑀦𑀺𑀕𑁆𑀕𑀳𑀧𑀕𑁆𑀕𑀳𑀁 𑀓𑀸𑀢𑀼𑀁 𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀦𑀺𑀁𑀲𑀼. 𑀲𑁄 𑀢𑁂𑀦 𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑁄𑀢𑀺𑀧𑀺 𑀫𑀳𑀸𑀲𑀫𑁆𑀫𑀢𑁄, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑀢𑁆𑀢𑀺𑀬𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑁂𑀲𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸𑀢𑀺, 𑀢𑀻𑀳𑀺 𑀦𑀸𑀫𑁂𑀳𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀬𑀜𑁆𑀳𑀺 𑀮𑁄𑀓𑁂 𑀅𑀘𑁆𑀙𑀭𑀺𑀬𑀁 𑀞𑀸𑀦𑀁 𑀩𑁄𑀥𑀺𑀲𑀢𑁆𑀢𑁄𑀯 𑀢𑀢𑁆𑀣 𑀆𑀤𑀺 𑀧𑀼𑀭𑀺𑀲𑁄𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀔𑀢𑁆𑀢𑀺𑀬𑀫𑀡𑁆𑀟𑀮𑁂 𑀲𑀡𑁆𑀞𑀺𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀸𑀤𑀬𑁄𑀧𑀺 𑀯𑀡𑁆𑀡𑀸 𑀲𑀡𑁆𑀞𑀳𑀺𑀁𑀲𑀼. 𑀏𑀯𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼 𑀪𑀸𑀯𑀢𑁄 𑀬𑀸𑀯 𑀧𑀼𑀦 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄, 𑀇𑀤𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫 𑀘𑀢𑀼𑀢𑁆𑀣𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑀫𑁂𑀖𑁄 𑀚𑀸𑀮𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀁𑀯𑀝𑁆𑀝𑁄𑀢𑀺 𑀚𑀸𑀮𑀸 𑀫𑁂𑀖𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀫𑁂𑀖𑀸 𑀲𑀽𑀭𑀺𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀺𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀽𑀭𑀺𑀬𑀸 𑀫𑁂𑀖𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀢𑁆𑀢𑀸𑀭𑀺 𑀇𑀫𑀸𑀦𑀺 𑀓𑀧𑁆𑀧𑀸𑀦𑀺 𑀫𑀳𑀸𑀓𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀓𑀧𑁆𑀧𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀼𑀤𑁆𑀥𑀸𑀤𑀬𑁄𑀢𑀺. 𑀢𑀣𑀸 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀅𑀲𑀗𑁆𑀔𑁆𑀬𑀬𑁆𑀬𑀓𑀧𑁆𑀧𑁂 𑀩𑀼𑀤𑁆𑀥𑀧𑀘𑁆𑀘𑁂𑀓 𑀩𑀼𑀤𑁆𑀥𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂𑀲𑀼. 𑀢𑀜𑁆𑀘 𑀔𑁄 𑀅𑀲𑀼𑀜𑁆𑀜𑀓𑀧𑁆𑀧𑁂𑀬𑁂𑀯, 𑀦 𑀲𑀼𑀜𑁆𑀜𑀓𑀧𑁆𑀧𑁂. 𑀢𑀢𑁆𑀣 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀻𑀳𑀺 𑀧𑀼𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑁂𑀳𑀺 𑀅𑀲𑀼𑀜𑁆𑀜𑀢𑁆𑀢𑀸 𑀅𑀲𑀼𑀜𑁆𑀜𑀓𑀧𑁆𑀧𑁄 𑀦𑀸𑀫. 𑀢𑀩𑁆𑀩𑀺𑀕𑀫𑁂𑀦 𑀲𑀼𑀜𑁆𑀜𑀓𑀧𑁆𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼𑀧𑀺 𑀅𑀲𑀼𑀜𑁆𑀜𑀓𑀧𑁆𑀧𑁄 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀲𑀸𑀭𑀓𑀧𑁆𑀧𑁄, 𑀫𑀡𑁆𑀟𑀓𑀧𑁆𑀧𑁄, 𑀯𑀭𑀓𑀧𑁆𑀧𑁄, 𑀲𑀸𑀭𑀫𑀡𑁆𑀟𑀓𑀧𑁆𑀧𑁄, 𑀪𑀤𑁆𑀤𑀓𑀧𑁆𑀧𑁄𑀢𑀺, 𑀢𑁂𑀲𑀼 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀲𑀸𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀯𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀲𑀸𑀭𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀪𑀤𑁆𑀤𑀓𑀧𑁆𑀧𑁄𑀦𑀸𑀫. 𑀇𑀫𑀸𑀦𑀺 𑀧𑀜𑁆𑀘𑀓𑀧𑁆𑀧𑀸𑀦𑀺𑀬𑁂𑀯 𑀲𑀳𑁂𑀯 𑀲𑀫𑁄𑀥𑀸𑀦𑁂𑀢𑁆𑀯𑀸 𑀚𑀸𑀢𑀢𑁆𑀢𑀓𑀻𑀲𑁄𑀢𑀢𑁆𑀢𑀓𑀺𑀬𑀸 𑀦𑀺𑀤𑀸𑀦𑁂.

‘‘𑀦𑀦𑁆𑀤𑁄 𑀲𑀼𑀦𑀦𑁆𑀤𑁄 𑀧𑀣𑀯𑀻, 𑀫𑀡𑁆𑀟𑁄 𑀥𑀭𑀡𑀻 𑀲𑀸𑀕𑀭𑁄;

𑀧𑀼𑀡𑁆𑀟𑀭𑀻𑀓𑁄 𑀇𑀫𑁂 𑀲𑀢𑁆𑀢, 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀧𑀓𑀸𑀲𑀺𑀢𑀸.

𑀧𑀜𑁆𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀳𑁄𑀦𑁆𑀢𑀺 𑀦𑀦𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀦𑀯 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀼𑀦𑀦𑁆𑀤𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀧𑀣𑀯𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀏𑀓𑀸𑀤𑀲 𑀲𑀳𑀲𑁆𑀲𑀸𑀦𑀺, 𑀢𑀫𑁆𑀳𑀺 𑀫𑀡𑁆𑀟𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀯𑀻𑀲𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀥𑀭𑀡𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀢𑀺𑀁𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀸𑀕𑀭𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀧𑀼𑀡𑁆𑀟𑀭𑀻𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀲𑀢𑁆𑀢𑀲𑀼, 𑀏𑀢𑁆𑀢𑀓𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀏𑀓𑀁𑀲𑀢𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀘 𑀲𑀳𑀲𑁆𑀲𑀜𑁆𑀘;

𑀲𑁂𑀲𑀸 𑀧𑀜𑁆𑀘𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀫𑀡𑁆𑀟𑀺𑀢𑀸’’𑀢𑀺.

𑀯𑀼𑀢𑁆𑀢𑀁. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁.

‘‘𑀪𑀤𑁆𑀤𑁄 𑀲𑀩𑁆𑀩𑀨𑀼𑀮𑁆𑀮𑁄, 𑀲𑀩𑁆𑀩𑀭𑀢𑀦𑁄 𑀉𑀲𑀪𑀓𑁆𑀔𑀦𑁆𑀥𑁄;

𑀫𑀸𑀦𑀺𑀢𑀪𑀤𑁆𑀤𑁄 𑀘 𑀧𑀤𑀼𑀫𑁄, 𑀉𑀲𑀪𑀓𑁆𑀔𑀦𑁆𑀢𑀼𑀢𑁆𑀢𑀫𑁂𑀯 𑀘;

𑀲𑀩𑁆𑀩𑀪𑀸𑀲𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄, 𑀦𑀯𑀫𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀡𑁆𑀡𑀸𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀪𑀤𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀲𑀝𑁆𑀞𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀨𑀼𑀮𑁆𑀮𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀲𑀢𑁆𑀢𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀭𑀢𑀦𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀉𑀲𑀪𑀓𑁆𑀔𑀦𑁆𑀥𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀦𑀯𑀼𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀫𑀸𑀦𑀺𑀢𑀪𑀤𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀯𑀻𑀲𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀧𑀤𑀼𑀫𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀉𑀲𑀪𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀧𑀜𑁆𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀔𑀦𑁆𑀢𑀼𑀢𑁆𑀢𑀫𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑁆𑀯𑁂 𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀪𑀸𑀲𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀗𑁆𑀔𑁆𑀬𑁂𑀬𑁂 𑀦𑀯𑀲𑁆𑀫𑀺𑀁, 𑀏𑀢𑁆𑀢𑀓𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢𑀸𑀲𑀻𑀢𑀺𑀲𑀳𑀲𑁆𑀲𑀜𑁆𑀘;

𑀕𑀡𑀦𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀁, 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀫𑀡𑁆𑀟𑀺𑀢𑀸’’𑀢𑀺.

𑀢𑁂 𑀲𑀩𑁆𑀩𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀬𑀸𑀯 𑀅𑀭𑀺𑀫𑁂𑀢𑁆𑀢𑁂𑀬𑁆𑀬𑀸 𑀲𑀫𑁄𑀥𑀸𑀦𑁂𑀢𑁆𑀯𑀸

‘‘𑀲𑀫𑁆𑀩𑀼𑀤𑁆𑀥𑁂 𑀅𑀝𑁆𑀞𑀯𑀻𑀲𑀜𑁆𑀘, 𑀤𑁆𑀯𑀸𑀤𑀲𑀜𑁆𑀘 𑀲𑀳𑀲𑁆𑀲𑀓𑁂;

𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺, 𑀦𑀫𑀸𑀫𑀺 𑀲𑀺𑀭𑀲𑀸 𑀫𑀳𑀁;

𑀢𑁂𑀲𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀆𑀤𑀭𑁂𑀦 𑀦𑀫𑀸𑀫𑀳𑀁.

𑀦𑀫𑀓𑁆𑀓𑀸𑀭𑀸𑀦𑀼𑀪𑀸𑀯𑁂𑀦, 𑀳𑀺𑀢𑁆𑀯𑀸 𑀲𑀩𑁆𑀩𑁂 𑀉𑀧𑀤𑁆𑀤𑀯𑁂;

𑀅𑀦𑁂𑀓𑀅𑀦𑁆𑀢𑀭𑀸𑀬𑀸𑀧𑀺, 𑀯𑀺𑀦𑀲𑁆𑀲𑀦𑁆𑀢𑀼 𑀅𑀲𑁂𑀲𑀢𑁄’’𑀢𑀺.

𑀦𑀫𑀲𑁆𑀲𑀦𑀕𑀸𑀣𑀸 𑀧𑀯𑀢𑁆𑀢𑀸 𑀲𑀸 𑀊𑀦𑀲𑀗𑁆𑀔𑁆𑀬𑀸𑀯𑀲𑁂𑀦𑁂𑀯 𑀓𑀢𑀸𑀯 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀳𑀺 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀧𑁄𑀭𑀸𑀡𑀩𑁆𑀭𑀳𑁆𑀫𑀤𑁂𑀯𑀩𑀼𑀤𑁆𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀸 𑀫𑀦𑀲𑀸𑀯 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀲𑀢𑁆𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀩𑀼𑀤𑁆𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀸 𑀯𑀸𑀘𑀸𑀫𑀢𑁆𑀢𑁂𑀦 𑀦𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀯𑀲𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀢𑁄 𑀬𑀸𑀯 𑀓𑀓𑀼𑀲𑀦𑁆𑀥𑀸 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑀁. 𑀏𑀯𑀫𑀺𑀫𑁂𑀲𑀼 𑀯𑀻𑀲𑀢𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀩𑁆𑀭𑀳𑁆𑀫𑀤𑁂𑀯𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀩𑀼𑀤𑁆𑀥𑀸𑀦𑀫𑀦𑁆𑀢𑀭𑁂 𑀲𑀢𑁆𑀢 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑀲𑀢𑀲𑀳𑀲𑁆𑀲𑀜𑁆𑀘 𑀯𑀻𑀲𑀢𑀺 𑀲𑀳𑀲𑁆𑀲𑀜𑁆𑀘 𑀧𑀜𑁆𑀘𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀸𑀦𑀫𑀦𑁆𑀢𑀭𑁂 𑀦𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀢𑀻𑀡𑀺𑀲𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀢𑁄 𑀬𑀸𑀯 𑀫𑁂𑀢𑁆𑀢𑁂𑀬𑁆𑀬𑀸 𑀅𑀝𑁆𑀞𑀯𑀻𑀲𑀸𑀢𑀺 𑀲𑀩𑁆𑀩𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀜𑁆𑀘 𑀤𑁆𑀯𑀸𑀤𑀲𑀲𑀳𑀲𑁆𑀲𑀜𑁆𑀘 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺 𑀢𑀲𑁆𑀫𑀸 𑀊𑀦𑀲𑀗𑁆𑀔𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀧𑀼𑀡𑁆𑀡𑀲𑀗𑁆𑀔𑁆𑀬𑀸𑀯𑀲𑁂𑀦 𑀇𑀘𑁆𑀙𑀫𑀸𑀦𑁂𑀳𑀺 𑀘𑀺𑀦𑁆𑀢𑁂𑀢𑀩𑁆𑀩𑀸𑀯. 𑀏𑀲𑀸 𑀘 𑀲𑀗𑁆𑀔𑁆𑀬𑀸𑀯𑀺𑀘𑀸𑀭𑀡𑀸 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸𑀯.

𑀏𑀯𑀁 ‘‘𑀘𑀺𑀦𑁆𑀢𑀺𑀢𑀁 𑀲𑀢𑁆𑀢𑀲𑀗𑁆𑀔𑁆𑀬𑁂𑀬𑁆𑀬𑀁, 𑀦𑀯𑀲𑀗𑁆𑀔𑁆𑀬𑁂𑀬𑁆𑀬𑀯𑀸𑀘𑀓𑀁;

𑀓𑀸𑀬𑀯𑀸𑀘𑀸 𑀘𑀢𑀼𑀲𑀗𑁆𑀔𑁆𑀬𑁂𑀬𑁆𑀬𑀁, 𑀩𑀼𑀤𑁆𑀥𑀢𑁆𑀢𑀁𑀲𑀫𑀼𑀧𑀸𑀕𑀫𑀻’’𑀢𑀺.

𑀯𑀼𑀢𑁆𑀢𑁂𑀲𑀼 𑀯𑀻𑀲𑀢𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀧𑀯𑀢𑁆𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦𑁂𑀯 𑀓𑀢𑀸. 𑀅𑀢𑁆𑀣𑀢𑁄 𑀧𑀦 𑀲𑀸𑀭𑀓𑀧𑁆𑀧𑀫𑀡𑁆𑀟𑀓𑀧𑁆𑀧𑀯𑀭𑀓𑀧𑁆𑀧𑀲𑀸𑀭𑀫𑀡𑁆𑀟𑀓𑀧𑁆𑀧𑀪𑀤𑁆𑀤𑀓𑀧𑁆𑀧𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀦𑀺 𑀧𑀜𑁆𑀘𑀦𑀸𑀫𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀧𑁆𑀧𑁂𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀓𑀧𑁆𑀧𑁂 𑀧𑀦 𑀲𑀼𑀜𑁆𑀜𑀓𑀧𑁆𑀧𑁄𑀢𑁆𑀯𑁂𑀯 𑀦𑀸𑀫𑀁 𑀮𑀩𑁆𑀪𑀢𑀺 𑀢𑀣𑀸 𑀳𑀺 𑀓𑀧𑁆𑀧𑀲𑀡𑁆𑀞𑀳𑀦𑀓𑀸𑀮𑁂 𑀲𑀩𑁆𑀩𑀧𑀞𑀫𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑁂𑀬𑁂𑀯 𑀧𑀤𑀼𑀫𑀺𑀦𑀺𑀕𑀩𑁆𑀪𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀏𑀓𑁄 𑀧𑀤𑀼𑀫𑀺𑀦𑀺𑀕𑀩𑁆𑀪𑁄 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀳 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀼𑀦𑁄 𑀦𑁂𑀫𑀺𑀢𑁆𑀢𑀧𑀸𑀞𑀓𑀸 𑀅𑀭𑀳𑀦𑁆𑀢𑁄 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀞𑀧𑁂𑀦𑁆𑀢𑀺 ‘‘𑀬𑀤𑀸 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀧𑀤𑀼𑀫𑀺𑀦𑀺𑀕𑀩𑁆𑀪𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀜𑁆𑀘 𑀔𑁄 𑀏𑀓𑀲𑁆𑀫𑀺𑀁 𑀬𑁂𑀯 𑀦𑀸𑀴𑁂𑀓𑁂𑀓 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀓𑀧𑁆𑀧𑀲𑀡𑁆𑀞𑀳𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑁂𑀯 𑀇𑀫𑀸𑀦𑀺 𑀧𑀜𑁆𑀘 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 𑀩𑀼𑀤𑁆𑀥𑀸𑀤𑀬𑁄 𑀫𑀳𑁂𑀲𑀓𑁆𑀔𑀸 𑀧𑀼𑀜𑁆𑀜𑀯𑀦𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀆𑀬𑀼𑀓𑀧𑁆𑀧𑀦𑁆𑀢𑀭𑀓𑀧𑁆𑀧𑀸𑀦𑀺𑀧𑀺. 𑀢𑀢𑁆𑀣 𑀆𑀬𑀼𑀓𑀧𑁆𑀧𑁄 𑀦𑀸𑀫 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄. 𑀅𑀦𑁆𑀢𑀭𑀓𑀧𑁆𑀧𑁄 𑀦𑀸𑀫 𑀢𑀢𑁆𑀣 𑀲𑀢𑁆𑀣𑀭𑁄𑀕𑀤𑀼𑀩𑁆𑀪𑀺𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑀲𑀁𑀯𑀝𑁆𑀝𑀦𑁂𑀦 𑀩𑀳𑀽𑀲𑀼 𑀯𑀺𑀦𑀸𑀲𑀫𑀼𑀧𑀕𑀢𑁂𑀲𑀼 𑀅𑀯𑀲𑀺𑀝𑁆𑀞𑀲𑀢𑁆𑀢𑀲𑀦𑁆𑀢𑀸 𑀦𑀧𑁆𑀧𑀯𑀢𑁆𑀢𑀓𑀼𑀲𑀮𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀧𑁆𑀧𑀧𑁆𑀧𑀫𑀸𑀡𑁂𑀲𑀼 𑀲𑀢𑁆𑀢𑁂𑀲𑀼 𑀧𑀦 𑀅𑀥𑀫𑁆𑀫𑀲𑀫𑀸𑀤𑀸𑀦𑀯𑀲𑁂𑀦 𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀭𑁄𑀕𑀸𑀤𑀻𑀦𑀫𑀜𑁆𑀜𑀢𑀭𑀲𑀁𑀯𑀝𑁆𑀝𑀦𑁂𑀦 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑀧𑁆𑀧𑀢𑁆𑀢𑀺 𑀬𑀸𑀯 𑀅𑀬𑀫𑁂𑀓𑁄 𑀅𑀦𑁆𑀢𑀭𑀓𑀧𑁆𑀧𑁄. 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀅𑀦𑁆𑀢𑀭𑀓𑀧𑁆𑀧𑀯𑀲𑁂𑀦 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑁄 𑀏𑀓𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀯𑀻𑀲𑀢𑀺 𑀅𑀦𑁆𑀢𑀭𑀓𑀧𑁆𑀧𑀧𑁆𑀧𑀫𑀸𑀡𑁄𑀢𑀺 𑀅𑀧𑀭𑁂 𑀯𑀤𑀦𑁆𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀦𑀸𑀫. 𑀏𑀯𑀁 𑀢𑁂𑀚𑁄 𑀲𑀁𑀯𑀝𑁆𑀝𑀯𑀲𑁂𑀦 𑀢𑀸𑀯 𑀫𑀳𑀸𑀓𑀧𑁆𑀧𑀸𑀦𑀁 𑀅𑀦𑁆𑀢𑀭𑀁 𑀅𑀕𑁆𑀕𑀺𑀦𑀸𑀯 𑀯𑀺𑀦𑀲𑁆𑀲𑀢𑀺. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀧𑁆𑀧𑁄 𑀉𑀤𑀓𑁂𑀦 𑀦𑀲𑁆𑀲𑀢𑀺, 𑀢𑀤𑀸 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥𑀧𑀺 𑀓𑀧𑁆𑀧𑀯𑀺𑀦𑀸𑀲𑀓𑁄 𑀔𑀸𑀭𑀼𑀤𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺 𑀲𑁄 𑀆𑀤𑀺𑀢𑁄 𑀲𑀼𑀔𑀼𑀫𑀁 𑀯𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀥𑀸𑀭𑀸𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀦𑁆𑀢𑁄 𑀯𑀲𑁆𑀲𑀢𑀺. 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀯𑀺𑀮𑀻𑀬𑀦𑁆𑀢𑀺 𑀢𑀁 𑀉𑀤𑀓𑀁 𑀯𑀸𑀢𑁂𑀦 𑀲𑀫𑀦𑁆𑀢𑀢𑁄 𑀥𑀸𑀭𑀺𑀢𑀁 𑀧𑀣𑀯𑀺𑀢𑁄 𑀬𑀸𑀯 𑀧𑀭𑀺𑀢𑁆𑀢𑀸𑀪𑀸 𑀅𑀧𑁆𑀧𑀫𑀸𑀡𑀸𑀪𑀸 𑀆𑀪𑀲𑁆𑀲𑀭𑀸𑀢𑀺 𑀢𑀬𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀉𑀤𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀲𑀼𑀪 𑀓𑀺𑀡𑁆𑀳𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀬𑀸𑀯 𑀅𑀡𑀼𑀫𑀢𑁆𑀢𑀁 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀯𑀽𑀧𑀲𑀫𑀢𑀺. 𑀉𑀤𑀓𑀸𑀦𑀼𑀕𑀢𑀁 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳𑀲𑀸 𑀯𑀽𑀧𑀲𑀫𑀢𑀺 𑀅𑀦𑁆𑀢𑀭𑀥𑀸𑀦𑀁 𑀕𑀘𑁆𑀙𑀢𑀺, 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀧𑀦𑀺𑀥 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑀧𑀸𑀢𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀪𑀓𑀺𑀡𑁆𑀳𑀢𑁄 𑀘𑀯𑀺𑀢𑁆𑀯𑀸 𑀆𑀪𑀲𑁆𑀲𑀭𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀧𑀭𑀺𑀘𑁆𑀙𑁂𑀤𑁄 𑀲𑀁𑀯𑀝𑁆𑀝𑁄 𑀦𑀸𑀫 𑀧𑀞𑀫𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀦𑀸𑀫𑀸𑀢𑀺 𑀘𑀢𑁆𑀢𑀸𑀭𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀯𑀼𑀢𑁆𑀢𑀲𑀤𑀺𑀲𑀸𑀦𑀺 𑀏𑀯𑀁 𑀲𑀢𑁆𑀢 𑀫𑀳𑀸𑀓𑀧𑁆𑀧𑀸𑀦𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀕𑁆𑀕𑀺𑀦𑀸 𑀯𑀺𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀫𑁂 𑀫𑀳𑀸𑀓𑀧𑁆𑀧𑁂 𑀉𑀤𑀓𑁂𑀦𑀧𑀺 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀏𑀯𑀁 𑀲𑀢𑁆𑀢𑀲𑀢𑁆𑀢𑀫𑀳𑀸𑀓𑀧𑁆𑀧𑁄 𑀲𑀢𑁆𑀢𑀲𑀢𑁆𑀢𑀯𑀸𑀭𑀁 𑀅𑀕𑁆𑀕𑀺𑀦𑀸 𑀯𑀺𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀯𑀸𑀭𑁂 𑀆𑀧𑁂𑀦 𑀯𑀺𑀮𑀻𑀬𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑁂𑀲𑀝𑁆𑀞𑀺𑀫𑀳𑀸𑀓𑀧𑁆𑀧𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀢𑀤𑀸 𑀆𑀧𑀯𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀫𑁂 𑀫𑀳𑀸𑀓𑀧𑁆𑀧𑁂 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺 𑀢𑀤𑀸 𑀆𑀤𑀺𑀢𑁄 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀯𑀸𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀬𑀣𑀸 𑀅𑀕𑁆𑀕𑀺𑀦𑀸 𑀯𑀺𑀦𑀸𑀲𑀓𑀧𑁆𑀧𑁂 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀦𑀢𑁆𑀣𑀁 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺 𑀲𑁄 𑀧𑀞𑀫𑀁 𑀲𑀼𑀔𑀼𑀫𑀭𑀚𑀁 𑀉𑀝𑁆𑀞𑀸𑀧𑁂𑀢𑀺, 𑀢𑀢𑁄 𑀣𑀽𑀮𑀭𑀚𑀁 𑀲𑀡𑁆𑀳𑀭𑀚𑀁 𑀲𑀼𑀔𑀼𑀫𑀯𑀸𑀮𑀺𑀓𑀁 𑀲𑀓𑁆𑀔𑀭𑀧𑀸𑀲𑀸𑀡𑀸𑀤𑀬𑁄𑀢𑀺 𑀬𑀸𑀯 𑀓𑀽𑀝𑀸𑀕𑀸𑀭𑀫𑀢𑁆𑀢𑁂 𑀧𑀸𑀲𑀸𑀡𑁂𑀧𑀺 𑀯𑀺𑀲𑀫𑀝𑁆𑀞𑀸𑀦𑁂 𑀞𑀺𑀢𑀫𑀳𑀸𑀭𑀼𑀓𑁆𑀔𑁂𑀘 𑀉𑀝𑁆𑀞𑀸𑀧𑁂𑀢𑀺, 𑀢𑁂 𑀧𑀣𑀯𑀺𑀢𑁄 𑀦𑀪𑀫𑀼𑀕𑁆𑀕𑀢𑀸 𑀦 𑀧𑀼𑀦 𑀧𑀢𑀦𑁆𑀢𑀺, 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸𑀦𑀼𑀓𑁆𑀓𑀫𑁂𑀦 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀸𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑀸 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀘𑀢𑀼𑀬𑁄𑀚𑀦𑀧𑀜𑁆𑀘𑀬𑁄𑀚𑀦𑀙𑀬𑁄𑀚𑀦𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀪𑀺𑀚𑁆𑀚𑀺𑀢𑁆𑀯𑀸 𑀢𑁂 𑀯𑁂𑀕𑀓𑁆𑀔𑀺𑀢𑁆𑀢𑀸 𑀆𑀓𑀸𑀲𑁂𑀬𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀯𑀸𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑀬𑀦𑁆𑀢𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺 𑀏𑀢𑁂𑀦𑁂𑀯 𑀪𑀽𑀫𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀯𑀺𑀦𑀸𑀲𑁂𑀦𑁆𑀢𑁄 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀸𑀲𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀸𑀴𑀸 𑀘𑀓𑁆𑀓𑀯𑀸𑀴𑁂𑀳𑀺, 𑀳𑀺𑀫𑀯𑀦𑁆𑀢𑀸 𑀳𑀺𑀫𑀯𑀦𑁆𑀢𑁂𑀳𑀺, 𑀲𑀺𑀦𑁂𑀭𑀽 𑀲𑀺𑀦𑁂𑀭𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀧𑀣𑀯𑀺𑀢𑁄 𑀬𑀸𑀯 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀡𑀺𑀡𑁆𑀳𑀸𑀢𑀺 𑀢𑀬𑁄𑀧𑀺 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀻 𑀯𑀸𑀢𑁄 𑀕𑀡𑁆𑀳𑀸𑀢𑀺 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀏𑀯𑀁 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀁 𑀯𑀺𑀦𑀲𑁆𑀲𑀢𑀺, 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀇𑀥 𑀧𑀦 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀯𑁂𑀳𑀧𑁆𑀨𑀮𑀢𑁄 𑀘𑀯𑀺𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀢𑁆𑀣𑀓𑀧𑁆𑀧𑀯𑀺𑀦𑀸 𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀯𑀸𑀢𑀼𑀧𑀘𑁆𑀙𑁂𑀤𑁄, 𑀇𑀤𑀁 𑀲𑀁𑀯𑀝𑁆𑀝𑁄 𑀦𑀸𑀫, 𑀧𑀞𑀫𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫𑀸𑀢𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀦𑀸𑀫𑀸𑀢𑀺 𑀲𑀩𑁆𑀩𑀁 𑀢𑁂𑀚𑁄𑀲𑀁𑀯𑀝𑁆𑀝𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁.

‘‘𑀲𑀢𑁆𑀢 𑀲𑀢𑁆𑀢 𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸.

𑀅𑀕𑁆𑀕𑀺𑀦𑀸’𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀓𑀺𑀡𑁆𑀳𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀲𑁆𑀫𑀸 𑀢𑀺𑀡𑁆𑀡𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀢𑀮𑀸𑀦𑀁 𑀏𑀓𑀓𑀧𑁆𑀧𑁂𑀧𑀺 𑀅𑀯𑀺𑀦𑀸𑀲𑀸𑀪𑀸𑀯𑀢𑁄 𑀲𑀓𑀮𑀓𑀧𑁆𑀧𑁂 𑀢𑁂𑀲𑀁 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬 𑀓𑀧𑁆𑀧𑀯𑀲𑁂𑀦 𑀢𑁂𑀲𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀫𑀳𑀸𑀓𑀧𑁆𑀧𑀯𑀲𑁂𑀦 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄, 𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦. 𑀬𑀤𑀺 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀫𑀳𑀸𑀓𑀧𑁆𑀧𑀯𑀲𑁂𑀦 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀲𑀺𑀬𑀸, 𑀓𑀣𑀁 𑀆𑀪𑀲𑁆𑀲𑀭𑀸𑀤𑀻𑀲𑀼 𑀩𑁆𑀭𑀳𑁆𑀫𑀽𑀦𑀁 𑀅𑀝𑁆𑀞𑀫𑀳𑀸𑀓𑀧𑁆𑀧𑀸𑀤𑀺𑀯𑀲𑁂𑀦 𑀆𑀬𑀼 𑀧𑀭𑀺𑀧𑀼𑀡𑁆𑀡𑀁 𑀲𑀺𑀬𑀸, 𑀢𑀣𑀸 𑀳𑀺 𑀧𑀞𑀫𑀚𑁆𑀛𑀸𑀦𑀢𑀮𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺. 𑀅𑀝𑁆𑀞𑀫𑁂 𑀯𑀸𑀭𑁂 𑀬𑀸𑀯 𑀆𑀪𑀲𑁆𑀲𑀭𑀸 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀺 𑀧𑀼𑀦 𑀲𑀢𑁆𑀢𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀧𑀞𑀫𑀚𑁆𑀛𑀸𑀦𑀢𑀮𑀁, 𑀧𑀼𑀦 𑀅𑀝𑁆𑀞𑀫𑁂𑀯𑀸𑀭𑁂 𑀉𑀤𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀁 𑀯𑀺𑀦𑀲𑁆𑀲𑀢𑀻𑀢𑀺 𑀏𑀯𑀁 𑀅𑀝𑁆𑀞𑀫𑁂 𑀯𑀸𑀭𑁂 𑀆𑀧𑀯𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀬𑀸𑀯 𑀲𑀼𑀪𑀓𑀺𑀡𑁆𑀳𑀸 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺 𑀏𑀯𑀁 𑀘𑀢𑀼𑀲𑀝𑁆𑀞𑀺 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀻𑀢𑀺 𑀲𑀘𑁆𑀘𑀁, 𑀳𑁂𑀝𑁆𑀞𑀸𑀯𑀺𑀯𑀝𑁆𑀝𑀝𑁆𑀞𑀸𑀬𑀻 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦 𑀏𑀓𑁄 𑀲𑀢𑁆𑀢 𑀫𑀳𑀸𑀓𑀧𑁆𑀧𑀸𑀦𑀺 𑀘𑀸𑀢𑀺 𑀅𑀝𑁆𑀞 𑀓𑀧𑁆𑀧𑀸𑀦𑀺 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑁂𑀲𑀼𑀧𑀺 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦 𑀏𑀓𑁄 𑀢𑁂 𑀲𑀝𑁆𑀞𑀺𑀫𑀳𑀸𑀓𑀧𑁆𑀧𑀸𑀦𑀺 𑀘𑀸𑀢𑀺 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀦𑀺 𑀲𑀼𑀪𑀓𑀺𑀡𑁆𑀳𑀸𑀦𑀁 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺 𑀢𑁂𑀦 𑀯𑀼𑀢𑁆𑀢𑀁 𑀧𑁄𑀭𑀸𑀡𑁂𑀳𑀺.

𑀲𑀢𑁆𑀢 𑀲𑀢𑁆𑀢’𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸’𑀢𑀺.

𑀓𑁂𑀘𑀺 𑀧𑀦.

‘‘𑀅𑀕𑁆𑀕𑀺𑀦𑀸’𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀓𑀺𑀡𑁆𑀳𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 ‘‘𑀆𑀪𑀲𑁆𑀲𑀭𑀸𑀢𑀺’’𑀘 ‘‘𑀲𑀼𑀪𑀓𑀺𑀡𑁆𑀳𑀢𑁄’’𑀢𑀺 𑀘 ‘‘𑀯𑁂𑀳𑀧𑁆𑀨𑀮𑀢𑁄’’𑀢𑀺 𑀘 𑀅𑀪𑀺𑀯𑀺𑀥𑀺𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀜𑁆𑀘 𑀲𑀫𑀢𑀮𑀪𑀸𑀯𑁂𑀧𑀺 𑀲𑁂𑀝𑁆𑀞𑀪𑀽𑀫𑀺𑀢𑁆𑀢𑀸 𑀧𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀜𑁆𑀘 𑀅𑀫𑀜𑁆𑀜𑀺𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀻𑀲𑀼 𑀯𑀺𑀬 𑀉𑀧𑀭𑀽𑀧𑀭𑀺𑀯𑀲𑁂𑀦 𑀪𑀽𑀫𑀺𑀓𑁆𑀓𑀫𑁄𑀢𑀺 𑀫𑀜𑁆𑀜𑀺𑀢𑁆𑀯𑀸.

‘‘𑀧𑀜𑁆𑀘𑀪𑀽𑀫𑀺 𑀦𑀝𑁆𑀞𑀸 𑀅𑀕𑁆𑀕𑀺, 𑀅𑀝𑁆𑀞 𑀪𑀽𑀫𑀺 𑀦𑀝𑁆𑀞𑀸 𑀤𑀓𑀸;

𑀦𑀯𑀪𑀽𑀫𑀺 𑀦𑀝𑁆𑀞𑀸 𑀯𑀸𑀢𑀸, 𑀮𑁄𑀓𑀦𑀝𑁆𑀞𑀸 𑀢𑀤𑀸 𑀲𑀺𑀬𑀼𑀁.

𑀧𑀞𑀫𑁂 𑀅𑀕𑁆𑀕𑀺 𑀤𑁆𑀯𑀢𑁆𑀢𑀺𑀁𑀲, 𑀤𑀼𑀢𑀺𑀬𑁂 𑀆𑀤𑀺 𑀲𑁄𑀴𑀲;

𑀤𑀼𑀢𑀺𑀬𑀪𑀽𑀫𑁂 𑀫𑀚𑁆𑀛𑁂 𑀅𑀝𑁆𑀞𑀫𑀁, 𑀢𑀁 𑀙𑀧𑁆𑀧𑀜𑁆𑀜𑀸𑀲 𑀯𑀸𑀭𑀓𑀁.

𑀆𑀪𑀲𑁆𑀲𑀭𑀫𑁆𑀳𑀺 𑀘𑀢𑀼𑀢𑁆𑀣𑀁, 𑀧𑀭𑀺𑀢𑁆𑀢𑀲𑀼𑀪𑀫𑁆𑀳𑀺 𑀤𑁆𑀯𑁂 𑀚𑀮𑀁;

𑀅𑀧𑁆𑀧𑀫𑀸𑀡𑀲𑀼𑀪𑀁 𑀏𑀓𑀯𑀸𑀭𑀁, 𑀫𑀢𑀁 𑀉𑀤𑀓𑀲𑀢𑁆𑀢𑀫’’𑀦𑁆𑀢𑀺.

𑀯𑀤𑀦𑁆𑀢𑀺 𑀢𑁂𑀲𑀁 𑀯𑀸𑀤𑁂 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀧𑀜𑁆𑀘𑀪𑀽𑀫𑀺 𑀅𑀕𑁆𑀕𑀺𑀦𑀝𑁆𑀞𑀸, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀅𑀝𑁆𑀞𑀪𑀽𑀫𑀺 𑀉𑀤𑀓𑀦𑀝𑁆𑀞𑀸𑀢𑀺 𑀯𑀤𑀦𑁆𑀢𑀺. 𑀲𑀫𑀢𑀮𑀤𑀻𑀧𑀦𑀢𑁆𑀣𑀁 𑀲𑀦𑁆𑀤𑁂𑀳𑀘𑁆𑀙𑁂𑀤𑀦𑀢𑁆𑀣𑀁 𑀏𑀯𑀁 𑀕𑀳𑀺𑀢𑀸𑀢𑀺 𑀏𑀓𑀪𑀯𑀧𑀭𑀺𑀬𑁄𑀲𑀸𑀦𑀁 𑀲𑀦𑁆𑀥𑀸𑀬 𑀧𑀝𑀺𑀲𑀦𑁆𑀥𑀺𑀪𑀯𑀜𑁆𑀘𑀸𑀢𑀺 𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀅𑀢𑁆𑀣𑀁 𑀤𑀼𑀕𑁆𑀕𑀳𑀺𑀢𑁂𑀦 𑀕𑀳𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀺 𑀲𑁄 𑀅𑀬𑀼𑀢𑁆𑀢𑀭𑀽𑀧𑁄 𑀯𑀺𑀬 𑀤𑀺𑀲𑁆𑀲𑀢𑀺 𑀅𑀢𑀺𑀯𑀺𑀬 𑀫𑀺𑀘𑁆𑀙𑀸𑀕𑀸𑀳𑁄 𑀘 𑀳𑁄𑀢𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀳𑀺 𑀯𑀺𑀭𑀼𑀚𑁆𑀛𑀦𑀢𑁄 𑀲𑀁𑀯𑀝𑁆𑀝𑀲𑀻𑀫𑀸𑀧𑀺 𑀯𑀺𑀭𑀼𑀤𑁆𑀥𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀅𑀕𑁆𑀕𑀺𑀦𑀸, 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀉𑀤𑀓𑁂𑀦, 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀯𑀘𑀦𑁂𑀦𑀸𑀧𑀺 𑀯𑀺𑀭𑀼𑀚𑁆𑀛𑀢𑁂𑀯 𑀢𑀲𑁆𑀫𑀸 ‘‘𑀆𑀪𑀲𑁆𑀲𑀭𑀸’’𑀢𑀺 𑀘 ‘‘𑀲𑀼𑀪𑀓𑀺𑀡𑁆𑀳𑀢𑁄’’𑀢𑀺 𑀘 ‘‘𑀯𑁂𑀳𑀧𑁆𑀨𑀮𑀢𑁄’’𑀢𑀺 𑀘 𑀏𑀢𑁆𑀣𑀸𑀪𑀺𑀯𑀺𑀥𑀺𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀣𑀸 ‘‘𑀉𑀧𑀭𑀺 𑀧𑀩𑁆𑀩𑀢𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀆𑀪𑀲𑁆𑀲𑀭𑀲𑀼𑀪𑀓𑀺𑀡𑁆𑀳𑀯𑁂𑀳𑀧𑁆𑀨𑀮𑀸𑀦𑀁 𑀢𑁂𑀦 𑀢𑁂𑀦 𑀲𑀁𑀯𑀝𑁆𑀝𑁂𑀦 𑀯𑀺𑀦𑀸𑀲𑁄𑀧𑀺 𑀦 𑀪𑀯𑁂𑀬𑁆𑀬. 𑀅𑀬𑀁 𑀮𑁄𑀓𑀯𑀺𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄. 𑀏𑀯𑀁 𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂 𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂

𑀓𑀧𑁆𑀧𑀯𑀺𑀦𑀸𑀲𑀓𑀡𑁆𑀟𑁄 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.