𑁫. 𑀦𑀯𑀯𑀸𑀲𑀻𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄

𑁫. 𑀇𑀤𑀸𑀦𑀺 𑀯𑀦𑀯𑀸𑀲𑀻𑀭𑀝𑁆𑀞𑁂 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑀲𑀸𑀲𑀦𑀯𑀁𑀲𑀁 𑀯𑀓𑁆𑀔𑀸𑀫𑀺. 𑀚𑀺𑀦𑀘𑀓𑁆𑀓𑁂 𑀳𑀺 𑀏𑀓𑀸𑀥𑀺𑀓𑁂 𑀯𑀲𑁆𑀲𑀲𑀢𑁂 𑀲𑀫𑁆𑀧𑀢𑁆𑀢𑁂 𑀚𑀝𑀺𑀮𑁄 𑀲𑀓𑁆𑀓𑁄 𑀦𑀸𑀕𑁄 𑀕𑀭𑀼𑀴𑁄 𑀓𑀼𑀫𑁆𑀪𑀡𑁆𑀟𑁄 𑀘𑀦𑁆𑀤𑀻 𑀧𑀭𑀫𑀻𑀲𑁆𑀯𑀭𑁄𑀘𑀸𑀢𑀺 𑀇𑀫𑁂 𑀲𑀢𑁆𑀢 𑀲𑀺𑀭𑀺𑀔𑁂𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀫𑀸𑀧𑁂𑀲𑀼𑀁. 𑀢𑀢𑁆𑀣 𑀤𑁆𑀯𑀢𑁆𑀢𑀧𑁄𑀗𑁆𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀓𑀺𑀭 𑀢𑀻𑀡𑀺 𑀅𑀓𑁆𑀔𑀻𑀦𑀺 𑀲𑀦𑁆𑀢𑀻𑀢𑀺. 𑀢𑀤𑀸 𑀪𑀕𑀯𑀢𑁄 𑀲𑀸𑀯𑀓𑀸 𑀅𑀭𑀳𑀦𑁆𑀢𑀸 𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀢𑀢𑁆𑀣 𑀯𑀲𑀺𑀁𑀲𑀼. 𑀲𑁄 𑀭𑀸𑀚𑀸 𑀢𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀤𑁂𑀯𑀲𑀺𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀢𑁆𑀣𑀫𑁆𑀪𑀺. 𑀙 𑀲𑀭𑀻𑀭𑀥𑀸𑀢𑀼𑀬𑁄 𑀘 𑀏𑀓𑁂𑀓𑀁 𑀏𑀓𑁂𑀓𑀲𑁆𑀫𑀺𑀁 𑀦𑀺𑀤𑀳𑀺𑀢𑁆𑀯𑀸 𑀙 𑀘𑁂𑀢𑀺𑀇𑀬𑀸𑀦𑀺 𑀓𑀸𑀭𑀸𑀧𑁂𑀲𑀺. 𑀤𑀓𑁆𑀔𑀺𑀡𑀩𑀸𑀳𑀼𑀁 𑀧𑀦 𑀦𑀺𑀤𑀳𑀺𑀢𑁆𑀯𑀸 𑀏𑀓𑀫𑁆𑀧𑀺 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺.

𑀉𑀡𑁆𑀳𑀻𑀲𑀥𑀸𑀢𑀼𑀁 𑀧𑀦 𑀓𑀗𑁆𑀕𑀭𑀦𑁆𑀦𑀕𑀭𑀢𑁄 𑀆𑀦𑁂𑀢𑁆𑀯𑀸 𑀏𑀓𑀫𑁆𑀧𑀺 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺. 𑀢𑀁 𑀧𑀦 𑀢𑀸𑀯 𑀦 𑀦𑀺𑀝𑁆𑀞𑀺𑀢𑀁. 𑀧𑀘𑁆𑀙𑀸 𑀅𑀦𑀼𑀭𑀼𑀤𑁆𑀥𑀭𑀸𑀚𑀸 𑀕𑀳𑁂𑀢𑁆𑀯𑀸 𑀅𑀭𑀺𑀫𑀤𑁆𑀤𑀦𑀦𑀕𑀭𑀁 𑀆𑀦𑁂𑀢𑁆𑀯𑀸 𑀘𑀜𑁆𑀜𑀺𑀗𑁆𑀔𑀼 𑀦𑀸𑀫 𑀘𑁂𑀢𑀺𑀬𑁂 𑀦𑀺𑀥𑀸𑀦𑀁 𑀅𑀓𑀸𑀲𑀺. 𑀢𑀲𑁆𑀫𑀸 𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀆𑀕𑀫𑀦𑀢𑁄 𑀧𑀼𑀩𑁆𑀩𑁂𑀧𑀺 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄 𑀧𑀘𑁆𑀙𑀸 𑀲𑀸𑀲𑀦𑀁 𑀤𑀼𑀩𑁆𑀩𑀮𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀇𑀤𑀁 𑀯𑀦𑀯𑀸𑀲𑀻𑀭𑀝𑁆𑀞𑁂 𑀧𑀞𑀫𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀫𑀳𑀸𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀧𑀦 𑀧𑁂𑀲𑀺𑀢𑁄 𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀦𑀯𑀸𑀲𑀻𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀅𑀦𑀫𑀢𑀕𑁆𑀕𑀧𑀭𑀺𑀬𑀸𑀬𑀓𑀣𑀸𑀬 𑀯𑀦𑀯𑀸𑀲𑀺𑀓𑁂 𑀧𑀲𑀸𑀤𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀜𑁆𑀘𑀯𑀺𑀳𑀸𑀭𑀲𑀢𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦𑁂𑀯 𑀅𑀝𑁆𑀞 𑀓𑀣𑀸𑀬𑀁 𑁋

𑀕𑀦𑁆𑀢𑁆𑀯𑀸𑀦 𑀭𑀓𑁆𑀔𑀺𑀢𑀢𑁆𑀣𑁂𑀭𑁄,

𑀯𑀦𑀯𑀸𑀲𑀺𑀁 𑀫𑀳𑀺𑀤𑁆𑀥𑀺𑀓𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀢𑀢𑁆𑀣,

𑀤𑁂𑀲𑁂𑀲𑀺 𑀅𑀦𑀫𑀢𑀕𑁆𑀕𑀺𑀬𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀯𑀦𑀯𑀸𑀲𑀻𑀭𑀝𑁆𑀞𑁂 𑀧𑀼𑀩𑁆𑀩𑁂𑀬𑁂𑀯 𑀲𑀸𑀲𑀦𑀁 𑀑𑀕𑀸𑀳𑁂𑀢𑁆𑀯𑀸 𑀧𑀢𑀺𑀝𑁆𑀞𑀳𑀺. 𑀦 𑀧𑀦 𑀢𑀸𑀯 𑀲𑀓𑀮𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀢𑀺𑀝𑁆𑀞𑀳𑀺.

𑀇𑀤𑀁 𑀢𑀸𑀯 𑀯𑀦𑀯𑀸𑀲𑀻𑀭𑀝𑁆𑀞𑁂 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑁂 𑀤𑀼𑀢𑀺𑀬𑀁

𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀚𑀺𑀦𑀘𑀓𑁆𑀓𑁂 𑀧𑀦 𑀢𑁂𑀢𑁆𑀢𑀺𑀁𑀲𑀸𑀥𑀺𑀓𑁂 𑀘𑀢𑀼𑀯𑀲𑁆𑀲𑀲𑀢𑁂 𑀓𑀼𑀓𑁆𑀓𑀼𑀝 𑀲𑀻𑀲𑁄 𑀦𑀸𑀫 𑀏𑀓𑁄 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀭𑀜𑁆𑀜𑁄 𑀓𑀸𑀮𑁂 𑀪𑀕𑀯𑀢𑁄 𑀲𑀸𑀯𑀓𑀸 𑀅𑀭𑀳𑀦𑁆𑀢𑀸 𑀧𑀜𑁆𑀘𑀲𑀢𑀫𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂𑀲𑀫𑁆𑀧𑀺 𑀲𑁄 𑀭𑀸𑀚𑀸 𑀤𑁂𑀯𑀲𑀺𑀓𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀢𑁆𑀣𑀫𑁆𑀪𑁂𑀲𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀧𑀦 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸 𑀅𑀳𑁂𑀲𑀼𑀁.

𑀇𑀤𑀁 𑀯𑀦𑀯𑀸𑀲𑀻𑀭𑀝𑁆𑀞𑁂 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑁂 𑀧𑀭𑀫𑁆𑀧𑀭𑀸𑀪𑀢𑀯𑀲𑁂𑀦

𑀢𑀢𑀺𑀬𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀇𑀘𑁆𑀘𑁂𑀯𑀁 𑀯𑀦𑀯𑀸𑀲𑀻𑀭𑀝𑁆𑀞𑁂 𑀅𑀦𑁂𑀓𑀲𑀢𑁂𑀳𑀺 𑀅𑀭𑀳𑀦𑁆𑀢𑀢𑁆𑀣𑁂𑀭𑁂𑀳𑀺 𑀲𑀸𑀲𑀦𑀁 𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀁 𑀳𑀼𑀢𑁆𑀯𑀸 𑀅𑀢𑀺𑀯𑀺𑀬 𑀯𑀺𑀚𑁆𑀚𑁄𑀢𑁂𑀲𑀺. 𑀲𑀸𑀲𑀦𑀺𑀓 𑀕𑀦𑁆𑀣𑀓𑀸𑀭𑀸 𑀧𑀦 𑀫𑀳𑀸𑀣𑁂𑀭𑀸 𑀢𑀢𑁆𑀣 𑀦 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀅𑀭𑀳𑀦𑁆𑀢𑀢𑁆𑀣𑁂𑀭𑀸 𑀧𑀦 𑀭𑀸𑀚𑀽𑀦𑀁 𑀆𑀬𑀸𑀘𑀦𑀁 𑀆𑀭𑀩𑁆𑀪 𑀥𑀫𑁆𑀫𑀲𑀢𑁆𑀣𑀁 𑀏𑀓𑀁 𑀯𑀺𑀭𑀘𑀬𑀺𑀁𑀲𑀽𑀢𑀺 𑀧𑁄𑀭𑀸𑀡𑀸 𑀯𑀤𑀦𑁆𑀢𑀻𑀢𑀺. 𑀇𑀘𑁆𑀘𑁂𑀯𑀁𑁋

𑀢𑁂𑀘 𑀣𑁂𑀭𑀸 𑀫𑀳𑀸𑀧𑀜𑁆𑀜𑀸,

𑀧𑀕𑁆𑀕𑀳𑁂𑀢𑁆𑀯𑀸𑀦 𑀲𑀸𑀲𑀦𑀁;

𑀲𑀽𑀭𑀺𑀬𑁄 𑀯𑀺𑀬 𑀅𑀢𑁆𑀣𑀗𑁆𑀕𑁄,

𑀉𑀧𑀕𑀸 𑀫𑀘𑁆𑀘𑀼𑀲𑀦𑁆𑀢𑀺𑀓𑀁.

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄,

𑀬𑀸𑀯 𑀫𑀘𑁆𑀘𑀼 𑀦𑀘𑀸𑀕𑀢𑁄;

𑀢𑀸𑀯 𑀧𑀼𑀜𑁆𑀜𑀁 𑀓𑀭𑁂 𑀦𑀺𑀘𑁆𑀘𑀁,

𑀫𑀸 𑀧𑀫𑀚𑁆𑀚𑁂𑀬𑁆𑀬 𑀲𑀩𑁆𑀩𑀤𑀸𑀢𑀺.

𑀇𑀢𑀺 𑀲𑀸𑀲𑀦𑀯𑀁𑀲𑁂 𑀯𑀦𑀯𑀸𑀲𑀻𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄

𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.