𑁩. 𑀲𑀼𑀯𑀡𑁆𑀡𑀪𑀽𑀫𑀺𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄

𑁩. 𑀇𑀤𑀸𑀦𑀺 𑀬𑀣𑀸𑀞𑀧𑀺𑀢𑀫𑀸𑀢𑀺𑀓𑀸𑀯𑀲𑁂𑀦 𑀲𑀼𑀯𑀡𑁆𑀡𑀪𑀽𑀫𑀺 𑀭𑀝𑁆𑀞𑁂 𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑀲𑁆𑀲 𑀯𑀢𑁆𑀣𑀼𑀁 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀣𑁄, 𑀢𑀲𑁆𑀫𑀸 𑀲𑀼𑀯𑀡𑁆𑀡𑀪𑀽𑀫𑀺𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑀁 𑀆𑀭𑀪𑀺𑀲𑁆𑀲𑀸𑀫𑀺.

𑀢𑀢𑁆𑀣 𑀲𑀼𑀯𑀡𑁆𑀡𑀪𑀽𑀫𑀻𑀢𑀺 𑀢𑀻𑀲𑀼 𑀭𑀸𑀫𑀜𑁆𑀜𑀭𑀝𑁆𑀞𑁂𑀲𑀼 𑀏𑀓𑀲𑁆𑀲 𑀦𑀸𑀫𑀁. 𑀢𑀻𑀡𑀺𑀳𑀺 𑀭𑀸𑀫𑀜𑁆𑀜𑀭𑀝𑁆𑀞𑀸𑀦𑀺 𑀳𑁄𑀦𑁆𑀢𑀺 𑀳𑀁𑀲𑀸𑀯𑀢𑀻𑀫𑀼𑀢𑁆𑀢𑀺𑀫𑀲𑀼𑀯𑀡𑁆𑀡𑀪𑀽𑀫𑀺𑀯𑀲𑁂𑀦 𑀏𑀓𑀤𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀭𑀸𑀫𑀜𑁆𑀜𑀭𑀝𑁆𑀞𑀁 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀦 𑀉𑀓𑁆𑀓𑀮𑀸𑀧𑀚𑀦𑀧𑀤𑁂 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀼𑀬𑁂𑀯 𑀆𑀲𑀸𑀴𑁆𑀳𑀺𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀢𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀧𑀞𑀫𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀪𑀕𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀓𑀸𑀮𑀢𑁄 𑀧𑀼𑀩𑁆𑀩𑁂𑀬𑁂𑀯 𑀅𑀧𑀭𑀡𑁆𑀡𑀓𑀭𑀝𑁆𑀞𑁂 𑀲𑀼𑀪𑀺𑀦𑁆𑀦𑀦𑀕𑀭𑁂 𑀢𑀺𑀲𑁆𑀲𑀭𑀜𑁆𑀜𑁄 𑀓𑀸𑀮𑁂 𑀏𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀢𑀺𑀲𑁆𑀲𑁄 𑀚𑀬𑁄 𑀘𑀸𑀢𑀺 𑀤𑁆𑀯𑁂𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀕𑀺𑀳𑀺𑀪𑀸𑀯𑁂 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀲𑀫𑀻𑀧𑁂 𑀕𑀚𑁆𑀚𑀕𑀺𑀭𑀺𑀫𑁆𑀳𑀺 𑀦𑀸𑀫 𑀧𑀩𑁆𑀩𑀢𑁂 𑀇𑀢𑁆𑀣𑀼𑀲𑀺𑀧𑀩𑁆𑀩𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀲𑀻𑀤𑀺𑀲𑀼𑀁. 𑀢𑀤𑀸 𑀦𑀸𑀕𑀺𑀬𑀸 𑀯𑀺𑀚𑁆𑀚𑀸𑀥𑀭𑁄 𑀲𑀦𑁆𑀢𑀯𑀁 𑀓𑀢𑁆𑀯𑀸 𑀤𑁆𑀯𑁂 𑀅𑀡𑁆𑀟𑀸𑀦𑀺 𑀯𑀺𑀚𑀸𑀬𑀺𑀢𑁆𑀯𑀸 𑀲𑀸 𑀦𑀸𑀕𑀻 𑀮𑀚𑁆𑀚𑀸𑀬 𑀢𑀸𑀦𑀺 𑀯𑀺𑀚𑀳𑀺𑀢𑁆𑀯𑀸 𑀕𑀘𑁆𑀙𑀺.

𑀢𑀤𑀸 𑀚𑁂𑀝𑁆𑀞𑁄 𑀢𑀺𑀲𑁆𑀲𑀓𑀼𑀫𑀸𑀭𑁄 𑀢𑀸𑀦𑀺 𑀮𑀪𑀺𑀢𑁆𑀯𑀸 𑀓𑀦𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀯𑀺𑀪𑀚𑀺𑀢𑁆𑀯𑀸 𑀏𑀓𑀁 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀲𑀺. 𑀓𑀸𑀮𑁂 𑀅𑀢𑀺𑀓𑁆𑀓𑀦𑁆𑀢𑁂 𑀢𑁂𑀳𑀺 𑀅𑀡𑁆𑀟𑁂𑀳𑀺 𑀤𑁆𑀯𑁂 𑀫𑀦𑀼𑀲𑁆𑀲𑀸 𑀯𑀺𑀚𑀸𑀬𑀺𑀁𑀲𑀼. 𑀢𑁂 𑀤𑀲 𑀯𑀲𑁆𑀲𑀯𑀬𑁂 𑀲𑀫𑁆𑀧𑀢𑁆𑀢𑁂 𑀓𑀦𑀺𑀝𑁆𑀞𑀲𑁆𑀲 𑀅𑀡𑁆𑀟𑀢𑁄 𑀯𑀺𑀚𑀸𑀬𑀦𑀤𑀳𑀭𑁄 𑀓𑀸𑀮𑀁 𑀓𑀢𑁆𑀯𑀸 𑀫𑀚𑁆𑀛𑀺𑀫𑀤𑁂𑀲𑁂 𑀫𑀺𑀣𑀺𑀮𑀦𑀕𑀭𑁂 𑀕𑀯𑀁𑀧𑀢𑀺 𑀦𑀸𑀫 𑀓𑀼𑀫𑀸𑀭𑁄 𑀉𑀧𑀚𑁆𑀚𑀺. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀘𑀺𑀭𑁂𑀦𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑀚𑁂𑀝𑁆𑀞𑀲𑁆𑀲 𑀧𑀦 𑀅𑀡𑁆𑀟𑀢𑁄 𑀯𑀺𑀚𑀸𑀬𑀦𑀤𑀳𑀭𑁄 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀓𑀸𑀮𑁂 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀆𑀕𑀦𑁆𑀢𑁆𑀯𑀸 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀼𑀥𑀫𑁆𑀫𑀧𑀼𑀭𑀁 𑀦𑀸𑀫 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑀻𑀳𑀭𑀸𑀚𑀸𑀢𑀺 𑀦𑀸𑀫𑁂𑀦 𑀢𑀢𑁆𑀣 𑀭𑀚𑁆𑀚𑀁 𑀓𑀸𑀭𑀸𑀧𑁂𑀲𑀺. 𑀲𑀺𑀮𑀸𑀮𑁄𑀦𑁂 𑀧𑀦 𑀲𑀺𑀭𑀺𑀫𑀸𑀲𑁄𑀓𑁄𑀢𑀺 𑀦𑀸𑀫𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀕𑀯𑀁𑀧𑀢𑀺𑀢𑁆𑀣𑁂𑀭𑁄 𑀘 𑀅𑀢𑁆𑀢𑀦𑀸 𑀫𑀸𑀢𑀭𑀁 𑀤𑀝𑁆𑀞𑀼𑀓𑀸𑀫𑁄 𑀫𑀺𑀣𑀺𑀮𑀦𑀕𑀭𑀢𑁄 𑀆𑀕𑀦𑁆𑀢𑀼𑀁 𑀆𑀭𑀪𑀺. 𑀢𑀤𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀫𑀸𑀢𑀼𑀬𑀸 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀫𑁂 𑀫𑀸𑀢𑀸 𑀓𑀼𑀳𑀺𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀯𑀚𑁆𑀚𑀦𑁆𑀢𑁄 𑀩𑀸𑀳𑀼𑀮𑁆𑀮𑁂𑀦 𑀦𑁂𑀲𑀸𑀤𑀓𑁂𑀯𑀝𑁆𑀝𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑁂 𑀤𑁂𑀲𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀜𑀢𑁆𑀯𑀸 𑀲𑀘𑀸𑀳𑀁 𑀕𑀦𑁆𑀢𑁆𑀯𑀸 𑀦 𑀑𑀯𑀸𑀤𑁂𑀬𑁆𑀬𑀁, 𑀫𑀸𑀢𑀸 𑀫𑁂 𑀅𑀧𑀸𑀬𑀕𑀫𑀦𑀺𑀬𑀁 𑀅𑀧𑀼𑀜𑁆𑀜𑀁 𑀯𑀺𑀘𑀺𑀦𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀭𑀸𑀫𑀜𑁆𑀜𑀭𑀝𑁆𑀞𑀁 𑀯𑁂𑀳𑀸𑀲𑀫𑀕𑁆𑀕𑁂𑀦 𑀆𑀕𑀘𑁆𑀙𑀺. 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀼𑀥𑀫𑁆𑀫𑀧𑀭𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀢𑀼𑀦𑀸 𑀲𑀻𑀳𑀭𑀸𑀚𑁂𑀦 𑀲𑀤𑁆𑀥𑀺𑀁 𑀭𑀝𑁆𑀞𑀯𑀸𑀲𑀻𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀅𑀣 𑀲𑀻𑀳𑀭𑀸𑀚𑀸 𑀆𑀳, 𑀮𑁄𑀓𑁂𑀲𑀼 𑀪𑀦𑁆𑀢𑁂 𑀢𑁆𑀯𑀫𑀲𑀺 𑀅𑀕𑁆𑀕𑀢𑀭𑁄 𑀧𑀼𑀕𑁆𑀕𑀮𑁄𑀢𑀺. 𑀦 𑀫𑀳𑀸𑀭𑀸𑀚 𑀅𑀳𑀁 𑀅𑀕𑁆𑀕𑀢𑀭𑁄, 𑀢𑀻𑀲𑀼 𑀧𑀦 𑀪𑀯𑁂𑀲𑀼 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀫𑀓𑀼𑀝𑀲𑀗𑁆𑀓𑀸𑀲𑁄 𑀕𑁄𑀢𑀫𑁄 𑀦𑀸𑀫 𑀫𑀬𑁆𑀳𑀁 𑀲𑀢𑁆𑀣𑀸 𑀅𑀢𑁆𑀣𑀺, 𑀇𑀤𑀸𑀦𑀺 𑀫𑀚𑁆𑀛𑀺𑀫𑀤𑁂𑀲𑀁 𑀭𑀸𑀚𑀕𑀳𑀁 𑀧𑀝𑀺𑀯𑀲𑀢𑀻𑀢𑀺. 𑀏𑀯𑀁 𑀧𑀦 𑀪𑀦𑁆𑀢𑁂 𑀲𑀢𑀺 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀁 𑀫𑀬𑀁 𑀤𑀝𑁆𑀞𑀼𑀁 𑀅𑀭𑀳𑀸𑀫 𑀯𑀸 𑀦𑁄 𑀯𑀸𑀢𑀺 𑀧𑀼𑀘𑁆𑀙𑀺. 𑀕𑀯𑀁𑀧𑀢𑀺𑀢𑁆𑀣𑁂𑀭𑁄𑀘 𑀆𑀫 𑀫𑀳𑀸𑀭𑀸𑀚 𑀅𑀭𑀳𑀣 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁, 𑀅𑀳𑀁 𑀬𑀸𑀘𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀬𑀸𑀘𑀺. 𑀪𑀕𑀯𑀸 𑀘 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀝𑁆𑀞𑀫𑁂 𑀯𑀲𑁆𑀲𑁂 𑀲𑀤𑁆𑀥𑀺𑀁 𑀅𑀦𑁂𑀓𑀲𑀢𑀪𑀺𑀓𑁆𑀔𑀽𑀳𑀺 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀼𑀔𑀫𑁆𑀫𑀧𑀼𑀭𑀁 𑀆𑀓𑀸𑀲𑁂𑀦 𑀆𑀕𑀫𑀸𑀲𑀺. 𑀭𑀸𑀚𑀯𑀁𑀲𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀆𑀕𑀫𑀸𑀲𑀻𑀢𑀺 𑀯𑀼𑀢𑁆𑀢𑀁. 𑀲𑀺𑀮𑀸𑀮𑁂𑀔𑀦𑁂 𑀧𑀦 𑀯𑀻𑀲𑀢𑀺𑀲𑀳𑀲𑁆𑀲𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀲𑁆𑀫𑀸 𑀪𑀕𑀯𑀸 𑀲𑀧𑀭𑀺𑀲𑁄𑀬𑁂𑀯 𑀆𑀕𑀘𑁆𑀙𑀺, 𑀦 𑀏𑀓𑀓𑁄𑀢𑀺 𑀏𑀢𑁆𑀢𑀓𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀦𑀸𑀦𑀸 𑀯𑀸𑀤𑀢𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑁆𑀲𑀸𑀓𑀼𑀮𑀺𑀢𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺.

𑀅𑀣 𑀆𑀕𑀦𑁆𑀢𑁆𑀯𑀸 𑀭𑀢𑀦𑀫𑀡𑁆𑀟𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀭𑀸𑀚𑀺𑀓𑀸𑀦𑀁 𑀭𑀝𑁆𑀞𑀯𑀸𑀲𑀻𑀦𑀁 𑀅𑀫𑀢𑀭𑀲𑀁 𑀅𑀤𑀸𑀲𑀺. 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣 𑀪𑀕𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸𑀦𑀁 𑀙𑀦𑁆𑀦𑀁 𑀢𑀸𑀧𑀲𑀸𑀦𑀁 𑀙 𑀓𑁂𑀲𑀥𑀸𑀢𑀼𑀬𑁄 𑀧𑀽𑀚𑀦𑀢𑁆𑀣𑀸𑀬 𑀅𑀤𑀸𑀲𑀺. 𑀢𑀢𑁄 𑀧𑀘𑁆𑀙𑀸𑀲𑀢𑁆𑀢𑀢𑀺𑀁𑀲𑀯𑀲𑁆𑀲𑀸𑀦𑀺 𑀧𑀽𑀭𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀪𑀕𑀯𑀢𑁄 𑀅𑀥𑀺𑀝𑁆𑀞𑀸𑀦𑀸𑀦𑀼𑀭𑀽𑀧𑁂𑀦 𑀘𑀺𑀢𑀓𑀝𑁆𑀞𑀸𑀦𑀢𑁄 𑀢𑁂𑀢𑁆𑀢𑀺𑀁𑀲 𑀤𑀦𑁆𑀢𑁂 𑀕𑀳𑁂𑀢𑁆𑀯𑀸 𑀕𑀯𑀁𑀧𑀢𑀺𑀢𑁆𑀣𑁂𑀭𑁄 𑀲𑀼𑀥𑀫𑁆𑀫𑀧𑀼𑀭𑀁 𑀆𑀦𑁂𑀢𑁆𑀯𑀸 𑀲𑀻𑀳𑀭𑀜𑁆𑀜𑁄 𑀤𑀢𑁆𑀯𑀸 𑀢𑁂𑀢𑁆𑀢𑀺𑀁𑀲𑀘𑁂𑀢𑀺𑀬𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀯𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀝𑁆𑀞𑀫𑁂𑀬𑁂𑀯 𑀯𑀲𑁆𑀲𑁂 𑀕𑀯𑀁𑀧𑀢𑀺𑀢𑁆𑀣𑁂𑀭𑁄 𑀭𑀸𑀫𑀜𑁆𑀜 𑀭𑀝𑁆𑀞𑁂 𑀲𑀼𑀥𑀫𑁆𑀫𑀧𑀼𑀭𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀤𑀼𑀢𑀺𑀬𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀧𑀜𑁆𑀘𑀢𑀺𑀁𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀢𑀸𑀦𑀁 𑀉𑀧𑀭𑀺𑀲𑀼𑀯𑀡𑁆𑀡𑀪𑀽𑀫𑀺𑀁 𑀦𑀸𑀫 𑀭𑀸𑀫𑀜𑁆𑀜𑀭𑀝𑁆𑀞𑀁 𑀆𑀕𑀦𑁆𑀢𑁆𑀯𑀸 𑀲𑁄𑀡𑀢𑁆𑀣𑁂𑀭𑁄 𑀉𑀢𑁆𑀢𑀭𑀢𑁆𑀣𑁂𑀭𑁄𑀘𑀸𑀢𑀺 𑀤𑁆𑀯𑁂 𑀣𑁂𑀭𑀸 𑀧𑀜𑁆𑀘𑀯𑀕𑁆𑀕𑀓𑀫𑁆𑀫𑀸𑀭𑀳𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀢𑁂 𑀘 𑀣𑁂𑀭𑀸 𑀫𑀳𑀸𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀸.

𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑁂 𑀕𑀯𑀁𑀧𑀢𑀺𑀢𑁆𑀣𑁂𑀭𑀜𑁆𑀘 𑀧𑀝𑀺𑀘𑁆𑀘 𑀲𑀸𑀲𑀦𑀁 𑀢𑀸𑀯 𑀧𑀢𑀺𑀝𑁆𑀞𑀳𑀺. 𑀢𑀜𑁆𑀘 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀑𑀕𑀸𑀳𑁂𑀢𑁆𑀯𑀸 𑀬𑁂 𑀬𑁂 𑀧𑀦 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀢𑁂 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦𑁂𑀯 𑀲𑀸𑀲𑀦𑀁 𑀧𑀲𑀻𑀤𑀺𑀁𑀲𑀼. 𑀧𑀘𑁆𑀙𑀸 𑀧𑀦 𑀲𑁄𑀡𑀼𑀢𑁆𑀢𑀭𑀢𑁆𑀣𑁂𑀭𑀸 𑀫𑀳𑀼𑀲𑁆𑀲𑀸𑀳𑁂𑀦 𑀆𑀘𑀭𑀺𑀬 𑀆𑀡𑀢𑁆𑀢𑀺𑀬𑀸 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀸 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀢𑁂𑀦 𑀅𑀝𑁆𑀞𑀓𑀣𑀸𑀬𑀁 𑀏𑀢𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻𑀢𑀺 𑀓𑀸𑀭𑀺𑀢𑀧𑀘𑁆𑀘𑀬𑀯𑀲𑁂𑀦 𑀆𑀡𑀢𑁆𑀢𑀺𑀯𑀺𑀪𑀢𑁆𑀢𑀺𑀯𑀲𑁂𑀦𑀘 𑀯𑀼𑀢𑁆𑀢𑀁.

𑀢𑀤𑀸 𑀧𑀦 𑀲𑀼𑀯𑀡𑁆𑀡𑀪𑀽𑀫𑀺𑀭𑀝𑁆𑀞𑁂 𑀲𑀼𑀥𑀫𑁆𑀫𑀧𑀼𑀭𑁂 𑀲𑀺𑀭𑀺𑀫𑀸𑀲𑁄𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀜𑁆𑀘 𑀲𑀼𑀥𑀫𑁆𑀫𑀧𑀼𑀭𑀁 𑀦𑀸𑀫 𑀓𑁂𑀮𑀸𑀲𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀧𑀼𑀩𑁆𑀩𑀟𑁆𑀠𑀪𑀸𑀕𑁂𑀦 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀅𑀧𑀭𑀟𑁆𑀠𑀪𑀸𑀕𑁂𑀦 𑀪𑀽𑀫𑀺𑀢𑀮𑁂 𑀢𑀺𑀝𑁆𑀞𑀢𑀺. 𑀢𑀁𑀬𑁂𑀯 𑀕𑀼𑀴𑀧𑀸𑀘𑀓𑀸𑀦𑀁 𑀫𑀲𑁆𑀲𑀸𑀦𑀁 𑀕𑁂𑀳𑀲𑀤𑀺𑀲𑀸𑀦𑀺 𑀕𑁂𑀳𑀸𑀦𑀺 𑀬𑁂𑀪𑀼𑀬𑁆𑀬𑁂𑀦, 𑀢𑁂𑀦𑁂𑀯 𑀕𑁄𑀴𑀫𑀺𑀢𑁆𑀢𑀺𑀓 𑀦𑀸𑀫𑁂𑀦𑀸𑀧𑀺 𑀯𑁄𑀳𑀸𑀭𑀺𑀬𑀢𑀺. 𑀢𑀲𑁆𑀲 𑀧𑀦 𑀦𑀕𑀭𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑀫𑀻𑀧𑁂 𑀞𑀺𑀢𑀢𑁆𑀢𑀸 𑀤𑀓𑀬𑀓𑁆𑀔𑀺𑀦𑀻 𑀲𑀩𑁆𑀩𑀤𑀸 𑀆𑀕𑀦𑁆𑀢𑁆𑀯𑀸 𑀭𑀸𑀚𑀕𑁂𑀳𑁂 𑀚𑀸𑀢𑁂 𑀚𑀸𑀢𑁂 𑀓𑀼𑀫𑀸𑀭𑁂 𑀔𑀸𑀤𑀺.

𑀲𑁄𑀡𑀼𑀢𑁆𑀢𑀭𑀢𑁆𑀣𑁂𑀭𑀸𑀦𑀁 𑀲𑀫𑁆𑀧𑀢𑁆𑀢𑀤𑀺𑀯𑀲𑀬𑁂𑀯 𑀭𑀸𑀚𑀕𑁂𑀳𑁂 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀤𑀓𑀬𑀓𑁆𑀔𑀺𑀦𑀻𑀘 𑀔𑀸𑀤𑀺𑀲𑁆𑀲𑀸𑀫𑀻𑀢𑀺 𑀲𑀳 𑀧𑀜𑁆𑀘𑀳𑀺 𑀬𑀓𑁆𑀔𑀺𑀦𑀺𑀲𑀢𑁂𑀳𑀺 𑀆𑀕𑀢𑀸. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀪𑀸𑀬𑀺𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 𑀭𑀯𑀦𑁆𑀢𑀺. 𑀢𑀤𑀸 𑀣𑁂𑀭𑀸 𑀪𑀬𑀸𑀦𑀓𑀁 𑀲𑀻𑀳𑀲𑀻𑀲𑀯𑀲𑁂𑀦 𑀏𑀓𑀲𑀻𑀲𑀲𑀭𑀻𑀭𑀤𑁆𑀯𑀬𑀲𑀫𑁆𑀩𑀦𑁆𑀥𑀲𑀡𑁆𑀞𑀸𑀦𑀁 𑀫𑀦𑀼𑀲𑀻𑀳𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀬𑀓𑁆𑀔𑀺𑀦𑀺𑀁 𑀲𑀧𑀭𑀺𑀲𑀁 𑀧𑀮𑀸𑀧𑁂𑀲𑀼𑀁.

𑀣𑁂𑀭𑀸 𑀘 𑀧𑀼𑀦 𑀬𑀓𑁆𑀔𑀺𑀦𑀺𑀬𑀸 𑀅𑀦𑀸𑀕𑀫𑀦𑀢𑁆𑀣𑀸𑀬 𑀧𑀭𑀺𑀢𑁆𑀢𑀁 𑀅𑀓𑀁𑀲𑀼𑀢𑀲𑁆𑀫𑀺𑀜𑁆𑀘 𑀲𑀫𑀸𑀕𑀫𑁂 𑀆𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀅𑀤𑁂𑀲𑀬𑁆𑀬𑀼𑀁. 𑀲𑀝𑁆𑀞𑀺𑀫𑀢𑁆𑀢𑀲𑀳𑀲𑁆𑀲𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀧𑀭𑀸𑀬𑀦𑀸 𑀅𑀳𑁂𑀲𑀼𑀁. 𑀓𑀼𑀮𑀤𑀸𑀭𑀓𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼. 𑀓𑀼𑀮𑀥𑀻𑀢𑀸𑀦𑀁 𑀧𑀦 𑀤𑀺𑀖𑀟𑁆𑀠𑀲𑀳𑀲𑁆𑀲𑀁. 𑀭𑀸𑀚𑀓𑀼𑀫𑀸𑀭𑀸𑀦𑀁 𑀧𑀜𑁆𑀘𑀲𑀢𑀸𑀥𑀺𑀓𑀲𑀳𑀲𑁆𑀲𑀫𑀢𑁆𑀢𑀁 𑀧𑀩𑁆𑀩𑀚𑀺𑀁𑀲𑀼. 𑀅𑀯𑀲𑁂𑀲𑀸𑀧𑀺 𑀫𑀦𑀼𑀲𑁆𑀲𑀸 𑀲𑀭𑀡𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺. 𑀯𑀼𑀢𑁆𑀢𑀜𑁆𑀘 𑀅𑀝𑁆𑀞𑀓𑀣𑀸𑀬𑀁,𑁋

𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀲𑁄𑀡𑀼𑀢𑁆𑀢𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀺𑀲𑀸𑀘𑁂 𑀦𑀺𑀤𑁆𑀥𑀫𑀺𑀢𑁆𑀯𑀸𑀦, 𑀩𑁆𑀭𑀳𑁆𑀫𑀚𑀸𑀮𑁂 𑀫𑀤𑁂𑀲𑀺𑀲𑀼𑀦𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀓𑀼𑀫𑀸𑀭𑀸𑀦𑀁 𑀲𑁄𑀡𑀼𑀢𑁆𑀢𑀭𑀦𑀸𑀫𑁂𑀳𑀺𑀬𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀯𑀲𑁂𑀲𑀤𑁆𑀯𑀸𑀭𑀓𑀸𑀦𑀫𑁆𑀧𑀺 𑀭𑀓𑁆𑀔𑀲𑀪𑀬𑀢𑁄 𑀯𑀺𑀫𑁄𑀘𑀦𑀢𑁆𑀣𑀁 𑀢𑀸𑀮𑀧𑀢𑁆𑀢𑀪𑀼𑀚𑀧𑀢𑁆𑀢𑁂𑀲𑀼 𑀣𑁂𑀭𑁂𑀳𑀺 𑀫𑀸𑀧𑀺𑀢𑀁 𑀫𑀦𑀼𑀲𑀻𑀳𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀫𑀢𑁆𑀣𑀓𑁂 𑀞𑀧𑁂𑀲𑀼𑀁. 𑀫𑀦𑀼𑀲𑁆𑀲𑀸𑀘 𑀲𑀺𑀮𑀸𑀫𑀬𑀁 𑀫𑀦𑀼𑀲𑀻𑀳𑀭𑀽𑀧𑀁 𑀓𑀢𑁆𑀯𑀸 𑀲𑀼𑀥𑀫𑁆𑀫𑀧𑀼𑀭𑀲𑁆𑀲 𑀏𑀲𑀦𑁆𑀦𑁂 𑀧𑀤𑁂𑀲𑁂 𑀞𑀧𑁂𑀲𑀼𑀁. 𑀢𑀁 𑀬𑀸𑀯𑀚𑁆𑀚𑀢𑀦𑀸 𑀅𑀢𑁆𑀣𑀻𑀢𑀺. 𑀇𑀘𑁆𑀘𑁂𑀯𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀜𑁆𑀘𑀢𑀺𑀁𑀲𑀸𑀥𑀺𑀓𑁂 𑀤𑁆𑀯𑀺𑀯𑀲𑁆𑀲𑀲𑀢𑁂 𑀲𑀫𑁆𑀧𑀢𑁆𑀢𑁂 𑀲𑁄𑀡𑀼𑀢𑁆𑀢𑀭𑀢𑁆𑀣𑁂𑀭𑀸 𑀆𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀕𑁆𑀕𑀳𑀁 𑀅𑀓𑀁𑀲𑀽𑀢𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀢𑀢𑀺𑀬𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀢𑀢𑁄 𑀧𑀘𑁆𑀙𑀸 𑀙𑀲𑀢𑀸𑀥𑀺𑀓𑁂 𑀲𑀳𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀲𑀸𑀲𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀭𑀸𑀫𑀜𑁆𑀜𑀭𑀝𑁆𑀞𑀁 𑀤𑀸𑀫𑀭𑀺𑀓𑀘𑁄𑀭𑀪𑀬𑁂𑀦 𑀧𑀚𑁆𑀚𑀭𑀭𑁄𑀕𑀪𑀬𑁂𑀦 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀪𑀬𑁂𑀦𑀘𑀸𑀢𑀺 𑀢𑀻𑀳𑀺 𑀪𑀬𑁂𑀳𑀺 𑀆𑀓𑀼𑀮𑀺𑀢𑀁 𑀅𑀳𑁄𑀲𑀺. 𑀢𑀤𑀸 𑀘 𑀢𑀢𑁆𑀣 𑀲𑀸𑀲𑀦𑀁 𑀤𑀼𑀩𑁆𑀩𑀮𑀁 𑀅𑀳𑁄𑀲𑀺, 𑀬𑀣𑀸 𑀉𑀤𑀓𑁂 𑀫𑀦𑁆𑀤𑁂 𑀢𑀢𑁆𑀭𑀚𑀸𑀢𑀁 𑀉𑀧𑁆𑀧𑀮𑀁 𑀉𑀧𑁆𑀧𑀮𑀁 𑀤𑀼𑀩𑁆𑀩𑀮𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽𑀧𑀺 𑀲𑀸𑀲𑀦𑀁 𑀬𑀣𑀸 𑀓𑀸𑀫𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑀸.

𑀲𑀽𑀭𑀺𑀬𑀓𑀼𑀫𑀸𑀭𑀲𑁆𑀲 𑀦𑀸𑀫 𑀫𑀦𑁄𑀳𑀭𑀺𑀭𑀜𑁆𑀜𑁄 𑀧𑀦 𑀓𑀸𑀮𑁂 𑀲𑀸𑀲𑀦𑀁 𑀅𑀢𑀺𑀯𑀺𑀬 𑀤𑀼𑀩𑁆𑀩𑀮𑀁 𑀅𑀳𑁄𑀲𑀺. 𑀚𑀺𑀦𑀘𑀓𑁆𑀓𑁂 𑀏𑀓𑀙𑀲𑀢𑀸𑀥𑀺𑀓𑁂 𑀯𑀲𑁆𑀲𑀲𑀳𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 𑀓𑀮𑀺𑀬𑀼𑀕𑁂𑀘 𑀏𑀓𑀽𑀦𑀯𑀻𑀲𑀢𑀸𑀥𑀺𑀓𑁂 𑀘𑀢𑀼𑀯𑀲𑁆𑀲𑀲𑀢𑁂 𑀲𑀫𑁆𑀧𑀢𑁆𑀢𑁂 𑀅𑀭𑀺𑀫𑀤𑁆𑀤𑀦𑀦𑀕𑀭𑁂 𑀅𑀦𑀼𑀭𑀼𑀤𑁆𑀥𑀸 𑀦𑀸𑀫 𑀭𑀸𑀚𑀸 𑀢𑀢𑁄 𑀲𑀳 𑀧𑀺𑀝𑀓𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀦𑁂𑀲𑀺.

𑀢𑀢𑁄 𑀧𑀘𑁆𑀙𑀸 𑀚𑀺𑀦𑀘𑀓𑁆𑀓𑁂 𑀦𑀯𑀸𑀥𑀺𑀓𑁂 𑀲𑀢𑁆𑀢𑀲𑀢𑁂 𑀲𑀳𑀲𑁆𑀲𑁂 𑀘 𑀲𑀫𑁆𑀧𑀢𑁆𑀢𑁂 𑀮𑀗𑁆𑀓𑀸𑀤𑀻𑀧𑁂 𑀲𑀺𑀭𑀺𑀲𑀗𑁆𑀖𑀩𑁄𑀥𑀺𑀧𑀭𑀓𑁆𑀓𑀫𑀩𑀸𑀳𑀼𑀫𑀳𑀸𑀭𑀸𑀚𑀸 𑀲𑀸𑀲𑀦𑀁 𑀲𑁄𑀥𑁂𑀲𑀺.

𑀢𑀢𑁄 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀉𑀧𑀭𑀺 𑀓𑀮𑀺𑀬𑀼𑀕𑁂 𑀤𑁆𑀯𑀢𑁆𑀢𑀺𑀁𑀲𑀸𑀥𑀺𑀓𑁂 𑀧𑀜𑁆𑀘𑀲𑀢𑁂 𑀲𑀫𑁆𑀧𑀢𑁆𑀢𑁂 𑀉𑀢𑁆𑀢𑀭𑀸𑀚𑀻𑀯𑁄 𑀦𑀸𑀫 𑀣𑁂𑀭𑁄 𑀲𑀸𑀲𑀦𑁂 𑀧𑀸𑀓𑀝𑁄 𑀅𑀳𑁄𑀲𑀺.

𑀲𑁄 𑀧𑀦 𑀭𑀸𑀫𑀜𑁆𑀜𑀭𑀝𑁆𑀞𑀯𑀸𑀲𑀺𑀦𑁄 𑀅𑀭𑀺𑀬𑀸𑀯𑀁𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀅𑀭𑀺𑀬𑀸𑀯𑀁𑀲𑀢𑁆𑀣𑁂𑀭𑁄 𑀧𑀦 𑀓𑀧𑁆𑀧𑀼𑀗𑁆𑀕𑀦𑀕𑀭𑀯𑀸𑀲𑀺𑀦𑁄 𑀫𑀳𑀸𑀓𑀸𑀴𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀫𑀳𑀸𑀓𑀸𑀴𑀢𑁆𑀣𑁂𑀭𑁄 𑀧𑀦 𑀲𑀼𑀥𑀫𑁆𑀫𑀧𑀼𑀭𑀯𑀸𑀲𑀺𑀦𑁄 𑀧𑁆𑀭𑀸𑀦𑀤𑀲𑁆𑀲𑀺𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀅𑀬𑀁 𑀧𑀦 𑀉𑀢𑁆𑀢𑀭𑀸𑀚𑀻𑀯𑀙𑀧𑁆𑀧𑀤𑀢𑁆𑀣𑁂𑀭𑀸𑀦𑀁 𑀯𑀁𑀲𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸.

𑀲𑁄 𑀧𑀦 𑀧𑁆𑀭𑀸𑀦𑀤𑀲𑁆𑀲𑀺𑀢𑁆𑀣𑁂𑀭𑁄 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀬𑁄 𑀮𑀪𑀺𑀢𑁆𑀯𑀸 𑀦𑀺𑀘𑁆𑀘𑀁 𑀅𑀪𑀺𑀡𑁆𑀳𑀁 𑀧𑀸𑀢𑁄𑀯 𑀫𑀕𑀥𑀭𑀝𑁆𑀞𑁂 𑀉𑀭𑀼𑀯𑁂𑀮𑀦𑀺𑀕𑀫𑁂 𑀫𑀳𑀸𑀩𑁄𑀥𑀺𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀲𑀼𑀥𑀫𑁆𑀫𑀧𑀼𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺. 𑀇𑀤𑀁 𑀣𑁂𑀭𑀲𑁆𑀲 𑀦𑀺𑀩𑀤𑁆𑀥𑀯𑀢𑁆𑀢𑀼𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀼𑀥𑀫𑁆𑀫𑀧𑀼𑀭𑀢𑁄 𑀫𑀕𑀥𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀉𑀭𑀼𑀯𑁂𑀮𑀦𑀺𑀕𑀫𑁂 𑀯𑀸𑀡𑀺𑀚𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀢𑀤𑀸𑀓𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀦𑀓𑀸𑀮𑁂 𑀲𑀼𑀥𑀫𑁆𑀫𑀧𑀼𑀭 𑀯𑀸𑀲𑀻𑀦𑀁 𑀓𑀣𑁂𑀲𑀼𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀉𑀢𑁆𑀢𑀭𑀸𑀚𑀻𑀯𑀢𑁆𑀣𑁂𑀭𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁂𑀦 𑀙𑀧𑁆𑀧𑀤𑁂𑀦 𑀦𑀸𑀫 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀲𑀻𑀳𑀴𑀤𑀻𑀧𑀁 𑀕𑀘𑁆𑀙𑀺. 𑀲𑀻𑀳𑀴𑀤𑀻𑀧𑀯𑀸𑀲𑀺𑀦𑁄 𑀘 𑀪𑀺𑀓𑁆𑀔𑀽 𑀫𑀬𑀁 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀯𑀁𑀲𑀺𑀓𑀸 𑀪𑀯𑀸𑀫, 𑀢𑀼𑀫𑁆𑀳𑁂𑀧𑀺 𑀲𑁄𑀡𑀼𑀢𑁆𑀢𑀭𑀢𑁆𑀣𑁂𑀭𑀸𑀦𑀁 𑀯𑀁𑀲𑀺𑀓𑀸 𑀪𑀯𑀣, 𑀢𑀲𑁆𑀫𑀸 𑀫𑀬𑀁 𑀏𑀓𑀯𑀁𑀲𑀺𑀓𑀸 𑀪𑀯𑀸𑀫 𑀲𑀫𑀸𑀦 𑀯𑀸𑀤𑀺𑀓𑀸𑀢𑀺 𑀯𑀢𑁆𑀯𑀸 𑀙𑀧𑁆𑀧𑀤𑀲𑀸𑀫𑀡𑁂𑀭𑀲𑁆𑀲 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀅𑀓𑀁𑀲𑀼. 𑀢𑀢𑁄 𑀧𑀘𑁆𑀙𑀸 𑀘𑁂𑀢𑀺𑀬 𑀯𑀦𑁆𑀤𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀸𑀚𑀻𑀯𑀢𑁆𑀣𑁂𑀭𑁄 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀔𑁂𑀦 𑀅𑀭𑀺𑀫𑀤𑁆𑀤𑀦𑀦𑀕𑀭𑀁 𑀧𑀘𑁆𑀘𑀸𑀕𑀫𑀸𑀳𑀺.

𑀙𑀧𑁆𑀧𑀤𑀲𑁆𑀲 𑀧𑀦 𑀏𑀢𑀤𑀳𑁄𑀲𑀺,- 𑀲𑀘𑀸𑀳𑀁 𑀆𑀘𑀭𑀺𑀬𑁂𑀦 𑀲𑀳 𑀚𑀫𑁆𑀩𑀼𑀤𑀻𑀧𑀁 𑀕𑀘𑁆𑀙𑁂𑀬𑁆𑀬𑀁, 𑀩𑀳𑀽𑀳𑀺 𑀜𑀸𑀢𑀺𑀩𑀮𑀺𑀩𑁄𑀥𑁂𑀳𑀺 𑀧𑀭𑀺𑀬𑀢𑁆𑀢𑀼𑀕𑁆𑀕𑀳𑀡𑁂 𑀅𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬, 𑀢𑁂𑀦 𑀳𑀺 𑀲𑀻𑀳𑀴𑀤𑀻𑀧𑁂𑀬𑁂𑀯 𑀯𑀲𑀺𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀫𑀼𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀻𑀢𑀺.

𑀢𑀢𑁄 𑀆𑀘𑀭𑀺𑀬𑀲𑁆𑀲 𑀑𑀓𑀸𑀲𑀁 𑀬𑀸𑀘𑀺𑀢𑁆𑀯𑀸 𑀲𑀻𑀳𑀴𑀤𑀻𑀧𑁂𑀬𑁂𑀯 𑀧𑀝𑀺𑀯𑀲𑀺. 𑀲𑀻𑀳𑀴𑀤𑀻𑀧𑁂 𑀯𑀲𑀺𑀢𑁆𑀯𑀸 𑀬𑀸𑀯 𑀮𑀤𑁆𑀥𑀢𑁆𑀣𑁂𑀭𑀲𑀫𑁆𑀫𑀼𑀢𑀺𑀓𑀸 𑀧𑀭𑀺𑀬𑀢𑁆𑀢𑀺𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀧𑀼𑀦 𑀚𑀫𑁆𑀩𑀼𑀤𑀻𑀧𑀁 𑀧𑀘𑁆𑀘𑀸𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀢𑀲𑁆𑀲 𑀏𑀢𑀤𑀳𑁄𑀲𑀺,𑁋 𑀅𑀳𑀁 𑀏𑀓𑀓𑁄𑀯 𑀕𑀘𑁆𑀙𑀦𑁆𑀢𑁄 𑀲𑀘𑁂 𑀫𑀫 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀲𑀘𑁂𑀧𑀺 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀇𑀘𑁆𑀙𑁂𑀬𑁆𑀬𑀁, 𑀏𑀯𑀁 𑀲𑀢𑀺 𑀯𑀺𑀲𑀼𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀽𑀡𑁂𑀬𑁆𑀬𑀁, 𑀢𑀲𑁆𑀫𑀸 𑀧𑀺𑀝𑀓𑀥𑀭𑁂𑀳𑀺 𑀘𑀢𑀽𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀘𑁂𑀬𑁆𑀬𑀁, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺.

𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀫𑀮𑀺𑀢𑁆𑀢𑀺𑀕𑀸𑀫𑀯𑀸𑀲𑀺𑀦𑀸 𑀲𑀺𑀯𑀮𑀺𑀢𑁆𑀣𑁂𑀭𑁂𑀦 𑀓𑀫𑁆𑀩𑁄𑀚𑀭𑀜𑁆𑀜𑁄 𑀧𑀼𑀢𑁆𑀢𑀪𑀽𑀢𑁂𑀦 𑀢𑀸𑀫𑀮𑀺𑀦𑁆𑀤𑀢𑁆𑀣𑁂𑀭𑁂𑀦 𑀓𑀺𑀜𑁆𑀘𑀺𑀧𑀼𑀭𑀯𑀸𑀲𑀺𑀦𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀭𑀸𑀳𑀼𑀮𑀢𑁆𑀣𑁂𑀭𑁂𑀦𑀘𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀦𑀸𑀯𑀸𑀬 𑀧𑀘𑁆𑀘𑀸𑀕𑀘𑁆𑀙𑀺. 𑀢𑁂 𑀘 𑀣𑁂𑀭𑀸 𑀧𑀺𑀝𑀓𑀥𑀭𑀸 𑀅𑀳𑁂𑀲𑀼𑀁 𑀤𑀓𑁆𑀔𑀸 𑀣𑀸𑀫𑀲𑀫𑁆𑀧𑀦𑁆𑀦𑀸 𑀘. 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀭𑀸𑀳𑀼𑀮𑀢𑁆𑀣𑁂𑀭𑁄 𑀣𑀸𑀫𑀲𑀫𑁆𑀧𑀦𑁆𑀦𑁄. 𑀓𑀼𑀲𑀺𑀫𑀦𑀕𑀭𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀉𑀧𑀓𑀝𑁆𑀞𑀯𑀲𑁆𑀲𑀽𑀧𑀕𑀫𑀦𑀓𑀸𑀮𑁄 𑀳𑀼𑀢𑁆𑀯𑀸 𑀅𑀭𑀺𑀫𑀤𑁆𑀤𑀦𑀦𑀕𑀭𑁂 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀓𑀼𑀲𑀺𑀫𑀦𑀕𑀭𑀬𑁂𑀯 𑀯𑀲𑁆𑀲𑀁 𑀉𑀧𑀕𑀫𑀺𑀁𑀲𑀼. 𑀢𑁂𑀲𑀁 𑀯𑀲𑁆𑀲𑀽𑀧𑀕𑀫𑀦𑀯𑀺𑀳𑀸𑀭𑀯𑀢𑁆𑀣𑀼 𑀆𑀭𑀸𑀫𑀧𑀸𑀓𑀸𑀭𑁄 𑀘 𑀓𑀼𑀲𑀺𑀫𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀲𑀸𑀕𑁂 𑀬𑀸𑀯𑀚𑁆𑀚𑀢𑀦𑀸 𑀅𑀢𑁆𑀣𑀺.

𑀯𑀲𑁆𑀲𑀁𑀯𑀼𑀝𑁆𑀞𑀓𑀸𑀮𑁂 𑀧𑀦 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀢𑁂 𑀧𑀜𑁆𑀘 𑀣𑁂𑀭𑀸 𑀅𑀭𑀺𑀫𑀤𑁆𑀤𑀦𑀦𑀕𑀭𑀁 𑀅𑀕𑀫𑀁𑀲𑀼. 𑀉𑀢𑁆𑀢𑀭𑀸𑀚𑀻𑀯𑀢𑁆𑀣𑁂𑀭𑁄𑀘 𑀅𑀭𑀺𑀫𑀤𑁆𑀤𑀦𑀦𑀕𑀭 𑀯𑀸𑀲𑀻𑀳𑀺 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀲𑀗𑁆𑀖𑀓𑀫𑁆𑀫𑀸𑀦𑀺 𑀅𑀓𑀸𑀲𑀺. 𑀓𑀺𑀜𑁆𑀘𑀸𑀧𑀺 𑀘𑁂𑀢𑁆𑀣 𑀉𑀢𑁆𑀢𑀭𑀸𑀚𑀻𑀯𑀢𑁆𑀣𑁂𑀭𑀸𑀤𑀬𑁄 𑀲𑀻𑀳𑀴𑀤𑀻𑀧𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀭𑀺𑀫𑀤𑁆𑀤𑀦𑀦𑀕𑀭𑁂 𑀯𑀲𑀺𑀢𑁆𑀯𑀸 𑀲𑀸𑀲𑀦𑀁 𑀅𑀦𑀼𑀕𑁆𑀕𑀳𑁂𑀲𑀼𑀁, 𑀭𑀸𑀫𑀜𑁆𑀜𑀭𑀝𑁆𑀞𑁂 𑀧𑀦 𑀚𑀸𑀢𑀢𑁆𑀢𑀸 𑀧𑀼𑀩𑁆𑀩𑁂 𑀘 𑀢𑀢𑁆𑀣 𑀦𑀺𑀯𑀸𑀲𑀢𑁆𑀢𑀸 𑀇𑀥 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀤𑀮𑀦𑀕𑀭𑁂 𑀧𑀤𑀻𑀧𑀚𑁂𑀬𑁆𑀬𑀕𑀸𑀫𑁂 𑀚𑀸𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀫𑀳𑀮𑁆𑀮𑀓𑀲𑁆𑀲𑀫𑀡𑁂𑀭𑁄 𑀏𑀓𑁄 𑀅𑀭𑀺𑀫𑀤𑁆𑀤𑀦𑀦𑀕𑀭𑀁 𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀬𑀢𑁆𑀢𑀺 𑀧𑀭𑀺𑀬𑀧𑀼𑀡𑀺. 𑀲𑁄 𑀩𑀳𑀼𑀲𑁆𑀲𑀼𑀢𑁄 𑀅𑀳𑁄𑀲𑀺 𑀤𑀓𑁆𑀔𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀘. 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀦𑀭𑀧𑀢𑀺𑀘𑀜𑁆𑀜𑀺𑀲𑀽𑀭𑀸𑀚𑀸 𑀘𑀺𑀦𑁆𑀢𑁂𑀲𑀺,- 𑀲𑀘𑁂𑀲𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑁄 𑀪𑀯𑁂𑀬𑁆𑀬, 𑀆𑀘𑀭𑀺𑀬𑀁 𑀓𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀺 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺. 𑀭𑀸𑀚𑀸 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀯𑀻𑀫𑀁𑀲𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀘 𑀢𑀲𑁆𑀲 𑀙𑀺𑀦𑁆𑀦𑀧𑀸𑀤𑀗𑁆𑀕𑀼𑀝𑁆𑀞𑀕𑁆𑀕𑀢𑀁 𑀧𑀲𑁆𑀲𑀺𑀢𑁆𑀯𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀏𑀯𑀁 𑀯𑀺𑀓𑀮𑀗𑁆𑀕𑀧𑀘𑁆𑀘𑀗𑁆𑀕𑁄 𑀪𑀯𑁂𑀬𑁆𑀬, 𑀧𑀥𑀸𑀦𑀸𑀘𑀭𑀺𑀬𑀝𑁆𑀞𑀸𑀦𑁂 𑀞𑀧𑁂𑀢𑀼𑀁 𑀦 𑀬𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀧𑀥𑀸𑀦𑀸𑀘𑀭𑀺𑀬𑀪𑀸𑀯𑀁 𑀦 𑀅𑀓𑀸𑀲𑀺. 𑀧𑀽𑀚𑀸𑀲𑀓𑁆𑀓𑀸 𑀭𑀫𑀢𑁆𑀢𑁂𑀦𑁂𑀯 𑀅𑀦𑀼𑀕𑁆𑀕𑀳𑀁 𑀅𑀓𑀸𑀲𑀺. 𑀏𑀓𑀲𑁆𑀫𑀺𑀜𑁆𑀘 𑀓𑀸𑀮𑁂 𑀥𑀫𑁆𑀫𑀯𑀺𑀮𑀸𑀲𑁄𑀢𑀺 𑀮𑀜𑁆𑀙𑀁 𑀤𑀢𑁆𑀯𑀸 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀸𑀲𑀦𑀁 𑀲𑁄𑀥𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀁 𑀓𑀭𑁄𑀳𑀻𑀢𑀺 𑀭𑀸𑀫𑀜𑁆𑀜𑀭𑀝𑁆𑀞𑀁 𑀧𑁂𑀲𑁂𑀲𑀺.

𑀲𑁄𑀘 𑀭𑀸𑀫𑀜𑁆𑀜𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀤𑀮𑀦𑀕𑀭𑁂 𑀩𑀳𑀼𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫 𑀯𑀺𑀦𑀬𑀁 𑀯𑀸𑀘𑁂𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀲𑀺. 𑀢𑀢𑁆𑀣 𑀘 𑀭𑀸𑀫𑀜𑁆𑀜𑀫𑀦𑀼𑀲𑁆𑀲𑀸 𑀢𑀲𑁆𑀲 𑀥𑀫𑁆𑀫𑀯𑀺𑀮𑀸𑀲𑀢𑁆𑀣𑁂𑀭𑀲𑁆𑀲 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀸 𑀲𑀻𑀳𑀴𑀪𑀺𑀓𑁆𑀔𑀼 𑀕𑀡𑀸𑀢𑀺 𑀯𑁄𑀳𑀸𑀭𑀦𑁆𑀢𑀺. 𑀇𑀘𑁆𑀘𑁂𑀯𑀁 𑀲𑀻𑀳𑀴𑀤𑀻𑀧𑀺𑀓𑀲𑁆𑀲 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀺𑀲𑁆𑀲𑀁 𑀥𑀫𑁆𑀫𑀯𑀺𑀮𑀸𑀲𑀁 𑀧𑀝𑀺𑀘𑁆𑀘 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀻𑀳𑀴𑀤𑀻𑀧𑀢𑁄 𑀲𑀸𑀲𑀦𑀲𑁆𑀲 𑀆𑀕𑀢𑀫𑀕𑁆𑀕𑁄𑀢𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀘𑀢𑀼𑀢𑁆𑀣𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀫𑀼𑀢𑁆𑀢𑀺𑀫𑀦𑀕𑀭𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀆𑀘𑀭𑀺𑀬𑀸 𑀩𑀼𑀤𑁆𑀥𑀯𑀁𑀲𑀢𑁆𑀣𑁂𑀭𑀫𑀳𑀸𑀦𑀸𑀕𑀢𑁆𑀣𑁂𑀭𑀸 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀫𑀳𑀸𑀳𑀸𑀭𑀯𑀸𑀲𑀺𑀕𑀡𑀯𑀁𑀲𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀼𑀦 𑀲𑀺𑀓𑁆𑀔𑀁 𑀕𑀡𑁆𑀳𑀺𑀢𑁆𑀯𑀸 𑀫𑀼𑀢𑁆𑀢𑀺𑀫𑀦𑀕𑀭𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀼𑀢𑁆𑀢𑀺𑀫𑀦𑀕𑀭𑀯𑀸𑀲𑀻𑀢𑀺 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀲𑀗𑁆𑀖𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀲𑀼𑀁. 𑀢𑁂𑀘 𑀣𑁂𑀭𑁂 𑀧𑀝𑀺𑀘𑁆𑀘 𑀭𑀸𑀫𑀜𑁆𑀜𑀭𑀝𑁆𑀞𑁂 𑀧𑀼𑀦 𑀲𑀻𑀳𑀴𑀤𑀻𑀧𑀢𑁄 𑀲𑀸𑀲𑀦𑀁 𑀆𑀕𑀢𑀦𑁆𑀢𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀧𑀜𑁆𑀘𑀫𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀢𑀢𑁄 𑀧𑀘𑁆𑀙𑀸𑀘 𑀫𑀼𑀢𑁆𑀢𑀺𑀫𑀦𑀕𑀭𑁂 𑀲𑁂𑀢𑀺𑀪𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀫𑀸𑀢𑀼𑀬𑀸 𑀆𑀘𑀭𑀺𑀬𑁄 𑀫𑁂𑀥𑀗𑁆𑀓𑀭𑁄 𑀦𑀸𑀫 𑀣𑁂𑀭𑁄 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀲𑀻𑀳𑀴𑀤𑀻𑀧𑁂 𑀅𑀭𑀜𑁆𑀜𑀯𑀸𑀲𑀻𑀦𑀁 𑀫𑀳𑀸𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀼𑀦 𑀲𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀬𑁂 𑀢𑀺𑀧𑀼𑀲𑀻𑀲𑀘𑁆𑀙𑀦𑁆𑀦𑁂 𑀲𑁂𑀢𑀺𑀪𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀫𑀸𑀢𑀼𑀬𑀸 𑀓𑀸𑀭𑀸𑀯𑀺𑀢𑁂 𑀯𑀺𑀳𑀸𑀭𑁂 𑀦𑀺𑀲𑀺𑀤𑀺𑀢𑁆𑀯𑀸 𑀲𑀸𑀲𑀦𑀁 𑀅𑀦𑀼𑀕𑁆𑀕𑀳𑁂𑀲𑀺. 𑀮𑁄𑀓𑀤𑀻𑀧𑀓𑀲𑀸𑀭𑀜𑁆𑀘 𑀦𑀸𑀫 𑀕𑀦𑁆𑀣𑀁 𑀅𑀓𑀸𑀲𑀺. 𑀅𑀣𑀸𑀧𑀭𑀺𑀫𑁆𑀧𑀺 𑀫𑀼𑀢𑁆𑀢𑀺𑀫𑀦𑀕𑀭𑁂𑀬𑁂𑀯 𑀲𑀼𑀯𑀡𑁆𑀡𑀲𑁄𑀪𑀡𑁄 𑀦𑀸𑀫 𑀣𑁂𑀭𑁄 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀕𑀡𑀯𑀁𑀲𑀪𑀽𑀢𑀸𑀦𑀁 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀼𑀦 𑀲𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀫𑀼𑀢𑁆𑀢𑀺𑀫𑀦𑀕𑀭𑀫𑁂𑀯 𑀧𑀘𑁆𑀘𑀸𑀕𑀘𑁆𑀙𑀺.

𑀲𑁄 𑀧𑀦 𑀣𑁂𑀭𑁄 𑀅𑀭𑀜𑁆𑀜𑁂𑀬𑁂𑀯 𑀯𑀲𑀺. 𑀥𑀼𑀢𑀗𑁆𑀕𑀥𑀭𑁄 𑀘 𑀅𑀳𑁄𑀲𑀺 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸 𑀓𑀸𑀫𑁄 𑀤𑀓𑁆𑀔𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀘. 𑀲𑀻𑀳𑀴𑀤𑀻𑀧𑁂 𑀓𑀮𑀫𑁆𑀩𑀼𑀫𑁆𑀳𑀺 𑀦𑀸𑀫 𑀚𑀸𑀢𑀲𑁆𑀲𑀭𑁂 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀅𑀢𑀺𑀭𑁂𑀓𑀧𑀜𑁆𑀘𑀯𑀕𑁆𑀕𑁂𑀦 𑀯𑀦𑀭𑀢𑀦𑀁 𑀦𑀸𑀫 𑀲𑀗𑁆𑀖𑀭𑀸𑀚𑀁 𑀉𑀧𑀚𑁆𑀛𑀸𑀬𑀁 𑀓𑀢𑁆𑀯𑀸 𑀭𑀸𑀳𑀼𑀮𑀪𑀤𑁆𑀤𑀁 𑀦𑀸𑀫 𑀯𑀺𑀚𑀬𑀩𑀸𑀳𑀼𑀭𑀜𑁆𑀜𑁄 𑀆𑀘𑀭𑀺𑀬𑀪𑀽𑀢𑀁 𑀣𑁂𑀭𑀁 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑀁 𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺. 𑀲𑁄𑀘 𑀣𑁂𑀭𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀼𑀢𑁆𑀢𑀺𑀫𑀦𑀕𑀭𑁂𑀬𑁂𑀯 𑀯𑀲𑀺𑀢𑁆𑀯𑀸 𑀕𑀡𑀁 𑀯𑀟𑁆𑀠𑁂𑀢𑁆𑀯𑀸 𑀲𑀸𑀲𑀦𑀁 𑀅𑀦𑀼𑀕𑁆𑀕𑀳𑁂𑀲𑀺. 𑀏𑀢𑁂 𑀘 𑀤𑁆𑀯𑁂 𑀣𑁂𑀭𑁂 𑀧𑀝𑀺𑀘𑁆𑀘 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀻𑀳𑀴𑀤𑀻𑀧𑀢𑁄 𑀲𑀸𑀲𑀦𑀁 𑀆𑀕𑀢𑀁.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀙𑀝𑁆𑀞𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀢𑀢𑁄 𑀧𑀘𑁆𑀙𑀸 𑀲𑀸𑀲𑀦𑀯𑀲𑁂𑀦 𑀤𑁆𑀯𑀺𑀯𑀲𑁆𑀲𑀸𑀥𑀺𑀓𑁂 𑀤𑁆𑀯𑀺𑀲𑀳𑀲𑁆𑀲𑁂 𑀓𑀮𑀺𑀬𑀼𑀕𑀢𑁄 𑀏𑀓𑀸𑀲𑀻𑀢𑀺𑀓𑁂 𑀲𑀫𑁆𑀧𑀢𑁆𑀢𑁂 𑀳𑀁𑀲𑀸𑀯𑀢𑀻𑀦𑀕𑀭𑁂 𑀲𑀺𑀭𑀺𑀧𑀭𑀫𑀫𑀳𑀸𑀥𑀫𑁆𑀫𑀭𑀸𑀚𑀸𑀢𑀺 𑀮𑀤𑁆𑀥𑀦𑀸𑀫𑁄 𑀥𑀫𑁆𑀫𑀘𑁂𑀢𑀺𑀬𑀭𑀸𑀚𑀸 𑀓𑀼𑀲𑀺𑀫𑀫𑀡𑁆𑀟𑀮𑁂 𑀳𑀁𑀲𑀸𑀯𑀢𑀻𑀫𑀡𑁆𑀟𑀮𑁂 𑀫𑀼𑀢𑁆𑀢𑀺𑀫𑀫𑀡𑁆𑀟𑀮𑁂 𑀘 𑀭𑀝𑁆𑀞𑀯𑀸𑀲𑀺𑀦𑁄 𑀲𑀧𑀚𑀁𑀯𑀺𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀓𑁆𑀔𑀺𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀘 𑀭𑀸𑀚𑀸 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀘𑀢𑀽𑀲𑀼 𑀘 𑀯𑁂𑀤𑁂𑀲𑀼 𑀩𑁆𑀬𑀸𑀓𑀭𑀡𑀘𑁆𑀙𑀦𑁆𑀤𑀸𑀮𑀗𑁆𑀓𑀸𑀭𑀸𑀤𑀻𑀲𑀼 𑀘 𑀙𑁂𑀓𑁄 𑀲𑀺𑀓𑁆𑀔𑀺𑀢𑀦𑀸𑀦𑀸𑀲𑀺𑀧𑁆𑀧𑁄 𑀦𑀸𑀦𑀸𑀪𑀸𑀲𑀸𑀲𑀼 𑀘 𑀧𑀲𑀼𑀢𑁄 𑀲𑀤𑁆𑀥𑀸𑀲𑀻𑀮𑀸𑀤𑀺𑀕𑀼𑀡𑁄𑀧𑁂𑀢𑁄 𑀓𑀼𑀫𑀼𑀤𑀓𑀼𑀦𑁆𑀤𑀲𑀭𑀤𑀘𑀦𑁆𑀤𑀺𑀓𑀸𑀲𑀫𑀸𑀦𑀲𑀺𑀢𑀧𑀚𑀧𑀢𑀺𑀪𑀽𑀢𑁄 𑀘 𑀲𑀸𑀲𑀦𑁂 𑀘 𑀅𑀢𑀺𑀧𑁆𑀧𑀲𑀦𑁆𑀦𑁄 𑀅𑀳𑁄𑀲𑀺.

𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑁄 𑀘𑀺𑀦𑁆𑀢𑁂𑀲𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀦𑀸𑀫 𑀧𑀩𑁆𑀩𑀚𑁆𑀚𑀉𑀧𑀲𑀫𑁆𑀧𑀤𑀢𑀸𑀯𑁂𑀦 𑀲𑀫𑁆𑀩𑀦𑁆𑀥𑀁, 𑀉𑀧𑀲𑀫𑁆𑀧𑀤𑀪𑀸𑀯𑁄 𑀘 𑀲𑀻𑀫𑀧𑀭𑀺𑀲𑀯𑀢𑁆𑀣𑀼 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀲𑀻𑀫𑀯𑀺𑀦𑀺𑀘𑁆𑀙𑀬𑀁 𑀢𑀲𑁆𑀲𑀁 𑀯𑀡𑁆𑀡𑀦𑀁 𑀯𑀺𑀦𑀬𑀲𑀗𑁆𑀕𑀳𑀁 𑀢𑀲𑁆𑀲𑀁𑀯𑀡𑁆𑀡𑀦𑀁 𑀲𑀻𑀫𑀸𑀮𑀗𑁆𑀓𑀸𑀭 𑀲𑀻𑀫𑀲𑀗𑁆𑀕𑀳𑀜𑁆𑀘 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀼𑀩𑁆𑀩𑀸𑀧𑀭𑀁 𑀢𑀼𑀮𑀬𑀺𑀢𑁆𑀯𑀸 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀈𑀤𑀺𑀲𑁄 𑀕𑀦𑁆𑀣𑀓𑀸𑀭𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀈𑀤𑀺𑀲𑁄𑀢𑀺 𑀧𑀲𑁆𑀲𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀩𑀤𑁆𑀥𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑁂𑀲𑁆𑀲𑀭𑀸𑀤𑀬𑁄 𑀲𑀻𑀫𑀸𑀬𑁄 𑀩𑀳𑀼𑀓𑀸𑀧𑀺 𑀲𑀫𑀸𑀦𑀸 𑀅𑀬𑀁 𑀧𑀭𑀺𑀲𑀼𑀤𑁆𑀥𑀸𑀢𑀺 𑀯𑀯𑀢𑁆𑀣𑀧𑁂𑀢𑀼𑀁 𑀤𑀼𑀓𑁆𑀓𑀭𑀁, 𑀏𑀯𑀁 𑀲𑀢𑀺 𑀲𑀻𑀫𑀧𑀭𑀺𑀲𑀸𑀧𑀭𑀺𑀲𑀼𑀤𑁆𑀥𑀸 𑀪𑀯𑀺𑀢𑀼𑀁 𑀤𑀼𑀓𑁆𑀓𑀭𑀸𑀢𑀺 𑀧𑀝𑀺𑀪𑀸𑀢𑀺.

𑀢𑀢𑁄 𑀧𑀘𑁆𑀙𑀸 𑀭𑀸𑀫𑀜𑁆𑀜𑀭𑀝𑁆𑀞𑁂 𑀢𑀺𑀧𑀺𑀝𑀓𑀥𑀭𑀩𑁆𑀬𑀢𑁆𑀢𑀧𑁆𑀧𑀝𑀺𑀩𑀮𑀢𑁆𑀣𑁂𑀭𑁂𑀳𑀺 𑀫𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀧𑀝𑀺𑀪𑀸𑀦𑀸𑀦𑀼𑀭𑀽𑀧𑀁 𑀲𑀻𑀫𑀧𑀭𑀺𑀲𑀸 𑀧𑀭𑀺𑀲𑀼𑀤𑁆𑀥𑀸 𑀪𑀯𑀺𑀢𑀼𑀁 𑀤𑀼𑀓𑁆𑀓𑀭𑀸𑀢𑀺 𑀣𑁂𑀭𑀸 𑀯𑀺𑀦𑀺𑀘𑁆𑀙𑀦𑀺𑀁𑀲𑀼.

𑀅𑀣 𑀭𑀸𑀚𑀸 𑀏𑀯𑀫𑁆𑀧𑀺 𑀘𑀺𑀦𑁆𑀢𑁂𑀲𑀺,𑁋 𑀅𑀳𑁄𑀯𑀢 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀢𑀺𑀲𑁆𑀲𑀢𑀻𑀢𑀺 𑀕𑀦𑁆𑀣𑁂𑀲𑀼 𑀯𑀼𑀢𑁆𑀢𑁄𑀧𑀺 𑀲𑀫𑀸𑀦𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁄 𑀘𑀢𑀼𑀲𑀝𑁆𑀞𑀸𑀥𑀺𑀓𑀤𑁆𑀯𑀺𑀲𑀳𑀲𑁆𑀲𑀫𑀢𑁆𑀢𑁂𑀦𑁂𑀯 𑀓𑀸𑀮𑁂𑀦 𑀲𑀸𑀲𑀦𑁂 𑀫𑀮𑀁 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀤𑀓𑀫𑁆𑀫𑁂 𑀓𑀗𑁆𑀔𑀸𑀝𑁆𑀞𑀸𑀦𑀁 𑀢𑀸𑀯 𑀉𑀧𑁆𑀧𑀚𑁆𑀚𑀺, 𑀓𑀣𑀁 𑀧𑀦 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀥𑀫𑁆𑀫𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦𑀸𑀧𑀺 𑀏𑀯𑀁 𑀘𑀺𑀦𑁆𑀢𑁂𑀲𑀺,- 𑀏𑀯𑀁 𑀏𑀢𑁆𑀢𑀓𑀁 𑀲𑀸𑀲𑀦𑁂 𑀫𑀮𑀁 𑀤𑀺𑀲𑁆𑀲𑀫𑀸𑀦𑁄𑀧𑀺 𑀲𑀫𑀸𑀦𑁄 𑀉𑀧𑀲𑀫𑁆𑀧𑀤𑀓𑀫𑁆𑀫𑁂 𑀓𑀗𑁆𑀔𑀸𑀝𑁆𑀞𑀸𑀦𑀁 𑀤𑀺𑀲𑁆𑀲𑀫𑀸𑀦𑁄𑀧𑀺 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀢𑁆𑀣𑀸𑀬 𑀅𑀦𑀸𑀭𑀪𑀺𑀢𑁆𑀯𑀸 𑀫𑀸𑀤𑀺𑀲𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀚𑁆𑀛𑀢𑁆𑀢𑁄 𑀦𑀺𑀲𑀻𑀤𑀺𑀢𑀼𑀁 𑀅𑀬𑀼𑀢𑁆𑀢𑁄, 𑀏𑀯𑀜𑁆𑀳𑀺 𑀲𑀢𑀺 𑀪𑀕𑀯𑀢𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄𑀫𑁆𑀳𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀦𑀸𑀧𑀚𑁆𑀚𑁂𑀬𑁆𑀬𑀁, 𑀢𑀲𑁆𑀫𑀸 𑀲𑀸𑀲𑀦𑀁 𑀦𑀺𑀫𑁆𑀫𑀮𑀁 𑀓𑀸𑀢𑀼𑀁 𑀆𑀭𑀪𑀺𑀲𑁆𑀲𑀸𑀫𑀻𑀢𑀺.

𑀓𑀼𑀢𑁄 𑀦𑀼𑀔𑁄 𑀤𑀸𑀦𑀺 𑀲𑀸𑀲𑀦𑀁 𑀆𑀳𑀭𑀺𑀢𑁆𑀯𑀸 𑀣𑀺𑀭𑀁 𑀧𑀢𑀺𑀝𑁆𑀞𑀸 𑀧𑁂𑀬𑁆𑀬𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺,- 𑀪𑀕𑀯𑀢𑁄 𑀓𑀺𑀭 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀙𑀢𑁆𑀢𑀺𑀁𑀲𑀸𑀥𑀺𑀓𑁂 𑀤𑁆𑀯𑀺𑀲𑀢𑁂 𑀲𑀫𑁆𑀧𑀢𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑀺 𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀧𑁂𑀲𑁂𑀢𑁆𑀯𑀸 𑀲𑀻𑀳𑀴𑀤𑀻𑀧𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀤𑀸 𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑀭𑀸𑀚𑀸 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀲𑀸𑀲𑀦𑀯𑀭𑀜𑁆𑀘 𑀏𑀓𑀸𑀲𑀺𑀢𑀸𑀥𑀺𑀓𑀸𑀦𑀺 𑀤𑁆𑀯𑀺𑀯𑀲𑁆𑀲𑀲𑀢𑀸𑀦𑀺 𑀯𑀺𑀫𑀮𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀫𑀳𑀸𑀯𑀺𑀳𑀸𑀭 𑀯𑀸𑀲𑀺𑀕𑀡𑀯𑀲𑁂𑀦 𑀏𑀓𑀢𑁄𑀯 𑀅𑀝𑁆𑀞𑀸𑀲𑀺, 𑀢𑀢𑁄 𑀧𑀘𑁆𑀙𑀸 𑀅𑀪𑀬𑀕𑀺𑀭𑀺𑀯𑀸𑀲𑀺𑀚𑁂 𑀢𑀯𑀦𑀯𑀸𑀲𑀺𑀯𑀲𑁂𑀦 𑀤𑁆𑀯𑁂𑀥𑀸 𑀳𑀼𑀢𑁆𑀯𑀸 𑀪𑀺𑀚𑁆𑀚𑀺, 𑀚𑀺𑀦𑀘𑀓𑁆𑀓𑁂 𑀅𑀝𑁆𑀞𑀲𑀢𑁆𑀢𑀲𑀢𑀸𑀥𑀺𑀓𑁂 𑀲𑀳𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 𑀲𑀺𑀭𑀺𑀲𑀗𑁆𑀖𑀩𑁄𑀥𑀺𑀧𑀭𑀓𑁆𑀓𑀫𑀩𑀸𑀳𑀼𑀫𑀳𑀸𑀭𑀸𑀚𑀸 𑀉𑀤𑀼𑀫𑁆𑀩𑀭𑀕𑀺𑀭𑀺𑀯𑀸𑀲𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀧𑁆𑀧𑀫𑀼𑀔𑀁 𑀫𑀳𑀸𑀯𑀺𑀳𑀸𑀭 𑀯𑀸𑀲𑀺𑀕𑀡𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂 𑀤𑁆𑀯𑁂𑀕𑀡𑁂 𑀯𑀺𑀲𑁄𑀥𑁂𑀲𑀺, 𑀲𑀸𑀲𑀦𑀁 𑀦𑀺𑀫𑁆𑀫𑀮𑀁 𑀅𑀓𑀸𑀲𑀺, 𑀢𑀢𑁄 𑀧𑀘𑁆𑀙𑀸 𑀯𑀺𑀚𑀬𑀩𑀸𑀳𑀼𑀧𑀭𑀓𑁆𑀓𑀫𑀩𑀸𑀳𑀼𑀭𑀸𑀚𑀽𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀮𑁂𑀧𑀺 𑀲𑀸𑀲𑀦𑀁 𑀦𑀺𑀫𑁆𑀫𑀮𑀁 𑀳𑀼𑀢𑁆𑀯𑀸𑀬𑁂𑀯 𑀅𑀝𑁆𑀞𑀸𑀲𑀺, 𑀢𑁂𑀦𑁂𑀯 𑀩𑁆𑀬𑀢𑁆𑀢𑀧𑁆𑀧𑀝𑀺𑀩𑀮𑀪𑀺𑀓𑁆𑀔𑀽 𑀆𑀬𑀸𑀘𑀺𑀢𑁆𑀯𑀸 𑀲𑀻𑀳𑀴𑀤𑀻𑀧𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀺𑀓𑁆𑀔𑀁 𑀕𑀡𑁆𑀳𑀸 𑀧𑁂𑀲𑁆𑀲𑀸𑀫𑀺, 𑀢𑁂𑀲𑀁 𑀧𑀦 𑀧𑀭𑀫𑁆𑀧𑀭𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀅𑀫𑁆𑀳𑀸𑀓𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀸𑀲𑀦𑀁 𑀦𑀺𑀫𑁆𑀫𑀮𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀁 𑀲𑁄𑀫𑀢𑁆𑀣𑁂𑀭𑀜𑁆𑀘 𑀲𑀻𑀳𑀴𑀤𑀻𑀧𑀁 𑀕𑀫𑀦𑀢𑁆𑀣𑀸𑀬 𑀬𑀸𑀘𑀺. 𑀣𑁂𑀭𑀸𑀘 𑀲𑀸𑀲𑀦𑀧𑁆𑀧𑀝𑀺𑀬𑀢𑁆𑀢𑀓𑀫𑁆𑀫𑀫𑀺𑀤𑀦𑁆𑀢𑀺 𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀝𑀺𑀜𑁆𑀜𑀁 𑀅𑀓𑀁𑀲𑀼.

𑀭𑀸𑀚𑀸 𑀘 𑀤𑀸𑀞𑀸𑀥𑀸𑀢𑀼𑀧𑀽𑀚𑀦𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀪𑀽𑀯𑀦𑁂𑀓𑀩𑀸𑀳𑀼𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀯𑀢𑁆𑀣𑀽𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸 𑀘𑀺𑀢𑁆𑀭𑀤𑀽𑀢𑀁 𑀭𑀸𑀫𑀤𑀽𑀢𑀦𑁆𑀢𑀺 𑀇𑀫𑁂 𑀤𑁆𑀯𑁂 𑀅𑀫𑀘𑁆𑀘𑁂 𑀤𑁆𑀯𑀻𑀲𑀼 𑀦𑀸𑀯𑀸𑀲𑀼 𑀦𑀸𑀬𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀓𑀮𑀺𑀬𑀼𑀕𑁂 𑀲𑀢𑁆𑀢𑀢𑀺𑀁𑀲𑀸𑀥𑀺𑀓𑁂 𑀅𑀝𑁆𑀞𑀯𑀲𑁆𑀲𑀲𑀢𑁂 𑀲𑀫𑁆𑀧𑀢𑁆𑀢𑁂 𑀫𑀸𑀖𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀺𑀢𑁄 𑀏𑀓𑀸𑀤𑀲𑀫𑀺𑀬𑀁 𑀲𑀽𑀭𑀯𑀸𑀭𑁂 𑀘𑀺𑀢𑁆𑀭𑀤𑀽𑀢𑀁 𑀲𑀤𑁆𑀥𑀺𑀁 𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀧𑁆𑀧𑀫𑀼𑀔𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀸𑀬 𑀦𑀸𑀯𑀸𑀬 𑀕𑀫𑀸𑀧𑁂𑀲𑀺. 𑀨𑀕𑁆𑀕𑀼𑀡𑀫𑀸𑀲𑀲𑁆𑀲 𑀅𑀝𑁆𑀞𑀫𑀺𑀬𑀁 𑀲𑀻𑀳𑀴𑀤𑀻𑀧𑁂 𑀓𑀮𑀫𑁆𑀩𑀼𑀢𑀺𑀢𑁆𑀣𑀁 𑀧𑀸𑀬𑀸𑀲𑀺.

𑀭𑀸𑀫𑀤𑀽𑀢𑀁 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀯𑀲𑁆𑀲𑁂 𑀫𑀸𑀖𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀺𑀢𑁄 𑀤𑁆𑀯𑀸𑀤𑀲𑀫𑀺𑀬𑀁 𑀘𑀦𑁆𑀤𑀯𑀸𑀭𑁂 𑀲𑀤𑁆𑀥𑀺𑀁 𑀲𑁄𑀫𑀢𑁆𑀣𑁂𑀭𑀧𑁆𑀧𑀫𑀼𑀔𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀸𑀬 𑀦𑀸𑀯𑀸𑀬 𑀕𑀫𑀸𑀧𑁂𑀲𑀺. 𑀉𑀚𑀼𑀓𑀁 𑀧𑀦 𑀯𑀸𑀢𑀁 𑀅𑀮𑀪𑀺𑀢𑁆𑀯𑀸 𑀘𑀺𑀢𑁆𑀭𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀦𑀯𑀫𑀺𑀬𑀁 𑀲𑀻𑀳𑀴𑀤𑀻𑀧𑁂 𑀯𑀮𑁆𑀮𑀺𑀕𑀸𑀫𑀁 𑀧𑀸𑀬𑀸𑀲𑀺.

𑀢𑀢𑁄 𑀧𑀘𑁆𑀙𑀸 𑀢𑁂𑀧𑀺 𑀤𑁆𑀯𑁂 𑀅𑀫𑀘𑁆𑀘𑀸 𑀤𑁆𑀯𑀻𑀲𑀼 𑀦𑀸𑀯𑀸𑀲𑀼 𑀆𑀪𑀢𑀸𑀦𑀺 𑀤𑀸𑀢𑀩𑁆𑀩𑀧𑀡𑁆𑀡𑀸𑀓𑀸𑀭𑀯𑀢𑁆𑀣𑀽𑀦𑀺 𑀲𑀦𑁆𑀤𑁂𑀲𑀧𑀡𑁆𑀡𑀸𑀦𑀺 𑀘 𑀪𑀽𑀯𑀦𑁂𑀓𑀩𑀸𑀳𑀼𑀭𑀜𑁆𑀜𑁄 𑀪𑀺𑀓𑁆𑀔𑀽𑀲𑀗𑁆𑀖𑀲𑁆𑀲 𑀘 𑀅𑀤𑀸𑀲𑀺. 𑀭𑀜𑁆𑀜𑀸 𑀧𑁂𑀲𑀺𑀢𑀪𑀺𑀓𑁆𑀔𑀽𑀦𑀜𑁆𑀘 𑀲𑀦𑁆𑀤𑁂𑀲𑀧𑀡𑁆𑀡𑁂 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀓𑀮𑁆𑀬𑀸𑀡𑀺𑀬𑀁 𑀦𑀸𑀫 𑀦𑀤𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀅𑀓𑀁𑀲𑀼.

𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀘 𑀪𑀽𑀯𑀦𑁂𑀓𑀩𑀸𑀳𑀼𑀭𑀸𑀚𑀸 𑀦𑀸𑀦𑀸𑀧𑁆𑀧𑀓𑀸𑀭𑁂 𑀪𑀺𑀓𑁆𑀔𑀽𑀦𑀁 𑀲𑀸𑀭𑀼𑀧𑁆𑀧𑁂 𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀇𑀤𑀁 𑀧𑀦 𑀆𑀫𑀺𑀲𑀤𑀸𑀦𑀁 𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑀸𑀬𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀦𑀸𑀫𑀮𑀜𑁆𑀙𑀁 𑀧𑀦 𑀦 𑀚𑀻𑀭𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸 𑀭𑀸𑀫𑀤𑀽𑀢𑀲𑁆𑀲 𑀦𑀸𑀯𑀸𑀬 𑀧𑀔𑀸𑀦𑀪𑀽𑀢𑀲𑁆𑀲 𑀲𑁄𑀫𑀢𑁆𑀣𑁂𑀭𑀲𑁆𑀲 𑀲𑀺𑀭𑀺𑀲𑀗𑁆𑀖𑀩𑁄𑀥𑀺𑀲𑀸𑀫𑀻𑀢𑀺 𑀦𑀸𑀫𑀁 𑀅𑀤𑀸𑀲𑀺. 𑀅𑀯𑀲𑁂𑀲𑀸𑀦𑀁 𑀧𑀦 𑀤𑀲𑀦𑁆𑀦𑀁 𑀣𑁂𑀭𑀸𑀦𑀁 𑀓𑀺𑀢𑁆𑀢𑀺𑀲𑀺𑀭𑀺𑀫𑁂𑀖𑀲𑀸𑀫𑀺 𑀧𑀭𑀓𑁆𑀓𑀫𑀩𑀸𑀳𑀼𑀲𑀸𑀫𑀺 𑀩𑀼𑀤𑁆𑀥𑀖𑁄𑀲𑀲𑀸𑀫𑀺 𑀲𑀻𑀳𑀴𑀤𑀻𑀧𑀯𑀺𑀲𑀼𑀤𑁆𑀥𑀲𑀸𑀫𑀺 𑀕𑀼𑀡𑀭𑀢𑀦𑀥𑀭𑀲𑀸𑀫𑀻 𑀚𑀺𑀦𑀸𑀮𑀗𑁆𑀓𑀸𑀭𑀲𑀸𑀫𑀺 𑀭𑀢𑀦𑀫𑀸𑀮𑀺𑀲𑀸𑀫𑀺 𑀲𑀤𑁆𑀥𑀫𑁆𑀫𑀢𑁂𑀚𑀲𑀸𑀫𑀺 𑀥𑀫𑁆𑀫𑀭𑀸𑀫𑀲𑀸𑀫𑀺 𑀪𑀽𑀯𑀦𑁂𑀓𑀩𑀸𑀳𑀼𑀲𑀸𑀫𑀻𑀢𑀺 𑀦𑀸𑀫𑀸𑀦𑀺 𑀅𑀤𑀸𑀲𑀺.

𑀘𑀺𑀢𑁆𑀭𑀤𑀽𑀢𑀲𑁆𑀲 𑀦𑀸𑀯𑀸𑀬 𑀧𑀔𑀸𑀦𑀪𑀽𑀢𑀲𑁆𑀲 𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀓𑀺𑀢𑁆𑀢𑀺𑀮𑁄𑀓𑀕𑀭𑀼𑀲𑀸𑀫𑀻𑀢𑀺 𑀦𑀸𑀫𑀁 𑀅𑀤𑀸𑀲𑀺. 𑀅𑀯𑀲𑁂𑀲𑀸𑀦𑀁 𑀧𑀦 𑀲𑀺𑀭𑀺𑀯𑀦𑀭𑀢𑀦𑀲𑀸𑀫𑀺 𑀫𑀗𑁆𑀕𑀮𑀢𑁆𑀣𑁂𑀭𑀲𑁆𑀲𑀸𑀫𑀺 𑀓𑀮𑁆𑀬𑀸𑀡𑀢𑀺𑀲𑁆𑀲𑀲𑁆𑀲𑀸𑀫𑀺 𑀘𑀦𑁆𑀤𑀕𑀺𑀭𑀺𑀲𑀸𑀫𑀺 𑀲𑀺𑀭𑀺𑀤𑀦𑁆𑀢𑀥𑀸𑀢𑀼𑀲𑀸𑀫𑀺 𑀯𑀦𑀯𑀸𑀲𑀺𑀢𑀺𑀲𑁆𑀲𑀲𑀸𑀫𑀺 𑀭𑀢𑀦𑀮𑀗𑁆𑀓𑀸𑀭𑀲𑀸𑀫𑀺 𑀫𑀳𑀸𑀤𑁂𑀯𑀲𑀸𑀫𑀺 𑀉𑀤𑀼𑀫𑁆𑀩𑀭𑀕𑀺𑀭𑀺𑀲𑀸𑀫𑀺 𑀘𑀽𑀴𑀸𑀪𑀬𑀢𑀺𑀲𑁆𑀲𑀲𑀸𑀫𑀻𑀢𑀺 𑀦𑀸𑀫𑀸𑀦𑀺 𑀅𑀤𑀸𑀲𑀺. 𑀩𑀸𑀯𑀻𑀲𑀢𑀺𑀬𑀸 𑀧𑀦 𑀧𑀘𑁆𑀙𑀸 𑀲𑀫𑀡𑀸𑀦𑀁 𑀦𑀸𑀫𑀁 𑀦 𑀅𑀤𑀸𑀲𑀺. 𑀅𑀪𑀺𑀦𑀯𑀲𑀺𑀓𑁆𑀔𑀁 𑀧𑀦 𑀲𑀩𑁆𑀩𑁂𑀲𑀁𑀬𑁂𑀯 𑀅𑀤𑀸𑀲𑀺.

𑀢𑀢𑁄 𑀧𑀘𑁆𑀙𑀸 𑀘𑁂𑀢𑀺𑀬𑀧𑀽𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀢𑀁𑀢𑀁𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀧𑀼𑀦 𑀆𑀕𑀫𑀁𑀲𑀼. 𑀪𑀽𑀯𑀦𑁂𑀓𑀩𑀸𑀳𑀼𑀭𑀸𑀚𑀸 𑀘𑀺𑀢𑁆𑀭𑀤𑀽𑀢𑀁 𑀏𑀯𑀫𑀸𑀳, 𑀭𑀸𑀫𑀸𑀥𑀺𑀧𑀢𑀺𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀧𑀝𑀺𑀤𑀸𑀢𑀼𑀁 𑀇𑀘𑁆𑀙𑀸𑀫𑀺, 𑀧𑀝𑀺𑀤𑀽𑀢𑀜𑁆𑀘 𑀧𑁂𑀲𑁂𑀢𑀼𑀁 𑀢𑀸𑀯 𑀢𑁆𑀯𑀁 𑀆𑀕𑀫𑁂𑀳𑀻𑀢𑀺. 𑀏𑀯𑀁 𑀧𑀦 𑀯𑀢𑁆𑀯𑀸 𑀧𑀘𑁆𑀙𑀸 𑀆𑀕𑀫𑀦𑀓𑀸𑀮𑁂 𑀘𑀡𑁆𑀟𑀯𑀸𑀢𑀪𑀬𑁂𑀦 𑀫𑀳𑀸𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀸 𑀅𑀯𑀕𑀘𑁆𑀙𑀢𑀺. 𑀢𑁂𑀦 𑀲𑀻𑀳𑀴𑀭𑀜𑁆𑀜𑀸 𑀧𑁂𑀲𑀺𑀢𑀦𑀸𑀯𑀸𑀬 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀭𑀼𑀳𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀘𑀡𑁆𑀟𑀯𑀸𑀢𑀪𑀬𑁂𑀦 𑀅𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀲𑀺𑀮𑀸𑀬 𑀖𑀝𑁆𑀝𑁂𑀢𑁆𑀯𑀸 𑀮𑀕𑁆𑀕𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀏𑀓𑀁 𑀉𑀴𑀼𑀫𑁆𑀧𑀁 𑀩𑀦𑁆𑀥𑀺𑀢𑁆𑀯𑀸 𑀚𑀗𑁆𑀖𑁂𑀦𑁂𑀯 𑀅𑀕𑀫𑀁𑀲𑀼. 𑀲𑀻𑀳𑀴𑀭𑀜𑁆𑀜𑁄 𑀘 𑀤𑀽𑀢𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀧𑀘𑁆𑀘𑀸𑀕𑀫𑀸𑀲𑀺. 𑀪𑀺𑀓𑁆𑀔𑀽𑀲𑀼 𑀘 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀺. 𑀅𑀳𑁄 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣,𑁋

𑀇𑀫𑁂𑀲𑀁 𑀧𑀦 𑀆𑀭𑀤𑁆𑀥𑀁, 𑀦 𑀓𑀺𑀘𑁆𑀘𑀁 𑀬𑀸𑀯 𑀦𑀺𑀝𑁆𑀞𑀺𑀢𑀁;

𑀦 𑀢𑀸𑀯 𑀆𑀤𑀺𑀬𑀺𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼 𑀦𑀢𑁆𑀣𑀺 𑀆𑀧𑁂𑀓𑁆𑀔𑀦𑀸.

𑀦𑀺𑀓𑁆𑀓𑀸𑀭𑀼𑀡𑀺𑀓𑁄 𑀳𑀺 𑀏𑀲, 𑀩𑀮𑀓𑁆𑀓𑀸𑀭𑁂𑀦 𑀆𑀤𑀺𑀬;

𑀭𑁄𑀤𑀫𑀸𑀦𑀁𑀯 𑀜𑀸𑀢𑀻𑀦𑀁 𑀅𑀦𑀺𑀘𑁆𑀙𑀦𑁆𑀢𑀁𑀯 𑀕𑀘𑁆𑀙𑀢𑀻𑀢𑀺.

𑀭𑀸𑀫𑀸𑀥𑀺𑀧𑀢𑀺𑀭𑀸𑀚𑀸𑀘 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀓𑀸𑀮𑁂 𑀳𑀁𑀲𑀸𑀯𑀢𑀻𑀦𑀕𑀭𑀲𑁆𑀲 𑀧𑀘𑁆𑀙𑀺𑀫𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀦𑀭𑀲𑀽𑀭𑁂𑀦 𑀦𑀸𑀫 𑀅𑀫𑀘𑁆𑀘𑁂𑀦 𑀧𑀭𑀺𑀪𑀼𑀢𑁆𑀢𑁂 𑀕𑀸𑀫𑀔𑁂𑀢𑁆𑀢𑁂 𑀧𑀸𑀴𑀺𑀅𑀝𑁆𑀞𑀓𑀣𑀸𑀴𑀻𑀓𑀸𑀤𑀬𑁄 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀻𑀫𑀲𑀫𑀽𑀳𑀦𑀲𑀻𑀫𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀦𑀺 𑀓𑀸𑀭𑀧𑁂𑀲𑀺. 𑀲𑀻𑀳𑀴𑀤𑀻𑀧𑁂 𑀪𑀕𑀯𑀢𑀸 𑀦𑁆𑀳𑀸𑀬𑀺𑀢𑀧𑀼𑀩𑁆𑀩𑀸𑀬 𑀓𑀮𑁆𑀬𑀸𑀡𑀺𑀬𑀸 𑀦𑀸𑀫 𑀦𑀤𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀮𑀤𑁆𑀥𑀉𑀧𑀲𑀫𑁆𑀧𑀤𑀪𑀸𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀢𑁆𑀢𑀸 𑀓𑀮𑁆𑀬𑀸𑀡𑀻𑀲𑀻𑀫𑀸𑀢𑀺 𑀲𑀫𑀜𑁆𑀜𑀁 𑀅𑀓𑀸𑀲𑀺. 𑀇𑀘𑁆𑀘𑁂𑀯𑀁 𑀭𑀸𑀫𑀸𑀥𑀺𑀧𑀢𑀺𑀭𑀸𑀚𑀸 𑀧𑀢𑁆𑀢𑀮𑀗𑁆𑀓𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀲𑀸𑀲𑀦𑀁 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀁 𑀅𑀓𑀸𑀲𑀺. 𑀓𑀮𑀺𑀬𑀼𑀕𑀲𑁆𑀲 𑀅𑀝𑁆𑀞𑀢𑀺𑀁𑀲𑀸𑀥𑀺𑀓𑀅𑀝𑁆𑀞𑀯𑀲𑁆𑀲𑀲𑀢𑀓𑀸𑀮𑀢𑁄 𑀬𑀸𑀯 𑀏𑀓𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀅𑀝𑁆𑀞𑀯𑀲𑁆𑀲𑀲𑀢𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀁𑀲𑁂 𑀅𑀲𑀻𑀢𑀺𑀫𑀢𑁆𑀢𑀸 𑀕𑀡𑀧𑀸𑀫𑁄𑀓𑁆𑀔𑀢𑁆𑀣𑁂𑀭𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀲𑀺𑀲𑁆𑀲𑀚𑀸𑀢𑀸𑀦𑀺 𑀧𑀦 𑀙𑀩𑁆𑀩𑀺𑀲𑀸𑀥𑀺𑀓𑀸𑀦𑀺 𑀤𑁆𑀯𑀺𑀲𑀢𑀸𑀦𑀺 𑀘𑀢𑀼𑀲𑀳𑀲𑁆𑀲𑀸𑀦𑀺 𑀤𑀲𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀏𑀯𑀁 𑀪𑀕𑀯𑀢𑁄 𑀲𑀸𑀲𑀦𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀯𑀼𑀟𑁆𑀠𑀺𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑀺𑀁 𑀯𑁂𑀧𑀼𑀮𑁆𑀮𑀫𑀸𑀧𑀚𑁆𑀚𑀺𑀢𑀺.

𑀇𑀤𑀁 𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑀢𑁆𑀢𑀫𑀁 𑀲𑀸𑀲𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀁.

𑀬𑀤𑀸 𑀧𑀦 𑀅𑀭𑀺𑀫𑀤𑁆𑀤𑀦𑀦𑀕𑀭𑁂 𑀅𑀦𑀼𑀭𑀼𑀤𑁆𑀥𑁄 𑀦𑀸𑀫 𑀭𑀸𑀚𑀸 𑀲𑀼𑀥𑀫𑁆𑀫𑀧𑀼𑀭𑀁 𑀲𑀭𑀸𑀚𑀺𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀤𑁆𑀥𑀁𑀲𑀺, 𑀢𑀤𑀸 𑀭𑀸𑀫𑀜𑁆𑀜𑀭𑀝𑁆𑀞𑀁 𑀭𑀸𑀚𑀲𑀼𑀜𑁆𑀜𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺. 𑀭𑀸𑀫𑀜𑁆𑀜𑀭𑀝𑁆𑀞𑁂 𑀫𑀼𑀢𑁆𑀢𑀺𑀫𑀦𑀕𑀭𑁂 𑀲𑁄𑀡𑀼𑀢𑁆𑀢𑀭𑀯𑀁𑀲𑁄 𑀏𑀓𑁄 𑀕𑀡𑁄, 𑀲𑀺𑀯𑀮𑀺𑀯𑀁𑀲𑁄 𑀏𑀓𑁄, 𑀢𑀸𑀫𑀮𑀺𑀦𑁆𑀤𑀯𑀁𑀲𑁄 𑀏𑀓𑁄, 𑀆𑀦𑀦𑁆𑀤𑀯𑀁𑀲𑁄 𑀏𑀓𑁄, 𑀩𑀼𑀤𑁆𑀥𑀯𑀁𑀲𑁄 𑀏𑀓𑁄, 𑀫𑀳𑀸𑀦𑀸𑀕𑀯𑀁𑀲𑁄 𑀏𑀓𑁄𑀢𑀺 𑀙𑀕𑁆𑀕𑀡𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼 𑀦𑀸𑀦𑀸𑀲𑀁𑀯𑀸𑀲𑀓𑀸 𑀦𑀸𑀦𑀸𑀦𑀺𑀓𑀸𑀬𑀸.

𑀥𑀫𑁆𑀫𑀘𑁂𑀢𑀺𑀬𑀭𑀜𑁆𑀜𑀸 𑀧𑀦 𑀓𑀸𑀭𑀸𑀧𑀺𑀢𑀲𑀸𑀲𑀦𑀫𑁆𑀧𑀺 𑀅𑀪𑀺𑀚𑁆𑀚𑀫𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀫𑀸𑀦𑀲𑀁𑀯𑀸𑀲𑁄 𑀏𑀓𑀦𑀺𑀓𑀸𑀬𑁄𑀬𑁂𑀯 𑀅𑀳𑁄𑀲𑀺. 𑀳𑀁𑀲𑀸𑀯𑀢𑀻𑀫𑀼𑀢𑁆𑀢𑀺𑀫𑀲𑀼𑀯𑀲𑁂𑀦 𑀢𑀻𑀡𑀺𑀧𑀺 𑀭𑀸𑀫𑀜𑁆𑀜𑀭𑀝𑁆𑀞𑀸𑀦𑀺 𑀲𑀼𑀦𑀸𑀧𑀭𑀦𑁆𑀢 𑀲𑀗𑁆𑀔𑀸𑀢𑁂𑀦 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀧𑀼𑀩𑁆𑀩𑁂𑀘 𑀫𑀭𑀫𑁆𑀫𑀭𑀝𑁆𑀞𑀺𑀦𑁆𑀤𑀭𑀸𑀚𑀽𑀦𑀁 𑀆𑀡𑀸𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀫𑀭𑀫𑁆𑀫𑀭𑀝𑁆𑀞𑀢𑁄 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀭𑀸𑀫𑀜𑁆𑀜𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀓𑀮𑁆𑀬𑀸𑀡𑀻𑀲𑀻𑀫𑀸𑀬𑀁 𑀧𑀼𑀦 𑀲𑀺𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀥𑀫𑁆𑀫𑀘𑁂𑀢𑀺𑀬𑀭𑀜𑁆𑀜𑀸𑀓𑀸𑀭𑀸𑀯𑀺𑀢𑀲𑀸𑀲𑀦𑀁 𑀲𑀓𑀮𑀁 𑀫𑀭𑀫𑁆𑀫𑀭𑀝𑁆𑀞𑀫𑁆𑀧𑀺 𑀩𑁆𑀬𑀸𑀧𑁂𑀢𑁆𑀯𑀸 𑀑𑀕𑀸𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀭𑀸𑀫𑀜𑁆𑀜𑀭𑀝𑁆𑀞𑁂 𑀲𑁄𑀡𑀼𑀢𑁆𑀢𑀭𑀢𑁆𑀣𑁂𑀭𑀸𑀦𑀁 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀼𑀥𑀫𑁆𑀫𑀧𑀼𑀭𑁂 𑀫𑀦𑁄𑀳𑀭𑀺𑀭𑀜𑁆𑀜𑀸 𑀅𑀭𑀳𑀦𑁆𑀢𑀸𑀦𑀁 𑀲𑀁𑀯𑀺𑀚𑁆𑀚𑀫𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀧𑀘𑁆𑀙𑀸 𑀧𑀦 𑀉𑀢𑁆𑀢𑀭𑀸 𑀚𑀻𑀯𑀸𑀭𑀺𑀬𑀸𑀯𑀁𑀲𑀫𑀳𑀸𑀓𑀸𑀴𑀧𑁆𑀭𑀸𑀦𑀤𑀲𑁆𑀲𑀺𑀢𑁆𑀣𑁂𑀭𑀸𑀦𑀁 𑀓𑀸𑀮𑁂 𑀮𑁄𑀓𑀺𑀬𑀚𑁆𑀛𑀸𑀦𑀸𑀪𑀺𑀜𑁆𑀜𑀸𑀮𑀸𑀪𑀺𑀬𑁄𑀬𑁂𑀯 𑀲𑀁𑀯𑀺𑀚𑁆𑀚𑀁𑀲𑀽𑀢𑀺. 𑀅𑀥𑀼𑀦𑀸 𑀧𑀦 𑀢𑀻𑀲𑀼𑀧𑀺 𑀭𑀸𑀫𑀜𑁆𑀜𑀭𑀝𑁆𑀞𑁂𑀲𑀼 𑀥𑀫𑁆𑀫𑀘𑁂𑀢𑀺𑀬𑀭𑀜𑁆𑀜𑀸 𑀓𑀸𑀭𑀸𑀯𑀺𑀢𑀲𑀸𑀲𑀦𑀁𑀬𑁂𑀯 𑀢𑀺𑀝𑁆𑀞𑀢𑀺. 𑀏𑀢𑁆𑀣𑀘 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀆𑀤𑀺𑀅𑀦𑁆𑀢𑀯𑀲𑁂𑀦𑁂 𑀘 𑀲𑀸𑀲𑀦𑀯𑀁𑀲𑀁 𑀧𑀜𑁆𑀜𑀸𑀬 𑀢𑀼𑀮𑀬𑀺𑀢𑁆𑀯𑀸 𑀆𑀤𑀺𑀢𑁄𑀯 𑀤𑀲𑁆𑀲𑀺𑀢𑁂𑀳𑀺 𑀢𑀻𑀳𑀺 𑀦𑀬𑁂𑀳𑀺 𑀬𑀣𑀸𑀧𑀯𑁂𑀡𑀻 𑀖𑀝𑁆𑀝𑀺𑀬𑀢𑀺, 𑀢𑀣𑀸 𑀕𑀡𑁆𑀳𑁂𑀬𑁆𑀬𑀸𑀢𑀺. 𑀅𑀬𑀜𑁆𑀘 𑀲𑀸𑀲𑀦𑀯𑀁𑀲𑁄 𑀮𑀚𑁆𑀚𑀺𑀧𑁂𑀲𑀮𑀲𑀺𑀓𑁆𑀔𑀸𑀓𑀸𑀫𑀸𑀦𑀁𑀬𑁂𑀯 𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀸𑀮𑀚𑁆𑀚𑀻𑀦𑀁 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀸𑀬 𑀘 𑀣𑁂𑀭𑀧𑀭𑀫𑁆𑀧𑀭𑀸𑀬 𑀫𑀼𑀢𑁆𑀢𑀺𑀫𑀦𑀕𑀭𑀯𑀸𑀲𑀺𑀫𑁂𑀥𑀗𑁆𑀓𑀭𑀢𑁆𑀣𑁂𑀭𑁄 𑀮𑁄𑀓𑀤𑀻𑀧𑀓𑀲𑀸𑀭𑀁 𑀦𑀸𑀫 𑀕𑀦𑁆𑀣𑀁 𑀅𑀓𑀸𑀲𑀺. 𑀳𑀁𑀲𑀸𑀯𑀢𑀻𑀦𑀕𑀭𑀯𑀸𑀲𑀻 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑁄 𑀫𑀥𑀼𑀲𑀸𑀭𑀢𑁆𑀣𑀤𑀻𑀧𑀦𑀺𑀁 𑀦𑀸𑀫 𑀅𑀪𑀺𑀥𑀫𑁆𑀫𑀝𑀻𑀓𑀸𑀬 𑀲𑀁𑀯𑀡𑁆𑀡𑀦𑀁, 𑀳𑀁𑀲𑀸𑀯𑀢𑀻𑀦𑀕𑀭𑀯𑀸𑀲𑀻𑀬𑁂𑀯 𑀥𑀫𑁆𑀫𑀩𑀼𑀤𑁆𑀥𑀢𑁆𑀣𑁂𑀭𑁄 𑀓𑀯𑀺𑀲𑁆𑀲𑀸𑀭𑀁 𑀦𑀸𑀫 𑀙𑀦𑁆𑀤𑁄𑀯𑀡𑁆𑀡𑀦𑀁, 𑀳𑀁𑀲𑀸𑀯𑀢𑀻𑀦𑀕𑀭𑀯𑀸𑀲𑀻𑀬𑁂𑀯 𑀲𑀤𑁆𑀥𑀫𑁆𑀫𑀸𑀮𑀗𑁆𑀓𑀸𑀭𑀢𑁆𑀣𑁂𑀭𑁄 𑀧𑀝𑁆𑀞𑀸𑀦𑀲𑀸𑀭𑀤𑀻𑀧𑀦𑀺𑀁 𑀦𑀸𑀫 𑀧𑀓𑀭𑀡𑀁, 𑀢𑀣𑁂𑀯 𑀅𑀜𑁆𑀜𑀢𑀭𑁄 𑀣𑁂𑀭𑁄 𑀅𑀨𑁂𑀕𑁆𑀕𑀼𑀲𑀸𑀭𑀁 𑀦𑀸𑀫 𑀕𑀦𑁆𑀣𑀁 𑀅𑀓𑀸𑀲𑀺. 𑀏𑀯𑀁 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀁 𑀕𑀦𑁆𑀣𑀓𑀸𑀭𑀸𑀦𑀁 𑀫𑀳𑀸𑀣𑁂𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀲𑀸𑀲𑀦𑀁 𑀑𑀕𑀸𑀳𑁂𑀢𑁆𑀯𑀸 𑀯𑀺𑀭𑀽𑀴𑀝𑁆𑀞𑀸𑀦𑀁𑀅𑀳𑁄𑀲𑀻𑀢𑀺.

𑀇𑀢𑀺 𑀲𑀸𑀲𑀦𑀯𑀁𑀲𑁂 𑀲𑀼𑀯𑀡𑁆𑀡𑀪𑀽𑀫𑀺𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑀸 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.