𑁧𑁦. 𑀘𑀺𑀦𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄

𑁧𑁦. 𑀢𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺 𑀘𑀻𑀦𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑀁 𑀬𑀣𑀸𑀝𑁆𑀞𑀯𑀺𑀢𑀫𑀸𑀢𑀺𑀓𑀸𑀯𑀲𑁂𑀦.

𑀢𑀢𑀺𑀬𑀲𑀗𑁆𑀕𑀻𑀢𑀸𑀯𑀲𑀸𑀦𑁂 𑀳𑀺 𑀫𑀳𑀸𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀫𑀚𑁆𑀛𑀺𑀫𑀢𑁆𑀣𑁂𑀭𑀁 𑀘𑀺𑀦𑀭𑀝𑁆𑀞𑀁 𑀧𑁂𑀲𑁂𑀲𑀺,-𑀢𑁆𑀯𑀁 𑀏𑀢𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻𑀢𑀺.

𑀫𑀚𑁆𑀛𑀺𑀫𑀢𑁆𑀣𑁂𑀭𑁄𑀘 𑀓𑀲𑁆𑀲𑀧𑀕𑁄𑀢𑁆𑀢𑀭𑁂𑀦 𑀅𑀴𑀓𑀭𑁂𑀯𑀢𑁆𑀣𑁂𑀭𑁂𑀦 𑀤𑀼𑀦𑁆𑀤𑀪𑀺𑀬𑀢𑁆𑀣𑁂𑀭𑁂𑀦 𑀫𑀳𑀸𑀭𑁂𑀯𑀢𑁆𑀣𑁂𑀭𑁂𑀦𑀘 𑀲𑀤𑁆𑀥𑀺𑀁 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀧𑀜𑁆𑀘𑀘𑀻𑀦𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀓𑀣𑀸𑀬𑀢𑀁 𑀤𑁂𑀲𑀁 𑀧𑀲𑀸𑀤𑁂𑀢𑁆𑀯𑀸 𑀅𑀲𑀻𑀢𑀺𑀧𑀸𑀡𑀓𑁄𑀝𑀺𑀬𑁄 𑀫𑀕𑁆𑀕𑀨𑀮𑀭𑀢𑀦𑀸𑀦𑀺 𑀧𑀝𑀺𑀮𑀸𑀪𑁂𑀲𑀺. 𑀧𑀜𑁆𑀘𑀧𑀺𑀘 𑀢𑁂 𑀣𑁂𑀭𑀸 𑀧𑀜𑁆𑀘𑀭𑀝𑁆𑀞𑀸𑀦𑀺 𑀧𑀲𑀸𑀤𑁂𑀲𑀼𑀁. 𑀏𑀓𑀫𑁂𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀳𑀲𑁆𑀲𑀫𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀢𑁂 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀕𑀦𑁆𑀢𑁆𑀯𑀸 𑀫𑀚𑁆𑀛𑀺𑀫𑀢𑁆𑀣𑁂𑀭𑁄, 𑀳𑀺𑀫𑀯𑀦𑁆𑀢𑀁 𑀧𑀲𑀸𑀤𑀬𑀺;

𑀬𑀓𑁆𑀔𑀲𑁂𑀦𑀁 𑀧𑀓𑀸𑀲𑁂𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺.

𑀢𑀢𑁆𑀣 𑀓𑀺𑀭 𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀘𑀦𑁆𑀤𑀻𑀧𑀭𑀫𑀻𑀲𑁆𑀯𑀸𑀭𑀸𑀦𑀁 𑀬𑀓𑁆𑀔𑀸𑀦𑀁 𑀧𑀽𑀚𑀁 𑀓𑀭𑁄𑀦𑁆𑀢𑀺. 𑀢𑁂𑀦𑁂𑀯 𑀢𑁂 𑀧𑀜𑁆𑀘 𑀣𑁂𑀭𑀸 𑀢𑁂𑀲𑀁 𑀬𑀓𑁆𑀔𑀲𑁂𑀦𑀁 𑀧𑀓𑀸𑀲𑀬𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀼𑀁. 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀁 𑀧𑀦 𑀓𑀤𑀸𑀘𑀺 𑀓𑀤𑀸𑀘𑀺 𑀘𑀻𑀦𑀭𑀝𑁆𑀞𑀺𑀦𑁆𑀤𑀲𑁆𑀲 𑀯𑀺𑀚𑀺𑀢𑀁 𑀳𑁄𑀢𑀺, 𑀓𑀤𑀸𑀘𑀺 𑀓𑀤𑀸𑀘𑀺 𑀧𑀦 𑀯𑀺𑀲𑀼𑀁 𑀳𑁄𑀢𑀺. 𑀢𑀤𑀸 𑀧𑀦 𑀯𑀺𑀲𑀼𑀁𑀬𑁂𑀯 𑀅𑀳𑁄𑀲𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀘𑀻𑀭𑀦𑀝𑁆𑀞𑁂 𑀧𑀦 𑀪𑀕𑀯𑀢𑁄 𑀲𑀸𑀲𑀦𑀁 𑀤𑀼𑀩𑁆𑀩𑀮𑀁𑀬𑁂𑀯 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀦 𑀣𑀺𑀭𑀁 𑀳𑀼𑀢𑁆𑀯𑀸. 𑀢𑁂𑀦𑁂𑀯 𑀇𑀤𑀸𑀦𑀺 𑀢𑀢𑁆𑀣 𑀓𑀢𑁆𑀣𑀘𑀺𑀬𑁂𑀯 𑀲𑀸𑀲𑀦𑀁 𑀙𑀸𑀬𑀸𑀫𑀢𑁆𑀢𑀁𑀯 𑀧𑀜𑁆𑀜𑀸𑀬𑀢𑀺, 𑀯𑀸𑀢𑀯𑁂𑀕𑁂𑀦 𑀯𑀺𑀓𑀺𑀡𑁆𑀡𑀅𑀩𑁆𑀪𑀁𑀯𑀺𑀬 𑀢𑀺𑀝𑁆𑀞𑀢𑀻𑀢𑀺.

𑀇𑀢𑀺 𑀲𑀸𑀲𑀦𑀯𑀁𑀲𑁂 𑀘𑀻𑀦𑀭𑀝𑁆𑀞𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄 𑀦𑀸𑀫

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀯𑀁𑀲𑀓𑀣𑀸𑀫𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀏𑀢𑁆𑀢𑀸𑀯𑀢𑀸𑀘 𑁋

𑀮𑀗𑁆𑀓𑀸𑀕𑀢𑁂𑀦 𑀲𑀦𑁆𑀢𑁂𑀦, 𑀘𑀺𑀢𑁆𑀭𑀜𑀸𑀡𑁂𑀦 𑀪𑀺𑀓𑁆𑀔𑀼𑀦𑀸;

𑀲𑀭𑀡𑀗𑁆𑀓𑀭𑀦𑀸𑀫𑁂𑀦, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑀺𑀦𑀸.

𑀤𑀽𑀭𑀢𑁄𑀬𑁂𑀯 𑀤𑀻𑀧𑀫𑁆𑀳𑀸, 𑀲𑀼𑀫𑀗𑁆𑀕𑀮𑁂𑀦 𑀚𑁄𑀢𑀺𑀦𑀸;

𑀯𑀺𑀲𑀼𑀤𑁆𑀥𑀲𑀻𑀮𑀺𑀦𑀸𑀘𑁂𑀯, 𑀤𑀻𑀧𑀦𑁆𑀢𑀭𑀝𑁆𑀞𑀪𑀺𑀓𑁆𑀔𑀼𑀦𑀸.

𑀅𑀜𑁆𑀜𑁂𑀳𑀺𑀘𑀸𑀪𑀺𑀬𑀸𑀘𑀺𑀢𑁄, 𑀧𑀜𑁆𑀜𑀸𑀲𑀸𑀫𑀻𑀢𑀺 𑀦𑀸𑀫𑀓𑁄;

𑀅𑀓𑀸𑀲𑀺𑀁 𑀲𑀼𑀝𑁆𑀞𑀼𑀓𑀁 𑀕𑀦𑁆𑀣𑀁, 𑀲𑀸𑀲𑀦𑀯𑀁𑀲𑀧𑁆𑀧𑀤𑀻𑀧𑀺𑀓𑀁.

𑀤𑁆𑀯𑀺𑀲𑀢𑁂𑀘 𑀲𑀳𑀲𑁆𑀲𑁂𑀘, 𑀢𑁂𑀯𑀻𑀲𑀸𑀥𑀺𑀓𑁂 𑀕𑀢𑁂;

𑀧𑀼𑀡𑁆𑀡𑀸𑀬𑀁 𑀫𑀺𑀕𑀲𑀻𑀭𑀲𑁆𑀲, 𑀦𑀺𑀝𑁆𑀞𑀁 𑀕𑀢𑀸𑀯 𑀲𑀩𑁆𑀩𑀲𑁄.

𑀓𑁄𑀘𑀺 𑀏𑀢𑁆𑀣𑁂𑀯 𑀤𑁄𑀲𑁄 𑀘𑁂, 𑀧𑀜𑁆𑀜𑀸𑀬𑀢𑀺 𑀲𑀼𑀘𑀺𑀢𑁆𑀢𑀓𑀸;

𑀢𑀁 𑀔𑀫𑀦𑁆𑀢𑀼 𑀘 𑀲𑀼𑀤𑁆𑀥𑀺𑀬𑀸, 𑀕𑀡𑁆𑀳𑀦𑁆𑀢𑀼 𑀬𑀼𑀢𑁆𑀢𑀺𑀓𑀁 𑀳𑀯𑁂𑀢𑀺.