𑁨. 𑀪𑀯𑀢𑀺𑀓𑁆𑀭𑀺𑀬𑀸𑀧𑀤𑀫𑀸𑀮𑀸𑀯𑀺𑀪𑀸𑀕

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑁄𑀢𑀽𑀦𑀁 𑀫𑀢𑀺𑀯𑀟𑁆𑀠𑀦𑀁;

𑀓𑁆𑀭𑀺𑀬𑀸𑀧𑀤𑀓𑁆𑀓𑀫𑀁 𑀦𑀸𑀫, 𑀯𑀺𑀪𑀢𑁆𑀢𑀸𑀤𑀻𑀦𑀺 𑀤𑀻𑀧𑀬𑀁.

𑀢𑀢𑁆𑀭 𑀆𑀔𑁆𑀬𑀸𑀢𑀺𑀓𑀲𑁆𑀲 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑁆𑀢𑀲𑀽𑀘𑀺𑀓𑀸 𑀢𑁆𑀬𑀸𑀤𑀬𑁄 𑀯𑀺𑀪𑀢𑁆𑀢𑀺𑀬𑁄, 𑀢𑀸 𑀅𑀝𑁆𑀞𑀯𑀺𑀥𑀸 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀲𑀢𑁆𑀢𑀫𑀻𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀪𑀯𑀺𑀲𑁆𑀲𑀦𑁆𑀢𑀻 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦.

𑀢𑀢𑁆𑀣𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫, 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀢𑀼 𑀅𑀦𑁆𑀢𑀼, 𑀳𑀺 𑀣, 𑀫𑀺 𑀫, 𑀢𑀁 𑀅𑀦𑁆𑀢𑀁, 𑀲𑀼 𑀯𑁆𑀳𑁄, 𑀏 𑀆𑀫𑀲𑁂 𑀇𑀘𑁆𑀘𑁂𑀢𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀏𑀬𑁆𑀬 𑀏𑀬𑁆𑀬𑀼𑀁, 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀣, 𑀏𑀬𑁆𑀬𑀸𑀫𑀺 𑀏𑀬𑁆𑀬𑀸𑀫, 𑀏𑀣 𑀏𑀭𑀁, 𑀏𑀣𑁄 𑀏𑀬𑁆𑀬𑀸𑀯𑁆𑀳𑁄, 𑀏𑀬𑁆𑀬𑀁 𑀏𑀬𑁆𑀬𑀸𑀫𑁆𑀳𑁂 𑀇𑀘𑁆𑀘𑁂𑀢𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀅 𑀉, 𑀏 𑀢𑁆𑀣, 𑀅𑀁 𑀫𑁆𑀳, 𑀢𑁆𑀣 𑀭𑁂, 𑀢𑁆𑀣𑁄 𑀯𑁆𑀳𑁄, 𑀇𑀁 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀆 𑀊, 𑀑 𑀢𑁆𑀣, 𑀅𑀁 𑀫𑁆𑀳𑀸, 𑀢𑁆𑀣 𑀢𑁆𑀣𑀼𑀁, 𑀲𑁂 𑀯𑁆𑀳𑀁, 𑀇𑀁 𑀫𑁆𑀳𑀲𑁂 𑀇𑀘𑁆𑀘𑁂𑀢𑀸 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀈 𑀉𑀁, 𑀑 𑀢𑁆𑀣, 𑀇𑀁 𑀫𑁆𑀳𑀸, 𑀆 𑀊, 𑀲𑁂 𑀯𑁆𑀳𑀁, 𑀅𑀁 𑀫𑁆𑀳𑁂 𑀇𑀘𑁆𑀘𑁂𑀢𑀸 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑁆𑀲𑀢𑀺 𑀲𑁆𑀲𑀦𑁆𑀢𑀺, 𑀲𑁆𑀲𑀲𑀺 𑀲𑁆𑀲𑀣, 𑀲𑁆𑀲𑀸𑀫𑀺 𑀲𑁆𑀲𑀸𑀫, 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀁 𑀲𑁆𑀲𑀸𑀫𑁆𑀳𑁂 𑀇𑀘𑁆𑀘𑁂𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑁆𑀲𑀸 𑀲𑁆𑀲𑀁𑀲𑀼, 𑀲𑁆𑀲𑁂 𑀲𑁆𑀲𑀣, 𑀲𑁆𑀲𑀁 𑀲𑁆𑀲𑀸𑀫𑁆𑀳𑀸, 𑀲𑁆𑀲𑀣 𑀲𑁆𑀲𑀺𑀲𑀼, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀺𑀁 𑀲𑁆𑀲𑀸𑀫𑁆𑀳𑀲𑁂 𑀇𑀘𑁆𑀘𑁂𑀢𑀸 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺𑀬𑁄 𑀦𑀸𑀫.

𑀲𑀩𑁆𑀩𑀸𑀲𑀫𑁂𑀢𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺 𑀦𑀸𑀫. 𑀬𑀸𑀦𑀺 𑀬𑀸𑀦𑀺 𑀧𑀦 𑀧𑀭𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀦𑀸𑀫. 𑀢𑀢𑁆𑀣 𑀧𑀭𑀲𑁆𑀲𑀧𑀤𑀸𑀦𑀺 𑀯𑀢𑁆𑀢𑀫𑀸𑀦𑀸 𑀙, 𑀧𑀜𑁆𑀘𑀫𑀺𑀬𑁄 𑀙, 𑀲𑀢𑁆𑀢𑀫𑀺𑀬𑁄 𑀙, 𑀧𑀭𑁄𑀓𑁆𑀔𑀸 𑀙, 𑀳𑀺𑀬𑁆𑀬𑀢𑁆𑀢𑀦𑀺𑀬𑁄 𑀙, 𑀅𑀚𑁆𑀚𑀢𑀦𑀺𑀬𑁄 𑀙, 𑀪𑀯𑀺𑀲𑁆𑀲𑀦𑁆𑀢𑀺𑀬𑁄 𑀙, 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑁄 𑀙𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀺𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀇𑀢𑀭𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀸𑀦𑀺.

𑀧𑀭𑀲𑁆𑀲𑀧𑀤𑀸𑀦𑀫𑀢𑁆𑀢𑀦𑁄𑀧𑀤𑀸𑀦𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸 𑀦𑀸𑀫. 𑀢𑁂 𑀯𑀢𑁆𑀢𑀫𑀸𑀦𑀸𑀤𑀻𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄, 𑀅𑀝𑁆𑀞𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲, 𑀧𑀺𑀡𑁆𑀟𑀺𑀢𑀸𑀦𑀺 𑀧𑀭𑀺𑀫𑀸𑀡𑀸𑀦𑁂𑀯.

𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀧𑀞𑀫𑀁 𑀧𑀞𑀫𑀁 𑀏𑀓𑀯𑀘𑀦𑀁, 𑀤𑀼𑀢𑀺𑀬𑀁 𑀤𑀼𑀢𑀺𑀬𑀁 𑀩𑀳𑀼𑀯𑀘𑀦𑀁.

𑀢𑀢𑁆𑀭 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀻𑀦𑀦𑁆𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫 𑀇𑀘𑁆𑀘𑁂𑀢𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺. 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂 𑀇𑀘𑁆𑀘𑁂𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺. 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑁂𑀲𑀼𑀧𑀺𑀢𑀺 𑀅𑀦𑁆𑀢𑀺 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑀺𑀣 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀫𑀺 𑀫 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸, 𑀢𑁂 𑀅𑀦𑁆𑀢𑁂 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑁂 𑀯𑁆𑀳𑁂 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀏 𑀫𑁆𑀳𑁂 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸.

𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑁂𑀲𑀼𑀧𑀺 𑀢𑀺-𑀇𑀢𑀺 𑀏𑀓𑀯𑀘𑀦𑀁, 𑀅𑀦𑁆𑀢𑀺-𑀇𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀏𑀯𑀁 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀓𑀫𑀢𑁄 𑀜𑁂𑀬𑁆𑀬𑀸𑀦𑀺. 𑀏𑀯𑀁 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀭𑀲𑁆𑀲𑀧𑀤𑀢𑁆𑀢𑀦𑁄𑀧𑀤𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀜𑁂𑀬𑁆𑀬𑀸𑀦𑀺.

𑀢𑀢𑁆𑀣 𑀯𑀺𑀪𑀢𑁆𑀢𑀻𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀪𑀢𑁆𑀢𑀺? 𑀓𑀸𑀮𑀸𑀤𑀺𑀯𑀲𑁂𑀦 𑀥𑀸𑀢𑁆𑀯𑀢𑁆𑀣𑀁 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀲𑁆𑀬𑀸𑀤𑀻𑀳𑀺 𑀦𑀸𑀫𑀺𑀓𑀯𑀺𑀪𑀢𑁆𑀢𑀻𑀳𑀺 𑀲𑀳 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀧𑀦 𑀲𑀓𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀓𑀫𑁆𑀫𑀸𑀤𑀬𑁄 𑀯𑀸 𑀓𑀸𑀭𑀓𑁂 𑀏𑀓𑀯𑀘𑀦𑀩𑀳𑀼𑀯𑀘𑀦𑀯𑀲𑁂𑀦 𑀯𑀺𑀪𑀚𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀯𑀺𑀪𑀚𑀺𑀢𑀩𑁆𑀩𑀸 𑀜𑀸𑀡𑁂𑀦𑀸𑀢𑀺𑀧𑀺 𑀯𑀺𑀪𑀢𑁆𑀢𑀺, 𑀯𑀺𑀪𑀚𑀦𑁆𑀢𑀺 𑀅𑀢𑁆𑀣𑁂 𑀏𑀢𑀸𑀬𑀸𑀢𑀺𑀧𑀺 𑀯𑀺𑀪𑀢𑁆𑀢𑀺, 𑀅𑀣 𑀯𑀸 𑀲𑀢𑀺𑀧𑀺 𑀚𑀺𑀦𑀲𑀸𑀲𑀦𑁂 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀪𑀢𑁆𑀢𑀻𑀳𑀺 𑀯𑀺𑀦𑀸 𑀅𑀢𑁆𑀣𑀲𑁆𑀲𑀸’𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑁂𑀦 𑀯𑀺𑀯𑀺𑀥𑁂𑀦 𑀯𑀸 𑀆𑀓𑀸𑀭𑁂𑀦 𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀦𑀁 𑀧𑀡𑁆𑀟𑀺𑀢𑀸𑀢𑀺𑀧𑀺 𑀯𑀺𑀪𑀢𑁆𑀢𑀺. 𑀢𑀢𑁆𑀣 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑀮𑀓𑁆𑀔𑀡𑀁 𑀯𑀤𑀸𑀫 𑀲𑀳 𑀧𑀬𑁄𑀕𑀦𑀺𑀤𑀲𑁆𑀲𑀦𑀸𑀤𑀻𑀳𑀺.

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀦𑀸𑀫𑀺𑀓𑁂𑀲𑀼𑀧𑀮𑀩𑁆𑀪𑀢𑀺;

𑀦𑀸𑀔𑁆𑀬𑀸𑀢𑁂𑀲𑀽𑀢𑀺 𑀯𑀺𑀜𑁆𑀜𑁂𑀬𑁆𑀬-𑀫𑀺𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀦𑀺𑀕𑁆𑀭𑁄𑀥𑁄𑀯 𑀫𑀳𑀸𑀭𑀼𑀓𑁆𑀔𑁄, 𑀣𑁂𑀭 𑀯𑀸𑀤𑀸𑀦𑀫𑀼𑀢𑁆𑀢𑀫𑁄;

𑀅𑀦𑀽𑀦𑀁 𑀅𑀦𑀥𑀺𑀓𑀜𑁆𑀘, 𑀓𑁂𑀯𑀮𑀁 𑀚𑀺𑀦𑀲𑀸𑀲𑀦𑀁.

𑀢𑀢𑁆𑀭 𑀣𑁂𑀭-𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄, 𑀣𑁂𑀭𑀸𑀦𑀁 𑀅𑀬𑀦𑁆𑀢𑀺 𑀣𑁂𑀭𑁄. 𑀓𑁄 𑀲𑁄? 𑀯𑀸𑀤𑁄. 𑀣𑁂𑀭𑀯𑀸𑀤𑁄 𑀅𑀜𑁆𑀜𑁂𑀲𑀁 𑀯𑀸𑀤𑀸𑀦𑀁 𑀉𑀢𑁆𑀢𑀫𑁄𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀓𑀸𑀬𑁄 𑀢𑁂 𑀲𑀩𑁆𑀩 𑀲𑁄𑀯𑀡𑁆𑀡𑁄’’, 𑀇𑀘𑁆𑀘𑀸𑀤𑀺𑀫𑁆𑀳𑀺𑀧𑀺 𑀦𑀸𑀫𑀺𑀓𑁂;

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀕𑀳𑁂𑀢𑀩𑁆𑀩𑁄 𑀦𑀬𑀜𑁆𑀜𑀼𑀦𑀸.

𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀦𑀦𑁆𑀯𑀸𑀔𑁆𑀬𑀸𑀢𑁂𑀧𑀺 𑀤𑀺𑀲𑁆𑀲𑀢𑀺;

‘‘𑀪𑁄 𑀔𑀸𑀤 𑀧𑀺𑀯’’𑀇𑀘𑁆𑀘𑀢𑁆𑀭, 𑀯𑀤𑁂 𑀬𑁄 𑀓𑁄𑀘𑀺 𑀘𑁄𑀤𑀓𑁄.

𑀬𑀤𑀺 𑀏𑀯𑀁 𑀫𑀢𑁂𑀦𑀲𑁆𑀲, 𑀪𑀯𑁂𑀬𑁆𑀬 𑀅𑀯𑀺𑀪𑀢𑁆𑀢𑀺𑀓𑀁;

‘‘𑀪𑀺𑀓𑁆𑀔𑀼, 𑀪𑁄 𑀧𑀼𑀭𑀺𑀲𑀺’’𑀘𑁆𑀘𑀸𑀤𑀺, 𑀧𑀤𑀫𑁆𑀧𑀺, 𑀦 𑀳𑀺𑀤𑀁 𑀢𑀣𑀸.

‘‘𑀪𑀺𑀓𑁆𑀔𑀼, 𑀪𑁄 𑀧𑀼𑀭𑀺𑀲𑀺’’𑀘𑁆𑀘𑀸𑀤𑀺, 𑀲𑀺 𑀕 𑀮𑁄𑀧𑁂𑀦 𑀯𑀼𑀘𑁆𑀘𑀢𑀺;

𑀢𑀣𑀸 ‘‘𑀔𑀸𑀤𑀸’’𑀢𑀺𑀆𑀤𑀻𑀦𑀺, 𑀳𑀺 𑀮𑁄𑀧𑁂𑀦 𑀧𑀯𑀼𑀘𑁆𑀘𑀭𑁂.

𑀏𑀯𑀁 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀆𑀔𑁆𑀬𑀸𑀢𑁂𑀲𑀼 𑀦 𑀮𑀩𑁆𑀪𑀢𑀺, 𑀦𑀸𑀫𑁂𑀲𑀼𑀬𑁂𑀯 𑀮𑀩𑁆𑀪𑀢𑀺. 𑀢𑀢𑁆𑀭𑀸𑀧𑀺 ‘‘𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂’’𑀢𑀺 𑀏𑀢𑁆𑀣 𑀙𑀦𑁆𑀤𑀯𑀲𑁂𑀦 𑀧𑀼𑀕𑁆𑀕𑀮 𑀇𑀢𑀺 𑀭𑀲𑁆𑀲𑀓𑀭𑀡𑀁 𑀤𑀝𑁆𑀞𑀩𑁆𑀩𑀁, 𑀦 ‘‘𑀓𑀓𑀼𑀲𑀦𑁆𑀥 𑀓𑁄𑀡𑀸𑀕𑀫𑀦𑁄 𑀘 𑀓𑀲𑁆𑀲𑀧𑁄’’𑀢𑀺 𑀏𑀢𑁆𑀣 𑀓𑀓𑀼𑀲𑀦𑁆𑀥 𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀯𑀺𑀬 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸’’𑀢𑀺 𑀏𑀢𑁆𑀣 𑀧𑀦 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀪𑀺𑀓𑁆𑀔𑀼𑀫𑁆𑀳𑀻𑀢𑀺 𑀯𑀢𑁆𑀢𑀩𑁆𑀩𑀢𑁆𑀣𑀢𑁆𑀢𑀸 𑀪𑀼𑀫𑁆𑀫𑁂 𑀧𑀘𑁆𑀘𑀢𑁆𑀢𑀦𑁆𑀢𑀺𑀧𑀺 𑀅𑀤𑀺𑀝𑁆𑀞𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀦 𑀙𑀦𑁆𑀤𑀯𑀲𑁂𑀦 𑀓𑀢𑀭𑀲𑁆𑀲𑀢𑁆𑀢𑀸 𑀢𑀸𑀦𑀺 𑀧𑀤𑀸𑀦𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑀧𑀓𑁆𑀔𑀫𑁆𑀧𑀺 𑀪𑀚𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀺.

𑀢𑀢𑁆𑀣 𑀧𑀭𑀲𑁆𑀲𑀧𑀤𑀸𑀦𑀻𑀢𑀺 𑀧𑀭𑀲𑁆𑀲 𑀅𑀢𑁆𑀣𑀪𑀽𑀢𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺. 𑀏𑀢𑁆𑀣𑀼𑀢𑁆𑀢𑀫𑀧𑀼𑀭𑀺𑀲𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀣𑁂𑀲𑀼𑀧𑀺 𑀅𑀢𑁆𑀢𑀦𑁄𑀧𑀤𑀯𑁄𑀳𑀸𑀭𑁄 𑀦 𑀓𑀭𑀺𑀬𑀢𑀺.

𑀓𑀺𑀜𑁆𑀘𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸, 𑀧𑀼𑀭𑀺𑀲𑀸 𑀉𑀢𑁆𑀢𑀫𑀯𑁆𑀳𑀬𑀸;

𑀢𑀣𑀸𑀧𑀺 𑀇𑀢𑀭𑁂𑀲𑀸𑀦-𑀫𑀼𑀲𑁆𑀲𑀦𑁆𑀦𑀢𑁆𑀢𑀸𑀯 𑀢𑀩𑁆𑀩𑀲𑀸;

𑀢𑀩𑁆𑀩𑁄𑀳𑀸𑀭𑁄 𑀇𑀫𑁂𑀲𑀸𑀦𑀁, 𑀧𑁄𑀭𑀸𑀡𑁂𑀳𑀺 𑀦𑀺𑀭𑁄𑀧𑀺𑀢𑁄.

𑀅𑀢𑁆𑀢𑀦𑁄𑀧𑀤𑀸𑀦𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑀸𑀦𑀺 𑀧𑀤𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺. 𑀏𑀢𑁆𑀣 𑀧𑀦 𑀧𑀞𑀫𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀲𑀼 𑀧𑀭𑀲𑁆𑀲𑀢𑁆𑀣𑁂𑀲𑀼𑀧𑀺 𑀧𑀭𑀲𑁆𑀲𑀧𑀤𑀯𑁄𑀳𑀸𑀭𑁄 𑀦 𑀓𑀭𑀺𑀬𑀢𑀺.

𑀧𑀞𑀫𑀫𑀚𑁆𑀛𑀺𑀫𑀸 𑀘𑁂𑀢𑁂, 𑀧𑀭𑀲𑁆𑀲𑀢𑁆𑀣𑀸 𑀢𑀣𑀸𑀧𑀺 𑀘;

𑀇𑀢𑀭𑁂𑀲𑀁 𑀦𑀺𑀭𑀽𑀴𑁆𑀳𑀢𑁆𑀢𑀸, 𑀢𑀩𑁆𑀩𑁄𑀳𑀸𑀭𑀲𑁆𑀲 𑀲𑀘𑁆𑀘𑀢𑁄.

𑀇𑀫𑀲𑁆𑀲 𑀧𑀦𑀺𑀫𑁂𑀲𑀸𑀦𑀁, 𑀧𑀼𑀩𑁆𑀩𑀯𑁄𑀳𑀸𑀭𑀢𑀸𑀬 𑀘;

𑀢𑀣𑀸 𑀲𑀗𑁆𑀓𑀭𑀤𑁄𑀲𑀲𑁆𑀲, 𑀳𑀭𑀡𑀢𑁆𑀣𑀸𑀬 𑀲𑁄 𑀅𑀬𑀁;

𑀅𑀢𑁆𑀢𑀦𑁄𑀧𑀤𑀯𑁄𑀳𑀸𑀭𑁄, 𑀏𑀲𑀫𑀸𑀭𑁄𑀧𑀺𑀢𑁄 𑀥𑀼𑀯𑀁.

𑀧𑀭𑀲𑁆𑀲𑀧𑀤𑀲𑀜𑁆𑀜𑀸𑀤𑀺-𑀲𑀜𑁆𑀜𑀸𑀬𑁄 𑀩𑀳𑀼𑀓𑀸 𑀇𑀥;

𑀧𑁄𑀭𑀸𑀡𑁂𑀳𑀺 𑀓𑀢𑀢𑁆𑀢𑀸𑀢𑀸, 𑀲𑀜𑁆𑀜𑀸 𑀧𑁄𑀭𑀸𑀡𑀺𑀓𑀸 𑀫𑀢𑀸.

𑀢𑀲𑁆𑀫𑀸 𑀇𑀥 𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀼𑀭𑀺𑀲𑀸𑀦𑀁 𑀯𑀘𑀦𑀢𑁆𑀣𑀁 𑀦 𑀧𑀭𑀺𑀬𑁂𑀲𑀸𑀫. 𑀭𑀽𑀴𑁆𑀳𑀺𑀬𑀸 𑀳𑀺 𑀧𑁄𑀭𑀸𑀡𑁂𑀳𑀺 𑀢𑁆𑀬𑀸𑀤𑀻𑀦𑀁 𑀧𑀼𑀭𑀺𑀲𑀲𑀜𑁆𑀜𑀸 𑀯𑀺𑀳𑀺𑀢𑀸.

𑀏𑀓𑀯𑀘𑀦𑀩𑀳𑀼𑀯𑀘𑀦𑁂𑀲𑀼 𑀧𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀯𑀘𑀦𑀁 𑀏𑀓𑀯𑀘𑀦𑀁. 𑀩𑀳𑀽𑀦𑀫𑀢𑁆𑀣𑀸𑀦𑀁 𑀯𑀘𑀦𑀁 𑀩𑀳𑀼𑀯𑀘𑀦𑀁. 𑀅𑀣 𑀯𑀸 𑀩𑀳𑀼𑀢𑁆𑀢𑁂𑀧𑀺 𑀲𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀚𑀸𑀢𑀺𑀯𑀲𑁂𑀦 𑀯𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑀻𑀓𑀢𑀲𑁆𑀲𑀢𑁆𑀣𑀲𑁆𑀲 𑀏𑀓𑀲𑁆𑀲 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁, 𑀩𑀳𑀼𑀢𑁆𑀢𑁂 𑀦𑀺𑀲𑁆𑀲𑀺𑀢𑀲𑁆𑀲 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀯𑀲𑁂𑀦 𑀏𑀓𑀲𑁆𑀲 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁, 𑀏𑀓𑀢𑁆𑀢𑀮𑀓𑁆𑀔𑀡𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀏𑀓𑀯𑀘𑀦𑀁. 𑀅𑀩𑀳𑀼𑀢𑁆𑀢𑁂𑀧𑀺 𑀲𑀢𑀺 𑀅𑀢𑁆𑀢𑀕𑀭𑀼𑀓𑀸𑀭𑀸𑀧𑀭𑀺𑀘𑁆𑀙𑁂𑀤𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑀧𑀼𑀘𑁆𑀙𑀸𑀲𑀪𑀸𑀕𑀧𑀼𑀣𑀼𑀘𑀺𑀢𑁆𑀢- 𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁆𑀣𑀲𑁆𑀲 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀁 𑀩𑀳𑀼𑀯𑀘𑀦𑀁, 𑀢𑀣𑀸 𑀬𑁂 𑀬𑁂 𑀩𑀳𑀯𑁄 𑀢𑀦𑁆𑀦𑀺𑀯𑀸𑀲𑀢𑀁𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲𑁂𑀓𑀲𑁆𑀲𑀢𑁆𑀣𑀲𑁆𑀲 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀜𑁆𑀜𑁂𑀦𑀢𑁆𑀣𑁂𑀦 𑀏𑀓𑀸𑀪𑀺𑀥𑀸𑀦𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀦𑀺𑀲𑁆𑀲𑀺𑀢𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀆𑀭𑀫𑁆𑀫𑀡𑀪𑁂𑀤𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀩𑀳𑀽𑀦𑀁 𑀯𑀺𑀬 𑀯𑀘𑀦𑀫𑁆𑀧𑀺 𑀩𑀳𑀼𑀯𑀘𑀦𑀁. 𑀏𑀯𑀫𑀺𑀫𑁂𑀳𑀺 𑀆𑀓𑀸𑀭𑁂𑀳𑀺 𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂, 𑀏𑀓𑀫𑁆𑀳𑀺 𑀯𑀺𑀬 𑀘 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂, 𑀩𑀳𑀼𑀫𑁆𑀳𑀺 𑀯𑀺𑀬 𑀘 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀣𑀼𑀯𑀘𑀦𑀁, 𑀅𑀦𑁂𑀓𑀯𑀘𑀦𑀦𑁆𑀢𑀺 𑀘 𑀇𑀫𑀲𑁆𑀲𑁂𑀯 𑀦𑀸𑀫𑀁.

𑀯𑀘𑀦𑁂𑀲𑀼 𑀅𑀬𑀁 𑀅𑀢𑁆𑀣𑁄, 𑀦𑀸𑀫𑀸𑀔𑁆𑀬𑀸𑀢𑀯𑀺𑀪𑀢𑁆𑀢𑀺𑀦𑀁;

𑀯𑀲𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑁄, 𑀲𑀸𑀲𑀦𑀢𑁆𑀣𑀕𑀯𑁂𑀲𑀺𑀦𑀸.

𑀢𑀲𑁆𑀫𑀸 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀇𑀥 𑀦𑀸𑀫𑀺𑀓𑀧𑀬𑁄𑀕𑁂𑀳𑀺 𑀲𑀳𑁂𑀯𑀸𑀔𑁆𑀬𑀸𑀢𑀧𑀬𑁄𑀕𑁂 𑀧𑀯𑀓𑁆𑀔𑀸𑀫 𑁋 ‘‘𑀭𑀸𑀚𑀸 𑀆𑀕𑀘𑁆𑀙𑀢𑀺, 𑀲𑀳𑀸𑀬𑁄 𑀫𑁂 𑀆𑀕𑀘𑁆𑀙𑀢𑀺, 𑀏𑀓𑀁 𑀘𑀺𑀢𑁆𑀢’’ 𑀫𑀺𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀏𑀓𑀯𑀘𑀦𑀧𑀬𑁄𑀕𑀸. ‘‘𑀭𑀸𑀚𑀸𑀦𑁄 𑀆𑀕𑀘𑁆𑀙𑀦𑁆𑀢𑀺, 𑀲𑀳𑀸𑀬𑀸 𑀫𑁂 𑀆𑀕𑀘𑁆𑀙𑀦𑁆𑀢𑀺, 𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀤𑁆𑀯𑁂 𑀢𑀻𑀡𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀩𑀯𑁆𑀳𑀢𑁆𑀣𑀸𑀦𑀁 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀲𑀸 𑀲𑁂𑀦𑀸 𑀫𑀳𑀢𑀻 𑀆𑀲𑀺, 𑀩𑀳𑀼𑀚𑁆𑀚𑀦𑁄 𑀧𑀲𑀦𑁆𑀦𑁄𑀲𑀺, 𑀲𑀩𑁆𑀩𑁄 𑀢𑀁 𑀚𑀦𑁄 𑀑𑀚𑀺𑀦𑀸𑀬𑀢𑀼, 𑀇𑀢𑁆𑀣𑀺𑀕𑀼𑀫𑁆𑀩𑀲𑁆𑀲 𑀧𑀯𑀭𑀸, 𑀩𑀼𑀤𑁆𑀥𑀲𑁆𑀲𑀸𑀳𑀁 𑀯𑀢𑁆𑀣𑀬𑀼𑀕𑀁 𑀅𑀤𑀸𑀲𑀺𑀁, 𑀤𑁆𑀯𑀬𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀧𑁂𑀫𑀁 𑀫𑀳𑀦𑁆𑀢𑀁 𑀭𑀢𑀦𑀢𑁆𑀢𑀬𑀲𑁆𑀲, 𑀓𑀭𑁂 𑀧𑀲𑀸𑀤𑀜𑁆𑀘 𑀦𑀭𑁄 𑀅𑀯𑀲𑁆𑀲𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀩𑀮𑀓𑀸𑀬𑁄, 𑀤𑁂𑀯𑀦𑀺𑀓𑀸𑀬𑁄, 𑀅𑀭𑀺𑀬𑀕𑀡𑁄’’- 𑀇𑀘𑁆𑀘𑁂𑀯𑀫𑀸𑀤𑀬𑁄, ‘‘𑀤𑁆𑀯𑀺𑀓𑀁 𑀢𑀺𑀓’’𑀫𑀺𑀘𑁆𑀘𑀸𑀤𑀬𑁄 𑀘 𑀲𑀫𑀼𑀤𑀸𑀬𑀯𑀲𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸.

𑀓𑀢𑁆𑀣𑀘𑀺 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀩𑀳𑀼𑀯𑀘𑀦𑀧𑀬𑁄𑀕𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸 𑀳𑀺 ‘‘𑀧𑀽𑀚𑀺𑀢𑀸 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸, 𑀲𑀩𑁆𑀩𑁂𑀢𑁂 𑀤𑁂𑀯𑀦𑀺𑀓𑀸𑀬𑀸, 𑀤𑁆𑀯𑁂 𑀤𑁂𑀯𑀲𑀗𑁆𑀖𑀸, 𑀢𑀻𑀡𑀺 𑀤𑀼𑀓𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀯𑀓𑀸𑀦𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀬𑁄𑀕𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀏𑀓𑀯𑀘𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀩𑀳𑀼𑀲𑀫𑀼𑀤𑀸𑀬𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸𑀢𑀺 𑀕𑀳𑁂𑀢𑀩𑁆𑀩𑀸, 𑀲𑀗𑁆𑀕𑀬𑁆𑀳𑀫𑀸𑀦𑀸 𑀘 𑀩𑀯𑁆𑀳𑀢𑁆𑀣𑀩𑀳𑀼𑀯𑀘𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀯𑀺𑀲𑀼𑀁𑀬𑁂𑀯 𑀯𑀸, 𑀢𑀲𑁆𑀫𑀸 𑀩𑀳𑀼𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀦𑁆𑀢𑀺 𑀏𑀢𑁂𑀲𑀁 𑀦𑀸𑀫𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀧𑀸𑀡𑀁 𑀦 𑀳𑀦𑁂, 𑀲𑀲𑁆𑀲𑁄 𑀲𑀫𑁆𑀧𑀚𑁆𑀚𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀚𑀸𑀢𑀺𑀯𑀲𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸, 𑀢𑀩𑁆𑀪𑀸𑀯𑀲𑀸𑀫𑀜𑁆𑀜𑁂𑀦 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

‘‘𑀦𑀸𑀕𑀁 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑀁, 𑀲𑀸𑀯𑀢𑁆𑀣𑀻 𑀲𑀤𑁆𑀥𑀸 𑀅𑀳𑁄𑀲𑀺 𑀧𑀲𑀦𑁆𑀦𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀦𑀺𑀲𑁆𑀲𑀬𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸𑀦𑀫𑁂𑀓𑀯𑀘𑀦𑀧𑀬𑁄𑀕𑀸.

‘‘𑀢𑀺𑀮𑀓𑁆𑀔𑀡𑀁, 𑀓𑀼𑀲𑀮𑀸𑀓𑀼𑀲𑀮𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀥𑀫𑁆𑀫𑀯𑀺𑀦𑀬𑁄, 𑀘𑀺𑀢𑁆𑀢𑀲𑁂𑀦𑁄 𑀘 𑀕𑀦𑁆𑀥𑀩𑁆𑀩𑁄, 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺, 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀢𑁆𑀢𑀮𑀓𑁆𑀔𑀡𑁂 𑀩𑀯𑁆𑀳𑀢𑁆𑀣𑀸𑀦𑀁 𑀏𑀓𑀯𑀘𑀦𑀧𑀬𑁄𑀕𑀸.

‘‘𑀏𑀯𑀁 𑀫𑀬𑀁 𑀕𑀡𑁆𑀳𑀸𑀫, 𑀅𑀫𑁆𑀳𑀸𑀓𑀁 𑀧𑀓𑀢𑀺, 𑀧𑀥𑀸𑀦𑀦𑁆𑀢𑀺 𑀔𑁄 𑀫𑁂𑀖𑀺𑀬 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀢𑁆𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀢𑁂 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 ‘𑀪𑀼𑀜𑁆𑀚𑀣 𑀪𑀦𑁆𑀢𑁂’𑀢𑀺, 𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀩𑁆𑀪𑀸𑀕𑀢𑀸𑀦𑀸’𑀲𑀦𑀓𑀁 𑀅𑀤𑀸𑀲𑀺𑀁’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀕𑀭𑀼𑀓𑀸𑀭𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸, 𑀅𑀦𑀺𑀬𑀫𑀺𑀢𑀲𑀗𑁆𑀔𑀸𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸 𑀯𑀸.

𑀓𑁂𑀘𑀺 𑀧𑀦 ‘‘𑀤𑁂𑀲𑀦𑀸𑀲𑁄𑀢𑀧𑀸𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸’’𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀢𑀣𑀸𑀕𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀭𑀳𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀼𑀢𑁆𑀢𑀺 𑀘 𑀦 𑀤𑀺𑀲𑁆𑀲𑀢𑀺 ‘‘𑀫𑀸𑀢𑀺𑀓𑀸𑀬𑀁 𑀧𑀼𑀘𑁆𑀙𑀸𑀬𑀁 𑀯𑀺𑀲𑁆𑀲𑀚𑁆𑀚𑀦𑁂 𑀘𑀸𑀢𑀺 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀅𑀧𑁆𑀧𑀘𑁆𑀘𑀬𑀸𑀤𑀺𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀼𑀦𑀧𑁆𑀧𑀼𑀦𑀁 𑀩𑀳𑀼𑀯𑀘𑀦𑀯𑀲𑁂𑀦 𑀤𑁂𑀲𑀦𑀸𑀲𑁄𑀢𑁂 𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺.

‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀬𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀦𑁄 𑀧𑀭𑀸𑀫𑀸𑀲𑀸, 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻’’𑀢𑀺 𑀅𑀬𑀫𑁂𑀓𑀲𑁆𑀲𑀢𑁆𑀣𑀲𑁆𑀲 𑀧𑀼𑀣𑀼𑀘𑀺𑀢𑁆𑀢𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑁄.

‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂,

𑀲𑀦𑁆𑀢𑀺 𑀧𑀼𑀢𑁆𑀢𑀸 𑀯𑀺𑀤𑁂𑀳𑀸𑀦𑀁, 𑀤𑀻𑀖𑀸𑀯𑀼 𑀭𑀝𑁆𑀞𑀯𑀟𑁆𑀠𑀦𑁄;

𑀢𑁂 𑀭𑀚𑁆𑀚𑀁 𑀓𑀸𑀭𑀬𑀺𑀲𑁆𑀲𑀦𑁆𑀢𑀺, 𑀫𑀺𑀣𑀺𑀮𑀸𑀬𑀁 𑀧𑀚𑀸𑀧𑀢𑀺’’ 𑁋

𑀇𑀘𑁆𑀘𑁂𑀯𑀫𑀸𑀤𑀬𑁄 𑀲𑀤𑁆𑀤𑀸 𑀬𑁂 𑀬𑁂 𑀩𑀳𑀯𑁄, 𑀢𑀦𑁆𑀦𑀺𑀯𑀸𑀲𑀢𑀁𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲𑁂𑀓𑀢𑁆𑀣𑀲𑁆𑀲 𑀭𑀽𑀴𑁆𑀳𑀻𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀲𑀺 ‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑀸𑀭𑀺𑀧𑀼𑀢𑁆𑀢𑀸 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀣, 𑀢𑀼𑀫𑁆𑀳𑀸𑀓𑀁 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄’𑀢𑀺’’, ‘‘𑀓𑀘𑁆𑀘𑀺 𑀯𑁄 𑀓𑀼𑀮𑀧𑀼𑀢𑁆𑀢𑀸, 𑀏𑀣 𑀩𑁆𑀬𑀕𑁆𑀖𑀸 𑀦𑀺𑀯𑀢𑁆𑀢𑀯𑁆𑀳𑁄’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀅𑀜𑁆𑀜𑁂𑀦𑀢𑁆𑀣𑁂𑀦 𑀏𑀓𑀸𑀪𑀺𑀥𑀸𑀦𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀏𑀓𑀲𑁆𑀲𑀢𑁆𑀣𑀲𑁆𑀲 𑀦𑀺𑀲𑁆𑀲𑀺𑀢𑀯𑀲𑁂𑀦 𑀩𑀳𑀼𑀯𑀘𑀦𑀧𑀬𑁄𑀕𑀸.

‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀅𑀬𑀫𑀸𑀭𑀫𑁆𑀫𑀡𑀪𑁂𑀤𑁂𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀩𑀳𑀼𑀯𑀘𑀦𑀧𑀬𑁄𑀕𑁄.

‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 𑀅𑀬𑀁 𑀧𑀦 𑀓𑀺𑀘𑁆𑀘𑀪𑁂𑀤𑁂𑀦 𑀏𑀓𑀲𑁆𑀲𑀢𑁆𑀣𑀲𑁆𑀲 𑀩𑀳𑀼𑀯𑀘𑀦𑀧𑀬𑁄𑀕𑁄.

𑀢𑀢𑁆𑀣 𑀏𑀓𑀢𑁆𑀣𑁂𑀓𑀯𑀘𑀦𑀁, 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀚𑀸𑀢𑁆𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁, 𑀏𑀓𑀢𑁆𑀢𑀮𑀓𑁆𑀔𑀡𑁂𑀓𑀯𑀘𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀏𑀓𑀯𑀘𑀦𑀁 𑀪𑀯𑀢𑀺. 𑀏𑀢𑁆𑀣 𑀧𑀦 𑀚𑀸𑀢𑁆𑀬𑀸𑀧𑁂𑀓𑁆𑀔𑁂𑀓𑀯𑀘𑀦𑀁 𑀅𑀢𑁆𑀣𑀢𑁄 𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑁂𑀓𑀯𑀘𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀩𑀯𑁆𑀳𑀢𑁆𑀣𑀩𑀳𑀼𑀯𑀘𑀦𑀁, 𑀩𑀳𑀼𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀁, 𑀅𑀢𑁆𑀢𑀩𑀳𑀼𑀯𑀘𑀦𑀁, 𑀕𑀭𑀼𑀓𑀸𑀭𑀩𑀳𑀼𑀯𑀘𑀦𑀁, 𑀅𑀧𑀭𑀺𑀘𑁆𑀙𑁂𑀤𑀩𑀳𑀼𑀯𑀘𑀦𑀁, 𑀫𑀸𑀢𑀺𑀓𑀸𑀦𑀼𑀲𑀦𑁆𑀥𑀺𑀦𑀬𑀩𑀳𑀼𑀯𑀘𑀦𑀁, 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀬𑀩𑀳𑀼𑀯𑀘𑀦𑀁, 𑀧𑀼𑀘𑁆𑀙𑀸𑀲𑀪𑀸𑀕𑀩𑀳𑀼𑀯𑀘𑀦𑀁, 𑀧𑀼𑀣𑀼𑀘𑀺𑀢𑁆𑀢𑀲𑀫𑀸𑀬𑁄𑀕𑀧𑀼𑀣𑀼𑀆𑀭𑀫𑁆𑀫𑀡𑀩𑀳𑀼𑀯𑀘𑀦𑀁, 𑀢𑀦𑁆𑀦𑀺𑀯𑀸𑀲𑀩𑀳𑀼𑀯𑀘𑀦𑀁, 𑀢𑀁𑀧𑀼𑀢𑁆𑀢𑀩𑀳𑀼𑀯𑀘𑀦𑀁, 𑀏𑀓𑀸𑀪𑀺𑀥𑀸𑀦𑀩𑀳𑀼𑀯𑀘𑀦𑀁, 𑀢𑀦𑁆𑀦𑀺𑀲𑁆𑀲𑀺𑀢𑀸𑀧𑁂𑀓𑁆𑀔𑀩𑀳𑀼𑀯𑀘𑀦𑀁, 𑀆𑀭𑀫𑁆𑀫𑀡𑀪𑁂𑀤𑀩𑀳𑀼𑀯𑀘𑀦𑀁, 𑀓𑀺𑀘𑁆𑀘𑀪𑁂𑀤𑀩𑀳𑀼𑀯𑀘𑀦𑀦𑁆𑀢𑀺 𑀧𑀦𑁆𑀦𑀭𑀲𑀯𑀺𑀥𑀁 𑀩𑀳𑀼𑀯𑀘𑀦𑀁 𑀪𑀯𑀢𑀺. 𑀇𑀘𑁆𑀘𑁂𑀯𑀁 𑀯𑀻𑀲𑀥𑀸 𑀲𑀩𑁆𑀩𑀸𑀦𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀅𑀢𑁆𑀭𑀺𑀤𑀁 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑁋

𑀏𑀓𑀢𑁆𑀣𑁂 𑀤𑁂𑀓𑀯𑀘𑀦-𑀜𑁆𑀘𑀺𑀢𑀭𑀲𑁆𑀫𑀺𑀢𑀭𑀫𑁆𑀧𑀺 𑀘;

𑀲𑀫𑀼𑀤𑀸𑀬𑀚𑀸𑀢𑀺𑀏𑀓𑀢𑁆𑀢-𑀮𑀓𑁆𑀔𑀡𑁂𑀓𑀯𑀘𑁄𑀧𑀺 𑀘;

𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀫𑁆𑀳𑀺, 𑀧𑀸𑀞𑁂 𑀧𑀸𑀬𑁂𑀦 𑀤𑀺𑀲𑁆𑀲𑀭𑁂.

𑀕𑀭𑀼𑀫𑁆𑀳𑀺 𑀘𑀢𑁆𑀢𑀦𑁂𑀓𑀲𑁆𑀫𑀺𑀁, 𑀩𑀳𑀼𑀯𑀘𑀦𑀓𑀁 𑀧𑀦;

𑀧𑀸𑀴𑀺𑀬𑀁 𑀅𑀧𑁆𑀧𑀓𑀁 𑀅𑀝𑁆𑀞-𑀓𑀣𑀸𑀝𑀻𑀓𑀸𑀲𑀼 𑀢𑀁 𑀩𑀳𑀼𑀁.

𑀢𑀣𑀸 𑀳𑀺 𑀩𑀳𑀼𑀓𑀁 𑀤𑁂𑀓-𑀯𑀘𑀦𑀁𑀬𑁂𑀯 𑀧𑀸𑀴𑀺𑀬𑀁;

𑀕𑀭𑀼𑀫𑁆𑀳𑀺 𑀘𑀢𑁆𑀢𑀦𑁂𑀓𑀲𑁆𑀫𑀺𑀁, 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀢𑀯 𑀲𑀸𑀲𑀦𑀫𑀸𑀕𑀫𑁆𑀫, 𑀧𑀢𑁆𑀢𑁄𑀫𑁆𑀳𑀺 𑀅𑀫𑀢𑀁 𑀧𑀤𑀁’’.

𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀸𑀞𑀸, 𑀩𑀳𑀼𑀥𑀸 𑀚𑀺𑀦𑀲𑀸𑀲𑀦𑁂;

𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀚𑀸𑀦𑁂𑀬𑁆𑀬, 𑀯𑀺𑀤𑁆𑀯𑀸 𑀅𑀓𑁆𑀔𑀭𑀘𑀺𑀦𑁆𑀢𑀓𑁄.

𑀲𑀸𑀢𑀺𑀲𑀬𑀁 𑀕𑀭𑀼𑀓𑀸𑀭𑀸-𑀭𑀳𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄;

𑀏𑀓𑀯𑀘𑀦𑀬𑁄𑀕𑁂𑀦, 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑁂 𑀬𑀢𑁄.

𑀢𑀢𑁄 𑀯𑁄𑀳𑀸𑀭𑀓𑀼𑀲𑀮𑁄, 𑀓𑀭𑁂𑀬𑁆𑀬𑀢𑁆𑀣𑀸𑀦𑀼𑀭𑀽𑀧𑀢𑁄;

𑀏𑀓𑀯𑀘𑀦𑀬𑁄𑀕𑀁 𑀯𑀸, 𑀇𑀢𑀭𑀁 𑀯𑀸 𑀲𑀼𑀫𑁂𑀥𑀲𑁄.

𑀧𑀸𑀬𑁂𑀦 𑀢𑀦𑁆𑀦𑀺𑀯𑀸𑀲𑀫𑁆𑀳𑀺, 𑀩𑀳𑀼𑀯𑀘𑀦𑀓𑀁 𑀞𑀺𑀢𑀁;

𑀢𑀁𑀧𑀼𑀢𑁆𑀢𑁂 𑀅𑀧𑁆𑀧𑀓𑀁 𑀢𑀦𑁆𑀦𑀺-𑀲𑁆𑀲𑀬𑁂𑀓𑀯𑀘𑀦𑀫𑁆𑀧𑀺 𑀘.

𑀧𑀼𑀣𑀼𑀘𑀺𑀢𑁆𑀢𑀸𑀧𑀭𑀺𑀘𑁆𑀙𑁂𑀤-𑀫𑀸𑀢𑀺𑀓𑀸𑀲𑀦𑁆𑀥𑀺𑀆𑀤𑀺𑀲𑀼;

𑀩𑀳𑀼𑀯𑀘𑀦𑀓𑀜𑁆𑀘𑀸𑀧𑀺, 𑀅𑀧𑁆𑀧𑀓𑀦𑁆𑀢𑀺 𑀧𑀓𑀸𑀲𑀬𑁂.

𑀏𑀓𑀸𑀪𑀺𑀥𑀸𑀦𑀢𑁄 𑀓𑀺𑀘𑁆𑀘𑀸, 𑀢𑀣𑀸 𑀕𑁄𑀘𑀭𑀢𑁄𑀧𑀺 𑀘;

𑀩𑀳𑀼𑀯𑀘𑀦𑀓𑀁 𑀢𑀦𑁆𑀦𑀺-𑀲𑁆𑀲𑀺𑀢𑀸𑀧𑁂𑀓𑁆𑀔𑀜𑁆𑀘 𑀅𑀧𑁆𑀧𑀓𑀁.

𑀇𑀘𑁆𑀘𑁂𑀯𑀁 𑀲𑀧𑁆𑀧𑀬𑁄𑀕𑀁 𑀢𑀼, 𑀜𑀢𑁆𑀯𑀸𑀦 𑀯𑀘𑀦𑀤𑁆𑀯𑀬𑀁;

𑀓𑀸𑀢𑀩𑁆𑀩𑁄 𑀧𑀦 𑀯𑁄𑀳𑀸𑀭𑁄, 𑀬𑀣𑀸𑀧𑀸𑀴𑀺 𑀯𑀺𑀪𑀸𑀯𑀺𑀦𑀸.

𑀇𑀤𑀸𑀦𑀺 𑀓𑀸𑀮𑀸𑀤𑀺𑀯𑀲𑁂𑀦 𑀆𑀔𑁆𑀬𑀸𑀢𑀧𑁆𑀧𑀯𑀢𑁆𑀢𑀺𑀁 𑀤𑀻𑀧𑀬𑀺𑀲𑁆𑀲𑀸𑀫 𑁋 𑀓𑀸𑀮𑀓𑀸𑀭𑀓𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀁 𑀆𑀔𑁆𑀬𑀸𑀢𑀺𑀓𑀁. 𑀢𑀢𑁆𑀭 𑀓𑀸𑀮𑀦𑁆𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀢𑀬𑁄 𑀓𑀸𑀮𑀸, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀧𑀦 𑀙, 𑀢𑁂 𑀏𑀓𑁂𑀓𑀸 𑀢𑀺𑀧𑀼𑀭𑀺𑀲𑀓𑀸.

𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀸𑀮𑁂𑀲𑀼, 𑀬𑀤𑀺𑀤𑀁 𑀯𑀢𑁆𑀢𑀢𑁂 𑀬𑀢𑁄;

𑀆𑀔𑁆𑀬𑀸𑀢𑀺𑀓𑀁 𑀢𑀢𑁄 𑀢𑀲𑁆𑀲, 𑀓𑀸𑀮𑀤𑀻𑀧𑀦𑀢𑀸 𑀫𑀢𑀸.

𑀓𑀸𑀭𑀓𑀦𑁆𑀢𑀺 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀸. 𑀢𑁂 𑀳𑀺 𑀉𑀧𑀘𑀸𑀭𑀫𑀼𑀔𑁆𑀬𑀲𑀪𑀸𑀯𑀯𑀲𑁂𑀦 𑀓𑀭𑁄𑀦𑁆𑀢𑀺 𑀓𑀭𑀡𑀦𑁆𑀢𑀺 𑀘 ‘‘𑀓𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀯 𑀬𑀣𑀸𑀓𑁆𑀓𑀫𑀁 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢 𑀢𑀁𑀲𑀸𑀥𑀓 𑀢𑀁𑀲𑀪𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀁 𑀓𑀢𑁆𑀢𑀸 𑀘 𑀪𑀸𑀯𑁄 𑀘, 𑀇𑀘𑁆𑀘𑁂𑀯𑀁 𑀓𑀸𑀭𑀓𑀸 𑀢𑀺𑀥𑀸;

𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀸 𑀏𑀢𑁆𑀣, 𑀯𑀼𑀢𑁆𑀢𑀸 𑀦𑀸𑀜𑁆𑀜𑀢𑁆𑀭 𑀲𑀘𑁆𑀘𑀢𑁄.

‘‘𑀧𑀭𑀺𑀪𑀯𑀺𑀬𑁆𑀬𑀢𑀺’’𑀘𑁆𑀘𑀸𑀤𑀻, 𑀓𑀫𑁆𑀫𑁂 𑀲𑀺𑀚𑁆𑀛𑀦𑁆𑀢𑀺 𑀓𑀸𑀭𑀓𑁂;

‘‘𑀲𑀫𑁆𑀪𑀯𑀢𑀻’’𑀢𑀺𑀆𑀤𑀻𑀦𑀺, 𑀲𑀺𑀚𑁆𑀛𑀭𑁂 𑀓𑀢𑁆𑀢𑀼𑀓𑀸𑀭𑀓𑁂.

‘‘𑀯𑀺𑀪𑀯𑀺𑀬𑁆𑀬𑀢𑀺’’𑀇𑀘𑁆𑀘𑀸𑀤𑀻, 𑀪𑀸𑀯𑁂 𑀲𑀺𑀚𑁆𑀛𑀦𑁆𑀢𑀺 𑀓𑀸𑀭𑀓𑁂;

𑀢𑀺𑀯𑀺𑀥𑁂𑀲𑁆𑀯𑁂𑀯𑀫𑁂𑀢𑁂𑀲𑀼, 𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀸 𑀫𑀢𑀸.

𑀓𑀸𑀭𑀓𑀢𑁆𑀢𑀬𑀫𑀼𑀢𑁆𑀢𑀁 𑀬𑀁, 𑀆𑀔𑁆𑀬𑀸𑀢𑀁 𑀦𑀢𑁆𑀣𑀺 𑀲𑀩𑁆𑀩𑀲𑁄;

𑀢𑀲𑁆𑀫𑀸 𑀢𑀤𑁆𑀤𑀻𑀧𑀦𑀢𑁆𑀢𑀫𑁆𑀧𑀺, 𑀢𑀲𑁆𑀲𑀸𑀔𑁆𑀬𑀸𑀢𑀲𑁆𑀲 𑀪𑀸𑀲𑀺𑀢𑀁.

𑀓𑀸𑀭𑀓𑀢𑁆𑀢𑀁 𑀢𑀼 𑀪𑀸𑀯𑀲𑁆𑀲, 𑀲𑀘𑁂𑀧𑀺 𑀦 𑀲𑀫𑀻𑀭𑀺𑀢𑀁;

𑀓𑀸𑀭𑀓𑀮𑀓𑁆𑀔𑀡𑁂 𑀢𑁂𑀦, 𑀪𑀸𑀯𑁂𑀦 𑀘 𑀅𑀯𑀢𑁆𑀣𑀼𑀦𑀸.

𑀓𑁆𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺 𑀦𑀢𑁆𑀣𑀻𑀢𑀺, 𑀬𑀼𑀢𑁆𑀢𑀺𑀢𑁄𑀧𑀺 𑀘 𑀦𑀢𑁆𑀣𑀺 𑀢𑀁;

𑀢𑀣𑀸𑀧𑀸𑀔𑁆𑀬𑀸𑀢𑀺𑀓𑁂 𑀢𑀲𑁆𑀲, 𑀢𑀩𑁆𑀩𑁄𑀳𑀸𑀭𑁄 𑀦𑀺𑀭𑀼𑀢𑁆𑀢𑀺𑀬𑀁;

𑀧𑀢𑀺𑀝𑁆𑀞𑀺𑀢𑀦𑀬𑁄𑀯𑀸𑀢𑀺, 𑀫𑀦𑁆𑀢𑁆𑀯𑀸 𑀅𑀫𑁆𑀳𑁂𑀳𑀺 𑀪𑀸𑀲𑀺𑀢𑁄.

𑀧𑀼𑀭𑀺𑀲𑁄𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀓𑀸 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸. 𑀢𑀢𑁆𑀣 𑀧𑀞𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀢𑀼𑀫𑁆𑀳𑀸’𑀫𑁆𑀳𑀲𑀤𑁆𑀤𑀯𑀚𑁆𑀚𑀺𑀢𑁂 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀦𑀸𑀫𑀫𑁆𑀳𑀺 ‘‘𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀺, 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 ‘‘𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸, 𑀧𑀻𑀴𑀺𑀬𑀓𑁆𑀔𑁄𑀢𑀺 𑀫𑀁 𑀯𑀺𑀤𑀽, 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀓𑀢𑁆𑀣𑀘𑀺 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑁂 𑀦𑀸𑀫𑀲𑁆𑀲 𑀅𑀧𑁆𑀧𑀬𑀼𑀢𑁆𑀢𑀢𑁆𑀢𑀸 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑀢𑁆𑀣𑁄 𑀤𑀼𑀭𑀦𑀼𑀩𑁄𑀥𑁄 𑀪𑀯𑀢𑀺, 𑀬𑀣𑀸 ‘‘𑀤𑀼𑀓𑁆𑀔𑀁 𑀢𑁂 𑀯𑁂𑀤𑀬𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀅𑀲𑁆𑀲𑀸𑀲𑀬𑀦𑁆𑀢𑀼 𑀫’’𑀦𑁆𑀢𑀺. 𑀢𑀣𑀸 𑀳𑀺 𑀏𑀢𑁆𑀣 ‘‘𑀧𑀸𑀤𑀸’’𑀢𑀺 𑀧𑀸𑀞𑀲𑁂𑀲𑁄, 𑀢𑀲𑁆𑀫𑀺𑀁 𑀤𑀼𑀓𑁆𑀔𑀲𑀸𑀲𑀦𑀸𑀭𑁄𑀘𑀦𑁂 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑀯𑀲𑁂𑀦 𑀓𑀺𑀮𑀫𑀦𑁆𑀢𑀁 𑀫𑀁 𑀤𑁂𑀯𑀲𑁆𑀲 𑀉𑀪𑁄 𑀧𑀸𑀤𑀸 𑀅𑀲𑁆𑀲𑀸𑀲𑁂𑀦𑁆𑀢𑀼, 𑀯𑀺𑀲𑁆𑀲𑀝𑁆𑀞𑁄 𑀓𑀣𑁂𑀳𑀻𑀢𑀺 𑀫𑀁 𑀯𑀤𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀘 𑀪𑀯𑀢𑀺.

𑀅𑀥𑀺𑀧𑁆𑀧𑀸𑀬𑁄 𑀲𑀼𑀤𑀼𑀩𑁆𑀩𑁄𑀥𑁄, 𑀬𑀲𑁆𑀫𑀸 𑀯𑀺𑀚𑁆𑀚𑀢𑀺 𑀧𑀸𑀴𑀺𑀬𑀁;

𑀢𑀲𑁆𑀫𑀸 𑀉𑀧𑀝𑁆𑀞𑀳𑀁 𑀕𑀡𑁆𑀳𑁂, 𑀕𑀭𑀼𑀁 𑀕𑀭𑀼𑀫𑀢𑀁 𑀯𑀺𑀤𑀽.

𑀢𑀢𑁆𑀭𑀺𑀫𑀸𑀦𑀺 𑀪𑀽𑀥𑀸𑀢𑀸𑀥𑀺𑀓𑀸𑀭𑀢𑁆𑀢𑀸 𑀪𑀽𑀥𑀸𑀢𑀼𑀯𑀲𑁂𑀦 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀲𑁄 𑀧𑀭𑀺𑀪𑀯𑀢𑀺, 𑀢𑁂 𑀧𑀭𑀺𑀪𑀯𑀦𑁆𑀢𑀺, 𑀧𑀭𑀺𑀪𑀯𑀢𑀺, 𑀧𑀭𑀺𑀪𑀯𑀦𑁆𑀢𑀺. 𑀲𑀧𑀢𑁆𑀢𑁄 𑀅𑀪𑀺𑀪𑀯𑀺𑀬𑀢𑁂, 𑀲𑀩𑁆𑀩𑀸 𑀯𑀺𑀢𑁆𑀬𑀸’𑀦𑀼𑀪𑀽𑀬𑀢𑁂, 𑀅𑀪𑀺𑀪𑀯𑀺𑀬𑀢𑁂, 𑀅𑀦𑀼𑀪𑀽𑀬𑀢𑁂𑀢𑀺. 𑀬𑀢𑁆𑀣 𑀲𑀢𑀺𑀧𑀺 𑀦𑀸𑀫𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀢𑀢𑁆𑀣 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘 𑀧𑀞𑀫𑀧𑀼𑀭𑀺𑀲𑀸𑀤𑀬𑁄 𑀢𑀬𑁄 𑀮𑀩𑁆𑀪𑀦𑁆𑀢𑀺. 𑀢𑀁 𑀬𑀣𑀸? 𑀧𑀭𑀺𑀪𑀯𑀺𑀬𑁆𑀬𑀢𑁂 𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀭𑀺𑀪𑀯𑀺𑀬𑁆𑀬𑀲𑁂 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦, 𑀧𑀭𑀺𑀪𑀯𑀺𑀬𑁆𑀬𑀫𑁆𑀳𑁂 𑀫𑀬𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀏𑀢𑁆𑀣 𑀧𑀦𑀺𑀤𑀁 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁 ‘‘𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀺𑀦’𑀦𑁆𑀢𑀺𑀆𑀤𑀻𑀲𑀼 𑀲𑀢𑀺𑀧𑀺 𑀦𑀸𑀫𑀲𑁆𑀲 𑀓𑀫𑁆𑀫𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀻𑀢𑀺 𑀧𑀞𑀫𑀧𑀼𑀭𑀺𑀲𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸’’𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘‘𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀺𑀦’’𑀦𑁆𑀢𑀺𑀆𑀤𑀻𑀲𑀼 ‘‘𑀚𑀦𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀲𑁆𑀲 𑀲𑀸𑀥𑀓𑀯𑀸𑀘𑀓𑀲𑁆𑀲 𑀦𑀸𑀫𑀲𑁆𑀲 𑀲𑀤𑁆𑀥𑀺𑀫𑀸𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺 𑀦𑀬𑁄.

𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀢𑀼𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀢𑁆𑀯𑀁 𑀅𑀢𑀺𑀪𑀯𑀲𑀺, 𑀢𑀼𑀫𑁆𑀳𑁂 𑀅𑀢𑀺𑀪𑀯𑀣, 𑀅𑀢𑀺𑀪𑀯𑀲𑀺, 𑀅𑀢𑀺𑀪𑀯𑀣. 𑀢𑁆𑀯𑀁 𑀧𑀭𑀺𑀪𑀯𑀺𑀬𑀲𑁂 𑀤𑁂𑀯𑀤𑀢𑁆𑀢𑁂𑀦, 𑀢𑀼𑀫𑁆𑀳𑁂 𑀧𑀭𑀺𑀪𑀯𑀺𑀬𑀯𑁆𑀳𑁂. 𑀬𑀢𑁆𑀣 𑀲𑀢𑀺𑀧𑀺 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀦 𑀢𑀢𑁆𑀣 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀳𑁄𑀢𑀺. 𑀇𑀢𑀭𑁂 𑀧𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘. 𑀢𑀁 𑀬𑀣𑀸? 𑀢𑀬𑀸 𑀅𑀪𑀺𑀪𑀯𑀺𑀬𑀢𑁂 𑀲𑀧𑀢𑁆𑀢𑁄, 𑀢𑀬𑀸 𑀅𑀪𑀺𑀪𑀯𑀺𑀬𑁂 𑀅𑀳𑀁.

𑀉𑀢𑁆𑀢𑀫𑀧𑀼𑀭𑀺𑀲𑁄 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀸𑀥𑀓𑀯𑀸𑀘𑀓𑁂 𑀯𑀸 𑀓𑀫𑁆𑀫𑀯𑀸𑀘𑀓𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑁂 𑀅𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀝𑁆𑀞𑀸𑀦𑀺𑀬𑀢𑁆𑀢𑁂 𑀲𑀢𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀳𑁄𑀢𑀺. 𑀅𑀳𑀁 𑀧𑀭𑀺𑀪𑀯𑀸𑀫𑀺, 𑀫𑀬𑀁 𑀧𑀭𑀺𑀪𑀯𑀸𑀫, 𑀧𑀭𑀺𑀪𑀯𑀸𑀫𑀺, 𑀧𑀭𑀺𑀪𑀯𑀸𑀫. 𑀅𑀳𑀁 𑀧𑀭𑀺𑀪𑀯𑀺𑀬𑁆𑀬𑀸𑀫𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀬𑀁 𑀧𑀭𑀺𑀪𑀯𑀺𑀬𑁆𑀬𑀸𑀫, 𑀧𑀭𑀺𑀪𑀯𑀺𑀬𑁆𑀬𑀸𑀫𑀺, 𑀧𑀭𑀺𑀪𑀯𑀺𑀬𑁆𑀬𑀸𑀫. 𑀬𑀢𑁆𑀣 𑀲𑀢𑀺𑀧𑀺 𑀅𑀫𑁆𑀳𑀲𑀤𑁆𑀤𑀲𑁆𑀲 𑀲𑀸𑀥𑀓𑀯𑀸𑀘𑀓𑀢𑁆𑀢𑁂 𑀅𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀢𑀸 𑀆𑀔𑁆𑀬𑀸𑀢𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦 𑀮𑀩𑁆𑀪𑀢𑀺, 𑀦 𑀢𑀢𑁆𑀣 𑀉𑀢𑁆𑀢𑀫𑀧𑀼𑀭𑀺𑀲𑁄 𑀳𑁄𑀢𑀺. 𑀇𑀢𑀭𑁂 𑀧𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀓𑀫𑁆𑀫𑀯𑀸𑀘𑀓𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀁 𑀧𑀝𑀺𑀘𑁆𑀘. 𑀢𑀁 𑀬𑀣𑀸? 𑀫𑀬𑀸 𑀅𑀦𑀼𑀪𑀯𑀺𑀬𑀢𑁂 𑀲𑀫𑁆𑀧𑀢𑁆𑀢𑀺, 𑀫𑀬𑀸 𑀅𑀪𑀺𑀪𑀯𑀺𑀬𑀲𑁂 𑀢𑁆𑀯𑀁. 𑀏𑀯𑀁 𑀬𑀢𑁆𑀣 𑀬𑀢𑁆𑀣 𑀲𑀸𑀥𑀓𑀯𑀸𑀘𑀓𑀸𑀦𑀁 𑀯𑀸 𑀓𑀫𑁆𑀫𑀯𑀸𑀘𑀓𑀸𑀦𑀁 𑀯𑀸 𑀦𑀸𑀫𑀸𑀤𑀻𑀦𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀸𑀦𑀁 𑀆𑀔𑁆𑀬𑀸𑀢𑀧𑀤𑁂𑀳𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑁂 𑀮𑀤𑁆𑀥𑁂 𑀢𑀢𑁆𑀣 𑀢𑀢𑁆𑀣 𑀧𑀞𑀫𑀧𑀼𑀭𑀺𑀲𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀫𑀸𑀤𑀻𑀦𑀁 𑀧𑀘𑁆𑀘𑀢𑁆𑀢𑀯𑀘𑀦𑀪𑀽𑀢𑀸𑀦𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑁄𑀬𑁂𑀯 𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀫𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁.

𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀼𑀭𑀺𑀲𑀸𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀏𑀓𑀸𑀪𑀺𑀥𑀸𑀦𑀁 𑀦𑀸𑀫 𑀏𑀓𑀢𑁄 𑀅𑀪𑀺𑀥𑀸𑀦𑀁 𑀏𑀓𑀓𑀸𑀮𑀸𑀪𑀺𑀥𑀸𑀦𑀜𑁆𑀘. 𑀢𑀜𑁆𑀘 𑀔𑁄 𑀘𑀲𑀤𑁆𑀤𑀧𑀬𑁄𑀕𑁂𑀬𑁂𑀯, 𑀅𑀘𑀲𑀤𑁆𑀤𑀧𑀬𑁄𑀕𑁂 𑀪𑀺𑀦𑁆𑀦𑀓𑀸𑀮𑀸𑀪𑀺𑀥𑀸𑀦𑁂 𑀢𑀕𑁆𑀕𑀳𑀡𑀸𑀪𑀸𑀯𑀢𑁄. ‘‘𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫’’ 𑀇𑀘𑁆𑀘𑁂𑀯𑀫𑀸𑀤𑀬𑁄 𑀢𑀧𑁆𑀧𑀬𑁄𑀕𑀸. 𑀢𑀢𑁆𑀣 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣 𑁋 𑀇𑀘𑁆𑀘𑁂𑀢𑀲𑁆𑀫𑀺𑀁 𑀯𑁄𑀳𑀸𑀭𑁂 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣𑀸’’𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. ‘‘𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀧𑀦 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 ‘‘𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀏𑀯𑀫𑁆𑀧𑀺 𑀤𑁆𑀯𑀺𑀦𑁆𑀦𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 ‘‘𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑁂 𑀘 𑀅𑀢𑁆𑀣𑀓𑀼𑀲𑀮𑀸 𑀪𑀯𑀦𑁆𑀢𑀺, 𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀢𑀼𑀫𑁆𑀳𑁂 𑀘 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣, 𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀏𑀯𑀁 𑀢𑀺𑀡𑁆𑀡𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄.

𑀅𑀧𑀭𑁄𑀧𑀺 𑀅𑀢𑁆𑀣𑀦𑀬𑁄 𑀯𑀼𑀘𑁆𑀘𑀢𑀺 𑁋 ‘‘𑀢𑁆𑀯𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀲𑀺, 𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀢𑀼𑀫𑁆𑀳𑁂 𑀅𑀢𑁆𑀣𑀓𑀼𑀲𑀮𑀸 𑀪𑀯𑀣𑀸’’𑀢𑀺 𑀯𑀸 ‘‘𑀅𑀳𑀜𑁆𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀸𑀫𑀺, 𑀲𑁄 𑀘 𑀅𑀢𑁆𑀣𑀓𑀼𑀲𑀮𑁄 𑀪𑀯𑀢𑀺, 𑀫𑀬𑀫𑀢𑁆𑀣𑀓𑀼𑀲𑀮𑀸 𑀪𑀯𑀸𑀫𑀸’’𑀢𑀺 𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑁄 𑀅𑀢𑁆𑀣𑀦𑀬𑁄. 𑀏𑀯𑀁 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀜𑁆𑀘𑀫𑀻𑀲𑀢𑁆𑀢𑀫𑀺𑀬𑀸𑀤𑀻𑀲𑀼 𑀧𑀭𑁄𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄. 𑀲𑀩𑁆𑀩𑁂𑀲𑀼 𑀘 𑀓𑁆𑀭𑀺𑀬𑀸𑀧𑀤𑁂𑀲𑀼 𑀩𑀯𑁆𑀳𑀢𑁆𑀣𑀯𑀸𑀘𑀓𑁂𑀲𑀼 𑀩𑀳𑀼𑀯𑀘𑀦𑀦𑁆𑀢𑁂𑀲𑀼, 𑀦 𑀧𑀦 𑀩𑀳𑀼𑀯𑀘𑀦𑀦𑁆𑀢𑁂𑀲𑀼𑀧𑀺 𑀏𑀓𑀲𑁆𑀲𑀢𑁆𑀢𑀦𑁄 𑀯𑀸𑀘𑀓𑁂𑀲𑀼 𑀕𑀭𑀼𑀓𑀸𑀢𑀩𑁆𑀩𑀲𑁆𑀲𑁂𑀓𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁂𑀲𑀼 𑀘 𑀓𑁆𑀭𑀺𑀬𑀸𑀧𑀤𑁂𑀲𑀼. 𑀏𑀢𑁆𑀣 𑀘𑁄𑀤𑀦𑀸𑀲𑀦𑁆𑀤𑀻𑀧𑀦𑀺𑀬𑁄 𑀇𑀫𑀸 𑀕𑀸𑀣𑀸 𑁋

‘‘𑀢𑁆𑀯𑀜𑁆𑀘 𑀪𑀯𑀲𑀺 𑀲𑁄 𑀘𑀸𑀧𑀺, 𑀪𑀯𑀢𑀺’’𑀘𑁆𑀘𑀸𑀤𑀺𑀪𑀸𑀲𑀦𑁂;

‘‘𑀢𑀼𑀫𑁆𑀳𑁂 𑀪𑀯𑀣’’ 𑀇𑀘𑁆𑀘𑀸𑀤𑀺, 𑀧𑀭𑁄𑀧𑁄𑀲𑁄 𑀓𑀣𑀁 𑀲𑀺𑀬𑀸?;

‘‘𑀅𑀳𑀁 𑀪𑀯𑀸𑀫𑀺 𑀲𑁄 𑀘𑀸𑀧𑀺, 𑀪𑀯𑀢𑀺’’𑀘𑁆𑀘𑀸𑀤𑀺𑀪𑀸𑀲𑀦𑁂;

‘‘𑀫𑀬𑀁 𑀪𑀯𑀸𑀫’’𑀇𑀘𑁆𑀘𑀸𑀤𑀺, 𑀉𑀢𑁆𑀢𑀫𑁄 𑀘 𑀓𑀣𑀁 𑀲𑀺𑀬𑀸?;

𑀏𑀢𑁆𑀣 𑀘 𑀯𑀼𑀘𑁆𑀘𑀢𑁂 𑁋

𑀧𑀘𑁆𑀙𑀸 𑀯𑀼𑀢𑁆𑀢𑁄 𑀧𑀭𑁄 𑀦𑀸𑀫, 𑀲𑀜𑁆𑀜𑀸𑀬 𑀧𑀝𑀺𑀧𑀸𑀝𑀺𑀬𑀸;

𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑁄, 𑀧𑀭𑁄𑀧𑀼𑀭𑀺𑀲𑀦𑀸𑀫𑀓𑁄.

𑀧𑀞𑀫𑀫𑁆𑀳𑀸 𑀧𑀭𑁄 𑀦𑀸𑀫, 𑀫𑀚𑁆𑀛𑀺𑀫𑁄 𑀉𑀢𑁆𑀢𑀫𑁄𑀧𑀺 𑀘;

𑀫𑀚𑁆𑀛𑀺𑀫𑀫𑁆𑀳𑀸 𑀧𑀭𑁄 𑀦𑀸𑀫, 𑀉𑀢𑁆𑀢𑀫𑁄 𑀧𑀼𑀭𑀺𑀲𑁄 𑀭𑀼𑀢𑁄.

𑀏𑀯𑀁 𑀢𑀼 𑀕𑀳𑀡𑀜𑁆𑀳𑁂𑀢𑁆𑀣, 𑀯𑁄𑀳𑀸𑀭𑀲𑁆𑀲𑀸𑀦𑀼𑀮𑁄𑀫𑀓𑀁;

𑀤𑁄𑀲𑁄 𑀢𑀤𑀦𑀼𑀮𑁄𑀫𑀫𑁆𑀳𑀺, 𑀕𑀳𑀡𑀲𑁆𑀫𑀺𑀁 𑀦 𑀯𑀺𑀚𑁆𑀚𑀢𑀺.

‘‘𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺, 𑀏𑀲𑁄 𑀘𑀸𑀧𑀺 𑀫𑀳𑀸𑀫𑀺𑀕𑁄’’;

𑀇𑀢𑀺 𑀧𑀸𑀞𑁄 𑀬𑀢𑁄 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘𑀢𑀼𑀫𑁆𑀳𑁂 𑀤𑁆𑀯𑁂 𑀲𑀼𑀔𑀺𑀢𑀸 𑀳𑁄𑀣’’, 𑀇𑀘𑁆𑀘𑀢𑁆𑀣𑁄 𑀢𑀢𑁆𑀣 𑀤𑀺𑀲𑁆𑀲𑀢𑀺;

𑀏𑀯𑀁𑀧𑁆𑀬𑀬𑀁 𑀦𑀬𑁄 𑀯𑀼𑀢𑁆𑀢𑁄, 𑀅𑀢𑁆𑀢𑀦𑁄𑀫𑀢𑀺𑀬𑀸 𑀫𑀫.

𑀅𑀢𑁆𑀢𑀦𑁄𑀫𑀢𑀺 𑀓𑀺𑀜𑁆𑀘𑀸𑀧𑀺, 𑀓𑀣𑀺𑀢𑀸 𑀲𑀩𑁆𑀩𑀤𑀼𑀩𑁆𑀩𑀮𑀸;

𑀢𑀣𑀸𑀧𑀺 𑀦𑀬𑀫𑀸𑀤𑀸𑀬, 𑀓𑀣𑀺𑀢𑀢𑁆𑀢𑀸 𑀅𑀓𑁄𑀧𑀺𑀬𑀸.

‘‘𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀺𑀢𑁆𑀣 𑀫𑀁;

𑀢𑁆𑀯𑀜𑁆𑀘 𑀚𑀸𑀦𑀧𑀤𑀸 𑀘𑁂𑀯, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸’’.

‘‘𑀅𑀳𑀜𑁆𑀘 𑀫𑀤𑁆𑀤𑀺𑀤𑁂𑀯𑀻 𑀘, 𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀅𑀜𑁆𑀜𑀫𑀜𑁆𑀜𑀁 𑀲𑁄𑀓𑀦𑀼𑀤𑀸, 𑀯𑀲𑀸𑀫 𑀅𑀲𑁆𑀲𑀫𑁂 𑀢𑀤𑀸’’.

𑀏𑀢𑀸 𑀕𑀸𑀣𑀸𑀧𑀺 𑀏𑀢𑀲𑁆𑀲, 𑀅𑀢𑁆𑀣𑀲𑁆𑀲 𑀧𑀦 𑀲𑀸𑀥𑀺𑀓𑀸;

𑀢𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀅𑀢𑁆𑀣𑁄 𑀲𑀼𑀧𑀸𑀓𑀝𑁄 𑀲𑀺𑀬𑀸;

𑀏𑀯𑀁 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀩𑀳𑀼𑀦𑀸 𑀪𑀸𑀲𑀺𑀢𑁂𑀦 𑀓𑀺𑀁.

𑀆𑀓𑀸𑀭𑁂𑀦 𑀫𑀦𑀸𑀧𑁂𑀦, 𑀓𑀣𑀦𑁂 𑀬𑁂𑀦 𑀓𑁂𑀦𑀘𑀺;

𑀦 𑀯𑀺𑀭𑀼𑀚𑁆𑀛𑀢𑀺 𑀘𑁂 𑀅𑀢𑁆𑀣𑁄, 𑀢𑀁 𑀧𑀫𑀸𑀡𑀁 𑀲𑀼𑀥𑀻𑀫𑀢𑀁.

𑀧𑀼𑀭𑀺𑀲𑀢𑁆𑀢𑀬𑀢𑁄 𑀏𑀲𑁄, 𑀧𑀭𑁄𑀧𑀼𑀭𑀺𑀲𑀦𑀸𑀫𑀓𑁄;

𑀦𑀼𑀧𑀮𑀩𑁆𑀪𑀢𑀺 𑀧𑀘𑁆𑀘𑁂𑀓𑀁, 𑀢𑀤𑀦𑁆𑀢𑁄𑀕𑀥𑀢𑁄𑀯 𑀬𑀁.

𑀧𑀸𑀝𑀯𑀢𑁆𑀣𑀸𑀬 𑀲𑁄𑀢𑀽𑀦𑀁, 𑀯𑁄𑀳𑀸𑀭𑀢𑁆𑀣𑁂𑀲𑀼 𑀲𑀩𑁆𑀩𑀲𑁄;

𑀯𑀺𑀲𑀼𑀁 𑀅𑀮𑀩𑁆𑀪𑀫𑀸𑀦𑁄𑀧𑀺, 𑀮𑀩𑁆𑀪𑀫𑀸𑀦𑁄𑀯 𑀉𑀤𑁆𑀥𑀝𑁄.