𑁩𑁭. 𑀧𑀼𑀢𑁆𑀢𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀮𑀗𑁆𑀓𑀸𑀤𑀻𑀧𑀯𑀸𑀲𑀺𑀦𑁄 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀚𑀬𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀓𑀸𑀫𑀸 𑀏𑀓𑀢𑁄 𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀢𑀺𑀢𑁆𑀣𑁂𑀦 𑀦𑀸𑀯𑀁 𑀆𑀭𑀼𑀬𑁆𑀳 𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀯𑀸 𑀢𑀸𑀫𑀮𑀺𑀢𑁆𑀢𑀺𑀧𑀝𑁆𑀞𑁂𑀦𑁂 [𑀢𑀫𑀮𑀺𑀢𑁆𑀢𑀧𑀝𑁆𑀝𑀦𑁂 𑀇𑀢𑀺𑀓𑀢𑁆𑀣𑀘𑀺] 𑀑𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀏𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀤𑀺𑀲𑁆𑀯𑀸 𑀘𑀺𑀭𑁂𑀦 [𑀘𑀺𑀭𑁂𑀦𑀸𑀳𑀁𑀤𑀺𑀝𑁆𑀞𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀫𑀬𑀸 𑀤𑀺𑀝𑁆𑀞𑀸 𑀩𑀼𑀤𑁆𑀥𑀧𑀼𑀢𑁆𑀢𑀸𑀢𑀺 𑀲𑁄𑀫𑀦𑀲𑁆𑀲𑁄 𑀪𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀪𑀤𑁆𑀤𑁂 𑀇𑀫𑁂𑀲𑀁 𑀅𑀬𑁆𑀬𑀸𑀦𑀁 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺, 𑀧𑀼𑀩𑁆𑀩𑁂 𑀦𑁄 𑀅𑀓𑀢𑀧𑀼𑀜𑁆𑀜𑀢𑁆𑀢𑀸 𑀇𑀤𑀸𑀦𑀺 𑀤𑀼𑀕𑁆𑀕𑀢𑀸 𑀚𑀸𑀢𑀸, 𑀇𑀫𑁂𑀲𑀼 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂𑀲𑀼 𑀩𑀻𑀚𑀁 𑀦𑁄 𑀘𑁂 𑀭𑁄𑀧𑁂𑀲𑁆𑀲𑀸𑀫, 𑀧𑀼𑀦𑀧𑀺 𑀏𑀯𑀫𑁂𑀯 𑀪𑀯𑀺𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀓𑀺𑀁 𑀫𑁂 𑀕𑁂𑀳𑁂 𑀤𑁂𑀬𑁆𑀬𑀥𑀫𑁆𑀫𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀲𑀼𑀢𑁆𑀯𑀸 𑀖𑀭𑁂 𑀦𑁄 𑀲𑀸𑀫𑀺 𑀅𑀬𑁆𑀬𑀸𑀦𑀁 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀦 𑀧𑀲𑁆𑀲𑀸𑀫𑀺. 𑀅𑀧𑀺 𑀘 𑀫𑀫 𑀧𑀼𑀢𑁆𑀢𑀁 𑀫𑀸𑀭𑁂𑀢𑁆𑀯𑀸 𑀤𑀸𑀦𑀁 𑀤𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀲𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀪𑀤𑁆𑀤𑁂 𑀧𑀼𑀢𑁆𑀢𑀁 𑀫𑀸𑀭𑁂𑀢𑁆𑀯𑀸 𑀓𑀺𑀁 𑀤𑀸𑀦𑀁 𑀤𑁂𑀫𑀸𑀢𑀺 𑀆𑀳. 𑀢𑀸𑀬 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀺 𑀓𑀺𑀁 𑀦 𑀚𑀸𑀦𑀸𑀲𑀺, 𑀧𑀼𑀢𑁆𑀢𑁂 𑀦𑁄 𑀫𑀢𑁂 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸 𑀘 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀸𑀦𑁆𑀢𑀸 𑀓𑀺𑀜𑁆𑀘𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀫𑀬𑀁 𑀢𑁂𑀦 𑀧𑀡𑁆𑀡𑀸𑀓𑀸𑀭𑁂𑀦 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑁂 𑀉𑀧𑀸𑀲𑀓𑁄 𑀲𑀸𑀥𑀼 𑀢𑀣𑀸 𑀓𑀭𑁄𑀳𑀻𑀢𑀺 𑀫𑀸𑀢𑀼𑀬𑀸 𑀏𑀯 𑀪𑀸𑀭𑀫𑀓𑀸𑀲𑀺, 𑀲𑀸 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀆𑀳. 𑀢𑀣𑀸 𑀳𑀺.

𑁧. 𑀓𑀺𑀘𑁆𑀙𑀸 𑀮𑀤𑁆𑀥𑀁 𑀧𑀺𑀬𑀁 𑀧𑀼𑀢𑁆𑀢𑀁, 𑀅𑀫𑁆𑀫𑀫𑁆𑀫𑀸𑀢𑀺 𑀧𑀺𑀬𑀁 𑀯𑀤𑀁;

𑀲𑀼𑀦𑀻𑀮𑀦𑁂𑀢𑁆𑀢𑀁 𑀲𑀼𑀪𑀫𑀼𑀁, 𑀓𑁄 𑀧𑀓𑁆𑀓𑀫𑀺𑀢𑀼𑀫𑀺𑀘𑁆𑀙𑀢𑀺.

𑁨. 𑀫𑀸𑀢𑀭𑀸 𑀫𑀸𑀭𑀺𑀬𑀦𑁆𑀢𑁄𑀧𑀺, 𑀫𑀸𑀢𑀭𑀫𑁂𑀯 𑀭𑁄𑀤𑀢𑀺;

𑀫𑀸𑀭𑁂𑀢𑀼𑀁 𑀢𑀁 𑀦 𑀲𑀓𑁆𑀓𑁄𑀫𑀺, 𑀳𑀤𑀬𑀁 𑀫𑁂 𑀧𑀯𑁂𑀥𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀳𑀁 𑀲𑀸𑀫𑀺 𑀦 𑀲𑀓𑁆𑀓𑁄𑀫𑀺 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁. 𑀢𑁆𑀯𑀁 𑀫𑀸𑀭𑁂𑀳𑀻𑀢𑀺 𑀧𑀼𑀢𑁆𑀢𑀁 𑀧𑀺𑀢𑀼𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀅𑀣 𑀲𑁄𑀧𑀺 𑀢𑀁 𑀫𑀸𑀭𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳. 𑀯𑀼𑀢𑁆𑀢𑀜𑁆𑀳𑀺.

𑁩. 𑀢𑀸𑀬𑀦𑁆𑀢𑀺 𑀧𑀺𑀢𑀼𑀦𑁄 𑀤𑀼𑀓𑁆𑀔𑀁, 𑀧𑀼𑀢𑁆𑀢𑀸 𑀧𑀼𑀢𑁆𑀢𑀸𑀢𑀺 𑀓𑀺𑀢𑁆𑀢𑀺𑀢𑀸;

𑀧𑀺𑀢𑀼 𑀤𑀼𑀓𑁆𑀔𑀁 𑀲𑀼𑀔𑀁 𑀧𑀼𑀢𑁆𑀢𑀸, 𑀤𑀸𑀬𑀸𑀤𑀸 𑀳𑁄𑀦𑁆𑀢𑀺 𑀲𑀩𑁆𑀩𑀤𑀸.

𑁪. 𑀢𑀲𑁆𑀫𑀸 𑀫𑁂 𑀲𑀤𑀺𑀲𑀁 𑀧𑀼𑀢𑁆𑀢𑀁, 𑀧𑀺𑀮𑁆𑀮𑀓𑀁 𑀫𑀜𑁆𑀚𑀼𑀪𑀸𑀲𑀦𑀁;

𑀦 𑀲𑀓𑁆𑀓𑁄𑀫𑀺 𑀅𑀳𑀁 𑀪𑀤𑁆𑀤𑁂, 𑀚𑀻𑀯𑀺𑀢𑀸 𑀢𑀁 𑀯𑀺𑀬𑁄𑀚𑀺𑀢𑀼𑀁.

𑁫. 𑀅𑀬𑀲𑀜𑁆𑀘 𑀅𑀓𑀺𑀢𑁆𑀢𑀺𑀜𑁆𑀘, 𑀧𑀧𑁆𑀧𑁄𑀢𑀺 𑀧𑀼𑀢𑁆𑀢𑀖𑀸𑀢𑀓𑁄;

𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀫𑁆𑀧𑀺, 𑀓𑀸𑀫𑀁 𑀲𑁄 𑀨𑀼𑀲𑀢𑁂 𑀦𑀭𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑁄 𑀢𑁆𑀯𑀫𑁂𑀯 𑀢𑀯 𑀧𑀼𑀢𑁆𑀢𑀁 𑀫𑀸𑀭𑁂𑀳𑀻𑀢𑀺 𑀧𑁂𑀲𑁂𑀲𑀺, 𑀏𑀯𑀁 𑀢𑁂𑀦 𑀯𑀼𑀢𑁆𑀢𑁂 𑀧𑀼𑀢𑁆𑀣𑀲𑁆𑀲 𑀫𑀸𑀭𑀧𑀸𑀡𑀽𑀧𑀸𑀬𑀁 𑀧𑀭𑀺𑀬𑁂𑀲𑀦𑁆𑀢𑀸 𑀏𑀯𑀫𑀸𑀳𑀁𑀲𑀼, 𑀅𑀫𑁆𑀳𑁂 𑀧𑀦𑀺𑀫𑀁 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀕𑁂𑀳𑁂 𑀫𑀳𑀦𑁆𑀢𑁄 𑀯𑀫𑁆𑀫𑀺𑀓𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀏𑀓𑁄 𑀦𑀸𑀕𑀭𑀸𑀚𑀸 𑀧𑀝𑀺𑀯𑀲𑀢𑀺. 𑀓𑀼𑀫𑀸𑀭𑀁 𑀢𑀢𑁆𑀣 𑀧𑁂𑀲𑁂𑀲𑁆𑀲𑀸𑀫, 𑀲𑁄 𑀢𑀁 𑀟𑀲𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀢𑀻𑀢𑀺. 𑀇𑀘𑁆𑀘𑁂𑀢𑁂 𑀏𑀲𑁄 𑀔𑁄 𑀉𑀧𑀸𑀬𑁄 𑀏𑀯𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀜𑁆𑀘𑀦𑀸 𑀯𑀮𑀺𑀯𑀮𑀬𑀸𑀤𑀻𑀳𑀺 𑀫𑀡𑁆𑀟𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀕𑁂𑀡𑁆𑀟𑀼𑀁 [𑀢𑁂𑀡𑁆𑀟𑀼𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀞𑀧𑁂𑀢𑁆𑀯𑀸 𑀢𑀸𑀢 𑀧𑀘𑁆𑀙𑀸𑀕𑁂𑀳𑁂 𑀯𑀫𑁆𑀫𑀺𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀓𑀻𑀴𑀸𑀢𑀺 𑀧𑁂𑀲𑁂𑀲𑀼𑀁. 𑀢𑀢𑁄 𑀤𑀸𑀭𑀓𑁄 𑀕𑀦𑁆𑀢𑁆𑀯𑀸 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀦𑁆𑀢𑁄 𑀯𑀫𑁆𑀫𑀺𑀓𑀩𑀺𑀮𑁂 𑀕𑁂𑀡𑁆𑀟𑀼𑀓𑀁 𑀧𑀸𑀢𑁂𑀲𑀺. 𑀅𑀣 𑀲𑁄 𑀕𑁂𑀡𑁆𑀟𑀼𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀯𑀫𑁆𑀫𑀺𑀓𑀲𑀼𑀲𑀺𑀭𑁂 𑀳𑀢𑁆𑀣𑀁 𑀧𑀯𑁂𑀲𑁂𑀲𑀺. 𑀢𑀢𑁄 𑀲𑀧𑁆𑀧𑁄 𑀓𑀼𑀚𑁆𑀛𑀺𑀢𑁆𑀯𑀸 𑀲𑀼𑀲𑀽𑀢𑀺𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀩𑀺𑀮𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺 𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀧𑀭𑀺𑀕𑀮𑀺𑀢𑀧𑀸𑀲𑀁𑀯𑀺𑀬. 𑀅𑀣𑀲𑁆𑀲 𑀓𑀼𑀫𑀸𑀭𑁄 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀲𑀧𑁆𑀧𑀲𑁆𑀲 𑀕𑀻𑀯𑀁 𑀤𑀴𑁆𑀳𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀲𑀤𑁆𑀥𑀸𑀩𑀮𑁂𑀦 𑀦𑀸𑀕𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀓𑀭𑀢𑀮𑁂 𑀅𑀝𑁆𑀞𑀁𑀲𑀁 𑀇𑀘𑁆𑀙𑀸𑀤𑀸𑀬𑀓𑀁 𑀓𑀡𑁆𑀞𑀫𑀡𑀺𑀭𑀢𑀦𑀁 𑀧𑀸𑀢𑁂𑀲𑀺. 𑀓𑀼𑀫𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑀢𑁄 𑀫𑀡𑀺𑀭𑀢𑀦𑀁 𑀕𑀡𑁆𑀳𑀺𑀁𑀲𑀼. 𑀢𑀢𑁄 𑀢𑁂 𑀢𑀁 𑀫𑀡𑀺𑀭𑀢𑀦𑀁 𑀧𑀭𑀺𑀲𑀼𑀤𑁆𑀥𑀸𑀲𑀦𑁂 𑀞𑀧𑁂𑀢𑁆𑀯𑀸 𑀉𑀧𑀘𑀸𑀭𑀁 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸𑀢𑀺 𑀅𑀩𑁆𑀪𑀼𑀓𑁆𑀓𑀺𑀭𑀺𑀁𑀲𑀼. 𑀅𑀣 𑀢𑁂 𑀫𑀡𑀺𑀭𑀢𑀦𑀸𑀦𑀼𑀪𑀸𑀯𑁂𑀦 𑀕𑁂𑀳𑀤𑁆𑀯𑀸𑀭𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀯𑀺𑀢𑀸𑀦𑀸𑀤𑀺𑀦𑀸 𑀫𑀡𑁆𑀟𑀧𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑁂 𑀲𑀝𑁆𑀞𑀺𑀫𑀢𑁆𑀢𑁂 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀢𑀢𑁄 𑀦𑀕𑀭𑀯𑀸𑀲𑀺𑀦𑁄 𑀫𑀡𑀺𑀭𑀢𑀦𑀸𑀦𑀼𑀪𑀸𑀯𑀁 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀣 𑀢𑁂 𑀢𑁂𑀲𑀁 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀲𑀤𑁆𑀥𑀸𑀩𑀮𑁂𑀦 𑀫𑀡𑀺𑀭𑀢𑀦𑀲𑁆𑀲 𑀮𑀸𑀪𑀁 𑀧𑀓𑀸𑀲𑁂𑀢𑁆𑀯𑀸 𑀇𑀫𑀜𑁆𑀳𑀺 𑀤𑀸𑀦𑀢𑁆𑀣𑀸𑀬𑁂𑀯 𑀧𑀭𑀺𑀘𑁆𑀘𑀚𑁆𑀚𑀸𑀫𑀸𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦𑀸𑀦𑀼𑀪𑀸𑀯𑁂𑀦 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀤𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀽𑀢𑀺.

𑁬. 𑀙𑁂𑀢𑁆𑀯𑀸𑀦 𑀧𑁂𑀫𑀁 𑀅𑀧𑀺 𑀅𑀢𑁆𑀭𑀚𑁂𑀲𑀼,

𑀤𑀤𑀦𑁆𑀢𑀺 𑀤𑀸𑀦𑀁 𑀇𑀥 𑀫𑀸𑀦𑀼𑀲𑁂𑀯𑀁;

𑀦 𑀤𑀤𑀸𑀢𑀺 𑀓𑁄 𑀦𑀸𑀫 𑀦𑀭𑁄 𑀲𑀫𑀺𑀤𑁆𑀥𑁄,

𑀤𑀸𑀦𑀜𑁆𑀳𑀺 𑀤𑀸𑀦𑀲𑁆𑀲 𑀨𑀮𑀁 𑀲𑀭𑀦𑁆𑀢𑁄𑀢𑀺.

𑀧𑀼𑀢𑁆𑀢𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.