𑁧𑁯. 𑀧𑀸𑀦𑀻𑀬𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀚𑀦𑀧𑀤𑁂 𑀓𑀺𑀭𑁂 𑀓𑁄 𑀫𑀦𑀼𑀲𑁆𑀲𑁄 𑀭𑀝𑁆𑀞𑀢𑁄 𑀭𑀝𑁆𑀞𑀁 𑀚𑀦𑀧𑀤𑀢𑁄 𑀚𑀦𑀧𑀤𑀁 𑀯𑀺𑀘𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑀁 𑀧𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀘𑁆𑀙𑀢𑀺. 𑀅𑀣𑀸𑀧𑀭𑀸 𑀕𑀩𑁆𑀪𑀺𑀦𑀺𑀢𑁆𑀣𑀻 𑀢𑀸𑀬 𑀏𑀯 𑀦𑀸𑀯𑀸𑀬 𑀕𑀘𑁆𑀙𑀢𑀺, 𑀅𑀣 𑀦𑀸𑀯𑀸 𑀕𑀗𑁆𑀕𑀸𑀫𑀚𑁆𑀛𑀧𑁆𑀧𑀢𑁆𑀢𑀓𑀸𑀮𑁂 𑀢𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀢𑀢𑁄 𑀲𑀸 𑀯𑀺𑀚𑀸𑀬𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀻 𑀓𑀺𑀮𑀦𑁆𑀢𑀸 𑀧𑀸𑀦𑀻𑀬𑀁 𑀫𑁂 𑀤𑁂𑀣, 𑀧𑀺𑀧𑀸𑀲𑀺𑀢𑀸𑀫𑁆𑀳𑀺𑀢𑀺 𑀫𑀦𑀼𑀲𑁆𑀲𑁂 𑀬𑀸𑀘𑀺. 𑀢𑁂 𑀢𑀲𑁆𑀲𑀸 𑀯𑀘𑀦𑀁 𑀅𑀲𑀼𑀡𑀦𑁆𑀢𑀸 𑀯𑀺𑀬 𑀧𑀸𑀦𑀻𑀬𑀁 𑀦𑀸𑀤𑀁𑀲𑀼, 𑀅𑀣 𑀲𑁄 𑀚𑀸𑀦𑀧𑀤𑀺𑀓𑁄 𑀢𑀲𑁆𑀲𑀸 𑀓𑀭𑀼𑀡𑀸𑀬𑀦𑁆𑀢𑁄 [𑀓𑀭𑀼𑀡𑀸𑀬𑀧𑀸𑀦𑀻𑀬𑀁, 𑀓𑀭𑀼𑀡𑀸𑀬𑀦𑁆𑀢𑁄𑀧𑀸𑀦𑀻𑀬𑀁, 𑀓𑀭𑀼𑀡𑀸𑀬𑀢𑁄𑀬𑀁 𑀇𑀢𑀺𑀘𑀓𑀢𑁆𑀣𑀘𑀺] 𑀢𑁄𑀬𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀆𑀲𑀺𑀜𑁆𑀘𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀮𑀤𑁆𑀥𑀲𑁆𑀲𑀸𑀲𑀸 𑀲𑀼𑀔𑁂𑀦 𑀤𑀸𑀭𑀓𑀁 𑀯𑀺𑀚𑀸𑀬𑀺, 𑀅𑀣 𑀢𑁂 𑀢𑀻𑀭𑀁 𑀧𑀢𑁆𑀯𑀸 𑀓𑀢𑀺𑀧𑀬𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣𑀸𑀧𑀭𑀪𑀸𑀕𑁂 𑀲𑁄 𑀚𑀸𑀦𑀧𑀤𑀺𑀓𑁄 𑀅𑀜𑁆𑀜𑀢𑀭𑀓𑀺𑀘𑁆𑀘𑀁 𑀧𑀝𑀺𑀘𑁆𑀘 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀲𑀦𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀅𑀮𑀪𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀘𑁄𑀭𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀕𑁂𑀳𑁂 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀥𑀦𑀲𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑁂𑀳𑀺 𑀅𑀦𑀼𑀩𑀦𑁆𑀥𑀸 𑀕𑀦𑁆𑀢𑁆𑀯𑀸 𑀢𑀸𑀬𑁂𑀯 𑀲𑀸𑀮𑀸𑀬 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀅𑀣 𑀭𑀸𑀚𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 𑀘𑁄𑀭𑁂 𑀅𑀧𑀲𑁆𑀲𑀦𑁆𑀢𑀸 𑀢𑀁 𑀚𑀸𑀦𑀧𑀤𑀺𑀓𑀁 𑀤𑀺𑀲𑁆𑀯𑀸 𑀅𑀬𑀁 𑀘𑁄𑀭𑁄𑀢𑀺 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀧𑀼𑀦 𑀤𑀺𑀯𑀲𑁂 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀜𑁆𑀜𑀸 𑀓𑀲𑁆𑀫𑀸 𑀪𑀡𑁂 𑀘𑁄𑀭𑀓𑀫𑁆𑀫 𑀫𑀓𑀸𑀲𑀻𑀢𑀺 𑀧𑀼𑀘𑁆𑀙𑀺𑀢𑁄 𑀦𑀸𑀳𑀁 𑀤𑁂𑀯 𑀘𑁄𑀭𑁄, 𑀆𑀕𑀦𑁆𑀢𑀼𑀓𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀘𑁄𑀭𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑁄 𑀅𑀬𑀫𑁂𑀯 𑀘𑁄𑀭𑁄, 𑀇𑀫𑀁 𑀫𑀸𑀭𑁂𑀣𑀸𑀢𑀺 𑀆𑀡𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑁂𑀳𑀺 𑀢𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑀻𑀢𑁂 𑀲𑀸 𑀇𑀢𑁆𑀣𑀻 𑀢𑀁 𑀢𑀣𑀸 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑀸 𑀫𑀼𑀳𑀼𑀢𑁆𑀢𑁂𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯 𑀏𑀲𑁄 𑀦 𑀘𑁄𑀭𑁄 𑀆𑀕𑀦𑁆𑀢𑀼𑀓𑁄 𑀫𑀼𑀜𑁆𑀘𑀣𑁂𑀢𑀁 𑀤𑁂𑀯𑀸𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲𑀸 𑀓𑀣𑀁 𑀅𑀲𑀤𑁆𑀤𑀳𑀦𑁆𑀢𑁄 𑀬𑀚𑁆𑀚𑁂𑀢𑀁 𑀫𑁄𑀘𑁂𑀢𑀼 𑀫𑀺𑀘𑁆𑀙𑀲𑀺. 𑀢𑀲𑁆𑀲𑀕𑁆𑀖𑀦𑀓𑀁 𑀥𑀦𑀁 𑀤𑀢𑁆𑀯𑀸 𑀫𑀼𑀜𑁆𑀘𑀸𑀧𑁂𑀳𑀻𑀢𑀺, 𑀲𑀸 𑀲𑀸𑀫𑀺 𑀫𑀫 𑀕𑁂𑀳𑁂 𑀥𑀦𑀁 𑀦𑀢𑁆𑀣𑀺. 𑀅𑀧𑀺𑀘 𑀫𑀫 𑀲𑀢𑁆𑀢𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀫𑀁 𑀤𑀸𑀲𑀺𑀁 𑀓𑀭𑁄𑀳𑀺, 𑀏𑀢𑀁 𑀫𑀼𑀜𑁆𑀘 𑀤𑁂𑀯𑀸𑀢𑀺 𑀆𑀳, 𑀅𑀣 𑀭𑀸𑀚𑀸 𑀢𑁆𑀯𑀁 𑀏𑀢𑀁 𑀅𑀥𑀼𑀦𑀸𑀕𑀢𑁄𑀢𑀺 𑀯𑀤𑀲𑀺. 𑀏𑀢𑀁 𑀦𑀺𑀲𑁆𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀸𑀦𑀁 𑀤𑀸𑀲𑀢𑁆𑀢𑀁 𑀲𑀸𑀯𑁂𑀲𑀺. 𑀓𑀺𑀫𑁂𑀲𑁄 𑀢𑁂 𑀜𑀸𑀢𑀺 𑀯𑀸, 𑀉𑀤𑀸𑀳𑀼 𑀉𑀧𑀓𑀸𑀭𑀓𑁄𑀢𑀺 𑀧𑀼𑀘𑁆𑀙𑀦𑁆𑀢𑁄 𑀆𑀳.

𑁧. 𑀓𑀺𑀁𑀢𑁂 𑀪𑁄𑀢𑀺 𑀅𑀬𑀁 𑀧𑁄𑀲𑁄, 𑀢𑀼𑀯𑀁 𑀧𑀼𑀘𑁆𑀙𑀸𑀫𑀺 𑀲𑀁𑀲𑀬𑀁;

𑀪𑀸𑀢𑀸 𑀯𑀸 𑀢𑁂 𑀧𑀺𑀢𑀸 𑀳𑁄𑀢𑀺, 𑀧𑀢𑀺 𑀯𑀸 𑀤𑁂𑀯𑀭𑁄 𑀢𑀯.

𑁨. 𑀜𑀸𑀢𑀺 𑀲𑀸𑀮𑁄𑀳𑀺𑀢𑁄 𑀓𑀺𑀦𑁆𑀦𑀼, 𑀉𑀤𑀸𑀳𑀼 𑀇𑀡𑀤𑀸𑀬𑀓𑁄;

𑀅𑀣𑁄𑀧𑀓𑀸𑀭𑀓𑁄 𑀓𑀺𑀦𑁆𑀦𑀼, 𑀓𑀲𑁆𑀫𑀸𑀲𑁆𑀲 𑀤𑁂𑀲𑀺 𑀚𑀻𑀯𑀺𑀢𑀁𑀢𑀺.

𑀢𑀢𑁄 𑀲𑀸 𑀆𑀳.

𑁩. 𑀏𑀲𑁄 𑀫𑁂 𑀧𑀼𑀭𑀺𑀲𑁄 𑀤𑁂𑀯, 𑀓𑀢𑀧𑀼𑀩𑁆𑀩𑁄𑀧𑀓𑀸𑀭𑀓𑁄;

𑀅𑀢𑀸𑀡𑀫𑁂𑀓𑀺𑀓𑀁 [𑀅𑀢𑁆𑀢𑀸𑀦𑀫𑁂𑀓𑀺𑀓𑀁 𑀇𑀢𑀺𑀓𑀢𑁆𑀣𑀘𑀺] 𑀘𑁂𑀲𑁄, 𑀤𑀼𑀓𑁆𑀔𑀺𑀢𑀁 𑀫𑀭𑀡𑁂 𑀞𑀺𑀢𑀁.

𑁪. 𑀯𑀺𑀚𑀸𑀬𑀺𑀢𑀼 𑀫𑀲𑀓𑁆𑀓𑁄𑀦𑁆𑀢𑀺𑀁, 𑀕𑀩𑁆𑀪𑀺𑀦𑀺𑀁 𑀤𑀼𑀓𑁆𑀔𑀯𑁂𑀤𑀺𑀦𑀺𑀁;

𑀢𑁄𑀬𑁂𑀦 𑀫𑀁 𑀉𑀧𑀝𑁆𑀞𑀸𑀲𑀺, 𑀢𑁂𑀦𑀸𑀳𑀁 𑀲𑀼𑀔𑀺𑀢𑀸 𑀢𑀤𑀸.

𑁫. 𑀪𑀗𑁆𑀕𑀓𑀮𑁆𑀮𑁄𑀮𑀫𑀸𑀮𑀸𑀬, 𑀉𑀢𑁆𑀢𑀭𑀦𑁆𑀢𑀁 𑀫𑀳𑀡𑁆𑀡𑀯𑀁;

𑀧𑀳𑀸𑀬 𑀧𑀸𑀢𑀼𑀁 𑀓𑀽𑀧𑀲𑁆𑀲, 𑀬𑀸𑀢𑀺 𑀮𑁄𑀓𑁄 𑀧𑀺𑀧𑀸𑀲𑀺𑀢𑁄.

𑁬. 𑀢𑀣𑁂𑀯 𑀯𑀺𑀚𑁆𑀚𑀫𑀸𑀦𑁂𑀲𑀼, 𑀚𑀦𑁂𑀲𑀼 𑀫𑀦𑀼𑀚𑀸𑀥𑀺𑀧,

𑀏𑀓𑀲𑁆𑀲𑁂𑀯 𑀫𑀦𑀲𑁆𑀫𑀺𑀁𑀳𑀺, 𑀕𑀼𑀡𑀁 𑀢𑀺𑀝𑁆𑀞𑀢𑀺 𑀲𑀸𑀥𑀼𑀓𑀁.

𑁭. 𑀧𑀳𑀢𑁆𑀯𑀸𑀦 𑀫𑀢𑀁 𑀳𑀢𑁆𑀣𑀺𑀁, 𑀫𑀁𑀲𑀢𑁆𑀣𑀻 𑀓𑁂𑀘𑀺 𑀚𑀦𑁆𑀢𑀼𑀦𑁄;

𑀅𑀦𑀼𑀩𑀦𑁆𑀥𑀦𑁆𑀢𑀺 𑀫𑀁𑀲𑀢𑁆𑀣𑀁, 𑀲𑀲𑀁 𑀥𑀸𑀯𑀦𑁆𑀢 𑀫𑁂𑀓𑀓𑀁.

𑁮. 𑀢𑀣𑁂𑀯 𑀯𑀺𑀚𑁆𑀚𑀫𑀸𑀦𑁂𑀲𑀼, 𑀚𑀦𑁂𑀲𑀼 𑀫𑀦𑀼𑀚𑀸𑀥𑀺𑀧;

𑀕𑀼𑀡𑀯𑀦𑁆𑀢 𑀫𑀦𑀼𑀩𑀦𑁆𑀥𑀦𑁆𑀢𑀺, 𑀲𑀧𑁆𑀧𑀼𑀭𑀺𑀲𑀁 𑀓𑀢𑀯𑁂𑀤𑀺𑀓𑀁.

𑁯. 𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂 𑀥𑀫𑁆𑀫𑁂, 𑀧𑀢𑀺𑀝𑁆𑀞𑀸𑀲𑁆𑀫𑀺 𑀦𑀭𑀸𑀥𑀺𑀧;

𑀅𑀦𑀼𑀲𑁆𑀲𑀭𑀦𑁆𑀢𑀺 𑀏𑀢𑁂𑀦, 𑀓𑀢𑀧𑀼𑀩𑁆𑀩𑀽 𑀧𑀓𑀸𑀭𑀓𑀁.

𑁧𑁦. 𑀅𑀳𑀜𑁆𑀘 𑀫𑀫 𑀧𑀼𑀢𑁆𑀢𑀸 𑀘, 𑀏𑀢𑁂𑀦𑀫𑁆𑀳 𑀲𑀼𑀔𑀸𑀧𑀺𑀢𑀸;

𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑁆𑀚, 𑀫𑀼𑀘𑁆𑀘𑀦𑀻𑀬𑁄 𑀅𑀬𑀁 𑀫𑀬𑀸𑀢𑀺.

𑀢𑀢𑁄 𑀭𑀸𑀚𑀸 𑀤𑁄𑀯𑀸𑀭𑀺𑀓𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀫𑁆𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀥𑀼𑀦𑀸𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀦𑁆𑀢𑀼𑀝𑁆𑀞𑁄 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀧𑁆𑀧𑀤𑀸𑀲𑀺. 𑀢𑁂 𑀮𑀤𑁆𑀥𑀬𑀲𑀸 𑀢 𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀦𑁆𑀢𑀺.

𑁧𑁧. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀫𑀦𑀸 𑀅𑀧𑀺 𑀫𑀸𑀢𑀼𑀕𑀸𑀫𑀸,

𑀏𑀯𑀁 𑀮𑀪𑀦𑁆𑀢𑀺 𑀯𑀺𑀪𑀯𑀜𑁆𑀘 𑀧𑀲𑀁𑀲𑀦𑀜𑁆𑀘;

𑀥𑀫𑁆𑀫𑀜𑁆𑀘 𑀲𑀸𑀥𑀼𑀘𑀭𑀺𑀢𑀁 𑀫𑀦𑀲𑀻𑀓𑀭𑁄𑀦𑁆𑀢𑁄,

𑀥𑀫𑁆𑀫𑁂𑀲𑀼 𑀯𑀢𑁆𑀢𑀣 𑀲𑀤𑀸 𑀲𑀼𑀘𑀺𑀲𑀚𑁆𑀚𑀦𑀸𑀢𑀺.

𑀧𑀸𑀦𑀻𑀬𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀁 𑀦𑀯𑀫𑀁.