𑁧𑁭. 𑀘𑁄𑀭𑀲𑀳𑀸𑀬𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀤𑀳𑀦𑀕𑀭𑁂 𑀏𑀓𑁄 𑀫𑀦𑀼𑀲𑁆𑀲𑁄 𑀤𑀼𑀓𑁆𑀔𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀧𑀘𑁆𑀘𑀦𑁆𑀢𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸 𑀧𑁄𑀲𑁂𑀲𑀼𑀁, 𑀢𑀢𑁄 𑀲𑁄 𑀢𑀢𑁆𑀣 𑀫𑀦𑀼𑀲𑁆𑀲𑁂𑀳𑀺 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀅𑀜𑁆𑀜𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀧𑀭𑀪𑀸𑀕𑁂 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑁄𑀭𑁂𑀦𑁆𑀢𑀁 𑀢𑀁 𑀭𑀸𑀚𑀧𑀼𑀭𑀺𑀲𑀸 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀁 𑀩𑀦𑁆𑀥𑀦𑀸𑀕𑀸𑀭𑁂 𑀓𑀭𑁄𑀣𑀸𑀢𑀺 𑀆𑀡𑀸𑀧𑁂𑀲𑀺, 𑀢𑁂 𑀢𑀁 𑀩𑀦𑁆𑀥𑀦𑀸𑀕𑀸𑀭𑀁 𑀦𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸𑀳𑀺 𑀩𑀦𑁆𑀥𑀺𑀢𑁆𑀯𑀸 𑀆𑀭𑀓𑁆𑀔𑀓𑀸𑀦𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀅𑀕𑀫𑀁𑀲𑀼, 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀢𑀲𑁆𑀲 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀧𑀼𑀩𑁆𑀩𑀲𑀳𑀸𑀬𑁄 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀻 𑀫𑀦𑀼𑀲𑁆𑀲𑁄 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀤𑁂𑀯𑀤𑀳 𑀫𑀸𑀕𑀢𑁄 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑀁 𑀢𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀢𑀲𑁆𑀲 𑀳𑀤𑀬𑀁 𑀓𑀫𑁆𑀧𑀺, 𑀲𑁄 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀓𑀺𑀁 𑀢𑁂 𑀫𑀬𑀸 𑀓𑀢𑁆𑀢𑀩𑁆𑀩𑀁 𑀲𑀫𑁆𑀫𑀸𑀢𑀺 𑀧𑀼𑀘𑁆𑀙𑀺. 𑀢𑀢𑁄 𑀢𑁂𑀦 𑀲𑀫𑁆𑀫 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀫𑁂 𑀇𑀤𑀸𑀦𑀺 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀼𑀩𑁆𑀪𑁄𑀚𑀦𑀸𑀤𑀺𑀦𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀫𑀺. 𑀬𑀸𑀯𑀸𑀳𑀁 𑀆𑀳𑀸𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀺. 𑀢𑀸𑀯 𑀫𑀁 𑀇𑀢𑁄 𑀫𑀼𑀜𑁆𑀘𑀦𑀼𑀧𑀸𑀬𑀁 𑀚𑀸𑀦𑀸𑀳𑀻𑀢𑀺 𑀯𑀼𑀢𑁆𑀢𑁂 𑀲𑁄 𑀲𑀧𑁆𑀧𑀼𑀭𑀺𑀲𑁄.

𑁧. 𑀭𑀽𑀧𑁂𑀦 𑀓𑀺𑀦𑁆𑀢𑀼 𑀕𑀼𑀡𑀲𑀻𑀮𑀯𑀺𑀯𑀚𑁆𑀚𑀺𑀢𑁂𑀦,

𑀫𑀺𑀘𑁆𑀙𑀸𑀮𑀬𑀲𑁆𑀲 𑀓𑀺𑀢𑀯𑀲𑁆𑀲 𑀥𑀺𑀬𑀸 𑀓𑀺𑀫𑀢𑁆𑀣𑀁;

𑀤𑀸𑀦𑀸 𑀤𑀺𑀘𑀸𑀕𑀯𑀺𑀕𑀢𑁂𑀦 𑀥𑀦𑁂𑀦 𑀓𑀺𑀁 𑀯𑀸;

𑀫𑀺𑀢𑁆𑀢𑁂𑀦 𑀓𑀺𑀁 𑀩𑁆𑀬𑀲𑀦𑀓𑀸𑀮𑀧𑀭𑀫𑁆𑀫𑀼𑀔𑁂𑀦𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀸𑀥𑀼 𑀲𑀫𑁆𑀫 𑀓𑀭𑁄𑀫𑀺 𑀢𑁂 𑀯𑀘𑀦𑀦𑁆𑀢𑀺 𑀆𑀭𑀓𑁆𑀔𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑁄𑀦𑁆𑀢𑁄 𑀬𑀸𑀯𑁂𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀸𑀯𑀸𑀳𑀁 𑀢𑀲𑁆𑀲 𑀧𑀸𑀝𑀺𑀪𑁄𑀕𑁄 𑀪𑀯𑀺𑀲𑁆𑀲𑀸𑀫𑀺. 𑀯𑀺𑀲𑁆𑀲𑀚𑁆𑀚𑁂𑀣 𑀦𑀦𑁆𑀢𑀺 𑀆𑀳, 𑀢𑁂𑀳𑀺 𑀦 𑀲𑀓𑁆𑀓𑀸 𑀪𑁄 𑀏𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀅𑀧𑀺 𑀘 𑀔𑁄 𑀬𑀸𑀯𑀸𑀬𑀁 𑀆𑀕𑀘𑁆𑀙𑀢𑀺. 𑀢𑀸𑀯 𑀢𑁆𑀯𑀁 𑀅𑀬𑀲𑀗𑁆𑀔𑀮𑀺𑀓𑀸𑀬 𑀩𑀤𑁆𑀥𑁄 𑀦𑀺𑀲𑀻𑀤𑀺𑀲𑁆𑀲𑀲𑀺, 𑀏𑀯𑀁 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫, 𑀦𑁄 𑀘𑁂 𑀦 𑀲𑀓𑁆𑀓𑀸𑀢𑀺 𑀆𑀳𑀁𑀲𑀼, 𑀲𑁄 𑀏𑀯𑀫𑁆𑀧𑀺 𑀳𑁄𑀢𑀼 𑀲𑀫𑁆𑀫𑀸𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀸𑀤𑀢𑁄 𑀲𑀗𑁆𑀔𑀮𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂 𑀓𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀇𑀢𑀭𑀁 𑀫𑀼𑀜𑁆𑀘𑀸𑀧𑁂𑀲𑀺. 𑀲𑁄𑀧𑀺 𑀅𑀲𑀧𑁆𑀧𑀼𑀭𑀺𑀲𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀦 𑀧𑀼𑀦 𑀢𑀁 𑀞𑀸𑀦 𑀫𑀕𑀫𑀸𑀲𑀺, 𑀅𑀳𑁄 𑀅𑀓𑀢𑀜𑁆𑀜𑀼𑀦𑁄 𑀧𑀓𑀢𑀺𑀁 𑀜𑀸𑀢𑀼𑀁 𑀪𑀸𑀭𑀺𑀬𑀁. 𑀬𑀣𑀸𑀳.

𑁨. 𑀯𑀸𑀭𑀺𑀧𑀽𑀭𑁂 𑀬𑀣𑀸 𑀲𑁄𑀩𑁆𑀪𑁂, 𑀦𑁂𑀯𑀦𑁆𑀢𑁄 𑀯𑀺𑀲𑀫𑀁 𑀲𑀫𑀁;

𑀧𑀜𑁆𑀜𑀸𑀬𑀢𑁂𑀯𑀁𑀲𑀸𑀥𑀼𑀲𑁆𑀲, 𑀪𑀸𑀯𑀁 𑀫𑀦𑀲𑀺 𑀲𑀫𑁆𑀪𑀯𑀁.

𑁩. 𑀪𑀸𑀲𑀦𑁆𑀢𑀺 𑀫𑀼𑀔𑀢𑁄 𑀏𑀓𑀁, 𑀘𑀺𑀦𑁆𑀢𑁂𑀦𑁆𑀢𑀺 𑀫𑀦𑀲𑀸 𑀧𑀭𑀁;

𑀓𑀸𑀬𑁂𑀦𑁂𑀓𑀁 𑀓𑀭𑁄𑀦𑁆𑀢𑁂𑀯𑀁, 𑀧𑀓𑀢𑀸𑀬𑀫𑀲𑀸𑀥𑀼𑀦𑀁.

𑁪. 𑀢𑁂𑀲𑀁 𑀬𑁄 𑀪𑀸𑀯𑀫𑀜𑁆𑀜𑀸𑀲𑀺, 𑀲𑁄𑀯 𑀧𑀡𑁆𑀟𑀺𑀢𑀚𑀸𑀢𑀺𑀓𑁄;

𑀩𑀳𑀼𑀲𑁆𑀲𑀼𑀢𑁄𑀧𑀺 𑀲𑁄𑀬𑁂𑀯, 𑀧𑀭𑀘𑀺𑀢𑁆𑀢𑀯𑀺𑀤𑀽𑀧𑀺 𑀲𑁄.

𑀅𑀣𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁂𑀦 𑀢𑁂𑀦 𑀆𑀳𑀸𑀭𑀢𑁆𑀢𑀸𑀬 𑀧𑀭𑁄 𑀦 𑀬𑀸𑀘𑀺𑀢𑀧𑀼𑀩𑁆𑀩𑁄, 𑀅𑀦𑀼𑀘𑁆𑀙𑀺𑀝𑁆𑀞𑀸𑀳𑀸𑀭𑀁 𑀮𑀪𑀦𑀤𑀺𑀯𑀲𑀢𑁄 𑀅𑀮𑀪𑀦𑀤𑀺𑀯𑀲𑀸𑀬𑁂𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀅𑀣 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀫𑁂 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀲𑀩𑁆𑀩𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀲𑀺. 𑀅𑀦𑁆𑀢𑀫𑀲𑁄 𑀫𑀺𑀕𑀧𑀓𑁆𑀔𑀺𑀦𑁄𑀧𑀺 𑀩𑀦𑁆𑀥𑀦𑀸 𑀫𑀼𑀜𑁆𑀘𑀸𑀧𑁂𑀲𑀺. 𑀤𑁆𑀯𑀸𑀭𑁂 𑀯𑀺𑀯𑀝𑀫𑀢𑁆𑀢𑁂𑀬𑁂𑀯 𑀩𑀦𑁆𑀥𑀦𑀸𑀕𑀸𑀭𑁂 𑀫𑀦𑀼𑀲𑁆𑀲𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑁄 𑀧𑀦𑁂𑀓𑁄𑀯 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀕𑀦𑁆𑀢𑁆𑀯𑀸 𑀑𑀳𑀻𑀬𑀺. 𑀆𑀭𑀓𑁆𑀔𑀓𑁂𑀳𑀺 𑀢𑁆𑀯𑀁 𑀪𑁄 𑀓𑀲𑁆𑀫𑀸 𑀦 𑀕𑀘𑁆𑀙𑀲𑀻𑀢𑀺 𑀯𑀼𑀢𑁆𑀢𑁂 𑀅𑀳𑀁 𑀪𑁄 𑀧𑀜𑁆𑀜𑀸𑀢𑀪𑀸𑀯𑁂𑀦 𑀇𑀤𑀸𑀦𑀺 𑀦 𑀕𑀫𑀺𑀲𑁆𑀲𑀸𑀫𑀺. 𑀅𑀢𑀻𑀯 𑀧𑀭𑀺𑀳𑀻𑀦𑀕𑀢𑁆𑀢𑁄𑀲𑁆𑀫𑀺. 𑀅𑀦𑁆𑀥𑀓𑀸𑀭𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀆𑀕𑀢𑁂 𑀦𑀺𑀓𑁆𑀔𑀫𑁆𑀫 𑀅𑀦𑁆𑀢𑁄𑀦𑀕𑀭𑁂 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀅𑀪𑀸𑀯𑁂𑀦 𑀓𑀼𑀢𑁄 𑀆𑀳𑀸𑀭𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀓𑁆𑀔𑀫𑁆𑀫 𑀭𑀢𑁆𑀢𑀦𑁆𑀥𑀓𑀸𑀭𑁂 𑀆𑀫𑀓𑀲𑀼𑀲𑀸𑀦 𑀫𑀕𑀫𑀸𑀲𑀺. 𑀏𑀢𑁆𑀣𑀸𑀳𑀸𑀭𑀁 𑀮𑀪𑀺𑀲𑁆𑀲𑀸𑀫𑀻𑀢𑀺. 𑀢𑀢𑁆𑀣 𑀲𑁄 𑀅𑀥𑀼𑀦𑀸 𑀦𑀺𑀓𑁆𑀔𑀺𑀢𑁆𑀢𑀫𑀢𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀝𑁆𑀞𑀺𑀦𑀸 𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀲𑀓𑀧𑀸𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀻𑀳𑀺 𑀫𑀦𑀼𑀲𑁆𑀲𑀲𑀻𑀲𑁂𑀳𑀺 𑀓𑀢𑀉𑀤𑁆𑀥𑀦𑁂 𑀞𑀧𑁂𑀢𑁆𑀯𑀸 𑀘𑀺𑀢𑀓𑀢𑁄 𑀑𑀫𑀼𑀓𑁆𑀓𑀅𑀮𑀸𑀢𑁂𑀳𑀺 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬𑀸 𑀪𑀢𑀉𑀤𑀓𑁂𑀦 𑀫𑀦𑀼𑀲𑁆𑀲𑀝𑁆𑀞𑀺𑀦𑀸 𑀆𑀮𑁄𑀮𑁂𑀦𑁆𑀢𑁄 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑁂𑀦 𑀳𑀺𑀭𑀺𑀓𑁄𑀧𑀻𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀯𑀢𑁆𑀣𑀧𑀺𑀮𑁄𑀓𑀺𑀓𑀁 𑀯𑀸𑀢𑀸𑀯𑀭𑀡𑀁 𑀓𑀢𑁆𑀯𑀸𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁆𑀣 𑀧𑀺𑀧𑁆𑀧𑀮𑀻𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦𑀦𑁆𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳. 𑀪𑁄 𑀢𑁆𑀯𑀁 𑀖𑀦𑀢𑀭𑀢𑀺𑀫𑀺𑀭𑀸𑀓𑀼𑀮𑁂 𑀫𑀳𑀸𑀭𑀢𑁆𑀢𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀓𑀺𑀡𑁆𑀡𑀦𑀭𑀝𑁆𑀞𑀺𑀲𑀫𑀸𑀓𑀺𑀡𑁆𑀡𑁂 𑀲𑁄𑀡𑀲𑀺𑀕𑀸𑀮𑀸𑀤𑀺𑀓𑀼𑀡𑀧𑀸𑀤𑀓𑀸𑀓𑀼𑀮𑁂 𑀫𑀦𑀼𑀲𑁆𑀲𑀫𑀁𑀲𑀪𑀓𑁆𑀔𑀬𑀓𑁆𑀔𑀭𑀓𑁆𑀔𑀲𑀸𑀓𑀼𑀮𑁂 𑀢𑀢𑁆𑀣 𑀢𑀢𑁆𑀣 𑀧𑀚𑁆𑀚𑀮𑀦𑁆𑀢𑀸𑀦𑁂𑀓𑀘𑀺𑀢𑀓𑀪𑀬𑀸𑀦𑀓𑁂 𑀲𑀼𑀲𑀸𑀦𑁂 𑀫𑀦𑀼𑀲𑁆𑀲𑀫𑀁𑀲𑀁 𑀧𑀘𑀺𑀢𑁆𑀯𑀸 𑀓𑀺𑀁𑀓𑀭𑁄𑀲𑀻𑀢𑀺 𑀧𑀼𑀘𑁆𑀙𑀦𑁆𑀢𑀻 𑀆𑀳.

𑁫. 𑀭𑀢𑁆𑀢𑀦𑁆𑀥𑀓𑀸𑀭𑁂 𑀓𑀼𑀡𑀧𑀸𑀤𑀓𑁂𑀳𑀺,

𑀲𑀫𑀸𑀓𑀼𑀮𑁂 𑀲𑀻𑀯𑀣𑀺𑀓𑀸𑀬 𑀫𑀚𑁆𑀛𑁂;

𑀫𑀦𑀼𑀲𑁆𑀲𑀫𑀁𑀲𑀁 𑀧𑀘𑀲𑀻 𑀥 𑀲𑀻𑀲𑁂,

𑀯𑀤𑁂𑀳𑀺 𑀓𑀺𑀁 𑀢𑁂𑀦 𑀧𑀬𑁄𑀚𑀦𑀁 𑀢𑁂𑀢𑀺.

𑀅𑀣 𑀲𑁄 𑀆𑀳.

𑁬. 𑀦 𑀬𑀸𑀕𑀳𑁂𑀢𑀼 𑀦 𑀘 𑀤𑀸𑀦𑀳𑁂𑀢𑀼,

𑀲𑀼𑀲𑀸𑀦𑀫𑀚𑁆𑀛𑀫𑁆𑀳𑀺 𑀧𑀘𑀸𑀫𑀺 𑀫𑀁𑀲𑀁;

𑀔𑀼𑀤𑀸𑀲𑀫𑀁 𑀦𑀢𑁆𑀣𑀺 𑀦𑀭𑀲𑁆𑀲 𑀅𑀜𑁆𑀜𑀁,

𑀔𑀼𑀤𑀸𑀯𑀺𑀦𑀸𑀲𑀸𑀬 𑀧𑀘𑀸𑀫𑀺𑀫𑀫𑁆𑀪𑁄𑀢𑀺.

𑀢𑀢𑁄 𑀤𑁂𑀯𑀢𑀸 𑀢𑀁 𑀢𑀣𑀸 𑀳𑁄𑀢𑀼, 𑀇𑀫𑀺𑀦𑀸 𑀧𑀺𑀮𑁄𑀢𑀺𑀓𑁂𑀦 𑀯𑀸𑀢𑀸𑀯𑀭𑀡𑀁 𑀓𑀭𑁄𑀲𑀺. 𑀓𑀺𑀫𑀢𑁆𑀣𑀫𑁂𑀢𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀻.

𑁭. 𑀦𑀺𑀯𑀢𑁆𑀣𑀲𑀸𑀔𑁄 𑀳𑀺𑀭𑀺𑀲𑀁𑀯𑀭𑀸𑀬,

𑀧𑀺𑀮𑁄𑀢𑀺𑀓𑀁 𑀢𑀢𑁆𑀣 𑀧𑀲𑀸𑀭𑀬𑀦𑁆𑀢𑁄;

𑀓𑀭𑁄𑀲𑀺 𑀯𑀸𑀢𑀸𑀯𑀭𑀡𑀜𑁆𑀘 𑀲𑀫𑁆𑀫,

𑀓𑀺𑀫𑀢𑁆𑀣𑀫𑁂𑀢𑀁 𑀯𑀤 𑀧𑀼𑀘𑁆𑀙𑀺𑀢𑁄 𑀫𑁂𑀢𑀺.

𑀲𑁄 𑀢𑀲𑁆𑀲𑀸 𑀘𑀺𑀓𑁆𑀔𑀦𑁆𑀢𑁄 𑀆𑀳.

𑁮. 𑀲𑀼𑀪𑀸 𑀲𑀼𑀪𑀸𑀫𑀺𑀲𑁆𑀲𑀺𑀢𑀲𑀻𑀢𑀯𑀸𑀢𑁄,

𑀲𑀬𑀁 𑀅𑀘𑀺𑀢𑁆𑀢𑁄𑀯 𑀅𑀘𑀺𑀢𑁆𑀢𑀪𑀸𑀯𑀸;

𑀤𑁂𑀳𑀁 𑀨𑀼𑀲𑀺𑀢𑁆𑀯𑀸𑀦 𑀅𑀲𑀸𑀥𑀼𑀓𑀲𑁆𑀲,

𑀅𑀓𑀢𑀜𑁆𑀜𑀼𑀦𑁄 𑀫𑀺𑀢𑁆𑀢𑀧𑀥𑀁𑀲𑀓𑀲𑁆𑀲.

𑁯. 𑀲𑀫𑀸𑀯𑀳𑀦𑁆𑀢𑁄 𑀬𑀤𑀺 𑀫𑁂 𑀲𑀭𑀻𑀭𑁂,

𑀨𑀼𑀲𑀸𑀢𑀺 [𑀨𑀼𑀲𑀸𑀢𑀺𑀲𑀸𑀲𑀗𑁆𑀕𑀢𑀺𑀫𑀚𑁆𑀚𑀤𑀸𑀦𑀺 𑀇𑀢𑀺𑀓𑀢𑁆𑀢𑀘𑀺] 𑀢𑀁 𑀯𑀸𑀬𑀼 𑀫𑀫𑀸 𑀯𑀺𑀲𑀺𑀢𑁆𑀯𑀸;

𑀤𑀼𑀓𑁆𑀔𑀁 𑀤𑀤𑀸𑀢𑀻𑀢𑀺 𑀯𑀺𑀲𑀁𑀯 𑀢𑀁 𑀪𑁄,

𑀧𑀭𑀺𑀯𑀚𑁆𑀚𑀺𑀢𑀼𑀁 𑀩𑀤𑁆𑀥𑀫𑀺𑀫𑀁 𑀓𑀼𑀘𑁂𑀮𑀦𑁆𑀢𑀺.

𑀤𑁂𑀯𑀢𑀸 𑀆𑀳.

𑁧𑁦. 𑀓𑀺 𑀫𑀓𑀸𑀲𑀺 𑀪𑁄 𑀲𑁄 𑀓𑀢𑀦𑀸𑀲𑀓𑁄 𑀢𑁂,

𑀥𑀦𑀜𑁆𑀘 𑀥𑀜𑁆𑀜𑀁 𑀢𑀯 𑀦𑀸𑀲𑀬𑀻 𑀘;

𑀫𑀸𑀢𑀸 𑀧𑀺𑀢𑀸 𑀩𑀦𑁆𑀥𑀯𑁄 𑀔𑁂𑀢𑁆𑀢 𑀯𑀢𑁆𑀣𑀽,

𑀯𑀺𑀦𑀸𑀲𑀺𑀢𑀸 𑀢𑁂𑀦 𑀯𑀤𑁂𑀳𑀺 𑀓𑀺𑀁 𑀢𑁂𑀢𑀺.

𑀢𑀢𑁄 𑀲𑁄 𑀆𑀳.

𑁧𑁧. 𑀬𑀁 𑀭𑀸𑀚𑀢𑁄 𑀳𑁄𑀢𑀺 𑀪𑀬𑀁 𑀫𑀳𑀦𑁆𑀢𑀁,

𑀲𑀩𑁆𑀩𑀲𑁆𑀲 𑀳𑀭𑀡𑀸𑀤𑀺𑀯𑀥𑀸𑀤𑀺𑀓𑀜𑁆𑀘;

𑀅𑀓𑀢𑀜𑁆𑀜𑀼𑀦𑀸 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺,

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄.

𑁧𑁨. 𑀬𑀫𑀢𑁆𑀣𑀺 𑀘𑁄𑀭𑀸𑀭𑀺𑀪𑀬𑀜𑁆𑀳𑀺 𑀮𑁄𑀓𑁂,

𑀅𑀣𑁄 𑀤𑀓𑁂𑀦𑀸𑀧𑀺 𑀘 𑀧𑀸𑀯𑀓𑁂𑀦;

𑀅𑀓𑀢𑀜𑁆𑀜𑀼𑀦𑀸 𑀢𑀁 𑀲𑀓𑀮𑀫𑁆𑀧𑀺 𑀳𑁄𑀢𑀺,

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄.

𑁧𑁩. 𑀧𑀸𑀡𑀸𑀢𑀺𑀧𑀸𑀢𑀫𑁆𑀧𑀺 𑀅𑀤𑀺𑀦𑁆𑀦𑀤𑀸𑀦𑀁,

𑀧𑀭𑀲𑁆𑀲 𑀤𑀸𑀭𑀽𑀧𑀕𑀫𑀁 𑀫𑀼𑀲𑀸 𑀘;

𑀫𑀚𑁆𑀚𑀲𑁆𑀲 𑀧𑀸𑀦𑀁 𑀓𑀮𑀳𑀜𑁆𑀘 𑀧𑁂𑀲𑀼𑀦𑀁,

𑀲𑀫𑁆𑀨𑀁 𑀕𑀺𑀭𑀁 𑀥𑀼𑀢𑁆𑀢𑀚𑀦𑁂𑀳𑀺 [𑀅𑀓𑁆𑀔𑀥𑀼𑀢𑁆𑀢𑀸𑀤𑀺𑀬𑁄𑀕𑀁 𑀇𑀢𑀺𑀓𑀢𑁆𑀣𑀘𑀺] 𑀬𑁄𑀕𑀁.

𑁧𑁪. 𑀲𑀩𑁆𑀩𑀁 𑀅𑀦𑀢𑁆𑀣𑀁 𑀅𑀲𑀺𑀯𑀁 𑀅𑀦𑀺𑀝𑁆𑀞𑀁,

𑀅𑀧𑀸𑀬𑀺𑀓𑀁 [𑀅𑀧𑀸𑀬𑀺𑀓𑀁 𑀇𑀢𑀺𑀓𑀢𑁆𑀣𑀘𑀺] 𑀤𑀼𑀓𑁆𑀔𑀫𑀦𑀦𑁆𑀢 𑀫𑀜𑁆𑀜𑀁;

𑀅𑀓𑀢𑀜𑁆𑀜𑀼𑀦𑀸 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄𑀢𑀺.

𑀯𑀢𑁆𑀯𑀸 𑀅𑀢𑁆𑀢𑀦𑀸 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁂𑀦𑀸𑀦𑀼𑀪𑀽𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀓𑀣𑁂𑀲𑀺, 𑀢𑀢𑁄 𑀤𑁂𑀯𑀢𑀸 𑀅𑀳𑀫𑁆𑀧𑀺 𑀪𑁄 𑀲𑀢𑁆𑀣𑀼𑀦𑁄 𑀫𑀗𑁆𑀕𑀮𑀲𑀼𑀢𑁆𑀢𑀤𑁂𑀲𑀦𑀸𑀤𑀺𑀯𑀲𑁂 𑀇𑀫𑀲𑁆𑀫𑀺𑀁𑀬𑁂𑀯 𑀭𑀼𑀓𑁆𑀔𑁂 𑀦𑀺𑀲𑀺𑀦𑁆𑀦𑁄.

𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸;

𑀧𑀽𑀚𑀸 𑀘 𑀧𑀽𑀚𑀦𑀻𑀬𑁆𑀬𑀸𑀦𑀁, 𑀏𑀢𑀁 𑀫𑀗𑁆𑀕𑀮 𑀫𑀼𑀢𑁆𑀢𑀫𑀦𑁆𑀢𑀺.

𑀕𑀸𑀣𑀸𑀬 𑀩𑀸𑀮𑀲𑁆𑀲 𑀤𑁄𑀲𑁂 𑀅𑀲𑁆𑀲𑁄𑀲𑀺𑀁𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀲𑀦𑁆𑀦𑁄 𑀢𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀦𑁂𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀺𑀩𑁆𑀩𑀦𑁆𑀦𑀧𑀸𑀦𑀁 𑀤𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺.

𑁧𑁫. 𑀏𑀯𑀁 𑀅𑀲𑀸𑀥𑀼𑀚𑀦𑀲𑀗𑁆𑀕𑀫𑀲𑀦𑁆𑀦𑀺𑀯𑀸𑀲𑀁,

𑀲𑀜𑁆𑀘𑀚𑁆𑀚 𑀲𑀸𑀥𑀼𑀲𑀼𑀘𑀺𑀲𑀚𑁆𑀚𑀦𑀲𑀗𑁆𑀕𑀫𑁂𑀦;

𑀤𑀸𑀦𑀸𑀤𑀺 𑀦𑁂𑀓𑀓𑀼𑀲𑀮𑀁 𑀧𑀭𑀺𑀧𑀽𑀭𑀬𑀦𑁆𑀢𑀸,

𑀲𑀕𑁆𑀕𑀸 𑀧𑀯𑀕𑁆𑀕𑀯𑀺𑀪𑀯𑀁 𑀅𑀪𑀺𑀲𑀫𑁆𑀪𑀼𑀦𑀸𑀣𑀸𑀢𑀺.

𑀘𑁄𑀭𑀲𑀳𑀸𑀬𑀲𑁆𑀲 𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.