𑁭. 𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀓𑁄𑀲𑀫𑁆𑀩𑀺𑀦𑀕𑀭𑁂 𑀓𑁄𑀲𑀫𑁆𑀩𑀺𑀭𑀜𑁆𑀜𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀢𑀤𑀸 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀝𑀺𑀯𑀲𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀫𑀥𑀼𑀭𑁂𑀦 𑀲𑀭𑁂𑀦 𑀤𑁂𑀲𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀫𑀸𑀫𑀺𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀣𑀸 𑀧𑀭𑀪𑀸𑀕𑁂 𑀢𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑀢𑁆𑀣𑀸𑀬 𑀧𑀘𑁆𑀘𑀦𑁆𑀢𑀭𑀸𑀚𑀸 𑀬𑀼𑀤𑁆𑀥𑀲𑀚𑁆𑀚𑁄 𑀭𑀚𑁆𑀚𑀁 𑀯𑀸 𑀤𑁂𑀢𑀼, 𑀬𑀼𑀤𑁆𑀥𑀁𑀯𑀸𑀢𑀺 𑀧𑀡𑁆𑀡𑀁 𑀧𑀳𑀺𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀬𑀼𑀤𑁆𑀥𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑁄 𑀫𑀳𑁂𑀲𑀺𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀸 𑀏𑀯𑀫𑀸𑀳. 𑀪𑀤𑁆𑀤𑁂 𑀲𑀗𑁆𑀕𑀸𑀫𑀲𑀻𑀲𑁂 𑀚𑀬𑀧𑀭𑀸𑀚𑀬𑁄 𑀦𑀸𑀫 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀲𑀘𑁂 𑀫𑁂 𑀧𑀭𑀸𑀚𑀬𑁄 𑀅𑀪𑀯𑀺𑀲𑁆𑀲, 𑀧𑀼𑀭𑁂𑀢𑀭𑀫𑁂𑀯 𑀭𑀢𑁆𑀢𑀧𑀢𑀸𑀓𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫𑀺, 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀢𑁆𑀯𑀁 𑀓𑁄𑀲𑀫𑁆𑀩𑀺𑀫𑁂𑀯 𑀕𑀘𑁆𑀙𑀸𑀳𑀻𑀢𑀺 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀗𑁆𑀕𑀸𑀫 𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀫𑀳𑀸𑀭𑀡𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀸𑀚𑀬𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀼𑀕𑀸𑀫𑀁 𑀲𑀭𑀺𑀢𑁆𑀯𑀸 𑀭𑀢𑁆𑀢𑀤𑁆𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑁄 𑀭𑀡𑁂 𑀧𑀢𑀺. 𑀅𑀣 𑀲𑀸 𑀭𑀢𑁆𑀢𑀧𑀢𑀸𑀓𑀁 𑀤𑀺𑀲𑁆𑀯𑀸 𑀧𑀭𑀸𑀚𑀺𑀢𑁄 𑀦𑀽𑀦 𑀫𑁂 𑀲𑀸𑀫𑀺𑀓𑁄𑀢𑀺 𑀪𑀬𑁂𑀦 𑀧𑀮𑀸𑀬𑀺𑀢𑀼𑀫𑀸𑀭𑀪𑀺. 𑀅𑀣 𑀢𑀁 𑀘𑁄𑀭𑀭𑀜𑁆𑀜𑁄 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀦𑀽𑀦𑀸𑀬𑀁 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀫𑁂𑀢𑀁 𑀅𑀪𑀺𑀲𑁂𑀓𑀁 𑀓𑀭𑁄𑀣𑀸𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀢𑀁 𑀅𑀪𑀺𑀲𑁂𑀓𑀢𑁆𑀣𑀸𑀬 𑀬𑀸𑀘𑀺𑀁𑀲𑀼, 𑀲𑀸 𑀦 𑀫𑁂 𑀪𑀡𑁂 𑀅𑀪𑀺𑀲𑁂𑀓𑁂𑀦𑀢𑁆𑀣𑁄𑀢𑀺 𑀦 𑀇𑀘𑁆𑀙𑀺. 𑀅𑀫𑀘𑁆𑀘𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀲𑁆𑀫𑀸 𑀦 𑀇𑀘𑁆𑀙𑀲𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀏𑀯𑀫𑀸𑀳.

𑁧. 𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀤𑁂𑀯, 𑀪𑀸𑀲𑀫𑀸𑀦𑀸𑀬 𑀫𑁂 𑀯𑀘𑁄;

𑀪𑀢𑁆𑀢𑀸 𑀫𑀬𑁆𑀳𑀁 𑀫𑀢𑁄 𑀅𑀚𑁆𑀚, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄.

𑁨. 𑀓𑀢𑁆𑀯𑀸𑀦 𑀲𑁄𑀪𑀺𑀲𑁂𑀓𑀁 𑀫𑀁, 𑀅𑀢𑁆𑀢𑀦𑁄 𑀳𑀤𑀬𑀁 𑀯𑀺𑀬;

𑀧𑀸𑀮𑁂𑀢𑀺 𑀢𑀁 𑀲𑀭𑀦𑁆𑀢𑀲𑁆𑀲𑀸, 𑀲𑁄𑀓𑀕𑁆𑀕𑀺 𑀤𑀳𑀢𑁂 𑀫𑀦𑀁.

𑁩. 𑀫𑀳𑀸𑀭𑀸𑀚 𑀲𑀘𑀜𑁆𑀜𑀲𑁆𑀲, 𑀅𑀲𑁆𑀲 𑀫𑀕𑁆𑀕𑀫𑀳𑁂𑀲𑀺𑀓𑀸;

𑀢𑀫𑁆𑀳𑀸 𑀤𑀼𑀓𑁆𑀔𑀸 𑀦 𑀫𑀼𑀘𑁆𑀘𑀸𑀫𑀺, 𑀢𑁂𑀦𑀸𑀳𑀁 𑀢𑀁 𑀦 𑀧𑀢𑁆𑀣𑀬𑁂.

𑁪. 𑀲𑁄𑀓𑀕𑁆𑀕𑀺𑀦𑀸 𑀧𑀤𑀺𑀢𑁆𑀢𑀸𑀳𑀁, 𑀲𑁄𑀓𑁂 𑀲𑁄𑀓𑀁 𑀓𑀣𑀁 𑀔𑀺𑀧𑁂;

𑀚𑀮𑀦𑁆𑀢𑀕𑁆𑀕𑀺𑀫𑁆𑀳𑀻 𑀓𑁄 𑀦𑀸𑀫, 𑀧𑀮𑀸𑀮𑀁 𑀧𑀓𑁆𑀔𑀺𑀧𑁂 𑀩𑀼𑀥𑁄.

𑁫. 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁, 𑀢𑀁 𑀘𑀺𑀦𑁆𑀢𑀬𑀦𑁆𑀢𑀻 𑀧𑀼𑀦𑀧𑁆𑀧𑀼𑀦𑀁;

𑀢𑀫𑁆𑀳𑀸 𑀤𑀼𑀓𑁆𑀔𑀸 𑀦 𑀫𑀼𑀘𑁆𑀘𑀸𑀫𑀺, 𑀢𑀲𑁆𑀫𑀸𑀳𑀁 𑀢𑀁 𑀦 𑀧𑀢𑁆𑀣𑀬𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀓𑁄𑀥𑁂𑀦𑀸𑀪𑀺𑀪𑀽𑀢𑁄 𑀲𑀘𑁂 𑀦𑀸𑀪𑀺𑀲𑀺𑀜𑁆𑀘𑀺𑀲𑁆𑀲𑀲𑀺, 𑀅𑀕𑁆𑀕𑀺𑀫𑁆𑀳𑀺 𑀢𑀁 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀘𑀺𑀢𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀏𑀓𑀧𑀚𑁆𑀚𑁄𑀢𑁂 𑀚𑀸𑀢𑁂 𑀏𑀢𑁆𑀢 𑀧𑀯𑀺𑀲𑀸𑀢𑀺 𑀆𑀳. 𑀅𑀣 𑀲𑀸 𑀬𑀸𑀘𑀦𑁆𑀢𑀻 𑀭𑀸𑀚𑀸𑀦𑀁 𑀆𑀳.

𑁬. 𑀧𑀸𑀧𑁄 𑀦𑀺𑀧𑁆𑀧𑀸𑀧𑀺𑀦𑀁 𑀭𑀸𑀚, 𑀧𑀸𑀢𑀦𑀁 𑀔𑀮𑀼 𑀧𑀸𑀯𑀓𑁂;

𑀳𑁄𑀢𑀺 𑀧𑀸𑀧𑀨𑀮𑀁 𑀢𑀲𑁆𑀲, 𑀧𑀘𑁆𑀘𑀢𑁆𑀢𑁂𑀘 𑀧𑀭𑀢𑁆𑀣𑀘.

𑁭. 𑀧𑀼𑀭𑀸𑀢𑀦𑁂𑀳𑀺 𑀪𑀽𑀧𑀸𑀮, 𑀲𑀫𑀡𑀩𑁆𑀭𑀳𑁆𑀫𑀡𑁂𑀲𑀼𑀘;

𑀫𑀸𑀢𑀸𑀧𑀺𑀢𑀼𑀲𑀼 𑀩𑀸𑀮𑁂𑀲𑀼, 𑀭𑁄𑀕𑁂𑀦𑀸 𑀢𑀼𑀭𑀇𑀢𑁆𑀣𑀺𑀲𑀼;

𑀦𑀧𑁆𑀧𑀲𑀢𑁆𑀣𑁄 𑀯𑀥𑁄 𑀤𑁂𑀯, 𑀢𑀲𑁆𑀫𑀸𑀳𑀁 𑀦 𑀯𑀥𑀸𑀭𑀳𑀸𑀢𑀺.

𑀢𑀁 𑀲𑀼𑀢𑁆𑀯𑀸𑀧𑀺 𑀭𑀸𑀚𑀸 𑀅𑀲𑀤𑁆𑀤𑀳𑀦𑁆𑀢𑁄 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺. 𑀏𑀢𑀸𑀬 𑀳𑀢𑁆𑀣𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀣𑀸𑀢𑀺 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀅𑀣 𑀲𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀫𑀸𑀦𑀸 𑀦𑀢𑁆𑀣𑁂𑀢𑁆𑀣 𑀫𑁂 𑀓𑁄𑀘𑀺 𑀧𑀝𑀺𑀲𑀭𑀡𑁄𑀢𑀺 𑀲𑀭𑀡𑀫𑁂𑀯 𑀲𑀭𑀡𑀁 𑀓𑀭𑁄𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺’’ 𑀯𑀤𑀦𑁆𑀢𑀻 𑀫𑀦𑀲𑀸𑀘 𑀅𑀦𑀼𑀲𑁆𑀲𑀭𑀦𑁆𑀢𑀻 𑀅𑀕𑁆𑀕𑀺𑀫𑁆𑀳𑀺 𑀧𑀢𑀺, 𑀢𑀣𑀸𑀯𑀺𑀥𑁄𑀧𑀺 𑀅𑀕𑁆𑀕𑀺 𑀢𑀲𑁆𑀲𑀸 𑀲𑀭𑀻𑀭𑁂 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀸𑀓𑀸𑀭𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀲𑀻𑀢𑀺𑀪𑀽𑀢𑀲𑀭𑀻𑀭𑀸 𑀅𑀳𑁄𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀯𑁂𑀕𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀕𑀕𑁆𑀕𑀬𑁆𑀳 𑀞𑀺𑀢𑁄 𑀓𑀲𑁆𑀫𑀸 𑀢𑁂 𑀢𑀁 𑀅𑀕𑁆𑀕𑀺 𑀲𑀭𑀻𑀭𑀁 𑀫𑀸 𑀧𑀭𑀺𑀤𑀳𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑀏𑀯 𑀫𑀸𑀳.

𑁮. 𑀫𑀸𑀢𑀸 𑀧𑀺𑀢𑀸𑀘 𑀜𑀸𑀢𑀻𑀘, 𑀧𑀭𑀺𑀯𑀸𑀭𑀸𑀘 𑀲𑁄𑀳𑀤𑀸;

𑀫𑀦𑁆𑀢𑁄 𑀲𑀥𑀸𑀤𑀬𑁄𑀘𑀸𑀧𑀺, 𑀫𑀳𑁂𑀲𑀓𑁆𑀔𑀸𑀘 𑀤𑁂𑀯𑀢𑀸.

𑁯. 𑀏𑀢𑁂𑀘 𑀜𑁆𑀜𑁂𑀘 𑀪𑀽𑀧𑀸𑀮, 𑀲𑀢𑁆𑀢𑀸𑀦𑀁 𑀪𑀬 𑀫𑀸𑀕𑀢𑁂;

𑀭𑀓𑁆𑀔𑀺𑀢𑀼𑀁 𑀦𑁂𑀯 𑀲𑀓𑁆𑀓𑁄𑀦𑁆𑀢𑀺, 𑀳𑀺𑀢𑁆𑀯𑀸𑀦 𑀲𑀭𑀡𑀢𑁆𑀢𑀬𑀁.

𑁧𑁦. 𑀅𑀕𑀸𑀳𑀁 𑀩𑀼𑀤𑁆𑀥𑀁 𑀲𑀭𑀡𑀁, 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁧. 𑀅𑀕𑀸𑀳𑀁 𑀥𑀫𑁆𑀫𑀁 𑀲𑀭𑀡𑀁, 𑀥𑀫𑁆𑀫𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁨. 𑀅𑀕𑀸𑀳𑀁 𑀲𑀗𑁆𑀖𑀁 𑀲𑀭𑀡𑀁, 𑀲𑀗𑁆𑀖𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁩. 𑀏𑀯𑀁 𑀫𑀳𑀸𑀦𑀼𑀪𑀸𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀁 𑀏𑀳𑀺𑀧𑀲𑁆𑀲𑀺𑀓𑀁;

𑀦𑀸𑀦𑁄 𑀧𑀤𑁆𑀤𑀯 𑀯𑀺𑀤𑁆𑀥𑀁𑀲𑀺𑀁, 𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁.

𑁧𑁪. 𑀲𑀭𑀡𑀢𑁆𑀢𑀬𑀜𑁆𑀳𑀺 𑀬𑁄 𑀲𑀢𑁆𑀢𑁄, 𑀦 𑀲𑀫𑀸𑀤𑀸𑀬 𑀕𑀡𑁆𑀳𑀢𑀺;

𑀇𑀥𑀯𑀸 𑀧𑀭𑀢𑁆𑀣𑀯𑀸 𑀮𑁄𑀓𑁂, 𑀲𑁄 𑀲𑀼𑀔𑀁 𑀦𑀸𑀦𑀼𑀪𑁄𑀲𑁆𑀲𑀢𑀺.

𑁧𑁫. 𑀲𑀭𑀡𑀢𑁆𑀢𑀬𑀜𑁆𑀳𑀺 𑀬𑁄 𑀲𑀢𑁆𑀢𑁄, 𑀲𑀼𑀲𑀫𑀸𑀤𑀸𑀬 𑀕𑀡𑁆𑀳𑀢𑀺;

𑀇𑀥𑀯𑀸𑀧𑀭𑀢𑁆𑀣𑀯𑀸 𑀮𑁄𑀓𑁂, 𑀲𑁄 𑀲𑀼𑀔𑀸 𑀦 𑀯𑀺𑀳𑀸𑀬𑀢𑀺.

𑁧𑁬. 𑀢𑀲𑁆𑀫𑀸 𑀢𑀼𑀯𑀫𑁆𑀧𑀺 𑀪𑀽𑀧𑀸𑀮, 𑀕𑀡𑁆𑀳𑀸𑀳𑀺 𑀲𑀭𑀡𑀢𑁆𑀢𑀬𑀁;

𑀢𑀁 𑀢𑁂 𑀪𑀯𑀢𑀺 𑀲𑀩𑁆𑀩𑀢𑁆𑀣, 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀫𑀸𑀦𑀲𑁄 𑀢𑀁 𑀔𑀫𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀅𑀚𑁆𑀚𑀧𑁆𑀧𑀝𑁆𑀞𑀸𑀬 𑀢𑁆𑀯𑀁 𑀫𑀫 𑀫𑀸𑀢𑀸𑀢𑀺 𑀢𑀁 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀡 𑀫𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀞𑀺𑀢𑀫𑀳𑀸𑀚𑀦𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀲𑀭𑀡𑁂𑀲𑀼𑀘 𑀲𑀻𑀮𑁂𑀲𑀼𑀘 𑀧𑀢𑀺𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸𑀢𑀺.

𑁧𑁭. 𑀇𑀢𑀺 𑀲𑀭𑀡𑀯𑀭𑀁 𑀲𑀸 𑀓𑁂𑀯𑀮𑀁 𑀉𑀕𑁆𑀕𑀳𑁂𑀢𑁆𑀯𑀸,

𑀚𑀮𑀺𑀢𑀤𑀳𑀦𑀫𑀚𑁆𑀛𑁂 𑀲𑀻𑀢𑀺𑀪𑀸𑀯𑀁 𑀅𑀮𑀢𑁆𑀣;

𑀧𑀭𑀫𑀲𑀭𑀡𑀲𑀻𑀮𑀁 𑀧𑀸𑀮𑀬𑀦𑁆𑀢𑀸 𑀓𑀣𑀁 𑀯𑁄,

𑀦 𑀮𑀪𑀣 𑀪𑀯𑀪𑁄𑀕𑀁 𑀦𑀺𑀩𑁆𑀩𑀼𑀢𑀺𑀜𑁆𑀘𑀸𑀧𑀺 𑀅𑀦𑁆𑀢𑁂𑀢𑀺.

𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀧 𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.