𑁧𑁦. 𑀭𑀽𑀧𑀤𑁂𑀯𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀢𑀻𑀢𑁂 𑀓𑀺𑀭 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀲𑁆𑀫𑀺𑀁 𑀦𑀕𑀭𑁂 𑀏𑀓𑀸 𑀕𑀸𑀫𑀤𑀸𑀭𑀺𑀓𑀸 𑀯𑀺𑀳𑀸𑀭𑁂 𑀆𑀳𑀺𑀡𑁆𑀟𑀦𑁆𑀢𑀻 𑀏𑀓𑀁 𑀕𑀺𑀮𑀸𑀦𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀦𑁆𑀢𑁂 𑀓𑁄𑀢𑁂 𑀆𑀩𑀸𑀥𑁄 𑀲𑀭𑀻𑀭𑀁 𑀧𑀻𑀴𑁂𑀢𑀻𑀢𑀺 𑀧𑀼𑀘𑁆𑀙𑀺. 𑀢𑁂𑀦𑀸𑀧𑀺 𑀪𑀕𑀺𑀦𑀺 𑀔𑀭𑀸𑀩𑀸𑀥𑁄 𑀫𑁂 𑀧𑀻𑀴𑁂𑀢𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀢𑁂𑀦𑀳𑀺 𑀪𑀦𑁆𑀢𑁂 𑀅𑀳𑀁 𑀢𑀁 𑀭𑁄𑀕𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀓𑀣𑁂𑀢𑁆𑀯𑀸 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑀸 𑀧𑀼𑀦 𑀤𑀺𑀯𑀲𑁂 𑀦𑀸𑀦𑀕𑁆𑀕𑀭𑀲𑁂𑀦 𑀪𑁂𑀲𑀚𑁆𑀚𑀸𑀳𑀸𑀭𑀁 𑀲𑀫𑁆𑀧𑀸𑀤𑁂𑀲𑀺, 𑀢𑀢𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀦𑀤𑀺𑀯𑀲𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀣𑁂𑀭𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀢𑀁 𑀆𑀳𑀸𑀭𑁂𑀦 𑀲𑀸𑀥𑀼𑀓𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑀸𑀭 𑀫𑀓𑀸𑀲𑀺. 𑀅𑀣𑀲𑁆𑀲𑀸 𑀲𑀤𑁆𑀥𑀸𑀩𑀮𑁂𑀦 𑀪𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀲𑁄 𑀆𑀩𑀸𑀥𑁄 𑀯𑀽𑀧𑀲𑀫𑀺. 𑀢𑀢𑁄 𑀲𑁄 𑀯𑀽𑀧𑀲𑀦𑁆𑀢𑀭𑁄𑀕𑁄 𑀤𑀼𑀢𑀺𑀬𑀤𑀺𑀯𑀲𑁂 𑀢𑀲𑁆𑀲𑀸 𑀕𑁂𑀳𑀁 𑀦𑀸 𑀕𑀫𑀸𑀲𑀺. 𑀅𑀣 𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀲𑁆𑀫𑀸𑀦𑀸𑀕𑀢𑀢𑁆𑀣𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀫𑁂 𑀪𑀕𑀺𑀦𑀺 𑀩𑁆𑀬𑀸𑀥𑀺 𑀯𑀽𑀧𑀲𑀫𑀺, 𑀢𑀲𑁆𑀫𑀸 𑀦𑀸𑀕𑀢𑁄𑀲𑁆𑀫𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀲𑀸𑀥𑀼 𑀪𑀦𑁆𑀢𑁂𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀢𑀢𑁆𑀣 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀢𑀢𑁆𑀣 𑀤𑁂𑀯𑀺𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑀻 𑀙𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀉𑀤𑀺𑀘𑁆𑀘𑀩𑁆𑀭𑀳𑁆𑀫𑀡𑀓𑀼𑀮𑁂 𑀚𑁂𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀲𑀸 𑀧𑀭𑀺𑀧𑀸𑀓 𑀫𑀦𑁆𑀯𑀸𑀬 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀝𑁆𑀞𑀝𑁆𑀞𑀦𑀸𑀮𑀺𑀫𑀢𑁆𑀢𑀁 𑀢𑀡𑁆𑀟𑀼𑀮𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀸 𑀫𑀸𑀢𑀸𑀧𑀺𑀢𑀭𑁄 𑀭𑀽𑀧𑀤𑁂𑀯𑀻𑀢𑀺 𑀦𑀸𑀫 𑀫𑀓𑀁𑀲𑀼. 𑀧𑀘𑁆𑀙𑀸 𑀢𑀁 𑀧𑀢𑀺𑀭𑀽𑀧𑁂𑀦 𑀤𑀸𑀭𑀓𑁂𑀦 𑀦𑀺𑀬𑁄𑀚𑁂𑀲𑀼𑀁. 𑀅𑀣𑀲𑁆𑀲𑀸 𑀢𑀡𑁆𑀟𑀼𑀮- 𑀦𑀸𑀮𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑀺𑀢𑀼𑀁 𑀆𑀭𑀤𑁆𑀥𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀚 𑀲𑀧𑁆𑀧𑀺𑀦𑀯𑀦𑀻𑀢𑀤𑀥𑀺𑀔𑀻𑀭𑀸𑀤𑀺𑀕𑁄𑀭𑀲𑀜𑁆𑀘 𑀚𑀻𑀭𑀫𑀭𑀺𑀘𑀸𑀤𑀺𑀓𑀝𑀼𑀓𑀪𑀡𑁆𑀟𑀜𑁆𑀘 𑀓𑀤𑀮𑀺𑀧𑀦𑀲𑀫𑀥𑀼𑀕𑀼𑀴𑀸𑀤𑀺𑀉𑀧𑀓𑀭𑀡𑀜𑁆𑀘 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀸𑀬 𑀳𑀢𑁆𑀣𑁂𑀦 𑀕𑀳𑀺𑀢𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁𑀯𑀸 𑀧𑀽𑀢𑀺𑀪𑀸𑀯𑀁 𑀦 𑀕𑀘𑁆𑀙𑀢𑀺, 𑀪𑀢𑁆𑀢𑀼𑀓𑁆𑀔𑀮𑀺𑀁 𑀕𑀳𑁂𑀢𑁆𑀯𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀪𑁄𑀚𑁂𑀦𑁆𑀢𑀺𑀬𑀸𑀧𑀺 𑀏𑀓𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀕𑀳𑀺𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀅𑀧𑀭𑀺𑀓𑁆𑀔𑀬𑀧𑀼𑀜𑁆𑀜𑀸 𑀅𑀳𑁄𑀲𑀺, 𑀲𑀓𑀮𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀘𑀦𑁆𑀤𑀲𑀼𑀭𑀺𑀬𑀸𑀯 𑀧𑀸𑀓𑀝𑀸 𑀅𑀳𑁄𑀲𑀺, 𑀅𑀣 𑀲𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀁 𑀲𑀓𑀦𑀺𑀯𑁂𑀲𑀦𑁂𑀬𑁂𑀯 𑀪𑁄𑀚𑁂𑀢𑀺, 𑀢𑀤𑀸 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀦𑀸𑀫 𑀇𑀫𑀺𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀦 𑀚𑀸𑀦𑀸𑀢𑀺 𑀏𑀲𑀸 𑀅𑀢𑁆𑀣𑀦𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁. 𑀬𑀦𑁆𑀦𑀽𑀦𑀸𑀳𑀁 𑀅𑀲𑁆𑀲𑀸 𑀧𑀓𑀸𑀲𑁂𑀬𑁆𑀬𑀦𑁆𑀢𑀺 𑀏𑀓𑀤𑀺𑀯𑀲𑀁 𑀢𑀲𑁆𑀲𑀸 𑀦𑀺𑀯𑁂𑀲𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀚𑀸𑀦𑀸𑀲𑀺 𑀪𑀕𑀺𑀦𑀺 𑀢𑀬𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀦𑁆𑀢𑀺 𑀧𑀼𑀘𑁆𑀙𑀺, 𑀦 𑀚𑀸𑀦𑀸𑀫𑀺 𑀪𑀦𑁆𑀢𑁂. 𑀲𑁄𑀢𑀼𑀫𑀺𑀘𑁆𑀙𑀸𑀫𑀻𑀢𑀺, 𑀅𑀣𑀲𑁆𑀲𑀸 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀓𑀸𑀲𑁂𑀦𑁆𑀢𑁄.

𑁧. 𑀏𑀓𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂,

𑀯𑀺𑀧𑀲𑁆𑀲𑀻𑀦𑀸𑀫 𑀦𑀸𑀬𑀓𑁄;

𑀅𑀳𑁄𑀲𑀺 𑀮𑁄𑀓𑁂 𑀮𑁄𑀓𑁂𑀓,

𑀦𑀸𑀬𑀓𑁄 𑀙𑀺𑀦𑁆𑀦𑀩𑀦𑁆𑀥𑀦𑁄.

𑁨. 𑀢𑀤𑀸 𑀢𑀲𑁆𑀫𑀺𑀁 𑀧𑀼𑀭𑁂 𑀭𑀫𑁆𑀫𑁂, 𑀆𑀲𑀺 𑀢𑁆𑀯𑀁 𑀕𑀸𑀫𑀤𑀸𑀭𑀺𑀓𑀸;

𑀆𑀳𑀺𑀡𑁆𑀟𑀦𑁆𑀢𑀻 𑀯𑀺𑀳𑀸𑀭𑀲𑁆𑀫𑀺𑀁, 𑀅𑀤𑁆𑀤𑀓𑁆𑀔𑀺 𑀚𑀺𑀦𑀲𑀸𑀯𑀓𑀁.

𑁩. 𑀭𑁄𑀕𑀸𑀢𑀼𑀭𑀁 𑀓𑀺𑀲𑀁 𑀧𑀡𑁆𑀟𑀼𑀁, 𑀅𑀲𑁆𑀲𑀲𑀦𑁆𑀢𑀁 𑀫𑀼𑀳𑀼𑀁 𑀫𑀼𑀳𑀼𑀁;

𑀤𑀺𑀲𑁆𑀯𑀸𑀦 𑀓𑀫𑁆𑀧𑀺𑀢𑀸 𑀘𑀺𑀢𑁆𑀢𑀸, 𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀢𑀁 𑀫𑀼𑀦𑀺𑀁.

𑁪. 𑀪𑁂𑀲𑀚𑁆𑀚𑀜𑁆𑀘𑁂𑀯 𑀪𑀢𑁆𑀢𑀜𑁆𑀘, 𑀅𑀤𑀸 𑀢𑁆𑀯𑀁 𑀢𑁂𑀦 𑀲𑁄 𑀬𑀢𑀺;

𑀅𑀩𑁆𑀬𑀸𑀩𑀸𑀥𑁄 𑀅𑀦𑀻𑀖𑁄𑀘, 𑀅𑀳𑁄𑀲𑀺 𑀅𑀦𑀼𑀧𑀤𑁆𑀤𑀯𑁄.

𑁫. 𑀢𑀢𑁄 𑀢𑁆𑀯𑀁 𑀢𑁂𑀦 𑀓𑀫𑁆𑀫𑁂𑀦, 𑀲𑀼𑀓𑀢𑁂𑀦 𑀢𑀢𑁄 𑀘𑀼𑀢𑀸;

𑀚𑀸𑀢𑀸𑀲𑀺 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁬. 𑀢𑀢𑁆𑀣 𑀢𑁂 𑀧𑀼𑀜𑁆𑀜𑀢𑁂𑀚𑁂𑀦, 𑀧𑀸𑀲𑀸𑀤𑁄 𑀭𑀢𑀦𑀸𑀫𑀬𑁄;

𑀫𑀡𑀺𑀣𑀽𑀧𑀺𑀲𑀢𑀸𑀓𑀺𑀡𑁆𑀡𑁄, 𑀓𑀽𑀝𑀸𑀕𑀸𑀭𑁂𑀳𑀺 𑀮𑀗𑁆𑀓𑀢𑁄.

𑁭. 𑀦𑁂𑀓𑀕𑀩𑁆𑀪𑀲𑀢𑀸𑀓𑀺𑀡𑁆𑀡𑁄, 𑀲𑀬𑀦𑀸𑀲𑀦𑀫𑀡𑁆𑀟𑀺𑀢𑁄;

𑀅𑀘𑁆𑀙𑀭𑀸𑀲𑀢𑀲𑀁𑀓𑀺𑀡𑁆𑀡𑁄, 𑀦𑀘𑁆𑀘𑀕𑀻𑀢𑀸𑀤𑀺𑀲𑀁𑀓𑀼𑀮𑁄.

𑁮. 𑀭𑀫𑁆𑀪𑀸𑀫𑁆𑀩𑀚𑀫𑁆𑀩𑀼𑀲𑀦𑁆𑀦𑀻𑀭, 𑀧𑀽𑀕𑀧𑀼𑀦𑁆𑀦𑀸𑀕𑀧𑀸𑀝𑀮𑀻;

𑀦𑀸𑀕𑀸𑀤𑀺𑀢𑀭𑀼𑀲𑀡𑁆𑀟𑁂𑀳𑀺, 𑀫𑀡𑁆𑀟𑀺𑀢𑀼𑀬𑁆𑀬𑀸𑀦𑀧𑀦𑁆𑀢𑀺𑀳𑀺.

𑁯. 𑀧𑀤𑀼𑀫𑀼𑀧𑁆𑀧𑀮𑀓𑀴𑀸𑀭, 𑀓𑀼𑀦𑁆𑀤𑀓𑀸𑀦𑀦𑀫𑀡𑁆𑀟𑀺𑀢𑁂;

𑀫𑀥𑀼𑀫𑀢𑁆𑀢𑀸𑀮𑀺𑀧𑀸𑀮𑀻𑀳𑀺, 𑀲𑀸𑀭𑀲𑀻𑀲𑀭𑀲𑀁𑀓𑀼𑀮𑁂.

𑁧𑁦. 𑀤𑁂𑀯𑀧𑀼𑀢𑁆𑀢𑁂𑀳𑀺 𑀦𑁂𑀓𑁂𑀳𑀺, 𑀢𑀣𑀸 𑀤𑁂𑀯𑀘𑁆𑀙𑀭𑀸𑀳𑀺𑀘;

𑀦𑀺𑀘𑁆𑀘𑀼𑀲𑁆𑀲𑀯𑁂 𑀫𑀳𑀸𑀪𑁄𑀕𑁂, 𑀯𑀺𑀫𑀸𑀦𑁂 𑀫𑀦𑀦𑀦𑁆𑀤𑀦𑁂.

𑁧𑁧. 𑀢𑁆𑀯𑀫𑁂𑀯𑀁 𑀤𑁂𑀯𑀮𑁄𑀓𑀫𑁆𑀳𑀺, 𑀯𑀺𑀦𑁆𑀤𑀫𑀸𑀦𑀸 𑀫𑀳𑀸𑀬𑀲𑀁;

𑀅𑀤𑁆𑀥𑀸𑀦𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑁂 𑀕𑁄𑀢𑀫𑁂 𑀚𑀺𑀦𑁂.

𑁧𑁨. 𑀚𑀫𑁆𑀩𑀼𑀤𑀻𑀧𑁂 𑀇𑀤𑀸𑀦𑀺 𑀢𑁆𑀯𑀁, 𑀦𑀺𑀩𑁆𑀩𑀢𑁆𑀢𑀸 𑀉𑀤𑀺𑀢𑁂 𑀓𑀼𑀮𑁂;

𑀧𑀼𑀜𑁆𑀜𑀧𑀜𑁆𑀜𑀸𑀕𑀼𑀡𑀸𑀯𑀸𑀲𑀸, 𑀭𑀽𑀧𑁂𑀦𑀕𑁆𑀕𑀸 𑀧𑀺𑀬𑀁𑀯𑀤𑀸.

𑁧𑁩. 𑀏𑀢𑀁 𑀢𑁂 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀤𑁂𑀯𑀺𑀲𑁆𑀲𑀭𑀺𑀬𑀫𑀩𑁆𑀪𑀼𑀢𑀁,

𑀇𑀫𑀁 𑀢𑁂 𑀇𑀥 𑀮𑁄𑀓𑀲𑁆𑀫𑀺𑀁, 𑀲𑀩𑁆𑀩𑀁 𑀫𑀸𑀦𑀼𑀲𑀺𑀓𑀁 𑀲𑀼𑀔𑀁.

𑁧𑁪. 𑀯𑀺𑀧𑀲𑁆𑀲𑀺𑀫𑀼𑀦𑀺𑀦𑁄 𑀓𑀸𑀮𑁂, 𑀢𑁆𑀯𑀁 𑀢𑀲𑁆𑀲𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀤𑀸 𑀤𑀸𑀦𑀁 𑀕𑀺𑀮𑀸𑀦𑀲𑁆𑀲, 𑀢𑀲𑁆𑀲 𑀢𑀁 𑀨𑀮𑀫𑀻𑀤𑀺𑀲𑀁.

𑁧𑁫. 𑀓𑀸𑀢𑀩𑁆𑀩𑀜𑁆𑀳𑀺 𑀲𑀤𑀸 𑀧𑀼𑀜𑁆𑀜𑀁, 𑀇𑀘𑁆𑀙𑀦𑁆𑀢𑁂𑀦 𑀲𑀼𑀔𑀧𑁆𑀧𑀤𑀁;

𑀢𑀲𑁆𑀫𑀸 𑀢𑁆𑀯𑀁 𑀲𑀩𑁆𑀩𑀤𑀸 𑀪𑀤𑁆𑀤𑁂, 𑀉𑀲𑁆𑀲𑀼𑀓𑁆𑀓𑀸 𑀓𑀼𑀲𑀮𑁂 𑀪𑀯𑀸𑀢𑀺.

𑀏𑀯𑀁 𑀲𑁄 𑀢𑀲𑁆𑀲 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑁂 𑀅𑀧𑁆𑀧𑀫𑀸𑀤𑀸 𑀪𑀯𑀸𑀢𑀺 𑀅𑀦𑀼𑀲𑀸𑀲𑀺. 𑀲𑀸 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀭𑀫𑀲𑁄𑀫𑀦𑀲𑁆𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀲𑀼 𑀦𑀺𑀭𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀳𑁄𑀲𑀻𑀢𑀺.

𑁧𑁬. 𑀇𑀢𑀺 𑀢𑀭𑀼𑀡𑀓𑀼𑀫𑀸𑀭𑀻 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀲𑀸𑀭𑀁,

𑀅𑀯𑀺𑀤𑀺𑀢𑀕𑀼𑀡𑀫𑀢𑁆𑀢𑀸 𑀤𑀢𑁆𑀯 𑀪𑀺𑀓𑁆𑀔𑀼𑀲𑁆𑀲 𑀤𑀸𑀦𑀁;

𑀤𑀺𑀯𑀺𑀫𑀦𑀼𑀚𑀲𑀼𑀔𑀁 𑀲𑀸𑀮𑀢𑁆𑀣 𑀢𑀼𑀫𑁆𑀳𑁂 𑀪𑀯𑀦𑁆𑀢𑀸,

𑀯𑀺𑀤𑀺𑀢𑀓𑀼𑀲𑀮𑀧𑀸𑀓𑀸 𑀓𑀺𑀁 𑀦 𑀮𑀩𑁆𑀪𑁂𑀣 𑀲𑀦𑁆𑀢𑀺𑀁.

𑀭𑀽𑀧𑀤𑁂𑀯𑀺𑀬𑀸 𑀯𑀢𑁆𑀣𑀼𑀁 𑀤𑀲𑀫𑀁.

𑀥𑀫𑁆𑀫𑀲𑁄𑀡𑁆𑀟𑀓𑀯𑀕𑁆𑀕𑁄 𑀧𑀣𑀫𑁄.