𑀆𑀲𑀻𑀯𑀺𑀲𑀯𑀕𑁆𑀕

𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀆𑀲𑀻𑀯𑀺𑀲𑀯𑀕𑁆𑀕𑁂 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀘𑀢𑀼𑀢𑁆𑀣𑀁 𑀲𑀁𑀕𑀻𑀢𑀁 𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀅𑀫𑁆𑀳𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸.

𑀉𑀧𑀘𑀸𑀭𑀯𑀘𑀦𑀁

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀪𑀕𑀯𑀢𑀸 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀉𑀧𑀘𑀸𑀭𑀯𑀘𑀦𑀸𑀦𑀁 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀑𑀭𑀺𑀫𑀁 𑀢𑀻𑀭𑀦𑁆𑀢𑀺 𑀔𑁄 𑀪𑀺𑀓𑁆𑀔𑀼 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺 𑀔𑁄 𑀪𑀺𑀓𑁆𑀔𑀼 𑀙𑀦𑁆𑀦𑁂𑀢𑀁 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀫𑀚𑁆𑀛𑁂 𑀲𑀁𑀲𑀻𑀤𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀣𑀮𑁂 𑀉𑀲𑁆𑀲𑀸𑀤𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀅𑀲𑁆𑀫𑀺𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀉𑀧𑀘𑀸𑀭𑀯𑀘𑀦𑀸𑀦𑀁 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 𑀔𑁄 𑀧𑀦 𑀆𑀯𑀼𑀲𑁄 𑀲𑀼𑀢𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑁂 𑀯𑀺𑀲𑁂𑀲𑀢𑁄 𑀓𑀲𑁆𑀲 𑀓𑀻𑀤𑀺𑀲𑁄 𑀅𑀢𑁆𑀣𑁄 𑀓𑀣𑀜𑁆𑀘 𑀧𑀝𑀺𑀮𑀤𑁆𑀥𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀲𑁆𑀫𑀺𑀁 𑀪𑀦𑁆𑀢𑁂 𑀲𑀼𑀢𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑁂 𑀯𑀺𑀲𑁂𑀲𑀢𑁄 𑀦𑀦𑁆𑀤𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀬𑀸𑀯 𑀅𑀭𑀳𑀢𑁆𑀢𑀸𑀘 𑀯𑀺𑀲𑁂𑀲𑀢𑁄 𑀅𑀢𑁆𑀣𑁄 𑀅𑀥𑀺𑀕𑀢𑁄.

𑀮𑀪𑁂𑀬𑁆𑀬𑀸𑀳𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤𑀁.

𑀢𑁂𑀦 𑀳𑀺 𑀢𑁆𑀯𑀁 𑀦𑀦𑁆𑀤 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀳𑀺.

𑀕𑀫𑀺𑀲𑁆𑀲𑀦𑁆𑀢𑀺 𑀪𑀦𑁆𑀢𑁂 𑀕𑀸𑀯𑁄 𑀯𑀘𑁆𑀙𑀕𑀺𑀤𑁆𑀥𑀺𑀦𑀺𑀬𑁄.

𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀅𑀝𑁆𑀞𑀫𑀁 𑀲𑀁𑀕𑀻𑀢𑀁 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀅𑀜𑁆𑀜𑀢𑀭𑀁 𑀓𑀸𑀭𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀓𑀸𑀭𑀓𑁄 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀔𑀸𑀡𑀸𑀲𑀯𑁂 𑀪𑀺𑀓𑁆𑀔𑀽 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀦𑁆𑀢𑀼𑀝𑁆𑀞𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀧𑀼𑀭𑀺𑀲𑀲𑁆𑀲 𑀓𑀺𑀁𑀲𑀼𑀓𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀅𑀲𑁆𑀲, 𑀲𑁄 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀅𑀭𑀼𑀕𑀢𑁆𑀢𑁄 𑀧𑀓𑁆𑀓𑀕𑀢𑁆𑀢𑁄 𑀲𑀭𑀯𑀦𑀁 𑀧𑀯𑀺𑀲𑁂𑀬𑁆𑀬𑀸’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀪𑀕𑀯𑀢𑀸 𑀅𑀲𑀁𑀯𑀭𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀅𑀲𑀁𑀯𑀭𑁄 𑀳𑁄𑀢𑀺, 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀅𑀲𑀁𑀯𑀭𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀪𑀕𑀯𑀢𑀸 𑀲𑀁𑀯𑀭𑁄 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀲𑀁𑀯𑀭𑁄 𑀳𑁄𑀢𑀺, 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀻𑀢𑀺, 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀲𑀁𑀯𑀭𑁄 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑀺𑀢𑁄.