𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢

𑀕𑀸𑀭𑀯𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑁂 𑀆𑀯𑀼𑀲𑁄 𑀧𑁄𑀭𑀸𑀡𑁂𑀳𑀺 𑀫𑀳𑀸𑀓𑀲𑁆𑀲𑀧𑀣𑁂𑀭𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑀯𑀭𑁂𑀳𑀺 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀕𑀸𑀭𑀯𑀲𑀼𑀢𑁆𑀢𑀁 𑀓𑀢𑁆𑀣 𑀓𑀣𑀜𑁆𑀘 𑀲𑀫𑀼𑀧𑁆𑀧𑀦𑁆𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀭𑀼𑀯𑁂𑀮𑀸𑀬𑀁 𑀪𑀦𑁆𑀢𑁂 𑀲𑀫𑀼𑀧𑁆𑀧𑀦𑁆𑀦𑀁. 𑀪𑀕𑀯𑀸 𑀪𑀦𑁆𑀢𑁂 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀓𑀁 𑀦𑀼 𑀔𑁆𑀯𑀸𑀳𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀪𑀦𑁆𑀢𑁂 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 ‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼𑀁, 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸

𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼𑀁.

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲;

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲;

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲.

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀬𑁆𑀯𑀸𑀬𑀁 𑀥𑀫𑁆𑀫𑁄 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑁄 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀉𑀧𑁆𑀧𑀦𑁆𑀦𑀁.

𑀬𑁂 𑀘 𑀅𑀢𑀻𑀢𑀸 𑀲𑀫𑁆𑀩𑀼𑀤𑁆𑀥𑀸, 𑀬𑁂 𑀘 𑀩𑀼𑀤𑁆𑀥𑀸 𑀅𑀦𑀸𑀕𑀢𑀸;

𑀬𑁄 𑀘𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀩𑀳𑀽𑀦𑀁 𑀲𑁄𑀓𑀦𑀸𑀲𑀦𑁄;

𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘;

𑀢𑀣𑀸𑀧𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦 𑀥𑀫𑁆𑀫𑀢𑀸.

𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦, 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

𑀅𑀜𑁆𑀜𑀭𑀢𑀩𑁆𑀭𑀳𑁆𑀫𑀲𑀼𑀢𑁆𑀢

𑀧𑀼𑀘𑁆𑀙𑀸- 𑀢𑀢𑁆𑀣𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑀯𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀸𑀦𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑀲𑁆𑀲 𑀪𑀦𑁆𑀢𑁂 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 ‘‘𑀦𑀢𑁆𑀣𑀺 𑀲𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀅𑀚𑁆𑀚𑀸𑀧𑀺 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀦𑁆𑀢𑀺;

𑀏𑀯𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀅𑀚𑁆𑀚𑀸𑀧𑀺 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁-𑀳𑀼𑁋

𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁆𑀯𑀸𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄 𑀳𑀼𑁋

𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬 𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸-𑀳𑀼𑁋

𑀅𑀭𑀼𑀡𑀯𑀢𑀻𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀭𑀸𑀚𑀸 𑀅𑀳𑁄𑀲𑀺 𑀅𑀭𑀼𑀡𑀯𑀸 𑀦𑀸𑀫. 𑀭𑀜𑁆𑀜𑁄 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀅𑀭𑀼𑀡𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀅𑀭𑀼𑀡𑀯𑀢𑀻 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁.

𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄;

𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺 𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺-𑀳𑀼𑁋