𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀧𑀸𑀴𑀺

𑀓𑀦𑁆𑀤𑀭𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀦𑁆𑀤𑀭𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀫𑁆𑀧𑀸𑀬𑀁 𑀪𑀦𑁆𑀢𑁂 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀧𑁂𑀲𑁆𑀲𑀜𑁆𑀘 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑀁 𑀓𑀦𑁆𑀤𑀭𑀓𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀓𑀦𑁆𑀤𑀭𑀓𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀡𑁆𑀡𑀁 𑀅𑀪𑀸𑀲𑀺, 𑀧𑁂𑀲𑁆𑀲𑁄 𑀘 𑀪𑀦𑁆𑀢𑁂 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄 𑀪𑀕𑀯𑀢𑁄 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀯𑀡𑁆𑀡𑀁 𑀅𑀪𑀸𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀏𑀯𑀁 𑀔𑁄 𑀆𑀯𑀼𑀲𑁄 𑀓𑀦𑁆𑀤𑀭𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀪𑀺𑀧𑁆𑀧𑀲𑀦𑁆𑀦𑁂𑀦 𑀯𑀡𑁆𑀡𑁂 𑀪𑀸𑀲𑀺𑀢𑁂 𑀓𑀣𑀁 𑀪𑀕𑀯𑀸 𑀢𑀁 𑀲𑀫𑀦𑀼𑀚𑀸𑀦𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀭𑀫𑁆𑀪𑀁 𑀆𑀭𑀪𑀺, 𑀓𑀣𑀜𑁆𑀘 𑀧𑁂𑀲𑁆𑀲𑁄 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄 𑀪𑀕𑀯𑀢𑁄 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀯𑀡𑁆𑀡𑀁 𑀅𑀪𑀸𑀲𑀺, 𑀓𑀣𑀜𑁆𑀘 𑀧𑁂𑀲𑁆𑀲𑀲𑁆𑀲 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀔𑁄 𑀪𑀦𑁆𑀢𑁂 𑀓𑀦𑁆𑀤𑀭𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀪𑀺𑀧𑁆𑀧𑀲𑀦𑁆𑀦𑁂𑀦 𑀯𑀡𑁆𑀡𑁂 𑀪𑀸𑀲𑀺𑀢𑁂 ‘‘𑀏𑀯𑀫𑁂𑀢𑀁 𑀓𑀦𑁆𑀤𑀭𑀓 𑀏𑀯𑀫𑁂𑀢𑀁 𑀓𑀦𑁆𑀤𑀭𑀓’’ 𑀏𑀯𑀫𑀸𑀤𑀺𑀦𑀸 𑀪𑀕𑀯𑀸 𑀢𑀁 𑀲𑀫𑀦𑀼𑀚𑀸𑀦𑀺𑀢𑁆𑀯𑀸 ‘‘𑀲𑀦𑁆𑀢𑀺 𑀳𑀺 𑀓𑀦𑁆𑀤𑀭𑀓 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀥𑀫𑁆𑀫𑀤𑁂𑀲𑀦𑀁 𑀲𑀫𑀸𑀭𑀪𑀺. 𑀅𑀣 𑀔𑁄 𑀪𑀦𑁆𑀢𑁂 𑀧𑁂𑀲𑁆𑀲𑁄 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄 ‘‘𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀪𑀦𑁆𑀢𑁂 𑀪𑀕𑀯𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑁄 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀯𑀡𑁆𑀡𑀁 𑀅𑀪𑀸𑀲𑀺, 𑀪𑀕𑀯𑀸𑀧𑀺 𑀪𑀦𑁆𑀢𑁂 ‘‘𑀕𑀳𑀦𑀜𑁆𑀳𑁂𑀢𑀁 𑀧𑁂𑀲𑁆𑀲 𑀬𑀤𑀺𑀤𑀁 𑀫𑀦𑀼𑀲𑁆𑀲𑀸, 𑀉𑀢𑁆𑀢𑀸𑀦𑀓𑀜𑁆𑀳𑁂𑀢𑀁 𑀧𑁂𑀲𑁆𑀲 𑀬𑀤𑀺𑀤𑀁 𑀧𑀲𑀯𑁄’’𑀢𑀺𑀆𑀤𑀺𑀦𑀸 𑀧𑁂𑀲𑁆𑀲𑀲𑁆𑀲 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀓𑀣𑀁 𑀤𑁂𑀲𑁂𑀲𑀺.

𑀧𑀼𑀘𑁆𑀙𑀸 𑁋 𑀢𑀁 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑁂𑀲𑁆𑀲𑀲𑁆𑀲 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑀲𑁆𑀲 𑀓𑀻𑀤𑀺𑀲𑁄 𑀆𑀦𑀺𑀲𑀁𑀲𑁄 𑀅𑀥𑀺𑀕𑀢𑁄, 𑀓𑀣𑀜𑁆𑀘 𑀪𑀕𑀯𑀸 𑀢𑀁 𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀤𑁂𑀲𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀁, 𑀪𑀺𑀓𑁆𑀔𑀽𑀦𑀁 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀁 𑀔𑁄 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑁂𑀲𑁆𑀲𑀲𑁆𑀲 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑀲𑁆𑀲 𑀤𑁆𑀯𑁂 𑀆𑀦𑀺𑀲𑀁𑀲𑀸 𑀅𑀥𑀺𑀕𑀢𑀸 𑀲𑀗𑁆𑀖𑁂 𑀘 𑀧𑀲𑀸𑀤𑁄 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀡𑀽𑀧𑀸𑀬𑁄 𑀘 𑀅𑀪𑀺𑀦𑀯𑁄. 𑀪𑀕𑀯𑀸 𑀘 𑀪𑀦𑁆𑀢𑁂 𑀢𑀁 𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀤𑁂𑀲𑀦𑀁 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑁄 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀁. 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀯𑁂𑀴𑀼𑀯𑀕𑀸𑀫𑀓𑁂 𑀕𑀳𑀧𑀢𑀺𑀁 𑀅𑀝𑁆𑀞𑀓𑀦𑀸𑀕𑀭𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁. 𑀤𑀲𑀫𑁄 𑀪𑀦𑁆𑀢𑁂 𑀕𑀳𑀧𑀢𑀺 𑀅𑀝𑁆𑀞𑀓𑀦𑀸𑀕𑀭𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺 𑀦𑀼 𑀔𑁄 𑀪𑀦𑁆𑀢𑁂 𑀆𑀦𑀦𑁆𑀤 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄, 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀯𑀺𑀫𑀼𑀢𑁆𑀢𑀜𑁆𑀘𑁂𑀯 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀧𑀭𑀺𑀓𑁆𑀔𑀺𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀢𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀲𑁂𑀔𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀲𑁂𑀔𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀦𑁆𑀣𑀸𑀕𑀸𑀭𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀓𑀸𑀧𑀺𑀮𑀯𑀢𑁆𑀣𑀯𑁂 𑀲𑀓𑁆𑀬𑁂 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀕𑀯𑀸 𑀪𑀦𑁆𑀢𑁂 𑀓𑀸𑀧𑀺𑀮𑀯𑀢𑁆𑀣𑀯𑁂 𑀲𑀓𑁆𑀬𑁂 𑀩𑀳𑀼𑀤𑁂𑀯𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 ‘‘𑀧𑀝𑀺𑀪𑀸𑀢𑀼 𑀢𑀁 𑀆𑀦𑀦𑁆𑀤 𑀓𑀸𑀧𑀺𑀮𑀯𑀢𑁆𑀣𑀯𑀸𑀦𑀁 𑀲𑀓𑁆𑀬𑀸𑀦𑀁 𑀲𑁂𑀔𑁄 𑀧𑀸𑀝𑀺𑀧𑀤𑁄, 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑁄𑀢𑀮𑀺𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀧𑁄𑀢𑀮𑀺𑀬𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀪𑀦𑁆𑀢𑁂 𑀆𑀧𑀡𑁂 𑀦𑀸𑀫 𑀅𑀗𑁆𑀕𑀼𑀢𑁆𑀢𑀭𑀸𑀧𑀸𑀦𑀁 𑀦𑀺𑀕𑀫𑁂 𑀧𑁄𑀢𑀮𑀺𑀬𑀁 𑀕𑀳𑀧𑀢𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀓𑀫𑁆𑀫𑀦𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀧𑁄𑀢𑀮𑀺𑀬𑁄 𑀪𑀦𑁆𑀢𑁂 𑀕𑀳𑀧𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀓𑀫𑁆𑀫𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀪𑀕𑀯𑀢𑀸 𑀕𑀳𑀧𑀢𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀺𑀬𑀫𑀸𑀦𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀢𑀬𑀺𑀤𑀁 𑀪𑁄 𑀕𑁄𑀢𑀫 𑀦𑀘𑁆𑀙𑀦𑁆𑀦𑀁 𑀢𑀬𑀺𑀤𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀁 𑀫𑀁 𑀢𑁆𑀯𑀁 𑀕𑀳𑀧𑀢𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀲𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀪𑀕𑀯𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑁂𑀢𑁆𑀯𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀁 𑀤𑀲𑁆𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀣 𑀪𑀦𑁆𑀢𑁂 𑀪𑀕𑀯𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀸𑀬 𑀅𑀝𑁆𑀞 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀳𑀧𑀢𑀺 𑀓𑀼𑀓𑁆𑀓𑀼𑀭𑁄 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑁄 𑀕𑁄𑀖𑀸𑀢𑀓𑀲𑀽𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀲𑁆𑀲’’ 𑀏𑀯𑀫𑀸𑀤𑀺𑀦𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀁 𑀲𑀩𑁆𑀩𑁂𑀦𑀲𑀩𑁆𑀩𑀁 𑀲𑀩𑁆𑀩𑀣𑀸𑀲𑀩𑁆𑀩𑀁 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀁 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀚𑀻𑀯𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀚𑀻𑀯𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀚𑀻𑀯𑀓𑁄 𑀪𑀦𑁆𑀢𑁂 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀲𑀼𑀢𑀁 𑀫𑁂𑀢𑀁 𑀪𑀦𑁆𑀢𑁂 𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀪𑀦𑁆𑀢𑀺, 𑀢𑀁 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀺 𑀧𑀝𑀺𑀘𑁆𑀘 𑀓𑀫𑁆𑀫𑀦𑁆𑀢𑀺. 𑀬𑁂 𑀢𑁂 𑀪𑀦𑁆𑀢𑁂 𑀏𑀯𑀫𑀸𑀳𑀁𑀲𑀼 ‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀪𑀦𑁆𑀢𑀺, 𑀢𑀁 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀺 𑀧𑀝𑀺𑀘𑁆𑀘 𑀓𑀫𑁆𑀫’𑀦𑁆𑀢𑀺, 𑀓𑀘𑁆𑀘𑀺 𑀢𑁂 𑀪𑀦𑁆𑀢𑁂 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀉𑀧𑀸𑀮𑀺𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀉𑀧𑀸𑀮𑀺𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀴𑀦𑁆𑀤𑀸𑀬𑀁 𑀪𑀦𑁆𑀢𑁂 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀉𑀧𑀸𑀮𑀺 𑀪𑀦𑁆𑀢𑁂 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀆𑀕𑀫𑀸 𑀦𑀼𑀔𑁆𑀯𑀺𑀥 𑀪𑀦𑁆𑀢𑁂 𑀤𑀻𑀖𑀢𑀧𑀲𑁆𑀲𑀻 𑀦𑀺𑀕𑀡𑁆𑀞𑁄’’𑀢𑀺, 𑀏𑀯𑀫𑀸𑀤𑀺𑀦𑀸 𑀘 𑀪𑀦𑁆𑀢𑁂 𑀉𑀧𑀸𑀮𑀺 𑀕𑀳𑀧𑀢𑀺 𑀪𑀕𑀯𑀢𑁄 𑀧𑀝𑀺𑀲𑀦𑁆𑀥𑀸𑀭𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀯𑀸𑀤𑀁 𑀧𑀓𑀸𑀲𑁂𑀲𑀺, 𑀯𑀸𑀤𑀁 𑀯𑀡𑁆𑀡𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀣 𑀔𑁄 𑀆𑀯𑀼𑀲𑁄 𑀪𑀕𑀯𑀸 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀢𑀲𑁆𑀫𑀺𑀁 𑀯𑀸𑀤𑁂 𑀓𑀣𑀁 𑀲𑀫𑀦𑀼𑀬𑀼𑀜𑁆𑀚𑀻 𑀲𑀫𑀦𑀼𑀕𑀸𑀳𑀻 𑀲𑀫𑀦𑀼𑀪𑀸𑀲𑀻, 𑀓𑀣𑀜𑁆𑀘𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀪𑀽𑀢𑀁 𑀅𑀢𑁆𑀣𑀁 𑀜𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀣 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 ‘‘𑀲𑀘𑁂 𑀔𑁄 𑀢𑁆𑀯𑀁 𑀕𑀳𑀧𑀢𑀺 𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀬 𑀫𑀦𑁆𑀢𑁂𑀬𑁆𑀬𑀸𑀲𑀺, 𑀲𑀺𑀬𑀸 𑀦𑁄 𑀏𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 ‘‘𑀢𑀁 𑀓𑀺𑀁𑀫𑀜𑁆𑀜𑀲𑀺 𑀕𑀳𑀧𑀢𑀺, 𑀇𑀥𑀲𑁆𑀲 𑀦𑀺𑀕𑀡𑁆𑀞𑁄 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀜𑁆𑀳𑀕𑀺𑀮𑀸𑀦𑁄 𑀲𑀻𑀢𑁄𑀤𑀓𑀧𑀭𑀺𑀓𑁆𑀔𑀺𑀢𑁆𑀢𑁄 𑀉𑀡𑁆𑀳𑁄𑀤𑀓𑀧𑀝𑀺𑀲𑁂𑀯𑀻, 𑀲𑁄 𑀲𑀻𑀢𑁄𑀤𑀓𑀁 𑀅𑀮𑀪𑀫𑀸𑀦𑁄 𑀓𑀸𑀮𑀗𑁆𑀓𑀭𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀘𑀢𑁆𑀢𑀸𑀭𑁄 𑀉𑀧𑀸𑀬𑁂 𑀤𑀲𑁆𑀲𑁂𑀢𑁆𑀯𑀸 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀬𑀣𑀸𑀪𑀽𑀢𑀫𑀢𑁆𑀣𑀁 𑀜𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀏𑀯𑀁 𑀔𑁄 𑀆𑀯𑀼𑀲𑁄 𑀉𑀧𑀸𑀮𑀺 𑀕𑀳𑀧𑀢𑀺 𑀪𑀕𑀯𑀢𑀸 𑀲𑀜𑁆𑀜𑀸𑀧𑀺𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀁 𑀅𑀓𑀸𑀲𑀺, 𑀓𑀣𑀜𑁆𑀘 𑀪𑀕𑀯𑀸 𑀢𑀁 𑀧𑀼𑀦 𑀅𑀦𑀼𑀲𑀸𑀲𑀺𑀢𑁆𑀯𑀸 𑀉𑀢𑁆𑀢𑀭𑀺 𑀯𑀺𑀦𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀧𑀼𑀭𑀺𑀫𑁂𑀦𑁂𑀯𑀸𑀳𑀁 𑀪𑀦𑁆𑀢𑁂 𑀑𑀧𑀫𑁆𑀫𑁂𑀦 𑀪𑀕𑀯𑀢𑁄 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄, 𑀅𑀧𑀺𑀘𑀸𑀳𑀁 𑀇𑀫𑀸𑀦𑀺 𑀪𑀕𑀯𑀢𑁄 𑀯𑀺𑀘𑀺𑀢𑁆𑀭𑀸𑀦𑀺 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀺 𑀲𑁄𑀢𑀼𑀓𑀸𑀫𑁄, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀧𑀘𑁆𑀘𑀦𑀻𑀓𑀁 𑀓𑀸𑀢𑀩𑁆𑀩𑀁 𑀅𑀫𑀜𑁆𑀜𑀺𑀲𑁆𑀲’’𑀦𑁆𑀢𑀺, 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀉𑀧𑀸𑀮𑀺 𑀕𑀳𑀧𑀢𑀺 𑀪𑀕𑀯𑀢𑀸 𑀯𑀺𑀜𑁆𑀜𑀸𑀧𑀺𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀅𑀓𑀸𑀲𑀺. 𑀢𑀢𑁆𑀣 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀅𑀦𑀼𑀯𑀺𑀘𑁆𑀘𑀓𑀸𑀭𑀁 𑀔𑁄 𑀕𑀳𑀧𑀢𑀺 𑀓𑀭𑁄𑀳𑀺, 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀲𑀸𑀥𑀼 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀼𑀦 𑀅𑀦𑀼𑀲𑀸𑀲𑀺𑀢𑁆𑀯𑀸 𑀉𑀢𑁆𑀢𑀭𑀺 𑀬𑀸𑀯 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑀸 𑀯𑀺𑀦𑁂𑀲𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀆𑀯𑀻𑀫𑀁𑀲𑀦𑀸 𑀘 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀘𑁆𑀘𑀼𑀢𑁆𑀢𑀭𑀸 𑀓𑀣𑀸 𑀘 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀉𑀫𑁆𑀫𑀢𑁆𑀢𑁄𑀲𑀺 𑀢𑁆𑀯𑀁 𑀕𑀳𑀧𑀢𑀺 𑀤𑀢𑁆𑀢𑁄𑀲𑀺 𑀢𑁆𑀯𑀁 𑀕𑀳𑀧𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀯𑀻𑀫𑀁𑀲𑀸 𑀘 ‘‘𑀪𑀤𑁆𑀤𑀺𑀓𑀸 𑀪𑀦𑁆𑀢𑁂 𑀆𑀯𑀝𑁆𑀝𑀦𑀻𑀫𑀸𑀬𑀸 𑀓𑀮𑁆𑀬𑀸𑀡𑀻 𑀪𑀦𑁆𑀢𑁂 𑀆𑀯𑀝𑁆𑀝𑀦𑀻𑀫𑀸𑀬𑀸𑀢𑀺’’ 𑀏𑀯𑀫𑀸𑀤𑀺𑀦𑀸 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀘𑁆𑀘𑀼𑀢𑁆𑀢𑀭𑀓𑀣𑀸 𑀘 𑀅𑀳𑁄𑀲𑀺.

𑀥𑀻𑀭𑀲𑁆𑀲 𑀯𑀺𑀕𑀢𑀫𑁄𑀳𑀲𑁆𑀲,

𑀧𑀪𑀺𑀦𑁆𑀦𑀔𑀻𑀮𑀲𑁆𑀲 𑀯𑀺𑀚𑀺𑀢𑀯𑀺𑀚𑀬𑀲𑁆𑀲;

𑀅𑀦𑀻𑀖𑀲𑁆𑀲 𑀲𑀼𑀲𑀫𑀘𑀺𑀢𑁆𑀢𑀲𑁆𑀲,

𑀯𑀼𑀤𑁆𑀥𑀲𑀻𑀮𑀲𑁆𑀲 𑀲𑀸𑀥𑀼𑀧𑀜𑁆𑀜𑀲𑁆𑀲;

𑀯𑁂𑀲𑀫𑀦𑁆𑀢𑀭𑀲𑁆𑀲 𑀯𑀺𑀫𑀮𑀲𑁆𑀲,

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺𑀁.

𑀅𑀓𑀣𑀁 𑀓𑀣𑀺𑀲𑁆𑀲 𑀢𑀼𑀲𑀺𑀢𑀲𑁆𑀲,

𑀯𑀦𑁆𑀢𑀮𑁄𑀓𑀸𑀫𑀺𑀲𑀲𑁆𑀲 𑀫𑀼𑀤𑀺𑀢𑀲𑁆𑀲;

𑀓𑀢𑀲𑀫𑀡𑀲𑁆𑀲 𑀫𑀦𑀼𑀚𑀲𑁆𑀲,

𑀅𑀦𑁆𑀢𑀺𑀫𑀲𑀸𑀭𑀻𑀭𑀲𑁆𑀲 𑀦𑀭𑀲𑁆𑀲.

𑀅𑀦𑁄𑀧𑀫𑀲𑁆𑀲 𑀯𑀺𑀭𑀚𑀲𑁆𑀲,

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄 𑀳𑀫𑀲𑁆𑀫𑀺 𑁋

𑀢𑀡𑁆𑀳𑀘𑁆𑀙𑀺𑀤𑀲𑁆𑀲 𑀩𑀼𑀤𑁆𑀥𑀲𑁆𑀲,

𑀯𑀻𑀢𑀥𑀽𑀫𑀲𑁆𑀲 𑀅𑀦𑀼𑀧𑀮𑀺𑀢𑁆𑀢𑀲𑁆𑀲.

𑀆𑀳𑀼𑀦𑁂𑀬𑁆𑀬𑀲𑁆𑀲 𑀬𑀓𑁆𑀔𑀲𑁆𑀲,

𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲 𑀅𑀢𑀼𑀮𑀲𑁆𑀲;

𑀫𑀳𑀢𑁄 𑀬𑀲𑀕𑁆𑀕𑀧𑀢𑁆𑀢𑀲𑁆𑀲,

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄 𑀳𑀫𑀲𑁆𑀫𑀺 𑁋

𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀮𑀺𑀬𑁂𑀲𑀼 𑀪𑀦𑁆𑀢𑁂 𑀳𑀮𑀺𑀤𑁆𑀤𑀯𑀲𑀦𑁂 𑀦𑀸𑀫 𑀓𑁄𑀮𑀺𑀬𑀸𑀦𑀁 𑀦𑀺𑀕𑀫𑁂 𑀧𑀼𑀡𑁆𑀡𑀜𑁆𑀘 𑀓𑁄𑀮𑀺𑀬𑀧𑀼𑀢𑁆𑀢𑀁 𑀕𑁄𑀯𑀢𑀺𑀓𑀁 𑀅𑀘𑁂𑀮𑀜𑁆𑀘 𑀲𑁂𑀦𑀺𑀬𑀁 𑀓𑀼𑀓𑁆𑀓𑀼𑀭𑀯𑀢𑀺𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀧𑀼𑀡𑁆𑀡𑁄 𑀪𑀦𑁆𑀢𑁂 𑀓𑁄𑀮𑀺𑀬 𑀧𑀼𑀢𑁆𑀢𑁄 𑀕𑁄𑀯𑀢𑀺𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀪𑀦𑁆𑀢𑁂 𑀅𑀘𑁂𑀮𑁄 𑀲𑁂𑀦𑀺𑀬𑁄 𑀓𑀼𑀓𑁆𑀓𑀼𑀭𑀯𑀢𑀺𑀓𑁄 𑀤𑀼𑀓𑁆𑀓𑀭𑀓𑀸𑀭𑀓𑁄 𑀙𑀫𑀸𑀦𑀺𑀓𑁆𑀔𑀺𑀢𑁆𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀢𑀁 𑀓𑀼𑀓𑁆𑀓𑀼𑀭𑀯𑀢𑀁 𑀤𑀻𑀖𑀭𑀢𑁆𑀢𑀁 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀫𑁂 𑀪𑀦𑁆𑀢𑁂 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀪𑀬𑁄 𑀪𑀦𑁆𑀢𑁂 𑀭𑀸𑀚𑀓𑀼𑀫𑀸𑀭𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀪𑀸𑀲𑁂𑀬𑁆𑀬 𑀦𑀼 𑀔𑁄 𑀪𑀦𑁆𑀢𑁂 𑀢𑀣𑀸𑀕𑀢𑁄 𑀢𑀁 𑀯𑀸𑀘𑀁, 𑀬𑀸 𑀲𑀸 𑀯𑀸𑀘𑀸 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀉𑀤𑀸𑀬𑀺𑀁 𑀧𑀜𑁆𑀘𑀓𑀗𑁆𑀕𑀜𑁆𑀘 𑀣𑀧𑀢𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀧𑀜𑁆𑀘𑀓𑀗𑁆𑀕𑁄 𑀪𑀦𑁆𑀢𑁂 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑁂𑀤𑀦𑀁 𑀧𑀼𑀘𑁆𑀙𑀺, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀤𑀸𑀬𑀻 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀏𑀢𑀤𑀯𑁄𑀘 ‘‘𑀢𑀺𑀲𑁆𑀲𑁄 𑀔𑁄 𑀣𑀧𑀢𑀺 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀦𑁆𑀢𑁂 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 ‘‘𑀦 𑀔𑁄 𑀪𑀦𑁆𑀢𑁂 𑀉𑀤𑀸𑀬𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀬𑀸𑀬𑀁 𑀪𑀦𑁆𑀢𑁂 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺. 𑀦𑁂𑀯 𑀅𑀲𑀓𑁆𑀔𑀺 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀜𑁆𑀘𑀓𑀗𑁆𑀕𑀁 𑀣𑀧𑀢𑀺𑀁 𑀲𑀜𑁆𑀜𑀸𑀧𑁂𑀢𑀼𑀁, 𑀦 𑀧𑀦 𑀅𑀲𑀓𑁆𑀔𑀺 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀲𑀜𑁆𑀜𑀸𑀧𑁂𑀢𑀼𑀁. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀧𑀜𑁆𑀘𑀓𑀗𑁆𑀕𑁂𑀦 𑀣𑀧𑀢𑀺𑀦𑀸 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁, 𑀅𑀣 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀧𑀜𑁆𑀘𑀓𑀗𑁆𑀕𑁂𑀦 𑀣𑀧𑀢𑀺𑀦𑀸 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀅𑀧𑀡𑁆𑀡𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀅𑀧𑀡𑁆𑀡𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀲𑀸𑀮𑀸𑀬𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀸𑀮𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀸𑀮𑁂𑀬𑁆𑀬𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀧𑀝𑀺𑀕𑁆𑀕𑀡𑁆𑀳𑀸𑀧𑁂𑀲𑀼𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀢𑁂 𑀧𑀦 𑀪𑀦𑁆𑀢𑁂 𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀏𑀓𑀤𑀺𑀝𑁆𑀞𑀺𑀬𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀭 𑀆𑀯𑀼𑀲𑁄 𑀪𑀕𑀯𑀢𑀸 𑀧𑀞𑀫𑀁 𑀫𑀺𑀘𑁆𑀙𑀸𑀯𑀸𑀤𑁄 𑀘 𑀲𑀫𑁆𑀫𑀸𑀯𑀸𑀤𑁄 𑀘 𑀓𑀣𑀁 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀭 𑀪𑀦𑁆𑀢𑁂 𑀪𑀕𑀯𑀢𑀸 ‘‘𑀲𑀦𑁆𑀢𑀺 𑀕𑀳𑀧𑀢𑀬𑁄 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀬𑀺𑀝𑁆𑀞𑀁 𑀦𑀢𑁆𑀣𑀺 𑀳𑀼𑀢𑀁 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀞𑀫𑀁 𑀫𑀺𑀘𑁆𑀙𑀸𑀯𑀸𑀤𑁄 𑀘 𑀲𑀫𑁆𑀫𑀸𑀯𑀸𑀤𑁄 𑀘 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀢𑀢𑁆𑀣 𑀆𑀯𑀼𑀲𑁄 𑀪𑀕𑀯𑀢𑀸 𑀫𑀺𑀘𑁆𑀙𑀸𑀯𑀸𑀤𑀻𑀦𑀜𑁆𑀘 𑀤𑁄𑀲𑁄 𑀲𑀫𑁆𑀫𑀸𑀯𑀸𑀤𑀻𑀦𑀜𑁆𑀘 𑀕𑀼𑀡𑁄 𑀓𑀣𑀁 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣 𑀪𑀦𑁆𑀢𑁂 𑀪𑀕𑀯𑀢𑀸 ‘‘𑀢𑀢𑁆𑀭 𑀕𑀳𑀧𑀢𑀬𑁄 𑀬𑁂𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀬𑀺𑀝𑁆𑀞𑀁 𑀦𑀢𑁆𑀣𑀺 𑀳𑀼𑀢𑀁 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀫𑀺𑀘𑁆𑀙𑀸𑀯𑀸𑀤𑀻𑀦𑀜𑁆𑀘 𑀤𑁄𑀲𑁄 𑀲𑀫𑁆𑀫𑀸𑀯𑀸𑀤𑀻𑀦𑀜𑁆𑀘 𑀕𑀼𑀡𑁄 𑀪𑀕𑀯𑀢𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀪𑀕𑀯𑀢𑀸 𑀯𑀺𑀜𑁆𑀜𑀼𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀲𑀜𑁆𑀘𑀺𑀓𑁆𑀔𑀡𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀭 𑀕𑀳𑀧𑀢𑀬𑁄 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀯𑀺𑀜𑁆𑀜𑀼𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀲𑀜𑁆𑀘𑀺𑀓𑁆𑀔𑀡𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀪𑀕𑀯𑀢𑀸 𑀅𑀜𑁆𑀜𑁂𑀲𑀼𑀧𑀺 𑀫𑀺𑀘𑁆𑀙𑀸𑀯𑀸𑀤𑀲𑀫𑁆𑀫𑀸𑀯𑀸𑀤𑁂𑀲𑀼 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑀸, 𑀢𑀁 𑀲𑀗𑁆𑀔𑁂𑀧𑀢𑁄 𑀓𑀣𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑀣𑁂𑀯 𑀪𑀦𑁆𑀢𑁂 𑀧𑀞𑀫𑁂 𑀯𑀸𑀤𑁂, 𑀏𑀯𑀫𑁂𑀯 𑀔𑁄 𑀪𑀦𑁆𑀢𑁂 𑀅𑀓𑀺𑀭𑀺𑀬𑀯𑀸𑀤𑀸𑀤𑀻𑀲𑀼 𑀘𑀢𑀽𑀲𑀼 𑀘 𑀫𑀺𑀘𑁆𑀙𑀸𑀯𑀸𑀤𑁂𑀲𑀼 𑀤𑁄𑀲𑀁 𑀓𑀺𑀭𑀺𑀬𑀯𑀸𑀤𑀸𑀤𑀻𑀲𑀼 𑀘 𑀘𑀢𑀽𑀲𑀼 𑀲𑀫𑁆𑀫𑀸𑀯𑀸𑀤𑁂𑀲𑀼 𑀕𑀼𑀡𑀁, 𑀢𑀢𑁆𑀣 𑀘 𑀯𑀺𑀜𑁆𑀜𑀼𑀦𑁄 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑀜𑁆𑀘𑀺𑀓𑁆𑀔𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀢𑀸 𑀅𑀧𑀡𑁆𑀡𑀓𑀧𑀝𑀺𑀧𑀤𑀸 𑀧𑀓𑀸𑀲𑀺𑀢𑀸.

𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀭𑀸𑀳𑀼𑀮𑁄 𑀪𑀕𑀯𑀢𑁄 𑀘𑁂𑀯 𑀅𑀢𑁆𑀢𑀦𑁄 𑀘 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑁆𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀲𑁆𑀫𑀺𑀁𑀬𑁂𑀯 𑀪𑀦𑁆𑀢𑁂 𑀲𑀸𑀯𑀢𑁆𑀣𑀺𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀪𑀤𑁆𑀤𑀸𑀮𑀺𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀪𑀤𑁆𑀤𑀸𑀮𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀪𑀤𑁆𑀤𑀸𑀮𑀺 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀸𑀧𑀺𑀬𑀫𑀸𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀺𑀓𑁆𑀔𑀁 𑀲𑀫𑀸𑀤𑀺𑀬𑀫𑀸𑀦𑁂 𑀅𑀦𑀼𑀲𑁆𑀲𑀸𑀳𑀁 𑀧𑀯𑁂𑀤𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄𑀳𑀁 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀸𑀧𑀺𑀬𑀫𑀸𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀺𑀓𑁆𑀔𑀁 𑀲𑀫𑀸𑀤𑀺𑀬𑀫𑀸𑀦𑁂 𑀅𑀦𑀼𑀲𑁆𑀲𑀸𑀳𑀁 𑀧𑀯𑁂𑀤𑁂𑀲𑀺𑀁, 𑀢𑀲𑁆𑀲 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬 𑁋

𑀧𑀼𑀘𑁆𑀙𑀸 𑁋 𑀅𑀣 𑀔𑁄 𑀆𑀯𑀼𑀲𑁄 𑀆𑀬𑀲𑁆𑀫𑀸 𑀪𑀤𑁆𑀤𑀸𑀮𑀺 𑀪𑀕𑀯𑀦𑁆𑀢𑀁 𑀓𑀻𑀤𑀺𑀲𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀓𑀣𑀜𑁆𑀘𑀲𑁆𑀲 𑀪𑀕𑀯𑀸 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀣 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀪𑀤𑁆𑀤𑀸𑀮𑀺 ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑀁 𑀪𑀺𑀓𑁆𑀔𑀼𑀁 𑀧𑀲𑀬𑀼 𑀧𑀲𑀬𑀼 𑀓𑀸𑀭𑀡𑀁 𑀓𑀭𑁄𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀇𑀥 𑀪𑀤𑁆𑀤𑀸𑀮𑀺 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀆𑀧𑀢𑁆𑀢𑀺𑀩𑀳𑀼𑀮𑁄’’ 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑁄 𑀪𑀤𑁆𑀤𑀸𑀮𑀺𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀲𑀺.

𑀧𑀼𑀘𑁆𑀙𑀸 𑁋 𑀢𑀤𑀸𑀧𑀺 𑀔𑁄 𑀆𑀯𑀼𑀲𑁄 𑀆𑀬𑀲𑁆𑀫𑀸 𑀪𑀤𑁆𑀤𑀸𑀮𑀺 𑀧𑀼𑀦𑀧𑀺 𑀪𑀕𑀯𑀦𑁆𑀢𑀁 𑀓𑀻𑀤𑀺𑀲𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀓𑀣𑀜𑁆𑀘𑀲𑁆𑀲 𑀪𑀕𑀯𑀸 𑀢𑀫𑁆𑀧𑀺 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀤𑀸𑀧𑀺 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀪𑀤𑁆𑀤𑀸𑀮𑀺 ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀧𑀼𑀩𑁆𑀩𑁂 𑀅𑀧𑁆𑀧𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀳𑁂𑀲𑀼𑀁, 𑀩𑀳𑀼𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀟𑀳𑀺𑀁𑀲𑀼. 𑀓𑁄 𑀧𑀦 𑀪𑀦𑁆𑀢𑁂 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀏𑀢𑀭𑀳𑀺 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑁄𑀦𑁆𑀢𑀺 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀟𑀳𑀦𑁆𑀢𑀻’’𑀢𑀺 𑀪𑀕𑀯𑀦𑁆𑀢𑀁 𑀧𑀼𑀦𑀧𑀺 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀏𑀯𑀫𑁂𑀢𑀁 𑀪𑀤𑁆𑀤𑀸𑀮𑀺 𑀳𑁄𑀢𑀺, 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀼 𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀩𑀳𑀼𑀢𑀭𑀸𑀦𑀺 𑀳𑁄𑀦𑁆𑀢𑀺 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀟𑀳𑀦𑁆𑀢𑀻’’𑀢𑀺, 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑁄 𑀪𑀤𑁆𑀤𑀸𑀮𑀺𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀢𑀸.

𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀪𑀦𑁆𑀢𑁂 𑀆𑀧𑀡𑁂 𑀦𑀸𑀫 𑀅𑀗𑁆𑀕𑀼𑀢𑁆𑀢𑀭𑀸𑀧𑀸𑀦𑀁 𑀦𑀺𑀕𑀫𑁂 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀤𑀸𑀬𑀻 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀇𑀥 𑀫𑀬𑁆𑀳𑀁 𑀪𑀦𑁆𑀢𑁂 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀩𑀳𑀽𑀦𑀁 𑀯𑀢 𑀦𑁄 𑀪𑀕𑀯𑀸 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀅𑀧𑀳𑀢𑁆𑀢𑀸, 𑀩𑀳𑀽𑀦𑀁 𑀯𑀢 𑀦𑁄 𑀪𑀕𑀯𑀸 𑀲𑀼𑀔𑀥𑀫𑁆𑀫𑀸𑀦𑀁 𑀉𑀧𑀳𑀢𑁆𑀢𑀸, 𑀩𑀳𑀽𑀦𑀁 𑀯𑀢 𑀦𑁄 𑀪𑀕𑀯𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑀳𑀢𑁆𑀢𑀸, 𑀩𑀳𑀽𑀦𑀁 𑀯𑀢 𑀦𑁄 𑀪𑀕𑀯𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀳𑀢𑁆𑀢𑀸’𑀢𑀺’’. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀣 𑀔𑁄 𑀆𑀯𑀼𑀲𑁄 𑀪𑀕𑀯𑀸 𑀓𑀻𑀤𑀺𑀲𑀻 𑀉𑀧𑀫𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀅𑀤𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀣 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀮𑀝𑀼𑀓𑀺𑀓𑁄𑀧𑀫𑀁 𑀳𑀢𑁆𑀣𑀺𑀦𑀸𑀕𑁄𑀧𑀫𑀁 𑀤𑀮𑀺𑀤𑁆𑀤𑀧𑀼𑀭𑀺𑀲𑁄𑀧𑀫𑀁 𑀕𑀳𑀧𑀢𑀺𑀓𑁄𑀧𑀫𑀦𑁆𑀢𑀺 𑀘𑀢𑀲𑁆𑀲𑁄 𑀉𑀧𑀫𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀫𑀤𑀸𑀲𑀺.

𑀧𑀼𑀘𑁆𑀙𑀸 𑁋 𑀏𑀯𑀜𑁆𑀘𑀸𑀯𑀼𑀲𑁄 𑀪𑀕𑀯𑀸 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀓𑀣𑀁 𑀉𑀢𑁆𑀢𑀭𑀺 𑀥𑀫𑁆𑀫𑀤𑁂𑀲𑀦𑀁 𑀧𑀯𑀟𑁆𑀠𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑁂 𑀉𑀤𑀸𑀬𑀺 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀉𑀢𑁆𑀢𑀭𑀺 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀧𑀯𑀟𑁆𑀠𑁂𑀲𑀺.

𑀘𑀸𑀢𑀼𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀘𑀸𑀢𑀼𑀫𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀸𑀢𑀼𑀫𑀸𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑀸𑀦𑀺 𑀪𑀦𑁆𑀢𑁂 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀘𑀸𑀢𑀼𑀫𑀁 𑀅𑀦𑀼𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀦𑁂𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀫𑀸𑀦𑀸 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀸𑀧𑀬𑀫𑀸𑀦𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀲𑀸𑀫𑀬𑀫𑀸𑀦𑀸 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀅𑀤𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀪𑀬𑀸𑀦𑀺 𑀉𑀤𑀓𑁄𑀭𑁄𑀳𑀦𑁆𑀢𑁂 𑀧𑀸𑀢𑀺𑀓𑀗𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀅𑀤𑀸𑀲𑀺.

𑀦𑀴𑀓𑀧𑀸𑀦𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀦𑀴𑀓𑀧𑀸𑀦𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀴𑀓𑀧𑀸𑀦𑁂 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀧𑁆𑀧𑀫𑀼𑀔𑁂 𑀲𑀫𑁆𑀩𑀳𑀼𑀮𑁂 𑀅𑀪𑀺𑀜𑁆𑀜𑀸𑀢𑁂 𑀅𑀪𑀺𑀜𑁆𑀜𑀸𑀢𑁂 𑀓𑀼𑀮𑀧𑀼𑀢𑁆𑀢𑁂 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀕𑁄𑀮𑀺𑀬𑀸𑀦𑀺𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀕𑁄𑀮𑀺𑀬𑀸𑀦𑀺 𑀆𑀭𑀜𑁆𑀜𑀺𑀓𑁄 𑀧𑀤𑀲𑀫𑀸𑀘𑀸𑀭𑁄 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀸𑀲𑀻𑀲𑀼 𑀪𑀦𑁆𑀢𑁂 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀓𑀸𑀲𑀻𑀦𑀁 𑀦𑀺𑀕𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 ‘‘𑀫𑀬𑀁 𑀔𑁄 𑀆𑀯𑀼𑀲𑁄 𑀲𑀸𑀬𑀜𑁆𑀘𑁂𑀯 𑀪𑀼𑀜𑁆𑀚𑀸𑀫 𑀧𑀸𑀢𑁄 𑀘 𑀤𑀺𑀯𑀸 𑀘 𑀯𑀺𑀓𑀸𑀮𑁂, 𑀢𑁂 𑀫𑀬𑀁 𑀲𑀸𑀬𑀜𑁆𑀘𑁂𑀯 𑀪𑀼𑀜𑁆𑀚𑀫𑀸𑀦𑀸 𑀧𑀸𑀢𑁄 𑀘 𑀤𑀺𑀯𑀸 𑀘 𑀯𑀺𑀓𑀸𑀮𑁂 𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀸𑀫 𑀅𑀧𑁆𑀧𑀸𑀢𑀗𑁆𑀓𑀢𑀜𑁆𑀘 𑀮𑀳𑀼𑀝𑁆𑀞𑀸𑀦𑀜𑁆𑀘 𑀩𑀮𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀜𑁆𑀘, 𑀢𑁂 𑀫𑀬𑀁 𑀓𑀺𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀺𑀲𑁆𑀲𑀸𑀫, 𑀲𑀸𑀬𑀜𑁆𑀘𑁂𑀯 𑀫𑀬𑀁 𑀪𑀼𑀜𑁆𑀚𑀺𑀲𑁆𑀲𑀸𑀫 𑀧𑀸𑀢𑁄 𑀘 𑀤𑀺𑀯𑀸 𑀘 𑀯𑀺𑀓𑀸𑀮𑁂’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀯𑀘𑁆𑀙𑀕𑁄𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀼𑀢𑀁 𑀫𑁂 𑀪𑀦𑁆𑀢𑁂 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺. 𑀬𑁂 𑀢𑁂 𑀪𑀦𑁆𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺. 𑀓𑀘𑁆𑀘𑀺 𑀢𑁂 𑀪𑀦𑁆𑀢𑁂 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀪𑀸𑀲𑀺𑀢𑀁. 𑀯𑀘𑁆𑀙𑀕𑁄𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑁄 𑀕𑁄𑀢𑀫 ‘𑀲𑀲𑁆𑀲𑀢𑁄 𑀮𑁄𑀓𑁄 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺 𑀪𑀯𑀁 𑀕𑁄𑀢𑀫𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀫𑀳𑀸𑀯𑀘𑁆𑀙𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑀁𑀬𑁂𑀯 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀯𑀘𑁆𑀙𑀕𑁄𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀤𑀻𑀖𑀭𑀢𑁆𑀢𑀸𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀳𑀓𑀣𑀻, 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑀁𑀔𑀺𑀢𑁆𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀁 𑀤𑁂𑀲𑁂𑀢𑀽’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀏𑀯𑀁 𑀯𑀼𑀢𑁆𑀢𑁂 𑀔𑁄 𑀆𑀯𑀼𑀲𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀁 𑀅𑀓𑀸𑀲𑀺, 𑀓𑀣𑀜𑁆𑀘𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀯𑀼𑀢𑁆𑀢𑁂 𑀪𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀲𑀘𑁂 𑀳𑀺 𑀪𑁄 𑀕𑁄𑀢𑀫 𑀇𑀫𑀁 𑀥𑀫𑁆𑀫𑀁 𑀪𑀯𑀁𑀬𑁂𑀯 𑀕𑁄𑀢𑀫𑁄 𑀆𑀭𑀸𑀥𑀓𑁄 𑀅𑀪𑀯𑀺𑀲𑁆𑀲, 𑀦𑁄 𑀘 𑀔𑁄 𑀪𑀺𑀓𑁆𑀔𑀽 𑀆𑀭𑀸𑀥𑀓𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀏𑀯𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀧𑀭𑀺𑀧𑀽𑀭𑀁 𑀅𑀪𑀯𑀺𑀲𑁆𑀲 𑀢𑁂𑀦𑀗𑁆𑀕𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀬𑀸𑀯 𑀅𑀭𑀳𑀢𑁆𑀢𑀜𑁆𑀘𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀤𑀻𑀖𑀦𑀔𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀤𑀻𑀖𑀦𑀔𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀤𑀻𑀖𑀦𑀔𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀤𑀻𑀖𑀦𑀔𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀅𑀳𑀜𑁆𑀳𑀺 𑀪𑁄 𑀕𑁄𑀢𑀫 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 𑀘 𑀧𑀦𑀸𑀯𑀼𑀲𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀓𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀪𑀦𑁆𑀢𑁂 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺, 𑀤𑀻𑀖𑀦𑀔𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀼𑀭𑀽𑀲𑀼 𑀪𑀦𑁆𑀢𑁂 𑀓𑀫𑁆𑀫𑀸𑀲𑀥𑀫𑁆𑀫𑁂 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁂 𑀪𑀸𑀭𑀤𑁆𑀯𑀸𑀚 𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀕𑁆𑀬𑀸𑀕𑀸𑀭𑁂 𑀢𑀺𑀡𑀲𑀦𑁆𑀣𑀸𑀭𑀓𑁂 𑀫𑀸𑀕𑀡𑁆𑀟𑀺𑀬𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀫𑀸𑀕𑀡𑁆𑀟𑀺𑀬𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 ‘‘𑀪𑀽𑀦𑀳𑀼 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀤𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀝𑁆𑀞𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀪𑀕𑀯𑀸 𑀢𑀢𑁆𑀣 𑀫𑀸𑀕𑀡𑁆𑀟𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀘𑀓𑁆𑀔𑀼𑀁 𑀔𑁄 𑀫𑀸𑀕𑀡𑁆𑀟𑀺𑀬 𑀭𑀽𑀧𑀸𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢𑀁, 𑀢𑀁 𑀢𑀣𑀸𑀕𑀢𑀲𑁆𑀲 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀲𑀁𑀯𑀼𑀢𑀁, 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀸 𑀫𑀸𑀕𑀡𑁆𑀟𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀧𑀼𑀘𑁆𑀙𑀸 𑁋 𑀏𑀯𑀁 𑀔𑁄 𑀆𑀯𑀼𑀲𑁄 𑀫𑀸𑀕𑀡𑁆𑀟𑀺𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 ‘‘𑀦𑀓𑀺𑀜𑁆𑀘𑀺 𑀪𑁄 𑀕𑁄𑀢𑀫𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀲𑁆𑀲𑀼𑀢𑁂 𑀓𑀣𑀁 𑀪𑀕𑀯𑀸 𑀅𑀢𑁆𑀢𑀦𑁄𑀧𑀺 𑀦 𑀓𑀺𑀜𑁆𑀘𑀺 𑀓𑁂𑀦𑀘𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀧𑀓𑀸𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀔𑁄 𑀪𑀦𑁆𑀢𑁂 𑀫𑀸𑀕𑀡𑁆𑀟𑀺𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀦𑀓𑀺𑀜𑁆𑀘𑀺 𑀪𑁄𑀕𑁄𑀢𑀫𑀸𑀢𑀺 𑀬𑀣𑀸𑀪𑀽𑀢𑀁 𑀧𑀝𑀺𑀲𑁆𑀲𑀼𑀢𑁂 ‘‘𑀅𑀳𑀁 𑀔𑁄 𑀧𑀦 𑀫𑀸𑀕𑀡𑁆𑀟𑀺𑀬 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄 𑀲𑀫𑀸𑀦𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀲𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀳𑀺 𑀭𑀽𑀧𑁂𑀳𑀺 𑀇𑀝𑁆𑀞𑁂𑀳𑀺 𑀫𑀦𑀸𑀧𑁂𑀳𑀺 𑀧𑀺𑀬𑀭𑀽𑀧𑁂𑀳𑀺 𑀓𑀸𑀫𑀽𑀧𑀲𑀁𑀳𑀺𑀢𑁂𑀳𑀺 𑀭𑀚𑀦𑀻𑀬𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀸 𑀅𑀢𑁆𑀢𑀦𑁄𑀧𑀺 𑀦 𑀓𑀺𑀜𑁆𑀘𑀺 𑀓𑁂𑀦𑀘𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀧𑀓𑀸𑀲𑁂𑀲𑀺.

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀭𑀺𑀬𑁄𑀲𑀸𑀦𑀧𑀼𑀘𑁆𑀙𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀇𑀫𑀜𑁆𑀘 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀸𑀕𑀡𑁆𑀟𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀁 𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀸𑀕𑀡𑁆𑀟𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 ‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀲𑀦𑁆𑀤𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀲𑀦𑁆𑀤𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀲𑀦𑁆𑀤𑀓𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁. 𑀲𑀦𑁆𑀤𑀓𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼𑀯𑀢 𑀪𑀯𑀦𑁆𑀢𑀁𑀬𑁂𑀯 𑀆𑀦𑀦𑁆𑀤𑀁 𑀧𑀝𑀺𑀪𑀸𑀢𑀼 𑀲𑀓𑁂 𑀆𑀘𑀭𑀺𑀬 𑀓𑁂 𑀥𑀫𑁆𑀫𑀺𑀓𑀣𑀸’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀲𑀦𑁆𑀤𑀓 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀏𑀯𑀁𑀯𑀸𑀤𑀻 𑀳𑁄𑀢𑀺 𑀏𑀯𑀁𑀤𑀺𑀝𑁆𑀞𑀺 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀘𑀢𑁆𑀢𑀸𑀭𑁄 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀅𑀦𑀲𑁆𑀲𑀸𑀲𑀺𑀓𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀯𑀺𑀘𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀲𑀦𑁆𑀤𑀓 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀘𑀢𑁆𑀢𑀸𑀭𑀺 𑀅𑀦𑀲𑁆𑀲𑀸𑀲𑀺𑀓𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑀸𑀦𑀺.

𑀧𑀼𑀘𑁆𑀙𑀸 𑁋 𑀅𑀣

𑀔𑁄 𑀆𑀯𑀼𑀲𑁄 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀓𑀣𑀁 𑀧𑀼𑀘𑁆𑀙𑀺, 𑀢𑀣𑀜𑁆𑀘𑀲𑁆𑀲𑀸𑀬𑀲𑁆𑀫𑀸𑀦𑀦𑁆𑀤𑀢𑁆𑀣𑁂𑀭𑁄 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀣 𑀔𑁄 𑀪𑀦𑁆𑀢𑁂 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀲𑁄 𑀧𑀦 𑀪𑁄 𑀆𑀦𑀦𑁆𑀤 𑀲𑀢𑁆𑀣𑀸 𑀓𑀺𑀁𑀯𑀸𑀤𑀻 𑀓𑀺𑀁 𑀅𑀓𑁆𑀔𑀸𑀬𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀼𑀘𑁆𑀙𑀺, 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀇𑀥 𑀲𑀦𑁆𑀤𑀓 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀦𑁆𑀤𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀲𑀺.

𑀧𑀼𑀘𑁆𑀙𑀸 𑁋 𑀇𑀫𑀜𑁆𑀘 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀜𑁆𑀘 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀅𑀘𑁆𑀙𑀭𑀺𑀬𑀁 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁 𑀪𑁄 𑀆𑀦𑀦𑁆𑀤, 𑀦 𑀘 𑀦𑀸𑀫 𑀲𑀥𑀫𑁆𑀫𑁄𑀓𑁆𑀓𑀁𑀲𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀧𑀭𑀥𑀫𑁆𑀫𑀯𑀫𑁆𑀪𑀦𑀸, 𑀆𑀬𑀢𑀦𑁂 𑀘 𑀥𑀫𑁆𑀫𑀤𑁂𑀲𑀦𑀸, 𑀢𑀸𑀯 𑀩𑀳𑀼𑀓𑀸 𑀘 𑀦𑀺𑀬𑁆𑀬𑀸𑀢𑀸𑀭𑁄 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀫𑀳𑀸𑀲𑀓𑀼𑀮𑀼𑀤𑀸𑀬𑀻𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.